ᒨᓯᓯ ᐂᑉᐸᖏᑦ 14 - ᐊᒡᓔᑦ ᐃᑦᔪᕐᖕᓁᑦᑐᑦᐃᓴᕆᐊᓕᒥᐅᑦ ᑕᕆᐅᕐᒥᒃ ᐊᐅᐸᕐᑐᒥᒃ ᐊᑎᓕᖕᒥᒃ ᐃᑳᕐᓯᓂᖓᑦ 1 ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ, 2 “ᐃᓴᕆᐊᓕᒥᐅᑦ ᐅᖃᐅᑎᒃᑭᑦ ᐅᑎᕐᓗᑎᒃ ᓯᓂᒃᑕᖁᓗᒋᑦ ᐰ-ᕼᐊᕼᐃᕋᑎᒥ, ᓄᓇᐅᑉ ᒥᒡᑐᓕᐅᑉ ᐃᒪᐅᓪᓗ ᐊᐅᐸᓗᒃᑕᒥᒃ ᐊᑎᓕᐅᑉ ᐊᑯᓐᓂᖓᓃᑦᑐᒥ, ᐰᓕ-ᔨᐸᓂᐅᑉ ᖃᓂᒋᔭᖓᓃᑦᑐᒧᑦ. 3 ᐊᖓᔪᖅᑳᕐᔪᐊᖅ ᐃᓱᒪᓕᕐᓂᐊᕐᒪᑦ ᐃᓴᕆᐊᓕᒥᐅᓂᒃ ᐊᕙᒻᒧᒃᑕᕋᓱᒋᒃᓕᓕᕐᓗᓂ ᓄᓇᒧᑦ ᓯᐅᕅᓐᓈᓗᖕᒧᑦ ᐊᖅᑯᑍᒍᑎᔭᐅᓯᒪᓂᕐᒧᑦ. 4 ᐱᔭᕐᓂᕈᓐᓃᕐᑎᓐᓂᐊᕋᒃᑯ, ᐃᓕᑦᓯᓐᓂᒡᓗ ᒪᓕᒃᓴᕐᓂᐊᕐᐳᖅ, ᓵᓚᖃᕐᓂᕋᓗ ᐊᖓᔪᖅᑳᕐᔪᐊᒥᒃ ᐅᓇᑕᕐᑐᒃᓴᖁᑎᖏᓐᓂᒡᓗ ᐅᐱᒋᔭᐅᑦᔪᑎᒋᓂᐊᕐᐸᕋ, ᑕᕝᕙ ᐄᑦᔨᑉᑎᒥᐅᑦ ᖃᐅᔨᓂᐊᕐᐳᑦ ᐊᑕᓂᐅᓂᓐᓂᒃ.” ᐃᓴᕆᐊᓕᒥᐅᓪᓗ ᐱᖁᔭᐅᓂᑎᒃ ᒪᓕᒡᓗᒍ ᐱᓂᐊᓚᐅᕐᐳᑦ. 5 ᐄᑦᔨᑉᑎᒥᐅᓪᓕ ᐊᖓᔪᖅᑳᕐᔪᐊᖓ ᐅᖃᐅᑎᔭᐅᒐᒥ ᐃᓴᕆᐊᓕᒥᐅᑦ ᕿᒫᓂᕋᕐᑕᐅᑎᓪᓗᒋᑦ, ᐊᖓᔪᖅᑳᖅᑯᑎᓂᓗ ᐃᓱᒪᒋᖅᑲᐅᔭᑎᒃ ᓴᖑᑎᒃᑭᕔᑦ ᐅᖃᓕᕐᓗᑎᒡᓗ, “ᖃᓄᖅ ᐱᓕᕐᐱᑖ, ᐃᓴᕆᐊᓕᒥᐅᑦ ᕿᒫᔪᓐᓇᕐᓯᑎᓐᓂᕐᐸᕗᑦ ᓯᐊᓛᕆᔪᓐᓃᕐᓗᑎᒍᓗ.” 6 ᐊᖓᔪᖅᑳᕐᔪᐊᓪᓕ ᐅᓇᑕᕆᐊᕐᓗᓂ ᐊᑐᕐᐸᒃᑕᓂ ᕿᒧᒃᓯᐅᑦ ᐊᒃᓴᓗᐊᓕᒃ ᐅᓇᑕᕐᑐᒃᓴᖁᑎᓂᓗ ᐊᑐᐃᓐᓇᕈᕐᑎᕐᐰᑦ. 7 ᐊᐅᓪᓚᕐᐳᓪᓗ ᕿᒧᒃᓯᐅᑎᓕᒫᓂ ᐊᑐᕐᓗᓂᒋᑦ ᕿᒧᒃᓯᐅᑎᓪᓗ 600 ᕿᒧᒃᓯᐅᑎᑦᓯᐊᕙᐅᓂᕐᐹᑦ ᐄᑦᔨᑉᑎᒥ ᐱᖃᓯᐅᑎᓪᓗᓂᒋᑦ ᐊᖓᔪᖅᑳᖁᑎᖏᓐᓄᑦ ᐊᐅᓚᑕᐅᓪᓗᑎᒃ. 8 ᐊᑕᓂᐅᓪᓗ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓ ᐱᔭᕐᓂᕈᓐᓃᕐᑎᓚᐅᕐᒪᒍ, ᐃᓴᕆᐊᓕᒥᐅᑦ ᒪᓕᒃᓴᕐᐰᑦ, ᑖᒃᑯᐊ ᖁᕕᐊᓱᒡᓗᑎᒃ ᐃᖏᕐᕋᓕᓚᐅᕐᑑᒐᓗᐊᑦ. 9 ᐄᑦᔨᑉᑎᒥᐅᓪᓕ ᐅᓇᑕᕐᑐᒃᓴᖁᑎᖏᑦ ᕿᒻᒥᕐᔪᐊᒥᖕᓄᑦ ᕿᒧᒃᓯᐅᑎᓄᓪᓗ ᐊᒃᓴᓗᐊᓕᖕᓄᑦ ᒪᓕᒃᑲᒥᒃ ᐊᓐᖑᑎᓕᕐᐳᑦ ᐃᓴᕆᐊᓕᒥᐅᑦ ᑕᖕᒫᕐᓯᒪᕕᒋᔭᖓᓐᓂ ᐃᒪᐅᑉ ᐊᐅᐸᓗᒃᑕᐅᑉ ᓴᓂᐊᓂ ᐰ-ᕼᐊᕼᐃᕋᑎᐅᑉ ᐰᓕ-ᔨᐸᓂᐅᑉ ᖃᓂᒋᔭᖓᓂ. 10 ᐃᓴᕆᐊᓕᒥᐅᓪᓕ ᑕᑯᓕᕋᒥᒃ ᐊᖓᔪᖅᑳᕐᔪᐊᒥᒃ ᐅᓇᑕᕐᑐᒃᓴᖁᑎᖏᓐᓂᒡᓗ ᐅᓇᑕᕆᐊᓕᕐᑐᓂᒃ, ᐄᑦᔨᑉᑎᒥᐅᑦ ᒪᓕᓕᕐᒪᑕ; ᑕᕝᕙ ᑲᑉᐱᐊᓱᕕᒡᔪᐊᓕᕐᐳᑦ ᐊᑕᓂᕐᒧᓪᓗ ᐃᓗᖏᕐᑐᕐᓗᑎᒃ ᓂᓪᓕᐊᓕᕐᐳᑦ ᐃᑲᔪᕐᑕᐅᔪᒪᓪᓗᑎᒃ. 11 ᒨᓯᓯᒧᓪᓗ ᐅᖃᕐᓗᑎᒃ, “ᐄᑦᔨᑉᑎᒥᐅᑦ ᓄᓇᖓᓐᓂ ᐃᓗᕕᕐᓯᕕᒃᓴᖃᖏᓐᓂᖓᓄᑦ ᒪᐅᖓ ᐃᓄᖃᖏᑦᑐᓕᐊᕈᑎᕕᑎᒎᑦ ᑐᖁᑕᐅᔭᕐᑐᖁᓪᓗᑖ? ᑕᒪᐅᓐᖓᐅᑦᔨᓚᐅᕐᓂᕐᓄᑦ ᑕᑯᒋᑦ ᐃᒤᑦᑑᒦᓕᕐᐳᒍᑦ! 12 ᐅᖃᐅᑦᔨᓚᐅᓐᖏᓚᒎᑦ ᐃᓕᖕᓂᒃ ᐊᐅᓪᓚᓚᐅᖅᑳᕋᑕ ᓱᓕ ᐄᑦᔨᑉᑎᒥᑦ ᐃᒤᑦᑐᒧᑦ ᑎᑭᑐᐃᓐᓇᕆᐊᖃᕐᓂᕋᕐᓗᑖ? ᐃᓕᖕᓄᑦ ᑲᒪᒋᔭᐅᔪᒪᓇᑕ ᐅᖃᓚᐅᕋᓗᐊᕐᐳᒍᑦ ᐄᑦᔨᑉᑎᒥᐅᓄᑦ ᓯᐊᓛᕆᔭᐅᖏᓐᓇᖔᕈᒪᓪᓗᑕ. ᓯᐊᓛᕆᔭᐅᒐᓗᐊᕐᓗᑕ ᐱᐅᓂᕐᓴᐅᓚᐅᕐᒪᑦ ᑍᑲᓂ, ᒫᓂ ᐃᓄᖃᖏᑦᑐᒥ ᑐᖁᑐᐃᓐᓇᕋᔭᕐᓂᑦᑎᓐᓂᑦ.” 13 ᒨᓯᓯᐅᑉ ᑭᐅᕔᑦ, “ᑲᑉᐱᐊᓱᖏᓪᓗᓯ ᓱᕐᕋᒃᑍᓕᒋᑦᓯ ᑕᑯᓂᐊᕐᐳᓯ ᐊᑕᓂᐅᑉ ᓴᐳᑦᔨᓂᖓᓂᒃ ᐃᓕᑦᓯᓐᓂᒃ ᐅᓪᓗᒥ. ᑖᒃᑯᐊ ᐄᑦᔨᑉᑎᒥᐅᑦ ᑕᑯᒃᑲᓐᓂᕈᓐᓇᕐᓂᐊᓐᖏᓚᓯ. 14 ᐊᑕᓂᐅᑉ ᐅᓇᑕᖔᕐᓂᐊᕐᒪᒋᑦ ᐊᑭᕋᓯ, ᐃᓕᑦᓯᓕ ᓱᓇᒥᒃ ᐱᓇᓱᐊᕆᐊᖃᓐᖏᓚᓯᓘᓐᓃᑦ.” 15 ᐊᑕᓂᕐᓗ ᒨᓯᓯᒧᑦ ᐅᖃᕐᐳᖅ, “ᓱᖕᒪᑦ ᐃᓗᖏᕐᑐᕐᓗᓯ ᕿᓄᕕᓰ ᐃᑲᔪᕐᑕᐅᔪᒪᓪᓗᓯ? ᐃᓴᕆᐊᓕᒥᐅᑦ ᓯᕗᒧᑦ ᐃᖏᕐᕋᖁᓕᒃᑭᑦ. 16 ᐊᔭᐅᑉᐱᐊᑦ ᐃᓴᐅᑎᒍᒃ ᐃᒪᐅᑉ ᖁᓛᓄᑦ ᓄᖅᑲᖓᑎᓪᓗᒍᓗ. ᐃᒪᖅ ᑕᕝᕙ ᐊᕕᖕᓂᐊᕐᐳᖅ, ᐃᓴᕆᐊᓕᒥᐅᓪᓗ ᐃᒪᐅᖅᑲᐅᔪᒃᑰᕈᓐᓇᕐᓂᐊᕐᐳᑦ ᐸᓂᑦᓯᐊᕐᑐᒃᑯᑦ. 17 ᐄᑦᔨᑉᑎᒥᐅᓪᓗ ᐆᒻᒪᑎᖏᑦ ᓯᑎᔫᑎᓐᓂᐊᕐᐸᒃᑲ ᒪᓕᒃᓴᕐᓂᐊᕐᐳᓪᓗ ᑖᒃᑯᓂᖓ. ᐅᐱᒋᔭᐅᑦᔪᑎᑖᕐᓂᐊᕐᐳᖓᓗ ᓵᓚᖃᕐᓂᓐᓂᒃ ᐊᖓᔪᖅᑳᕐᔪᐊᒥᒃ, ᐅᓇᑕᕐᑐᒃᓴᖁᑎᖏᓐᓂᒡᓗ, ᕿᒧᒃᓯᐅᑎᖁᑎᖏᓐᓃᑦᑐᓕᒫᓂᒃ. 18 ᐄᑦᔨᑉᑎᒥᐅᓪᓗ ᓵᓚᒋᒍᒃᑭᑦ ᖃᐅᔨᓂᐊᕐᐳᑦ ᐊᑕᓂᐅᓂᓐᓂᒃ.” 19 ᒎᑎᐅᓪᓗ ᐂᖏᓕᖓ ᐃᓴᕆᐊᓕᒥᐅᑦ ᐅᓇᑕᕐᑐᒃᓴᖁᑎᖏᑕ ᓯᕗᓂᖓᓃᑉᐸᒃᑐᖅ ᓅᑉᐳᖅ ᑭᖑᓂᖔᖓᓄᐊᕐᓗᓂ, ᓄᕗᔭᓗ ᖁᒻᒧᑦ ᑕᑭᑦᑐᑯᑖᒃ ᓅᒃᑭᕗᖅ, 20 ᓄᖅᑲᕐᓗᓂᓗ ᐃᓴᕆᐊᓕᒥᐅᑦ ᐄᑦᔨᑉᑎᒥᐅᓪᓗ ᐊᑯᓐᓂᖓᓄᑦ, ᑖᓐᓇᓗ ᓄᕗᔮᓗᒃ ᑖᕐᓯᐅᕐᑎᑦᓯᓕᕐᐳᖅ ᐄᑦᔨᑉᑎᒥᐅᓂᒃ, ᐃᓴᕆᐊᓕᒥᐅᓪᓕ ᖃᐅᒪᔪᕐᓯᐅᕐᑎᑉᐰᑦ, ᑍᒤᓐᓂᖓᓄᓪᓗ ᐅᓇᑕᕐᓂᐊᕐᑑᒐᓗᐊᑦ ᑲᑎᔪᓐᓇᓐᖏᑎᑕᐅᓕᕐᐳᑦ ᐅᓐᓄᐊᓕᒫᖅ. 21 ᒨᓯᓯᐅᓪᓗ ᑕᓕᓂ ᐃᓵᒃᐹ ᐃᒪᕐᒧᑦ, ᐊᑕᓂᐅᓪᓗ ᐃᒪᖅ ᐅᑎᕆᐊᕐᑎᑉᐹ ᐊᓄᕆᐊᓗᖕᒧᑦ ᓯᕿᓂᐅᑉ ᓄᐃᕕᐊᓂᓐᖔᕐᑐᒥᑦ, ᐅᓐᓄᐊᓕᒫᖅ ᐊᓄᕌᕐᑐᐊᓘᖕᒪᑦ ᐃᒪᖅ ᐊᕕᒃᐳᖅ ᑕᒪᓐᓇᓗ ᓄᓇ ᐸᓂᑦᓯᐊᕐᑑᓕᕐᓗᓂ. 22 ᐃᓴᕆᐊᓕᒥᐅᑦ ᐃᒪᐅᖅᑲᐅᔫᒐᓗᐊᒃᑯᑦ ᐃᑳᓕᕐᐳᑦ ᓴᓗᐊᖓᑦᓯᐊᕐᑐᒃᑰᕐᓗᑎᒃ. ᐃᒫᓗᒡᓗ ᐊᑭᓐᓇᓕᐅᑎᓯᒪᕗᖅ ᐊᕙᑖᑦᑎᒍᑦ ᐃᒡᓗᒃᑐᑦ. 23 ᐄᑦᔨᑉᑎᒥᐅᓪᓗ ᒪᓕᒃᓴᕐᐳᑦ ᐃᒪᐅᖅᑲᐅᔫᒐᓗᐊᒃᑯᑦ ᕿᒻᒥᕐᔪᐊᑎᒃ ᕿᒧᒃᓯᐅᑎᑎᒡᓗ ᐊᒃᓴᓗᐊᓖᑦ ᑕᒪᒃᑭᕐᓗᒋᑦ. 24 ᐅᓪᓗᕐᑖᕐᐸᓪᓕᐊᓕᕐᑎᓪᓗᒍᓗ ᐊᑕᓂᐅᑉ ᐄᑦᔨᑉᑎᒥᐅᑦ ᐅᓇᑕᕐᑐᒃᓴᖁᑎᖏᑦ ᑕᐅᑐᒃᐰᑦ ᓄᕗᔮᓗᖕᒥᑦ ᐃᑯᐊᓚᔪᒥᑦ ᐅᐃᒻᒪᒃᑎᑉᐰᓪᓗ. 25 ᕿᒧᒃᓯᐅᑎᖏᑕᓗ ᐊᒃᓴᓗᐊᖏᑦ ᐊᔪᕐᓯᑦᑕᕐᑎᓕᕐᐰᑦ ᐃᖏᕐᕋᑦᓯᐊᕈᓐᓃᕈᑎᒋᓪᓗᓂᑦᔪᒃ. ᐄᑦᔨᑉᑎᒥᐅᓪᓗ ᐅᖃᕐᐳᑦ, “ᐊᑕᓂᐅᑉ ᐃᓴᕆᐊᓕᒥᐅᑦ ᐅᓇᑕᐅᑎᓕᕐᐰᑦ ᐅᕙᑦᑎᓐᓂᒃ, ᐊᑏ ᕿᒫᖔᓕᕐᑕ ᑕᒫᓐᖓᑦ.” 26 ᐊᑕᓂᕐᓗ ᒨᓯᓯᒧᑦ ᐅᖃᕐᐳᖅ, “ᑕᓖᑦ ᐃᓵᒍᒃ ᐃᒪᐅᑉ ᖁᓛᓄᑦ, ᑕᕝᕙ ᐄᑦᔨᑉᑎᒥᐅᑦ ᕿᒧᒃᓯᐅᑎᖏᓪᓗ ᐅᑎᕆᐊᕐᕕᐅᓂᐊᕐᐳᑦ ᐃᒫᓄᑦ.” 27 ᐊᓱᐃᓛᒃ ᒨᓯᓯᐅᑉ ᑕᓕᓂ ᐃᓵᒃᐹ ᐃᒪᐅᑉ ᖁᓛᓄᑦ, ᖃᐅᒻᒪᓕᕐᑎᓪᓗᒍᓗ ᐃᒪᖅ ᐅᑎᕐᐳᖅ ᐃᓕᖅᑯᓯᕆᕙᒃᑕᒥᑐᑦ. ᐄᑦᔨᑉᑎᒥᐅᓪᓗ ᕿᒫᓇᓱᒃᑲᓗᐊᕐᑎᓪᓗᒋᑦ ᐃᒫᓂᑦ ᐊᑕᓂᐅᑉ ᐃᒫᓄᑦ ᐱᔭᐅᒃᑲᕐᐰᑦ. 28 ᐃᒫᓗᒃ ᐅᑎᕆᐊᕐᒪᑦ ᐄᑦᔨᑉᑎᒥᐅᑦ ᐅᓇᑕᕐᑐᒃᓴᖁᑎᖏᑦ ᕿᒧᒃᓯᐅᑎᓕᒫᑦᓯᐊᖏᓪᓗ ᐃᓴᕆᐊᓕᒥᐅᓂᒃ ᒪᓕᒃᑐᕕᓃᑦ ᐃᒫᓄᑦ ᐅᓕᒃᑕᐅᕗᑦ ᐊᑕᐅᓯᕐᒥᒡᓘᓐᓃᑦ ᐊᒥᐊᒃᑯᓇᑎᒃ. 29 ᐃᓴᕆᐊᓕᒥᐅᓪᓕ ᐱᓱᒃᐳᑦ ᓄᓇᒃᑯᑦ ᓴᓗᐊᒪᑦᓯᐊᕐᑐᒃᑯᑦ ᐃᒪᐅᑉ ᐃᓚᕕᓂᕋᓗᐊᖓᒍᑦ. ᐃᒫᓗᒡᓗ ᐊᑭᓐᓇᓕᐅᑎᓯᒪᓚᐅᕐᐳᖅ ᐃᒡᓗᒃᑐᑦ ᐊᕙᑖᓐᓂ. 30 ᐅᓪᓗᒥ ᑍᑦᓱᒪᓂ ᐊᑕᓂᐅᑉ ᐃᓴᕆᐊᓕᒥᐅᑦ ᐱᐅᓕᓚᐅᕐᐰᑦ ᐄᑦᔨᑉᑎᒥᐅᓂᑦ. ᐃᓴᕆᐊᓕᒥᐅᓪᓗ ᐄᑦᔨᑉᑎᒥᐅᕕᓂᕐᓂᒃ ᑐᖁᖓᓕᕐᑐᓂᒃ ᑕᑯᕗᑦ ᐃᒪᐅᑉ ᓯᓈᓂ. 31 ᐃᓴᕆᐊᓕᒥᐅᓪᓗ ᑕᑯᒐᒥᒃ ᐊᑕᓂᐅᑉ ᐱᔪᓐᓇᕐᓂᕐᔪᐊᒥᓄᑦ ᓵᓚᖃᕐᓂᖓ ᐄᑦᔨᑉᑎᒥᐅᓂᒃ, ᐊᑕᓂᖅ ᓯᕘᕋᒋᓕᕐᐹᑦ, ᐊᑕᓂᕐᓗ ᐅᒃᐱᕆᓪᓗᒍ ᐃᓅᓕᕐᐳᑦ, ᒨᓯᓯᓗᑦᑕᐅᖅ ᐊᑕᓂᐅᑉ ᐱᔨᒋᔭᖓ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society