ᒨᓯᓯ ᐂᑉᐸᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖓᔪᒃᓯᕐᐹᖁᑎᒋᔭᐅᔪᓂᒃ ᑐᓂᕐᕈᑎᖃᕐᓂᖅ

¹ ᐊᑕᓂᖅ ᐅᖃᕐᐳᖅ ᒨᓯᓯᒧᑦ,

² “ᐊᖑᑎᑦ ᐃᕐᓂᐊᖑᖅᑳᕐᓯᒪᔪᑦ ᑐᓂᔭᐅᔪᒃᓴᐅᕗᑦ ᐅᕙᓐᓄᑦ; ᐊᖑᑎᑦ ᐃᕐᓂᐊᖑᖅᑳᕐᓯᒪᔪᑦ ᐃᓴᕆᐊᓕᒥᐅᓂ ᐆᒪᔪᓂᓗ ᐊᖑᑎᑦ ᐃᕐᓂᐊᖑᖅᑳᕐᓯᒪᔪᑦ ᑕᒪᕐᒥᒃ ᐱᖁᑎᒋᕙᒃᑲ.”

ᓂᐊᖂᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᓇᓪᓕᐅᓐᓂᕐᓯᐅᕐᓂᖓᑦ

³ ᒨᓯᓯᓗ ᐅᖃᕐᐳᖅ ᐃᓄᖕᓄᑦ, “ᐅᓪᓗᖅ ᑖᓐᓇ ᐃᖅᑲᐅᒪᔭᐅᔪᒃᓴᐅᕗᖅ, ᑕᕝᕙᓂ ᐅᓪᓗᒥ ᐊᐅᓪᓚᕐᑎᑕᐅᓚᐅᕋᑦᓯ ᐄᑦᔨᑉᑎᒥᑦ, ᕿᓚᒃᓱᕐᑕᐅᓯᒪᕕᒋᔭᑦᓯᓐᓂᑦ ᐊᑕᓂᐅᑉ ᐱᔪᓐᓇᕐᓂᖓᓄᑦ ᑕᕝᕙᓐᖓᑦ ᐊᓂᑎᑕᐅᓚᐅᕋᑦᓯ; ᑍᒤᒻᒪᑦ ᑕᕝᕙᓂ ᓇᓪᓕᐅᓐᓂᕐᓯᐅᕐᑐᒃᓴᐅᕗᓯ ᐳᕙᓪᓚᕐᓴᐅᑎᖃᖏᑦᑐᒥᒃ ᓂᐊᖂᔭᒥᒃ ᓂᕆᓗᓯ.

⁴ ᑕᕝᕙᓂ ᐅᓪᓗᒥ ᐊᐅᓪᓚᓚᐅᕐᐳᓯ, ᑕᖅᑭᒥ ᐊᐱᑉᒥᒃ ᐊᑎᓕᖕᒥ.

⁵ ᐊᑕᓂᐅᑉ ᓱᓕᓪᓚᕆᒃᑐᒥᒃ ᐊᖏᕐᕕᒋᓯᒪᖕᒪᒋᑦ ᓯᕗᓕᕕᓂᓯ ᓄᓇᒥᒃ ᑕᒪᑐᒥᖓ ᑬᓇᓂᒥᐅᑦ ᓄᓇᖓᓂᒃ ᑐᓂᓯᕕᒋᔪᒪᓪᓗᒋᑦ, ᕼᐃᑍᑎᒥᐅᓪᓗ ᓄᓇᖓᓂᒃ, ᐊᒧᕅᑎᒥᐅᓪᓗ ᓄᓇᖓᓂᒃ, ᕼᐃᕔᑎᒥᐅᓪᓗ ᓄᓇᖓᓂᒃ, ᔨᐳᓮᑎᒥᐅᓪᓗ ᓄᓇᖓᓂᒃ, ᑕᒪᓐᓇ ᓄᓇ ᐱᕈᕐᑐᓂ ᐊᔪᕐᓴᕐᓇᖏᑦᓯᐊᕐᒪᑦ, ᑍᒤᒻᒪᑦ ᐊᕐᕌᒍᑕᒫᑦ ᓇᓪᓕᐅᓐᓂᕐᓯᐅᕐᑕᒃᓴᕆᕙᓯ ᖁᕕᐊᓲᑎᒋᓗᒍ ᑕᕝᕙᓂ ᑕᖅᑭᒥ.

⁶ ᐅᓪᓗᓂᒃ 7ᓂᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᓂᐊᖂᔭᒥᒃ ᓂᕿᖃᕐᑐᒃᓴᐅᕗᓯ; ᐅᓪᓗᓪᓕ 7ᒋᓕᕐᐸᒍ ᑕᕝᕙ ᐊᑕᓂᕐᒧᑦ ᐅᐱᒍᓲᑎᒋᔭᐅᔪᒃᓴᐅᕗᖅ.

⁷ ᐅᓪᓗᓂᒃ 7ᓂᒃ ᓂᐊᖂᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᓂᕿᖃᕐᑐᒃᓴᐅᕗᓯ; ᓂᐊᖂᔭᒥᒃ ᐳᕙᓪᓚᕐᓴᐅᑎᓕᖕᒥᒃ ᐃᒡᓗᑦᓯᓐᓃᑦᑐᖃᕐᑐᒃᓴᐅᓐᖏᓚᖅ, ᐳᕙᓪᓚᕐᓴᐅᒥᒡᓘᓐᓃᑦ ᓇᓂᓕᒫᖅ ᓄᓇᑦᓯᓐᓃᑦᑐᑲᕐᑐᒃᓴᐅᖏᓚᖅ.

⁸ ᐅᓪᓗᒥᓗ ᑕᕝᕙᓂ ᐃᕐᓂᓯ ᐅᓂᒃᑲᐅᑎᔭᒃᓴᕆᕙᓯ, ‘ᐊᑕᓂᐅᑉ ᐱᓇᓱᐊᕐᓯᒪᓂᖓᓄᑦ ᑭᓯᐊᓂ ᑕᕝᕙ ᐄᑦᔨᑉᑎᒥᑦ ᐊᐅᓪᓚᕐᑎᑕᐅᓯᒪᕗᖓ.’

⁹ ᑕᒪᒃᑯᐊᓗ ᑎᑎᕋᕐᓯᒪᓗᑎᒃ ᓇᓗᓁᒃᑯᑕᐅᔪᒃᓴᐅᕗᑦ ᕿᓚᒃᓯᒪᓗᒋᑦ ᐊᒡᒐᑦᓯᓐᓄᑦ, ᐃᖅᑲᐅᒪᑦᔪᑎᒃᓴᐅᓗᑎᒡᓗ ᖃᐅᑦᓯᓐᓂ; ᐊᑕᓂᐅᑉ ᐱᖁᔭᖓᓂᒃ ᐳᐃᒍᖁᓇᓯ; ᐊᑕᓂᐅᑉ ᐱᔪᓐᓇᕐᓂᕐᔪᐊᖓᓄᑦ ᐄᑦᔨᑉᑎᒥᑦ ᐊᓂᑎᑕᐅᓚᐅᕋᑦᓯ.

¹⁰ ᑍᒤᒻᒪᑦ ᑕᒪᓐᓇ ᓇᓪᓕᐅᓐᓂᕐᓯᐅᕐᓂᐅᔪᖅ ᐊᑐᒐᒃᓴᕆᕙᓯ ᐊᕐᕌᒍᑕᒫᑦ ᓇᓪᓕᐅᓐᓂᖓ ᓇᓪᓕᐅᑎᔭᕌᖓᑦ.”

ᐊᖓᔪᒃᓯᕐᐹᖁᑎᒋᔭᐅᔪᑦ

¹¹ “ᐊᑕᓂᐅᓪᓗ ᑬᓇᓂᒥᐅᑉ ᓄᓇᖓᓄᑦ ᑎᑭᑎᓚᐅᕐᐹᓯ, ᐊᖏᕈᑎᒋᓯᒪᔭᒥᓂᒃ ᓯᕗᓕᕕᓂᑦᓯᓐᓄᑦ ᐃᓕᑦᓯᓐᓄᓪᓗ ᑐᓂᓂᐊᕐᓂᕋᓚᐅᕐᑕᒥᓄᑦ,

¹² ᐊᖑᑎᑦ ᐃᕐᓂᐊᖑᖅᑳᕐᓯᒪᔪᑦ ᑐᓂᔭᒃᓴᕆᕙᓯ ᐊᑕᓂᕐᒧᑦ. ᐆᒪᔪᖁᑎᑦᓯᓗ ᐃᕐᓂᐊᕆᖅᑳᕐᑕᖏᑦ ᐊᖑᑎᑦ ᐊᑕᓂᐅᑉ ᐱᖁᑎᒋᕔᑦ.

¹³ ᓯᐅᑎᖅᑯᕐᑐᔪᒥᓪᓗ ᐃᕐᓂᐊᖑᖅᑳᕐᑐᑦ ᑕᐅᕐᓯᕐᑕᐅᖔᕈᓐᓇᕐᐳᑦ ᓄᕐᕋᐅᔭᕐᒧᑦ, ᐅᕝᕙᓗ ᑕᐅᕐᓯᐅᑎᓂᐊᖏᒃᑯᑦᓯᐅᒃ ᑐᖁᑕᒃᓴᕆᕙᓯ. ᐊᖑᑎᓕᒫᑦ ᐃᕐᓂᐊᖑᖅᑳᕐᓯᒪᔪᑦ ᑕᐅᕐᓯᕐᑕᐅᑎᑦᓱᓐᓇᕐᐸᓯ.

¹⁴ ᓯᕗᓂᕐᒥᓕ ᐃᕐᓂᑦᓯᓐᓄᑦ ᐊᐱᕆᔭᐅᒍᑦᓯ, ‘ᖃᓄᖅ ᒪᓐᓇ ᑐᑭᖃᕐᑐᖅ?’ ᑕᕝᕙ ᐅᖃᐅᑎᔭᒃᓴᕆᕙᑦ, ‘ᐊᑕᓂᐅᑉ ᐱᔪᓐᓇᕐᓂᖓᒍᑦ ᐊᓂᑎᑕᐅᓯᒪᒐᑦᑕ ᐄᑦᔨᑉᑎᒥᑦ, ᕿᓚᒃᑕᐅᓯᒪᕕᒋᔭᑦᑎᓐᓂᑦ.

¹⁵ ᐰᕉᖅ ᐅᕙᑦᑎᓐᓂᒃ ᐊᐅᓪᓚᖁᔨᖏᑦᑐᐊᓘᑎᓪᓗᒍ, ᐊᑕᓂᐅᑉ ᐄᑦᔨᑉᑎᒥᐅᓂ ᐊᖑᑎᑦ ᐃᕐᓂᐊᖑᖅᑳᕐᓯᒪᔪᑦ ᑐᖁᑎᓚᐅᕐᐰᑦ, ᐊᑕᖏᕐᓗᒋᑦ ᐃᓅᒐᓗᐊᕐᐸᑦ ᐆᒪᔫᒐᓗᐊᕐᐸᓪᓗ ᐊᖑᑎᑦ ᐃᕐᓂᐊᖑᖅᑳᕐᓯᒪᔪᑦ. ᑍᒤᒻᒪᑦ ᐊᑕᓂᕐᒧᑦ ᑐᓂᕐᕈᑎᖃᕐᐳᖓ ᐊᖑᑎᓂ ᐃᕐᓂᐊᖑᖅᑳᕐᓯᒪᔪᓂᒃ; ᑭᓯᐊᓂᓕ ᐃᕐᓂᓐᓂ ᐃᕐᓂᐊᖑᖅᑳᕐᓯᒪᔪᑦ ᑕᐅᕐᓯᐅᑎᓯᒪᕙᒃᑲ.’

¹⁶ ᑕᒪᒃᑯᐊᓗ ᐃᕐᓂᐊᖑᖄᕐᓯᒪᔪᓕᒫᑦ ᓇᓗᓁᒃᑯᑕᖏᑦ ᐃᓕᓯᒪᔪᒃᓴᐅᕗᑦ ᐊᒡᒐᑦᓯᓐᓂ ᐅᕝᕙᓗ ᖃᐅᑦᓯᓐᓂ; ᐊᑕᓂᐅᑉ ᐱᔪᓐᓇᕐᓂᕐᔪᐊᒥᓄᑦ ᐊᐅᓪᓚᕐᑎᓚᐅᕐᒪᑎᒍᑦ ᐄᑦᔨᑉᑎᒥᑦ.”

ᓄᕗᔭᕐᔪᐊᖅ ᑕᑭᔪᑯᑖᒃ ᖁᒻᒧᑦ ᐃᑯᐊᓚᔪᕐᔪᐊᕐᓗ ᑕᑭᔪᑯᑖᒃ ᖁᒻᒧᑦ

¹⁷ ᐰᕉᓪᓕ ᐃᓄᐃᑦ ᐊᐅᓪᓚᖁᓕᕐᒪᒋᑦ, ᒎᑎᐅᑉ ᑕᓯᐅᓚᓐᖏᓔᑦ ᐱᓕᔅᑍᓂᒥᐅᑦ ᓄᓇᖓᒍᑦ, ᑕᒪᓐᓇᓕ ᖃᓂᒋᓈᓚᐅᕋᓗᐊᕐᐹᑦ; ᒎᑎ ᐅᖃᓚᐅᕐᒪᑦ, “ᐃᓄᐃᑦ ᐅᓇᑕᕐᑐᓂᒃ ᑕᑯᓕᕈᑎᒃ ᐃᓱᒪᖏᑦ ᓴᖑᒐᔭᕐᒪᑕ, ᐄᑦᔨᑉᑎᒧᓪᓗ ᐅᑎᑐᐃᓐᓇᕆᐊᖃᕐᓗᑎᒃ.”

¹⁸ ᒎᑎᐅᓪᓕ ᐃᓄᐃᑦ ᑕᓯᐅᓚᐅᕐᐰᑦ ᐃᓄᖃᖏᑦᑐᒃᑯᑦ ᓂᒍᕈᑎᓪᓗᓂᒋᑦ ᐃᒪᖅ ᐊᐅᐸᓗᒃᑕ ᑐᕌᕐᓗᒍ. ᐃᓴᕆᐊᓕᒥᐅᓪᓗ ᑕᐸᐅᓐᖓᓚᐅᕐᐳᑦ ᐄᑦᔨᑉᑎᐅᑉ ᓄᓇᖓᓂᑦ ᐊᓂᓪᓗᑎᒃ ᐅᓇᑕᕐᓂᕐᒧᑦ ᐅᐸᓗᖎᔭᕈᓐᓇᖁᓪᓗᒋᑦ.

¹⁹ ᒨᓯᓯᐅᓪᓗ ᔫᓯᐱᐅᑉ ᓴᐅᓂᖏᑦ ᓇᒃᓴᓚᐅᕐᐰᑦ; ᔫᓯᐱᐅᑉ ᐃᓴᕆᐊᓕᒥᐅᑦ ᐃᓄᖏᑦ ᐊᒃᓱᕈᕐᓗᓂ ᐊᖏᕐᑎᓐᓇᓱᐊᓚᐅᕐᒪᒋᑦ ᑕᒪᑐᒧᖓ, ᐅᖃᕐᓗᓂ, “ᒎᑎᐅᑉ ᐅᐸᒍᒫᕐᐹᓯ; ᑍᒤᒻᒪᑦ ᑕᒫᓐᖓᑦ ᐊᐅᓚᓕᕈᑦᓯ ᓴᐅᓂᒃᑲ ᑕᒫᓐᖓᑦ ᐊᐅᓪᓚᕈᑎᔭᒃᓴᕆᕙᓯ.”

²⁰ ᐃᓴᕆᐊᓕᒥᐅᑦ ᓄᓇᒥᑦ ᓱᑰᑎᒥᑦ ᐊᐅᓪᓚᕆᕗᑦ ᑕᖕᒫᕐᓗᑎᒡᓗ ᓄᓇᒥ ᐃᑖᒻᒥ ᓯᐅᕌᓘᑉ ᑭᒡᓕᖓᓂ.

²¹ ᐅᓪᓘᓕᕌᖓᑦ ᐊᑕᓂᖅ ᓯᕗᓂᖓᓐᓃᑉᐸᓚᐅᕐᐳᖅ ᓄᕗᔭᒥ ᓇᐸᔪᒥ ᐊᑐᕐᓂᐊᕐᑕᖓᓃᑉᐸᓚᐅᕐᐳᖅ ᓇᓗᓁᕐᓯᓯᒪᓇᓱᐊᕐᓗᓂ. ᐅᓐᓄᐊᖑᓕᕌᖓᓪᓕ ᐊᑕᓂᐅᑉ ᓯᕗᓕᓕᖃᑦᑕᓚᐅᕐᐰᑦ ᐃᑯᐊᓚᔪᒥ ᓇᐸᔪᒥ ᓯᕗᓂᕆᔭᖓᑦ ᖃᐅᒪᑎᑉᐸᒃᓗᓂᐅᒃ ᐃᖏᕐᕅᓐᓇᖁᓪᓗᒋᑦ ᐅᓐᓄᐊᒃᑯᑦ ᐅᓪᓗᒃᑯᓪᓗ.

²² ᓄᕗᔮᓗᒡᓗ ᑕᑭᑦᑐᑯᑖᒃ ᖁᒻᒧᑦ ᐃᓄᐃᑦ ᓯᕗᓂᖏᓐᓃᖏᓐᓇᕐᐸᓚᐅᕐᐳᖅ ᐅᓪᓗᒃᑯᑦ, ᐅᓐᓄᒃᑯᓪᓗ ᐃᑯᒫᓘᓕᕐᐸᒃᓗᓂ ᑕᑭᑦᑐᑯᑖᖑᓪᓗᓂ ᖁᒻᒧᑦ.