ᒨᓯᓯ ᐂᑉᐸᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᒡᓕᕐᑕᐅᔮᕐᑐᑦ

¹ ᑕᕝᕙ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᐰᕉᒧᐊᓚᐅᕆᑦ; ᑖᑦᓱᒪ ᐆᒻᒪᑎᖓ ᐱᔨᖏᑕᓗ ᐆᒻᒪᑎᖏᑦ ᓯᑎᔫᑎᓯᒪᒐᒃᑭᑦ, ᑖᒃᑯᑎᒎᓇᖅ ᓇᓗᓁᒃᑯᑕᕐᓂᒃ ᓴᖅᑭᑎᑦᓯᔪᓐᓇᖁᓪᓗᖓ,

² ᐊᒻᒪᑦᑕᐅᖅ ᐅᖃᐅᓯᖃᕈᓐᓇᖁᓪᓗᑎᑦ ᕿᑐᕐᖓᕐᓄᑦ ᕿᑐᕐᖓᕕᓪᓗ ᕿᑐᕐᖓᖏᓐᓄᑦ ᖃᓄᖅ ᐄᑦᔨᑉᑎᒥᐅᓂᒃ ᐱᓐᖑᐊᖃᑐᐃᓐᓇᕐᑑᔮᓚᐅᕐᓂᓐᓂᒃ ᖃᓄᕐᓗ ᓇᓗᓁᒃᑯᑕᕐᓂᒃ ᐱᓇᓱᐊᖃᑦᑕᓚᐅᕐᒪᖔᕐᒪ ᑖᒃᑯᑎᒎᓇᖅ; ᑕᒪᑦᓯ ᖃᐅᔨᖁᓪᓗᓯ ᐅᕙᖓ ᐊᑕᓂᐅᒐᒪ.”

³ ᑕᕝᕙ ᒨᓯᓯᒃᑯᒃ ᐂᕉᓂᒃᑯᒃ ᐰᕉᒧᐊᕐᐴᒃ, ᐅᖃᐅᑎᓪᓗᒍᓗ, “ᐊᑕᓂᖅ ᐃᒫᒃ ᐅᖃᕐᐳᖅ, ᐄᑉᕈᐃᑦ ᒎᑎᖓᑦ, ᖃᓄᖅ ᐊᑯᓂᐅᑎᒋᔪᖅ ᐅᕙᓐᓄᑦ ᓂᑲᓇᕐᓴᕐᑍᓕᓂᐊᕐᐲᑦ? ᐃᓄᖁᑎᒃᑲ ᐊᐅᓪᓚᕈᓐᓇᕐᑎᓚᐅᒃᑭᑦ, ᐅᕙᓐᓂᒃ ᑐᒃᓯᐊᕐᕕᖃᕈᓐᓇᖁᓪᓗᒋᑦ.

⁴ ᐃᓄᖁᑎᒃᑲ ᐊᐅᓪᓚᖁᓂᐊᖏᒃᑯᕕᒋᑦ, ᑕᑯᒋᑦ ᖃᐅᒃᐸᑦ ᐱᒡᓕᕐᑕᐅᔮᕐᑐᓂᒃ ᓄᓇᑦᓯᓐᓄᑦ ᑎᑭᑎᑦᓯᓂᐊᕐᐳᖓ.

⁵ ᑕᒪᓐᓇᓗ ᓄᓇᓕᒫᑦᓯᐊᖅ ᑕᑕᑕᐅᓯᒪᓂᐊᕐᐳᖅ ᑕᒪᒃᑯᓄᖓ, ᐊᒡᓛᑦ ᐅᓄᓗᐊᒧᑦ ᓄᓇ ᓴᖅᑭᔮᕈᓐᓃᕐᑎᑕᐅᓂᐊᕐᐳᖅ ᑕᒪᒃᑯᓄᖓ; ᓱᓇᑐᐃᓐᓇᑦᓯᐊᓂᒡᓗ ᓇᑕᖅᑯᕐᓇᕐᓄᑦ ᓱᕋᒃᑕᐅᓯᒪᖏᑦᑐᓕᒫᓂᒃ ᓂᕆᓂᐊᕐᐳᑦ, ᓇᐹᕐᑐᖁᑎᓕᒫᓯᓗ ᓄᓇᒥ ᐱᕈᕐᑐᑦ ᑕᒪᒃᑯᓄᖓ ᓂᕆᔭᐅᓂᐊᕐᐳᑦ.

⁶ ᑕᒪᒃᑯᓄᖓᓗ ᐃᒡᓗᓯ ᑕᑕᑕᐅᓂᐊᕐᐳᑦ, ᐱᔨᕕᓪᓗ ᐃᒡᓗᓕᒫᖏᑦ ᑕᑕᑕᐅᓂᐊᕐᐳᑦ ᐄᑦᔨᑉᑎᒥᐅᓕᒫᓪᓗ; ᐊᑖᑕᒃᑯᓯ ᐊᑖᑕᑦᓯᐊᒃᑯᓯᓘᓐᓃᑦ ᑍᒫᒃ ᐅᓄᕐᑎᒋᔪᓂᒃ ᑕᑯᓚᐅᕐᓯᒪᓐᖏᓚᑦ, ᑍᒪᓐᖓᑦ ᐃᓅᓕᕐᓂᕐᒥᖕᓂᑦ ᐅᓪᓗᒥᒧᑦ ᑎᑭᓪᓗᒍ ᑍᒫᒃ ᖃᐅᔨᔪᖃᓚᐅᕐᓯᒪᓐᖏᓚᖅ.” ᒨᓯᓯᓗ ᐰᕉᒥᑦ ᑐᓄᒃᑲᒥ ᑕᕝᕙᓐᖓᑦ ᐊᓂᕗᖅ.

⁷ ᑕᕝᕙ ᐰᕉᑉ ᐱᔨᖏᑦ ᐰᕉᒧᑦ ᐅᖃᕐᐳᑦ, “ᖃᓄᖅ ᐊᑯᓂᐅᑎᒋᔪᖅ ᑖᒃᑯᐊ ᐊᖑᑎᑦ ᐅᕙᑦᑎᓐᓂᒃ ᐸᒡᕕᓴᒃᑐᒃᓴᐅᕚᑦ? ᐅᑯᐊ ᐃᓄᐃᑦ ᐊᐅᓪᓚᕐᑎᓚᐅᒃᑭᑦ, ᐊᑕᓂᕐᒧᑦ ᒎᑎᒥᖕᓄᑦ ᑐᒃᓯᐊᕆᐊᕐᑐᕈᓐᓇᖁᓪᓗᒋᑦ; ᓱᓕ ᖃᐅᔨᓐᖏᓚᑏᑦ? ᐄᑦᔨᑉᑎᐅᑉ ᑭᓱᒃᓴᐅᔪᓐᓃᕐᑎᑕᐅᓂᖓᓂᒃ?”

⁸ ᑍᒤᒻᒪᑦ ᒨᓯᓯᒃᑯᒃ ᐂᕉᓂᒃᑯᒃ ᐰᕉᒧᑦ ᐅᑎᕐᑎᑕᐅᕘᒃ; ᑖᑦᓱᒪᓗ ᐅᖃᐅᑎᕚᒃ, “ᐊᐅᓪᓚᓕᕆᑦᓯ, ᐊᑕᓂᖅ ᒎᑎᓯ ᑐᒃᓯᐊᕐᕕᒋᔭᕐᑐᓕᕐᓯᐅᒃ; ᑭᓯᐊᓂᓕ ᑭᓇᒃᑯᑦ ᐊᐅᓪᓚᖃᑕᐅᔪᒃᓴᐅᕚᑦ?”

⁹ ᒨᓯᓯᐅᑉ ᑭᐅᕚ, “ᑕᒪᑦᑕ ᐊᐅᓪᓚᕐᓂᐊᕐᐳᒍᑦ, ᕿᑐᕐᖓᕗᓪᓗ ᐃᓄᑐᖃᕗᓪᓗ ᐃᓚᒋᓗᒋᑦ; ᐊᐅᓪᓚᕐᓂᐊᕐᐳᒍ ᐃᕐᓂᕗᑦ ᐸᓂᕗᓪᓗ ᓰᐱᖁᑎᕗᓪᓗ ᐆᒪᔪᖁᑎᕗᓪᓗ ᐃᓚᒋᓗᒋᑦ, ᓇᓪᓕᐅᓐᓂᕐᓯᐅᕆᐊᖃᕐᓂᐊᕋᑦᑕ ᑕᒪᑦᑕ ᐊᑕᓂᖅ ᐅᐱᒋᓗᒍ.”

¹⁰ ᐰᕉᑉ ᐅᖃᐅᑎᕔᑦ, “ᐊᑕᓂᐅᑉ ᓵᖓᓂ ᐅᖃᒻᒪᕆᒃᐳᖓ, ᐊᕐᓇᓂᒃ ᓱᕈᓯᕐᓂᒡᓗ ᐃᓚᖃᕐᓂᐊᕈᑦᓯ ᐊᐅᓪᓚᕐᑎᑦᓯᓂᐊᖏᒻᒪᕆᒃᐳᖓ! ᑍᒤᓐᓂᐊᕈᑦᓯ ᓇᓗᓇᖏᑦᓯᐊᕐᒪᑦ ᐱᐅᖏᑦᑐᒥᒃ ᐃᓱᒪᖃᕐᓗᓯ ᑭᓯᐊᓂ ᑍᒤᓐᓇᓱᐊᕋᔭᕐᑐᓯ.

¹¹ ᑍᒤᑦᔮᖏᒻᒪᕆᒃᐳᓯ! ᐊᖑᑏᑦ ᑭᓯᐊᓂ ᐃᓚᒋᓗᒋᑦ ᐊᐅᓪᓚᕈᓐᓇᕐᐳᓯ ᐊᑕᓂᕐᒧᑦ ᑐᒃᓯᐊᕆᐊᕐᑐᕐᓗᓯ, ᑕᒪᓐᓇ ᑕᕝᕙ ᐱᔪᒪᔭᓯ.” ᑍᒤᓕᔭᐅᒐᒥᒃ ᒨᓯᓯᒃᑯᒃ ᐂᕉᓂᒃᑯᒃ ᐰᕉᒥᑦ ᐊᔭᐅᕐᑕᐅᓪᓗᑎᒃ ᐊᓂᑎᑕᐅᓕᕐᐴᒃ.

¹² ᑕᕝᕙ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᑕᓖᑦ ᐃᓵᓚᐅᕈᒃ ᐄᑦᔨᑉᑎᐅᑉ ᓄᓇᖓᑕ ᖁᓛᓄᑦ, ᐱᒡᓕᕐᑕᐅᔮᕐᑐᑦ ᐄᑦᔨᑉᑎᐅᑉ ᓄᓇᖓᓄᑦ ᑎᑭᖁᓪᓗᒋᑦ, ᓄᓇᒥ ᐱᕈᕐᑐᓕᒫᓂᒃ ᓂᕆᖁᓪᓗᒋᑦ ᓇᑕᖅᑯᕐᓇᕐᓄᑦ ᓱᕋᒃᑕᐅᓯᒪᖏᑦᑐᓂᒃ.”

¹³ ᑕᕝᕙ ᒨᓯᓯᐅᑉ ᐊᔭᐅᑉᐱᐊᓂ ᐃᓴᐅᑎᕚ ᐄᑦᔨᑉᑎᐅᑉ ᖁᓛᓄᑦ, ᐊᑕᓂᕐᓗ ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐊᓄᕌᓕᕐᑎᑦᓯᕗᖅ ᓄᓇᒧᑦ ᐅᓪᓗᓕᒫᖅ ᐅᓐᓄᐊᓕᒫᕐᓗ ᓈᓪᓗᒍ; ᐅᓪᓛᓐᖑᕐᑎᓪᓗᒍ ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐊᓄᕌᕐᑑᑉ ᐱᒡᓕᕐᑕᐅᔮᕐᑐᑦ ᑎᑭᑎᑉᐰᑦ.

¹⁴ ᐱᒡᓕᕐᑕᐅᔮᕐᑐᓪᓗ ᑎᑭᓐᓇᒥᒃ ᐄᑦᔨᑉᑎᐅᑉ ᓄᓇᓕᒫᖓᓄᑦ ᓯᐊᒻᒪᒃᐳᑦ, ᐄᑦᔨᑉᑎᐅᓪᓗ ᓄᓇᓕᒫᖓᓃᓕᕐᓗᑎᒃ, ᐅᓄᕐᑐᕐᔪᐊᖑᓚᐅᕐᐳᑦ ᑍᒫᒡᓗ ᓯᕗᓂᖓᒍᑦ ᐅᓄᕐᑎᒋᔪᖃᓚᐅᕐᓯᒪᓐᖏᓚᖅ, ᑭᖑᓂᖓᒍᓪᓗ ᑍᒫᒃ ᐅᓄᕐᑎᒋᔪᓂᒃ ᐱᑕᖃᓚᐅᕐᓯᒪᑦᔮᓇᓂ.

¹⁵ ᓄᓇᓕᒫᑦᓯᐊᕐᓗ ᑕᑕᑕᐅᓯᒪᓕᓚᐅᕐᐳᖅ ᑕᒪᒃᑯᓄᖓ, ᓄᓇᓗ ᐊᒡᓛᑦ ᑕᒪᒃᑯᓄᖓ ᑖᕐᓯᑎᑕᐅᓚᐅᕐᐳᖅ, ᐱᕈᕐᑐᓕᒫᓂᒡᓗ ᓄᓇᒦᑦᑐᓂᒃ ᓂᕆᓕᕐᐳᑦ ᓇᐹᕐᑐᐃᓪᓗ ᐱᕈᕐᑐᖏᓐᓂᒃ ᓇᑕᖅᑯᕐᓇᕐᓄᑦ ᐊᒥᐊᒃᑯᒋᔭᐅᓚᐅᕐᑐᓂᒃ; ᑐᖑᔪᕐᑕᓂᒡᓗ ᓄᓇᒥ ᐊᒥᐊᒃᑯᑕᖃᕈᓐᓃᓚᐅᕐᐳᖅ, ᐊᒡᓛᓪᓗ ᓇᐹᕐᑐᑦ, ᐱᕈᕐᑐᓪᓗ ᐱᕈᕐᓰᕕᖕᒦᑦᑐᑦ, ᐄᑦᔨᑉᑎᐅᑉ ᓄᓇᓕᒫᖓᓃᓕᕐᓗᑎᒃ.

¹⁶ ᑕᕝᕙ ᐰᕉᖅ ᒨᓯᓯᒥᒃ ᐂᕉᓂᒥᒡᓗ ᕾᖁᔨᕗᖅ ᑐᐊᕕᖁᓪᓗᒋᒃ, ᐅᖃᐅᑎᓪᓗᒋᒡᓗ, “ᐊᔪᕐᑐᓕᓯᒪᕗᖓ ᐊᑕᓂᕐᒧᑦ ᒎᑎᑦᓯᓐᓄᑦ, ᐃᓕᑦᓯᖕᓄᓪᓗ.

¹⁷ ᑍᒤᒻᒪᑦ ᒫᓐᓇ, ᐊᔪᕐᑐᓕᓂᒃᑲ ᐃᓱᒪᒋᔪᓐᓁᕐᓯᐅᒃ, ᐊᒃᓱᕈᕐᓗᖓ ᕿᓄᕕᒋᕙᑦᓯᒃ ᐊᑕᐅᓯᐊᓪᓚᕆᒡᓗᖓ, ᐊᑕᓂᖅ ᒎᑎᓯ ᑐᒃᓯᐊᕐᕕᒋᓚᐅᕐᓯᐅᒃ ᑕᒪᑐᒥᖓᑦ ᑐᖁᓐᓇᕐᑐᒥᒃ ᐲᕐᓯᖁᓗᒍ ᐅᕙᓐᓂᑦ.”

¹⁸ ᑕᕝᕙᓐᖓᓪᓗ ᐰᕉᒥᑦ ᐊᓂᒐᒥ, ᐊᑕᓂᖅ ᑐᒃᓯᐊᕐᕕᒋᕚ.

¹⁹ ᐊᑕᓂᕐᓗ ᓯᕿᓂᐅᑉ ᓂᐱᕕᐊᑕ ᓇᓛᓂᑦ ᐊᓄᕆᒥ ᓴᓐᖏᔪᒥᒃ ᑎᑭᑎᑦᓯᕗᖅ, ᑕᒪᑐᒧᖓᓗ ᑕᒪᒃᑯᐊ ᐱᒡᓕᕐᑕᐅᔮᕐᑐᑦ ᑎᒃᑕᐅᓕᕐᐳᑦ ᐃᒪᕐᒧᑦ ᐊᐅᐸᓗᒃᑕᒧᑦ; ᐊᑕᐅᓯᕐᒥᒡᓘᓐᓃᑦ ᐱᒡᓕᕐᑕᐅᔮᕐᑐᒥᒃ ᐄᑦᔨᑉᑎᐅᑉ ᓄᓇᖓᓂ ᐊᒥᐊᒃᑯᑕᖃᕈᓐᓃᕐᓗᓂ.

²⁰ ᐊᑕᓂᐅᓪᓕ ᐰᕉᑉ ᐆᒻᒪᑎᖓ ᓱᓕ ᓯᑎᔫᑎᓚᐅᕐᐹ, ᐃᓴᕆᐊᓕᒥᐅᓪᓗ ᐃᓄᖏᑦ ᐊᐅᓪᓚᖁᓚᐅᓐᖏᓔᑦ.

ᑖᕐᑐᕐᔪᐊᖅ

²¹ ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᑕᓖᑦ ᐃᓵᓚᐅᕈᒃ ᕿᓚᖕᒧᑦ ᐄᑦᔨᑉᑎᒧᑦ ᑖᕐᑐᕐᔪᐊᖅ ᑎᑭᖁᓪᓗᒍ, ᐃᓄᖏᓐᓄᓪᓗ ᑖᕐᑐᕐᔪᐊᑉ ᑖᕐᑑᓂᖓ ᐃᒃᐱᒋᔭᐅᔪᓐᓇᖁᓪᓗᒍ.”

²² ᑕᕝᕙ ᒨᓯᓯᐅᑉ ᑕᓕᓂ ᐃᓵᒃᐹ ᕿᓚᖕᒧᑦ, ᑕᕝᕙ ᑖᕐᑐᕐᔪᐊᖅ ᑭᓪᓚᖃᖏᑦᑐᑎᑐᑦ ᑍᒤᑦᑐᖅ ᑎᑭᐅᑎᕗᖅ ᐄᑦᔨᑉᑎᓕᒫᒧᑦ ᑖᕐᑑᓕᕐᓗᓂᓗ ᐅᓪᓗᓂᒃ ᐱᖓᓱᓂᒃ.

²³ ᓇᓪᓕᐊᓐᓂᒡᓘᓐᓃᑦ ᐃᒻᒥᖕᓄᑦ ᑕᑯᖃᑦᑕᐅᑎᔪᓐᓇᕐᑐᖃᓚᐅᓐᖏᓚᖅ, ᐃᒡᓗᒥᖕᓂᓪᓗ ᐊᓂᔪᖃᓚᐅᕋᓂ ᐅᓪᓗᓂᒃ ᐱᖓᓱᓂᒃ; ᐃᓴᕆᐊᓕᒥᐅᓪᓕ ᓇᔪᕐᑕᖓᑦ ᖃᐅᒪᑦᓯᐊᓚᐅᕐᐳᖅ.

²⁴ ᑕᕝᕙ ᐰᕉᑉ ᒨᓯᓯ ᕾᖁᕚ, ᐅᖃᐅᑎᓪᓗᒍᓗ, “ᐊᐅᓪᓚᓕᕆᑦᓯ ᐊᑕᓂᖅ ᑐᒃᓯᐊᕐᕕᒋᔭᕐᑐᕐᓗᒍ ᕿᑐᕐᖓᓯ ᐃᓚᒋᓗᒋᑦ, ᑭᓯᐊᓂᓕ ᐆᒪᔪᖁᑎᓯ ᐱᓐᖏᑕᑐᐊᕆᓗᒋᑦ.”

²⁵ ᒨᓯᓯᐅᓪᓕ ᑭᐅᕚ, “ᑭᓯᐊᓂᓕ ᐆᒪᔪᓂᒃ ᑐᓂᕐᕈᑎᒃᓴᑦᑎᓐᓂᒃ ᐃᑯᐊᓚᔭᒃᓴᓂᒡᓗ ᑐᓂᓯᔭᕆᐊᖃᕐᓂᐊᕐᐸᑦᑎᒍᑦ, ᑐᓂᕐᕈᓯᕈᓐᓇᖁᓪᓗᑕ ᐊᑕᓂᕐᒧᑦ ᒎᑎᑦᑎᓐᓄᑦ.

²⁶ ᐆᒪᔪᖁᑎᓕᒫᕗᓪᓕ ᐊᐅᓪᓚᖃᑎᒋᔭᒃᓴᕆᕙᕗᑦ; ᑭᓱᒥᒡᓘᓐᓃᑦ ᐊᒥᐊᒃᑯᖃᕐᑐᒃᓴᐅᓐᖏᓚᒍᑦ ᐆᒪᔪᑦ ᑯᑭᖏᓪᓘᓐᓃᑦ ᕿᒪᒃᑕᐅᔪᒃᓴᐅᓐᖏᓚᑦ, ᓇᒃᓴᕆᐊᖃᕋᑦᑎᒍ ᐊᑕᓂᕐᒥᒃ ᒎᑎᑦᑎᓐᓂᒃ ᑐᒃᓯᐊᕐᕕᖃᕈᓐᓇᖁᓪᓗᑕ, ᖃᐅᔨᒪᓇᑕᓗ ᓇᓪᓕᐊᓐᓂᒃ ᐊᑕᓂᕐᒧᑦ ᑐᓂᕐᕈᓯᕆᐊᖃᕐᓂᐊᕐᒪᖔᑦᑕ ᑍᑯᖓ ᑎᑭᓚᐅᖅᑳᕐᑎᓐᓇᑕ.”

²⁷ ᐊᑕᓂᐅᓪᓕ ᐰᕉᑉ ᐆᒻᒪᑎᖓ ᓯᑎᔫᑎᓚᐅᕐᐹ, ᑖᒃᑯᓂᖓᓗ ᐊᐅᓪᓚᖁᔨᓚᐅᓐᖏᓚᖅ.

²⁸ ᑕᕝᕙ ᐰᕉᑉ ᐅᖃᐅᑎᕚ, “ᑕᒫᓂᓐᖏᓚᐅᕆᑦ ᓇᔪᕐᑕᓐᓂ; ᐊᓂᓚᐅᕆᑦ, ᑕᑯᒃᑲᓐᓂᕈᒪᔪᓐᓃᕐᐸᒋᑦ; ᑕᑯᒃᑲᓐᓂᓕᑐᐊᕈᒃᑭᑦ ᐅᓪᓗᐃᑦ ᓇᓪᓕᐊᓐᓂ ᑕᕝᕙ ᑐᖁᔪᒃᓴᐅᕗᑎᑦ!”

²⁹ ᒨᓯᓯᓗ ᐅᖃᕐᐳᖅ, “ᑍᒫᒃ ᐅᖃᕋᕕᑦ! ᑕᕝᕙ ᑕᑯᒃᑲᓐᓂᑦᔮᔪᓐᓃᕐᐸᒋᑦ.”