ᒨᓯᓯ ᐂᑉᐸᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑦ ᐱᑦᓯᐊᕐᑕᐅᖏᓐᓂᖓᑦ ᐄᑦᔨᑉᑎᒥ

¹ ᐃᓴᕆᐊᓕᐅᑉ ᐃᕐᓂᖏᑦ ᔧᑰᑉ ᐄᑦᔨᑉᑎᒧᐊᖃᑎᒋᓚᐅᕐᑕᖏᑦ ᐅᑯᐊᖑᓚᐅᕐᐳᑦ, ᓇᖕᒥᓂᖅ ᐃᓚᒋᔭᒥᖕᓂᒃ ᐃᓚᖃᕐᓗᑎᒃ,

² ᕉᐱᓂ, ᓯᒥᐅᓂ, ᓕᕔ, ᔫᑕ,

³ ᐃᓴᑳᕆ, ᓯᐳᓗᓂ, ᐱᓐᔭᒥᓂ,

⁴ ᑖᓐ, ᓈᑉᑕᓕ, ᒑᑎ, ᐋᓱᕆᓗ.

⁵ ᑖᒃᑯᐊᓕᒫᑦ ᐃᓄᐃᑦ ᑲᑎᓪᓗᒋᑦ ᔧᑰᑉ ᑭᖑᕚᖏᑦ 70ᐅᓚᐅᕐᐳᑦ. ᐃᕐᓂᖓᓕ ᔫᓯᐱ ᐄᑦᔨᑉᑎᒦᓕᕇᓚᐅᕐᒪᑦ.

⁶ ᑭᖑᓂᑲᓪᓚᖓᒍᑦ ᔫᓯᐱ, ᖃᑕᓐᖑᑎᖏᓪᓗ ᐃᓚᓕᒫᖏᓪᓗ ᑐᖁᓯᒪᓕᓚᐅᕐᐳᑦ.

⁷ ᑭᓯᐊᓂᓕ ᑭᖑᕚᖏᑦ ᐃᓴᕆᐊᓕᒥᐅᑦ ᕿᑐᕐᖓᕐᑖᖃᑦᑕᕐᓂᕐᒧᑦ ᐅᓄᕐᓯᓚᐅᕐᐳᑦ ᓲᖑᓂᖃᕐᓗᑎᒡᓗ ᐄᑦᔨᑉᑎᓗ ᐃᓄᒋᐊᒃᓯᓚᐅᕐᐳᖅ ᑖᒃᑯᓄᖓ.

⁸ ᑕᕝᕙᓕ ᓄᑖᒥᒃ ᐊᖓᔪᖅᑳᕐᔪᐊᕐᑖᓚᐅᕐᐳᑦ ᐄᑦᔨᑉᑎᒥ, ᑖᓐᓇ ᔫᓯᐱᒥᒃ ᖃᐅᔨᓯᒪᓚᐅᓐᖏᓚᖅ.

⁹ ᐃᓄᖁᑎᓂᓗ ᐅᖃᐅᑎᕔᑦ, ᒪᑯᐊ ᐃᓴᕆᐊᓕᒥᐅᑦ ᐅᓄᓗᐊᓕᕐᒪᑕ ᐱᔪᓐᓇᕐᓂᖃᓗᐊᕐᓗᑎᒡᓗ ᐃᓕᒪᓇᕐᓯᓕᕐᐳᑦ.

¹⁰ ᐅᓇᑕᓯᑲᓪᓚᒃᑯᑦᑕ ᐊᑭᕋᑦᑎᓐᓄᑦ ᑕᑉᐱᐅᑎᑐᐃᓇᕆᐊᖃᕐᐳᑦ ᐅᕙᑦᑎᓐᓂᒃ ᐅᓇᑕᕈᒪᓗᑎᒃ, ᓄᓇᑦᑎᓐᓂᓪᓗ ᐊᐅᓪᓚᕋᔭᕐᐳᑦ ᐋᖅᑭᒃᓯᔭᕆᐊᖃᕐᐳᒍᑦ ᐅᓄᕐᕙᓪᓕᐊᓗᐊᖁᓇᒋᑦ.

¹¹ ᐊᓱᐃᓛᒃ ᐄᑦᔨᑉᑎᒥᐅᑦ ᐃᓖᔭᕐᓱᐃᔨᓂᒃ ᑎᓕᓯᓚᐅᕐᐳᑦ ᑖᒃᑯᓂᖓ ᐊᒃᓱᐊᓗᒃ ᓴᓇᑎᓪᓗᓂᑦᔪᒃ ᖁᕕᐊᓱᒍᓐᓃᖁᓪᓗᒋᑦ; ᐃᓴᕆᐊᓕᒥᐅᑦ ᐃᒡᓗᒐᓴᒡᔪᐊᓂᒃ ᓴᓇᓚᐅᕐᐳᑦ ᐰᑕᒥᒥᒃ ᕌᒥᓯᓯᒥᒡᓗ ᐊᑎᖃᕐᑐᓂᒃ, ᑖᒃᑯᐊᒃ ᐊᖓᔪᖅᑳᕐᔪᐊᑉ ᐱᖁᑎᒃᑯᕕᒃᓴᕆᔭᖏᒃ.

¹² ᑭᓯᐊᓂᓕ ᐄᑦᔨᑉᑎᒥᐅᑦ ᐊᒃᓱᕈᕐᑎᑦᓯᕙᓪᓕᐊᓂᖓᑦ ᐃᓴᕆᐊᓕᒥᐅᓂᒃ ᒪᓕᒡᓗᒍ, ᐃᓴᕆᐊᓕᒥᐅᑦ ᐅᓄᕐᓯᕙᓪᓕᐊᑐᐃᓐᓇᓚᐅᕐᐳᑦ; ᐄᑦᔨᑉᑎᒥᐅᓪᓗ ᓄᓇᖓᓐᓂ ᓈᔨᕙᓪᓕᐊᑐᐃᓐᓇᕐᒪᑕ ᐄᑦᔨᑉᑎᒥᐅᑦ ᓯᕘᕋᓕᕐᐸᓪᓕᐊᓚᐅᕐᐳᑦ ᐃᓴᕆᐊᓕᒥᐅᓂᒃ.

¹³ ᐄᑦᔨᑉᑎᒥᐅᓪᓗ ᐃᓴᕆᐊᓕᒥᐅᑦ ᐃᓖᔭᕆᓪᓗᒋᑦ ᖁᕕᐊᓱᒍᓐᓃᕐᑎᓚᐅᕐᐰᑦ,

¹⁴ ᐃᒡᓗᓂᒃ ᓴᓇᑎᓪᓗᓂᑦᔪᒃ ᐱᕈᕐᓰᕕᖕᓂᒡᓗ, ᐊᑦᑕᕆᓚᐅᓐᖏᓔᓪᓗ.

¹⁵ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᓕᕐᐳᖅ ᐄᑉᕉᒥᐅᑦ ᓄᓕᐊᖏᓐᓄᑦ ᓯᑉᕋᒧᑦ ᐳᐊᒧᓪᓗ ᑖᒃᑯᐊᒃ ᐃᕐᓂᓱᒃᓰᔨᐅᔪᑦ ᐃᓴᕆᐊᓕᒥᐅᑦ ᐊᕐᓇᖏᓐᓂᒃ ᐃᑲᔪᖃᑦᑕᕐᒥᔫᒃ.

¹⁶ ᐄᑉᕉᒥᐅᑦ ᐊᕐᓇᖏᓐᓂᒃ ᐃᕐᓂᓱᒃᓰᖃᑕᐅᔭᕌᖓᑦᓯᒃ ᕿᑐᕐᖓᕐᑖᖏᑦ ᑐᖁᑉᐸᖕᓂᐊᕐᐸᓯᒃ ᐊᖑᑕᐅᔭᕌᖓᑕ, ᐊᕐᓇᐅᔭᕌᖓᑕᓕ ᐆᒪᑎᑉᐸᒡᓗᒋᑦ.

¹⁷ ᑖᒃᑯᐊᒡᓕ ᐃᕐᓂᓱᒃᓰᔩᒃ ᒎᑎᒥᒃ ᓯᕘᕋᒐᒥᒃ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓂᒃ ᓈᓚᓚᐅᓐᖏᓛᒃ. ᕿᑐᕐᖓᕐᑖᖑᔪᑦ ᐊᖑᑕᐅᒐᓗᐊᕌᖓᑕ ᐆᒪᑎᑦᓯᖃᑦᑕᓚᐅᕐᐴᒃ.

¹⁸ ᐄᑦᔨᑉᑎᐅᓪᓗ ᐊᖓᔪᖅᑳᕐᔪᐊᖓᑕ ᐃᕐᓂᓱᒃᓰᔩᒃ ᕾᖁᔭᐅᒃᑲᕐᐹᒃ, ᐊᐱᕆᓪᓗᓂᒋᒡᓗ, “ᓱᖕᒪᑦ ᑍᒤᓕᐅᕐᐱᓰᒃ? ᓱᖕᒪᑦ ᐊᖑᑕᐅᓂᖏᓐᓂᒃ ᐆᒪᑎᑦᓯᖃᑦᑕᕐᐱᓰᒃ?”

¹⁹ ᑖᒃᑯᐊᒡᓗ ᑭᐅᕘᒃ, ᐄᑉᕉᒥᐅᑦ ᐊᕐᓇᖏᑦ ᐄᑦᔨᑉᑎᒥᐅᑦ ᐊᕐᓇᖏᑎᑐᑦ ᑍᒤᖏᒻᒪᑕ, ᐃᕐᓂᓴᕅᓐᓂᕐᓴᐅᖕᒪᑕ ᐃᕐᓂᓱᒃᓯᐊᕆᓂᐊᕐᑕᑦᑎᓐᓄᑦ ᑎᑭᓚᐅᕐᑎᓐᓇᓄᒃ ᓱᓕ ᐃᕐᓂᔭᕇᖃᑕᕐᒪᑕ.

²⁰ ᑖᒃᑯᐊᒡᓗ ᐃᕐᓂᓱᒃᓰᔩᒃ ᒎᑎᒥᒃ ᓯᕘᕋᒋᔭᖃᕐᒪᑎᒃ ᐊᖓᔪᖅᑳᕐᔪᐊᑉ ᐱᑦᓯᐊᕐᕕᒋᓚᐅᕐᐹᒃ ᕿᑐᕐᖓᖃᕈᓐᓇᕐᑎᓪᓗᓂᒋᒡᓗ.

²¹ ᐃᓴᕆᐊᓕᒥᐅᓪᓗ ᐅᓄᕐᓯᕙᓪᓕᐊᑐᐃᓐᓇᓚᐅᕐᐳᑦ ᐃᕐᓂᓱᒃᓰᔩᑦ ᒎᑎᒥᒃ ᓯᕘᕋᒋᔭᖃᓚᐅᕐᒪᑕ.

²² ᐊᓱᐃᓛᒃ ᐊᖓᔪᖅᑳᕐᔪᐊᖅ ᐃᓄᖁᑎᒥᓄᑦ ᐊᑐᕐᑕᐅᖁᔭᒥᓂᒃ ᑐᓴᕐᑎᑦᓯᓕᕐᐳᖅ ᐃᒫᒃ, “ᐄᑉᕉᒥᐅᑦ ᕿᑐᕐᖓᕐᑖᕌᖓᑕ ᓄᑲᑉᐱᐊᓂᒃ ᑰᖕᒧᑦ ᓁᓕᒧᑦ ᐃᒋᖃᑦᑕᕐᓂᐊᕐᐸᓯ, ᐊᕐᓇᐅᓂᖏᓪᓕ ᑕᒪᕐᒥᒃ ᐆᒪᑎᖃᑦᑕᕐᓗᒋᑦ.”