ᐃᔅᑕᐅᑉ ᐊᒡᓚᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᑎᑦ ᐊᑭᕋᕐᑐᕐᑎᒥᖕᓂᒃ ᓄᖒᑦᓯᓂᖓᑦ

¹ ᑕᖅᑮᑦ 12ᖓᓂ, ᑕᖅᑭᒥ ᐊᑖᕆᒥ, ᐅᓪᓗᖅ 13ᖑᓕᕐᒪᑦ, ᑕᕝᕙ ᐊᖓᔪᖅᑳᕐᔪᐊᑉ ᐱᖁᔨᓂᖓ ᐱᖁᔭᓕᐊᕆᓯᒪᔭᖓᓗ ᓇᓪᓕᐅᑎᓚᐅᕐᐳᖅ ᑐᖁᕅᕕᒃ, ᑕᕝᕙᓂ ᐅᓪᓗᒥ ᔫᑎᑦ ᐊᑭᕋᕐᑐᕐᑎᖏᑦ ᓄᖒᑦᓯᓂᐊᕋᓱᒋᓚᐅᕐᐳᑦ, ᐃᒡᓗᖔᖓᓄᓪᓕ ᐱᔪᖃᓚᐅᕐᐳᖅ, ᑕᕝᕙᓂ ᐅᓪᓗᒥ ᔫᑎᑦ ᐆᒥᒋᔨᒥᖕᓂᒃ ᓵᓚᖃᖔᓚᐅᕐᒪᑕ.

² ᔫᑎᑦ ᑲᑎᓚᐅᕐᐳᑦ ᐃᒡᓗᒐᓴᖕᓃᑦᑐᓕᒫᑦ ᐊᖓᔪᖅᑳᕐᔪᐊᑉ ᐊᕼᐊᓱᐃᕋᓯᐅᑉ ᓄᓇᓕᖁᑎᖏᑕ ᐊᕕᒃᑐᕐᓯᒪᓂᖏᓐᓃᑦᑐᑦ ᐱᒋᐊᕋᓱᒃᑐᓕᒫᓂᒃ ᑐᖁᑦᓯᖃᑦᑕᕐᓗᑎᒃ. ᓇᓪᓕᐊᓐᓄᓪᓘᓐᓃᑦ ᓵᓚᐅᔪᓐᓇᓚᐅᓐᖏᓚᑦ, ᐃᓄᓕᒫᑦ ᑲᑉᐱᐊᓱᓕᓚᐅᕐᒪᑕ ᑖᒃᑯᓂᖓ.

³ ᓄᓇᓕᖕᓂ ᐊᕕᒃᑐᕐᓯᒪᔪᓂ ᐊᖓᔪᖅᑳᑦ, ᓄᓇᓕᖕᓂ ᐊᐅᓚᑦᓯᔩᑦ, ᓄᓇᓕᖕᓂᓗ ᐋᖅᑭᒃᓯᒪᑎᑦᓯᔩᑦ, ᐊᖓᔪᖅᑳᕐᔪᐊᕐᒥᒡᓗ ᓄᓇᓕᖕᓂ ᐱᔨᑦᓯᕐᑏᑦ, ᔫᑎᓂᒃ ᐃᑲᔪᖔᓚᐅᕐᐳᑦ, ᒧᐊᑎᑬᒥᒃ ᓯᕘᕋᓚᐅᕋᒥᒃ.

⁴ ᒧᐊᑎᑬ ᐱᓪᓚᕆᐊᓘᓕᓚᐅᕐᒪᑦ ᐊᖓᔪᖅᑳᕐᔪᐊᒃᑯᕕᖕᒥ, ᑖᑦᓱᒪᓗ ᐊᔪᖏᓐᓂᕋᕐᑕᐅᓂᖓ ᓄᓇᓕᖕᓂ ᐊᕕᒃᑐᕐᓯᒪᔪᓂ ᓯᐊᒻᒪᕐᓯᒪᓕᓚᐅᕐᒪᑦ; ᑖᓐᓇ ᒧᐊᑎᑬ ᐱᔪᓐᓇᕐᓂᕐᑖᕐᐸᓪᓕᐊᑐᐃᓐᓇᓚᐅᕐᐳᖅ.

⁵ ᑍᒤᒻᒪᑦ ᔫᑎᑦ ᐊᑭᕋᕐᑐᕐᑎᓕᒫᒥᖕᓂᒃ ᓵᓚᖃᓚᐅᕐᐳᑦ ᓴᕕᒡᔪᐊᒧᑦ ᑐᖁᑦᓯᕙᒃᓗᑎᒃ, ᑐᖁᕅᓪᓗᑎᒃ ᓄᖑᕅᓪᓗᑎᒡᓗ, ᐆᒥᒋᔨᑎᒃ ᐃᓱᒪᕐᓱᕐᓗᑎᒃ ᐱᓂᐊᕐᕕᒋᓚᐅᕐᐰᑦ.

⁶ ᓄᓇᒥ ᓲᓴᒥ ᐊᖓᔪᖅᑳᕐᔪᐊᒃᑯᕕᖕᒥ ᔫᑎᑦ ᑐᖁᕅᓚᐅᕐᐳᑦ ᐊᖑᑎᓂᒃ 500ᓂᒃ.

⁷ ᓄᓇᓕᖕᓂᓗ ᐅᑯᓇᓂ ᐸᕐᓴᓐᑕᑦᑕᒥ, ᑕᓪᐴᓂᒥ, ᐊᓴᐸᑕᒥ,

⁸ ᐳᕌᓴᒥ, ᐊᑕᓔᐊᒥ, ᐊᕅᑖᑕᒥ,

⁹ ᐸᕐᒪᓰᑕᒥ, ᐊᕆᓮᒥ, ᐊᕅᑍᒥ, ᕔᔭᑕᒥᓗ,

¹⁰ ᕼᐂᒪᓂᐅᑉ ᕼᐊᒥᑕᑕᐅᑉ ᐃᕐᓂᖓᑕ, ᐃᕐᓂᖏᑦ ᖁᓕᑦ, ᔫᑎᑦ ᐊᑭᕋᕐᑐᕐᑎᖏᑦ ᑐᖁᑕᐅᓚᐅᕐᐳᑦ; ᑐᖁᑕᖏᑕᓕ ᐱᖁᑎᕕᓂᖏᓐᓂᒃ ᑎᒍᓯᔪᖃᓚᐅᓐᖏᓚᖅ.

¹¹ ᑕᕝᕙᓂ ᐅᓪᓗᒥ ᑐᖁᑕᐅᔪᑦ ᐅᓄᕐᓂᖏᑦ ᓄᓇᒥ ᓲᓴᒥ ᐊᖓᔪᖅᑳᕐᔪᐊᒃᑯᕕᖕᒥ ᐊᖓᔪᖅᑳᕐᔪᐊᕐᒧᑦ ᐅᖃᐅᓯᐅᓚᐅᕐᐳᑦ.

¹² ᐊᖓᔪᖅᑳᕐᔪᐊᕐᓗ ᑯᐃᓐ ᐃᔅᑕᕐᒧᑦ ᐅᖃᕐᐳᖅ, “ᔫᑎᑦ ᑐᖁᑦᓯᓚᐅᕐᐳᑦ ᓄᖒᑦᓯᓪᓗᑎᒡᓗ ᐊᖑᑎᓂᒃ 500ᓂᒃ ᑕᕝᕙᓂ ᓲᓴᒥ ᐊᖓᔪᖅᑳᕐᔪᐊᒃᑯᕕᖕᒥ, ᕼᐂᒪᓂᐅᓪᓗ ᐃᕐᓂᖏ ᖁᓕᑦ ᑐᖁᑕᐅᓚᐅᕆᕗᑦ. ᖃᑦᓯᓂᒡᓕᑭᐊᖅ ᑐᖁᑦᓯᕙᑦ ᐊᖓᔪᖅᑳᕐᔪᐊᑉ ᓄᓇᖁᑎᓕᒫᖏᓐᓂ ᑲᑎᑦᓱᒋᑦ? ᒫᓐᓇᓕ ᖃᓄᖅ ᑐᒃᓯᕋᕈᑎᒃᓴᖃᓕᕐᐲᑦ? ᐱᔪᒪᔭᕐᓂᒃ ᑐᓂᓯᕕᒋᓂᐊᕐᐸᒋᑦ. ᐅᕝᕙᓗ ᖃᓄᐃᓕᐅᒃᑲᓐᓂᖁᔨᕖᑦ? ᑕᕝᕙ ᑲᔪᓯᓂᐊᕐᐳᖅ.”

¹³ ᑕᕝᕙ ᐃᔅᑕᕐ ᐅᖃᕐᐳᖅ, “ᐊᖓᔪᖅᑳᕐᔪᐊᑉ ᖁᕕᐊᒋᒃᐸᒍ, ᔫᑎᑦ ᐱᔪᓐᓇᕐᑎᑕᐅᓚᐅᕐᓕᑦ ᖃᐅᒃᐸᑦ ᑲᔪᓯᒃᑲᓐᓂᖁᓪᓗᒋᑦ ᑕᕝᕙᓃᑦᑐᑦ ᓲᓴᒥ ᐅᓪᓗᒥ ᐱᖁᔭᓕᐊᕆᔭᐅᓯᒪᔫᑉ ᐱᓇᓱᐊᕐᑕᐅᓂᖓᓂᒃ, ᑖᒃᑯᐊ ᕼᐂᒪᓂᐅᑉ ᐃᕐᓂᖏᑦ ᖁᓕᑦ ᕿᒥᑦᓯᕕᖕᒥ ᓂᕕᓐᖓᕐᑕᐅᓗᑎᒃ.”

¹⁴ ᑕᕝᕙ ᐊᖓᔪᖅᑳᕐᔪᐊᖅ ᐱᖁᔨᓚᐅᕐᐳᖅ ᑕᒪᓐᓇ ᑍᒤᑎᑕᐅᖁᓪᓗᒍ; ᐱᖁᔭᕐᓗ ᓴᖅᑭᑕᐅᓚᐅᕐᐳᖅ ᓲᓴᒥ, ᕼᐂᒪᓂᐅᑉ ᐃᕐᓂᖏᑦ ᖁᓕᑦ ᕿᒥᑦᓯᕕᖕᒥ ᓂᕕᓐᖓᕐᑕᐅᖁᓪᓗᒋᑦ.

¹⁵ ᑕᕝᕙ ᔫᑎᑦ ᓲᓴᒦᑦᑐᑦ ᑲᑎᓚᐅᕆᕗᑦ ᐅᓪᓗᐃᑦ 14ᖓᓐᓂ ᑕᖅᑭᒥ ᐊᑖᕆᒥ ᑕᕝᕙᓂᓗ ᑐᖁᑦᓯᒃᑲᓐᓂᓚᐅᕐᐳᑦ ᐊᖑᑎᓂᒃ 300ᓂᒃ ᓄᓇᒥ ᓲᓴᒥ; ᑐᖁᑕᖏᑕᓕ ᐱᖁᑎᖏᓐᓂᒃ ᑎᒍᓯᔪᖃᓚᐅᓐᖏᓚᖅ.

¹⁶ ᑕᕝᕙ ᔫᑎᑦ ᑖᒃᑯᐊ ᐊᓯᖏᑦ ᐊᖓᔪᖅᑳᕐᔪᐊᑉ ᓄᓇᖁᑎᖏᓐᓃᑦᑐᑦ ᑲᑎᓚᐅᕆᕗᑦ ᐃᒻᒥᖕᓂᒃ ᓴᐳᓐᓂᐊᕐᓗᑎᒃ, ᐊᑭᕋᕐᑐᕐᑎᒥᖕᓂᒃ ᓵᓚᖃᓚᐅᕐᐳᑦ, ᑐᖁᑦᓯᓪᓗᑎᒃ 75,000ᓂᒃ; ᑐᖁᑕᖏᑕᓕ ᐱᖁᑎᖏᓐᓂᒃ ᑎᒍᓯᔪᖃᓚᐅᓐᖏᓚᑦ.

¹⁷ ᑕᒪᓐᓇ ᐊᑐᓚᐅᕐᐳᖅ ᐅᓪᓗᖅ 13ᖑᑎᓪᓗᒍ ᑕᖅᑭᒥ ᐊᑖᕆᒥ, ᖃᐅᑎᓪᓗᒍᓕ ᐅᓪᓗᖅ 14ᖑᓕᕐᑎᓪᓗᒍ ᑕᕾᕐᓯᓕᕐᐳᑦ ᐅᓪᓗᒥᓗ ᑕᕝᕙᓂ ᓂᕆᕕᒃᔪᐊᖃᑎᒌᓕᕐᐳᑦ ᖁᕕᐊᓱᖃᑎᒌᒡᓗᑎᒡᓗ.

ᓇᓪᓕᐅᓐᓂᕐᓯᐅᕐᕕᒃ ᐱᐅᕆᒻ

¹⁸ ᔫᑎᓪᓕ ᓲᓴᒦᑦᑐᑦ ᑲᑎᖃᑎᒌᓚᐅᕐᐳᑦ ᐅᓪᓗᖅ 13ᖑᑎᓪᓗᒍ ᐊᒻᒪ 14ᖑᑎᓪᓗᒍ, ᑕᕾᕐᓯᓕᕐᓗᑎᒃ ᐅᓪᓗᖅ 15ᖑᓕᕐᑎᓪᓗᒍ, ᐅᓪᓗᒥᓗ ᑕᕝᕙᓂ ᓂᕆᕕᒡᔪᐊᖃᑎᒌᓕᕐᐳᑦ ᖁᕕᐊᓱᖃᑎᒌᒡᓗᑎᒡᓗ.

¹⁹ ᑍᒤᒻᒪᑦ ᔫᑎᑦ ᓄᓇᓕᖕᓃᑦᑐᑦ ᒥᑭᓐᓂᕐᓴᓂ, ᓄᓇᖃᕐᑐᑦ ᐊᕙᓗᕐᔪᐊᖃᖏᑦᑐᓂ, ᐅᓪᓗᖅ 14ᖑᓕᕐᒪᑦ ᑕᖅᑭᒥ ᐊᑖᕆᒥ ᖁᕕᐊᓱᖃᑎᒌᓚᐅᕐᐳᑦ ᓂᕆᕕᒡᔪᐊᕐᓗᑎᒡᓗ ᕿᑲᓚᐅᕐᐳᑦ ᐱᓇᓱᐊᕐᓂᕐᒥᖕᓂᑦ, ᐃᒻᒥᖕᓄᓪᓗ ᐊᑐᓂᑦ ᓂᕿᑦᓯᐊᕙᖁᑎᒥᖕᓂᒃ ᐂᑦᑑᑎᖃᑦᑕᐅᑎᓪᓗᑎᒃ.

²⁰ ᒧᐊᑎᑬᓗ ᑕᒪᒃᑯᓂᖓ ᐊᑐᕐᑕᐅᔪᓂᒃ ᑎᑎᕋᓚᐅᕐᐳᖅ ᐊᐅᓪᓚᕐᑎᓪᓗᒋᓪᓗ ᔫᑎᓄᑦ ᐊᖓᔪᖅᑳᕐᔪᐊᑉ ᐊᕼᐊᓱᐃᕋᔅᓯᐅᑉ ᓄᓇᖁᑎᖓᓃᑦᑐᓄᑦ ᓄᓇᓂ ᐊᕕᒃᑐᕐᓯᒪᔪᓃᑦᑐᓕᒫᓄᑦ, ᖃᓂᑦᑐᒦᑦᑐᓄᑦ ᐅᖓᓯᒃᑐᒦᑦᑐᓄᓪᓗ,

²¹ ᐅᖃᐅᑎᓚᐅᕐᐰᑦ ᓇᓗᓁᕐᓯᖁᓪᓗᒋᑦ ᓇᓪᓕᐅᓐᓂᕐᓯᐅᕐᕕᐅᖃᑦᑕᕐᓂᐊᕐᑑᖕᓂᒃ ᐊᕐᕌᒍᑕᒫᑦ ᐅᓪᓘᒃ ᒪᕐᕉᒃ 14ᓗ 15ᓗ ᑕᖅᑭᒥ ᐊᑖᕆᒥ,

²² ᑕᕝᕙᓂ ᐅᓪᓘᖕᓂ ᔫᑎᑦ ᐊᑭᕋᕐᑐᕐᑎᒥᖕᓂᒃ ᓵᓚᖃᓚᐅᕐᒪᑕ, ᑕᖅᑭᒥᓗ ᑕᕝᕙᓂ ᕿᒃᓵᖕᓂᖓᑦ ᒧᒥᒃᑎᑕᐅᓚᐅᕐᒪᑦ ᖁᕕᓱᖕᓂᕐᒧᑦ, ᐅᒡᒍᐊᕐᓂᖓᑦ ᖁᕕᐊᓱᖕᓂᓐᖑᕐᓗᓂ; ᑖᒃᑯᐊᒃ ᐅᓪᓘᒃ ᓂᕆᕕᒡᔪᐊᖃᑎᒌᒃᕕᒃᓴᐅᖕᒪᑎᒃ ᖁᕕᐊᓱᖃᑎᒌᖕᓂᕐᒧᑦ, ᐃᒻᒥᖕᓄᑦ ᓂᕿᒃᓴᑦᓯᐊᖑᓂᕐᐹᓂᒃ ᑐᓂᓯᖃᑦᑕᐅᑎᓗᑎᒃ ᐊᔪᕐᓴᕐᑐᓄᓪᓗ ᓂᕆᔭᒃᓴᓂᒃ ᑐᓂᓯᓗᑎᒃ.

²³ ᑕᕝᕙ ᔫᑎᑦ ᑕᒪᑐᒥᖓ ᐱᐅᓯᕐᑖᕐᐳᑦ ᐊᑐᕆᐊᓕᓚᐅᕐᑕᒥᖕᓂᒃ ᑍᒫᒃ ᒧᐊᑎᑬᑉ ᑍᒤᓕᐅᖁᓪᓗᒋᑦ ᑎᑎᕋᕐᕕᒋᓚᐅᕐᒪᒋᑦ.

²⁴ ᕼᐂᒪᓂ, ᕼᐊᒥᑕᑕᐅᑉ ᐃᕐᓂᖓ ᐊᒐᒊᑎ, ᔫᑎᓕᒫᑦ ᐊᑭᕋᕐᑐᕐᑎᖓᑦ, ᔫᑎᓂᒃ ᑐᖁᕅᔪᒪᓚᐅᕐᒪᑦ, ᓇᓚᐅᑦᑖᕈᑎᒃᑯᑦ ᐱᐅᕆᒥᒃ ᐊᑐᕐᓗᓂ, ᓄᖑᑦᓯᐊᕐᓗᒋᑦ ᐊᓯᕈᕈᒪᓚᐅᕐᒪᒋᑦ;

²⁵ ᐃᔅᑕᕐᓕ ᐊᖓᔪᖅᑳᕐᔪᐊᕐᒧᑦ ᐅᐸᒍᑎᓚᐅᕐᒪᑦ, ᑕᕝᕙ ᐊᖓᔪᖅᑳᕐᔪᐊᖅ ᐱᖁᔨᓕᓚᐅᕐᐳᖅ ᑎᑎᕋᕐᓗᓂᓗ ᑕᒪᓐᓇ ᐱᐅᖏᑦᑐᐊᓗᒃ ᐋᖅᑭᒃᑕᐅᓯᒪᔪᖅ ᕼᐂᒪᓂᒧᑦ ᔫᑎᓂᒃ ᓄᖑᑦᓯᔪᒪᓂᖅ ᑖᑦᓱᒧᖓ ᐅᑎᕐᑎᑕᐅᖔᖁᓪᓗᒍ, ᑖᓐᓇ ᐃᕐᓂᖏᓪᓗ ᕿᒥᑦᓯᕕᖕᒥ ᕿᒥᑕᐅᖁᓪᓗᒋᑦ.

²⁶ ᑍᒤᒻᒪᑦ ᑖᒃᑯᐊ ᐅᓪᓗᐃᑦ ᑍᔭᐅᓕᓚᐅᕐᐳᑦ ᐱᐅᕆᒻᒥᒃ, ᐊᑦᓯᕐᑕᐅᑦᔪᑎᖃᕐᓗᓂ ᓇᓛᐅᑦᓵᕈᑎᐅᑉ ᐊᑎᖓᓂᒃ ᐱᐅᕆᒻᒥᒃ. ᑍᒤᓕᐅᓚᐅᕐᐳᑦ ᑎᑎᕋᕐᑕᐅᓯᒪᔪᓕᒫᑦ ᑎᑎᕋᕐᓯᒪᖕᒪᑕ ᑖᒃᑯᓇᓂ ᑎᑎᖅᑲᓂ ᓵᓐᖓᔭᐅᓂᕆᓚᐅᕐᑕᖏᑦ, ᖃᓄᐃᓕᐅᕐᑕᐅᓂᕆᓚᐅᕐᑕᖏᓪᓗ,

²⁷ ᔫᑎᑦ ᐋᖅᑭᒃᓯᓚᐅᕐᐳᑦ ᐱᖁᔭᓕᐅᕐᓗᑎᒡᓗ ᐃᒻᒥᖕᓄᑦ ᑭᖑᕚᕆᓂᐊᕐᑕᖏᓪᓗ ᔫᑎᓄᑦ ᐃᓚᓕᐅᑎᔪᒪᒐᔭᕐᑐᑦ, ᐱᓐᖏᓮᓐᓇᖃᑦᑕᖏᓪᓗᑎᒃ ᑖᒃᑯᓂᖓ ᐅᓪᓘᖕᓂᒃ ᒪᕐᕉᖕᓂᒃ ᓇᓪᓕᐅᓐᓂᕐᓯᐅᖃᕐᑕᖁᓪᓗᒋᑦ ᐊᕐᕌᒍᑕᒫᑦ, ᑎᑎᕋᕐᑕᐅᓯᒪᔪᑦ ᒪᓕᒡᓗᒋᑦ ᖃᓄᐃᓕᐅᕆᐊᖃᕐᓂᖏᓐᓂᒃ ᐅᖃᕐᓯᒪᔪᑦ ᓇᓪᓕᐅᓐᓂᕐᒥᓗ ᓇᓗᓁᕐᑕᐅᓯᒪᔪᒥᒃ ᒪᓕᒡᓗᑎᒃ,

²⁸ ᑖᒃᑯᐊ ᐅᓪᓗᐃᑦ ᐃᖅᑲᐅᒪᔭᐅᖃᑦᑕᖁᓪᓗᒋᑦ ᐳᐃᒍᕐᑕᐅᑦᑍᓕᖁᓪᓗᒋᓪᓗ ᑭᖑᕚᕆᔪᒫᕐᑕᖏᓐᓄᑦ, ᐃᒡᓗᒥᐅᖃᑎᒌᓕᒫᓂᑦ, ᓄᓇᓕᓕᒫᓂᓗ ᐊᕕᒃᑐᕐᓯᒪᔪᓂ, ᐃᒡᓗᒐᓴᒡᔪᐊᓕᒫᓂᓗ, ᑖᒃᑯᓇᓂ ᐅᓪᓗᓂ ᐱᐅᕆᒻᒥᒃ ᑍᔭᐅᔪᓂ ᔫᑎᓕᒫᑦ ᓄᖅᑲᐅᑦᔨᑐᐃᓐᓇᖁᓇᒋᑦ, ᑖᒃᑯᐊᓗ ᐃᖅᑲᐅᒪᔭᐅᓂᖏᑦ ᐳᐃᒍᕐᑕᐅᓕᖁᓇᒋᑦ ᑭᖑᕚᖏᓐᓄᑦ.

²⁹ ᑕᕝᕙ ᑯᐃᓐ ᐃᔅᑕᕐ, ᐊᐱᕼᐂᓕᐅᑉ ᐸᓂᖓ, ᒧᐊᑎᑬᒥᑦ ᔫᑎᒥᑦ ᐃᑲᔪᕐᑕᐅᓪᓗᓂ, ᑎᑎᕋᓚᐅᕐᐴᒃ ᐱᔪᓐᓇᕐᑎᑕᐅᓂᕐᒥᒃ ᐊᑐᕐᓗᑎᒃ ᑕᒪᓐᓇ ᓇᓗᓁᕐᑕᐅᑦᓯᐊᓚᐅᕐᐳᖅ ᑎᑎᕋᕐᑕᖏᑕ ᐂᑉᐸᖏᓐᓂ ᑎᑎᕋᕐᑎᓪᓗᒋᒃ ᐱᐅᕆᒻ ᐱᑦᔪᑎᒋᓪᓗᒍ.

³⁰ ᑖᒃᑯᐊᓗ ᑎᑎᕋᕐᑕᐅᔪᑦ ᔫᑎᓕᒫᓄᑦ ᑐᓂᐅᕋᕐᑕᐅᓚᐅᕐᐳᑦ, ᐊᖓᔪᖅᑳᕐᔪᐊᑉ ᐊᕼᐊᓱᐃᕋᔅᓯᐅᑉ ᓄᓇᖁᑎᖏᓐᓃᑦᑐᓄᑦ ᐊᕕᒃᑐᕐᓯᒪᔪᓄᑦ 127ᓄᑦ, ᐅᖃᐅᓯᕐᑕᖃᕐᓗᑎᒃ ᖃᓄᐃᖏᑦᓯᐊᖁᔨᓂᕐᒥᒃ ᓱᓕᑦᓯᐊᖁᔨᓂᕐᒥᒡᓗ,

³¹ ᑖᒃᑯᐊ ᐅᓪᓗᐃᑦ ᐱᐅᕆᒻᒥᒃ ᑍᔭᐅᔪᑦ ᐊᑐᕐᑕᐅᔭᕆᐊᖃᕐᓂᖏᑕ ᓇᓗᓁᕐᑕᐅᓯᒪᑦᔪᑎᖏᓐᓂᒃ, ᑖᓐᓇ ᒧᐊᑎᑬ ᔫᑎ ᑯᐃᓐ ᐃᔅᑕᕐᓗ ᑎᑎᕋᕐᓗᑎᒃ ᔫᑎᓄᑦ ᓇᓗᓁᕐᓯᓚᐅᕐᐳᒃ, ᓇᖕᒥᓂᖅ ᓇᓗᓁᕐᓯᒪᔪᓂᒃ ᐱᖁᔭᖃᖁᓪᓗᒋᑦ ᑭᖑᕚᖏᑕᓗ ᖃᐅᔨᒪᑦᔪᑎᒃᓴᖏᓐᓂᒃ ᑕᒪᒃᑯᓂᖓ ᓂᕆᑦᑍᓕᓂᐅᓚᐅᕐᑐᓂᒃ ᕿᒃᓵᖕᓂᐅᓚᐅᕐᑐᓂᒡᓗ.

³² ᑕᒪᓐᓇ ᐃᔅᑕᐅᑉ ᐱᖁᔭᓕᐊᕆᓚᐅᕐᐹ ᑖᒃᑯᓇᓂ ᐅᓪᓗᓂ ᓇᓪᓕᐅᑎᖃᑦᑕᕐᓂᐊᕐᑐᓂ ᐱᐅᕆᒻᒥᒃ ᑍᔭᐅᔪᓂ, ᐅᓂᒃᑲᐅᑕᐅᓂᖏᑦ ᑎᑎᖅᑲᓂ ᑎᑎᕋᕐᑕᐅᓯᒪᕗᑦ.