ᐃᔅᑕᐅᑉ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑕᕝᕙ ᐊᖓᔪᖅᑳᕐᔪᐊᖅ ᕼᐂᒪᓂᓗ ᓂᕆᖃᑎᖃᕆᐊᕐᑐᕐᐴᒃ ᐃᔅᑕᕐᒥᒃ.

² ᑕᕝᕙ ᐂᐸᖓᓂᒃ ᓂᕆᖃᑎᒌᓕᕋᒥᒃ ᐃᒥᕐᓗᑎᒡᓗ ᕔᓂᒥᒃ, ᐊᖓᔪᖅᑳᕐᔪᐊᖅ ᐃᔅᑕᕐᒧᑦ ᐅᖃᒃᑲᓐᓂᕐᐳᖅ, “ᓱᓇᒥᒃ ᐱᔪᒪᕖᑦ ᑯᐃᓐ ᐊᓯᑖ? ᑐᓂᓯᕕᒋᓂᐊᕐᐸᒋᑦ ᐱᔪᒪᔭᕐᓂᒃ. ᐱᔪᒪᓪᓚᕆᒃᑕᖃᕈᕕᑦ, ᐊᒡᓛᑦ ᐊᖓᔪᖅᑳᐅᕕᖕᒪ ᐊᕝᕙᓪᓗᐊᖓᓂᒃ ᐱᔪᒪᑐᐊᕈᕕᑦ ᐱᑎᑦᓱᓐᓇᕐᐸᒋᑦ!”

³ ᑕᕝᕙ ᑯᐃᓐ ᐃᔅᑕᕐ ᑭᐅᓪᓗᓂ ᐅᖃᓕᕐᐳᖅ, “ᖁᕕᐊᒋᒍᕕᖓ, ᐊᖓᔪᖅᑳᕐᔪᐊᖅ, ᖃᓄᐃᒋᖏᒃᑯᕕᖓᓗ ᐊᖓᔪᖅᑳᕐᔪᐊᖅ, ᐃᓅᓯᕋ ᓴᐳᑎᔭᐅᖁᓪᓗᒍ ᕿᓄᕗᖓ, ᐃᓅᖃᑎᒪᓗ ᐃᓅᓯᖏᑦ ᓴᐳᑎᔭᐅᖁᓪᓗᒋᑦ ᕿᓄᑦᔪᑎᒋᕙᒃᑲ.

⁴ ᐃᓅᖃᑎᒃᑲᓗ ᐅᕙᖓᓗ ᓂᐅᕐᕈᑎᒋᔭᐅᓯᒪᒐᑦᑕ, ᐊᓯᕈᕐᑕᐅᖁᓪᓗᑕ, ᑐᖁᑕᐅᖁᓪᓗᑕ, ᓄᖑᑕᐅᑦᓯᐊᖁᓪᓗᑕᓗ. ᓂᐅᕐᕈᑎᒋᔭᐅᓂᐊᕈᑦᑕᓕ ᐊᖑᑎᓪᓗ ᐊᕐᓁᓪᓗ ᓯᐊᓛᒃᓴᐅᖁᓪᓗᑕ, ᓂᓪᓕᕋᔭᓐᖏᓚᖓ, ᑕᒪᓐᓇ ᐅᖁᒤᑦᑐᒦᑎᑕᐅᓂᕗᑦ ᐊᑦᔨᐅᑎᑕᒃᓴᐅᖏᒻᒪᑦ ᐊᖓᔪᖅᑳᕐᔪᐊᑉ ᐊᓯᐅᔨᒐᔭᕐᓂᖓᓄᑦ.”

⁵ ᑕᕝᕙ ᐊᖓᔪᖅᑳᕐᔪᐊᖅ ᐊᕼᐊᓱᐃᕋᔅ ᐊᐱᕆᕗᖅ ᑯᐃᓐ ᐃᔅᑕᕐᒧᑦ, “ᑭᓇᐅᕚ ᑍᓐᓇ, ᓇᓃᑉᐸᓗ, ᑍᒫᒃ ᐱᓇᓱᐊᕈᒪᓗᓂ ᐃᓱᒪᖃᕐᑐᖅ?”

⁶ ᐃᔅᑕᐅᑉ ᑭᐅᕚ, “ᑐᖁᕅᓇᓱᒃᑐᖅ ᐊᑭᕋᕐᑐᕐᑎᓗ ᐅᓇᐅᕗᖅ ᐱᐅᖏᑦᑐᐊᓗᖕᒥᒃ ᐱᓇᓱᐊᕐᑐᖅ ᕼᐂᒪᓂ!” ᑕᕝᕙ ᕼᐂᒪᓂ ᑲᑉᐱᐊᓱᒃᑐᐊᓘᓕᕐᐳᖅ ᐊᖓᔪᖅᑳᕐᔪᐊᑉ ᑯᐃᓪᓗ ᓵᖓᓂ.

⁷ ᑕᕝᕙ ᐊᖓᔪᖅᑳᕐᔪᐊᖅ ᓂᓐᖓᕕᒡᔪᐊᕐᓗᓂ ᓂᑯᕕᑉᐳᖅ ᓂᕆᕕᒡᔪᐊᕐᕕᖕᒥᑦ ᐊᖓᔪᖅᑳᕐᔪᐊᒃᑯᕕᐅᓪᓗ ᐱᕈᕐᓰᕕᖓᓄᐊᕐᓗᓂ; ᕼᐂᒪᓂᓕ ᐃᔅᑕᕐᒧᑦ ᕿᓄᕗᖅ ᐃᓅᓯᕐᒥᓂ ᓴᐳᑎᔭᐅᔪᒪᓪᓗᓂ, ᖃᐅᔨᒐᒥ ᐊᖓᔪᖅᑳᕐᔪᐊᖅ ᑖᑦᓱᒧᖓ ᓈᒻᒪᖏᑦᑐᒥᒃ ᐃᓱᒪᖃᓕᕐᒪᑦ.

⁸ ᐊᖓᔪᖅᑳᕐᔪᐊᕐᓗ ᐅᑎᕐᐳᖅ ᐊᖓᔪᖅᑳᕐᔪᐊᒃᑯᕕᐅᑉ ᐱᕈᕐᓰᕕᖓᓂᑦ ᑕᕝᕗᖓ ᓂᕆᕕᒋᔭᒥᖕᓄᑦ, ᕼᐂᒪᓂᓕ ᐹᒻᒪᖓᕗᖅ ᐃᔅᑕᐅᑉ ᐹᒻᒪᖓᕕᒋᔭᖓᑕ ᑭᒡᓕᖓᓂ; ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᐅᓈ ᐊᒡᓛᑦ ᑯᐃᖕᒥᒃ ᐊᕐᓇᕐᓂᐊᕋᓱᒃᑐᖅ ᐊᖏᕐᕋᕐᓯᒪᑎᓪᓗᖓ?” ᐊᖓᔪᖅᑳᕐᔪᐊᖅ ᑍᒫᒃ ᐅᖃᑐᐊᕐᒪᑦ, ᕼᐂᒪᓂᐅᑉ ᑮᓇᖓ ᐅᓕᒃᑕᐅᕗᖅ.

⁹ ᕼᐊᕐᐴᓇᓕ ᐊᖓᔪᖅᑳᕐᔪᐊᑉ ᐱᔨᖓᑦ ᐊᕐᓇᕐᓂᐊᕈᓐᓁᓪᓕᑎᑕᐅᓯᒪᔪᖅ ᑕᕝᕙᓂ ᓇᔫᑎᔪᖅ ᐊᖓᔪᖅᑳᕐᔪᐊᕐᒧᑦ ᐅᖃᕐᐳᖅ, “ᑕᑯᒋᑦ! ᕿᒥᑦᓯᕕᒃᑕᖃᕐᐳᖅ, 75ᓂᒃ ᐃᑎᒐᖕᓂᒃ ᐳᕐᑐᓂᓕᖕᒥᒃ, ᕼᐂᒪᓂᐅᑉ ᓴᓇᔭᐅᖁᓚᐅᕐᑕᖓᓂᒃ ᐃᒡᓗᖓᑕ ᓴᓂᐊᓂ ᒧᐊᑎᑬᒥᒃ ᕿᒥᑦᓯᕕᒋᔪᒪᓪᓗᓂᐅᒃ, ᑖᑦᓱᒥᖓ ᐊᖓᔪᖅᑳᕐᔪᐊᑉ ᐃᓅᓯᖓᓂᒃ ᓴᐳᑦᔨᓚᐅᕐᑐᒥᒃ, ᖃᐅᔨᑎᑦᓯᓚᐅᕐᓂᕐᒥᓄᑦ!” ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᑕᕝᕙᓂ ᕼᐂᒪᓂ ᕿᒥᑕᐅᓕᕐᓕ!”

¹⁰ ᑕᕝᕙᓂ ᕼᐂᒪᓂ ᕿᒥᑕᐅᕗᖅ ᕿᒥᑦᓯᕕᖕᒥ ᓴᓇᔭᐅᑎᓚᐅᕐᑕᒥᓂ ᒧᐊᑎᑬ ᐱᓪᓗᒍ. ᑕᕝᕙ ᐊᖓᔪᖅᑳᕐᔪᐊᖅ ᓮᒻᒪᕐᐳᖅ.