ᐃᔅᑕᐅᑉ ᐊᒡᓚᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖓᔪᖅᑳᕐᔪᐊᑉ ᐅᐱᓐᓇᕐᓯᑎᑦᓯᓂᖓ ᒧᐊᑎᑬᒥᒃ

¹ ᑕᒪᑐᒪᓂᓕ ᐅᓐᓄᐊᒥ ᐊᖓᔪᖅᑳᕐᔪᐊᖅ ᓯᓂᒍᓐᓁᓪᓕᕗᖅ; ᑕᕝᕙ ᑎᓕᓯᕗᖅ ᐊᖓᔪᖅᑳᕐᔪᐊᑉ ᐱᕙᓪᓕᐊᔪᖁᑎᖏᓐᓂ ᑎᑎᕋᕐᓯᒪᔪᑦ ᑕᕝᕗᓐᖓᕐᑕᐅᓗᑎᒃ ᐊᑐᐊᕐᑕᐅᖁᓪᓗᒋᑦ; ᑕᕝᕙ ᐊᑐᐊᕐᑕᐅᓕᕐᐳᑦ ᐊᖓᔪᖅᑳᕐᔪᐊᕐᒧᑦ.

² ᑕᕝᕙᓂᓗ ᑎᑎᕋᕐᓯᒪᔪᓂᒃ ᓇᓂᓯᔪᖃᕐᐳᖅ ᒧᐊᑎᑬᑉ ᐅᖃᐅᓯᖃᕐᓂᕆᓚᐅᕐᑕᖓᓂᒃ ᐊᖓᔪᖅᑳᕐᔪᐊᑉ ᐃᒡᓗᒥᓂ ᐱᔨᒋᔭᖏᒃ, ᐱᒡᑖᓇ ᑎᕆᔅᓗ, ᐊᖓᔪᖅᑳᕐᔪᐊᑉ ᐃᒡᓗᖓᓂ ᐃᑎᕐᑕᕐᕕᖕᒥ ᑲᒪᔨᐅᕙᒃᑑᒃ, ᐊᖓᔪᖅᑳᕐᔪᐊᕐᒥᒃ ᐊᕼᐊᓱᐃᕋᔅᒥᒃ ᑐᖁᑦᓯᔪᒪᓚᐅᕐᓂᖏᖕᓂᒃ.

³ ᑕᕝᕙ ᐊᖓᔪᖅᑳᕐᔪᐊᖅ ᐊᐱᕆᕗᖅ, “ᖃᓄᖅ ᒧᐊᑎᑬ ᐅᐱᒋᔭᐅᓯᒪᕚ ᖃᓄᕐᓗ ᓇᓗᓁᒃᑯᓯᕐᑕᐅᓯᒪᕚ ᑕᒪᑐᒧᖓ?” ᐱᔨᖏᑦ ᑭᐅᕗᑦ, “ᐱᓇᓱᐊᕐᕕᐅᓯᒪᓐᖏᓚᖅ ᑕᒪᑐᒧᖓ.”

⁴ ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᑭᓇᒥᒃ ᐅᕙᓃᑦᑐᖃᕐᐹ?” ᕼᐂᒪᓂᓕ ᑕᕝᕗᖓ ᓈᒻᒪᓈᕐᓗᓂ ᐊᖓᔪᖅᑳᕐᔪᐊᑉ ᐃᒡᓗᖓᑕ ᐊᕙᓗᐊᓄᑦ ᐃᑎᓕᕐᐳᖅ; ᑕᕝᕗᓐᖓᓚᕿᕗᖅ ᐊᖓᔪᖅᑳᕐᔪᐊᕐᒥᒃ ᐊᐱᕆᔭᕐᑐᕈᒪᓪᓗᓂ ᒧᐊᑎᑬᒥᒃ ᕿᒥᑕᐅᑎᑦᓯᖁᓪᓗᒍ ᕿᒥᑦᓯᕕᖕᒧᑦ ᐊᑐᐃᓐᓇᕈᕐᑎᓯᒪᔭᒥᓄᑦ.

⁵ ᐊᖓᔪᖅᑳᕐᔪᐊᑉ ᐱᔨᖏᑕ ᑭᐅᕚᑦ, “ᑕᕝᕙ ᕼᐂᒪᓂ ᑕᕝᕙᓃᑦᑐᖅ, ᐃᑎᑐᐃᓐᓇᕆᐊᖃᓕᕐᑐᖅ.” ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᐃᑎᕐᑎᑕᐅᓚᐅᕐᓕ.”

⁶ ᑕᕝᕙ ᕼᐂᒪᓂ ᐃᑎᕐᐳᖅ, ᐊᖓᔪᖅᑳᕐᔪᐊᓪᓗ ᐊᐱᕆᕚ, “ᐊᖑᑦ ᖃᓄᐃᓕᐅᑕᐅᔪᓐᓇᕋᔭᕐᐹ ᐊᖓᔪᖅᑳᕐᔪᐊᑉ ᖁᕕᐊᒋᓗᓂᐅᒃ ᐅᐱᓐᓇᕐᓯᑎᒐᔭᕐᑕᖓ?” ᕼᐂᒪᓂᓕ ᐆᒻᒪᑎᒥᒍᑦ ᐃᓱᒪᓕᕐᐳᖅ, “ᐊᖓᔪᖅᑳᕐᔪᐊᖅ ᐅᐱᒋᔭᒃᓴᖃᕐᓂᕐᓴᐅᔪᓐᓇᕐᐹ ᐊᓯᓐᓂᒃ.”

⁷ ᕼᐂᒪᓂᐅᓪᓗ ᐊᖓᔪᖅᑳᕐᔪᐊᖅ ᑭᐅᕚ, “ᐊᖑᑦ ᖁᕕᐊᒋᓗᒍ ᐅᐱᓐᓇᕐᓯᑎᑦᓱᒪᔧᑦ,

⁸ ᐅᓕᒡᔪᐊᕐᓂᒃ ᐊᑐᕐᓯᒪᔭᕐᓂᒃ ᐊᑎᑎᑕᐅᔪᒃᓴᐅᕗᖅ, ᕿᒻᒥᕐᔪᐊᕐᓂᓗ ᐃᑭᒪᕕᒋᓯᒪᔭᕐᓂ ᐃᑭᒪᓗᓂ, ᐊᑎᑎᑕᐅᓗᓂᓗ ᐊᖓᔪᖅᑳᕐᔪᐊᑉ ᓂᐊᖂᑎᖓᓂᒃ;

⁹ ᐊᓐᓄᕌᕐᓗ ᕿᒻᒥᕐᔪᐊᕐᓗ ᐂᔭᐅᔪᒃᓴᐅᕗᑦ ᐊᖓᔪᖅᑳᕐᔪᐊᑉ ᐊᖓᔪᖅᑳᖑᓂᕐᐹᖁᑎᖏᑕ ᐃᓚᖓᓐᓄᑦ; ᑖᑦᓱᒧᖓ ᐊᓐᓄᕌᒥᒃ ᐊᑎᓯᑎᑕᐅᖁᓪᓗᒍ ᕿᒻᒥᕐᔪᐊᒧᓪᓗ ᐃᑭᑎᓪᓗᓂᐅᒃ ᑖᓐᓇ ᐊᖓᔪᖅᑳᕐᔪᐊᑉ ᐅᐱᓐᓇᕐᓯᑎᑦᓱᒪᔭᖓ, ᕿᒻᒥᕐᔪᐊᒥ ᐃᑭᒪᑎᓪᓗᒍ ᑕᓯᒍᐊᕐᓂᐊᕐᒪᒍ ᐃᒡᓗᒐᓮᑦ ᐊᖅᑯᓯᓂᖏᑎᒍᑦ, ᓯᕗᓂᖓᓂᓗ ᕾᒐᓛᕐᑐᒃᓴᐅᕗᖅ, ‘ᑍᒫᒃ ᑕᕝᕙ ᐊᖓᔪᖅᑳᕐᔪᐊᑉ ᓇᓪᓕᐊᑦ ᐊᖑᑦ ᐅᐱᒋᔪᒪᔭᓂ ᐅᐱᒋᖃᑦᑕᕐᓂᐊᕐᐰᑦ!’”

¹⁰ ᑕᕝᕙ ᐊᖓᔪᖅᑳᕐᔪᐊᖅ ᕼᐂᒪᓂᒧᑦ ᐅᖃᕐᐳᖅ: “ᑐᐊᕕᕐᓗᑎᑦ ᐅᓕᒡᔪᐊᕋ ᕿᒻᒥᕐᔪᐊᕋᓗ ᐂᓕᒃᑭᑦ, ᑍᒫᒃ ᐅᖃᓚᐅᕋᕕᑦ, ᒧᐊᑎᑬᓗ ᔫᑎᐅᔪᖅ ᑍᒤᓕᐅᕐᕕᒋᓕᕈᒃ, ᐊᖓᔪᖅᑳᕐᔪᐊᑉ ᐃᒡᓗᖓᑕ ᐃᑎᕐᑕᕐᕕᐊᓂ ᐃᒃᓯᕙᔪᖅ. ᐅᖃᐅᓯᕆᔭᑎᑦ ᐊᑐᑦᓯᐊᕐᓂᐊᕐᐸᑎᑦ ᓇᓪᓕᐊᓐᓂᒡᓘᓐᓃᑦ ᐊᑐᓐᖏᑕᖃᖏᓪᓗᑎᑦ.”

¹¹ ᑕᕝᕙ ᕼᐂᒪᓂᐅᑉ ᐅᓕᒡᔪᐊᖅ ᕿᒻᒥᕐᔪᐊᕐᓗ ᐂᓪᓗᓂᒋᑦ, ᒧᐊᑎᑬᒧᑦ ᐊᑎᑎᑉᐰᑦ ᕿᒻᒥᕐᔪᐊᖓᓗ ᑕᓯᒍᐊᓕᕐᐹ ᐃᒡᓗᒐᓮᑦ ᐊᖅᑯᓯᓂᖏᑎᒍᑦ, ᕾᒐᓛᕐᓗᓂᓗ ᑖᑦᓱᒪ ᓯᕗᓂᖓᓂ, “ᑍᒫᒃ ᑕᕝᕙ ᐊᖓᔪᖅᑳᕐᔪᐊᑉ ᓇᓪᓕᐊᑦ ᐊᖑᑦ ᐅᐱᒋᔪᒪᔭᓂ ᐅᐱᒋᖃᑦᑕᕐᓂᐊᕐᐰᑦ!”

¹² ᑭᖑᓂᖓᒍᑦ ᒧᐊᑎᑬ ᐊᖓᔪᖅᑳᕐᔪᐊᑉ ᐃᒡᓗᖓᑕ ᐃᑎᕐᑕᕐᕕᐊᑕ ᓴᓂᐊᓄᑦ ᐅᑎᓚᐅᕆᕗᖅ. ᕼᐂᒪᓂᓕ ᑐᐊᕕᕐᓗᓂ ᐊᖏᕐᕋᕐᐳᖅ, ᕿᒃᓵᕕᒡᔪᐊᕐᓗᓂ ᑮᓇᓂ ᒪᑐᓯᒪᓪᓗᓂᐅᒃ.

¹³ ᕼᐂᒪᓂᓕ ᐅᓂᒃᑳᕐᒪᑦ ᓄᓕᐊᒥᓄᑦ ᔨᕆᓯᒧᑦ ᐃᓚᓐᓇᕆᔭᒥᓄᓪᓗ ᑕᒪᒃᑯᓂᖓ ᖃᓄᐃᓕᐅᖅᑲᐅᓂᕐᒥᓂᒃ, ᐃᓕᓯᒪᔪᖁᑎᖏᑕ ᓄᓕᐊᖓᑕᓗ ᔨᕆᓯᐅᑉ ᐅᖃᐅᑎᕚᑦ, “ᒧᐊᑎᑬᒧᑦ, ᔫᑎᒧᑦ ᓵᓚᐅᕙᓪᓕᐊᓕᕈᕕᑦ, ᓵᓚᒋᔪᓐᓇᕐᓂᐊᕈᓐᓁᕐᐸᑦ, ᓇᓗᓇᖏᑦᑐᒥᒡᓕ ᓵᓚᐅᖔᕐᓂᐊᓕᕐᐳᑎᑦ ᑖᑦᓱᒧᖓ.”

ᕼᐂᒪᓂᐅᑉ ᑐᖁᑕᐅᓂᖓ

¹⁴ ᓱᓕᓕ ᐅᖃᓪᓚᒃᑎᓪᓗᒋᑦ ᑖᑦᓱᒧᖓ, ᐊᖓᔪᖅᑳᕐᔪᐊᑉ ᐱᔨᖏᑦ ᕾᕗᑦ, ᑐᐊᕕᕐᓗᑎᒃ ᕼᐂᒪᓂᒥᒃ ᐂᒃᓯᓕᕐᑐᑦ ᓂᕆᔭᕐᑐᖃᑕᐅᔭᕆᐊᖃᕐᒪᑦ ᐃᔅᑕᐅᑉ ᓂᕆᕕᒡᔪᐊᕐᑎᑦᓯᓂᖓᓄᑦ.