ᐃᔅᑕᐅᑉ ᐊᒡᓚᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᔅᑕᐅᑉ ᓂᕆᔭᕐᑐᖁᔨᓂᖓ ᐊᖓᔪᖅᑳᕐᔪᐊᕐᒥᒃ ᕼᐂᒪᓂᒥᒡᓗ

¹ ᑕᕝᕙ ᐅᓪᓗᐃᑦ ᓂᕆᑦᑍᓕᓂᖏᑕ ᐱᖓᔪᒋᓕᕐᑕᖓᓂ ᐃᔅᑕᕐ ᐊᖓᔪᖅᑳᕐᓯᐅᑎᓂᒃ ᐊᓐᓄᕌᓂᒃ ᐊᑎᕗᖅ ᐊᖓᔪᖅᑳᕐᔪᐊᓪᓗ ᐃᒡᓗᖓᑕ ᐊᕙᓗᐊᑕ ᐃᓗᐊᓄᑦ ᐃᑎᕐᓗᓂ, ᐊᖓᔪᖅᑳᕐᔪᐊᑉ ᐃᒡᓗᖓᑕ ᐊᑭᓪᓗᐊᖓᓃᑦᑐᒧᑦ, ᐊᖓᔪᖅᑳᕐᔪᐊᕐᓕ ᐃᒃᓯᕙᐅᑕᕐᔪᐊᒥᓂ ᐃᒃᓯᕙᓚᐅᕐᐳᖅ ᐊᖓᔪᖅᑳᐅᕕᖕᒥᓂ, ᐃᑎᕐᑕᕐᕕᖓᓄᑦ ᓵᓐᖓᓪᓗᓂ.

² ᐊᖓᔪᖅᑳᕐᔪᐊᓪᓕ ᑯᐃᓐ ᐃᔅᑕᕐ ᑕᑯᒐᒥᐅᒃ ᐃᑎᕐᑕᕐᕕᐅᑉ ᓯᓚᑖᓂ ᓇᖏᕐᑐᖅ, ᖁᕕᐊᒋᓚᐅᕐᐹ, ᑎᒃᑯᐊᕐᓯᑦᔪᑎᒥᒡᓗ ᒎᓗᒥᒃ ᐃᓴᒡᕕᒋᕚ ᑎᒍᒥᐊᕐᑕᒥᓂᒃ. ᐃᔅᑕᕐᓗ ᕾᓪᓗᓂ ᐊᖓᔪᖅᑳᕐᔪᐊᑉ ᑎᒃᑯᐊᕐᓯᑦᔪᑎᖓᑕ ᓄᕗᐊ ᐊᒃᑐᕐᐹ.

³ ᑕᕝᕙ ᐊᖓᔪᖅᑳᕐᔪᐊᖅ ᐊᐱᕆᓕᕐᐳᖅ ᐃᔅᑕᕐᒧᑦ, “ᑯᐃᓐ ᐊᓯᑖ ᓱᔪᒪᒐᕕᑦ? ᐱᔪᒪᔭᕐᓂᒃ ᐅᖃᐅᑎᓚᐅᓐᖓ, ᐱᔪᒪᔭᕐᓂᒃ ᑐᓂᓯᕕᒋᓂᐊᕐᐸᒋᑦ ᐊᒡᓛᑦ ᐊᖓᔪᖅᑲᐅᕕᖕᒪ ᐊᕝᕙᓪᓗᐊᖓᓂᒃ ᑐᓂᓯᕕᒋᔪᓐᓇᕐᐸᒋᑦ.”

⁴ ᑕᕝᕙ ᐃᔅᑕᐅᑉ ᑭᐅᕚ, “ᐊᖓᔪᖅᑳᕐᔪᐊᖅ ᖃᓄᐃᒃᓴᖏᒃᑯᕕᑦ, ᕼᐂᒪᓂᓗ ᐃᓕᑦᓯᒃ ᓂᕆᔭᕐᑐᖁᕙᑦᓯᒃ ᐃᓕᑦᓯᖕᓄᑦ ᓂᕆᕕᒡᔪᐊᒃᓴᓕᐅᕐᓯᒪᒐᒪ.”

⁵ ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᑐᐊᕕᕐᓗᓯ ᕼᐂᒪᓂ ᕾᖁᔭᐅᓕ, ᐃᔅᑕᐅᑉ ᐱᖁᔨᓂᖓ ᒪᓕᒡᓗᒍ.” ᑕᕝᕙ ᐊᖓᔪᖅᑳᕐᔪᐊᖅ ᕼᐂᒪᓂᓗ ᓂᕆᔭᕐᑐᕐᐴᒃ ᐃᔅᑕᐅᑉ ᓂᕆᕕᒃᔪᐊᒃᓴᓕᐊᖓᓄᑦ.

⁶ ᓂᕆᕕᒃᔪᐊᕐᕕᖕᒦᓕᕐᓗᑎᒃ ᐃᒥᓕᕋᒥᒃ ᕔᓂᒥᒃ, ᐊᖓᔪᖅᑳᕐᔪᐊᖅ ᐃᔅᑕᕐᒧᑦ ᐅᖃᕐᐳᖅ, “ᓱᓇᒥᒃ ᑐᒃᓯᕋᕈᒪᕖᑦ? ᑐᓂᓯᕕᒋᓂᐊᕐᐸᒋᑦ ᐱᔪᒪᔭᕐᓂᒃ. ᐱᔪᒪᓪᓚᕆᒃᑕᖃᕈᕕᑦ, ᐊᒡᓛᑦ ᐊᖓᔪᖅᑲᐅᕕᖕᒪ ᐊᕝᕙᓪᓗᐊᖓᓂᒃ ᐱᔪᒪᑐᐊᕈᕕᑦ ᑐᓂᓯᕕᒋᔪᓐᓇᕐᐸᒋᑦ.”

⁷ ᑕᕝᕙ ᐃᔅᑕᕐ ᐅᖃᕐᐳᖅ, “ᑐᒃᓯᕋᕈᑎᒐ ᐱᔪᒪᔭᕋᓗ ᐃᒤᑦᑑᕗᖅ:

⁸ ᐊᖓᔪᖅᑳᕐᔪᐊᖅ ᖁᕕᐊᒋᒍᕕᖓ, ᑐᒃᓯᕋᕈᒪᓂᕋᓗ ᐊᖓᔪᖅᑳᕐᔪᐊᑉ ᖃᓄᐃᒋᖏᑉᐸᒍ ᐱᔪᒪᔭᓐᓂᒡᓗ ᑐᓂᓯᕕᒋᓂᐊᕈᓂᖓ, ᑕᕝᕙ ᐊᖓᔪᖅᑳᕐᔪᐊᖅ ᕼᐂᒪᓂᓗ ᕾᖁᑲᓐᓂᕐᐸᑦᓯᒃ ᓂᕆᕕᒃᔪᐊᒃᓴᓕᐅᕐᓂᐊᕐᑕᓐᓄᑦ ᐃᓕᑦᓯᒃ ᐱᑦᔪᑎᒋᓗᓯᒃ, ᑕᕝᕙ ᖃᐅᒃᐸᑦ ᑕᕝᕗᖓ ᕾᒍᑦᓯᒃ ᐊᖓᔪᖅᑳᕐᔪᐊᑉ ᐅᖃᐅᓯᕆᓯᒪᔭᖓ ᒪᓕᒡᓗᒍ ᐱᔪᒪᔭᓐᓂᒃ ᐅᖃᐅᑎᓛᕐᐸᑦᓯᒃ.”

ᕼᐂᒪᓂᐅᑉ ᑐᖁᑦᓯᔪᒪᓂᖓ ᒧᐊᑎᑬᒥᒃ

⁹ ᕼᐂᒪᓂᓕ ᑕᕝᕙᓐᖓᑦ ᐊᓂᓕᕐᐳᖅ ᖁᕕᐊᓱᒡᓗᓂ ᐆᒻᒪᑎᒥᒍᓪᓗ ᓮᒪᑦᓯᐊᕐᓗᓂ; ᒧᐊᑎᑬᓕ ᑕᑯᒐᒥᐅᒃ ᐊᖓᔪᖅᑳᕐᔪᐊᑉ ᐃᒡᓗᖓᑕ ᐃᑎᕐᑕᕐᕕᐊᑕ ᓴᓂᐊᓃᑦᑐᖅ, ᓂᑯᕕᖏᒻᒪᑦ ᐅᑯᖏᒻᒪᓪᓘᓐᓃᑦ ᕼᐂᒪᓂᒧᑦ, ᑕᕝᕙ ᕼᐂᒪᓂ ᒧᐊᑎᑬᒧᑦ ᓂᓐᖓᕕᒡᔪᐊᕐᐳᖅ.

¹⁰ ᓮᒻᒪᕐᔫᒥᓇᓱᐊᕋᒥᓕ, ᕼᐂᒪᓐ ᐊᖏᕐᕋᕐᐳᖅ; ᑕᕝᕙ ᐃᓚᓐᓇᕆᔭᓂ ᐃᒡᓗᒥᓄᑦ ᕾᖁᕔᑦ ᓄᓕᐊᓂᓗ ᔨᕆᓯ ᐃᓚᒋᔭᐅᖁᕚ.

¹¹ ᑕᕝᕙ ᕼᐂᒪᓂᐅᑉ ᐱᐅᔪᕆᓪᓗᓂ ᐅᖃᕐᕕᒋᓕᕐᐰᑦ ᐊᔪᕐᓴᖏᑦᑐᕐᔪᐊᖑᓂᕐᒥᓂᒃ, ᕿᑐᕐᖓᖏᑕᓗ ᐅᓄᕐᓂᖏᓐᓂᒃ, ᐊᖓᔪᖅᑳᕐᔪᐊᒧᓪᓗ ᐊᖓᔪᖅᑳᕈᕐᑎᑕᐅᓯᒪᓂᕐᒥᓂᒃ, ᐊᖓᔪᖅᑳᕐᔪᐊᓪᓗ ᐊᖓᔪᖅᑳᖁᑎᒋᔭᖏᓐᓂᑦ ᐱᔨᒋᔭᖏᓐᓂᓪᓗ ᐱᓪᓚᕆᐅᑎᑕᐅᓂᕐᓴᐅᓂᕐᒥᓂᒃ.

¹² ᐊᒻᒪ ᕼᐂᒪᓂ ᐅᖃᒃᑲᓐᓂᕐᐳᖅ, “ᐊᒻᒪᑦᑕᐅᖅ ᑯᐃᓐ ᐃᔅᑕᕐ ᒪᑯᓂᖓᑐᐃᓐᓇᖅ ᕾᖁᔨᓇᓂ ᐅᕙᓐᓂᒡᓗ ᐊᖓᔪᖅᑳᕐᔪᐊᒥᒡᓗ ᓂᕆᕕᒃᔪᐊᕆᐊᕐᑐᖁᔨᖅᑲᐅᕗᖅ ᐅᐸᓗᖎᕐᓯᒪᔭᒥᓂᒃ; ᖃᐅᒃᐸᑦᑕᐅᖅ ᓱᓕ ᐅᕙᓐᓂᒃ ᕾᒋᐊᓪᓚᖁᔨᒋᕗᖅ, ᐊᖓᔪᖅᑳᕐᔪᐊᕐᒥᒃ ᐂᑉᐸᑲᕐᓗᖓ.

¹³ ᑕᒪᒃᑯᐊᓕ ᐱᕚᓪᓕᕈᑎᒋᔪᓐᓁᖃᑦᑕᕐᐸᒃᑲ, ᑍᓐᓇ ᒧᐊᑎᑬ ᔫᑎᐅᔪᖅ ᑕᑯᑐᐊᕌᖓᒃᑯ ᐊᖓᔪᖅᑳᕐᔪᐊᑉ ᐃᒡᓗᖓᑕ ᓯᕗᕌᓂ ᐃᒃᓯᕙᔪᖅ.”

¹⁴ ᑕᕝᕙ ᓄᓕᐊᖓᑕ ᔨᕆᓯᐅᑉ ᐃᓚᓐᓇᕆᔭᓕᒫᖏᑕᓗ ᐅᖃᐅᑎᕚᑦ, “ᕿᒥᑦᓯᕕᒃᓴᒥᒃ ᓴᓇᔭᐅᑎᑦᓯᓚᐅᕆᑦ 75ᓂᒃ ᐃᑎᒐᖕᓂᒃ ᐳᕐᑐᓂᖃᕐᑎᓪᓗᒍ, ᐅᓪᓛᒃᑯᑦ ᐊᖓᔪᖅᑳᕐᔪᐊᖅ ᐅᖃᐅᑎᓂᐊᕋᕕᐅᒃ ᒧᐊᑎᑬ ᑕᕝᕙᓂ ᕿᒥᑕᐅᖁᓗᒍ; ᑕᕝᕙ ᖁᕕᐊᓱᑦᓯᐊᕐᓗᑎᑦ ᐊᖓᔪᖅᑳᕐᔪᐊᖅ ᓂᕆᕕᒡᔪᐊᕆᐊᕐᑐᖃᑎᒋᓛᕐᐸᑦ.” ᑕᒪᓐᓇ ᕼᐂᒪᓂᐅᑉ ᖁᕕᐊᒋᒐᒥᐅᒃ; ᑕᕝᕙ ᕿᒥᑦᓯᕕᒃᓴᒥᒃ ᓴᓇᔭᐅᑎᑦᓯᓕᕐᐳᖅ.