ᐃᔅᑕᐅᑉ ᐊᒡᓚᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᒧᐊᑎᑬᑉ ᐃᔅᑕᕐᒧᑦ ᐃᑲᔪᕐᑕᐅᔪᒪᓂᖓ

¹ ᑕᕝᕙ ᒧᐊᑎᑬ ᑕᒪᑐᒥᖓ ᐱᓇᓱᐊᕐᑕᐅᔪᒥᒃ ᖃᐅᔨᒐᒥ, ᐊᓐᓄᕌᓂ ᐊᓕᒃᐰᑦ ᐳᑐᕐᓛᒥᒡᓗ ᐊᑎᓪᓗᓂ ᐃᒻᒥᓂᒃ ᐊᕐᔭᓕᓂᕐᑎᕐᐳᖅ, ᐃᒡᓗᒐᓮᓪᓗ ᕿᑎᖓᓄᐊᕐᓗᓂ, ᓂᐱᖅᑯᕐᑐᓪᓗᓂᓗ ᕿᐊᓕᕐᐳᖅ ᐅᒡᒍᐊᕐᓂᕐᒧᑦ ᓂᐹᔪᐊᓘᓪᓗᓂ;

² ᐊᖓᔪᖅᑳᕐᔪᐊᑉ ᐃᒡᓗᖓᑕ ᐃᑎᕐᑕᕐᕕᖓᑕ ᓴᓂᐊᓄᐊᓚᐅᕐᐳᖅ, ᓇᓪᓕᐊᓪᓘᓐᓃᑦ ᐊᖓᔪᖅᑳᕐᔪᐊᑉ ᐃᒡᓗᖓᑕ ᐃᑎᕐᑕᕐᕕᖓᓄᐊᕆᖃᓚᐅᓐᖏᒻᒪᑦ ᐳᑐᕐᓛᓂᒃ ᐊᓐᓄᕌᕐᓯᒪᓗᓂ.

³ ᓄᓇᓕᓕᒫᓂ ᐊᕕᒃᑐᕐᓯᒪᔪᓂ ᐊᖓᔪᖅᑳᕐᔪᐊᑉ ᐱᖁᔭᓕᐊᕆᔭᖓᓄᑦ ᑎᑭᑕᐅᔪᑦ, ᔫᑎᑦ ᕿᒃᓵᒻᒪᕆᒃᓗᑎᒃ ᕿᐊᓚᐅᕐᐳᑦ, ᓂᕆᑦᑍᓕᓪᓗᑎᒃ, ᖁᕝᕕᐅᕐᓗᑎᒡᓗ, ᐅᒡᒍᐊᕐᓂᕐᒧᑦ; ᐅᓄᕐᑐᓪᓗ ᐳᑐᕐᓛᓂᒃ ᐊᓐᓄᕌᕐᓯᒪᕗᖅ ᐊᕐᔭᓕᓂᕐᑎᕐᓯᒪᓪᓗᑎᒡᓗ.

⁴ ᑕᕝᕙ ᐃᔅᑕᐅᑉ ᐱᔨᖏᑦ ᐊᕐᓁᑦ ᐊᖑᑎᓪᓗ ᐊᕐᓇᕐᓂᐊᕈᓐᓁᓪᓕᑎᑕᐅᓯᒪᔪᑦ ᐃᔅᑕᕐᒧᐊᕐᐳᑦ ᑕᒪᑐᒥᖓᓗ ᐅᖃᐅᑎᓪᓗᒍ, ᑕᕝᕙ ᑯᐃᓐ ᐃᓱᒪᔮᕐᑐᐊᓘᓕᕐᐳᖅ; ᐊᓐᓄᕌᓂᒡᓗ ᒧᐊᑎᑬᑉ ᐊᑎᔭᒃᓴᖏᓐᓂᒃ ᑐᓂᓯᕕᐅᖁᕚ ᐊᓐᓄᕌᖏᑦ ᐳᑐᕐᓛᑦ ᐲᕐᑕᐅᖁᓪᓗᒋᑦ, ᒧᐊᑎᑬᓕ ᐊᖏᓐᖏᓚᖅ.

⁵ ᑕᕝᕙ ᐃᔅᑕᐅᑉ ᕼᐊᑕᒃ ᕾᖁᕚ, ᑖᓐᓇ ᐊᖓᔪᖅᑳᕐᔪᐊᑉ ᐱᔨᖓ ᑎᓕᓯᒪᔭᖓ ᐃᔅᑕᕐᒧᑦ ᐱᔨᐅᖁᓪᓗᒍ ᐊᕐᓇᕐᓂᐊᕈᓐᓁᓪᓕᑎᑕᐅᓯᒪᔪᖅ, ᐃᔅᑕᐅᑉ ᑎᓕᕚ ᖃᐅᔨᓇᓱᐊᑦᓯᐊᖁᓪᓗᒍ ᒧᐊᑎᑬᒥᒃ, ᓱᖕᒪᑦ ᖃᓄᐃᒻᒪᓪᓗ ᑍᒤᓕᐅᕐᒪᖔᑦ.

⁶ ᑕᕝᕙ ᕼᐊᑕᒃ ᒧᐊᑎᑬᒧᐊᕐᐳᖅ ᐃᒡᓗᒐᓮᑦ ᐊᖅᑯᓯᓂᖓᓃᑎᓪᓗᒍ ᐊᖓᔪᖅᑳᕐᔪᐊᑉ ᐃᒡᓗᕐᔪᐊᖓᑕ ᐃᑎᕐᑕᕐᕕᖓᑕ ᓯᕗᕌᓂ.

⁷ ᒧᐊᑎᑬᓪᓗ ᐅᖃᐅᑎᕚ ᖃᓄᐃᓕᐅᕐᑕᐅᓂᕆᔭᓕᒫᒥᓂᒃ, ᖃᑦᓯᓂᒡᓗ ᑮᓇᐅᔭᓂᒃ ᕼᐂᒪᓂ ᐊᑭᓖᔪᒪᓯᒪᓂᖓᓂᒃ ᐊᖓᔪᖅᑳᕐᔪᐊᑉ ᑮᓇᐅᔭᒃᑯᕕᖓᓄᑦ ᑐᓂᔭᐅᓂᐊᕐᑐᓂᒃ ᔫᑎᑦ ᑐᖁᕋᕐᑕᐅᒃᐸᑕ.

⁸ ᐱᖁᔭᓕᐊᕆᔭᐅᔫᓪᓗ ᐅᖃᐅᓯᕐᑕᖏᑕ ᐊᑦᔨᖏᓐᓂᒃ ᕼᐊᑕᒃ ᑐᓂᓯᕕᒋᕚ ᓲᓴᒥ ᓴᖅᑭᑎᑕᐅᓯᒪᔪᓂᒃ, ᔫᑎᑦ ᑐᖁᕋᕐᑕᐅᖁᓪᓗᒋᑦ, ᑖᒃᑯᐊᓗ ᐃᔅᑕᕐᒧᑦ ᑕᑯᔭᐅᖁᕔᑦ ᑕᒪᑐᒥᖓᓗ ᑐᑭᓯᑎᑕᐅᖁᕚ, ᐊᖓᔪᖅᑳᕐᔪᐊᕐᒧᐊᕈᓐᓇᕐᒪᖔᓪᓗ ᐃᓗᖏᕐᑐᕐᓗᓂ ᕿᓄᕕᖃᖁᓪᓗᒍ ᐊᖓᔪᖅᑳᕐᔪᐊᕐᒥᒃ ᓴᐳᑦᔭᐅᖁᔨᓗᓂᓗ ᐃᓅᖃᑎᒥᓂᒃ.

⁹ ᕼᐊᑕᒃᓗ ᐃᔅᑕᕐᒧᐊᕋᒥ ᑕᒪᒃᑯᓂᖓ ᒧᐊᑎᑬᑉ ᐅᖃᐅᓯᖏᓐᓂᒃ ᐅᖃᐅᑎᕚ.

¹⁰ ᑕᕝᕙ ᐃᔅᑕᕐ ᕼᐊᑕᒃᒧᑦ ᐅᖃᕐᐳᖅ, ᒧᐊᑎᑬᒧᓪᓗ ᐅᖃᖁᓪᓗᓂᐅᒃ:

¹¹ “ᐊᖓᔪᖅᑳᕐᔪᐊᑉ ᐱᔨᓕᒫᖏᑦ ᐃᓄᓕᒫᓪᓗ ᐊᖓᔪᖅᑳᕐᔪᐊᑉ ᓄᓇᖁᑎᖏᓐᓃᑦᑐᑦ ᖃᐅᔨᒪᕗᑦ ᓇᓪᓕᐊᑦ ᐊᖑᑦ ᐊᕐᓇᕐᓘᓐᓃᑦ ᐊᖓᔪᖅᑳᕐᔪᐊᑉ ᐃᒡᓗᖓᑕ ᐊᕙᓗᐊᑕ ᐃᓗᐊᓄᐊᕋᔭᕐᐸᑦ, ᐊᖓᔪᖅᑳᕐᔪᐊᕐᒧᑦ ᕾᖁᔭᐅᓯᒪᖏᓪᓗᓂ, ᐊᖓᔪᖅᑳᕐᔪᐊᖅ ᐱᖁᔭᖃᕐᐳᖅ ᑕᒪᑐᒧᖓ ᐊᑕᐅᓯᕐᒥᒃ: ᑍᒤᑦᑐᑦ ᑐᖁᑕᐅᔭᕆᐊᖃᕐᒪᑕ, ᓇᓪᓕᐊᓪᓕ ᐊᖓᔪᖅᑳᕐᔪᐊᑉ ᐊᔭᐅᑉᐱᐊᖓᓂᒃ ᒎᓗᒥᒃ ᐊᒃᑐᕐᓯᑎᑕᐅᔪᖅ, ᑭᓯᒥ ᐃᓅᑎᑕᐅᔪᓐᓇᕐᐳᖅ. ᐅᕙᖓᓕ ᓱᓕ ᕾᖁᔭᐅᓯᒪᓐᖏᓚᖓ ᐊᖓᔪᖅᑳᕐᔪᐊᕐᒧᑦ ᐃᑎᖁᓗᖓ ᑖᒃᑯᓇᓂ ᐅᓪᓗᓂ 30ᓂ.”

¹² ᐃᔅᑕᕐᐅᓪᓗ ᐅᖃᐅᓯᕆᔭᖏᑦ ᒧᐊᑎᑬᒧᑦ ᐅᖃᐅᓯᕆᔭᐅᕗᑦ.

¹³ ᒧᐊᑎᑬᓪᓗ ᐃᔅᑕᕐ ᑭᐅᔭᐅᖁᕚ ᐃᒫᒃ: “ᐃᓗᒃᑯᑦ ᐃᓱᒪᖃᕐᑍᓕᒋᑦ ᔫᑎᐅᖃᑎᓕᒫᕐᓂᑦ ᐊᑦᑕᕐᓇᖏᑦᑐᒦᓐᓂᕐᓴᐅᓇᓱᒋᓗᑎᑦ ᐊᖓᔪᖅᑳᕐᔪᐊᑉ ᐃᒡᓗᖓᓂᒥᐅᑕᐅᓂᕐᓄᑦ.

¹⁴ ᒫᓐᓇᐅᔪᕐᓕ ᓂᓪᓕᐊᓂᐊᖏᒃᑯᕕᑦ, ᑕᕝᕙ ᔫᑎᑦ ᐊᓯᖕᓂᑦ ᐃᑲᔪᕐᑕᐅᓂᐊᕐᐳᑦ, ᐃᕝᕕᓪᓕ ᐊᑖᑕᒃᑯᑎᓪᓗ ᑐᖁᑕᐅᓛᕐᐳᓯ. ᖃᐅᔨᒪᓇᓐᖏᓚᖅ; ᐃᒻᒪᖄᓕ ᑕᒪᓐᓇ ᐱᓂᐊᕐᓂᐅᓕᕐᑐᖅ ᐱᑦᔪᑎᒋᓪᓗᒍ ᐊᖓᔪᖅᑳᕐᔪᐊᖃᕐᕕᖕᒦᓚᕿᕗᑎᑦ.”

¹⁵ ᑕᕝᕙ ᐃᔅᑕᐅᑉ ᐅᖃᐅᑎᕔᑦ ᒧᐊᑎᑬᒧᑦ ᑭᐅᖁᓪᓗᒋᑦ ᐃᒫᒃ:

¹⁶ “ᔫᑎᓕᒫᑦ ᑲᑎᖁᓚᐅᒃᑭᑦ ᑕᕝᕙᓂ ᓲᓴᒦᑦᑐᑦ, ᐱᑦᔪᑎᒋᓗᖓ ᓂᕆᑦᑍᓕᖁᓪᓗᒋᑦ; ᐅᓪᓗᓂᒃ ᐱᖓᓱᓂᒃ ᓱᓇᒥᒡᓘᓐᓃᑦ ᓂᕆᖁᓇᒋᑦ ᐃᒥᖁᓇᒋᓪᓗ, ᐅᓐᓄᐊᒃᑯᑦ ᐅᓪᓗᒃᑯᓪᓘᓐᓃᑦ. ᐱᔨᒋᔭᒃᑲ ᐃᓚᒋᓗᒋᑦ ᓂᕆᑦᑍᓕᓂᐊᕆᕗᒍᑦ ᑍᒫᑦᓮᓐᓇᖅ. ᑕᒪᑐᒪ ᑭᖑᓂᖓᒍᑦ ᐊᖓᔪᖅᑳᕐᔪᐊᒧᐊᓛᕐᐳᖓ, ᐱᖁᔭᖏᑦ ᒪᓕᒡᓗᒋᑦ ᑍᒤᑦᓴᕆᐊᖃᖏᒃᑲᓗᐊᕐᓗᖓ; ᑐᖁᑕᐅᓂᐊᕈᒪ, ᑕᕝᕙ ᑐᖁᑕᐅᓂᐊᕐᐳᖓ.”

¹⁷ ᑕᕝᕙ ᒧᐊᑎᑬ ᐊᓂᕗᖅ ᐱᓇᓱᐊᓕᕐᓗᓂᓗ ᐃᔅᑕᐅᑉ ᐱᖁᔨᑦᔪᑎᒋᔭᓕᒫᖏᓐᓂ.