ᐃᔅᑕᐅᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᔅᑕᐅᑉ ᑯᐃᓐᖑᕐᓂᖓ

¹ ᑕᒪᒃᑯᐊ ᑭᖑᓂᖓᑦᑎᒍᑦ, ᐊᖓᔪᖅᑳᕐᔪᐊᖅ ᐊᕼᐊᓱᐃᕋᔅ ᓂᓐᖓᐅᒪᔪᓐᓃᕋᒥ, ᐃᖅᑲᐅᒪᓕᓚᐅᕐᐳᖅ ᕚᔅᑎᒥᒃ, ᖃᓄᐃᓕᐅᓚᐅᕐᓂᖓᓂᒡᓗ, ᐱᖁᔨᑦᔪᑎᓕᐅᓚᐅᕐᓂᕐᒥᓂᒡᓗ ᑎᑎᕋᕐᑎᑦᓯᓪᓗᓂ ᑖᑦᓱᒥᖓ ᓈᒻᒪᒃᓴᓐᖏᐅᑎᒥᓂᒃ.

² ᑕᕝᕙ ᐊᖓᔪᖅᑳᕐᔪᐊᑉ ᐃᓱᒪᓕᐅᕐᑎᖏᑕ ᐃᓚᖏᑦ ᑕᕝᕙᓂ ᓇᔫᑎᔪᑦ ᐊᖓᔪᖅᑳᕐᔪᐊᒧᑦ ᐅᖃᕐᐳᑦ, “ᐅᐃᖃᓚᐅᕐᓯᒪᖏᑦᑐᓂᒃ ᐊᕐᓇᑦᓯᐊᕙᖕᓂᒃ ᕿᓂᕐᑎᑦᓯᓚᐅᕆᑦ ᓂᕈᐊᕐᕕᒋᓛᕐᑕᕐᓂᒃ;

³ ᓄᓇᓕᖁᑎᖕᓃᑦᑐᓂᒃ ᐊᑐᓂᑦ ᑲᒪᔨᐅᓂᐊᕐᑐᓂᒃ ᑎᓕᓯᓗᑎᑦ, ᑖᒃᑯᐊ ᐊᕐᓇᑦᓯᐊᕙᖕᓂᒃ ᐅᐃᖃᓚᐅᕐᓯᒪᖏᑦᑐᓂᒃ ᑲᑎᑦᓯᓗᑎᒃ ᐅᕗᖓ ᓇᔪᕐᑕᕐᓄᐊᕈᑦᔨᖁᓪᓗᒋᑦ ᐊᖓᔪᖅᑳᕐᔪᐊᒃᑯᕕᖕᒧᑦ ᓄᓇᒧᑦ ᓲᓴᒧᑦ, ᐊᕐᓇᒃᑯᕕᖕᒧᐊᕐᑕᐅᓗᑎᒃ, ᑲᒪᒋᔭᐅᖁᓪᓗᒋᑦ ᐱᔨᖕᓄᑦ ᕼᐃᒊᒧᑦ ᐃᒡᔪᐃᕐᑕᐅᓯᒪᔪᒧᑦ ᐊᕐᓇᓂᒃ ᑲᒪᔨᐅᕙᒃᑐᒧᑦ; ᑕᕝᕙᓂ ᐱᐅᓴᕐᑕᐅᑦᓯᐊᕈᓐᓇᖁᓪᓗᒋᑦ ᐅᐸᓗᖎᔭᕐᑕᐅᓗᑎᒃ.

⁴ ᑖᒃᑯᓇᓐᖓᑦ ᐊᕐᓇᑦᓯᐊᕙᐅᒋᔭᕐᓂᒃ ᓂᕈᐊᕈᓐᓇᖁᓪᓗᑎᑦ ᑯᐃᓐᖑᕐᓂᐊᕐᑐᒥᒃ ᕚᔅᑎᒥᒃ ᐃᓇᖐᔪᒃᓴᐅᖁᓪᓗᒍ.” ᑕᒪᓐᓇ ᐊᖓᔪᖅᑳᕐᔪᐊᑉ ᐃᓱᒪᓕᐅᕈᑕᐅᔪᖅ ᐊᑲᐅᒋᕚ, ᑍᒫᒡᓗ ᐱᓇᓱᐊᓕᕐᓗᓂ.

⁵ ᑕᕝᕙᓂ ᓲᓴᒥ ᐊᖓᔪᖅᑳᕐᔪᐊᒃᑯᕕᖕᒥ ᔫᑎᑕᖃᓚᐅᕐᐳᖅ ᒧᐊᑎᑬᒥᒃ ᐊᑎᓕᖕᒥᒃ ᔧᕆᐅᑉ ᐃᕐᓂᖓᓂᒃ; ᐊᑖᑕᑦᓯᐊᖃᕐᓗᓂ ᓯᒥᐂᒥᒃ ᑭᓯᐅᑉ ᐃᕐᓂᖓᓂᒃ, ᐱᓐᔭᒥᓂᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ.

⁶ ᑖᓐᓇ ᑮᓯ ᔨᕉᓴᓕᒥᑦ ᐊᐅᓪᓚᕈᑦᔭᐅᖃᑕᐅᓯᒪᔪᖅ ᓵᓚᐅᔪᑦ ᐊᐅᓪᓚᕈᑦᔭᐅᓕᕐᑎᓪᓗᒋᑦ ᑎᒍᔭᐅᖃᑕᐅᓪᓗᓂ ᔫᑕᐅᑉ ᐊᖓᔪᖅᑳᕐᔪᐊᖓ ᔨᑯᓁᐊ ᑎᒍᔭᐅᑎᓪᓗᒍ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᓂᐱᑯᓁᓴᒧᑦ ᐊᐅᓪᓚᕈᑦᔭᐅᑎᓪᓗᒋᑦ.

⁷ ᒧᐊᑎᑬᓪᓗ ᓇᒃᓴᓚᐅᕐᐹ ᕼᐊᑖᓴ, ᕼᐄᑉᕉᑎᑐᑦ ᑍᒫᒃ ᐊᑎᓕᒃ, ᑖᓐᓇ ᐃᔅᑕᕐ, ᒧᐊᑎᑬᑉ ᐊᒃᑲᖓᑕ ᐸᓂᖓ, ᑖᓐᓇ ᐊᑖᑕᖃᓚᐅᓐᖏᓚᖅ ᐊᓈᓇᖃᕋᓂᓗ; ᐅᐃᒡᒐᓲᓪᓗᓂ ᐃᓂᖁᓇᕐᐳᖅ ᐊᕐᓇᑦᓯᐊᕙᐅᓪᓗᓂᓗ, ᑖᑦᓱᒪ ᐊᑖᑕᖓ ᐊᓈᓇᖓᓗ ᑐᖁᖕᒪᑎᒃ, ᒧᐊᑎᑬᑉ ᑎᒍᐊᕐᑖᕆᓚᐅᕐᐹ ᓇᖕᒥᓂᖅ ᐸᓂᖕᒥᑐᑦ ᐱᓕᕐᓗᓂᐅᒃ.

⁸ ᑍᒤᒻᒪᑦ, ᐊᖓᔪᖅᑳᕐᔪᐊᑉ ᐱᖁᔨᑦᔪᑎᖓ ᑎᑎᕋᐅᓯᕆᔭᖓᓗ ᑐᓴᕐᑕᐅᒐᒥ, ᐊᕐᓁᑦ ᐅᐃᒡᒐᓱᐃᑦ ᐅᓄᕐᑐᑦ ᑲᑎᕐᓱᕐᑕᐅᓕᕐᒪᑕ ᑕᕝᕗᖓ ᓄᓇᒧᑦ ᓲᓴᒧᑦ ᐊᖓᔪᖅᑳᕐᔪᐊᒃᑯᕕᖕᒧᑦ, ᕼᐃᒊᒧᑦ ᑲᒪᒋᔭᐅᑎᓪᓗᒋᑦ, ᑕᕝᕙ ᐃᔅᑕᕐ ᐊᖓᔪᖅᑳᕐᔪᐊᒃᑯᕕᖕᒧᑦ ᐋᑕᐅᓚᐅᕆᕗᖅ, ᕼᐃᒊᑉ ᑲᒪᒋᔭᖏᓐᓄᑦ ᐊᕐᓇᓄᑦ.

⁹ ᕼᐃᒊᓪᓕ ᐃᔅᑕᕐ ᖁᕕᐊᒋᒐᒥᐅᒃ, ᑍᒤᒻᒪᑦ ᐱᐅᓂᕐᐹᒥ ᐃᓂᖃᕐᑎᓕᕐᐹ, ᑎᒥᖓᓗ ᐱᐅᓴᓯᑦᓴᐅᑎᒋᓪᓗᓂᐅᒃ ᓂᕆᔭᒃᓴᖏᓪᓗ ᐊᑐᐃᓐᓇᐅᑎᓕᕐᐰᑦ ᑖᑦᓱᒧᖓ, ᓂᕈᐊᕐᑕᐅᓯᒪᔪᓂᒡᓗ ᐊᕐᓇᓂᒃ 7ᓂᒃ ᐱᔨᑲᑖᖃᓕᕐᑎᑉᐹ ᐊᖓᔪᖅᑳᕐᔪᐊᖃᕐᕕᖕᒥᑦ ᐱᓯᒪᔪᓂᒃ, ᐃᓂᖃᕐᑎᓕᕐᐹᓗ ᐱᔨᒋᔭᖏᓪᓗ ᐃᓂᒃᓴᑦᓯᐊᕙᐅᓂᕐᐹᒧᑦ ᐊᕐᓁᑦ ᐃᓂᒋᔭᖏᓐᓂ ᐃᓂᖃᓕᓚᐅᕐᐳᖅ.

¹⁰ ᐃᔅᑕᕐᓕ ᖃᐅᔨᑎᑦᓯᓚᐅᓐᖏᓚᖅ ᐃᓅᖃᑎᒥᓂᒃ ᐃᓚᒥᓂᒡᓗ, ᒧᐊᑎᑬᑉ ᑕᒪᑐᒥᖓ ᖃᐅᔨᑎᑦᓯᖁᓚᐅᖏᒻᒪᒍ.

¹¹ ᖃᐅᑕᒫᓪᓕ ᒧᐊᑎᑬ ᐊᕐᓁᑦ ᐃᒡᓗᖏᑕ ᐃᑎᕐᑕᕐᕕᐊᒍᑦ ᐅᑎᕐᑕᕐᓗᓂ ᐱᓱᑲᑕᒃᐸᓚᐅᕐᐳᖅ, ᖃᐅᔨᒪᓇᓱᐊᕐᓗᓂ ᐃᔅᑕᕐ ᖃᓄᐃᑕᐅᕙᓪᓕᐊᖕᒪᖔᑦ ᖃᓄᐃᖏᑦᓯᐊᕋᓗᐊᕐᒪᖔᓪᓗ.

¹² ᐊᕐᓁᑦ ᐅᐃᒡᒐᓱᐃᑦ ᐊᑐᓂᑦ ᐱᕕᒃᓴᖓᑦ ᓇᓪᓕᐅᑎᔭᕌᖓᑦ ᐊᖓᔪᖅᑳᕐᔪᐊᕐᒧᑦ ᐊᕼᐊᓱᐃᕋᓯᒧᑦ ᐃᑎᕐᑎᑕᐅᕙᓚᐅᕐᐳᑦ ᑕᖅᑭᓂᒃ 12ᓂᒃ ᐅᐸᓗᖎᔭᓚᐅᕐᑎᓪᓗᒋᑦ, ᐊᕐᓁᑦ ᐊᑐᓂᑦ ᐅᐸᓗᖎᔭᕐᑕᐅᔭᕆᐊᖃᕐᑕᖏᑦ ᓈᒻᒪᒃᓯᔭᕌᖓᑕ, ᐅᓪᓗᐃᑦ ᐋᖅᑭᒃᑕᐅᓯᒪᓚᐅᕐᐳᑦ ᐅᐸᓗᖎᔭᕐᑕᐅᓂᕆᔭᒃᓴᖏᑦ, ᑕᖅᑭᓂᒃ ᐱᖓᓲᔪᕐᑐᓂᒃ ᒫᕐᒧᑦ ᐅᕐᓱᕐᑎᕐᑕᐅᖃᑦᑕᓚᐅᕐᐳᑦ, ᐊᒻᒪ ᑕᖅᑭᓂᒃ ᐱᖓᓲᔪᕐᑐᓂᒃ ᑎᐱᑦᓯᐊᕆᒃᑐᒧᑦ ᐅᕐᓱᕐᑎᕐᑕᐅᓕᕆᓪᓗᑎᒃ; ᐊᕐᓁᓪᓗ ᑕᑯᒥᓇᕐᓴᐅᑎᖏᓐᓄᑦ ᐅᐸᓗᖎᔭᕐᑕᐅᓪᓗᑎᒃ.

¹³ ᑍᒫᒃ ᐅᐸᓗᖎᔭᕐᑕᐅᔭᕇᕌᖓᒥᒃ, ᐊᑐᓂᑦ ᐅᐃᒡᒐᓱᐃᑦ ᐊᖓᔪᖅᑳᕐᔪᐊᕐᒧᑦ ᐃᑎᕐᑎᑕᐅᕙᓚᐅᕐᐳᑦ, ᐊᕐᓁᓪᓗ ᐊᑐᓂᑦ ᐃᓱᒪᕐᓱᕐᑎᑕᐅᓚᐅᕐᐳᑦ ᓱᓇᓂᒃ ᐊᑐᕈᒪᔭᒥᖕᓂᒃ ᐊᑐᕈᓐᓇᕐᓗᑎᒃ ᑕᕝᕙᓐᖓᑦ ᐊᕐᓁᑦ ᐃᒡᓗᖓᓂᑦ ᐊᖓᔪᖅᑳᕐᔪᐊᒃᑯᕕᖕᒧᑦ ᐂᓕᑐᐊᕈᑎᒃ.

¹⁴ ᐅᓐᓄᒃᑯᑦ ᐊᖓᔪᖅᑳᕐᔪᐊᕐᒧᐊᕈᓂ, ᐅᓪᓛᒃᑯᑦ ᖃᐅᑎᓪᓗᒍ ᐊᓂᕙᓚᐅᕐᐳᖅ ᐊᕐᓁᑦ ᐃᒡᓗᖓᑕ ᐂᑉᐸᖓᓄᑦ ᐂᑎᑕᐅᓕᕐᓗᓂ, ᑲᒪᒋᔭᐅᓕᕐᓗᓂ ᓵ-ᐊᔅᒑᔅᒧᑦ, ᐊᖓᔪᖅᑳᕐᔪᐊᑉ ᓄᓕᐊᒃᑲᓐᓂᖏᑕ ᑲᒪᔨᖓᓄᑦ ᐃᒡᔪᐃᕐᑕᐅᓯᒪᔪᒧᑦ; ᐊᕐᓇᖅ ᐊᖓᔪᖅᑳᕐᔪᐊᕐᒦᑦᑐᕕᓂᐅᒍᓂ ᐅᑎᕐᑎᑕᐅᕙᓚᐅᓐᖏᓚᖅ ᐊᖓᔪᖅᑳᕐᔪᐊᕐᒧᑦ, ᑭᓯᐊᓂ ᐊᖓᔪᖅᑳᕐᔪᐊᑉ ᖁᕕᐊᒋᓐᓂᕈᓂᐅᒃ ᐊᑎᖓ ᑍᓗᒍ ᕾᖁᒐᔭᕐᐹ.

¹⁵ ᐃᔅᑕᕐᐅᓪᓕ ᐊᖓᔪᖅᑳᕐᔪᐊᕐᒧᑦ ᐅᐸᒍᑎᕕᒃᓴᖓ ᓇᓪᓕᐅᑎᖕᒪᑦ, ᑖᓐᓇ ᐊᐱᕼᐂᓕᐅᑉ ᒧᐊᑎᑬᑉ ᐊᒃᑲᖓᑕ ᐸᓂᖓ ᒧᐊᑎᑬᑉ ᑎᒍᐊᕐᑖᕆᓯᒪᓕᕐᑕᖓ ᐸᓂᖕᒥᑐᑦ ᐱᓕᕐᓗᓂᐅᒃ, ᓱᓇᒥᒃ ᑐᒃᓯᕋᓚᐅᓐᖏᓚᖅ ᕼᐃᒊᓪᓕ ᐊᖓᔪᖅᑳᕐᔪᐊᑉ ᐱᔨᖓᑕ ᐃᒡᔪᐃᕐᑕᐅᓯᒪᔫᑉ, ᐊᕐᓇᓂᒃ ᑲᒪᔨᒋᔭᐅᔫᑉ ᐊᑐᖁᔭᖏᓐᓂᒃ ᑭᓯᐊᓂ ᐊᑐᓚᐅᕐᐳᖅ. ᐃᔅᑕᕐᓗ ᑕᑯᔪᓕᒫᓄᑦ ᑖᑦᓱᒥᖓ ᖁᕕᐊᒋᔭᐅᓚᐅᕐᐳᖅ.

¹⁶ ᑕᕝᕙ ᐃᔅᑕᕐ ᐊᖓᔪᖅᑳᕐᔪᐊᕐᒧᑦ ᐊᕼᐊᓱᐃᕋᔅᒧᑦ ᐂᑎᑕᐅᕗᖅ, ᐊᖓᔪᖅᑳᕐᔪᐊᑉ ᐃᒡᓗᖓᓄᑦ ᑕᖅᑮᑦ 10ᖓᓐᓂ, ᑎᐲᓯᒥᒃ ᑍᔭᐅᔪᒥ, ᐊᖓᔪᖅᑳᕐᔪᐊᑉ ᐊᖓᔪᖅᑳᖑᓂᖓᑕ 7ᒋᓕᕐᑕᖓᓂ.

¹⁷ ᐊᖓᔪᖅᑳᕐᔪᐊᓪᓗ ᐃᔅᑕᕐ ᓇᒡᓕᒋᓂᕐᐹᕆᓕᕐᐹ ᐊᕐᓇᓕᒫᓂᑦ, ᖁᕕᐊᒋᓪᓗᒍᓗ ᐱᐅᒋᓂᕐᓴᕆᓕᕐᐹ ᐅᐃᒡᒐᓲᖃᑎᓕᒫᖏᓐᓂᑦ; ᑕᕝᕙ ᑯᐃᑉ ᓂᐊᖂᑎᖓᓂᒃ ᐊᑎᑎᑉᐹ ᑯᐃᓐᖑᕐᑎᓪᓗᒍᓗ ᐃᓇᖐᑎᑉᐹ ᕚᔅᑎᒥᒃ.

¹⁸ ᑕᕝᕙ ᐊᖓᔪᖅᑳᕐᔪᐊᖅ ᓂᕆᕕᒃᔪᐊᕐᑎᑦᓯᓕᕐᐳᖅ ᐊᖓᔪᖅᑳᖁᑎᒥᓂᒃ ᐱᔨᓕᒫᒥᓂᒡᓗ; ᐃᔅᑕᐅᑉ ᓂᕆᕕᒡᔪᐊᕈᑕᐅᓂᖓᓂᒃ ᑍᓪᓗᒍ. ᐅᓪᓗᕐᓗ ᑖᓐᓇ ᑖᒃᓰᔭᕐᕕᐅᖁᓚᐅᓐᖏᓛ ᓄᓇᓂ ᐊᖓᔪᖅᑲᐅᕕᓕᒫᒥᓂ, ᑐᓂᓯᓚᐅᕐᐳᕐᓗ ᐊᖓᔪᖅᑳᕐᔪᐊᑉ ᑐᓂᕐᕈᑎᖏᓐᓂᒃ ᐊᓐᓂᕈᓱᒐᓂ.

ᒧᐊᑎᑬᑉ ᐊᖓᔪᖅᑳᕐᔪᐊᕐᒥᒃ ᓴᐳᑦᔨᓂᖓ

¹⁹ ᐅᐃᒡᒐᓱᐃᑦ ᐂᑉᐸᖓᓂᒃ ᑲᑎᑕᐅᓕᕐᑎᓪᓗᒋᑦ, ᒧᐊᑎᑬ ᐃᒃᓯᕙᕗᖅ ᐊᖓᔪᖅᑳᕐᔪᐊᑉ ᐃᑎᕐᑕᕐᕕᖓᓂ.

²⁰ ᐃᔅᑕᕐᓕ ᖃᐅᔨᔭᐅᑎᑦᓯᓚᐅᓐᖏᓚᖅ ᐃᓚᒥᓂᒃ ᐃᓅᖃᑎᒥᓂᒡᓗ, ᒧᐊᑎᑬᑉ ᖃᐅᔨᔭᐅᑎᑦᓯᖁᔨᖏᓐᓂᖓ ᒪᓕᒡᓗᓂᐅᒃ, ᐃᔅᑕᕐ ᒧᐊᑎᑬᑉ ᐱᖁᔨᓂᖓᓂᒃ ᓈᓚᓚᐅᕐᐳᖅ, ᑍᒪᓐᖓᑦ ᐱᕈᕐᓴᓂᕐᒥᓂᑦ ᓈᓔᓐᓇᕋᒥᐅᒃ.

²¹ ᑍᑦᓱᒪᓂᐅᑎᓪᓗᒍ, ᒧᐊᑎᑬ ᐊᖓᔪᖅᑳᕐᔪᐊᑉ ᐃᑎᕐᑕᕐᕕᖓᓂ ᐃᒃᓯᕙᑎᓪᓗᒍ, ᐊᖓᔪᖅᑳᕐᔪᐊᑉ ᐱᔨᖏᒃ ᒪᕐᕉᒃ ᐃᒡᔪᐃᕐᑕᐅᓯᒪᔫᒃ, ᐱᒡᑖᓇ ᑎᕆᔅᓗ, ᐊᖓᔪᖅᑳᕐᔪᐊᑉ ᐃᒡᓗᕈᓯᖓᑕ ᐃᑎᕐᑕᕐᕕᐊᓂ ᑲᒪᔨᒃ, ᐊᖓᔪᖅᑳᕐᔪᐊᕐᒧᑦ ᐊᕼᐊᓱᐃᕋᔅᒧᑦ ᓂᓐᖓᒡᓗᑎᒃ ᐊᑭᕋᕐᑐᓕᕐᐴᒃ, ᑐᖁᑦᓱᒪᓕᕐᓗᒍᓗ.

²² ᒧᐊᑎᑬᓕ ᑕᒪᑐᒥᖓ ᖃᐅᔨᒐᒥ, ᑯᐃᓐ ᐃᔅᑕᕐ ᐅᖃᐅᑎᕚ, ᐃᔅᑕᕐᐅᓪᓗ ᐊᖓᔪᖅᑳᕐᔪᐊᖅ ᑕᒪᑐᒥᖓ ᐅᖃᐅᑎᕚ ᒧᐊᑎᑬᒧᑦ ᖃᐅᔨᑎᑕᐅᓂᕋᕐᓗᓂ.

²³ ᑕᒪᓐᓇᓕ ᖃᐅᔨᓴᕐᑕᐅᓕᕋᒥ, ᓱᓕᓂᖓ ᖃᐅᔨᔭᐅᕗᖅ, ᑖᒃᑯᐊᒡᓗ ᐊᖑᑏᒃ ᕿᒥᑦᓯᕕᖕᒥ ᕿᒥᑕᐅᕘᒃ; ᑕᒪᓐᓇᓗ ᑎᑎᕋᕐᑕᐅᓚᐅᕐᐳᖅ ᐊᖓᔪᖅᑳᕐᔪᐊᑉ ᐱᕙᓪᓕᐊᔪᖁᑎᖏᓐᓂ ᑯᕉᓂᑲᓂ ᐊᖓᔪᖅᑳᕐᔪᐊᖅ ᓇᔫᑎᑎᓪᓗᒍ.