ᐃᔅᑕᐅᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᑯᐃᓐ ᕚᔅᑎᐅᑉ ᓇᕐᕈᓇᕐᑎᑦᓯᓂᖓ ᐊᖓᔪᖅᑳᕐᔪᐊᕐᒥᒃ ᔨᕆᒃᓯᒥᒃ

¹ ᐊᕼᐊᓱ-ᐃᕋᔅ ᐊᖓᔪᖅᑳᕐᔪᐊᖑᑎᓪᓗᒍ ᐃᒤᑦᑐᖃᓚᐅᕐᐳᖅ; ᐊᕼᐊᓱᐃᕋᔅ ᓄᓇᓕᖕᓄᑦ 127ᓄᑦ ᐊᕕᒃᑐᕐᓯᒪᔪᓄᑦ ᐊᖓᔪᖅᑳᕐᔪᐊᖑᓚᐅᕐᐳᖅ ᐃᓐᑎᐊᒥᑦ ᐃᑎᐅᐱᐊ ᑎᑭᓪᓗᒍ,

² ᑍᑦᓱᒪᓂᐅᑎᓪᓗᒍ ᐊᖓᔪᖅᑳᕐᔪᐊᖅ ᐊᕼᐊᓱᐃᕋᔅ ᐊᖓᔪᖅᑳᕐᔪᐊᖑᕕᖕᒥᓂ ᐃᒃᓯᕙᐅᑕᕐᔪᐊᖃᓚᐅᕐᐳᖅ, ᓄᓇᒥ ᓲᓴᒥ ᐊᖓᔪᖅᑳᕐᔪᐊᖃᕐᕕᖕᒥ.

³ ᐊᖓᔪᖅᑲᐅᓂᖓᑕ ᐊᕐᕌᒍᖏᑕ ᐱᖓᔪᖓᓐᓂ, ᓂᕆᕕᒃᔪᐊᕐᑎᑦᓯᓚᐅᕐᐳᖅ ᐊᖓᔪᖅᑳᖁᑎᓕᒫᒥᓂᒃ ᐱᔨᓕᒫᒥᓂᒡᓗ; ᐊᖓᔪᖅᑳᓕᒫᓄᑦ ᐱᔪᓐᓇᕐᓂᖃᕐᑐᓕᒫᓄᓪᓗ ᐴᕐᓯᐊᒥ ᒥᑎᐊᒥᓗ, ᓄᓇᓕᖕᓂ ᐊᐅᓚᑦᓯᔩᑦ ᐊᖓᔪᖅᑳᓕᒫᓪᓗ ᑕᕝᕙᓃᑉᐳᑦ.

⁴ ᕿᒥᕐᕈᔭᐅᑎᑦᓯᕗᖅ ᐅᓪᓗᒐᓴᖕᓂᒃ ᐊᖓᔪᖅᑲᐅᕕᖓᑕ ᐊᔪᖏᑦᑐᕐᔪᐊᖑᓂᖓᓂᒃ ᐅᐱᓐᓇᕐᑐᕐᔪᐊᖑᓂᖓᓂᒡᓗ, ᐅᓪᓗᓂᒃ 180ᓂᒃ.

⁵ ᐅᓪᓗᐃᑦ ᑖᒃᑯᐊ ᓈᖕᒪᑕ, ᐊᖓᔪᖅᑳᕐᔪᐊᖅ ᓂᕆᕕᒃᔪᐊᕐᑎᑦᓯᓕᕐᐳᖅ ᓄᓇᒥ ᓲᓴᒥ ᐊᖓᔪᖅᑳᕐᔪᐊᖃᕐᕕᖕᒥ ᐅᓪᓗᓂᒃ 7ᓂᒃ, ᐱᓪᓚᕆᖕᓂᒃ ᐱᓪᓚᕆᐅᖏᑦᑐᓂᒡᓗ, ᐊᖓᔪᖅᑳᕐᔪᐊᖃᕐᕕᐅᑉ ᐱᕈᕐᓰᕕᖁᑎᖓᓂ.

⁶ ᑕᕝᕙᓂ ᖃᓪᓗᓈᕐᑕᑦᓯᐊᓂᒃ ᖃᑯᕐᑕᓂᒃ ᑐᖑᔪᕐᑕᓂᒡᓗ ᑖᓗᑕᖃᕐᐳᖅ ᑖᒃᑯᐊᓗ ᓂᕕᖓᕕᖃᕐᐳᑦ ᐊᑦᓱᓈᓂᒃ ᑕᑯᒥᓇᕐᑐᓂᒃ ᐊᐅᐸᓪᓚᕆᒃᑐᓂᒃ ᓯᐅᓪᕕᕆᓂᒃ ᐳᑐᓕᖕᓂᒃ ᕿᓚᒃᓯᒪᕕᖃᕐᓗᑎᒃ ᖃᓪᓗᓈᕐᑕᓂᒃ ᓵᑦᑐᓂᒃ ᓇᐸᔪᖏᑦ ᐅᔭᕋᐅᓪᓗᑎᒃ ᑕᑯᒥᓇᕐᑑᕗᑦ, ᐃᒃᓯᕙᐅᑕᖏᑦ ᓯᐅᓪᕕᕆᐅᕗᑦ ᒎᓘᓪᓗᑎᒡᓗ, ᓇᔪᕐᑕᖓ ᓇᑎᖃᕐᐳᖅ ᐅᔭᕋᖕᒥᒃ ᐊᓚᐹᓯᑕᒥᒃ ᐊᑎᓕᖕᒥᒃ ᑕᑯᒥᓇᕐᑐᐊᓗᖕᓂᒃ, ᖃᑯᕐᑕᓂᒃ ᕿᕐᓂᕐᑕᓂᒡᓗ ᓯᑎᔪᓂᒃ ᕿᓪᓕᕐᑐᒥᒃ ᐅᔭᕋᖕᓂᒃ ᓇᑎᖃᕐᐳᖅ.

⁷ ᐃᒥᕐᓂᐊᕐᑕᖏᓐᓂᒃ ᑐᓐᓂᐅᖅᑬᕗᑦ ᒎᓘᓂᒃ ᐃᒥᐅᑎᖃᕐᓗᑎᒃ, ᐃᒥᐅᑎᓕᒫᖏᓪᓗ ᐊᑐᓂᑦ ᐊᑦᔨᒌᒃᑐᖃᓐᖏᓚᑦ, ᕔᓂᒥᒡᓗ ᐊᒥᒐᕐᓯᓐᖏᓚᑦ, ᐊᖓᔪᖅᑳᕐᔪᐊᑉ ᐊᔪᕐᓴᖏᓐᓂᖓ ᒪᓕᒡᓗᒍ.

⁸ ᓇᓪᓕᐊᓐᓂᒡᓘᓐᓃᑦ ᖃᓄᑎᒋ ᐃᒥᕆᐊᖃᕐᓂᖏᓐᓂᒃ ᐱᖁᔭᕐᑕᖃᓚᐅᓐᖏᓚᖅ; ᐊᖓᔪᖅᑳᕐᔪᐊᑉ ᐱᔨᓂ ᐃᒡᓗᕐᔪᐊᒥᓃᑦᑐᑦ ᐅᖃᐅᑎᓯᒪᓚᐅᕐᒪᒋᑦ, ᑕᕝᕙᓃᑦᑐᑦ ᐊᑐᓂᑦ ᓈᒻᒪᒋᔭᒥᖕᓂᒃ ᐃᒥᕈᓐᓇᕐᑎᑕᐅᖁᓪᓗᒋᑦ.

⁹ ᐊᖓᔪᖅᑳᕐᔪᐊᓪᓗ ᓄᓕᐊᖓ ᑯᐃᓐ ᕚᔅᑎ ᓂᕆᕕᒃᔪᐊᕐᑎᑦᓯᓚᐅᕆᕗᖅ ᐊᕐᓇᓂᒃ ᐊᖓᔪᖅᑳᕐᔪᐊᑉ ᐊᕼᐊᓱᐃᕋᔅ ᐃᒡᓗᕐᔪᐊᖓᓂ.

¹⁰ ᓂᕆᕕᒡᔪᐊᕐᓂᖏᑕ ᐅᓪᓗᐃᑦ 7ᖓᓐᓂ, ᐊᖓᔪᖅᑳᕐᔪᐊᖅ ᐃᒥᕋᒥ ᕔᓂᒥᒃ ᐋᖓᔮᒐᓚᓕᓚᐅᕐᐳᖅ ᖁᕕᐊᓱᓕᕐᓗᓂᓗ, ᑎᓕᓯᓕᕐᐳᖅ ᓇᖕᒥᓂᖅ ᐱᔨᒥᓂᒃ 7ᓂᒃ ᐃᒡᔪᐃᕐᑕᐅᓯᒪᔪᓂᒃ ᐅᑯᓂᖓ ᒥᕼᐅᒪᓐ, ᐱᑦᔾᑕ, ᕼᐊᕐᐴᓇ, ᐱᒡᔅᑕ, ᐊᐸᒐᔅᑕ, ᔨᑦᓴᕐ, ᑳᑲᓯᓗ.

¹¹ ᐂᒃᓯᖁᓪᓗᒋᑦ ᑯᐃᓐ ᕚᔅᑎᒥᒃ ᐊᖓᔪᖅᑳᕐᔪᐊᕐᒧᑦ ᐂᑎᑕᐅᖁᓪᓗᒍ, ᑯᐃᒃᓯᐅᑎᒥᓂᒃ ᓂᐊᖂᓯᕐᓯᒪᓗᓂ, ᑖᑦᓱᒪ ᐊᕐᓇᑦᓯᐊᕙᐅᓂᖓ ᑕᑯᔭᐅᑎᑦᓱᒪᓪᓗᓂᐅᒃ ᐃᓄᖕᓄᑦ ᐊᖓᔪᖅᑳᓄᓪᓗ, ᑯᐃᓐ ᕚᔅᑎ ᐊᕐᓇᑦᓯᐊᕙᓪᓚᕆᐅᖕᒪᑦ.

¹² ᑯᐃᓐ ᕚᔅᑎᓕ ᐊᖓᔪᖅᑳᕐᔪᐊᑉ ᑎᓕᔭᖏᓐᓄᑦ ᐅᐸᒃᑕᐅᒐᒥ ᕿᐱᓗᒃᐳᖅ; ᑕᕝᕙ ᐊᖓᔪᖅᑳᕐᔪᐊᖅ ᓂᓐᖓᕕᒃᔪᐊᕐᐳᖅ, ᓂᓐᖓᓗᐊᕐᓂᕐᒧᓪᓗ ᐃᓗᐃᓪᓕᕐᓗᓂ.

¹³ ᑕᕝᕙ ᐊᖓᔪᖅᑳᕐᔪᐊᖅ ᓯᓚᑐᔪᖁᑎᒥᓄᑦ ᐊᐱᕆᕗᖅ, ᑕᕝᕙᓃᑦᑐᓄᑦ ᖃᐅᔨᔪᓄᓪᓗ ᓱᖕᒪᖔᑦ, ᐊᖓᔪᖅᑳᕐᔪᐊᖅ ᑍᒤᓕᐅᕐᐸᒃᑲᒥ ᑕᒪᒃᑯᓄᖓ ᐱᖁᔭᓂᒃ ᐃᓅᓯᓕᕆᓂᕐᒥᒡᓗ ᖃᐅᔨᒪᔪᖁᑎᒥᓄᑦ,

¹⁴ ᐅᑯᐊ ᑕᕝᕙ ᖃᓂᒋᓂᕐᐹᕆᓪᓗᒋᑦ ᐊᐱᕆᒐᔪᒃᐸᓚᐅᕐᑕᖏᑦ ᑳᕐᓯᓇ, ᓯᑕᕆ, ᐊᑦᒪᑕ, ᑖᕐᓯᓯ, ᒥᕆᓯ, ᒪᕐᓰᓇ, ᒥᒧᑳᓐᓗ, ᑲᑎᑦᓱᒋᑦ 7ᐅᕗᑦ ᐴᕐᓯᐊᒥᑦ ᒥᑎᐊᒥᓪᓗ ᐱᓯᒪᔪᑦ, ᑖᒃᑯᐊ ᐊᖓᔪᖅᑳᕐᔪᐊᕐᒥ ᓇᔫᑏᓐᓇᕐᐸᒃᑐᑦ, ᐊᖓᔪᖅᑲᐅᕕᖓᓂᓗ ᐱᓪᓚᕆᐅᓂᕐᐸᐅᓪᓗᑎᒃ ᐊᖓᔪᖅᑳᖑᓂᕐᐸᐅᖃᑕᐅᕗᑦ.

¹⁵ ᑖᒃᑯᐊ ᐊᖓᔪᖅᑳᕐᔪᐊᑉ ᐅᖃᐅᑎᕔᑦ, “ᐅᕙᖓ ᐊᖓᔪᖅᑳᕐᔪᐊᖑᔪᖓ ᐊᕼᐊᓱᐃᕋᔅ ᑎᓕᓯᓪᓚᕆᒃᓗᖓ ᑯᐃᓐ ᕚᔅᑎ ᕾᖁᔭᐅᖁᓚᐅᕐᐸᕋ, ᐱᖁᔨᓂᕆᓚᐅᕐᑕᓐᓂᒃ ᓈᓚᖏᒻᒪᑦ ᖃᓄᕐᓕ ᐱᓂᐊᕐᕕᐅᔪᒃᓴᐅᕚ? ᐱᖁᔭᕗᑦ ᖃᓄᐃᓕᐅᖁᔨᕚᑦ?”

¹⁶ ᑕᕝᕙ ᒥᒧᑳᓐ ᑭᐅᕗᖅ ᐊᖓᔪᖅᑳᕐᔪᐊᖅ ᐊᖓᔪᖅᑳᓪᓗ ᑐᓵᑎᓪᓗᒋᑦ, “ᑯᐃᓐ ᕚᔅᑎ ᐊᖓᔪᖅᑳᕐᔪᐊᒧᑐᐊᖅ ᐱᐅᖏᑦᑐᓕᓐᖏᓚᖅ, ᐊᖓᔪᖅᑳᓕᒫᓄᓪᓕ, ᐃᓄᓕᒫᓄᓪᓗ ᐊᖓᔪᖅᑲᐅᕕᖕᓃᑦᑐᓄᑦ ᐱᐅᖏᑦᑐᓕᓯᒪᕗᖅ.

¹⁷ ᐊᖓᔪᖅᑲᐅᕕᖕᓃᑐᓕᒫᓪᓕ ᐊᕐᓁᑦ ᑕᒪᑐᒥᖓ ᑐᓴᕈᑎᒃ ᑯᐃᓐ ᕚᔅᑎᐅᑉ ᐱᓂᐊᕐᓂᕕᓂᖓᓂᒃ ᐅᐃᒥᖕᓂᒃ ᓱᓇᐅᑎᑦᓯᖃᑦᑕᕈᓐᓁᕐᓂᐊᓕᕐᐳᑦ. ᐅᖃᕐᐸᓕᕐᓗᑎᒡᓗ, ‘ᐊᖓᔪᖅᑳᕐᔪᐊᑉ ᐊᕼᐊᓱᐃᕋᓯᐅᑉ ᑯᐃᓐ ᕚᔅᑎ ᑎᓕᓯᓪᓚᕆᒃᓗᓂ ᕾᖁᓚᐅᕋᓗᐊᕐᐹ ᐃᒻᒥᓄᑦ, ᑖᓐᓇᓕ ᕿᐱᓗᓚᐅᕐᐳᖅ.’

¹⁸ ᐅᓪᓗᒥᒥᑦ ᐱᒋᐊᕐᓗᑎᒃ ᐊᕐᓁᑦ ᐊᖓᔪᖅᑳᖑᔪᑦ ᐴᕐᓯᐊᒥ ᒥᑎᐊᒥᓗ ᐅᖃᖃᑦᑕᕐᓂᐊᓕᕐᐳᑦ ᑕᒪᑐᒥᖓ ᑐᓴᕐᑕᒥᖕᓂᒃ ᑯᐃᑉ ᐱᑦᓯᐊᖏᓐᓂᕕᓂᖓᓂᒃ, ᑕᒪᓐᓇᓗ ᐱᑦᔪᑎᒋᓗᒍ ᐊᑲᐅᒃᓴᓐᖏᖃᑦᑕᐅᑎᓂᖅ ᓂᓐᖓᐅᑎᓂᕐᓗ ᐱᓕᐅᒥᓂᐊᓕᕐᐳᖅ.

¹⁹ ᐊᖓᔪᖅᑳᕐᔪᐊᖅ ᖃᓄᐃᒃᓴᖏᒃᑯᕕᑦ, ᐊᖓᔪᖅᑲᐅᓃᑦ ᐱᔪᓐᓇᐅᑎᒋᓗᒍ ᐱᖁᔨᓚᐅᕆᑦ, ᐴᕐᓯᐊᒥᐅᑦ ᒥᑏᔅᒥᐅᓪᓗ ᐱᖁᔭᖁᑎᖏᓐᓂ ᑎᑎᕋᕐᑕᐅᓗᓂ, ᐊᓯᑦᔨᒐᒃᓴᐅᖏᓪᓗᓂ ᑕᒪᑐᒪ ᑭᖑᓂᖓᒍᑦ ᑕᒪᓐᓇ ᐳᐃᒍᕐᑕᐅᑐᐃᓐᓇᖁᓇᒍ, ᑖᓐᓇ ᕚᔅᑎ ᐃᓕᖕᓄᑦ ᐊᖓᔪᖅᑳᕐᔪᐊᕐᒧᑦ ᐃᑎᖃᑦᑕᕐᓂᐊᕈᓐᓃᕐᓕ; ᑯᐃᖑᓂᕐᓗ ᑖᑦᓱᒪ ᐊᓯᐊᓄᑦ ᑐᓂᓕᕈᒃ ᑖᑦᓱᒪᓐᖓᑦ ᐱᑦᓯᐊᕐᓂᕐᓴᒧᑦ.

²⁰ ᐊᖓᔪᖅᑳᕐᔪᐊᓪᓗ ᐱᔪᓐᓇᕐᓂᕐᒥᓄᑦ ᐱᖁᔨᓂᖓ ᐃᓄᓕᒫᓄᑦ ᐊᖓᔪᖅᑲᐅᕕᖕᓃᑦᑐᓄᑦ ᓴᖅᑭᑎᑕᐅᓂᐊᕐᐳᖅ, ᓄᓇ ᐊᖏᔪᐊᓘᖕᒪᑦ, ᐊᕐᓇᓕᒫᑦ ᐅᐃᓖᑦ ᐅᐃᒥᖕᓂᒃ ᓈᓚᑦᓯᐊᖁᓪᓗᒋᑦ, ᐱᓪᓚᕇᑦ ᐱᓪᓚᕆᐅᖏᑦᑐᓪᓗ.”

²¹ ᑕᒪᓐᓇᓗ ᐃᓱᒪᓕᐅᕈᑕᐅᔪᖅ ᐊᖓᔪᖅᑳᕐᔪᐊᑉ ᖁᕕᐊᒋᕚ ᐊᖓᔪᖅᑳᖑᖃᑕᐅᔪᓕᒫᓄᓪᓗ ᖁᕕᐊᒋᔭᐅᒋᕗᖅ, ᑕᕝᕙ ᐊᖓᔪᖅᑳᕐᔪᐊᖅ ᐱᓇᓱᐊᓕᕐᐳᖅ ᒥᒧᑳᓐ ᐅᖃᐅᓯᕆᔭᖏᑦ ᒪᓕᒡᓗᒋᑦ.

²² ᑕᕝᕙ ᑎᑎᖅᑲᓂᒃ ᐊᖓᔪᖅᑲᐅᕕᖕᒥᓃᑦᑐᓕᒫᓄᑦ ᐊᐅᓪᓚᕐᑎᑦᓯᕗᖅ, ᓄᓇᖁᑎᖏᑕ ᐅᖃᐅᓯᖏᑦ ᒪᓕᒡᓗᒋᑦ ᑎᑎᕋᕐᓯᒪᔪᓂᒃ, ᐃᓄᖏᑕᓗ ᐅᖃᐅᓯᖏᑦ ᐊᑐᓂᑦ ᒪᓕᒡᓗᒋᑦ, ᐊᖑᑎᓕᒫᑦ ᐊᑐᓂᑦ ᐃᒡᓗᒥᖕᓂ ᐊᖓᔪᖅᑲᐅᑦᓯᐊᖁᓪᓗᒋᑦ ᐃᒡᓗᒥᐅᖃᑎᒥᓄᑦ, ᓇᖕᒥᓂᖅ ᐅᖃᐅᓯᑎᒃ ᐊᑐᕐᓗᒋᑦ ᐅᖃᖃᑎᖃᕈᓐᓇᑦᓯᐊᖁᓪᓗᒋᑦ ᐃᓅᖃᑎᒥᖕᓄᑦ.