ᐃᐱᓯᒥᐅᓄᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐸᐅᓗᓯᐅᑉ ᐱᓇᓱᓯᐊᕐᓂᖓ ᔫᑎᐅᖏᑦᑐᓄᑦ

¹ ᑕᒪᓐᓇ ᐱᓪᓗᒍ, ᐅᕙᖓ ᐸᐅᓗᓯ, ᙭ᔅᑑᓯ ᔩᓱᓯᐅᑉ ᑎᒍᔭᐅᓯᒪᕕᖕᒦᑎᑕᖓ ᐃᓕᑦᓯ ᔫᑎᐅᖏᑦᑐᓯ ᐱᑦᔪᑎᒋᓪᓗᓯ,

² ᖁᓚᕐᓇᓐᖏᓚᖅ ᑐᓴᐅᒪᓕᕋᑦᓯ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᑎᓕᔭᐅᑦᔪᑎᖃᕋᒪ ᐃᓕᑦᓯ ᐱᑦᔪᑎᒋᓪᓗᓯ.

³ ᓇᓗᓇᓚᐅᕐᑐᒥᒃ ᖃᐅᔨᑎᑕᐅᓯᒪᒐᒪ ᓇᓗᓁᕐᓯᕕᐅᓂᒃᑯᑦ, ᑕᒪᓐᓇ ᓁᑦᑐᒥᒃ ᑎᑎᕋᐅᓯᕆᓚᐅᕐᐸᕋ ᐃᓕᑦᓯᓐᓄᑦ.

⁴ ᑖᒃᑯᐊ ᐅᖃᓕᒫᕈᑦᓯᐅᒃ, ᑐᑭᓯᔪᓐᓇᕐᐳᓯ ᖃᐅᔨᑎᑕᐅᓯᒪᓂᓐᓂᒃ ᙭ᔅᑑᓯᐅᑉ ᓇᓗᓇᕐᓂᖓᓂᒃ.

⁵ ᓯᕗᓕᕕᓂᑦᑎᓐᓄᑦ ᑕᒪᓐᓇ ᓇᓗᓇᕐᑎᑕᐅᓚᐅᕐᑐᖅ ᑐᑭᓯᔭᐅᓂᖅ ᐊᔪᕐᓇᕐᑎᑕᐅᓚᐅᕐᐳᖅ ᐃᓅᑎᓪᓗᒋᑦ, ᒫᓐᓇᓕ ᓇᓗᓇᕈᓐᓃᕐᑎᑕᐅᕗᖅ ᐊᐴᓯᑕᓕᖁᑎᖏᓐᓄᑦ ᐃᑦᔪᕐᓁᑦᑐᓄᑦ ᓇᓚᐅᑦᑍᔪᓄᓪᓗ ᐊᓂᕐᓂᒃᑯᑦ.

⁶ ᑕᒪᓐᓇ ᓇᓗᓇᕈᑎᖃᓚᐅᕐᐳᖅ ᔪᑎᐅᓐᖏᑦᑐᑦ ᑭᖑᕐᖑᑦᔨᔪᓐᓇᕐᓯᑎᑕᐅᓚᐅᕐᒪᑕ ᐃᓚᒋᔭᐅᓕᕐᓗᑎᒃ ᑎᒥᒧᑦ ᐊᑕᐅᓯᕐᒧᑦ, ᐱᖃᑕᐅᓕᕐᓗᑎᒃᓗ ᐊᖏᕈᑕᐅᓯᒪᔪᒥᒃ ᙭ᔅᑑᓯ ᔩᓱᓯᒃᑯᑦ ᐅᖃᐅᓯᕐᑎᒍᑦ ᑐᓴᕈᒥᓇᕐᑐᑎᒍᑦ.

⁷ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᓪᓚᖁᓪᓗᖓ ᑎᓕᔭᐅᓯᒪᕗᖓ ᐱᔨᑦᓯᕐᑎᐅᖁᓪᓗᖓ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ; ᑐᓂᕐᕈᓯᐊᕐᑎᓚᐅᕐᒪᖓ ᐱᔪᓐᓇᕐᓂᖓᑕ ᐱᓇᓱᐊᕐᓂᖓᒍᑦ.

⁸ ᐅᕙᖓ ᒎᑎᐅᑉ ᐃᓄᖁᑎᓕᒫᖏᓐᓂᑦ ᒥᑭᓐᓂᕐᐸᐅᒐᓗᐊᕐᑐᖓ, ᒎᑎᐅᑉ ᑐᓂᓯᕕᒋᓚᐅᕐᐹᖓ ᐱᑦᓯᐊᕐᓂᕐᒥ ᐱᔪᓐᓇᕐᑎᑦᓯᓂᕐᒥᒍᑦ; ᔫᑎᐅᖏᑦᑐᓄᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᓪᓚᖁᓪᓗᖓ ᙭ᔅᑑᓯᐅᑉ ᐊᒥᒐᕐᓯᖏᓐᓂᖓᓂᒃ ᑭᒡᓕᖃᖏᑦᑐᒥᒃ,

⁹ ᐃᓄᓕᒫᑦ ᑐᑭᓯᑎᓐᓇᓱᐊᕐᓗᒋᑦ ᓇᓗᓇᓚᐅᕐᑑᑉ ᖃᐅᔨᔭᐅᓕᕈᓐᓇᕐᓂᖓᓂᒃ, ᑕᒪᓐᓇ ᑍᑦᓱᒪᓂᐊᓗᖕᓂᑦ ᒎᑎᐅᑉ ᐃᔨᕐᓯᒪᓚᐅᕐᐹ, ᑕᒤᓐᓂᒃ ᐱᓐᖑᕐᑎᑦᓯᓚᐅᕐᑑᑉ.

¹⁰ ᒫᓐᓇᐅᓕᕐᑐᒃᑯᑦ ᐅᒃᐱᕐᑑᖃᑎᒌᑎᒍᑦ, ᒎᑎᐅᑉ ᓱᓇᑐᐃᓐᓇᓕᒫᑎᒍᑦ ᓯᓚᑐᓂᕐᔪᐊᖓ ᖃᐅᔨᔭᐅᔪᓐᓇᕐᓯᖁᓪᓗᒍ ᐊᐅᓚᑦᑎᔨᐅᕙᒃᑐᓄᑦ ᐱᔪᓐᓇᕐᓂᖃᕐᑐᓄᓪᓗ ᕿᓚᖕᒥᐅᓄᑦ.

¹¹ ᒎᑎ ᐃᓱᖃᖏᑦᑐᒥᑦ ᐱᓇᓱᐊᕈᒪᓯᒪᔭᒥᓂᒃ ᓈᒪᒃᓯᑎᑦᓯᓚᐅᕐᐳᖅ ᙭ᔅᑑᓯ ᔩᓱᓯᒃᑯᑦ ᐊᑕᓂᑦᑎᒍᑦ.

¹² ᑖᑦᓱᒨᓇ ᐅᒃᐱᕐᓂᑯᑦ ᓯᕘᕋᖏᓪᓗᑕ ᐃᓕᕋᓱᓐᖏᓪᓗᑕᓗ ᐊᖅᑯᑎᒃᓴᖃᕐᐳᒍᑦ ᒎᑎᐅᑉ ᓇᔪᕐᑕᖓᓄᐊᕈᓐᓇᓕᕐᐳᒍᑦ ᖁᓚᕈᑎᖃᖏᓪᓗᑕ.

¹³ ᑍᒤᒻᒪᑦ ᓴᐱᓕᑐᐃᓐᓇᖁᖏᒃᑲᓗᐊᕐᐸᑦᓯ ᐊᒃᓱᕈᕐᓇᕐᑐᒃᑰᕐᑎᑕᐅᓂᓐᓄᑦ ᐱᑦᔪᑎᒋᓪᓗᓯ, ᑕᒪᓐᓇ ᓂᕐᑐᕐᓇᐅᑎᒃᓴᑦᓯᓐᓄᑦ ᑍᒤᓕᖓᖕᒪᑦ.

᙭ᔅᑑᓯᐅᑉ ᓇᒡᓕᖕᓂᖓ

¹⁴ ᑕᒪᓐᓇ ᐱᑦᔪᑎᒋᓪᓗᒍ ᐊᑖᑕᐅᑉ ᓵᖓᓂ ᓰᖅᑯᕐᐳᖓ,

¹⁵ ᐃᒡᓗᒥᐅᖃᑎᒌᓂ ᐃᓚᒌᒃᑐᓂᒃ ᑍᔭᐅᔪᓕᒫᑦ ᕿᓚᖕᒦᑦᑐᑦ ᓄᓇᒦᑦᑐᓪᓗ ᐊᑎᖃᕐᕕᒋᔭᖓᓐᓄᑦ.

¹⁶ ᑖᑦᓱᒧᖓ ᑐᓂᓯᕕᐅᖁᓪᓗᓯ ᐱᔪᓐᓇᕐᓂᕐᒥᒃ, ᐱᓐᓇᕐᓇᕐᓂᕐᔪᐊᖓᑕ ᐊᒥᒐᖏᓐᓂᖓᓄᑦ ᓴᓐᖏᔫᑎᑕᐅᖁᓪᓗᓯ ᐊᓂᕐᓂᖓᒍᑦ ᐃᓗᑦᓯᒍᑦ,

¹⁷ ᑐᒃᓯᐊᕐᐳᖓᓗ ᐅᒃᐱᕐᓂᑯᑦ ᙭ᔅᑑᓯ ᐃᓂᖃᖁᓪᓗᒍ ᐆᒻᒪᑎᑦᓯᓐᓂ; ᑖᑦᓱᒪᓂ ᐊᒫᖃᓕᖁᓪᓗᓯ ᑐᓐᖓᕕᖃᓕᖁᓪᓗᓯᓗ ᓇᒡᓕᖕᓂᕐᒥ,

¹⁸ ᐃᑦᔪᕐᓁᑎᑕᐅᓯᒪᔪᓪᓗ ᐊᑕᐅᑦᓯᒃᑯᑦ ᑐᑭᓯᔪᓐᓇᖁᓪᓗᓯ ᙭ᔅᑑᓯᐅᑉ ᓇᒡᓕᖕᓂᖓᑕ ᓯᓕᖕᓂᖓᓂᒃ ᑕᑭᓂᖓᓂᒃ ᐳᕐᑐᓂᖓᓂᒃ ᐃᑎᓂᖓᓂᒡᓗ.

¹⁹ ᖃᐅᔨᖁᓪᓗᓯᓗ ᙭ᔅᑑᓯᐅᑉ ᓇᒡᓕᖕᓂᖓᓂᒃ ᖃᐅᔨᔭᐅᔪᓐᓇᕐᑐᑦ ᐅᖓᑖᓃᑦᑐᒥᒃ, ᐃᓗᒻᒥᕐᑕᐅᖁᓪᓗᓯᓗ ᒎᑎᐅᓂᖓᑕ ᐃᓕᖅᑯᓯᓕᒫᖓᓂᒃ.

²⁰ ᑖᑦᓱᒪᓕ ᐱᔪᓐᓇᕐᓂᕐᒥᒍᑦ ᐅᕙᑦᑎᓐᓂ ᐱᓇᓱᐊᕐᑑᑉ ᐱᓇᓱᐊᕐᕕᒋᔪᓐᓇᕐᐹᑎᒍᑦ ᐱᔪᒪᔪᓐᓇᕐᑕᑦᑕ ᐃᓱᒪᒋᔪᓐᓇᕐᑕᑦᑕᓗ ᐅᖓᑖᓃᑦᑐᓂᒃ,

²¹ ᑖᓐᓇ ᓂᕐᑐᕐᑕᐅᓕ ᐅᒃᐱᕐᑑᖃᑎᒌᓂ ᙭ᔅᑑᓯ ᔩᓱᓯᒥᓗ ᑭᖑᕚᕇᓕᒫᓄᑦ, ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. ᐋᒥᓐ.