ᐃᐱᓯᒥᐅᓄᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᖁᒥᑦ ᐃᓅᓯᕐᒧᑦ

¹ ᐃᓕᑦᓯᑦᑕᐅᖅ ᐅᒃᐱᕐᓂᕐᒥ ᑐᖁᖓᓚᐅᕐᐳᓯ, ᐱᐅᖏᑦᑐᓕᓂᕐᒧᑦ ᐊᔪᕐᑐᓕᓂᕐᒧᓪᓗ.

² ᑍᑦᓱᒪᓂ ᑍᒫᒃ ᐃᓅᓯᖃᕐᑎᓪᓗᓯ ᓯᓚᕐᔪᐊᕐᒥᐅᑦ ᐃᓕᖅᑯᓯᖏᓐᓂᒃ ᒪᓕᓚᐅᕐᐳᓯ, ᓯᓚᕐᔪᐊᓪᓗ ᐊᐅᓚᑦᓯᔨᖓᓂᒃ ᓈᓚᒃᓗᓯ, ᑕᕝᕙ ᐊᓂᕐᓂᕐᒥᒃ ᒫᓐᓇ ᒎᑎᒥᒃ ᓈᓚᓐᖏᑎᑦᓯᔪᒥᒃ ᐃᓄᖕᓂᒃ.

³ ᑕᒪᑦᑕ ᐃᓚᒃ ᑍᑯᑎᑐᓇᖅ ᐃᓅᓯᒪᒐᑦᑕ ᐱᔪᒪᔭᑐᐃᓐᓇᕗᑦ ᐃᒃᐱᒋᔭᕗᓪᓗ ᒪᓕᒡᓗᒋᑦ, ᑎᒥᑦᑕᓗ ᐃᓱᒪᑦᑕᓗ ᐱᔪᒪᓕᑐᐃᓐᓇᕐᑕᖓᓂᒃ ᐊᑐᕐᐸᒃᓗᑕ, ᐃᓕᖅᑯᓯᑐᐃᓐᓇᖅ ᒪᓕᒡᓗᒍ ᑕᒤᓐᓂᒃ ᐊᑦᔨᖃᑐᐃᓐᓇᕐᓯᒪᕗᒍᑦ, ᑍᒤᑎᓪᓗᑕᓗ ᒎᑎᐅᑉ ᓂᓐᖓᐅᓯᖓᑕ ᕿᑐᕐᖓᕆᓚᐅᕐᐹᑎᒍᑦ.

⁴ ᒎᑎᐅᓪᓕ ᓂᑲᒍᓱᖕᓂᕐᔪᐊᖓᑕ ᐊᒥᒐᖏᑦᑐᐊᓘᓂᖓᓄᑦ, ᓇᒡᓕᒍᓱᖕᓂᕐᔪᐊᒥᓄᓪᓗ ᓇᒡᓕᒋᓚᐅᕋᒥᑎᒍᑦ,

⁵ ᐅᒃᐱᕐᓂᕐᒥ ᑐᖁᖓᑎᓪᓗᑕ ᐱᐅᖏᑦᑐᓕᓂᕐᒧᑦ, ᐆᒻᒪᕐᑎᓚᐅᕐᐹᑎᒍᑦ ᒪᑭᑎᓪᓗᑕᓗ ᙭ᔅᑑᓯ ᐃᓚᒋᓪᓗᒍ, ᑕᕝᕙ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᐱᐅᓕᔭᐅᓯᒪᕗᓯ.

⁶ ᐃᓚᒋᓪᓗᒍᓗ ᒪᑭᑎᓚᐅᕐᐹᑎᒍᑦ, ᕿᓚᖕᒥ ᐃᒃᓯᕙᖃᑕᐅᖁᓪᓗᑕ ᔩᓱᓯ ᙭ᔅᑑᓯᒧᑦ.

⁷ ᑍᒤᓕᐅᓚᐅᕐᐳᕐᓕ ᓇᓪᓕᐅᑦᑐᒃᓴᒥ ᐱᔪᒫᕐᑐᒥ ᓴᖅᑭᑎᑦᓱᒪᓪᓗᒍ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᕐᔪᐊᖓ ᓇᓕᖃᖏᑦᑑᑉ ᐊᒥᒐᖏᓐᓂᖓ ᓇᒡᓕᒍᓱᖕᓂᖓᑕᓗ ᓴᖅᑭᑎᑕᐅᓯᒪᓂᖓ ᙭ᔅᑑᓯ ᔩᓱᓯᒥ.

⁸ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᐱᐅᓕᔭᐅᓯᒪᒐᑦᓯ ᐅᒃᐱᕐᓂᒃᑯᑦ; ᑕᒪᓐᓇᓗ ᐃᓕᑦᓯᓐᓂᒃ ᐱᓯᒪᓐᖏᓚᓯ, ᒎᑎᐅᓪᓕ ᑐᓂᕐᕈᑎᒋᕚ ᐊᑭᖃᖏᑦᑐᖅ.

⁹ ᐱᓂᐊᕐᓂᒃᑯᑦ ᐃᒻᒥᓂᒃ ᐱᓯᒪᔪᖃᖏᒻᒪᑦ, ᑍᒤᒻᒪᑦ ᓇᓪᓕᐊᓪᓘᓐᓃᑦ ᐱᐅᔪᕆᑦᔪᑎᖃᕈᓐᓇᓐᖏᓚᖅ ᑕᒪᑐᒥᖓ.

¹⁰ ᒎᑎᐅᑉ ᓴᓇᓯᒪᕚᑎᒍᑦ, ᙭ᔅᑑᓯ ᔩᓱᓯᒃᑯᑦ ᐱᓐᖑᕐᑎᓚᐅᕐᐹᑎᒍᑦ ᐱᓇᓱᐊᑦᓯᐊᖁᓪᓗᑕ, ᒎᑎᐅᑉ ᑕᒪᓐᓇ ᓯᕗᓂᖓᒍᑦ ᐅᐸᓗᖕᒊᔭᕇᕐᓯᒪᓚᐅᕐᐹ, ᑍᒤᓕᐅᖁᓪᓗᑕ.

᙭ᔅᑑᓯᒥ ᐊᑕᐅᓯᐅᓂᖅ

¹¹ ᑍᒤᒻᒪᑦ ᖃᓄᐃᑦᑑᓚᐅᕐᓂᑦᓯᓐᓂᒃ ᐃᖅᑬᓚᐅᕆᑦᓯ, ᔫᑎᐅᖏᑦᑐᓯ ᑍᔭᐅᓪᓗᓯ ᑭᐱᓯᒪᖏᑦᑐᓂᒃ ᔫᑎᓄᑦ, ᐃᒻᒥᖕᓂᒃ ᑍᔪᓄᑦ ᑭᐱᓯᒪᔪᓂᒃ ᓇᖕᒥᓂᖅ ᑎᒥᒥᒃᑎᒍᑦ ᑭᐱᓯᒪᔪᑦ ᐊᒡᒐᖕᓄᑦ.

¹² ᐃᕾᒋᑦᓯ ᑍᑦᓱᒪᓂ ᙭ᔅᑑᓯᖃᕋᓯ ᐊᕝᕗᑎᓯᒪᓚᐅᕐᑐᓯ, ᐃᓴᕆᐊᓕᒥᐅᓪᓗ ᓂᕈᐊᕐᑕᐅᓯᒪᓂᖏᓐᓄᑦ ᐃᓚᒋᔭᐅᓚᐅᖏᑦᑐᓯ, ᐊᖏᕈᑕᐅᓯᒪᔪᒥᒡᓗ ᐱᓯᒪᖃᑕᐅᓚᐅᖏᑦᑐᓯ, ᑍᒤᑦᑑᓪᓗᓯ ᐃᓅᓚᐅᕐᑐᕐᓯ ᐅᕙᓂ ᓯᓚᕐᔪᐊᕐᒥ ᓂᕆᐅᒋᔭᒃᓴᖃᕋᓯ ᒎᑎᖃᕋᓯᓗ.

¹³ ᒫᓐᓇᓕ ᐃᓕᑦᓯ ᙭ᔅᑑᓯ ᔩᓱᓯᒦᑦᑐᓯ ᓯᕗᕐᖓᒍᑦ ᐅᖓᓯᒃᑐᒦᓚᐅᕐᑐᓯ ᖃᓂᒡᓕᑎᑕᐅᓯᒪᕗᓯ ᙭ᔅᑑᓯᐅᑉ ᐊᐅᖓᓄᑦ.

¹⁴ ᙭ᔅᑑᓯᐅᑉ ᐃᓅᖃᑎᒌᑦᓯᐊᓕᕐᑎᓚᐅᕐᒪᑎᒍᑦ, ᔫᑎᓪᓗ ᔫᑎᐅᖏᑦᑐᓪᓗ ᐊᑕᐅᓯᓐᖑᕐᑎᓪᓗᒋᑦ, ᐊᕙᓗᕐᔪᐊᕐᓗ ᐊᒡᕕᐊᕈᑕᐅᔪᖅ ᓯᖅᑯᒥᓚᐅᕐᐹ ᐊᕕᑎᑦᓯᓯᒪᔪᖅ ᐊᑭᕋᕇᒃᑎᑦᓯᔪᕐᓗ.

¹⁵ ᔫᑎᓪᓗ ᐱᖁᔭᖏᑦ ᐊᕕᓯᒪᑎᑦᓯᔪᑦ ᐊᑐᕈᓐᓃᕐᑎᓚᐅᕐᐰᑦ, ᑖᒃᑯᐊ ᒪᕐᕈᐃᓕᖓᔪᑦ ᐊᑕᐅᓯᓐᖑᕐᑎᑕᐅᖁᓪᓗᒋᑦ ᐃᒻᒥᒍᑦ ᓄᑖᓐᖑᕐᑎᑕᐅᓗᑎᒃ, ᐃᓅᖃᑎᒌᑦᓯᐊᓕᕐᑎᓪᓗᒋᓪᓗ.

¹⁶ ᑐᖁᓂᕐᒥᒍᓪᓗ ᓴᓐᓂᖓᔪᓕᖕᒥ ᐊᑭᕋᕇᖕᓂᖅ ᓄᖑᑎᓚᐅᕐᐹ; ᓴᓐᓂᖓᔪᓕᒃᑯᓪᓗ ᐊᑕᐅᓯᓐᖑᕐᑎᓚᐅᕐᐹᑎᒍᑦ ᑎᒥᒥ ᐃᓅᖃᑎᒌᓕᕐᑎᓪᓗᑕᓗ ᒎᑎᒧᑦ ᐅᑎᕐᑎᓪᓗᑕ.

¹⁷ ᑎᑭᓚᐅᕆᕗᖅ ᐅᖃᐅᓯᖃᕐᓗᓂ ᑕᒤᓐᓄᑦ ᐃᓅᖃᑎᒌᑦᓯᐊᓕᕐᓇᕐᑐᒥᒃ ᐃᓕᑦᓯᓐᓄᑦ ᐅᖓᓯᒃᑐᒦᓚᐅᕐᑐᓄᑦ ᖃᓂᑦᑐᒦᓚᐅᕐᑐᓄᓪᓗ;

¹⁸ ᑖᑦᓱᒨᓇ ᑕᒪᑦᑕ ᐊᑐᓂᑦ ᐊᖅᑯᑎᒃᓴᖃᓕᕐᐳᒍᑦ ᐊᑖᑕᒧᑦ ᐊᓂᕐᓂᒃᑯᑦ ᐊᑕᐅᓯᒃᑯᑦ.

¹⁹ ᑍᒤᒻᒪᑦ ᓄᓇᖃᑎᒋᔭᐅᖏᑦᑐᑎᑐᑦ ᑕᑯᓕᒪᓇᖏᑦᑐᑎᑐᓪᓗ ᑍᒤᑦᑑᓐᓃᕐᐳᓯ, ᐃᑦᔪᕐᓁᑎᑕᐅᓯᒪᔪᓄᓪᓕ ᐃᓚᒋᔭᐅᓕᕐᐳᓯ ᒎᑎᐅᑉ ᐃᒡᓗᒥᐅᖃᑎᖏᓐᓄᑦ.

²⁰ ᐃᒡᓗᓕᐊᖑᖃᑕᐅᓕᕐᓗᓯᓗ ᐋᐴᓯᑕᓖᑦ ᓇᓚᐅᑦᑍᔪᓪᓗ ᑐᓐᖓᕕᓕᐊᕆᓚᐅᕐᑕᖓᓐᓄᑦ, ᑐᓐᖓᕕᖕᒧᓪᓕ ᑎᕆᖅᑯᕆᔭᐅᕗᖅ ᑕᕝᕙ ᙭ᔅᑑᓯ ᔩᓱᓯ.

²¹ ᑖᓐᓇ ᐃᒡᓗᓕᐊᖑᔪᒧᑦ ᑕᒤᓐᓂᒃ ᐊᑦᓱᖏᐅᒪᑎᑦᓯᕗᖅ ᐱᕈᕐᑎᑦᓯᓪᓗᓂᓗ ᑕᑯᒃᓴᐅᖏᑦᑐᒥᒃ ᐃᑦᔪᕐᓁᑦᑐᒥᒃ ᑐᒃᓯᐊᕐᕕᒡᔪᐊᕐᒥᒃ ᐊᑕᓂᕐᒥ.

²² ᑖᑦᓱᒨᓇ ᐃᓕᑦᓯᑦᑕᐅᖅ ᐃᒡᓗᓕᐊᖑᖃᑕᐅᓕᕐᐳᓯ ᒎᑎᒧᑦ ᐃᓂᒋᔭᒃᓴᐅᖁᓪᓗᓯ.