ᐃᓕᓯᒪᓃᑦ ᐃᒃᓖᓯᐊᓯᑏᔅ 9 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑕᒪᒃᑯᐊ ᐆᒻᒪᑎᓐᓂ ᐃᓱᒪᒋᓚᐅᕐᐸᒃᑲ, ᖃᐅᔨᓚᐅᕐᐳᖓᓗ ᐃᓱᐊᕐᑐᑦ ᓯᓚᑐᔪᓪᓗ ᑲᓄᐃᓕᐅᕐᑕᖏᑦ ᒎᑎᐅᑉ ᐊᒡᒐᖏᓐᓃᒻᒪᑕ. ᐃᓄᖕᒥᒡᓕ ᑭᓇᒥᒡᓘᓐᓃᑦ ᖃᐅᔨᒪᔪᖃᓐᖏᓚᖅ ᓇᒡᓕᖕᓂᕐᒥᒃ ᐆᒥᓱᖕᓂᕐᒥᒡᓘᓐᓃᑦ ᐱᓂᐊᕐᕕᐅᓂᐊᕐᒪᖔᕐᒥᒃ.

² ᑕᒪᕐᒥᒡᓕ ᐊᑦᔨᒌᒃᑐᒥᒃ ᓯᕗᓂᒃᓴᖃᕐᐳᑦ ᐃᓱᐊᕐᑐᑦ ᐱᐅᖏᑦᑐᓕᔪᓪᓗ, ᐱᐅᔪᓪᓗ ᐱᐅᖏᑦᑐᓪᓗ, ᓴᓗᒪᔪᑦ ᓴᓗᒤᑦᑐᓪᓗ, ᑐᓂᕐᕈᑎᒃᓴᓂᒡᓗ ᑐᓂᓯᔪᑦ ᑐᓂᕐᕈᓯᖏᑦᑐᓪᓗ. ᑍᒤᒻᒪᑦ ᐃᓄᖕᒧᑦ ᐱᐅᔪᒧᑦ, ᑍᒤᒃᑭᕗᖅ ᓱᓕ ᐊᔪᕐᑐᓕᔪᒧᑦ; ᑍᒤᒃᑭᕗᖅ ᐊᖏᕈᑎᖃᕐᑐᓄᑦ ᐊᖏᕈᑎᖃᕆᐊᒃᓴᕐᓗ ᑲᑉᐱᐊᓱᒃᑐᓄᑦ.

³ ᑕᒪᓐᓇ ᑕᒪᑦᔭ ᐱᐅᖏᑦᑐᖅ ᑕᒪᑭᕐᓗᓂ ᐊᑐᕐᑕᐅᔪᖅ ᓯᕿᓂᐅᑉ ᐊᑖᓂ; ᐊᑦᔨᒌᒃᑐᒥᒃ ᑕᒪᕐᒥᒃ ᐱᓂᐊᕐᕕᐅᖕᒪᑕ. ᓱᓕᔪᒥᒃ ᐃᓄᐃᑦ ᐆᒻᒪᑎᖏᑦ ᑕᒪᕐᒥᒃ ᐱᐅᖏᑦᑐᒥᒃ ᑕᑕᒻᒪᑕ; ᐃᓱᒤᕈᑎᓂᐅᔮᕐᑐᒥᒃ ᐆᒻᒪᑎᖏᑦ ᑕᑕᑉᐳᑦ ᐃᓅᓂᕐᒥᖕᓂ, ᑕᒪᑐᒪᓗ ᑭᖑᓂᖓᒍᑦ ᑐᖁᕙᒃᐳᑦ.

⁴ ᐃᓅᖃᑕᐅᔪᓪᓕ ᓯᕗᓂᒃᓴᒥᒃ ᓂᕆᐅᖕᓂᖃᕐᐳᖅ, ᕿᒻᒥᖅ ᐆᒪᔪᖅ ᐱᐅᓂᕐᓴᐅᖕᒪᑦ ᓛᔭᒥᑦ ᑐᖁᖓᔪᒥᑦ.

⁵ ᐃᓅᔪᑦ ᖃᐅᔨᒪᖕᒪᑕ ᑐᖁᔪᒫᕐᓂᕐᒥᖕᓂᒃ. ᑐᖁᖓᔪᓪᓕ ᓱᓇᒥᒃ ᖃᐅᔨᒪᓐᖏᓚᑦ. ᐊᑭᓕᕐᑕᐅᑦᔪᑎᒃᓴᒥᖕᓂᒡᓗ ᐱᓂᐊᕈᓐᓃᕐᓗᑎᒃ ᐃᖅᑲᐅᒪᔭᐅᑦᔪᑎᒃᓴᖏᓪᓗ ᐳᐃᒍᕐᑕᐅᕗᑦ.

⁶ ᓇᒡᓕᒍᓱᖕᓂᖏᓪᓗ, ᐆᒥᓱᖕᓂᖏᓪᓗ, ᐊᓐᓂᕈᑦᔨᓂᖏᓪᓗ, ᓄᖑᓯᒪᕗᑦ; ᐃᓚᐅᖃᑕᐅᓂᐊᕈᓐᓃᕐᐳᑦ ᓯᕿᓂᐅᑉ ᐊᑖᓂ ᖃᓄᐃᓕᐅᕐᑕᐅᔪᓂ.

⁷ ᐂᓕᕆᑦ ᓂᐊᖂᔭᖅ ᓂᕆᔭᕐᑐᓕᕈᒃ ᖁᕕᐊᓱᒡᓗᑎᑦ; ᕔᓃᓪᓗ ᐃᒥᕆᐊᕐᑐᓕᕈᒃ ᐆᒻᒪᑎᖕᓂ ᖁᕕᐊᓱᒃᓗᑎᑦ; ᒎᑎᐅᑉ ᐱᓂᐊᕐᓂᑎᑦ ᐃᓚᓕᐅᕇᕐᒪᒋᑦ.

⁸ ᐊᓐᓄᕌᑎᑦ ᑍᒪᓐᖓᓕᒫᖅ ᖃᑯᕐᑕᐅᓕᑦ, ᓂᐊᖁᐃᓪᓗ ᐅᕐᓱᕐᑎᕐᓯᒪᔪᓐᓃᕐᑍᓕᓕ.

⁹ ᓄᓕᐊᑦ ᓇᒡᓕᒋᔧᑦ ᓇᔪᕈᒃ ᖁᕕᐊᓱᒡᓗᑎᑦ ᓯᓔᑦᑐᒥ ᐃᓅᓯᕐᓂ ᐃᓅᑎᓪᓗᑎᑦ ᑐᓂᕐᕈᓯᐊᕐᓂ ᓯᕿᓂᐅᑉ ᐊᑖᓂ, ᑕᒪᓐᓇ ᑐᓂᕐᕈᓯᐊᕆᒐᕕᐅᒃ ᐃᓅᓯᕐᒥ ᐊᒃᓱᕈᕆᐊᓕᖕᒥ ᐃᓅᑎᓪᓗᑎᑦ ᓯᕿᓂᐅᑉ ᐊᑖᓂ ᐃᓅᑎᓪᓗᑎᑦ.

¹⁰ ᐊᒡᒐᖕᓄᑦ ᓱᓕᐊᒃᓴᒥᒃ ᐱᓯᒪᒍᕕᑦ ᐱᓇᓱᐊᕈᒃ ᐊᒃᓱᕈᕐᓗᑎᑦ, ᓯᕗᓂᕆᔭᕐᓂ ᐃᓗᕕᕐᒥ ᓱᓕᐊᒃᓴᖃᖏᒻᒪᑦ, ᓱᓕᐊᒃᓴᒧᓪᓗ ᐸᕐᓇᖕᓂᖃᕋᓂ, ᖃᐅᔨᒪᓂᕐᑕᖃᕋᓂᓗ, ᓯᓚᑐᓂᕐᑕᖃᕋᓂᓗ.

¹¹ ᓯᕿᓂᐅᑉ ᐊᑖᓂ ᑕᑯᓚᐅᕆᕗᖓ ᐃᒫᒃ: ᓱᒃᑲᓕᓂᕐᒧᑦ ᓵᓚᖃᕋᓱᐊᕐᓂᖅ ᓱᒃᑲᓕᓂᕐᐹᒧᑦ ᑐᕌᖓᖏᒻᒪᑦ, ᐅᓇᑕᕐᓂᕐᓗ ᓴᓐᖏᔪᒧᑦ ᑐᕌᖓᓇᓂ, ᓂᕿᒃᓴᕐᓗ ᓯᓚᑐᔪᒧᑦ ᑐᕌᖓᖕᒥᓇᓂ, ᐊᔪᕐᓴᖏᓐᓂᕐᓗ ᐃᓱᒪᑐᔪᒧᑦ ᑐᕌᖓᖕᒥᓇᓂ, ᖁᕕᐊᒋᔭᐅᓂᕐᓗ ᓴᓇᑐᔪᒧᑦ ᑐᕌᖓᖕᒥᓇᓂ; ᐱᕕᒃᓴᒧᓪᓕ ᓇᓪᓕᐅᑎᔪᓄᓪᓗ ᑕᒪᕐᒥᒃ ᑎᑭᑕᐅᕙᒃᐳᑦ.

¹² ᑭᓇᓘᓐᓃᑦ ᑲᓄᐃᑲᓪᓚᖕᓂᐊᕐᑐᓄᑦ ᐅᐸᓗᖎᕐᓯᒪᔪᓐᓇᖏᒻᒪᑦ: ᓲᕐᓗ ᐃᖃᓗᐃᑦ ᓄᓗᐊᓄᑦ ᑐᖁᑕᐅᓐᓇᕐᑐᒧᑦ ᑎᑭᒻᒪᑕ, ᐅᕝᕙᓗ ᑎᖕᒥᐊᑦ ᓂᒐᕐᓄᑦ ᑎᑭᒻᒪᑕ, ᑍᒫᒃᑕᐅᖅ ᐃᓄᐃᑦ ᐱᐅᖏᑦᑐᓄᑦ ᖃᓄᐃᓕᓇᕐᑐᓄᑦ ᓂᒐᕐᑎᑕᐅᔪᑐᑦ ᑎᑭᑉᐸᒃᐳᑦ, ᑕᕝᕔᓐᓇᖅ ᐅᐸᓗᐃᔭᐅᓪᓗᑎᒃ.

ᓯᓚᑐᓂᐅᑉ ᓯᓔᓐᓂᐅᓪᓗ ᐃᓱᒪᒋᔭᐅᓂᖏᒃ

¹³ ᖃᐅᔨᓚᐅᕆᕗᖓ ᓯᕿᓂᐅᑉ ᐊᑖᓂ ᓯᓚᑐᓂᕐᒥᒃ ᑕᑕᒥᓐᓂᐊᕆᔭᓐᓂᒃ.

¹⁴ ᓄᓇᓕᒃᔪᐊᕐᑕᖃᓚᐅᕐᐳᖅ ᒥᑭᔪᓂᒃ ᐃᓄᑭᑦᑑᓪᓗᑎᒃ. ᐊᖓᔪᖅᑳᔪᐊᒥᓪᓕ ᑎᑭᑕᐅᓚᐅᕐᐳᑦ, ᓵᓚᖃᕈᒪᓂᕐᒧᓪᓗ ᐊᕙᓗᔭᐅᓪᓗᑎᒃ, ᓴᐴᓗᑕᕐᓂᒡᓗ ᐅᓇᑕᕐᕕᖕᓂᒃ ᓴᓇᕗᑦ ᐊᕙᑖᓂ.

¹⁵ ᑕᕝᕙᓂᓕ ᐃᓄᒃᑕᖃᓚᐅᕐᐳᖅ ᐊᔪᕐᓴᕐᑐᒥ ᓯᓚᑐᔫᓪᓗᓂᓗ, ᓯᓚᑐᓂᕐᒥᓄᓪᓗ ᓄᓇᓕᒃᔪᐊᑦ ᓴᐳᑎᓚᕐᐰᑦ. ᑭᓯᐊᓂᓕ ᑍᓐᓇ ᐊᔪᕐᓴᕐᑐᖅ ᐃᖅᑲᐅᒪᔭᐅᓚᐅᓐᖏᓚᖅ.

¹⁶ ᐅᖃᕐᐳᖓᓕ, ᓯᓚᑐᓂᖅ ᐱᐅᓂᕐᓴᐅᕗᖅ ᐊᔪᖏᓐᓂᕐᒥᑦ; ᑭᓯᐊᓂ ᐊᔪᕐᓴᕐᑑᑉ ᓯᓚᑐᓂᖓ ᓇᕐᕈᒋᔭᐅᓚᐅᕐᐳᖅ, ᐅᖃᐅᓯᖏᓪᓗ ᓈᓚᒃᑕᐅᓇᑎᒃ.

¹⁷ ᓯᓚᑐᔫᓪᓕ ᐅᖃᐅᓰᖏᑦ ᓂᐱᖃᓗᐊᖏᑦᑐᑦ ᓈᓚᒃᑕᐅᓂᕐᓴᐅᕗᑦ, ᐊᖓᔪᖅᑳᑉ ᕾᒐᓛᕐᓂᖓᓂᑦ ᓯᓔᑦᑐᑦ ᐊᑯᓐᓂᖓᓂ.

¹⁸ ᓯᓚᑐᓂᖅ ᐱᐅᓂᕐᓴᐅᕗᖅ ᐅᓇᑕᐅᑎᓂᑦ, ᐱᐅᖏᑦᑐᓕᔪᕐᓕ ᐊᑕᐅᓯᖅ ᐊᓯᕈᐃᕗᖅ ᐱᐅᔪᓂᒃ ᐅᓄᕐᑐᓂᒃ.