ᐃᓕᓯᒪᓃᑦ ᐃᒃᓖᓯᐊᓯᑏᔅ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓅᓯᕐᒥᒃ ᐃᓱᒪᒃᓴᕐᓯᐅᕈᑎᖃᕐᓂᖅ

¹ ᐊᑏᑦ ᐅᐱᒋᔭᐅᑦᓯᐊᕐᐸᑦ ᐱᐅᓂᕐᓴᐅᕗᖅ ᒥᖑᐊᕈᑎᒥᑦ ᐅᕐᓱᒥᑦ ᐊᑭᑐᔪᒥᑦ, ᑐᖁᓂᐅᓪᓗ ᐅᓪᓗᖓ ᐱᐅᓂᕐᓴᐅᒋᕗᖅ ᐃᕐᓂᐊᖑᕕᐅᑉ ᐅᓪᓗᖓᓂᑦ.

² ᐃᓔᕐᓂᕐᒧᑦ ᕿᒃᓵᒃᑐᑦ ᐃᒡᓗᖓᓄᑦ ᐃᑎᕆᐊᒥᒃ ᐱᐅᓂᕐᓴᐅᕗᖅ ᓂᕆᕕᒡᔪᐊᕐᑐᑦ ᐃᒡᓗᖓᓄᑦ ᐃᑎᕐᓂᕐᒥᑦ, ᐃᓄᓕᒫᑦ ᑕᒪᑐᒥᖓ ᑐᕌᒐᖃᕐᒪᑕ, ᐃᓄᐃᓪᓗ ᐃᓅᔪᓕᒫᑦ ᐆᒻᒪᒻᒥᐅᑕᕆᕚᑦ.

³ ᕿᒃᓵᖕᓂᖅ ᐱᐅᓂᕐᓴᐅᕗᖅ ᐃᒡᓚᕐᓂᕐᒥᑦ, ᑮᓇᕐᒧᑦ ᑲᑕᓗᖓᔪᒧᑦ ᐆᒻᒪᑎ ᐋᖅᑭᒃᑕᐅᖕᒪᑦ.

⁴ ᓯᓚᑐᔫᑉ ᐆᒻᒪᑎᖓ ᐃᓂᖃᕐᐳᖅ ᐃᒡᓗᒥ ᕿᒃᓵᒡᕕᐅᔪᒥ, ᓯᓔᑦᑑᓪᓕ ᐆᒻᒪᑎᖓ ᐃᓂᖃᕐᐳᖅ ᖁᕕᐊᓚᖃᑎᒌᒃᑐᑦ ᐃᒡᓗᖓᓂ.

⁵ ᐱᐅᓂᕐᓴᐅᕗᖅ ᓯᓚᑐᔫᑉ ᓱᐊᖕᓂᖓᓂᒃ ᑐᓵᓗᓂ, ᓯᓔᑦᑑᑉ ᐃᓐᖏᕐᓂᖓᓂᒃ ᑐᓵᓂᕐᒥᑦ.

⁶ ᑲᑭᓪᓚᕐᓇᕐᑑᑉ ᓄᑦᑖᓂᖏᑦ ᑐᓴᕐᓴᐅᖕᒪᑕ ᐅᒃᑯᓯᐅᑉ ᐊᑖᓂ, ᑍᒤᓐᓂᕗᖅ ᓯᓔᑦᑑᑉ ᐃᒡᓚᕐᓂᖓ, ᑕᒪᓐᓇ ᑐᑭᖃᓐᖏᓚᖅ.

⁷ ᐅᖁᒤᒃᓴᕐᑎᑕᐅᓂᕐᒧᑦ ᓯᓚᑐᔪᖅ ᓯᓔᑦᑐᓐᖑᕐᑎᑕᐅᖕᒪᑦ, ᓯᓔᕆᒃᓯᕐᓂᐅᓪᓗ ᐆᒻᒪᑎ ᐋᓐᓂᐊᕐᑖᕐᑎᑉᐹ.

⁸ ᓱᓇᑐᐃᓐᓁᑦ ᐃᓱᓕᓐᓂᖓᑦ ᐱᐅᓂᕐᓴᐅᕗᖅ ᐱᒋᐊᓕᓵᕐᓂᕐᒥᑦ, ᕿᓄᐃᓵᕐᑐᖅ ᐊᓂᕐᓂᖅ ᐱᐅᓂᕐᓴᐅᕗᖅ ᐱᐅᔪᕆᔪᒥᑦ ᐊᓂᕐᓂᕐᒥᑦ.

⁹ ᐊᓂᕐᓃᑦ ᑐᐊᕕᕐᑎᓐᓂᐊᕐᓇᒍ ᓂᓐᖓᖕᓂᕐᒧᑦ, ᓂᖓᐅᒪᓂᖅ ᐃᓂᖃᕐᒪᑦ ᓯᓔᑦᑐᑦ ᓈᖏᓐᓂ.

¹⁰ ᐃᒫᒃ ᐅᖃᕐᓂᐊᕐᓇᒃ, “ᓱᖕᒪᑦ ᐅᓪᓗᐃᑦ ᐊᑐᓚᐅᕐᑕᕗᑦ ᐱᐅᓂᕐᓴᐅᕙᑦ ᐅᓪᓗᓂᑦ ᒫᓐᓇ ᐊᑐᕐᑐᓂᑦ?” ᑍᒫᒃ ᐊᐱᕆᑎᓪᓗᑎᑦ ᓯᓚᑐᔪᑎᑐᑦ ᐃᓱᒪᖏᓐᓇᕕᑦ.

¹¹ ᓯᓚᑐᓂᖅ ᐱᐅᕗᖅ ᐱᖁᑎᓂᒃ ᕿᒤᕕᐅᔪᑎᑐᑦ, ᐱᕚᓪᓕᕈᑕᐅᓪᓗᓂᓗ ᓯᕿᓂᕐᒥᒃ ᑕᑯᔪᓄᑦ.

¹² ᓯᓚᑐᓂᖅ ᓴᐳᓐᓂᐊᕈᑎᐅᕗᖅ ᓲᕐᓗ ᑮᓇᐅᔭᖅ ᓴᐳᓐᓂᐊᕈᑎᐅᖕᒪᑦ. ᖃᐅᔨᒪᓂᐅᑉ ᐱᕚᓪᓕᕐᓇᕐᓂᖓ ᑕᕝᕙ, ᓯᓚᑐᓂᖅ ᑐᓂᓯᖕᒪᑦ ᐃᓅᓯᕐᒥᒃ ᑖᑦᓱᒥᖓ ᐱᖃᕐᑐᒧᑦ.

¹³ ᒎᑎᐅᑉ ᐱᓇᓱᐊᕐᓂᖓ ᐃᓱᒪᒋᒍᒃ; ᑭᓇ ᑐᑭᓕᐊᕐᓯᑎᑦᓯᔪᓐᓇᕐᐸ ᑖᑦᓱᒪ ᓂᐅᖓᒃᑎᑕᕕᓂᖓᓂᒃ?

¹⁴ ᐅᓪᓗᒥᒃ ᐊᔪᕐᓴᖏᑦᓯᐊᕐᓇᕐᑐᖃᕐᐸᑦ ᖁᕕᐊᓱᒋᑦ, ᓇᓪᓕᐅᑎᔪᓪᓕ ᐊᒃᓱᕈᕐᓇᕐᐸᑕ ᐃᒫᒃ ᐃᓱᒪᒋᑦ: ᒎᑎ ᐆᒥᖓ ᓴᓇᓯᒪᕗᖅ ᐊᒻᒪᓗ ᐊᓯᐊᓂᒃ, ᐃᓄᒃ ᓱᓇᒥᒃ ᖃᐅᔨᖁᓇᒍ ᑭᖑᓂᕐᒥᓂ ᖃᓄᐃᑦᑐᖃᕈᒫᕐᒪᖔᑦ.

¹⁵ ᑕᑯᓯᒪᕗᖓ ᐅᓪᓗᓂ ᐃᓅᓂᓐᓂ ᑐᑭᖃᖏᑦᑐᓂᒃ, ᐃᓄᒃᑕᖃᕐᐳᖅ ᐃᓱᐊᕐᑐᓂᒃ ᑐᖁᓯᒪᔪᓂᒃ ᐃᓱᐊᕐᓂᑎᒃ ᐱᑦᔪᑎᒋᓪᓗᒋᑦ. ᐱᐅᖏᑦᑐᓕᔪᓂᒃᑕᐅᖅ ᐃᓄᒃᑕᖃᕆᕗᖅ ᐊᑯᓂ ᐃᓅᔪᓂᒃ ᐊᔪᕐᑐᓕᓂᑎᒃ ᐱᑦᔪᑎᒋᓪᓗᒋᑦ.

¹⁶ ᐃᓱᐊᕐᑐᓕᓗᐊᕐᓂᐊᕐᓇᒃ, ᓯᓚᑐᓗᐊᕐᓂᐊᕐᓇᒡᓘᓐᓃᑦ: ᓱᖕᒪᑦ ᐃᓕᖕᓂᒃ ᐃᓅᓯᑭᑎᓐᓇᓱᐊᕐᐲᑦ?

¹⁷ ᐊᔪᕐᑐᓕᓗᐊᕐᓂᐊᕐᓇᒡᓗ, ᓯᓔᑦᑑᓂᐊᕐᓇᒡᓘᓐᓃᑦ: ᓱᖕᒪᑦ ᑐᖁᔭᕆᐊᖃᕐᐲᑦ ᑐᖁᕕᒃᓮᑦ ᓇᓪᓕᐅᑎᖄᕐᑎᓐᓇᒍ?

¹⁸ ᓈᒻᒪᒃᐳᖅ ᐊᑕᐅᓯᕐᒥᒃ ᑎᒍᒥᐊᕐᓗᑎᑦ ᐂᑉᐸᖓᓗ ᓴᒃᑯᖏᓪᓗᒍ; ᒎᑎᒥᒃ ᓯᕗᕋᔫᑉ ᑕᒪᒃᑯᐊᓕᒫᑦ ᐊᓂᒍᕈᒫᕐᒪᒋᑦ.

¹⁹ ᓯᓚᑐᓂᐅᑉ ᓯᓚᑐᔪᖅ ᓴᓐᖏᔫᑎᑉᐹ, ᓴᓐᖏᓂᕐᓴᐅᓗᓂ ᐊᖓᔪᖅᑳᓂᑦ ᖁᓕᓂᑦ ᐃᒡᓗᒐᓴᒡᔪᐊᓂᒃ ᐊᐅᓚᑦᓯᔨᓂᑦ.

²⁰ ᐃᓄᖕᒥᒃ ᐃᓱᐊᕐᑐᒥᒃ ᓄᓇᒥ ᐱᑕᖃᖏᒻᒪᑦ ᐱᐅᔪᒥᒃ ᐱᓂᐊᕐᓂᖃᕐᑐᒥᒃ ᐊᔪᕐᑐᓕᖏᑦᑐᒥᒡᓗ.

²¹ ᐃᓄᐃᑦ ᐅᖃᐅᓯᕆᔭᓕᒫᖏᑦ ᓈᓚᒃᑍᓐᓇᕆᓂᐊᕐᓇᒋᑦ, ᐱᔨᖕᓂᑦ ᓇᕐᕈᓇᕐᓯᑎᑕᐅᓗᑎᑦ ᐅᖃᐅᓯᐅᑐᐃᓐᓇᕆᐊᖃᕋᕕᑦ.

²² ᐅᓄᕐᑐᐃᕐᓱᕐᓗᑎᑦᑕᐅᖅ ᐆᒻᒪᑎᖕᓂ ᖃᐅᔨᒪᒐᕕᑦ, ᓇᖕᒥᓂᖅ ᐊᒡᓛᑦ ᐊᓯᖕᓂᒃ ᓇᕐᕈᓇᕐᓯᑎᑦᓯᖃᑦᑕᕐᓯᒪᒐᕕᑦ.

²³ ᑕᒪᒃᑯᐊᓕᒫᑦ ᐆᒃᑐᕐᓯᒪᕙᒃᑲ ᓯᓚᑐᓂᒃᑯᑦ; ᐅᖃᓚᐅᕐᐳᖓ, “ᓯᓚᑐᓂᐊᕐᐳᖓ,” ᑕᒪᓐᓇᓕ ᐅᕙᓐᓂᑦ ᐅᖓᓯᒃᑑᓚᐅᕐᐳᖅ.

²⁴ ᑕᒪᓐᓇ ᐅᖓᓯᒃᑐᖅ, ᐊᒃᓱᒻᒪᕆᐊᓗᒡᓗ ᐃᑎᔫᓪᓗᓂ, ᑭᐊ ᖃᐅᔨᔪᓐᓇᕐᐸᐅᒃ?

²⁵ ᐃᓱᒪᒐ ᕿᓂᕐᑎᓚᐅᕐᐸᕋ ᖃᐅᔨᔪᒪᓪᓗᖓ, ᕿᓂᕐᓗᒍ ᓇᓂᓗᒍᓗ ᓯᓚᑐᓂᖅ, ᓱᓇᑐᐃᓐᓁᓪᓗ ᐋᖅᑭᒃᓯᒪᑦᔪᑎᒋᔭᖏᑦ ᓯᓔᑦᑐᓪᓗ ᐱᐅᖏᑦᑐᓕᑦᔪᓯᖏᑦ, ᓯᓔᑦᑐᓪᓘᓐᓂᑦ ᑐᑮᕈᑎᓂᖏᑦ.

²⁶ ᖃᐅᔨᓚᐅᕐᐳᖓ ᑐᖁᒥᑦ ᖃᓯᓕᓇᕐᓂᕐᓴᐅᖕᒪᑦ ᐊᕐᓇᖅ, ᐆᒻᒪᑎᖓ ᓂᒐᐅᔪᖅ ᓄᓗᐊᖑᓪᓗᓂᓗ, ᑕᓕᖏᑕᓗ ᐃᕿᑦᑎᓂᖏᒃ ᐊᕐᓵᕐᑑᔭᐅᔪᑦ. ᒎᑎᒥᒃ ᖁᕕᐊᓱᒃᑎᑦᓯᔫᑉ ᑖᓐᓇ ᕿᒫᔪᓐᓇᕐᐹ, ᐊᔪᕐᑐᓕᔪᕐᓕ ᑖᑦᓱᒪ ᓂᒐᕐᑎᓐᓂᐊᕐᐹ.

²⁷ “ᐃᒫᒃ ᖃᐅᔨᓚᐅᕐᐳᖓ,” ᐊᔪᕆᕐᑐᐃᔪᖅ ᐅᖃᕐᐳᖅ, ᓱᓇᑐᐃᓐᓁᑦ ᖃᓄᐃᑦᑐᑦ ᑲᑎᕐᓱᕐᓗᒋᑦ ᐱᑦᔪᑎᖏᓪᓗ ᓇᓂᓪᓗᒋᑦ,

²⁸ ᐃᓱᒪᒃᑯᑦ ᕿᓂᖃᑦᑍᓐᓇᕐᐳᖓ, ᓇᓂᓚᐅᕐᓇᒍᓗ: ᐊᖑᑎᒥ ᐊᑕᐅᓯᕐᒥᒃ ᐃᓱᐊᕐᑐᒥᒃ ᑕᐅᓴᓐᑎᑦ ᐊᑯᓐᓂᖓᓂ ᓇᓂᓯᓚᐅᕐᐳᖓ, ᐊᕐᓇᒥᒡᓕ ᐃᓱᐊᕐᑐᒥᒃ ᑖᒃᑯᐊ ᐊᑯᓐᓂᖓᓐᓂᑦ ᓇᓂᓯᓚᐅᓐᖏᓚᖓ.

²⁹ ᓱᓕᑦᓯᐊᕐᑐᒥᒃ, ᐅᓇᑐᐊᖅ ᖃᐅᔨᓚᐅᕐᐸᕋ: ᒎᑎᐅᑉ ᐊᖑᑦ ᐃᓱᐊᕐᑑᓪᓗᒍ ᓴᓇᓚᐅᕐᐹ, ᑭᓯᐊᓂᓕ ᐃᓱᒪᔮᕐᓇᕐᑐᓂᒃ ᐅᓄᕐᑐᓂᒃ ᕿᓂᕐᐳᒍᑦ.