ᒨᓯᓯ ᑕᓪᓕᒪᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓄᐃᑦ ᓈᓚᖏᓐᓂᖓᑦ

¹ “ᐃᓴᕆᐊᓕᒥᐅᑦ ᓈᓚᒋᑦᓯ! ᐅᓪᓗᒥ ᐃᑳᕐᓂᐊᓕᕐᐳᓯ ᔪᐊᕐᑕᓂᐅᑉ ᑰᖓᒍᑦ, ᓄᓇᑖᖁᓪᓗᓯ ᐃᓅᖃᑎᒌᒡᔪᐊᓄᑦ ᐃᓕᑦᓯᓐᓂᑦ ᐅᓄᕐᓂᕐᓴᕐᔪᐊᖑᔪᓄᑦ ᐊᔪᖏᓐᓂᕐᓴᕐᔪᐊᖑᔪᓄᓪᓗ ᓄᓇᒋᔭᐅᔪᒥᒃ. ᐃᒡᓗᒐᓴᒡᔪᐊᓂᒃ ᐊᖏᔪᕐᔪᐊᖑᔪᓂᒃ, ᐊᕙᓗᕐᔪᐊᖏᓪᓗ ᕿᓚᖕᒧᑦ ᑎᑭᐅᒪᔪᓂᒃ.

² ᐊᓇᑭᒻᑯᑦ ᑭᖑᕚᖏᑦ ᐊᖏᔫᑎᐊᓘᕗᑦ ᓴᓐᖏᔫᑕᐅᓪᓗᑎᒡᓗ, ᐃᓄᒃᐸᐅᕗᑦ, ᑐᓴᐅᒪᕙᓯᓗ ᓇᓪᓕᐊᓐᓄᓪᓘᓐᓃᑦ ᐅᓇᖕᒥᓇᖏᓐᓂᖏᓐᓂᒃ ᐊᓇᑭᒃᑯᑦ.

³ ᒫᓐᓇᓕ ᓇᖕᒥᓂᖅ ᑕᑯᓂᐊᕐᐳᓯ ᐊᑕᓂᐅᑉ ᒎᑎᑦᓯ ᓯᕗᓪᓕᐅᓗᓂ ᐃᑯᒪᑎᑐᑦ ᑬᕙᑦᑐᐊᓗᒃᑎᑐᑦ ᐱᓕᕆᓂᖓᓂᒃ. ᑖᒃᑯᐊᓗ ᓵᓚᒋᓂᐊᕐᐰᑦ ᐃᓕᑦᓯ ᑕᒪᐅᓐᖓᕈᓐᓇᕐᓯᖁᓪᓗᓯ, ᑖᒃᑯᓂᖓ ᐊᓂᑎᑦᓯᔪᓐᓇᕐᓯᖁᓪᓗᓯ ᓄᖒᑦᓯᖁᓪᓗᓯᓗ ᐊᑯᓂᐅᖏᑦᑐᖅ, ᑍᒤᑦᑐᓐᓇᖁᓪᓗᓯ ᑕᒪᑐᒥᖓ ᐊᖏᕐᕕᒋᓯᒪᖕᒪᓯ.

⁴ “ᐊᑕᓂᐅᓪᓕ ᒎᑎᑦᓯ ᑖᒃᑯᐊ ᐊᓂᑎᓯᒪᓕᕐᐸᒋᑦ ᐃᓕᑦᓯ ᐱᑦᔪᑎᒋᓗᓯ, ᑕᒪᑐᒪ ᑭᖑᓂᖓᒍᑦ ᐃᓱᒪᔪᒃᓴᐅᓐᖏᓚᓯ ᐃᓕᑦᓯ ᑕᒫᓂ ᓄᓇᑖᕆᐊᖃᕐᓂᑦᓯᓐᓄᑦ ᓄᓇᑖᕐᑎᑕᐅᓇᓱᒋᓗᓯ. ᑍᒤᓐᖏᓚᖅ, ᐊᑕᓂᐅᓪᓕ ᐃᓅᖃᑎᒌᒡᔪᐊᑦ ᑕᒫᓐᖓᑦ ᐊᓂᑎᓐᓂᐊᕐᐰᑦ ᐃᓕᑦᓯ ᐱᓪᓗᓯ ᐱᐅᖏᑦᑐᓕᓂᖏᑦ ᐱᑦᔪᑎᒋᓗᒋᑦ.

⁵ ᐱᐅᔫᓂᓯᓕ ᐋᖅᑭᑦᓯᐊᕐᓯᒪᓂᓯᓗ ᐱᑦᔪᑎᒋᓇᒋᑦ ᐊᑕᓂᐅᑉ ᒎᑎᑦᓯ ᑖᒃᑯᐊ ᓄᓇᖏᓐᓂᒃ ᓄᓇᑖᕐᑎᓯᒪᓐᖏᓛᓯ. ᐃᓅᖃᑎᒌᒡᔪᐊᓪᓕ ᓄᓇᖏᓐᓂᑦ ᐊᓂᑎᓐᓂᐊᕐᐰᑦ ᐱᐅᖏᑦᑐᓕᓂᖏᑦ ᐱᑦᔪᑎᒋᓪᓗᒋᑦ ᐊᖏᕈᑎᒋᓯᒪᔭᓂᓗ ᓯᕗᓕᕕᓂᑦᓯᓐᓄᑦ ᐱᑦᔪᑎᒋᓪᓗᒍ, ᐂᑉᕋᕼᐋᒧᑦ, ᐂᓴᑭᒧᑦ, ᔧᑯᒧᓪᓗ.

⁶ ᐊᑕᓂᐅᓪᓕ ᒎᑎᑦᓯ ᑐᓂᓯᕕᒋᓯᒪᓐᖏᓛᓯ ᓄᓇᒥᒃ ᓱᓇᑐᐃᓐᓇᖃᑦᓯᐊᕐᑐᒥᒃ ᐱᔭᕆᐊᖃᕐᓂᓯ ᐱᑦᔪᑎᒋᓗᒍ. ᑍᒤᓐᖏᓚᖅ, ᑐᓵᖏᑦᑐᐊᓘᕗᓯᓕ ᐃᓅᖃᑎᒌᖑᔪᓯ.

⁷ “ᑍᒪᓐᖓᑦ ᐳᐃᒍᕐᑐᒃᓴᐅᓐᖏᓚᓯ ᖃᓄᖅ ᐊᑕᓂᖅ ᒎᑎᓯ ᓂᓐᖓᒃᑎᓚᐅᕐᒪᖔᑦᓯᐅᒃ ᐃᓄᖃᖏᑦᑐᒥ. ᑍᒪᓐᖓᑦ ᐄᑦᔨᑉᑎᒥᑦ ᐊᐅᓪᓚᓚᐅᕐᓂᑦᓯᓐᓂᑦ ᐅᓪᓗᒧᑦ ᒪᐅᖓ ᑎᑭᓐᓂᑦᓯᓐᓄᑦ ᑎᑭᓪᓗᒍ, ᑖᑦᓱᒥᖓ ᐊᑭᕋᕐᑐᖃᑦᑕᕐᓯᒪᕗᓯ.

⁸ ᐊᒡᓛᑦ ᖃᖅᑲᒥ ᕼᐆᕆᑉᒥ ᐊᑕᓂᖅ ᓂᓐᖓᒃᑎᓚᐅᕐᐸᓯ, ᐊᑕᓂᐅᑉ ᐊᖏᔪᒥᒃ ᓂᓐᖓᒃᕕᒋᖕᒪᓯ ᐊᒡᓛᑦ ᓄᖑᑕᐅᑐᐃᓐᓇᕆᐊᖃᓕᓚᐅᕐᐳᓯ ᑖᑦᓱᒧᖓ.

⁹ ᖃᖅᑲᒧᖅ ᒪᔪᕋᕐᓯᒪᑎᓪᓗᖓ ᐱᖁᔭᓂᒃ ᐅᔭᕋᒃᑯᑦ ᑎᑎᕋᑦᓯᒪᔪᓂᒃ ᐊᑕᓂᐅᑉ ᐃᓕᑦᓯᓐᓄᑦ ᐊᖏᖃᑎᒌᒍᑎᖏᓐᓂᒃ ᐱᔭᕐᑐᕐᓯᒪᑎᓪᓗᖓ. ᐅᓪᓗᓂᒃ ᐅᓐᓄᐊᓂᒡᓗ 40ᓂᒃ ᓂᕆᓚᐅᕐᓇᖓ ᐃᒥᓚᐅᕐᓇᖓᓗ ᒪᔪᕋᕐᓯᒪᓚᐅᕋᒪ.

¹⁰ ᑕᕝᕙᓂ ᐊᑕᓂᐅᑉ ᑐᓂᓯᕕᒋᓚᐅᕐᐹᖓ ᐅᔭᕌᖕᓂᒃ ᒪᕐᕉᖕᓂᒃ ᓇᖕᒥᓂᖅ ᒎᑎᐅᑉ ᑎᑎᕋᕐᕕᒋᓯᒪᔭᒥᓂᒃ ᐃᓕᑦᓯᓐᓄᑦ ᐅᖃᐅᓯᕆᓯᒪᔭᒥᓂᒃ ᐃᑯᒪᒦᓪᓗᓂ ᑍᑦᓱᒪᓂ ᐅᓪᓗᒥ ᖃᖅᑲᐅᑉ ᑭᒡᓕᖓᓂ ᑲᑎᓐᖓᑎᓪᓗᓯ.

¹¹ ᐅᓪᓗᓪᓕ ᐅᓐᓄᐊᓪᓗ 40 ᐊᓂᒍᕐᑎᓪᓗᒋᑦ ᐊᑕᓂᐅᑉ ᑐᓂᓯᕕᒋᓚᐅᕐᐹᖓ ᐅᔭᕌᖕᓂᒃ ᒪᕐᕉᖕᓂᒃ ᑎᑎᕋᕐᕕᒋᓯᒪᔭᒥᓂᒃ ᐊᖏᖃᑎᒌᒍᑎᓂᒃ.

¹² “ᑕᕝᕙ ᐊᑕᓂᐅᑉ ᐅᖃᐅᑎᕚᖓ, ‘ᒫᓐᓇ ᑐᐊᕕᕐᓗᑎᑦ ᖃᖅᑲᒥᑦ ᐊᖅᑲᓕᕆᑦ, ᐃᓄᖁᑎᑎᑦ ᐄᑦᔨᑉᑎᒥᑦ ᑕᓯᐅᓚᐅᕐᑕᑎᑦ, ᐱᐅᖏᑦᑐᐊᓗᖕᒥᒃ ᐱᓕᕐᒪᑕ ᐊᔪᕐᑐᓕᓕᕐᓗᑎᒡᓗ. ᐱᖁᔨᑦᔪᑎᒋᓚᐅᕐᑕᓐᓂᒃ ᕿᒤᓯᒪᓕᕇᕐᒪᑕ, ᒎᑎᓐᖑᐊᒃᓴᒥᖕᓂᒡᓗ ᓴᓇᓯᒪᓕᕐᓗᑎᒃ.’

¹³ “ᐊᑕᓂᐅᓪᓗ ᐅᖃᐅᑎᒃᑲᓐᓂᕆᕚᖓ, ‘ᐅᑯᐊ ᐃᓄᐃᑦ ᖃᐅᔨᒪᔭᒃᑲ ᑐᓴᕈᓐᓇᖏᑦᑐᐊᓘᖕᒪᑕ.

¹⁴ ᓄᖅᑲᕐᑎᓐᓇᓱᐊᕐᓂᐊᕐᓇᖓ, ᓄᖑᑦᓱᒪᓕᕋᒃᑭᑦ ᓇᓪᓕᐊᓐᓄᓪᓘᓐᓃᑦ ᐃᖅᑲᐅᒪᔭᐅᔪᓐᓃᖁᓪᓗᒋᑦ. ᑕᕝᕙ ᐃᓅᖃᑎᒌᒡᔪᐊᓄᑦ ᐱᒋᐊᕐᕕᐅᓕᕐᑎᓐᓂᐊᕐᐸᒋᑦ ᑖᒃᑯᓇᓐᖓᑦ ᐅᓄᕐᓂᕐᓴᐅᔪᓂᒃ ᐱᔪᓐᓇᕐᓂᖃᕐᓂᕐᓴᐅᔪᓂᒡᓗ.’

¹⁵ “ᑕᕝᕙ ᖃᖅᑲᒥᑦ ᐅᑎᕆᐊᓕᓚᐅᕐᐳᖓ ᐊᖅᑲᕐᑎᓕᕐᓗᖓᓗ, ᐊᒡᔭᕐᓯᓪᓗᖓ ᐅᔭᕌᖕᓂᒃ ᒪᕐᕉᖕᓂᒃ ᑎᑎᕋᕐᕕᒋᓯᒪᔫᖕᓂᒃ ᐊᖏᖃᑎᒌᒍᑕᐅᓯᒪᔪᓂᒃ. ᐃᑯᒪᔪᐊᓗᒡᓗ ᖃᖅᑲᒥᑦ ᐊᖅᑲᖃᑦᑕᓚᐅᕐᐳᖅ.

¹⁶ ᑕᑯᓕᓚᐅᕐᐳᖓᓗ ᐊᑕᓂᐅᑉ ᒎᑎᑦᓯ ᐱᔭᐅᖁᓯᒪᔭᖏᓐᓂᒃ ᒪᓕᒍᓐᓁᕐᓂᑦᓯᓐᓂᒃ, ᑖᑦᓱᒧᖓᓗ ᐊᔪᕐᑐᓕᓂᑦᓯᓐᓂᒃ ᓴᕕᕋᔭᖕᒥᒃ ᒎᑎᓐᖑᐊᒥᒃ ᐃᒻᒧᓕᐅᕐᑎᐅᑉ ᓄᕐᕋᓐᖑᐊᖓᓂᒃ ᓴᓇᓯᒪᓂᑦᓯᓐᓄᑦ.

¹⁷ ᑕᕝᕙ ᓯᕗᕋᑦᓯᓐᓂ ᑖᒃᑯᐊᒃ ᐅᔭᕌᒃ ᑎᒍᒥᐊᕐᑖᒃᑲᒃ ᐃᒋᓚᐅᕐᐹᒃᑲᒃ ᓯᖁᒥᓪᓗᒋᒡᓗ.

¹⁸ ᑕᒪᑐᒪ ᑭᖑᓂᖓᒍᑦ ᐊᑕᓂᐅᑉ ᓵᖓᓂ ᐹᒻᒪᖓᓕᓚᐅᕆᕗᖓ ᐅᓪᓗᓂᒃ ᐅᓐᓄᐊᓂᒡᓗ 40ᓂᒃ ᓱᓇᒥᒡᓘᓐᓃᑦ ᓂᕆᓚᐅᕐᓇᖓ ᐃᒥᓚᐅᕐᓇᖓᓗ. ᑍᒤᓕᐅᓚᐅᕐᐳᖓᓕ ᐊᑕᓂᕐᒧᑦ ᐊᔪᕐᑐᓕᓚᐅᕐᓂᑦᓯᓐᓄᑦ ᐊᖏᔪᒥᒃ ᓂᓐᖓᒃᑎᓚᐅᕋᑦᓯᐅᒃ.

¹⁹ ᓯᕘᕋᓕᓚᐅᕋᒪ ᐊᑕᓂᐅᑉ ᓂᓐᖓᐅᒪᔪᐊᓘᓂᖓᓂᒃ, ᐊᖏᔪᒥᒃ ᓂᓐᖓᓚᐅᕐᒪᑦ ᐊᒡᓛᑦ ᐃᓕᑦᓯᓐᓂᒃ ᓄᖒᑦᓯᑐᐃᓐᓇᕆᐊᖃᓕᓚᐅᕐᒪᑦ; ᐊᑕᓂᐅᓪᓕ ᓱᓕ ᑐᒃᓯᐊᕐᓂᓐᓂᒃ ᑐᓴᓚᐅᕆᕚᖓ.

²⁰ ᐊᑕᓂᖅ ᐊᖏᔪᒥᒃ ᓂᓐᖓᐅᒪᓚᐅᕆᕗᖅ ᐂᕉᓂᒧᑦ ᐊᒡᓛᑦ ᑐᖁᑐᐃᓐᓇᕆᐊᖃᓕᓚᐅᕐᐹ, ᐂᕉᓂᑦᑕᐅᖅ ᐱᑦᔪᑎᒋᓪᓗᒍ ᑐᒃᓯᐊᕆᐊᖃᓚᐅᕆᕗᖓ.

²¹ ᑭᖑᓂᖓᒍᑦ ᐱᐅᖏᑦᑐᒥᒃ ᐱᓇᓱᐊᓕᓚᐅᕆᕗᖓ, ᑍᓐᓇ ᐃᒻᒧᒃᓯᐅᒐᐅᑉ ᓄᕐᕋᓐᖑᐊᖓ ᓴᕕᕋᔭᒃ ᓴᓇᓚᐅᕐᑕᓯ ᐱᑦᔪᑎᒋᓪᓗᒍ, ᐃᑯᒪᒧᑦ ᐃᑯᐊᓪᓚᒃᑎᓚᐅᕐᓗᒍ ᐊᐅᖕᒪᑦ ᓯᖃᓪᓕᑦᑎᐊᓚᐅᕐᐸᕋ, ᓯᖃᓪᓕᑦᑎᐊᕐᓗᓂ ᐊᒡᓛᑦ ᐳᔪᕋᕐᑎᑐᑦ ᑍᒤᓕᕐᑎᓚᐅᕐᐸᕋ, ᑖᓐᓇᓗ ᓯᖃᓪᓕᓂᖓ ᑰᖕᒧᑦ ᓈᕕᓚᐅᕐᐸᕋ ᖃᖅᑲᒥᑦ ᑰᒃᑐᒧᑦ.

²² “ᐊᒻᒪᑦᑕᐅᖅ ᐊᑕᓂᖅ ᒎᑎᓯ ᓂᓐᖓᒃᑎᓚᐅᕐᐸᓯ ᓄᓇᓕᖕᓂ ᑕᐱᕋᒥ, ᒫᓴᒥ, ᑭᐳᕌᑎ-ᕼᐊᑖᕙᒥ.

²³ ᐊᑕᓂᐅᓪᓕ ᐊᐅᓪᓚᕐᑎᒻᒪᓯ ᑲᑎᓯ-ᐸᕐᓂᐊᒥᑦ ᑎᓕᔭᐅᓪᓗᓯ ᓄᓇᑖᕆᐊᕐᑐᖁᔭᐅᓪᓗᓯ ᐃᓕᑦᓯᓐᓄᑦ ᑐᓂᓯᒪᔭᖓᓂᒃ, ᐊᑕᓂᕐᒥᒃ ᒎᑎᑦᓯᓐᓂᒃ ᐊᑭᕋᕐᑐᓕᓚᐅᕆᕗᓯ; ᐅᒃᐱᕈᓱᖏᓐᓂᑦᓯᓐᓄᑦ ᑖᑦᓱᒥᖓ ᓈᓚᖏᓐᓂᑦᓯᓐᓄᓪᓗ.

²⁴ ᑍᒪᓐᖓᑦ ᐃᓕᑦᓯᓐᓂᒃ ᖃᐅᔨᒪᓕᓚᐅᕐᓂᓐᓂᑦ ᐊᑕᓂᕐᒥᒃ ᐊᑭᕋᕐᑐᐃᓐᓇᖃᑦᑕᕐᐳᓯ.

²⁵ “ᑍᒤᒻᒪᑦ ᐹᒻᒪᖓᓚᐅᕐᐳᖓ ᐊᑕᓂᐅᑉ ᓵᖓᓂ ᐅᓪᓗᓂᒃ ᐅᓐᓄᓂᒡᓗ 40ᓂᒃ, ᖃᐅᔨᒪᓚᐅᕋᒪ ᐃᓕᑦᓯᓐᓂᒃ ᓄᖒᑦᓯᔪᒪᓯᒪᓕᖕᓂᖓᓂᒃ.

²⁶ ᑐᒃᓯᐊᓚᐅᕐᐳᖓᓗ ᐊᑕᓂᕐᒧᑦ, ‘ᐊᑕᓃᖅ ᒎᑎᐅᔪᑎᑦ, ᓇᖕᒥᓂᖅ ᐃᓄᖁᑎᒋᔭᑎᑦ ᓄᖑᑎᓐᓂᐊᕐᓇᒋᑦ, ᑖᒃᑯᐊ ᓴᐳᑎᓚᐅᕐᑕᑎᑦ ᐊᐅᓪᓚᕐᑎᓚᐅᕐᑕᑎᓪᓗ ᐄᑦᔨᑉᑎᒥᑦ ᓴᓐᖏᓂᕐᔪᐊᕐᓄᑦ ᐱᔪᓐᓇᕐᓂᕐᔪᐊᕐᓄᓪᓗ.

²⁷ ᐱᔨᑎᑦ ᐃᖅᑲᐅᒪᓚᐅᒃᑭᑦ, ᐂᑉᕋᕼᐋᒻ, ᐂᓴᑭ, ᔧᑯᓗ, ᐃᓱᒪᒋᓐᖏᓚᐅᒃᑭᑦ ᒫᓐᓇ ᐃᓅᖃᑎᒌᑦ ᑐᓴᕈᓐᓇᖏᑦᑐᐊᓘᓂᖏᑦ, ᐱᐅᖏᑦᑐᓕᓂᖏᓪᓗ, ᐊᔪᕐᑐᓕᓂᖏᓪᓗ.

²⁸ ᐄᑦᔨᑉᑎᒥᐅᑦ ᐅᖃᐅᓯᖃᓕᖁᓇᒋᑦ ᐃᓕᖕᓂᒃ ᐃᓄᖁᑎᓂ ᓄᓇᒧᑦ ᐊᖏᕈᑎᖏᓯᒪᔭᒥᓄᑦ ᑎᑭᑎᑦᓱᓐᓇᓐᖏᓔᑦ. ᐅᖃᓕᕋᔭᕆᕗᑦ ᐃᓄᖁᑎᓂ ᐃᓄᖃᖏᑦᑐᒧᐊᕈᑎᓚᐅᕐᐰᑦ ᑐᖁᑦᑕᕐᑐᕈᒪᓪᓗᖏᑦ, ᐃᓄᖁᑎᓂ ᐆᒥᒋᓕᕋᒥᒋᑦ.

²⁹ ᐅᑯᐊᓕ ᐃᓅᖃᑎᒌᑦ ᓂᕈᐊᕐᓯᒪᕙᑎᑦ ᐃᕝᕕᑦ ᓇᖕᒥᓂᕆᔪᒪᓪᓗᒋᑦ ᑖᒃᑯᐊᓗ ᐊᐅᓪᓚᕐᑎᓚᐅᕐᐸᑎᑦ ᐄᑦᔨᑉᑎᒥᑦ ᐱᔪᓐᓇᕐᓂᕐᔪᐊᕐᓄᑦ ᓴᓐᖏᓐᓂᕐᔪᐊᕐᓄᓪᓗ.’”