ᒨᓯᓯ ᑕᓪᓕᒪᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᓄᓇᑦᓯᐊᕙᒃ ᓄᓇᑖᕆᔭᐅᔪᒃᓴᖅ

¹ “ᐱᖁᔭᓕᒫᑦ ᐅᓪᓗᒥ ᐃᓕᑦᓯᓐᓄᑦ ᒪᓕᒃᑕᐅᖁᔭᒃᑲ ᓈᓚᒃᑕᒃᓴᕆᕙᓯ, ᐃᓅᔪᓐᓇᖁᓪᓗᓯ ᐅᓄᕐᓯᕙᓪᓕᐊᔪᓐᓇᖁᓪᓗᓯᓗ, ᓄᓇᑖᕈᓐᓇᖁᓪᓗᓯᓗ ᐊᑕᓂᐅᑉ ᑐᓂᓂᐊᕐᓂᕋᕐᓯᒪᔭᖓᓂᒃ ᓯᕗᓕᕕᓂᑦᓯᓐᓄᑦ.

² ᐃᖅᑲᐅᒪᔪᒃᓴᐅᕗᓯᑦᑕᐅᖅ ᐊᑕᓂᐅᑉ ᒎᑎᑦᓯ ᖃᓄᖅ ᑕᓯᐅᓚᐅᕐᒪᖔᓯ ᐊᕐᕌᒍᓂᒃ 40ᓂᒃ ᐃᓄᖃᖏᑦᑐᒃᑯᑦ, ᐃᓕᑦᓯᓐᓂᒃ ᒥᑭᒡᓕᑎᕈᓐᓇᕐᓯᖁᓪᓗᓯ, ᖃᐅᔨᓴᕈᒪᓪᓗᓯᓗ ᖃᓄᖅ ᐆᒻᒪᒻᒥᐅᑕᖃᕐᒪᖔᑦᓯ, ᐱᖁᔭᖏᓐᓂᒡᓗ ᓈᓚᒍᒪᓂᐊᕐᒪᖔᑦᓯ, ᓈᓚᒍᒪᓂᐊᖏᒻᒪᖔᑦᓯᓗ.

³ ᒥᑭᒡᓕᑎᕐᑎᓚᐅᕐᐹᓯ ᑳᓕᕐᑎᓪᓗᓂᓯ ᓂᕆᑎᑦᓱᒪᓪᓗᓂᓯ ᒫᓇᒥᒃ, ᑕᒪᑐᒥᖓ ᖃᐅᔨᒪᓚᐅᓐᖏᑕᑦᓯᓐᓂᒃ, ᓯᕗᓕᕕᓂᑦᓯᓘᓐᓃᑦ ᖃᐅᔨᒪᓚᐅᓐᖏᑕᖓᓂᒃ; ᖃᐅᔨᑎᑦᓱᒪᓪᓗᓂᓯ ᐃᓄᒃ ᓂᐊᖂᔭᑐᐃᓐᓇᕐᒧᑦ ᐃᓅᔪᓐᓇᖏᒻᒪᑦ, ᐊᑕᓂᐅᓪᓕ ᓇᖕᒥᓂᖅ ᐅᖃᐅᓯᖏᑎᒍᑦ ᑭᓯᐊᓂ ᐃᓅᔪᓐᓇᕐᐳᖅ.

⁴ ᐊᕐᕌᒍᓂᓕ ᑖᒃᑯᓇᓂ 40ᓂ ᐊᓐᓄᕌᓯ ᐱᐅᔪᓐᓁᕐᑐᖃᓚᐅᓐᖏᓚᑦ, ᐃᑎᒐᓯᓗ ᐳᓪᓕᓕᓚᐅᕋᑎᒃ.

⁵ ᐆᒻᒪᑎᑦᓯᒍᑦ ᖃᐅᔨᔪᒃᓴᐅᕗᓯ, ᐊᑖᑕᐅᑉ ᐃᕐᓂᓂ ᐋᖅᑭᒋᐊᓲᕆᖕᒪᒍ, ᑍᒫᒃᑕᐅᖅ ᐊᑕᓂᐅᑉ ᒎᑎᑦᓯ ᐋᖅᑭᒋᐊᖃᑦᑕᓚᐅᕆᕚᓯ.

⁶ ᑍᒤᒻᒪᑦ, ᐊᑕᓂᐅᑉ ᒎᑎᑦᓯ ᐃᓕᑦᓯᓐᓄᑦ ᐱᓇᓱᐊᕐᑕᐅᖁᔭᖓᓂᒃ ᐱᓇᓱᐊᕐᑐᒃᓴᐅᕗᓯ: ᑖᑦᓱᒪ ᐱᖁᔭᖏᑦ ᒪᓕᒡᓗᒋᑦ ᐃᓅᔪᒃᓴᐅᕗᓯ ᐃᓕᕋᒋᓗᒍᓗ.

⁷ ᐊᑕᓂᐅᑉ ᒎᑎᑦᓯ ᓄᓇᒧᑦ ᓂᕿᒃᓴᖃᑦᓯᐊᕐᑐᒧᑦ ᑎᑭᐅᑎᑎᒻᒪᓯ, ᑰᒐᓛᖃᐅᑦᓯᐊᕐᑐᒧᑦ ᓄᓇᐅᓪᓗ ᐃᓗᐊᓂᑦ ᑰᖏᓐᓇᕐᑐᖃᕐᑐᒧᑦ ᐃᒪᖃᕐᑐᒧᓪᓗ, ᓇᕐᓴᑎᒍᓪᓗ ᖃᖅᑲᑎᒍᓪᓗ ᑰᖃᐅᕐᑐᒧᑦ.

⁸ ᓄᓇᒧᑦ ᓂᐊᖂᔭᒃᓴᖃᕐᑐᒧᑦ ᖃᑯᕐᑕᓂᒃ ᑲᔪᕐᓂᒡᓗ, ᕔᓂᒃᓴᓕᖕᒧᑦ ᐱᒋᓕᒃᓴᓂᒡᓗ ᓇᐹᕐᑐᓕᖕᒧᑦ, ᐳᒥᕐᒍᓁᑎᓂᒡᓗ, ᓇᐹᕐᑐᓕᖕᓄᓪᓗ ᐅᕐᓱᒃᓴᓕᖕᓂᒃ, ᐃᒍᑦᑕᐅᓪᓗ ᓰᕐᓇᐅᑎᖏᓐᓂᒃ ᐱᑕᖃᕐᑐᒧᑦ.

⁹ ᑕᕝᕙᓂ ᐊᔪᕐᓴᓚᐅᕐᓯᒪᓂᐊᓐᖏᓚᓯ ᑭᓐᖒᒪᔭᖃᕐᓂᐊᕋᓯᓗ, ᐅᔭᕋᖏᓪᓗ ᓴᕕᕋᔭᒃᓴᕐᑕᖃᕐᐳᑦ, ᖃᖅᑲᖏᓐᓂᓪᓗ ᑲᓐᓄᔭᓂᒃ ᑲᑎᑦᓯᔪᓐᓇᕐᓂᐊᕐᐳᓯ.

¹⁰ ᑕᕝᕙᓂ ᓂᕆᔪᒪᓲᓕᒫᑦᓯᓐᓂᒃ ᓂᕆᔪᓐᓇᕐᓂᐊᕐᐳᓯ, ᐊᑕᓂᕐᓗ ᒎᑎᓯ ᑕᒪᒃᑯᓄᖓ ᖁᔭᒋᓂᐊᕐᐸᓯ ᓱᓇᑐᐃᓐᓇᖃᑦᓯᐊᕐᑐᒥᒃ ᓄᓇᒥᒃ ᐃᓕᑦᓯᓐᓄᑦ ᑐᓂᓯᓯᒪᓂᖓ ᐱᑦᔪᑎᒋᓗᒍ.”

ᐊᑕᓂᕐᒥᒃ ᐳᐃᒍᕐᓂᐅᑉ ᐅᓗᕆᐊᓇᕐᓂᖓ

¹¹ “ᐃᒃᐱᒍᓱᑦᓯᐊᕐᑐᒃᓴᐅᕗᓯ ᐳᐃᒍᖁᓇᓯ ᐊᑕᓂᕐᒥᒃ ᒎᑎᑦᓯᓐᓂᒃ; ᐱᖁᔭᖏᑕᓗ ᓇᓪᓕᐊᓐᓂᒃ ᓈᓚᓐᖏᑕᖃᕐᑍᓕᒋᑦᓯ ᐃᓕᑦᓯᓐᓄᑦ ᐅᓪᓗᒥ ᑐᓂᔭᓐᓂᒃ.

¹² ᓂᕆᔪᒪᔭᓕᒫᑦᓯᓐᓂᒃ ᓂᕆᖃᑦᑕᓕᕐᑎᓪᓗᓯ ᐃᒡᓗᑦᓯᐊᕙᖕᓂᒡᓗ ᓴᓇᓯᒪᓕᕐᑎᓪᓗᓯ ᐊᖏᕐᕋᖃᓕᕐᑎᓪᓗᓯᓗ,

¹³ ᐆᒪᔪᖁᑎᓯᓗ ᐃᒻᒧᒃᓯᐅᒊᑦ ᓰᐱᖁᑎᓯᓗ ᐅᓄᕐᓯᕙᓪᓕᐊᒃᐸᑕ, ᓯᐅᓪᕕᕆᖁᑎᓯᓗ ᒎᓗᖁᑎᓯᓗ ᐅᓄᕐᓯᕙᓪᓕᐊᖕᒥᓗᑎᒃ, ᐊᓯᓕᒫᖏᓪᓗ ᐱᖁᔭᓯ ᐅᓄᕐᓯᕙᓪᓕᐊᓯᒪᓕᕐᐸᑕ,

¹⁴ ᐱᐅᔪᕆᓕᕐᑐᒃᓴᐅᓐᖏᓚᓯ ᐳᐃᒍᓕᕐᑐᒃᓴᐅᓇᓯᓗ ᐊᑕᓂᕐᒥᒃ ᒎᑎᑦᓯᓐᓂᒃ ᐃᓕᓯᓐᓂᒃ ᓴᐳᑦᔨᓚᐅᕐᑐᒥᒃ ᐄᑦᔨᑉᑎᒥᑦ, ᓯᐊᓛᖑᕕᒋᓚᐅᕐᑕᑦᓯᓐᓂᑦ.

¹⁵ ᑖᑦᓱᒪ ᑕᓯᐅᓚᐅᕐᒪᓯ ᓯᕕᑐᔪᐊᓗᒃᑯᑦ ᖁᐊᕐᓵᖓᓇᕐᑐᒃᑯᓪᓗ ᓱᓇᖃᖏᑦᑐᒃᑯᑦ, ᖁᒡᓗᒋᐊᖃᕐᑐᒃᑯᑦ ᑐᖁᓐᓇᕐᑐᓕᖕᓂᒃ ᓯᑯᐊᕐᐱᐅᓂᖃᕐᑐᑎᒍᓪᓗ. ᓄᓇᒃᑯᑦ ᐸᓂᕐᑐᐊᓗᒃᑯᑦ ᐃᒪᖃᖏᑦᑐᒃᑯᑦ ᐃᒥᕐᒥᒃ ᑰᓕᕐᑎᑦᓯᓚᐅᕐᐳᖅ ᐃᒥᕐᕕᒃᓴᑦᓯᓐᓂᒃ ᐅᔭᕋᖕᒥᑦ ᕾᕐᑐᓪᓚᕆᖕᒥᑦ.

¹⁶ ᓱᓇᖃᖏᑦᑐᒥ ᓂᕆᑎᓚᐅᕐᐹᓯ ᓂᕿᒃᓴᒥᒃ ᒫᓇᒥᒃ ᓯᕗᓕᑦᓯ ᖃᐅᔨᓚᐅᕐᓯᒪᓐᖏᑕᖏᓐᓂᒃ, ᒥᑭᒡᓕᑎᕈᓐᓇᖁᓪᓗᓯ ᖃᐅᔨᓴᕈᒪᓪᓗᓂᓯᓗ, ᑕᒪᓐᓇ ᐊᓂᒍᕐᐸᑦ ᓮᒻᒪᕐᑎᑦᓱᒪᓪᓗᓂᓯ ᐱᕙᓪᓕᐅᑎᒃᓴᑦᓯᓂᒡᓗ ᐱᑎᑦᓱᒪᓪᓗᓂᓯ.

¹⁷ ᑍᒤᒻᒪᑦ ᐃᓱᒪᔪᒃᓴᐅᓐᖏᓚᑎᑦ ᐃᓕᖕᓂᒃ ᓇᖕᒥᓂᖅ ᐊᔪᕐᓴᕈᓐᓁᕐᑎᓯᒪᓇᓱᒋᓗᑎᑦ ᐱᔪᓐᓇᕐᓂᕐᓄᑦ ᓴᓐᖏᓂᕐᓄᓪᓗ.

¹⁸ ᐃᖅᑲᐅᒪᔪᒃᓴᐅᕗᑎᑦ ᐊᑕᓂᐅᑉ ᒎᑎᕕᑦ ᐱᔪᓐᓇᕐᓂᕐᒥᒃ ᑐᓂᓯᕕᒋᓯᒪᕚᑎᑦ ᐊᔪᕐᓴᕈᓐᓃᖁᓪᓗᑎᑦ. ᑍᒤᓕᐅᕐᐳᕐᓕ ᐅᓪᓗᒥ ᓱᓕ ᓯᕗᓕᕆᓚᐅᕐᑕᑦᓯᓐᓄᑦ ᐊᖏᕈᑎᒋᓯᒪᔭᒥᓂᒃ ᑲᔪᓯᑎᑦᓯᓯᒪᓂᕐᒥᓄᑦ.

¹⁹ ᐊᑕᓂᕐᒥᒃ ᒎᑎᖕᓂᒃ ᐳᐃᒍᕐᑐᒃᓴᐅᓐᖏᓚᑎᑦ ᐊᓯᐊᓂᒡᓘᓐᓂᑦ ᑐᒃᓯᐊᕐᕕᖃᖃᑦᑕᓕᕐᓗᑎᑦ ᐱᔨᑦᓯᓕᕐᓗᑎᓪᓗ ᐱᔪᒃᓴᐅᓐᖏᓚᑎᑦ. ᑍᒤᓐᓂᐊᕈᕕᑦ, ᓯᕘᕋᒋᔭᒃᓴᕐᓂᒃ ᐅᓪᓗᒥ ᐅᖃᐅᑎᕙᒋᑦ ᖁᓚᕐᓇᖏᑦᓯᐊᕐᑐᒥᒃ ᓄᖑᑕᐅᓪᓚᕆᒍᒫᕐᐳᑎᑦ.

²⁰ ᐊᑕᓂᕐᒥᒃ ᒎᑎᖕᓂᒃ ᒪᓕᖕᓂᐊᖏᒃᑯᕕᑦ, ᑍᒫᑦᓮᓐᓇᕐᑕᐅᖅ ᓄᖑᑎᑕᐅᔪᒫᕐᐳᑎᑦ ᐃᓅᖃᑎᒌᒡᔪᐊᑎᑐᑦ ᓄᖑᑕᐅᑎᓐᓂᐊᕐᑕᒥᑐᑦ ᐃᓕᑦᓯ ᐱᑦᔪᑎᒋᓪᓗᓯ.”