ᒨᓯᓯ ᑕᓪᓕᒪᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᓇᖕᒥᓂᕆᓪᓗᒋᑦ ᐃᓄᖁᑎᖏᑦ

¹ “ᐊᑕᓂᐅᑉ ᒎᑎᑦᓯ ᓄᓇᒧᑦ ᑎᑭᑎᓐᓂᐊᕐᐹᓯ ᓄᓇᑖᕆᓂᐊᕐᑕᑦᓯᓐᓄᑦ, ᐃᓅᖃᑎᒌᒡᔪᐊᓪᓗ ᐅᓄᕐᑐᑦ ᑕᒫᓂ ᓄᓇᖃᕐᑐᑦ ᓅᑎᓐᓂᐊᕐᐰᑦ, ᓵᓚᒃᓴᖁᓪᓗᓯ ᐃᓅᖃᑎᒌᒡᔪᐊᑦ 7ᐃᑦ ᐊᐅᓪᓚᕐᑎᓐᓂᐊᕐᐰᑦ ᐃᓕᑦᓯᓐᓂᑦ ᐃᓄᒋᐊᖕᓂᕐᓴᐅᔪᑦ ᓴᓐᖏᓂᕐᓴᐅᔪᓪᓗ; ᕼᐃᑍᑎᒥᐅᑦ, ᒋᕐᒐᓮᑎᒥᐅᓪᓗ, ᐊᒧᕅᑎᒥᐅᓪᓗ, ᑬᓇᓂᒥᐅᓪᓗ, ᐱᕆᔧᑎᒥᐅᓪᓗ, ᕼᐃᕔᑎᑎᒥᐅᓪᓗ, ᔨᐳᓮᑎᒥᐅᓪᓗ.

² ᐊᑕᓂᐅᓪᓕ ᒎᑎᑦᓯ ᐃᓕᑦᓯᓐᓄᑦ ᑐᓂᒃᐸᒋᑦ, ᓵᓚᒋᒍᑦᓯᒋᒡᓗ, ᑕᕝᕙ ᓄᖑᓪᓚᕆᒋᐊᖃᕐᐸᓯ ᑐᖁᑍᓐᓇᕆᓗᒋᑦ; ᓇᓪᓕᐊᓪᓘᓐᓃᑦ ᐊᖏᖃᑎᒋᓇᓱᐊᕐᑕᒃᓴᕆᓐᖏᓚᓯ ᓂᑲᒋᔭᒃᓴᕆᓐᖏᓚᓯᓘᓐᓃᑦ.

³ ᑖᒃᑯᓇᓐᖓᓪᓗ ᓄᓕᐊᓂᒃᑐᒃᓴᐅᓐᖏᓚᓯ, ᕿᑐᕐᖓᓯᓗ ᑖᒃᑯᓇᓐᖓᑦ ᐂᑉᐸᕐᑖᕐᑎᑕᒃᓴᕆᓐᖏᓚᓯ,

⁴ ᕿᑐᕐᖓᑦᓯᓐᓂᒃ ᑕᓯᐅᕐᓯᒐᔭᕐᒪᑕ ᒎᑎᓐᖑᐊᓄᑦ ᑐᒃᓯᐊᖃᑦᑕᓕᕐᑎᑦᓯᓗᑎᒃ ᐊᑕᓂᕐᒥᒃ ᕿᒤᖔᕐᓗᑎᒃ, ᑍᒤᓕᑐᐊᕐᐸᑕ, ᐊᑕᓂᐅᑉ ᓂᓐᖓᐅᓯᖓᑕ ᑎᑭᕝᕕᒋᒐᔭᕐᐹᓯ ᑕᒪᑦᓯᓗ ᓄᖑᑕᐅᓗᓯ ᑕᕝᕔᓐᓇᖅ.

⁵ ᑍᒤᒻᒪᑦ ᐃᒫᒃ ᐱᓇᓱᐊᕐᕕᒋᔭᒃᓴᕆᕙᓯ, ᒎᑎᓐᖑᐊᓄᑦ ᑐᓂᕐᕈᓯᕐᕕᖏᑦ ᓱᕋᒃᑎᒐᒃᓴᕆᕙᓯ, ᓱᑲᖁᑎᒋᔭᖏᓪᓗ ᓇᐸᔪᑦ ᐱᓪᓚᕆᖁᑎᒋᔭᖏᑦ ᓯᖃᓪᓕᓗᒋᑦ, ᐊᕐᓇᓐᖑᐊᓪᓗ ᒎᑎᓐᖑᐊᖏᑦ ᐊᓯᕋᒥᒃ ᐊᑎᓖᑦ ᐅᕐᕈᑎᑕᒃᓴᕆᕙᓯ, ᒎᑎᓐᖑᐊᖏᓪᓗ ᐃᑯᐊᓪᓚᒃᑎᓪᓗᒋᑦ.

⁶ ᑍᒤᓕᐅᕐᑐᒃᓴᐅᕗᓯ ᐃᓕᑦᓯ ᐊᑕᓂᐅᑉ ᒎᑎᑦᓯ ᐃᓄᖁᑎᒋᖕᒪᓯ ᐃᑦᔪᕐᓁᑎᑕᐅᔪᑦ ᑖᑦᓱᒧᖓ. ᐊᑕᓂᐅᑉ ᒎᑎᑦᓯ ᓂᕈᐊᕐᓯᒪᖕᒪᓯ ᓇᖕᒥᓂᖅ ᐃᓄᖁᑎᒋᓗᓂᓯ ᑖᑦᓱᒧᖓ ᐱᒋᔭᐅᖁᓪᓗᓯ, ᓯᓚᕐᔪᐊᕐᒥᐅᑦ ᐃᓄᓕᒫᖏᓐᓂᑦ ᓂᕈᐊᕐᑕᐅᓯᒪᒐᑦᓯ.

⁷ “ᐊᑕᓂᐅᑉ ᓇᒡᓕᒋᓯᒪᓐᖏᓛᓯ ᓂᕈᐊᕐᓯᒪᓇᓯᓗ ᐃᓅᖃᑎᒌᓂᑦ ᐊᓯᑦᓯᓐᓂᑦ ᐃᓄᒋᐊᖕᓂᕐᓴᐅᓂᑦᓯᓐᓄᑦ; ᐃᓅᖃᑎᒌᒡᔪᐊᓂᓪᓕ ᓄᓇᕐᔪᐊᕐᒦᑦᑐᓂᑦ ᐅᓄᖏᓐᓂᕐᐸᐅᕗᓯ.

⁸ ᐊᑕᓂᐅᓪᓕ ᓇᒡᓕᒋᕚᓯ, ᐊᖏᕈᑎᒋᓚᐅᕐᑕᓂᓗ ᓯᕗᓕᕕᓂᑦᓯᓐᓄᑦ ᑲᔪᓯᑎᑦᑐᒪᓯᒪᕚ. ᑍᒤᒻᒪᑦ ᑕᕝᕙ ᐱᐅᓕᓚᐅᕐᐹᓯ ᐱᔪᓐᓇᕐᓂᕐᔪᐊᒥᓄᑦ ᐃᓖᔭᕆᔭᐅᓂᕐᒥᓪᓗ ᐲᕐᑎᓪᓗᓂᓯ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓂᑦ.

⁹ ᐃᖅᑲᐅᒪᔪᒃᓴᐅᕗᓯ ᐊᑕᓂᖅ ᒎᑎᓯ ᑭᓯᒥ ᒎᑎᑑᖕᒪᑦ ᓱᖁᓯᔪᐃᑦᑑᓪᓗᓂᓗ, ᐊᖏᖃᑎᒌᒍᑎᒋᓯᒪᔭᓂ ᑲᔪᓯᑎᓐᓂᐊᕐᐹ ᓇᒡᓕᒍᓱᖕᓂᓂᓗ ᑍᒪᓐᖓᑦ ᓴᖅᑭᑎᖃᑦᑕᕐᓂᐊᕐᐹ ᑭᖑᕚᖑᖃᑎᒌᓄᑦ ᐅᓄᕐᑐᕐᔪᐊᓄᑦ ᓇᒡᓕᒍᓱᒃᑐᓄᑦ ᑖᑦᓱᒥᖓ ᐱᖁᔨᑦᔪᑎᒋᔭᖏᓐᓂᒡᓗ ᒪᓕᒃᑐᓄᑦ,

¹⁰ ᓱᒋᐊᕐᑍᓕᓂᐊᓐᖏᓔᓪᓕ ᑖᑦᓱᒥᖓ ᐆᒥᓱᒃᑐᑦ, ᓄᖑᓪᓗᒋᑦ; ᓄᖅᑲᖓᑎᑦᓯᓂᐊᓐᖏᓚᖅ ᓱᒋᐊᕐᓯᓂᒃᓴᒥᓂᒃ ᑖᑦᓱᒥᖓ ᐆᒥᓱᒃᑐᓂᒃ.

¹¹ ᑍᒤᒻᒪᑦ ᒫᓐᓇ, ᓈᓚᒋᐊᖃᕐᐸᓯ ᐃᓕᑦᓯᓐᓄᑦ ᐃᓕᓮᑦᔪᑕᐅᔪᑦ; ᐱᖁᔭᓕᒫᓪᓗ ᒪᓕᒃᑕᒃᓴᕆᕙᓯ ᐅᓪᓗᒥ ᐃᓕᑦᓯᓐᓄᑦ ᑐᓂᓯᒪᔭᒃᑲ.”

ᓈᓚᖕᓂᐅᑉ ᓮᒻᒪᕐᑎᑕᐅᓇᕐᓂᖓ

¹² “ᑖᒃᑯᓂᖓ ᐱᖁᔨᑦᔪᑎᓂᒃ ᓈᓚᒃᑯᕕᑦ ᒪᓕᑦᓯᐊᕈᕕᒋᓪᓗ ᓱᖁᓯᔪᐃᑦᑑᓗᑎᑦ, ᑕᕝᕙ ᐊᑕᓂᐅᑉ ᒎᑎᕕᑦ ᐊᖏᕈᑎᒋᓯᒪᔭᒥᓂᒃ ᑲᔪᓯᑎᑦᓯᕕᒋᓂᐊᕐᐹᑎᑦ ᓇᒡᓕᒍᓱᖕᓂᕐᒥᓂᒡᓗ ᑍᒪᓐᖓᑦ ᖃᐅᔨᑎᖃᑦᑕᕐᓂᐊᕐᐹᑎᑦ, ᑕᒪᑐᒥᖓ ᓯᕗᓕᕕᓂᕐᓯ ᐊᖏᕐᕕᒋᓯᒪᖕᒪᒋᑦ;

¹³ ᑕᕝᕙ ᓇᒡᓕᒋᓂᐊᕐᐹᑎᑦ ᓮᒻᒪᕐᑎᓪᓗᓂᑎᓪᓗ, ᐃᓄᒋᐊᒃᓯᕙᓪᓕᐊᑎᓐᓂᐊᕐᐹᑎᑦ ᕿᑐᕐᖓᖃᕐᑎᓪᓗᓂᑎᓪᓗ ᐅᓄᕐᑐᓂᒃ; ᐱᕈᕐᓰᕕᖁᑎᑎᓪᓗ ᓮᒻᒪᕐᑎᓐᓂᐊᕆᕔᑦ, ᐱᕈᕐᕕᐅᑦᓯᐊᖁᓪᓗᒋᑦ ᓂᕿᒃᓴᓂᒃ, ᕔᓂᒃᓴᓂᒡᓗ, ᓇᐹᕐᑐᐃᓪᓗ ᐱᕈᕐᑐᖏᓐᓂᒃ ᐅᕐᓱᒃᓴᓂᒃ; ᓮᒻᒪᕐᑎᓐᓂᐊᕐᐹᓯᓗ ᑐᓂᓯᕕᒋᓗᓂᓯ ᐆᒪᔪᖁᑎᒃᓴᑦᓯᓐᓂᒃ ᐃᒻᒧᒃᓯᐅᒐᕐᓂᒃ ᐅᓄᕐᑐᓂᒃ, ᓰᐱᓂᒡᓗ. ᑕᒪᒃᑯᓂᖓ ᑕᕝᕙ ᑐᓂᓯᕕᒋᒐᔭᕐᐹᓯ ᓮᒻᒪᕐᑎᓪᓗᓂᓯ ᑕᒫᓂ ᓄᓇᒥ ᑕᒪᓐᓇ ᓯᕗᓕᕕᓂᑦᓯᓐᓄᑦ ᐊᖏᕈᑎᒋᓯᒪᖕᒪᒍ ᑕᒪᒃᑯᓂᖓ ᑐᓂᓯᕕᒋᔪᒪᓪᓗᓯ.

¹⁴ ᓮᒻᒪᕐᑎᑕᐅᓂᕐᓴᐅᓂᐊᕐᐳᓯᓗ ᐃᓅᖃᑎᓕᒫᑦᓯᓐᓂᑦ ᓄᓇᕐᔪᐊᕐᒦᑦᑐᓂᑦ; ᐊᖑᑎᓂᒃ ᐊᕐᓇᓂᒡᓘᓐᓃᑦ ᕿᑐᕐᖓᕐᑖᕈᓐᓇᖏᑦᑐᖃᕐᓂᐊᓐᖏᓚᖅ, ᐆᒪᔪᖁᑎᑦᓯᓐᓂᓘᓐᓃᑦ ᕿᑐᕐᖓᕐᑖᕈᓐᓇᖏᑦᑐᖃᕐᓂᐊᖏᓐᓂᕗᖅ.

¹⁵ ᐊᑕᓂᐅᓪᓗ ᖃᓂᒪᓐᓇᕐᑐᓕᒫᑦ ᐃᓕᑦᓯᓐᓂᑦ ᐲᔭᕐᓂᐊᕐᐰᑦ; ᖃᓂᒪᓇᕐᑐᐃᓪᓗ ᐱᐅᖏᑦᑐᐊᓗᐃᑦ ᐄᑦᔨᑉᑎᒥ ᖃᐅᔨᕙᓚᐅᕐᑕᓯ, ᐃᓕᑦᓯᓐᓄᑦ ᑎᑭᑦᑐᖃᕐᓂᐊᓐᖏᓚᑦ, ᐊᑭᕋᕐᑐᕐᑎᓕᒫᑦᓯᓐᓄᓪᓕ ᑕᒪᒃᑯᐊ ᑎᑭᑎᖔᕐᓂᐊᕐᐰᑦ.

¹⁶ ᐃᓅᖃᑎᒌᒡᔪᐊᓕᒫᓂᒃ ᓄᖒᑦᓯᑦᑎᐊᕐᑐᒃᓴᐅᕗᓯ ᐊᑕᓂᐅᑉ ᒎᑎᑦᓯ ᑐᓂᔭᖏᓐᓂᒃ ᐃᓕᑦᓯᓐᓄᑦ, ᓂᑲᒋᔭᒃᓴᕆᖏᒻᒪᕆᒃᐸᓯ ᑕᐅᑦᑐᖏᑦ ᐱᑦᔪᑎᒋᓗᒋᑦ; ᒎᑎᒋᔭᖏᓪᓗ ᑐᒃᓯᐊᕐᕕᒋᔭᒃᓴᕆᓐᖏᓚᓯ, ᑐᒃᓯᐊᕐᕕᒋᑐᐊᕈᑦᓯᒋᒃ ᓂᒐᕐᑎᑕᐅᔪᑎᑐᑦ ᑍᒤᒐᔭᕋᑦᓯ.

¹⁷ “ᐃᓱᒪᔪᒃᓴᐅᓐᖏᓚᓯ, ‘ᐅᑯᐊ ᐃᓅᖃᑎᒌᒡᔪᐊᑦ ᐅᕙᑦᑎᓐᓂᑦ ᐅᓄᕐᓂᕐᓴᕐᔪᐊᕌᓗᐃᑦ; ᖃᓄᐊᓗᒡᓕ ᓵᓚᒋᔪᓐᓇᕐᓂᐊᕋᑦᑎᒋᑦ?’

¹⁸ ᓯᕘᕋᒋᔭᒃᓴᕆᓐᖏᓚᓯ; ᐃᖅᑲᐅᒪᔪᒃᓴᐅᕗᓯᓕ ᐊᑕᓂᖅ ᒎᑎᒋᔭᓯ ᖃᓄᖅ ᐱᓇᓱᐊᓚᐅᕐᒪᖔᑦ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐰᕉᒧᑦ ᐄᑦᔨᑉᑎᒥᐅᓕᒫᓄᓪᓗ,

¹⁹ ᐃᖅᑲᐅᒪᔪᒃᓴᐅᕗᓯ ᐱᐅᖏᑦᑐᐊᓗᖕᓂᒃ ᖃᓂᒪᓐᓇᕐᑐᓂᒃ ᓇᖕᒥᓂᖅ ᑕᑯᖃᑦᑕᓚᐅᕐᑕᑦᓯᓐᓂᒃ, ᓇᓗᓁᒃᑯᑕᕐᓂᒃ ᑲᒪᓇᕐᑐᓂᒡᓗ, ᐱᔪᓐᓇᕐᓂᕐᔪᐊᕐᒧᑦ ᐊᔪᖏᓐᓂᕐᔪᐊᕐᒧᓪᓗ ᐊᑕᓂᐅᑉ ᒎᑎᑦᓯ ᐊᓂᑎᓚᐅᕐᒪᓯ ᕿᓚᕈᑦᔮᕐᑕᐅᔪᑎᑐᑦ. ᑍᒫᑦᓮᓐᓇᕐᑕᐅᖅ ᐄᑦᔨᑉᑎᒥᐅᓂᒃ ᓄᖒᑦᓯᓚᐅᕐᓂᕐᒥᑐᑦ, ᑖᒃᑯᐊ ᐱᓇᓱᐊᕐᕕᒋᔪᓐᓇᕆᕔᑦ ᒫᓐᓇ ᓯᕘᕋᒋᔭᓯ.

²⁰ ᐊᒡᓛᓪᓘᓐᓃᑦ ᐊᑕᓂᖅ ᒎᑎᓯ ᑐᑮᕈᑎᑎᑦᓯᔪᓐᓇᕐᐳᖅ ᑖᒃᑯᓂᖓ, ᐊᒥᐊᒃᑰᔪᒃ ᐃᔨᕐᓯᒪᓚᐅᕐᑐᑦ ᓄᖑᑕᐅᖁᓪᓗᒋᑦ.

²¹ ᑍᒤᒻᒪᑦ ᑖᒃᑯᓂᖓ ᓯᕘᕋᔪᒃᓴᐅᓐᖏᓚᓯ, ᐊᑕᓂᐅᑉ ᒎᑎᑦᓯ ᐃᓚᒋᖕᒪᓯ, ᑖᓐᓇ ᐊᔪᖏᑦᑐᕐᔪᐊᖑᖕᒪᑦ ᓯᕘᕋᒋᔭᐅᔭᕆᐊᖃᕐᓗᓂᓗ.

²² ᐊᑕᓂᐅᑉ ᒎᑎᑦᓯ ᑖᒃᑯᐊ ᐃᓅᖃᑎᒌᒡᔪᐊᑦ ᐊᐅᓪᓚᕐᑎᑉᐸᓪᓕᐊᓂᐊᕐᐰᑦ ᓱᒃᑬᑦᑐᒥᒃ ᐱᕙᓪᓕᐊᒐᓛᐱᒡᓗᒋᑦ, ᑕᕝᕔᓐᓇᖅ ᑖᑦᑯᓂᖓ ᓄᖒᑦᓯᔪᓐᓇᕐᓂᐊᓐᖏᓚᓯ, ᓄᖒᑦᓯᑲᐅᕐᑐᓗᐊᕈᑦᓯ ᐆᒪᔪᓄᑦ ᐃᕐᓯᓇᕐᑐᓄᑦ ᐊᑦᑕᕐᓇᕐᑐᒦᑎᑕᐅᑐᐃᓐᓇᕆᐊᖃᕋᑦᓯ.

²³ ᐊᑕᓂᐅᓪᓕ ᒎᑎᑦᓯ ᐊᑭᕋᕐᑐᕐᑎᓯ ᐃᓕᑦᓯᓐᓄᑦ ᑐᓂᓂᐊᕐᐰᑦ, ᑐᑮᕈᑎᑎᓪᓗᓂᒋᓪᓗ ᓄᖑᑕᐅᓚᐅᖅᑳᕐᑎᓐᓇᒋᑦ.

²⁴ ᐊᖓᔪᖅᑳᕐᔪᐊᖏᓪᓗ ᐃᓕᑦᓯᓐᓄᑦ ᑐᓂᓂᐊᕐᐰᑦ, ᑕᕝᕙ ᑐᖁᓐᓂᐊᕐᐸᓯ, ᐳᐃᒍᕐᑕᐅᓂᐊᕐᐳᓪᓗ ᓄᓇᕐᔪᐊᕐᒥᐅᓄᑦ. ᓇᓪᓕᐊᓐᓄᓪᓘᓐᓃᑦ ᓄᖅᑲᕐᑎᑕᐅᔪᓐᓇᕐᓂᐊᓐᖏᓚᓯ; ᑕᒪᒃᑯᓂᖓ ᓄᖒᑦᓯᓚᐅᖏᓐᓂᑦᓯᓐᓂ.

²⁵ ᒎᑎᓐᖑᐊᖏᑦ ᐃᑯᐊᓪᓚᒃᑎᑕᒃᓴᕆᕙᓯ. ᐱᔪᒥᒋᔭᒃᓴᕆᓐᖏᓚᓯᓗ ᑕᕝᕙᓃᑦᑐᑦ ᓯᐅᓪᕕᕇᑦ ᒎᓗᐃᓪᓗ, ᓇᖕᒥᓂᒃᓴᑦᓯᓐᓂᒡᓘᓐᓃᑦ ᐱᑖᕐᕕᒋᔭᒃᓴᕆᓐᖏᓚᓯ. ᑍᒤᑦᑐᓂᒃ ᐱᔪᕕᓂᐅᑐᐊᕈᑦᓯ, ᑕᒪᓐᓇ ᐅᓗᕆᐊᓇᓪᓚᕆᒃᐳᖅ, ᐊᑕᓂᐅᑉ ᒎᑎᑦᓯ ᒎᑎᓐᖑᐊᖃᕐᓂᖅ ᐆᒥᒋᓪᓚᕆᖕᒪᒍ.

²⁶ ᒎᑎᓐᖑᐊᕆᔭᐅᔪᓂᒃ ᓇᓪᓕᐊᓐᓂᒡᓘᓐᓃᑦ ᐊᖏᕐᕋᑦᓯᓐᓄᑦ ᓇᒃᓴᕐᑐᒃᓴᐅᓐᖏᓚᓯ, ᑖᒃᑯᐊ ᓯᕗᓂᕐᓗᒃᑎᑕᐅᓂᖏᑎᑐᑦ ᑎᑭᕝᕕᐅᖁᓇᓯ. ᑍᒤᒻᒪᑦ ᒎᑎᓐᖑᐊᑦ ᐆᒥᒋᔭᒃᓴᕆᕙᓯ ᐱᐅᒋᖏᓪᓗᒋᓪᓗ, ᑕᒪᒃᑯᐊ ᑍᒤᑦᑐᑦ ᐊᑕᓂᐅᑉ ᓯᕗᓂᕐᓗᒃᑎᒻᒪᒋᑦ.”