ᒨᓯᓯ ᑕᓪᓕᒪᖏᑦ 33 - ᐊᒡᓔᑦ ᐃᑦᔪᕐᖕᓁᑦᑐᑦ

ᒨᓯᓯᐅᑉ ᐃᓴᕆᐊᓕᒥᐅᑦ ᑭᖑᕚᕇᖏᓐᓂᒃ ᓮᒻᒪᕐᑎᑦᓯᓂᖓ

¹ ᐅᑯᐊ ᑕᕝᕙ ᒨᓯᓯᐅᑉ ᒎᑎᐅᑉ ᐃᓄᖁᑎᖓᑕ ᓮᒻᒪᕐᑎᑦᓯᑦᔪᑎᒋᓚᐅᕐᑕᖏᑦ, ᐃᓴᕆᐊᓕᒥᐅᓄᑦ ᑐᖁᓚᐅᖅᑳᕋᓂ.

² ᐅᖃᕐᓗᓂ, “ᐊᑕᓂᖅ ᐊᖅᑲᓚᐅᕐᐳᖅ ᖃᖅᑲᒥᑦ ᓮᓁᒥᑦ; ᓴᖅᑭᓚᐅᕐᐳᕐᓗ ᓯᕿᓂᕐᑐᑦ ᐄᑐᒥᒧᑦ ᓴᖅᑭᑦᑐᑎᑐᑦ ᓰᐊᕆᒥᑦ ᐅᕙᑦᑎᓐᓄᑦ, ᖃᐅᒻᒪᒃᑎᑦᓯᓚᐅᕐᐳᖅ ᖃᖅᑲᒥᑦ ᐸᕌᓐᒥᑦ. ᐂᖏᓕᖁᑎᓂ 10,000 ᐃᑦᔪᕐᓁᑦᑐᑦ ᐃᓚᒋᓪᓗᒋᑦ, ᑕᓕᕐᐱᖕᒥᒍᑦ ᐃᑯᒪᒥᒃ ᐃᑯᐊᓚᔪᒥᒃ ᑎᒍᒥᐊᕐᓗᓂ.

³ ᑖᑦᓱᒪ, ᐃᓄᖁᑎᓂ ᓇᒡᓕᒋᓚᐅᕐᐰᑦ; ᐃᑦᔪᕐᓁᑎᑕᐅᓯᒪᔪᓕᒫᑦ ᑖᑦᓱᒪ ᑎᒍᒥᐊᓚᐅᕐᐰᑦ; ᑭᖑᓂᖓᓂᓗ ᐱᓱᓚᐅᕐᐳᑦ ᒪᓕᒡᓗᑎᒃ, ᓇᒧᓐᖓᐅᓂᕐᒥᒃ ᐊᔪᕆᕐᑐᕐᑕᐅᓪᓗᑎᒃ ᐃᓕᖕᓄᑦ,

⁴ ᒨᓯᓯᐅᑉ ᒪᓕᖁᓚᐅᕐᒪᑎᒍᑦ ᐱᖁᔭᓂᒃ, ᐱᓪᓚᕆᐅᓂᕐᐹᕆᔭᐅᔪᓂᒃ ᔧᑰᑉ ᑲᑎᒪᔪᖁᑎᖏᓐᓄᑦ.

⁵ ᐊᑕᓂᖅ ᐊᖓᔪᖅᑳᕐᔪᐊᕈᓚᐅᕐᐳᖅ ᔨᓱᕋᓐᒥ, ᐃᓄᐃᑦ ᐊᖓᔪᖅᑳᖏᑦ ᑲᑎᒪᑎᓪᓗᒋᑦ. ᐃᓴᕆᐊᓕᒥᐅᑦ ᑭᖑᕚᖑᖃᑎᒌᓕᒫᑦ ᑲᑎᒪᑎᓪᓗᒋᑦ.

⁶ ᕉᐱᓂᐅᑉ ᑭᖑᕚᖏᑦ ᐃᓅᓕᑦ, ᑐᖁᕋᖏᓪᓗᑎᒃ, ᐃᓄᖁᑎᖏᓪᓗ ᖃᑦᓰᓐᓇᐅᓗᐊᓕᕐᑍᓕᓕᑦ.”

⁷ ᔫᑕᐅᓪᓕ ᑭᖑᕚᖏᑦ ᐱᑦᔪᑎᒋᓪᓗᒋᑦ ᐅᖃᓚᐅᕐᐳᖅ: “ᐊᑕᓃᖅ, ᔫᑕᐅᑉ ᑭᖑᕚᖏᑕ ᓂᓪᓕᐊᓂᖏᑦ ᑐᓴᒃᑭᑦ, ᑭᖑᕚᖑᖃᑎᒥᖕᓄᑦ ᐃᓚᓕᐅᑎᑎᒃᑭᑦ. ᐱᔪᓐᓇᕐᓂᕐᓄᑦ ᐅᓇᑕᕈᑎᓗᒋᑦ, ᐊᑭᕋᕐᑐᕐᑎᖏᓐᓂᓪᓗ ᐊᑭᓂᐊᕈᑎᓗᒋᑦ ᐃᑲᔪᒃᑭᑦ.”

⁸ ᓕᕔᓪᓕ ᑭᖑᕚᖏᑦ ᐱᑦᔪᑎᒋᓪᓗᒋᑦ ᐅᖃᓚᐅᕐᐳᖅ: “ᓕᕔᑉ ᑭᖑᕚᖏᑦ ᑐᒥᒻᒥᒃ ᑐᓂᓯᕕᒋᒃᑭᑦ, ᔪᕆᒻᑯᓪᓗ ᐃᑦᔪᕐᓁᑦᑐᖁᑎᖕᓄᑦ, ᐆᒃᑐᓚᐅᕋᕕᒋᑦ ᓄᓇᒥ ᒫᓴᒥ; ᐊᑭᒪᖃᑎᒋᓚᐅᕐᑕᑎᓪᓗ ᒥᕆᐸᐅᑉ ᐃᒪᖏᓐᓂ.

⁹ ᑖᒃᑯᐊ ᐊᑖᑕᒥᖕᓂᒃ ᐊᓈᓇᒥᖕᓂᒡᓗ ᐃᒫᒃ ᐅᖃᐅᓯᖃᓚᐅᕐᐳᑦ, ‘ᑖᒃᑯᐊ ᐃᓱᒪᒋᓐᖏᓚᒃᑲ’; ᖃᑕᓐᖑᑎᑎᒃ ᐃᓚᒋᓂᕋᓐᖏᓔᑦ, ᕿᑐᕐᖓᑎᒡᓗ ᐃᒃᐱᒋᓇᒋᑦ. ᐅᖃᐅᓯᕐᓂᒃ ᒪᓕᑦᓯᐊᓗᐊᒧᑦ, ᐊᖏᖃᑎᒌᖕᓂᒃᑯᑦ ᐅᖃᕐᕕᒋᓯᒪᔭᑎᑦ ᒪᓕᒡᓗᒋᑦ.

¹⁰ ᑖᒃᑯᐊ ᐃᓕᓮᓂᐊᕐᐳᑦ ᒪᓕᒐᒃᓴᓂᒃ ᔧᑰᑉ ᑭᖑᕚᖏᓐᓄᑦ, ᐱᖁᔭᕐᓂᒡᓗ ᐃᓴᕆᐊᓕᒥᐅᓄᑦ; ᐃᓯᕐᓗᐊᕐᓂᑎᑦᓯᓗᑎᒡᓗ ᓵᖕᓂ, ᑐᓂᕐᕈᓯᕐᕕᖁᑎᖕᓂᓗ ᐃᑯᐊᓚᑦᓯᓗᑎᒃ ᑐᓂᕐᕈᓯᕐᓂᐊᕐᐳᑦ.

¹¹ ᐊᑕᓃᖅ, ᑭᖑᕚᖑᖃᑎᒌᑦ ᑖᒃᑯᐊ ᐱᒋᔭᖏᑦ ᓮᒻᒪᕐᑎᒃᑭᑦ, ᐱᓂᐊᕐᓂᖏᓪᓗ ᐃᓚᓕᐅᒃᑭᑦ; ᐊᑭᕋᕐᑐᕐᑎᓕᒫᖏᑦ ᓵᓚᒋᓗᒋᑦ; ᐆᒥᓱᒃᑐᓪᓗ ᑖᒃᑯᓂᖓ ᒪᑭᒃᑲᓐᓂᕈᓐᓁᖁᓪᓗᒋᑦ.”

¹² ᐱᓐᔭᒥᓂᐅᓪᓕ ᑭᒍᕚᖏᑦ ᐱᑦᔪᑎᒋᓪᓗᒋᑦ ᐅᖃᓚᐅᕐᐳᖅ: “ᐊᑕᓂᐅᑉ ᓇᒡᓕᒋᔭᖏᑦ ᐃᓂᖃᕐᐳᑦ ᓴᐳᑦᔭᐅᓯᒪᓂᕐᒥ ᑖᑦᓱᒧᖓ; ᑬᕙᓪᓚᒃᓯᒪᓪᓗᒋᑦ ᓴᐳᑎᓯᒪᕔᑦ ᐅᓪᓗᓕᒫᖅ ᓈᓪᓗᒍ, ᑖᒃᑯᓇᓂᓗ ᐃᓂᖃᕐᓗᓂ.”

¹³ ᔫᓯᐱᐅᓪᓕ ᑭᖑᕚᖏᑦ ᐱᑦᔪᑎᒋᓪᓗᒋᑦ ᐅᖃᓚᐅᕐᐳᖅ: “ᐊᑕᓂᕐᒧᑦ ᓮᒻᒪᕐᑎᑕᐅᓯᒪᓕ ᓄᓇᖁᑎᖓ, ᓄᓇᖁᑎᖓᑕᓗ ᐊᑖᓃᑦᑐᑦ ᐊᒃᐸᓯᒃᑐᒥ,

¹⁴ ᐱᐅᓂᕐᐹᓄᑦ ᐸᐅᕐᖓᓄᑦ ᓯᕿᓂᕐᒧᑦ ᐱᕈᕐᑎᑕᐅᔪᓄᑦ, ᐱᕈᕐᕕᐅᓯᐊᕐᐸᒡᓗᓂ ᐱᕈᕐᑐᑦ ᐱᕈᕐᐸᓪᓕᐊᕕᖏᓐᓂ ᑕᖅᑭᓂ.

¹⁵ ᑖᑦᓱᒪ ᐱᖑᖁᑎᖏᑦ ᓄᑕᐅᖏᑦᑐᑦ ᐱᕈᕐᑐᓄᑦ ᐱᕈᕐᕕᐅᖃᑦᑕᕐᓕ ᐱᐅᓂᕐᐹᓂᒃ, ᐅᓕᒃᑕᐅᓯᒪᓚᐅᕐᓕᑦ ᓂᕿᒃᓴᓄᑦ ᑍᒪᓐᖓᓕᒫᖅ,

¹⁶ ᓄᓇᐅᑉ ᑐᓂᕐᕈᑎᖏᓐᓂᒃ ᐱᐅᓂᕐᐹᓂᒃ ᑕᑕᑎᓚᐅᕈᒃ, ᐊᑕᓂᖅ ᓂᕐᑐᕐᓇᕐᓯᑎᑕᐅᓕ ᐅᕐᐱᖕᓂᑦ ᐃᑯᐊᓚᔪᓂᑦ ᐅᖃᓪᓚᓚᐅᕐᓯᒪᔪᖅ. ᑕᒪᒃᑯᐊ ᓮᒻᒪᕐᑎᑕᐅᓇᕐᑐᑦ ᔫᓯᐱᐅᑉ ᑭᖑᕚᖏᓐᓄᑦ ᑎᑭᓚᐅᕐᓕᑦ, ᖃᑕᓐᖑᑎᖏᑕᓗ ᑭᖑᕚᖏᑕ ᐊᖓᔪᖅᑳᖏᓐᓄᑦ ᑎᑭᓪᓗᓂ.

¹⁷ ᐃᕐᓂᐊᖑᖅᑳᕐᑐᖅ ᐊᖑᓴᓪᓗᖅ ᐆᒪᔪᖁᑎᖏᓐᓂ ᐱᔪᓐᓇᕐᓂᖃᕐᐳᖅ, ᓇᒡᔪᖃᕐᓗᓂᓗ ᐃᒻᒧᒃᓯᐅᒐᐅᑉ ᓄᔪᐊᕐᑑᑉ ᐊᖑᓴᓪᓗᖓᑎᑐᑦ; ᑖᑦᓱᒪ ᓇᒡᔪᖕᒥᒃᐰᑦ ᐃᓄᒐᓮᑦ ᐊᔭᒡᓗᒋᑦ, ᐃᓘᓐᓇᑦᓯᐊᑎᒃ ᓯᓚᕐᔪᐊᑉ ᐃᓱᐊᓄᑦ ᑎᑭᓪᓗᒋᑦ. ᑍᒤᑦᑑᕗᑦ ᐃᕗᕅᒥᐅᑉ ᑭᖑᕚᖏᑦ 10,000 ᐅᖓᑖᓃᑦᑐᑦ, ᑍᒤᒃᑭᓪᓗᑎᒡᓗ ᒫᓇᓯᐅᑉ ᑭᖑᕚᖏᑦ 10,000 ᐅᖓᑖᓃᑦᑐᑦ.”

¹⁸ ᓯᐳᓗᓂᐅᑉ ᑭᖑᕚᖏᑦ ᐱᑦᔪᑎᒋᓪᓗᒋᑦ ᐅᖃᓚᐅᕐᐳᖅ: “ᖁᕕᐊᓱᒻᒪᕆᒋᑦᓯ ᓯᐳᓗᓂᐅᑉ ᑭᖑᕚᖏᑦ ᐊᓂᓕᕈᑦᓯ; ᐃᓴᑳᕆᐅᓪᓗ ᑭᖑᕚᖏᑦ, ᐱᕈᕐᐸᓪᓕᐊᓕ ᐊᖏᕐᕋᒥᖕᓂ.

¹⁹ ᑖᒃᑯᐊ ᐃᓅᖃᑎᒌᒡᔪᐊᓂᒃ ᕾᖁᔨᔪᒫᕐᐳᑦ ᖃᖅᑲᖁᑎᒥᖕᓄᑦ; ᑕᕝᕙᓂᓗ ᑐᓂᕐᕈᑎᒃᓴᓂᒃ ᓈᒻᒪᒋᔭᐅᔪᓂᒃ ᑐᓂᕐᕈᓯᕐᓗᑎᒃ; ᐊᔪᕐᓴᖏᑦᔪᑎᓂᒃ ᐃᒪᕐᒥᑦ ᑕᕆᐅᒥᑦ ᐱᔪᓂᒃ ᓂᐅᕐᓯᖕᒪᑕ ᓯᐅᕋᕐᒥᓪᓗ ᐃᔨᕐᓯᒪᔪᓂᒃ ᐊᒃᓱᐃᑦᔪᑎᓂᒃ ᑕᕆᐅᑉ ᓯᓈᓂᑦ.”

²⁰ ᒑᑎᐅᑉ ᑭᖑᕚᖏᑦ ᐱᑦᔪᑎᒋᓪᓗᒋᑦ ᐅᖃᓚᐅᕐᐳᖅ: “ᓮᒻᒪᕐᑎᑕᐅᓕᑦ ᒑᑎᐅᑉ ᑭᖑᕚᖏᑕ ᓄᓇᖁᑎᖓᓂᒃ ᐊᖏᒡᓕᒋᐊᕐᑎᑦᓯᔪᑦ! ᒑᑎ ᐅᑕᖅᑭᖕᒪᑦ ᓛᔭᑎᑐᑦ ᐹᒻᒪᖓᔪᑎᑐᑦ, ᑕᓖᕐᓯᔪᓐᓇᕐᒪᑦ ᓂᐊᖁᐃᕐᓯᔪᓐᓇᕐᓗᓂᓗ.

²¹ ᓄᓇᐅᑉ ᐱᐅᓂᕐᐹᖓᓂᒃ ᑖᒃᑯᐊ ᓂᕈᐊᕐᓯᒪᕗᑦ ᓇᖕᒥᓂᒃᓴᒥᖕᓂᒃ, ᑕᕝᕙᓂ ᐅᓇᑕᕐᑐᒃᓮᑦ ᐊᖓᔪᖅᑳᖓᑦᑕ ᓄᓇᖁᑎᒃᓴᖓ ᖁᒥᐅᑕᐅᓯᒪᖕᒪᑦ; ᑖᓐᓇ ᑎᑭᓚᐅᕐᐳᖅ ᐃᓄᐃᑦ ᐊᖓᔪᖅᑳᖏᓐᓄᑦ, ᐃᓴᕆᐊᓕᒥᐅᑦ ᐊᖓᔪᖅᑳᖏᑦ ᐃᓚᒋᓪᓗᒋᑦ ᐱᖁᔭᐅᓯᒪᔪᑦ ᒪᓕᒃᑕᐅᑎᑉᐰᑦ ᐃᓱᐊᕐᑐᑦ ᒪᓕᒐᒃᓮᑦ ᐊᑕᓂᕐᒥᑦ ᐱᓯᒪᔪᑦ.”

²² ᑖᓂᐅᑉ ᑭᖑᕚᖏᑦ ᐱᑦᔪᑎᒋᓪᓗᒋᑦ ᐅᖃᓚᐅᕐᐳᖅ: “ᑖᓐ ᓛᔭᑎᑐᑦ ᐃᓅᓱᒃᑐᑎᑐᑦ ᑍᒤᑉᐳᖅ; ᓄᓇᒥᑦ ᐹᓴᓂᒥᑦ ᒥᓯᓚᐅᕐᐳᖅ ᓯᓚᒻᒧᑦ.”

²³ ᓈᑉᑕᓕᐅᑉ ᑭᖑᕚᖏᑦ ᐱᑦᔪᑎᒋᓪᓗᒋᑦ ᐅᖃᓚᐅᕐᐳᖅ: “ᓈᑉᑕᓕᐅᑉ ᑭᖑᕚᖏᑦ, ᓈᒻᒪᒃᓯᑎᑕᐅᕗᑦ ᓮᒻᒪᕐᑎᑕᐅᓂᕐᒥᒃ, ᑕᑕᑕᐅᓪᓗᑎᒃ ᐊᑕᓂᐅᑉ ᓮᒻᒪᕐᑎᑦᓯᓂᖓᓄᑦ, ᑖᒃᑯᐊ ᓄᓇᒋᔭᖓᑦ ᑕᓯᕐᒥᑦ ᐱᒋᐊᕐᓗᓂ ᐅᓪᓗᓪᓗᐊᑉ ᓇᓛᓃᑦᑐᒧᑦ ᑎᑭᓯᒪᕗᖅ.”

²⁴ ᐋᓱᕆᐅᓪᓕ ᑭᖑᕚᖏᑦ ᐱᑦᔪᑎᒋᓪᓗᒋᑦ ᐅᖃᓚᐅᕐᐳᖅ: “ᐋᓱᕆᐅᑉ ᑭᖑᕚᖏᑦ ᓮᒻᒪᕐᑎᑕᐅᓯᒪᓂᕐᐹᖑᕗᑦ ᑭᖑᕚᖑᖃᑎᒥᖕᓄᑦ ᖁᕕᐊᒋᔭᐅᓪᓗᑎᒃ. ᐃᑎᒐᑎᒃ ᒥᓱᒡᓕᒋᑦ ᐅᕐᓱᒧᑦ.

²⁵ ᐃᑎᕐᑕᕐᕕᒃᓯ ᓴᕕᕋᔭᐅᔪᒃᓴᐅᕗᑦ ᑲᓐᓄᔭᐅᓗᑎᒡᓗ, ᐃᓅᑎᓪᓗᓯ ᑍᒤᒃᑲᑦᓯ, ᑍᒤᓐᓂᐊᕆᕗᖅ ᓴᓐᖏᔫᓂᓯ.”

²⁶ “ᒎᑎ ᐊᑦᔨᖃᓐᖏᓚᖅ, ᔨᓱᕋᓐᖑᔪᓯ ᐃᖏᕐᕋᖕᒪᑦ ᕿᓚᒃᑎᒍᑦ ᐃᓕᑦᓯᓐᓂᒃ ᐃᑲᔪᕆᐊᕐᓗᓂ, ᐱᓐᓇᕐᓇᕐᓂᖓ ᐃᖏᕐᕋᕗᖅ ᕿᓚᒃᑎᒍᑦ.

²⁷ ᒎᑎ ᐃᓱᖃᖏᑦᑐᖅ ᐃᓂᒋᕙᓯ; ᑖᑦᓱᒪᓗ ᑕᓕᖏᒃ ᐃᓱᖃᖏᑦᑑᒃ ᓇᔪᒻᒪᖅᑯᑎᒋᕙᓯ. ᑖᑦᓱᒪᓗ ᐊᑭᕋᕐᑐᕐᑎᓯ ᐊᓂᑎᑉᐰᑦ ᓯᕗᓂᑦᓯᓐᓂ, ᐅᖃᐅᑎᓪᓗᓂᓯ ᓄᖑᕅᒋᑦᓯ.

²⁸ ᑍᒤᒻᒪᑦ ᐃᓴᕆᐊᓕᐅᑉ ᑭᖑᕚᖏᑦ ᐃᓅᕗᑦ ᐃᓱᒫᓗᓇᖏᑦᑐᒥ, ᐸᒡᕕᓴᒃᑕᐅᓐᖏᓚᕐᓗ ᔧᑰᑉ ᑭᖑᕚᖏᑕ ᐃᓂᖓᑦ, ᓄᓇᖓᑦ ᐱᕈᕐᑐᓕᒃ ᓂᕿᒃᓴᓂᒃ ᕔᓂᒃᓴᓂᒡᓗ; ᐃᓛᒃ, ᕿᓚᖕᒥᑦ ᒥᓂᔪᒧᑦ ᓄᓇ ᖃᐅᓯᓕᕐᑎᕐᑕᐅᖃᑦᑕᕐᓗᓂ.

²⁹ ᐃᓴᕆᐊᓕᒥᐅᖑᔪᓯ, ᖁᕕᐊᓱᒃᑐᒃᓴᐅᕗᓯ! ᐊᑦᔨᖃᓐᖏᓚᓯ, ᐊᑕᓂᕐᒧᑦ ᐱᐅᓕᔭᐅᓯᒪᔪᓂᒃ. ᑖᓐᓇ ᓴᐴᓗᑕᕆᒐᑦᓯᐅᒃ ᐃᑲᔪᕐᑎᒋᓪᓗᒍ, ᓴᕕᒡᔪᐊᕆᓪᓗᒍᓗ ᓵᓚᖃᐅᑎᒋᓪᓗᒍ! ᐊᑭᕋᓯ ᐃᓕᑦᓯᓐᓄᑦ ᕾᕙᖕᓂᐊᕐᐳᑦ ᐃᓚᓐᓂᕐᓴᕐᓗᑎᒃ; ᐃᓕᑦᓯᓕ ᑐᒃᓯᐊᕐᕕᖏᑦ ᐳᕐᑐᔪᒦᑦᑐᑦ ᑐᓪᓕᕋᕐᓂᐊᕐᐸᓯ.”