ᒨᓯᓯ ᑕᓪᓕᒪᖏᑦ 31 - ᐊᒡᓔᑦ ᐃᑦᔪᕐᖕᓁᑦᑐᑦ

ᔮᓱᐊᑉ ᒨᓯᓯᒧᑦ ᑭᖑᕝᕕᐅᑎᓂᖓ

¹ ᒨᓯᓯ ᐃᓴᕆᐊᓕᒥᐅᓄᑦ ᓱᓕ ᑲᔪᓯᓪᓗᓂ ᐅᖃᓪᓚᓚᐅᕐᐳᖅ,

² ᐅᖃᕐᓗᓂᓗ, “ᒫᓐᓇ ᐊᕐᕌᒍᖃᓕᕋᒪ 120ᓂᒃ; ᐊᔪᓕᓕᕐᐳᖓ ᐊᓂᖃᑦᑕᕆᐊᒃᓴᖅ ᐃᑎᖃᑦᑕᕆᐊᒃᓴᕐᓗ, ᐊᑕᓂᐅᓪᓗ ᐅᖃᐅᑎᓚᐅᕐᐹᖓ ᔪᐊᕐᑕᓂᒥᒃ ᐃᑳᕐᓂᐊᖏᓐᓂᕋᕐᓗᖓ.

³ ᐊᑕᓂᕐᓕ ᒎᑎᓯ ᓯᕗᓂᑦᓯᓐᓃᓐᓂᐊᕐᐳᖅ ᑕᒫᓂᓗ ᓄᓇᖃᕐᑐᑦ ᐃᓅᖃᑎᒌᒡᔪᐊᑦ ᓄᖑᑎᑦᓱᒫᕐᐰᑦ, ᓄᓇᖏᓐᓂᒃ ᓄᓇᑖᖔᖁᓪᓗᓯ; ᔮᓱᐊᓗ ᑕᓯᐅᕐᑎᒋᓂᐊᕐᐸᓯ, ᐊᑕᓂᖅ ᑍᒫᒃ ᐅᖃᕐᓯᒪᖕᒪᑦ.

⁴ ᐊᑕᓂᐅᑉ ᐃᓄᐃᑦ ᑖᒃᑯᐊ ᓄᖑᓐᓂᐊᕐᐰᑦ, ᑍᒫᑦᓮᓐᓇᖅ ᓵᓚᒋᓚᐅᕐᒪᒋᒃ ᐊᖓᔪᖅᑳᕐᔪᐊᒃ ᓮᕼᐆᓂ ᐊᒻᒪᓗ ᐋᒡ ᐊᒧᕅᑎᒥᐅᑦ ᐊᖓᔪᖅᑳᕐᔪᐊᖏᒃ, ᓄᓇᒋᔭᖏᒡᓗ, ᑖᒃᑯᐊᒡᓗ.

⁵ ᐊᑕᓂᐅᓪᓗ ᓵᓚᖃᕐᑎᑦᓱᒫᕐᐹᓯ ᑖᒃᑯᓂᖓ, ᐱᓇᓱᐊᕐᕕᒋᔭᒃᓴᕆᕙᓯᓗ ᐱᖁᔨᑦᔪᑎᒋᓯᒪᔭᒃᑲ ᐃᓕᑦᓯᓐᓄᑦ ᒪᓕᑦᓯᐊᕐᓗᒋᑦ.

⁶ ᓴᓐᖏᔫᓕᕆᑦᓯ ᓯᕘᕋᖏᓪᓗᓯᓗ, ᓯᕘᕋᒋᔭᒃᓴᕆᓐᖏᓚᓯ ᑲᑉᐱᐊᒋᓇᒋᓪᓗ, ᐊᑕᓂᐅᑉ ᒎᑎᑦᓯ ᐃᓚᒋᓂᐊᕐᒪᓯ, ᓴᒡᓗᕿᓐᓂᐊᖏᒻᒪᓯ ᕿᒪᖕᓂᐊᕐᓇᓂᓯᓗ.”

⁷ ᑕᕝᕙ ᒨᓯᓯᐅᑉ ᔮᓱᐊ ᕾᖁᕚ, ᐅᖃᐅᑎᓪᓗᒍᓗ ᐃᓄᓕᒫᑦ ᐃᓴᕆᐊᓕᒥᐅᑦ ᑐᓵᑎᓪᓗᒋᑦ, “ᓴᓐᖏᔫᓕᕆᑦ ᓯᕘᕋᔪᐃᓪᓗᑎᓪᓗ; ᐃᕝᕕᐅᒐᕕᑦ ᑕᓯᐅᕐᓯᔪᒃᓴᐅᔪᑎᑦ ᐅᑯᓂᖓ ᐃᓄᖕᓂᒃ ᓄᓇᒥᒃ ᓄᓇᑖᕆᐊᕐᑐᓕᕐᑎᓪᓗᒋᑦ ᐊᑕᓂᐅᑉ ᐅᖃᕕᒡᓗᓂ ᐊᖏᕈᑎᒋᓯᒪᓚᐅᕐᑕᖓᓂᒃ ᓯᕗᓕᕕᓂᖏᓐᓄᑦ, ᓄᓇᑖᕆᓂᐊᕐᑕᖏᓐᓄᓪᓗ ᑕᓯᐅᕐᑕᒃᓴᕆᕙᑎᑦ.

⁸ ᐊᑕᓂᖅ ᓯᕗᓂᕐᓃᓐᓂᐊᕐᐳᖅ ᐃᓚᒋᓂᐊᕐᐹᑎᓪᓗ, ᓴᒡᓗᕿᓐᓂᐊᖏᒻᒪᑎᑦ ᕿᒪᖕᓂᐊᕐᓇᑎᓪᓗ, ᑍᒤᒻᒪᑦ ᓯᕘᕋᑦᑍᓕᒋᑦ ᓴᐱᓕᕐᑍᓕᓗᑎᓪᓗ.”

ᐱᑯᔧᑦ ᐊᕐᕌᒍᑦ 7 ᐊᓂᒍᕌᖓᑕ ᑕᒫᑦ ᐊᑐᐊᕐᑕᐅᖃᑦᑕᕐᑐᒃᓴᐅᕗᑦ

⁹ ᒨᓯᓯᐅᓪᓗ ᐱᖁᔧᑦ ᑎᑎᕋᓚᐅᕐᐰᑦ ᑐᓂᓪᓗᒋᓪᓗ ᓕᕔᑎᓄᑦ ᑐᓂᕐᕈᓯᕐᑎᑦᓯᔨᓄᑦ, ᑖᒃᑯᐊ ᐊᒡᔭᕐᓯᔨᐅᖕᒪᑕ ᐊᑕᓂᐅᑉ ᐊᖏᖃᑎᒌᒍᑎᖏᑕ ᐃᒃᓯᕐᕕᖓᓂᒃ, ᐃᓴᕆᐊᓕᒥᐅᓪᓗ ᐊᖓᔪᖅᑳᖏᓐᓄᑦ.

¹⁰ ᐱᖁᔨᓪᓗᓂᓗ ᐅᖃᐅᑎᕔᑦ, “ᐊᕐᕌᒍᑦ 7 ᐊᓂᒍᕌᖓᑕ ᑕᒫᑦ, ᐊᑭᓕᒃᓴᕆᔭᐅᔪᑦ ᓄᖑᑎᑕᐅᓂᖏᑕ ᓇᓪᓕᐅᓐᓂᖓ ᓇᓪᓕᐅᑎᔭᕌᖓᑦ, ᑐᐱᕐᒥᒃ ᐊᖏᕐᕋᖃᖃᑦᑕᕐᓂᕕᓂᕐᒥᖕᓂᒃ ᓇᓪᓕᐅᓐᓂᕐᓯᐅᓕᕌᖓᑕ.

¹¹ ᐊᑐᐊᕐᑕᐅᖃᑦᑕᕐᑐᒃᓴᐅᕗᑦ ᐃᓴᕆᐊᓕᒥᐅᑦ ᐃᓄᖏᓐᓄᑦ ᑐᒃᓯᐊᕆᐊᕐᑐᕐᓯᒪᑎᓪᓗᒋᑦ ᐊᑕᓂᕐᒧᑦ ᒎᑎᑦᓯᓐᓄᑦ ᑐᒃᓯᐊᕐᕕᐅᕙᒃᑐᒥ ᑲᑎᖃᑦᑕᕐᕕᖕᒥ.

¹² ᐃᓄᐃᑦ ᕾᖁᔭᒃᓴᕆᕙᓯ ᐊᖑᑎᑦ, ᐊᕐᓁᓪᓗ, ᓄᑕᕅᓪᓗ, ᓄᓇᖃᕐᑐᑐᖃᐅᖏᑦᑐᓪᓗ ᓄᓇᑦᓯᓐᓃᑦᑐᑦ, ᐃᓄᓕᒫᑦ ᑐᓴᖁᓪᓗᒋᑦ ᑐᑭᓯᖁᓪᓗᒋᓪᓗ ᐊᑕᓂᕐᒥᒃ ᒎᑎᑦᓯᓐᓂᒃ ᐃᓕᕋᓱᒍᓐᓇᖁᓪᓗᒋᑦ, ᑲᒪᑦᓯᐊᕐᓗᑎᒡᓗ ᒪᓕᒍᓐᓇᖁᓪᓗᒋᑦ ᐱᖁᔧᑦ ᐅᖃᐅᓯᓕᒫᖏᓐᓂᒃ.

¹³ ᕿᑐᕐᖓᖏᓪᓗ ᑖᒃᑯᓂᖓ ᖃᐅᔨᓚᐅᕐᓯᒪᖏᑦᑐᑦ, ᑐᓴᕐᓂᐊᕐᒪᑕ ᐃᓕᓐᓂᐊᕐᓗᑎᒡᓗ ᐃᓕᕋᓱᖕᓂᕐᒥᒃ ᐊᑕᓂᕐᒥᒃ ᒎᑎᑦᓯᓐᓂᒃ, ᑍᒪᓐᖓᑦ ᓄᓇᒥ ᓄᓇᖃᕐᓂᓕᒫᒥᖕᓂ ᑕᒫᓂ ᓄᓇᑖᕆᓂᐊᓕᕐᑕᑦᓯᓐᓂ ᔪᐊᕐᑕᓂᐅᑉ ᐊᑭᐊᓃᑦᑐᒥ.”

ᐊᑕᓂᐅᑉ ᑭᖑᓪᓕᕐᐹᒥᒃ ᒨᓯᓯᒧᑦ ᐱᖁᔨᓂᖓ

¹⁴ ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᑕᑯᒋᑦ, ᐅᓪᓗᖅ ᐃᓅᔪᓐᓃᕐᕕᒃᓮᑦ ᖃᒡᓕᕗᖅ; ᔮᓱᐊ ᕾᖁᓚᐅᕈᒃ, ᐅᕗᖓ ᑐᐱᕐᒧᑦ ᑲᑎᒪᕕᖕᒧᑦ ᐃᑎᕐᓗᓯᒃ, ᐱᔭᒃᓴᖏᓐᓂᒃ ᑎᓕᓂᐊᕋᒃᑯ.” ᑕᕝᕙ ᒨᓯᓯᒃᑯᒃ ᔮᓱᐊᒃᑯᒃ ᑐᐱᕐᒧᐊᕐᐴᒃ,

¹⁵ ᐊᑕᓂᐅᓪᓗ ᓴᖅᑭᕝᕕᒋᕚᒃ ᓄᕗᔭᒦᓪᓗᓂ ᖁᒻᒧᑦ ᑕᑭᔪᑯᑖᒥ ᑐᐱᐅᓪᓗ ᐃᑎᕐᑕᕐᕕᐊᑕ ᓴᓂᐊᓂ ᓇᐸᓕᕐᓱᓂ.

¹⁶ ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ: “ᑕᑯᒋᑦ, ᐊᑯᓂᐅᖏᑦᑐᖅ ᑐᖁᓂᐊᓕᕋᕕᑦ ᓯᕗᓕᕕᓂᕐᑎᑦ ᐃᓚᒋᓕᕐᓗᒋᑦ; ᑭᖑᓂᕐᓂ ᐃᓄᐃᑦ ᐅᕙᓐᓂᒃ ᐊᓯᓐᓂᐊᓕᕈᒫᕐᐳᑦ ᐊᖏᖃᑎᒌᒍᑎᒋᓚᐅᕐᑕᕗᓪᓗ ᓯᖁᒥᑕᐅᔪᒫᕐᐳᑦ, ᐅᕙᓐᓂᒃ ᕿᒤᓗᑎᒃ ᐅᒃᐱᖏᑦᑐᑦ ᒎᑎᓐᖑᐊᖏᓐᓄᑦ ᑕᒫᓂ ᓄᓇᑖᕆᓂᐊᓕᕐᑕᖏᑕ ᐃᓄᖏᓐᓂᒃ ᒪᓕᒃᓴᕐᓗᑎᒃ ᑐᒃᓯᐊᖃᑦᑕᓕᕈᒫᕐᐳᑦ.

¹⁷ ᑕᒪᓐᓇ ᐊᑐᓕᕐᐸᑦ, ᑕᕝᕙ ᓂᓐᖓᒃᕕᒋᔪᒫᕐᐸᒃᑲ; ᕿᒪᒍᒫᕐᐸᒃᑲᓗ ᐊᓚᕐᓗᒋᑦ, ᑕᕝᕙ ᓄᖑᑕᐅᔪᒫᕐᐳᑦ; ᐅᓄᕐᑐᓄᑦ ᐱᓂᕐᓗᖕᓇᕐᑐᓄᑦ ᐊᑲᐅᖏᑦᑐᓄᓪᓗ ᑎᑭᑕᐅᔪᒫᕐᐳᑦ, ᑕᕝᕙ ᐅᖃᓕᕈᒫᕐᐳᑦ, ‘ᒪᑯᐊ ᐱᐅᖏᑦᑐᑦ ᐅᕙᑦᑎᓐᓄᑦ ᑎᑭᑉᐳᑦ ᒎᑎᐅᑉ ᐃᓚᒋᔪᓐᓃᕐᒪᑎᒎᑦ?’

¹⁸ ᑕᒪᓐᓇ ᓇᓪᓕᐅᑎᒃᐸᑦ ᓱᓕᓗᖓ ᐊᓚᕈᒫᕐᐸᒃᑲ, ᐱᐅᖏᑦᑐᓂᖏᑦ ᒎᑎᓐᖑᐊᓄᑦ ᐊᓯᓐᓄᑦ ᓵᓐᖓᓕᕐᓂᖏᑦ ᐱᑦᔪᑎᒋᓗᒋᑦ.

¹⁹ “ᒫᓐᓇᓕ ᑍᒤᒻᒪᑦ, ᐅᓇ ᐃᓐᖏᕈᓯᖅ ᑎᑎᕋᕐᑕᒃᓴᕆᕙᑦ, ᐃᓕᓐᓂᐊᕐᑎᑦᓯᑦᔪᑎᒋᓗᒍᓗ ᐃᓴᕆᐊᓕᒥᐅᓄᑦ; ᓇᓗᓁᕐᓯᓂᐊᕐᒪᑦ ᑖᒃᑯᓂᖓ ᓈᒻᒪᒃᓴᖏᓐᓂᓐᓂᒃ.

²⁰ ᓄᓇᒧᑦ ᑕᓯᐅᕐᓂᐊᕐᐸᒃᑲ ᓄᓇᑖᖁᓪᓗᒋᑦ ᐊᔪᕐᓴᕐᓇᖏᑦᑐᒧᑦ ᓂᕿᒃᓴᖃᑦᓯᐊᕐᑐᒧᓪᓗ, ᑕᒪᓐᓇ ᐅᖃᕕᒃᓗᖓ ᐊᖏᕈᑎᒋᓯᒪᒐᒃᑯ ᓯᕗᓕᕆᓚᐅᕐᑕᖏᓐᓄᑦ, ᑕᕝᕙᓂ ᓂᕆᓯᒪᓕᕐᐸᑕ ᐊᕿᐊᑦᑐᕐᓗᑎᒃ ᖁᐃᒃᓯᓪᓗᑎᒡᓗ, ᐊᓯᓐᓄᑦ ᒎᑎᓐᖑᐊᓄᑦ ᓵᖔᓕᕈᒫᕐᐳᑦ ᐱᔨᑦᓯᓕᕐᓗᒋᑦ, ᐅᕙᓐᓂᒃ ᖁᔭᓈᕐᓯᔪᒫᕐᐳᑦ ᐊᖏᖃᑎᒌᒍᑎᒋᓯᒪᔭᒃᑲᓗ ᓯᖁᒥᓪᓗᒋᑦ,

²¹ ᑕᕝᕙ ᐱᓂᕐᓗᖕᓇᕐᑐᓄᑦ ᐊᑲᐅᖏᑦᑐᑎᓄᓪᓗ ᐅᓄᕐᑐᓄᑦ ᑎᑭᑕᐅᔪᒫᕐᐳᑦ, ᑖᑦᓱᒪ ᐃᓐᖏᕈᓯᐅᑉ ᓵᓐᖓᔪᒫᕐᐰᑦ ᓇᓗᓁᕐᓯᓗᓂ ᑖᒃᑯᓂᖓ ᑖᓐᓇ ᐳᐃᒍᕐᑕᐅᓂᐊᖏᒻᒪᑦ ᑭᖑᕚᖏᑕ ᖃᓂᖏᓐᓂᑦ ᖃᐅᔨᒪᒐᒪ ᖃᓄᐃᓕᐅᕋᓱᐊᕐᑕᖏᑦ ᐋᖅᑭᒃᐸᓪᓕᐊᖕᒪᑕ, ᓱᓕ ᑎᑭᑎᓚᐅᖏᒃᑲᓗᐊᕐᓗᑎᒃ ᓄᓇᒧᑦ ᐊᖏᕈᑎᒋᓯᒪᔭᓐᓄᑦ ᑐᓂᓂᐊᕐᓂᕋᕐᓗᒍ ᑖᒃᑯᓄᖓ.”

²² ᑕᕝᕙᓂ ᐅᓪᓗᒥᑦᓮᓐᓇᖅ ᒨᓯᓯᐅᑉ ᐃᓐᖏᕈᓯᖅ ᑎᑎᕋᓚᐅᕐᐹ ᐃᓴᕆᐊᓕᐅᒥᓄᓪᓗ ᐃᓕᓐᓂᐊᕐᑎᑦᓯᑦᔪᑎᒋᓪᓗᓂᐅᒃ.

²³ ᑕᕝᕙ ᐊᑕᓂᖅ ᔮᓱᐊᒧᑦ ᐅᖃᓕᕐᐳᖅ ᓈᓂᐅᑉ ᐃᕐᓂᖓᓄᑦ ᐅᖃᐅᑎᓪᓗᒍᓗ, “ᓴᓐᖏᔫᓕᕆᑦ ᓯᕘᕋᔪᐃᓪᓗᑎᓪᓗ; ᐃᓴᕆᐊᓕᒥᐅᑦ ᑕᓯᐅᕐᓂᐊᕋᕕᒋᑦ ᓄᓇᒧᑦ ᑖᒃᑯᓄᖓ ᐅᖃᕕᒡᓗᖓ ᐊᖏᕈᑎᒋᓯᒪᔭᓐᓄᑦ; ᐅᕙᖓ ᐱᖃᑎᒋᓂᐊᕐᐸᒋᑦ.”

²⁴ ᒨᓯᓯ ᑎᑎᕋᓚᐅᕐᐳᖅ ᒎᑎᐅᑉ ᐱᖁᔭᖏᓐᓂᒃ ᐊᒡᓚᖕᓄᑦ ᑲᑎᑦᓱᒋᑦ ᐃᓱᓕᑦᓯᐊᕐᓱᒋᑦ.

²⁵ ᐱᔭᕇᕋᒥᒋᑦ, ᓕᕔᑎᓄᑦ ᑐᓂᕐᕈᓯᕐᑎᑦᓯᔨᓄᑦ ᐅᖃᕐᐳᖅ, ᑖᒃᑯᐊ ᐊᒡᔭᕐᓯᔨᐅᖕᒪᑕ ᐊᑕᓂᐅᑉ ᐊᖏᖃᑎᒌᒍᑎᖏᑕ ᐃᒃᓯᕐᕕᖓᓂᒃ,

²⁶ “ᐅᑯᐊ ᐱᖁᔧᑦ ᐊᒡᓚᒃᓯᒪᔪᑦ, ᑎᒍᓗᒋᑦ ᐃᓕᔭᒃᓴᕆᕙᓯ ᐊᑕᓂᐅᑉ ᒎᑎᑦᓯ ᐊᖏᖃᑎᒌᒍᑎᖏᑕ ᐃᒃᓯᕐᕕᖓᑕ ᓴᓂᐊᓄᑦ, ᓇᓗᓁᒃᑯᑕᐅᖁᓪᓗᒋᑦ ᐃᓕᑦᓯᓐᓄᑦ.

²⁷ ᖃᐅᔨᒪᒐᒪ ᓈᓚᒍᓐᓇᖏᓐᓂᑦᓯᓐᓂᒃ ᑕᑎᑐᔪᐊᓘᓂᑦᓯᓐᓂᒡᓗ; ᑕᑯᒋᑦ, ᐃᓅᖃᑎᒋᓪᓗᓯ ᓈᓚᒍᓐᓇᓚᐅᖏᓐᓇᑦᓯ ᑕᑎᑐᓴᒍᓐᓇᕐᓗᓯᓗ ᐊᑕᓂᕐᒧᑦ, ᐱᒋᐊᓪᓚᒃᑲᓐᓂᓛᕋᑦᓯ ᑐᖁᖓᓕᕈᒪ.

²⁸ ᑭᖑᕚᕇᑦ ᐊᖓᔪᖅᑳᓕᒫᖏᑦ ᐊᐅᓚᑦᓯᔨᐅᔪᓪᓗ ᐅᕙᓐᓄᑦ ᕾᖁᓚᐅᕐᓯᐅᒃ, ᒪᑯᓂᖓ ᐅᖃᐅᑎᓂᐊᕋᒃᑭᑦ; ᕿᓚᒡᓗ ᓄᓇᓗ ᓇᓗᓁᕐᓯᔨᒋᓂᐊᕐᐹᒃᑲᒃ ᑖᒃᑯᓂᖓ ᓈᒻᒪᒃᓴᖏᓐᓂᓐᓂᒃ.

²⁹ ᖃᐅᔨᒪᑦᓯᐊᕋᒪ ᑐᖁᓂᕐᒪ ᑭᖑᓂᖓᒍᑦ ᐱᐅᖏᑦᑐᐊᓗᖕᓂᒃ ᐱᐅᓯᕐᑖᕈᒫᕋᑦᓯ; ᒪᓕᒃᑕᐅᖁᓯᒪᔭᒃᑲᓗ ᑐᓄᓐᖓᓕᕈᒫᕋᑦᓯᐅᒃ; ᐅᓪᓗᓂ ᓯᕗᓂᑦᑎᓐᓂ ᐊᔪᕐᑐᓕᓂᐊᓗᖕᓄᑦ ᑎᑭᑕᐅᔪᒫᕐᐳᓯ, ᐱᐅᖏᑦᑐᓕᓂᕐᒥᒃ ᐊᑐᓕᕈᒫᕋᑦᓯ ᐊᑕᓂᐅᑉ ᓵᖓᓂ, ᓂᓐᖓᒃᑎᓪᓗᒍᓗ ᓇᖕᒥᓂᖅ ᐱᓇᓱᐊᕐᑕᑦᓯᓐᓄᑦ.”

ᒨᓯᓯᐅᑉ ᐃᓐᖏᕈᓯᖓ

³⁰ ᑕᕝᕙ ᒨᓯᓯ ᐅᖃᓪᓚᓯᓚᐅᕐᐳᖅ ᐃᓐᖏᐅᓯᕐᒥᒃ ᐊᑕᖏᕐᓗᓂᐅᒃ ᐃᓄᓕᒫᑦ ᐃᓴᕆᐊᓕᒥᐅᑦ ᓈᓚᒃᑎᓪᓗᒋᑦ.