ᒨᓯᓯ ᑕᓪᓕᒪᖏᑦ 29 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᐊᖏᕈᑎᖃᕐᓂᖓ ᐃᓴᕆᐊᓕᒥᐅᓄᑦ ᓄᓇᒥᒃ ᒧᐊᐱᒥᒃ

¹ ᒪᑯᐊ ᑕᕝᕙ ᐊᖏᖃᑎᒌᒍᑏᑦ ᐅᖃᐅᓯᕐᑕᖏᑦ ᒨᓯᓯᒧᑦ ᐊᑕᓂᐅᑉ ᐅᖃᐅᓯᕆᔭᐅᖁᓚᐅᕐᑕᖏᑦ ᐃᓴᕆᐊᓕᒥᐅᓄᑦ ᒧᐊᐱᒥᐅᑦ ᓄᓇᖓᓃᑎᓪᓗᒋᑦ; ᑕᒪᒃᑯᐊᓕᒫᑦ ᐃᓚᓕᐅᑎᔭᐅᓚᐅᕐᐳᑦ ᖃᖅᑲᒥ ᕼᐆᕆᑉᒥ ᐊᑕᓂᐅᑉ ᐊᖏᖃᑎᒌᒍᑎᒋᓯᒪᔭᖏᓐᓄᑦ.

² ᒨᓯᓯᐅᑉ ᐃᓄᓕᒫᑦ ᐃᓴᕆᐊᓕᒥᐅᑦ ᑲᑎᖁᓚᐅᕐᐰᑦ ᐅᖃᐅᑎᓪᓗᓂᒋᓪᓗ, “ᓇᖕᒥᓂᖅ ᑕᑯᓚᐅᕐᓯᒪᕗᓯ ᐊᑕᓂᐅᑉ ᖃᓄᐃᓕᐅᕆᓂᖓᓂᒃ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐊᖓᔪᖅᑳᖁᑎᖏᓐᓄᓪᓗ, ᓄᓇᖁᑎᓕᒫᖓᓄᓪᓗ.

³ ᑕᑯᓚᐅᕆᕗᓯ ᐱᐅᖏᑦᑐᐊᓗᖕᓂᒃ ᖃᓂᒪᓇᕐᑐᓂᒃ, ᑲᒪᓇᕐᑐᓕᓂᕐᓂᒡᓗ, ᓇᓗᓁᒃᑯᑕᕐᔪᐊᓂᒡᓗ ᐊᑕᓂᐅᑉ ᐱᓇᓱᓚᐅᕐᑕᖏᓐᓂᒃ.

⁴ ᑭᓯᐊᓂᓕ ᐊᒡᓛᑦ ᐅᓪᓗᒥᒧᑦ ᑎᑭᓪᓗᒍ ᓱᓕ ᑐᑭᓯᑎᓚᐅᕐᓯᒪᓐᖏᓛᓯ ᐊᑐᖃᑦᑕᓚᐅᕐᑕᑦᓯᓐᓂᒃ.

⁵ ᐊᕐᕌᒍᓂᒃ 40ᓂᒃ ᐊᑕᓂᐅᑉ ᑕᓯᐅᓚᐅᕐᐹᓯ ᐃᓄᖃᖏᑦᑐᒃᑯᑦ; ᐊᓐᓄᕌᓯᓕ ᐊᑐᕐᑕᓯ ᐃᑎᒐᒍᑎᓯᓗ ᐊᑐᕈᓐᓁᓪᓕᔪᖃᓚᐅᓐᖏᓚᑦ.

⁶ ᓂᐊᖂᔭᒥᒃ ᓂᕿᒃᓴᖃᓚᐅᓐᖏᓚᓯ ᕔᓂᒥᒃ ᐃᒥᐊᓗᖕᒥᒡᓘᓐᓃᑦ ᐃᒥᒃᓴᖃᓚᐅᓐᖏᓚᓯ, ᐊᑕᓂᐅᓪᓕ ᐊᑐᕆᐊᖃᕐᑕᑦᓯᓐᓂᒃ ᑐᓂᓯᕕᒋᖃᑦᑕᓚᐅᕐᐹᓯ ᐃᓕᓐᓂᐊᕐᑎᑦᓱᒪᓪᓗᓂᓯ ᑖᓐᓇ ᒎᑎᒋᒐᑦᓯᐅᒃ.

⁷ ᒪᐅᖓᓕ ᓄᓇᒧᑦ ᑎᑭᓐᓇᑦᓯ, ᐊᖓᔪᖅᑳᕐᔪᐊᖅ ᓮᕼᐆᓂ ᕼᐃᓴᐸᓂᒥᐅᖅ ᐊᖓᔪᖅᑳᕐᔪᐊᕐᓗ ᐋᒡ ᐹᓴᓂᒥᐅᖅ ᐅᕙᑦᑎᓐᓂᒃ ᐅᓇᑕᕆᐊᕋᓱᓚᐅᕐᐳᑦ, ᑖᒃᑯᐊᓕ ᓵᓚᒋᓚᐅᕐᐸᕗᑦ,

⁸ ᓄᓇᖏᓪᓗ ᓄᓇᑖᕆᓚᐅᕐᐸᕗᑦ, ᐊᕕᒃᑕᐅᑎᓪᓗᒋᓪᓗ ᑭᖑᕚᕇᓄᑦ ᕉᐱᓂᒃᑯᓐᓄᑦ, ᒑᑎᒃᑯᓐᓄᓪᓗ, ᒫᓇᓯᐅᓪᓗ ᑭᖑᕚᖏᑕ ᐃᓚᖏᓐᓄᑦ.

⁹ ᑍᒤᒻᒪᑦ ᑲᒪᑦᓯᐊᕐᓗᓯ ᐊᖏᖃᑎᒌᒍᑕᐅᓯᒪᔫᑉ ᓇᓗᓁᕐᓯᒪᓂᓕᒫᖏᑦ ᓈᓚᒋᐊᖃᕐᐸᓯ, ᐱᔪᓐᓇᑦᓯᐊᖁᓪᓗᓯ ᐃᓘᓐᓈᒍᑦ ᐱᓇᓱᐊᕐᑕᑦᓯᒍᑦ.

¹⁰ “ᐅᓪᓗᒥᓕ ᐊᑕᓂᐅᑉ ᒎᑎᑦᓯ ᓇᔪᕐᑕᖓᑕ ᓵᖓᓂ ᐃᓘᓐᓇᓯ ᓇᖏᕐᐳᓯ, ᑭᖑᕚᕇᓄᑦ ᑕᓯᐅᕐᑎᐅᔪᓯ, ᐊᖓᔪᖅᑳᖑᔪᓯ, ᐊᐅᓚᑦᓯᔨᐅᔪᓯᓗ, ᐊᖑᑕᐅᔪᓯ ᐃᓴᕆᐊᓕᒥ,

¹¹ ᕿᑐᕐᖓᓯ, ᓄᓕᐊᓯᓗ, ᓄᓇᖃᕐᑐᑐᖃᐅᖏᑦᑐᓪᓗ ᓄᓇᖃᖃᑎᒋᔭᓯ, ᑕᒤᑕ ᕿᔪᒃᓴᑦᓯᓐᓂᒃ ᓇᑲᑎᕆᕙᒃᑐᑦ ᐃᒥᒃᓴᑦᓯᓐᓂᒡᓗ ᐃᒥᕐᑕᕐᐸᒃᑐᑦ,

¹² ᐅᓪᓗᒥ ᐅᕙᓃᑉᐳᓯ ᐅᖃᒻᒪᕆᖕᓂᒃᑯᑦ ᐊᖏᖃᑎᒌᒍᑎᐅᔪᒧᑦ ᐃᑎᖁᓪᓗᓯ ᐊᑕᓂᐅᑉ ᒎᑎᑦᓯ ᐃᓕᑦᓯᓐᓄᑦ ᐋᖅᑭᒃᑕᖓᓄᑦ.

¹³ ᒫᓐᓇ ᐊᑕᓂᐅᑉ ᓱᖅᑯᐃᑦᓯᐊᕐᑐᒥᒃ ᓇᓗᓁᕐᓯᕕᒋᕚᓯ ᐃᓄᖁᑕᐅᓂᑦᓯᓐᓂᒃ ᑖᑦᓱᒧᖓ ᑖᓐᓇᓗ ᒎᑎᒋᒐᑦᓯᐅᒃ, ᑕᒪᑐᒥᖓ ᐊᖏᕐᕕᒋᓚᐅᕐᒪᓯ ᓯᕗᓕᕕᓂᕐᓯᓗ, ᐂᑉᕋᕼᐋᒻ, ᐂᓴᑭ, ᔧᑯᓗ.

¹⁴ ᐃᓕᑦᓯᓐᓄᑐᐊᖅ ᐅᖃᕕᒍᑎᒥᒃ ᐊᖏᖃᑎᒌᒍᑎᓕᐅᓐᖏᓚᖓ,

¹⁵ ᑕᒪᓐᓇ ᐅᕙᑦᑎᓐᓄᑦ ᐅᕙᓂ ᓇᔫᑎᔪᓕᒫᓄᑦ ᐅᓪᓗᒥ ᐊᖏᕈᑎᓕᐅᕐᐹ ᑭᖑᕚᕆᔪᒫᕐᑕᑦᑎᓐᓄᓪᓗ ᓱᓕ ᐃᓅᓯᒪᖏᑦᑐᓄᑦ.

¹⁶ “ᖃᐅᔨᒪᑦᓯᐊᕐᐳᓯ ᐃᓅᓯᓯ ᖃᓄᐃᑦᑑᓚᐅᕐᒪᖔᑦ ᐄᑦᔨᑉᑎᒦᑎᓪᓗᓯ ᖃᓄᕐᓗ ᐃᓅᓯᖃᓚᐅᕐᒪᖔᑦᑕ ᐃᓅᖃᑎᒌᒡᔪᐊᑦ ᐊᓯᑦᑕ ᓄᓇᖏᑎᒍᑦ ᐊᖅᑯᓵᖃᑦᑕᕐᑎᓪᓗᑕ.

¹⁷ ᑕᑯᖃᑦᑕᓚᐅᕐᐸᓯᓗ ᒎᑎᓐᖑᐊᖏᑦ ᓇᕐᕈᓇᕐᑐᑦ ᕿᔪᐃᑦ, ᐅᔭᕅᑦ, ᓯᐅᓪᕕᕇᑦ, ᒎᓗᐃᓪᓗ ᐱᖁᑎᒋᓚᐅᕐᑕᖏᑦ.

¹⁸ ᐅᓗᕆᐊᓱᒋᑦᓯ ᐃᓕᑦᓯᓐᓃᑦᑐᖃᖁᓇᒍ ᐊᖑᒻᒥᒃ, ᐊᕐᓇᒥᒡᓘᓐᓃᑦ, ᕿᑐᕐᖓᕇᓂᒡᓘᓐᓃᑦ, ᑭᖑᕚᕇᓂᒡᓘᓐᓃᑦ, ᐅᓪᓗᒥ ᐆᒻᒪᑎᒥᒍᑦ ᐊᑕᓂᕐᒥᑦ ᒎᑎᑦᑎᓐᓂᑦ ᓴᖑᓯᒪᔪᒥᒃ ᐃᓅᖃᑎᒌᒡᔪᐊᓪᓗ ᒎᑎᓐᖑᐊᖏᓐᓄᑦ ᑐᒃᓯᐊᕐᕕᖃᖔᕈᒪᓕᕐᑐᓂᒃ; ᑕᒪᓐᓇ ᑍᒤᑦᑐᖅ ᐱᕈᕐᓯᐊᒃᓴᐅᑉ ᓄᓇᒧᑦ ᒪᖒᒪᓂᖓᑐᑦ ᑍᒤᑉᐳᖅ ᐱᕈᕐᑐᖃᕈᒫᕐᓗᓂ ᖃᓯᓕᓇᕐᑐᒥᒃ ᑐᖁᓐᓇᕐᑐᒥᒡᓗ.

¹⁹ ᐅᓪᓗᒥ ᐅᕙᓃᑦᑐᒥᒃ ᐱᖁᔨᑦᔪᑎᐅᓪᓚᕆᒃᑐᓂᒃ ᑐᓵᔪᒥᒃ ᐃᓱᒪᔪᖃᕐᑍᓕᓕ ᑍᒤᑦᑐᓅᓕᕋᓗᐊᕈᓂ ᖃᓄᐃᓐᓂᐊᕋᓱᒋᖏᑦᑐᒥᒃ, ᓈᓚᒍᒪᖏᓪᓗᓂ ᐊᓯᒥᓂᒃ ᐃᓱᒪᒋᔭᑐᐃᓐᓇᕐᒥᓂᒃ ᐃᓅᔪᓐᓇᕋᓱᒋᔪᒥᒃ. ᑕᒪᓐᓇ ᑍᒤᓕᖓᓂᖅ ᑕᒪᑦᓯᓐᓂᒃ ᓄᖑᑎᑦᓯᔪᒫᕐᐳᖅ, ᐱᐅᔪᓂᒃ ᐱᐅᖏᑦᑐᓂᒡᓗ.

²⁰ ᐊᑕᓂᐅᑉ ᐊᖑᑦ ᑍᒤᑦᑐᖅ ᐃᓱᒪᒋᔪᓐᓁᕐᕕᒋᓂᐊᓐᖏᓛ. ᐊᑕᓂᐅᓪᓕ ᓂᓐᖓᕕᒃᔪᐊᕐᓂᖓ ᐃᑯᒪᔪᑎᑐᑦ ᐃᑯᐊᓪᓚᖕᓂᐊᕐᐳᖅ ᑖᑦᓱᒧᖓ, ᑕᒪᒃᑯᐊᓗ ᐅᕙᓂ ᐊᒡᓚᖕᓂ ᑎᑎᕋᐅᓯᐅᓯᒪᔪᑦ ᐊᔪᓕᕈᑕᐅᔪᓐᓇᕐᑐᓕᒫᑦᓯᐊᑦ ᑖᑦᓱᒧᖓ ᑎᑭᓐᓂᐊᕐᐳᑦ, ᑖᑦᓱᒪᓗ ᐊᑎᖓ ᐊᑕᓂᐅᑉ ᐲᕐᓂᐊᕐᐹ ᕿᓚᐅᑉ ᐊᑖᓂᑦ.

²¹ ᐊᑕᓂᐅᑉ ᐃᓄᒃ ᑍᒤᑦᑐᖅ ᖃᐅᔨᑦᔪᑕᐅᖁᓪᓗᒍ ᐃᓴᕆᐊᓕᒥᐅᑦ ᑭᖑᕚᕇᖏᓐᓄᑦ ᐊᔪᓕᕈᑕᐅᔪᓐᓇᕐᑐᓄᑦ ᑎᑭᑕᐅᑎᒃᑲᔭᕐᐹ ᓱᒋᐊᕐᑕᐅᑦᔪᑎᒃᓴᐅᔪᓄᑦ ᐊᖏᖃᑎᒌᒍᑏᑦ ᐃᓗᐊᓃᑦᑐᓄᑦ ᐅᑯᓇᓂ ᑎᑎᕋᕐᓯᒪᔪᓂ ᐊᒡᓚᖕᓂ ᐱᖁᔭᓂ.

²² “ᓯᕗᓂᑦᓯᓐᓂ ᐃᓅᖃᑎᒌᖑᔪᒫᕐᑐᓄᑦ, ᑭᖑᕚᒃᓴᑦᓯᓐᓄᑦ, ᓄᓇᖅᑲᑎᒋᓐᖏᑕᑦᓯᓐᓄᓪᓗ ᓄᓇᒥᑦ ᐅᖓᓯᒃᑐᒥᑦ ᐱᓯᒪᔪᓄᑦ ᑕᒪᒃᑯᐊ ᑕᑯᔭᐅᔪᒫᕐᐳᑦ ᐱᓂᕐᓗᒃᑕᐅᓇᕐᑐᑦ ᐋᓐᓂᐊᓇᕐᑐᓪᓗ ᐊᑕᓂᐅᑉ ᓄᓇᑦᓯᓐᓄᑦ ᑎᑭᑎᓯᒪᔭᖏᑦ.

²³ ᓄᓇᓕᒫᖅ ᐱᕈᕐᓰᕕᓕᒫᓪᓗ ᓱᓇᒃᓴᐅᔪᓐᓃᕈᒫᕐᐳᑦ, ᐅᔭᕋᖕᓄᑦ ᐃᑯᐊᓪᓚᒃᓴᕅᑦᑐᓄᑦ ᑕᕆᐅᕐᒧᓪᓗ; ᑲᓐᖓᕐᓱᐃᕕᐅᔪᒫᓐᖏᓚᖅ, ᐊᒡᓛᑦ ᐱᕈᕐᓂᕐᓗᒃᑐᓂᒃ ᐱᕈᕐᕕᐅᔪᓐᓃᕈᒫᕐᐳᖅ. ᓄᓇᓯᓗ ᓱᑑᒪᒥᐅᑦ ᒍᒨᕋᒥᐅᓪᓗ ᐃᒡᓗᒐᓴᖏᑎᑐᑦ ᑍᒤᑦᑑᓕᕈᒫᕐᐳᖅ, ᐊᑦᒪᒥᐅᑎᑐᓪᓗ ᔨᐳᐃᒥᐅᑎᑐᓪᓗ, ᐊᑕᓂᐅᑉ ᑖᒃᑯᐊ ᓄᖑᑎᓚᐅᕐᒪᒋᑦ ᓂᓐᖓᕕᒡᔪᐊᕐᕕᒋᓪᓗᒋᑦ.

²⁴ ᑕᕝᕙ ᐃᓅᖃᑎᒌᒡᔪᐊᓕᒫᑦ ᐊᐱᕐᓱᓕᕈᒫᕐᐳᑦ, ‘ᓱᖕᒪᓂᓐᓇ ᐊᑕᓂᖅ ᑖᑦᓱᒧᖓ ᓄᓇᒧᑦ ᑍᒤᓕᐅᕐᐹ? ᓱᓇᒥᒡᓗ ᐱᑦᔪᑎᖃᕐᓗᓂ ᓂᓐᖓᐅᒪᕕᒡᔪᐊᕐᐹ?’

²⁵ ᑕᒪᓐᓇ ᐃᒤᓕᖓᔪᒥᒃ, ‘ᐱᑦᔪᑎᖃᕐᐳᖅ ᐊᑕᓂᐅᑉ ᐃᓄᖁᑎᖏᑕ ᑖᑦᓱᒧᖓ ᐊᖏᖃᑎᒌᒍᑎᒋᓚᐅᕐᑕᓂ ᓯᖁᓯᒥᒪᖕᒪᒋᑦ, ᓯᕗᓕᕕᓂᖏᑕ ᒎᑎᖓᓄᑦ, ᐊᖏᖃᑎᒌᒍᑎᓕᐊᕆᓚᐅᕐᑕᖓᓄᑦ ᐄᑦᔨᑉᑎᒥᑦ ᐊᐅᓪᓚᕐᑎᓐᓇᒥᒋᑦ.

²⁶ ᒎᑎᒋᔭᐅᔪᓂᒃ ᑖᑦᓱᒪ ᐊᓯᖏᓐᓂᒃ ᑐᒃᓯᐊᕐᕕᖃᖃᑦᑕᓕᕐᒪᑕ ᓯᕗᓂᖓᒍᑦ ᑐᒃᓯᐊᕐᕕᒋᖃᑦᑕᓚᐅᕐᓯᒪᓐᖏᑕᒥᖕᓄᑦ, ᒎᑎᓄᑦ ᐊᑕᓂᐅᑉ ᑐᒃᓯᐊᕐᕕᐅᖃᑦᑕᖁᓚᐅᓐᖏᑕᖏᓐᓄᑦ.

²⁷ ᑍᒤᒻᒪᑦ ᐊᑕᓂᐅᑉ ᓄᓇᖁᑎᖏᑦ ᓂᓐᖓᐅᒪᕕᒋᓕᕐᐰᑦ ᑎᑭᑎᑦᓯᓯᒪᕗᖅ ᐊᔪᓕᕈᑕᐅᔪᓐᓇᕐᑐᓕᒫᓂᒃ ᑖᒃᑯᓇᓂ ᐊᒡᓚᖕᓂ ᑎᑎᕋᐅᓯᐅᓯᒪᔪᓂᒃ.

²⁸ ᐊᑕᓂᖅ ᓂᓐᖓᕕᒡᔪᐊᕐᓯᒪᓕᕐᐳᖅ, ᓂᓐᖓᐅᒪᓂᕐᒥᓄᓪᓗ ᐊᖏᔪᒧᑦ ᓄᓇᒋᔭᖏᓐᓂᑦ ᓄᓲᕋᓕᕐᐰᑦ ᐃᒋᓪᓗᓂᒋᓪᓗ ᓄᓇᖅᑲᑎᒋᓐᖏᑕᖏᓐᓄᑦ, ᒫᓐᓇᓗ ᑕᕝᕙᓃᓕᕐᐳᑦ ᐅᓪᓗᒥᒧᑦ.’

²⁹ “ᓱᓕᓕ ᐊᑕᓂᖅ ᒎᑎᕗᑦ ᐊᓐᖏᐊᕆᔭᖃᕐᐳᖅ; ᐱᖁᔭᒥᓂᒡᓕ ᓴᖅᑭᑎᑦᓯᓯᒪᒐᓗᐊᕐᐳᖅ, ᐅᕙᒍᑦ ᑭᖑᕚᕗᓪᓗ ᓈᓚᒋᐊᖃᕐᑕᑦᑎᓐᓂᒃ ᐃᓱᖃᖏᑦᑐᒧᑦ, ᐱᖁᔭᓕᒪᑦ ᐅᑯᐊ ᒪᓕᒃᑕᐅᖁᓪᓗᒋᑦ.”