ᒨᓯᓯ ᑕᓪᓕᒪᖏᑦ 28 - ᐊᒡᓔᑦ ᐃᑦᔪᕐᖕᓁᑦᑐᑦ

ᓈᓚᖕᓂᐅᑉ ᓮᒻᒪᕐᑎᑕᐅᓇᕐᓂᖓ

¹ “ᐊᑕᓂᐅᑉ ᒎᑎᑦᓯ ᓂᐱᖓᓂᒃ ᓈᓚᖕᓂᐊᕈᑦᓯ ᓱᖁᓯᔪᐃᑦᑑᓗᓯᓗ ᐱᖁᔭᓕᒫᖏᑦ ᒪᓕᖕᓂᐊᕈᑦᓯᒋᒃ ᐅᓪᓗᒥ ᐃᓕᑦᓯᓐᓄᑦ ᑐᓂᓯᒪᔭᒃᑲ, ᑕᕝᕙ ᐊᑕᓂᐅᑉ ᒎᑎᑦᓯ ᓄᓇᕐᔪᐊᕐᒥ ᐃᓅᖃᑎᒌᒡᔪᐊᓂᑦ ᐊᓯᑦᓯᓐᓂᑦ ᐊᔪᖏᓐᓂᕐᓴᐅᓕᕐᑎᓐᓂᐊᕐᐹᓯ.

² ᐊᑕᓂᐅᑉ ᒎᑎᕕᑦ ᓂᐱᖓᓂᒃ ᓈᓚᒃᑯᑦᓯ ᒪᑯᐊ ᑕᕝᕙ ᓮᒻᒪᕐᑕᑎᐅᑦᔪᑎᒃᓮᑦ ᐱᓂᐊᕐᐸᓯ:

³ “ᐊᑕᓂᐅᑉ ᓮᒻᒪᕐᑎᓐᓂᐊᕐᐹᓯ ᓄᓇᒋᔭᓯ ᐱᕈᕐᓰᕕᖁᑎᓯᓗ.

⁴ “ᓮᒻᒪᕐᑎᓐᓂᐊᕐᐹᓯᓗ ᐅᓄᕐᑐᓂᒃ ᕿᑐᕐᖓᖃᕐᑎᓪᓗᓂᓯ, ᓂᐊᖂᔭᒃᓴᓂᒡᓗ ᐱᕈᕐᓰᕕᖁᑎᓯ ᐱᕈᕐᕕᐅᕙᓪᓕᐊᖏᓐᓇᕐᓂᐊᕐᐳᑦ, ᐅᓄᕐᑐᓂᒡᓗ ᐃᒻᒧᒃᓯᐅᒐᖁᑎᖃᓕᕐᓗᓯ ᓰᐱᖁᑎᖃᓕᕐᓗᓯᓗ.

⁵ “ᓮᒻᒪᕐᑎᓐᓂᐊᕐᐹᓯᓗ ᓂᐊᖂᔭᒃᓴᓂᒃ ᐱᕈᕐᓰᕕᖁᑎᓯ ᑕᕝᕙᓐᖓᓪᓗ ᓂᕿᒃᓴᖃᑎᑦᓯᐊᕐᓗᓂᓯ.

⁶ “ᓮᒻᒪᕐᑎᓐᓂᐊᕐᐹᓯᓗ ᐱᓇᓱᐊᕐᓂᕆᔭᓕᒫᑦᓯᓐᓂ.

⁷ “ᐊᑕᓂᐅᑉ ᐊᑭᕋᕐᑐᕐᑎᓯ ᐃᓕᑦᓯᓐᓂᒃ ᐅᓇᑕᕋᓱᓕᕐᐸᑕ ᓵᓚᒋᖃᑦᑕᕐᓂᐊᕐᐰᑦ ᓵᑦᓯᓐᓂ; ᐃᓕᑦᓯᓐᓄᑦ ᐅᓇᑕᕆᐊᕋᔭᕐᐳᑦ ᐊᑕᐅᓯᕐᒥᓐᖔᕐᓗᑎᒃ, ᐃᓕᑦᓯᓐᓂᓪᓕ ᕿᒫᓕᕋᔭᕐᐳᑦ ᓵᓐᖓᔭᑐᐃᓐᓇᕐᒥᖕᓄᑦ ᕿᒫᓕᕐᓗᑎᒃ.

⁸ “ᐊᑕᓂᐅᑉ ᒎᑎᑦᓯ ᓮᒻᒪᕐᑎᓐᓂᐊᕐᐹᓯ ᐱᓇᓱᐊᕐᓂᑦᓯᓐᓂ ᓯᕐᓗᐊᖁᑎᓯᓗ ᓂᐊᖂᔭᒃᓴᓂᒃ ᑕᑕᑎᓐᓂᐊᕐᐰᑦ, ᓮᒻᒪᕐᑎᓐᓂᐊᕐᐹᓯ ᓄᓇᒋᔭᑦᓯᓐᓂ ᓄᓇᖃᕐᑎᓪᓗᓯ ᒎᑎᑦᓯ ᑐᓂᔭᖓᓂᒃ ᐃᓕᑦᓯᓐᓄᑦ.

⁹ “ᐊᑕᓂᖅ ᒎᑎᓯ ᓈᓚᖕᓂᐊᕈᑦᓯᐅᒃ ᑖᑦᓱᒪᓗ ᐱᖁᔨᓂᓕᒫᖏᑦ ᒪᓕᖕᓂᐊᕈᑦᓯᒋᒃ, ᑕᕝᕙ ᐃᓄᖁᑎᑖᕆᓂᐊᕐᐹᓯ ᓇᖕᒥᓂᕐᑖᕆᓗᓂᓯ, ᑕᒪᓐᓇ ᐅᖃᕕᒍᑎᒋᓯᒪᖕᒪᒍ.

¹⁰ ᑕᕝᕙ ᓄᓇᕐᔪᐊᕐᒥᐅᓕᒫᑦ ᖃᐅᔨᔪᒫᕐᐳᑦ ᕾᖁᔭᐅᓯᒪᒐᑦᓯ ᐊᑕᓂᐅᑉ ᐊᑎᖓᓂ; ᓯᕘᕋᒋᓂᐊᕐᐹᓯᓗ.

¹¹ ᐊᑕᓂᐅᓪᓗ ᕿᑐᕐᖓᕐᑖᕐᑎᑦᓱᒫᕐᐹᓯ ᐅᓄᕐᑐᓂᒃ, ᐃᒻᒧᒃᓯᐅᒐᕐᓂᒃ ᐅᓄᕐᑐᓂᒃ, ᓂᐊᖂᔭᒃᓴᓂᒡᓗ ᑍᒪᓐᖓᑦ ᐱᕈᕐᑎᑦᓯᕙᓪᓕᐊᖏᓐᓇᕐᓂᐊᕐᐳᓯ ᑕᒫᓂ ᓄᓇᒥ ᓯᕗᓕᕕᓂᑦᓯᓐᓄᑦ ᑐᓂᔪᒪᓪᓗᒍ ᐊᖏᕈᑎᒋᓚᐅᕐᑕᖓᓂ ᓄᓇᖃᕐᑎᓪᓗᓯ.

¹² ᐊᕐᕌᒍᓕᒫᕐᓗ ᓯᓚᓗᒃᑎᑦᓯᖃᑦᑕᕈᒫᕐᐳᖅ ᓄᓇᒋᔭᑦᓯᓐᓄᑦ ᓯᕐᓗᐊᕐᔪᐊᒥᓂᑦ ᕿᓚᖕᒥᑦ ᓮᒻᒪᕐᑎᓪᓗᓂᓯᓗ ᑕᒤᑎᒍᑦ ᐱᓇᓱᐊᕐᓂᑦᓯᒍᑦ, ᐃᓅᖃᑎᒌᒡᔪᐊᓄᑦ ᐊᓯᑦᓯᓐᓄᑦ ᐅᓄᕐᑐᓄᑦ, ᐊᑐᕐᑎᑦᓯᔪᓐᓇᖁᓪᓗᓯ, ᐊᓯᑦᓯᓐᓂᓪᓕ ᐊᑐᕐᑐᐊᕆᐊᖃᖃᑦᑕᕈᒫᓐᖏᓚᓯ.

¹³ ᐊᑕᓂᐅᓪᓗ ᒎᑎᑦᓯ ᑕᓯᐅᕐᑎᐅᑎᑦᓱᒫᕐᐹᓯ ᐃᓅᖃᑎᒌᒡᔪᐊᓄᑦ ᐊᓯᑦᓯᓐᓄᑦ ᑖᒃᑯᓄᖓ ᒪᓕᒃᑎᐅᑐᐃᓐᓇᖏᓪᓗᓯ; ᑍᒪᓐᖓᑦ ᐱᕙᓪᓕᐊᑎᑦᓱᒫᕐᐹᓯ ᖁᒻᒧᒃᐸᓪᓕᐊᑎᓪᓗᓯ, ᑲᑕᒃᐸᓪᓕᐊᑎᖏᓪᓗᓯ; ᐊᑕᓂᐅᑉ ᒎᑎᑦᓯ ᐱᖁᔭᓕᒫᖏᑦ ᐊᑐᕐᑕᐅᖁᔭᖏᓪᓗ ᒪᓕᖕᓂᐊᕈᑦᓯᐅᒃ ᓱᖁᓯᔪᐃᑦᑑᓗᓯ ᐅᓪᓗᒥ ᐃᓕᑦᓯᓐᓄᑦ ᐅᖃᐅᓯᕆᓯᒪᔭᒃᑲ.

¹⁴ ᑍᒪᓐᖓᑦ ᓈᓚᑦᓯᐊᕆᐊᖃᕐᐸᓯ ᓈᓚᖏᑦᑑᑦᑍᓕᓗᒋᑦ ᓇᓪᓕᐊᓐᓄᓪᓘᓐᓃᑦ ᓴᐅᒥᒧᑦ ᑕᓕᕐᐱᒧᓪᓘᓐᓃᑦ ᓴᖑᑦᑍᓕᓗᓯ, ᒎᑎᐅᓪᓗ ᐊᓯᖏᓐᓂᒃ ᒎᑎᒋᔭᐅᔪᓂᒃ ᑐᒃᓯᐊᕐᕕᖃᕋᓱᒃᑐᒃᓴᐅᓐᖏᓚᓯ.”

ᓈᓚᖏᓐᓂᐅᑉ ᐊᑭᑐᔪᐊᓘᓂᖓ

¹⁵ “ᐊᑕᓂᐅᓪᓕ ᒎᑎᑦᓯ ᓂᐱᖓ ᓈᓚᖕᓂᐊᖏᒃᑯᑦᓯᐅᒃ ᑖᑦᓱᒪᓗ ᐊᑐᕐᑕᐅᖁᓯᒪᔭᖏᑦ ᐱᖁᔭᓕᒫᖏᓪᓗ ᑲᒪᒋᑦᓯᐊᕐᓂᐊᖏᒃᑯᑦᓯᐅᒃ ᐅᓪᓗᒥ ᐃᓕᑦᓯᓐᓄᑦ ᒪᓕᒃᑕᐅᖁᓪᓗᒋᑦ ᐅᖃᐅᓯᕆᔭᒃᑲ, ᒪᑯᐊ ᑕᕝᕙ ᓯᕗᓂᑦᓯᐊᖃᕐᓇᖏᑦᑐᑦ ᐃᓕᑦᓯᓐᓄᑦ ᑎᑭᓐᓂᐊᕐᐳᑦ ᓵᓚᒋᓗᓯᓗ:

¹⁶ “ᐊᑕᓂᐅᑉ ᓈᒻᒪᖏᑦᔪᑎᖃᓕᕐᑎᓐᓂᐊᐰᑦ ᓄᓇᒋᔭᓯ ᐱᕈᕐᓰᕕᖁᑎᓯᓗ.

¹⁷ “ᐊᑕᓂᐅᑉ ᓈᒻᒪᖏᑦᔪᑎᖃᓕᕐᑎᓐᓂᐊᐰᑦ ᓂᐊᖂᔭᒃᓴᖁᑎᓯ ᓂᕿᒃᓮᓪᓗ ᑕᕝᕙᓐᖓᑦ ᓂᕿᒃᓴᓕᐊᕆᕙᒃᑕᓯ.

¹⁸ “ᐊᑕᓂᐅᑉ ᓈᒻᒪᖏᑦᔪᑎᖃᓕᕐᑎᓐᓂᐊᕐᐹᓯ ᐅᓄᖏᑦᑐᓂᒃ ᕿᑐᕐᖓᕐᑖᕐᑎᓪᓗᓂᓯ, ᐱᕈᕐᓰᕕᖁᑎᓯ ᓂᐊᖂᔭᒃᓴᓂᒃ ᐱᕈᕐᕕᐅᑎᑦᓯᐊᖏᓪᓗᓂᐅᒃ, ᐅᓄᖏᑦᑐᓂᒡᓗ ᐃᒻᒧᒃᓯᐅᒐᕐᓂᒃ ᓰᐱᓂᒡᓗ ᐱᖃᕐᑎᓪᓗᓂᓯ.

¹⁹ “ᐊᑕᓂᐅᓪᓗ ᓈᒻᒪᖏᑦᔪᑎᖃᓕᕐᑎᓐᓂᐊᕐᐹᓯ ᑕᒤᑎᒍᑦ ᐅᖃᕐᓂᕐᓘᑕᐅᖃᑦᑕᓕᕐᓗᓯ ᐃᑎᕈᑦᓯ ᐊᓂᒍᑦᓯᓗ.

²⁰ “ᐱᐅᖏᑦᑐᒥᒃ ᐱᓇᓱᐊᕈᑦᓯ ᐊᑕᓂᖃᕈᒪᖏᒃᑯᑦᓯᓗ, ᑕᕝᕙ ᐱᓂᕐᓗᖕᓇᕐᑐᓄᑦ ᑎᑭᑕᐅᑎᑦᓱᒫᕐᐹᓯ, ᓇᓗᓕᕐᓇᕐᑐᒧᓪᓗ, ᐊᑲᐅᖏᑦᔪᑎᒃᓴᖃᕐᓂᕐᓄᓪᓗ ᖃᓄᐃᑦᑐᑐᐃᓐᓇᒥᒃ ᐱᓇᓱᐊᕋᓗᐊᕈᑦᓯ, ᕿᓚᒥᑯᓗᒃ ᓄᖑᑕᐅᑦᓯᐊᕐᓇᕐᑐᒧᑦ ᑎᑭᑕᐅᓚᐅᖅᑳᕐᑎᓐᓇᓯ, ᐅᕙᓐᓂᒃ ᕿᒤᓯᒪᓃᑦ ᐱᑦᔪᑎᒋᓗᒍ.

²¹ ᖃᓂᒪᓇᕐᑐᓄᑦ ᐊᑦᔨᒌᖏᑦᑐᓄᑦ ᑎᑭᑕᐅᖃᑦᑕᕈᒫᕐᐳᓯ ᐊᑕᖏᕐᓗᓯ ᓄᖑᓚᐅᖏᓐᓂᓕᒫᑦᓯᓐᓂ ᑕᒫᓂ ᓄᓇᑖᕆᔪᒫᓕᕐᑕᑦᓯᓐᓂ.

²² ᐊᑕᓂᐅᓪᓗ ᓱᒋᐊᕈᒫᕐᐹᓯ ᖃᓂᒪᓇᕐᑐᓄᑦ ᓯᐊᒻᒪᕐᐸᓪᓕᐊᔭᑦᑐᓄᑦ, ᐳᓪᓕᓕᕐᓇᕐᑐᓄᑦ ᐆᑎᕐᓇᕐᑐᓄᓪᓗ, ᓄᓇᒧᑦ ᐸᓂᕐᓇᕐᑐᒧᑦ ᐅᖅᑰᔪᐊᓗᖕᒧᓪᓗ ᓂᐊᖂᔭᒃᓴᖁᑎᓯ ᑎᑭᑕᐅᔪᒫᕐᐳᑦ ᐊᓯᕈᕐᑕᐅᖁᓪᓗᒋᑦ. ᑕᒪᒃᑯᐊᓗ ᐱᓂᕐᓗᖕᓇᕐᑐᐃᑦ ᐃᓕᑦᓯᓐᓃᖏᓐᓇᕈᒫᕐᐳᑦ ᑐᖁᓚᐅᖅᑳᕐᑎᓐᓇᓯ.

²³ ᓯᓚᓗᓚᐅᕐᓯᒪᓂᐊᓐᖏᓚᖅ ᓄᓇᒧᑦ, ᓄᓇᓯᓗ ᐸᓂᕐᓂᕐᒧᑦ ᓴᕕᕋᔭᒃᑎᑐᑦ ᓯᑎᔫᑎᒋᓕᕈᒫᕐᐳᖅ.

²⁴ ᓯᓚᓗᓐᖏᖔᕐᓗᓂ ᐊᑕᓂᖅ ᑎᑭᑎᑦᓯᔪᒫᕐᐳᖅ ᐳᔪᕐᓗᖕᒥᒃ ᐱᕐᓯᓕᕐᓗᓂ ᓯᐅᕋᕐᒥᒡᓗ ᐱᕐᓯᕐᓗᓂ ᑐᖁᑕᐅᓗᓯ ᓄᖑᑕᐅᓚᐅᖏᓐᓂᑦᓯᓐᓂ.

²⁵ “ᐊᑕᓂᐅᑉ ᓵᓚᐅᑎᑦᓱᒫᕐᐹᓯ ᐊᑭᕋᑦᓯᓐᓄᑦ; ᐊᑕᐅᓯᕐᒥᓐᖔᕐᓗᓯ ᐅᓇᑕᕆᐊᕈᒫᕐᐸᓯ, ᕿᒫᔪᒫᕐᐳᓯᓕ ᓵᓐᖓᔭᑐᐃᓐᓇᑦᓯᓐᓄᑦ ᕿᒫᓕᕐᓗᓯ, ᓄᓇᕐᔪᐊᕐᒥᐅᓪᓗ ᐊᖓᔪᖅᑲᐅᕕᖃᕐᑐᓕᒫᑦ ᑯᐊᕐᓵᕐᓯᒪᔪᒫᕐᐳᑦ ᖃᓄᐃᓕᕐᓂᑦᓯᓐᓂᒃ ᑕᑯᒍᑎᒃ.

²⁶ ᑐᖁᒍᑦᓯᓕ, ᑎᖕᒥᐊᕐᔪᐊᓂᑦ ᐆᒪᔪᓂᓪᓗ ᓄᔪᐊᕐᑐᓂᑦ ᐅᐸᒃᑕᐅᓗᓯ ᑎᒥᑦᓯ ᓂᕆᔭᐅᔪᒫᕐᐳᑦ; ᓇᓪᓕᐊᓐᓄᓪᓘᓐᓃᑦ ᕿᒪᒃᓯᑎᑦᓯᔪᒃᓴᕐᑕᖃᕈᒫᓐᖏᓚᖅ ᑖᒃᑯᓂᖓ.

²⁷ ᐊᑕᓂᐅᓪᓗ ᐊᔪᐊᕐᑎᑦᓱᒫᕐᐹᓯ ᐄᑦᔨᑉᑎᒥ ᑍᒤᓚᐅᕐᑐᑎᑐᑦ, ᐅᕕᓂᓯ ᐊᖕᒪᕐᑎᕐᓗᑎᒃ ᐊᕿᐊᕈᕐᓗᓕᕐᓗᓯᓗ ᐊᒥᕐᓗᖕᓂᕐᒧᓪᓗ ᑎᒥᓯ ᓈᔭᐅᓯᒪᔪᒫᕐᐳᑦ, ᐅᖏᓚᖕᓇᕐᑐᒧᓪᓗ ᑕᒪᒃᑯᐊ ᐋᖅᑭᒃᑕᐅᑦᔪᑎᒃᓴᖃᕈᒫᓐᖏᓚᑦ.

²⁸ ᐊᑕᓂᐅᑉ ᐃᓱᒤᕈᑎᑎᑦᓱᒫᕐᐹᓯ; ᐊᓇᐅᔪᒫᕐᐹᓯᓗ ᑕᐅᑐᒍᓐᓁᕐᑎᓪᓗᓯ ᓇᓗᓕᕐᑎᓪᓗᓂᓯᓗ.

²⁹ ᑕᑦᓯᑲᒍᒫᕐᐳᓯ ᐅᓪᓗᒃᑯᑦ ᖃᐅᒪᑎᓪᓗᒍ ᑕᐅᑐᖏᑦᑐᑎᑐᑦ, ᓇᒧᓐᖓᐅᔭᕆᐊᒃᓴᕐᓗ ᖃᐅᔨᔪᓐᓇᕈᒫᓐᖏᓚᓯ; ᐱᓇᓱᐊᕋᓱᒃᑕᓕᒫᓯ ᐱᔪᓐᓇᕈᒫᓐᖏᓚᓯ ᑍᒪᓐᖓᑦ ᐅᖁᒤᒃᓴᕐᑎᑕᐅᔪᒫᕐᐳᓯ ᑎᒡᓕᒐᕐᕕᐅᖃᑦᑕᕐᓗᓯ, ᓇᓪᓕᐊᓐᓂᒡᓘᓐᓃᑦ ᐃᑲᔪᕐᑎᒃᓴᖃᕈᒫᓐᖏᓚᓯ.

³⁰ “ᓄᓕᐊᒃᓴᕐᑖᕈᒫᕐᐳᓯ, ᐊᓯᕕᓪᓕ ᐃᓐᓇᖓᖃᑎᒋᔪᒫᕐᐹ; ᐃᒡᓗᓕᐅᕈᒫᕐᐳᓯ ᐊᖏᕐᕋᕆᔪᒫᓐᖏᓚᓪᓕ; ᕔᓂᒃᓴᓂᒃ ᐱᕈᕐᓰᕕᖕᒥ ᑲᓐᖓᕐᓱᐃᔪᒫᕐᐳᓯ, ᐸᐅᕐᖓᖏᓐᓂᒡᓕ ᑲᑎᕐᓱᐃᔪᒫᓐᖏᓚᓯ.

³¹ ᐃᒻᒧᒃᓯᐅᒐᖁᑎᓯ ᑕᑯᓐᓇᕐᑎᓪᓗᓯ ᑐᖁᑕᐅᔪᒫᕐᐳᑦ, ᓂᕿᖏᓐᓂᒡᓕ ᓂᕆᕕᒋᔪᒫᓐᖏᓚᓯ; ᓯᐅᑎᖅᑯᕐᑐᔪᖁᑎᓯ ᑕᑯᓐᓇᕐᑎᓪᓗᑎᑦ ᑲᑉᐱᐊᓵᕐᑕᐅᓗᓯ ᐱᔭᐅᔪᒫᕐᐳᑦ, ᐃᓕᑦᓯᓐᓄᓪᓗ ᐅᑎᕐᑎᑕᐅᔪᒫᓐᖏᓚᑦ. ᓰᐱᖁᑎᓯ ᐊᑭᕋᕐᑐᕐᑎᑦᓯᓐᓄᑦ ᑐᓂᔭᐅᔪᒫᕐᐳᑦ, ᓇᓪᓕᐊᓐᓂᒡᓘᓐᓃᑦ ᐃᑲᔪᕐᑎᒃᓴᖃᕈᒫᓐᖏᓚᓯ.

³² ᑕᑯᓐᓇᕐᑎᓪᓗᓯ ᐃᕐᓂᓯ ᐸᓂᓯᓗ ᑐᓂᔭᐅᔪᒫᕐᐳᑦ ᐃᓄᖕᓄᑦ ᐊᓯᑦᓯᓐᓄᑦ, ᕿᑐᕐᖏᕆᔪᒫᕐᐳᓯ ᐅᓪᓗᓕᒫᖅ ᐅᖓᒋᓗᒋᑦ; ᕿᓂᕋᓱᖕᓂᕐᒧᑦ ᕿᑐᕐᖓᑎᑦ ᐅᑎᓕᕐᒪᖔᑕ ᐅᑎᕈᒫᓐᖏᓚᓪᓕ.

³³ ᐃᓅᖃᑎᒌᒡᔪᐊᓄᑦ ᐊᓯᑦᓯᓐᓂᑦ ᐱᓯᒪᔪᓄᑦ ᖃᐅᔨᒪᓐᖏᑕᑦᓯᓐᓄᑦ ᓂᐊᖂᔭᒃᓴᖁᑎᓯ ᓂᕿᒋᔭᐅᔪᒫᕐᐳᑦ ᐊᒃᓱᕈᒻᒪᕆᒃᓗᑎᑦ ᐱᓇᓱᐊᕈᑎᒋᖃᑦᑕᕐᓯᒪᔭᑎᑦ ᐱᕈᕐᑎᓐᓇᓱᐊᕐᓗᒋᑦ; ᐱᑎᑕᐅᖏᑦᓯᐊᕐᓗᓯ ᐅᖁᒤᒃᓴᕐᑎᑕᐅᔪᒫᕐᐳᓯ ᑍᒪᓐᖓᑦ ᐱᑲᒻᒪᒃᑕᐅᖃᑦᑕᕐᓗᓯᓗ ᓂᑲᒋᔭᐅᖏᓪᓗᓯ.

³⁴ ᐅᖁᒤᒃᓴᕐᑎᑕᐅᓂᕐᓄᓪᓗ ᑕᒪᒃᑯᓄᖓ ᐃᓱᒤᕈᑎᑎᑕᐅᔪᒫᕐᐳᓯ ᑕᑯᔭᑦᓯᓐᓄᑦ.

³⁵ ᐊᑕᓂᐅᓪᓗ ᒥᖑᐊᕈᒫᕐᐰᑦ ᓂᐅᒃᑭᒃ ᐋᓐᓂᐊᓇᕐᑐᓄᑦ ᐳᓪᓕᕐᓇᕐᑐᓄᑦ ᐋᖅᑭᒃᑕᐅᔪᓐᓇᖏᑦᑐᓄᑦ, ᐊᒥᕐᓗᖕᓄᑦ; ᐊᔪᐊᕐᓄᓪᓗ ᑎᒥᓯ ᓈᔭᐅᔪᒫᕐᐳᖅ ᓂᐊᖁᑦᓯᓐᓂᑦ ᐱᒋᐊᕐᓗᒍ ᐃᑎᒐᑦᓯᓐᓄᑦ ᑎᑭᓪᓗᒍ.

³⁶ “ᐊᑕᓂᐅᑉ ᐱᔭᐅᑎᑦᓱᒫᕐᐹᓯ, ᐊᖓᔪᖅᑳᕐᔪᐊᓯᓗ ᐊᖓᔪᖅᑳᕐᔪᐊᓐᖑᕐᑎᓯᒪᔭᓯ ᐃᓕᑦᓯᓐᓄᑦ, ᐃᓅᖃᑎᒌᒡᔪᐊᓄᑦ ᓯᕗᓕᓯᓘᓐᓃᑦ ᐃᓕᑦᓯᓘᓐᓃᑦ ᓯᕗᓕᖓᒍᑦ ᓄᓇᒋᓚᐅᕐᓯᒪᓐᖏᑕᑦᓯᓐᓄᑦ ᐊᐅᓪᓚᕈᑦᔭᐅᓗᓯ; ᑕᕝᕙᓂᓗ ᒎᑎᒋᔭᐅᔪᓂᒃ ᕿᔪᖕᓂᒃ ᐅᔭᕋᖕᓂᒡᓗ ᐱᔨᑦᓯᕈᒫᕐᐳᓯ.

³⁷ ᓄᓇᓄᑦ ᓇᒧᑐᐃᓐᓇᖅ ᐊᑕᓂᐅᑉ ᓯᐊᒻᒪᕐᑎᑦᓱᒫᕐᐹᓯ, ᐃᓄᖏᓐᓂᓪᓗ ᖁᐊᕐᓵᕈᑕᐅᔪᒫᕐᐳᓯ ᓱᔪᐊᓘᓐᓂᕐᒪᖔᑦᓯ ᐃᓱᒪᒋᔭᐅᓗᓯ; ᑍᒎᓴᒐᐅᓕᕐᓗᓯ ᐅᖃᐅᓯᐅᒐᔪᓕᕐᓗᓯᓗ.

³⁸ “ᐱᕈᕐᓯᐊᒃᓴᓂᒃ ᐅᓄᕐᑐᓂᒃ ᑲᓐᖓᕐᓱᐃᔪᒫᕐᐳᓯ, ᐅᓄᖏᑦᑐᓂᒡᓕ ᑲᑎᕐᓱᐃᔪᒫᕐᐳᓯ; ᐱᒡᓕᕐᑕᐅᔮᕐᑐᓄᑦ ᓂᐊᖂᔭᒃᓴᖁᑎᓯ ᓄᖑᑕᐅᖃᑦᑕᕈᒫᕐᒪᑕ.

³⁹ ᕔᓂᒃᓴᓂᒃ ᐱᕈᕐᓰᕕᖕᒥ ᑲᓐᖓᕐᓱᐃᔪᒫᕐᐳᓯ ᐱᕈᕐᓴᑎᓪᓗᒋᓪᓗ ᑲᒪᒋᑦᓯᐊᕐᓗᒋᑦ, ᐸᐅᕐᖓᖏᓐᓂᒡᓕ ᑲᑎᕐᓱᐃᔪᒫᓐᖏᓚᓯ ᐃᒥᕈᒫᕋᓯᓗ ᐸᐅᕐᖓᖏᓐᓂᑦ, ᓄᓇᐅᑉ ᖁᐱᕐᕈᖏᓐᓄᑦ ᕔᓂᒃᓮᑦ ᓂᕆᔭᐅᔪᒫᕐᒪᑕ.

⁴⁰ ᓇᐹᕐᑐᐃᑦ ᐅᕐᓱᒃᓴᓕᖕᓂᒃ ᐸᐅᕐᖓᓖᑦ ᓇᓂᑐᐃᓐᓇᖅ ᓄᓇᒋᔭᑦᓯᓐᓂ ᐱᕈᕈᒫᕐᐳᑦ, ᓇᐹᕐᑑᓪᓕ ᐱᕈᕐᑐᖏᓐᓂᒃ ᐅᕐᓱᒃᓴᓂᒃ ᐅᕐᓱᕐᑎᕈᑎᒃᓴᖃᕈᒫᓐᖏᓚᓯ, ᓇᐹᕐᑑᑉ ᐸᐅᕐᖓᖏᑦ ᐅᕐᓱᒃᓮᑦ ᐃᓂᒥᖕᓂᑦ ᑲᑕᒐᕈᒫᕐᒪᑕ.

⁴¹ ᐃᕐᓂᖃᐅᕈᒫᕐᐳᓯ ᐸᓂᖃᐅᕐᓗᓯᓗ, ᐱᒋᔪᒫᓐᖏᓚᓯᓕ ᑎᒍᔭᐅᓗᑎᒃ ᐊᐅᓪᓚᕈᑦᔭᐅᔪᒫᕐᒪᑕ.

⁴² ᓇᐹᕐᑐᖁᑎᓕᒫᓯ ᓄᓇᒥᓗ ᐱᕈᕐᓯᐊᓯ ᐱᔭᐅᔪᒫᕐᐳᑦ ᖁᐱᕐᕈᓄᑦ ᐱᒡᓕᕐᑕᐅᔮᕐᑐᓄᑦ.

⁴³ “ᓄᓇᖃᕐᑐᑐᖃᐅᖏᑦᑐᑦ ᓄᓇᑦᓯᓐᓃᑦᑐᑦ ᐱᓪᓚᕆᐅᓂᕐᒥ ᐃᓂᑖᕐᐸᓪᓕᐊᔪᒫᕐᐳᑦ, ᐃᓕᑦᓯᓕ ᑲᑕᒃᐸᓪᓕᐊᑐᐃᓐᓇᕈᒫᕐᐳᓯ ᐃᓂᕕᓂᑦᓯᓐᓂᑦ.

⁴⁴ ᑖᒃᑯᐊᓗ ᐃᓕᑦᓯᓐᓂᒃ ᑮᓇᐅᔭᓂᒃ ᐊᑐᕐᑐᐊᕐᑎᑦᓯᕙᒍᒫᕐᐳᑦ, ᐃᓕᑦᓯᓗ ᑖᒃᑯᓄᖓ ᐊᑐᕐᑐᐊᕐᑎᑦᓯᕙᓕᕐᓗᓯ; ᑭᖑᓂᖓᒍᑦ ᑖᒃᑯᐊ ᓂᐊᖂᓕᕈᒫᕐᐳᑦ ᐃᓕᑦᓯᓗ ᐸᒥᐅᖑᓕᕐᓗᓯ.

⁴⁵ “ᑕᒪᒃᑯᐊ ᐱᓂᕐᓗᖕᓇᕐᑐᑦ ᑎᑭᑦᓱᒫᕐᐳᑦ ᐃᓕᑦᓯᓐᓄᑦ ᐃᓕᑦᓯᓐᓃᖏᓐᓇᕈᒫᕐᐳᓪᓗ ᓄᖑᑕᐅᓚᐅᖏᓐᓂᓕᒫᑦᓯᓐᓂ, ᐊᑕᓂᐅᑉ ᒎᑎᑦᓯ ᓂᐱᖓᓂᒃ, ᓈᓚᓚᐅᖏᓐᓇᑦᓯ ᐱᖁᔭᖏᓪᓗ ᒪᓕᒐᒃᓴᐅᖁᔭᖏᓪᓗ ᒪᓕᓚᐅᖏᓐᓇᑦᓯᒋᒃ ᐃᓕᑦᓯᓐᓄᑦ ᐊᑐᕐᑕᐅᖁᓚᐅᕐᑕᖏᑦ.

⁴⁶ ᑕᒪᒃᑯᐊᓗ ᓇᓗᓁᒃᑯᑕᐅᔪᒫᕐᐳᑦ ᒎᑎᐅᑉ ᐃᓕᑦᓯᓐᓂᒃ ᓱᒋᐊᕐᓯᓂᖓᓂᒃ ᑭᖑᕚᓯ ᐱᖃᓯᐅᑎᓗᒋᑦ ᐃᓱᖃᖏᑦᑐᒧᑦ.

⁴⁷ ᐊᑕᓂᐅᑉ ᓮᒻᒪᕐᑎᓯᒪᓚᐅᕐᒪᓯ ᑕᒤᑎᒍᑦᓯᐊᖅ, ᐱᔨᑦᓯᓚᐅᓐᖏᓚᓯᓕ ᖁᕕᐊᓱᖕᓂᕐᒧᑦ ᐊᓕᐊᓁᒍᓱᖕᓂᕐᒧᓪᓗ ᐆᒻᒪᑎᒃᑯᑦ.

⁴⁸ ᑍᒤᒻᒪᑦ, ᐊᑭᕋᕐᑐᕐᑎᑦᓯᓐᓂᒃ ᐱᔨᑦᓯᕆᐊᖃᕈᒫᓕᕐᐳᓯ ᐊᑕᓂᐅᑉ ᑎᓕᓂᐊᕐᑕᖏᓐᓂᒃ ᐃᓕᑦᓯᓐᓄᑦ ᓵᓚᒋᔭᐅᖁᓪᓗᓯ, ᑳᒍᒫᕐᐳᓯ, ᐃᒥᕈᒡᓗᓯᓗ, ᐊᓐᓄᕌᖃᖏᓪᓗᓯᓗ ᓱᓇᓕᒫᓂᒡᓗ ᑭᓐᖒᒪᒃᓯᕐᓗᓯ; ᐊᑕᓂᐅᑉ ᐅᖁᒤᒃᓴᕐᑎᑦᓱᒫᕐᐹᓯ ᓂᑲᒋᖏᓪᓗᓂᓯ ᐋᓐᓂᕐᓇᕐᑐᓄᑦ ᓄᖑᑕᐅᓚᐅᖏᓐᓂᑦᓯᓐᓂ.

⁴⁹ ᐊᑕᓂᖅ ᐃᓅᖃᑎᒌᒡᔪᐊᓂᒃ ᓄᓇᕐᔪᐊᑉ ᐃᓱᐊᓂᑦ ᐱᓯᒪᔪᓄᑦ ᐅᐸᒃᑕᐅᑎᑦᓱᒫᕐᐹᓯ ᐅᓇᑕᕆᐊᕐᑕᐅᓗᓯ, ᐅᐸᒃᑐᕈᒫᕐᐳᑦ ᓇᒃᑐᕋᓕᒃᑎᑐᑦ ᐊᐅᕐᓵᕐᑐᑎᑐᑦ,

⁵⁰ ᐃᓅᖃᑎᒌᒡᔪᐊᖑᓗᑎᒃ ᓯᕘᕋᒋᔭᖃᖏᑦᑑᔪᒫᕐᐳᑦ ᓂᑲᒍᓱᖃᖏᓪᓗᑎᒡᓗ ᑭᓇᓕᒫᒥᒃ, ᐃᓅᓱᒃᑑᒐᓗᐊᓄᑦ ᐃᓄᑐᖃᕐᓄᓪᓗ.

⁵¹ ᐃᒻᒧᒃᓯᐅᒐᖁᑎᓯᓗ ᓄᕐᕋᖏᑦ ᓂᐊᖂᔭᒃᓴᖁᑎᓯᓗ ᓂᕿᒋᔪᒫᕐᐰᑦ, ᓄᖑᓚᐅᖏᓐᓂᑦᓯᓐᓂ; ᐊᒥᐊᒃᑯᔭᐅᔪᒫᓐᖏᓚᓯᓘᓐᓃᑦ ᓂᐊᖂᔭᒃᓴᓂᒃ, ᕔᓂᓂᒃ, ᓇᐹᕐᑐᐃᑦ ᐱᕈᕐᑐᖏᑕ ᐅᕐᓱᖏᓐᓂᒃ, ᐃᒻᒧᒃᓯᐅᒐᕐᓂᒃ, ᓰᐱᓂᒡᓗ; ᐱᕐᓕᕐᓗᓯ ᑐᖁᓚᐅᖏᓐᓂᑦᓯᓐᓂ.

⁵² ᓄᓇᓕᓕᒫᑦᓯᐊᑦ ᐊᑕᓂᐅᑉ ᒎᑎᑦᓯ ᑐᓂᓯᒪᔭᓕᒫᖏᑦ ᐅᓇᑕᕆᐊᕈᒫᕐᐰᑦ, ᐊᕙᓗᕐᔪᐊᖅ ᐳᕐᑐᔪᖅ, ᐊᑦᑕᕐᓇᖏᑦᑐᕐᓗ ᓱᕋᒃᑕᐅᔪᓐᓇᕋᓱᒋᓐᖏᑕᓯ ᐅᕐᕈᔪᒫᕐᐳᖅ.

⁵³ “ᐊᑭᕋᓯᓕ ᓄᓇᒋᔭᑦᓯᓐᓂᒃ ᐊᕙᑕᖏᕐᓯᓯᒪᓕᕐᐸᑕ, ᐱᕐᓚᓱᖕᓂᕐᒧᑦ ᐊᒡᓛᑦ ᕿᑐᕐᖓᑦᓯᓐᓂᒃ ᐊᑕᓂᐅᑉ ᒎᑎᕕᑦ ᐃᓕᑦᓯᓐᓄᑦ ᑐᓂᓯᒪᔭᖏᓐᓂᒃ ᓂᕿᖃᓕᕈᒫᕐᐳᓯ.

⁵⁴ ᐊᒡᓛᑦ ᐊᖑᑎᑦ ᐃᕐᓂᐊᖑᓂᕐᒥᖕᓂᑦ ᐊᔪᕐᓴᕐᓚᐅᕐᓯᒪᖏᑦᑐᑦ ᐃᓄᑦᓯᐊᕙᐅᓯᒪᔪᓪᓗ ᓂᕆᔪᒪᓗᐊᕐᓂᕐᒧᑦ ᐊᕙᓗᔭᐅᓯᒪᓕᕐᑎᓪᓗᓯ ᓇᖕᒥᓂᖅ ᕿᑐᕐᖓᓪᓚᕆᖕᒥᖕᓂᒃ ᓂᕿᖃᓕᕈᒫᕐᐳᑦ ᐊᓯᐊᓂᒃ ᓂᕆᔭᒃᓴᖃᖏᓐᓂᕐᒧᑦ.

⁵⁵ ᐊᒡᓛᑦ ᖃᑕᓐᖑᑎᒥᖕᓄᑦ ᓂᕆᔭᖏᑕ ᐃᓚᖓᓂᒃ ᐂᑦᑐᐃᔪᒫᓐᖏᓚᑦ ᓄᓕᐊᒥᖕᓄᓪᓘᓐᓃᑦ ᓇᒡᓕᒋᔭᒥᖕᓄᑦ ᕿᑐᕐᖓᖏᑕᓘᓐᓃᑦ ᐃᓚᖏᓐᓄᑦ ᐊᒥᐊᒃᑰᔪᓄᑦ.

⁵⁶ ᐊᒡᓛᑦᑕᐅᖅ ᐊᕐᓁᑦ ᐃᕐᓂᐊᖑᓂᕐᒥᖕᓂᑦ ᐊᔪᕐᓴᕐᓚᐅᕐᓯᒪᖏᑦᑐᑦ ᐃᓄᑦᓯᐊᕙᐅᓯᒪᔪᓪᓗ, ᐊᔪᕐᓴᖏᑦᑑᓗᐊᒧᑦ ᐊᒡᓛᑦ ᓇᒧᑐᐃᓐᓇᖅ ᐱᓱᒍᓐᓇᕐᐸᓚᐅᖏᑦᑐᑦ, ᑍᒫᑦᓮᓐᓇᕐᑕᐅᖅ ᓂᕆᖃᑦᑕᓕᕈᒫᕐᐳᑦ.

⁵⁷ ᐊᑭᕋᖏᑕ ᓄᓇᒋᔭᖓᑦ ᐊᕙᓗᓯᒪᓕᕐᐸᒍ, ᓂᕆᔪᒪᓗᐊᕐᓂᕐᒧᑦ ᐊᒡᓛᑦ ᐃᔨᕋᕐᑐᕐᓗᑎᒃ ᐃᕐᓂᐊᕆᕋᑖᕐᑕᒥᖕᓂᒃ ᓂᕆᖃᑦᑕᓕᕈᒫᕐᐳᑦ ᑕᒪᐅᓁᓐᓇᕐᓗ ᐃᓄᕐᓗᑎᒃ ᐃᕐᓂᐊᕆᔭᐅᓯᒪᔪᓂᒃ; ᐅᐃᒥᖕᓂᒡᓘᓐᓃᑦ ᓇᒡᓕᒋᔭᒥᖕᓂᒃ ᓂᕆᖃᑎᖃᕈᒫᓐᖏᓚᑦ ᕿᑐᖓᒥᖕᓂᒡᓘᓐᓃᑦ.

⁵⁸ “ᒎᑎᐅᑉ ᐊᔪᕆᕐᑐᐃᑦᔪᑎᒋᓯᒪᔭᖏᓐᓂᒃ ᐅᕙᓂ ᐊᒡᓚᖕᓂ ᑎᑎᕋᕐᑕᐅᓯᒪᔪᓕᒫᓂᒃ ᓈᓚᖕᓂᐊᖏᒃᑯᑦᓯ ᓱᖁᓯᔪᐃᑦᑑᓂᐊᖏᒃᑯᑦᓯᓗ ᐊᑕᓂᐅᓪᓗ ᒎᑎᕕᑦ ᐊᑎᖓ ᐅᐱᓐᓇᕐᓯᑎᓐᓂᐊᖏᒃᑯᕕᐅᒃ ᐱᐅᓂᕐᐹᖑᔪᖅ ᑲᒪᓇᕐᓂᕐᐸᐅᔪᕐᓗ,

⁵⁹ ᑕᕝᕙ ᐊᑕᓂᐅᑉ ᑎᑭᑕᐅᑎᑦᓱᒫᕐᐹᓯ ᐋᓐᓂᐊᓇᕐᑐᓂᒃ ᐋᖅᑭᒃᑕᐅᔪᓐᓇᖏᑦᑐᓂᒡᓗ ᖃᓂᒪᓐᓇᕐᑐᓂᒡᓗ ᐱᐅᖏᑦᑐᐊᓗᖕᓂᒃ ᐃᓕᑦᓯᓐᓄᑦ ᑭᖑᕚᑦᓯᓐᓄᓪᓗ ᑎᑭᑎᑦᓯᔪᒫᕐᐳᖅ.

⁶⁰ ᑎᑭᑎᑦᓯᒃᑲᓐᓂᕈᒫᕆᕗᖅ ᐊᑲᐅᖏᑦᑐᒻᒪᕆᐊᓗᖕᓂᒃ ᐋᓐᓂᐊᓇᕐᑑᓚᐅᕐᑐᓕᒫᓂᒃ ᐄᑦᔨᑉᑎᒥ ᐊᑐᕐᑕᐅᖃᑦᑕᓚᐅᕐᑐᓂᒃ, ᑲᑉᐱᐊᒋᓚᐅᕐᑕᑦᓯᓐᓂᒃ; ᑕᒪᒃᑯᐊᓗ ᐃᓕᑦᓯᓐᓄᑦ ᓂᐱᓐᖓᔪᒫᕐᐳᑦ.

⁶¹ ᐊᒻᒪᑦᑕᐅᖅ ᖃᓂᒻᒪᓰᑦ ᖃᓄᐃᑦᑐᑐᐃᓐᓇᓕᒫᑦ, ᐋᓐᓂᐊᓇᕐᑐᓪᓗ ᐃᓕᑦᓯᓐᓄᑦ ᑎᑭᑎᑕᐅᔪᒫᕐᐳᖅ ᐅᕙᓂ ᐊᒡᓚᖕᓂ ᐅᖃᐅᓯᐅᓯᒪᖏᑦᑐᑦ ᐊᑕᓂᐅᑉ ᐱᖁᔭᖏᓐᓂ, ᓄᖑᑕᐅᓂᓯ ᑎᑭᓪᓗᒍ.

⁶² ᐅᓪᓗᕆᐊᑎᑐᑦ ᕿᓚᖕᒦᑦᑐᑎᑐᑦ ᐅᓄᕐᑎᒋᓕᕋᓗᐊᕈᑦᓯ, ᐃᓕᑦᓯᓐᓂᑦ ᖃᑦᓰᓐᓇᑯᓗᐃᑦ ᐊᓐᓇᒍᒫᕐᐳᑦ, ᐊᑕᓂᖅ ᒎᑎᓯ ᓈᓚᓚᐅᖏᓐᓇᑦᓯᐅᒃ.

⁶³ ᐊᑕᓂᖅ ᑲᑦᓱᖎᕐᓯᒪᓪᓗᓂ ᐃᓕᑦᓯᓐᓂᒃ ᐊᔪᕐᓴᕈᓐᓁᕐᐸᓪᓕᐊᑎᑦᓯᓚᐅᕐᒪᑦ ᐃᓄᒋᐊᒃᓯᕙᓪᓕᐊᑎᑦᓯᓪᓗᓂᓗ, ᑍᒫᒃᑕᐅᖅ ᑲᑦᓱᖎᕐᓯᒪᓗᓂ ᓄᖒᑦᓯᕙᓪᓕᐊᔪᒫᕐᐳᖅ ᓯᖁᒥᑕᐅᕙᓪᓕᐊᑎᑦᓯᓗᓂᓗ. ᓄᓇᒋᔭᑦᓯᓐᓂᓪᓗ ᐊᒧᔭᐅᕙᓪᓕᐊᔪᒫᕐᐳᓯ ᑕᕝᕙᓐᖓᑦ ᓄᓇᑖᕆᓂᐊᓕᕐᑕᑦᓯᓐᓂᑦ.

⁶⁴ “ᐊᑕᓂᐅᑉ ᐃᓅᖃᑎᒌᒡᔪᐊᓄᑦ ᓇᒧᑐᐃᓐᓇᓕᒫᖅ ᓯᐊᒻᒪᕐᑎᑦᓱᒫᕐᐹᓯ, ᓄᓇᕐᔪᐊᑉ ᐃᓱᐊᓂᑦ ᐱᒋᐊᕐᓗᒍ ᐃᓱᐊᓄᑦ ᑎᑭᓪᓗᒍ, ᑕᒪᒃᑯᓇᓂᓗ ᒎᑎᓐᖑᐊᓂᒃ ᑐᒃᓯᐊᕐᕕᖃᕐᑎᑕᐅᔪᒫᕐᐳᓯ ᓴᓇᔭᐅᓯᒪᔪᓂᒃ ᕿᔪᖕᓂᒃ ᐅᔭᕋᖕᓂᒡᓗ, ᐃᓕᑦᓯ ᓯᕗᓕᕕᓂᑦᓯᓗ ᑐᒃᓯᐊᕐᕕᒋᓚᐅᕐᓯᒪᓐᖏᑕᑦᓯᓐᓄᑦ.

⁶⁵ ᑕᒪᒃᑯᓇᓂᓗ ᐃᓅᖃᑎᒌᒡᔪᐊᓃᑎᓪᓗᓯ ᓮᓕᑦᓯᐊᕐᓇᕐᑐᒥᒃ ᓇᓂᓯᔪᒫᓐᖏᓚᓯ, ᓇᖕᒥᓂᕆᔭᕐᓂᒡᓗ ᑍᔭᒃᓴᕐᑕᖃᕈᒫᓐᖏᓚᖅ; ᐊᑕᓂᐅᑉ ᓵᓚᒋᔭᐅᑎᑦᓱᒫᕐᒪᓯ ᐃᓱᒪᔮᕐᓂᕐᒧᑦ, ᓂᕆᐅᒋᔭᒃᓴᖃᖏᓐᓂᕐᒧᑦ, ᓴᐱᓕᕐᓂᕐᒧᓪᓗ.

⁶⁶ ᐃᓅᓯᓯ ᑍᒪᓐᖓᑦ ᓇᓗᓇᕐᑐᒦᑦᓱᒫᕐᐳᑦ; ᐅᓪᓗᒃᑯᑦ ᐅᓐᓄᐊᒃᑯᓪᓗ ᖁᐊᕐᓵᖓᓇᕐᑐᒦᑦᓱᒫᕐᐳᓯ, ᐃᓅᓂᐊᕐᒪᖔᑦᓯ ᓇᓗᓗᓯ.

⁶⁷ ᐅᓪᓛᒃᑯᑦ ᐅᖃᖃᑦᑕᕈᒫᕐᐳᓯ ‘ᐅᓐᓄᓚᐅᕐᒥᓕᑐᖅ!’ ᐅᓐᓄᒃᑯᓪᓗ ᐅᖃᕐᐸᖕᒥᓗᓯ ‘ᐅᓪᓛᓐᖑᓚᐅᕐᒥᓕᑐᖅ’ ᐆᒻᒪᑎᓯ ᑲᑉᐱᐊᓱᒃᑐᐊᓘᔪᒫᕐᒪᑕ, ᑕᑯᔭᓯ ᐱᑦᔪᑎᒋᓗᒋᑦ.

⁶⁸ ᐊᑕᓂᐅᑉ ᐄᑦᔨᑉᑎᒧᑦ ᐅᑎᕐᑎᑦᓱᒫᕐᐹᓯ ᐅᒥᐊᕐᔪᐊᑎᒍᑦ, ᑕᕝᕗᖓ ᓄᓇᒧᑦ ᐅᑎᓚᐅᕐᓯᒫᑦᔮᖏᓐᓂᕋᕐᓗᓯ ᐅᖃᕐᓯᒪᒐᓗᐊᕐᑎᓪᓗᒍ. ᑕᕝᕙᓂᓗ ᐊᑭᕋᑦᓯᓐᓄᑦ ᐃᓕᑦᓯᓐᓂᒃ ᓂᐅᕐᕈᑎᒋᓇᓱᐊᕈᒫᕐᐳᓯ ᓯᐊᓛᕐᑕᕆᔭᐅᔪᒪᓗᓯ, ᓇᓪᓕᐊᓐᓄᓪᓘᓐᓃᓪᓕ ᓂᐅᕕᕐᑕᐅᔪᒪᓛᓐᖏᓚᓯ.”