ᒨᓯᓯ ᑕᓪᓕᒪᖏᑦ 27 - ᐊᒡᓔᑦ ᐃᑦᔪᕐᖕᓁᑦᑐᑦᒎᑎᐅᑉ ᐱᖁᔭᖏᑦ ᐅᔭᕋᒃᑯᑦ ᑎᑎᕋᕐᓯᒪᔪᑦ 1 ᑕᕝᕙ ᒨᓯᓯ, ᐃᓴᕆᐊᓕᒥᐅᑦ ᐊᖓᔪᖅᑳᖏᓐᓂᒃ ᐃᓚᖃᕐᓗᓂ, ᐃᓄᖕᓄᑦ ᐅᖃᕐᐳᑦ, “ᐅᓪᓗᒥ ᐃᓕᑦᓯᓐᓄᑦ ᐱᖁᔭᐅᔪᑦ ᐅᖃᐅᓯᕆᔭᒃᑲ ᓈᓚᒃᑕᒃᓴᕆᕙᓯ. 2 ᔪᐊᕐᑕᓂᐅᑉ ᑰᖓᓂᒃ ᐃᑳᓕᕐᓂᑦᓯ ᐅᓪᓗᖓᓂ ᐊᑕᓂᐅᑉ ᒎᑎᑦᓯ ᑐᓂᔭᖓᓄᑦ ᓄᓇᒧᑦ, ᐅᔭᕋᖕᓂᒃ ᐊᖏᔫᑎᓂᒃ ᓇᑉᐹᕐᓯᔪᒃᓴᐅᕗᓯ, ᖄᖓᒍᑦ ᒥᖑᐊᕐᓗᒋᑦ ᖁᐊᕐᑎᑕᒐᕐᒥᒃ, 3 ᖄᖓᒍᓪᓗ ᑎᑎᕋᕐᕕᒋᔭᒃᓴᕆᕙᓯ ᐱᖁᔭᓕᒫᓂᒃ, ᐊᔪᕆᕐᑐᐃᑦᔪᑎᐅᔪᓂᒡᓗ. ᓄᓇᒧᑦ ᐊᔪᕐᓴᕐᓇᖏᑦᑐᒧᑦ ᓂᕿᒃᓴᖃᑦᓯᐊᕐᑐᒧᓪᓗ ᐃᑎᓕᕈᑦᓯ ᐊᑕᓂᐅᑉ ᒎᑎᑦᓯ ᑐᓂᔭᖓᓄᑦ, ᐃᓕᑦᓯᓐᓄᑦ, 4 ᔪᐊᕐᑕᓂᐅᓪᓕ ᑰᖓᑕ ᐊᑭᐊᓄᑦ ᐃᑳᕐᓯᒪᓕᕈᑦᓯ, ᐅᔭᕅᑦ ᑖᒃᑯᐊ ᓇᑉᐸᕐᑎᑕᒃᓴᕆᕙᓯ ᖃᖅᑲᒥ ᐄᐸᐅᓪᒥ, ᑖᒃᑯᐊ ᐅᓪᓗᒥ ᐃᓕᑦᓯᓐᓄᑦ ᐊᑐᕐᑕᐅᖁᓪᓗᒋᑦ ᐅᖃᐅᓯᕆᔭᒃᑲ, ᒥᖑᐊᕐᓗᒋᓪᓗ ᖁᐊᕐᑎᑕᒐᕐᒧᑦ. 5 ᑕᕝᕙᓂ ᑐᓂᕐᕈᓯᕐᕕᖕᒥᒃ ᐋᑭᒃᓱᐃᔪᒃᓴᐅᕗᓯ ᐊᑕᓂᕐᒧᑦ ᒎᑎᑦᓯᓐᓄᑦ, ᐅᔭᕋᖕᓂᒃ ᓴᓇᕐᕈᑎᓄᑦ ᓴᕕᕋᔭᖕᓄᑦ ᐋᖅᑭᒃᓱᕐᓯᒪᖏᑦᑐᓂᒃ, 6 ᑐᓂᕐᕈᓯᕐᕕᖕᒥᒃ ᐋᖅᑭᒃᓱᐃᓂᐊᕈᑦᓯ ᐊᑕᓂᕐᒧᑦ ᒎᑎᑦᓯᓐᓄᑦ ᐋᖅᑭᒃᓱᕐᓯᒪᔪᒃᓴᐅᖕᒪᑕ ᐅᔭᕋᖕᓄᑦ ᐃᓚᓐᖔᑎᕐᓯᒪᖏᑦᑐᓄᑦ. ᑕᕝᕙᓂᓗ ᑐᓂᕐᕈᓯᕐᕕᖕᒥ ᑐᓂᕐᕈᓯᕐᑐᒃᓴᐅᕗᓯ ᑐᖁᑕᒃᓴᓂᒃ ᐃᑯᐊᓚᑕᐅᔪᒃᓴᓂᒡᓗ, 7 ᑕᕝᕙᓂᓗ ᑐᓂᕐᕈᓯᕐᑐᒃᓴᐅᕗᓯ ᓂᕆᓗᒋᓪᓗ ᑐᓂᕐᕈᑎᒋᓯᒪᔭᓯ ᐃᓚᒌᖕᓂᕐᒧᑦ ᑐᓂᕐᕈᓯᕈᑎᐅᔪᑦ ᖁᔭᓕᓗᓯᓗ ᐊᑕᓂᐅᑉ ᒎᑎᑦᓯ ᓵᖓᓂ. 8 ᐅᔭᕋᖕᓂ ᖁᐊᕐᑎᑕᒐᕐᓂᒃ ᖄᓕᕐᓯᒪᔪᑎᒍᑦ ᑎᑎᕋᕐᑕᒃᓴᕆᕙᓯ ᑕᕐᓴᐅᑦᓯᐊᕐᓗᒋᑦ ᒎᑎᐅᑉ ᐱᖁᔭᓕᒫᖏᑦ.” 9 ᑕᕝᕙ ᒨᓯᓯ, ᐃᓚᖃᕐᓗᓂ ᓕᕔᑎᒃᑯᓐᓂᒃ ᑐᓂᕐᕈᓯᕐᑎᑦᓯᔨᓂᒃ, ᐅᖃᓕᕐᐳᖅ ᐃᓴᕆᐊᓕᒥᐅᓕᒫᓄᑦ, “ᓈᓚᒃᑕᐅᑬᓐᓇᓚᐅᕐᓚᖓ ᐃᓴᕆᐊᓕᒥᐅᖑᔪᓯ, ᓂᐱᖃᖏᑦᓯᐊᕐᓗᓯᓗ. ᐅᓪᓗᒥ ᐊᑕᓂᐅᑉ ᒎᑎᑦᓯ ᐃᓄᖁᑎᑖᕆᕚᓯ; 10 ᑍᒤᒻᒪᑦ ᑖᓐᓇ ᓈᓚᒃᑕᒃᓴᕆᕙᓯ ᐱᖁᔭᓕᒫᖏᓪᓗ ᒪᓕᒐᒃᓴᐅᖁᔭᖏᓪᓗ ᒪᓕᑦᓯᐊᕐᓗᒋᑦ, ᐅᓪᓗᒥ ᐃᓕᑦᓯᓐᓄᑦ ᑐᓂᔭᒃᑲ.” ᓈᓚᖏᑦᑑᑉ ᓱᒋᐊᕐᑕᒃᓴᐅᑎᑕᐅᓂᖓ 11 ᑕᕝᕙ ᒨᓯᓯ ᐃᓴᕆᐊᓕᒥᐅᓄᑦ ᐅᖃᓕᕐᐳᖅ, 12 “ᑰᖕᒥᒃ ᔪᐊᕐᑕᓂᒥᒃ ᐃᑳᕐᓯᒪᓕᕈᑦᓯ, ᐅᑯᐊ ᑭᖑᕚᕇᑦ ᑭᖑᓕᕇᒡᓗᑎᒃ ᖃᖅᑲᒥ ᒋᕆᔨᒦᑦᑐᒃᓴᐅᕗᑦ ᐃᓄᐃᑦ ᓮᒻᒪᕐᑎᑕᐅᓕᕐᑎᓪᓗᒋᑦ: ᓯᒥᐅᓂᒃᑯᑦ, ᓕᕔᒃᑯᑦ, ᔫᑕᒃᑯᑦ, ᐃᓴᑳᕆᒃᑯᑦ, ᔫᓯᐱᒃᑯᑦ, ᐱᓐᔭᒥᓂᒃᑯᓪᓗ. 13 ᐅᑯᐊᓕ ᑭᖑᕚᕇᑦ ᖃᖅᑲᒥ ᐄᐸᐅᓪᒦᑦᑐᒃᓴᐅᕗᑦ ᓱᒋᐊᕐᑕᐅᔪᒃᓴᐅᔪᓂᒃ ᐅᖃᕐᑐᖃᓕᕐᑎᓪᓗᒍ: ᕉᐱᓂᒃᑯᑦ, ᒑᑦᑯᑦ, ᐋᓱᕆᒃᑯᑦ, ᓯᐳᓗᓂᒃᑯᑦ, ᑖᓐᑯᑦ, ᓈᑉᑕᓕᒃᑯᓪᓗ. 14 ᓕᕔᑎᓪᓗ ᐅᑯᓂᖓ ᐅᖃᐅᓯᕐᓂᒃ ᐅᖃᕐᑐᒃᓴᐅᕗᑦ ᓂᐱᖅᑯᕐᑐᓗᑎᒃ: 15 “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐅᔭᕋᖕᓂᒃ ᒎᑎᓐᖑᐊᓕᐅᕐᑐᖅ, ᕿᔪᖕᓂᒡᓘᓐᓃᑦ, ᓴᕕᕋᔭᖕᓂᒡᓘᓐᓃᑦ ᐊᑕᓂᐅᑉ ᐆᒥᒋᔭᖓᓂᒃ, ᓴᓇᔨᐅᑉ ᓴᓇᔭᖓ, ᐃᔨᕋᕐᑐᕐᓗᓂ ᐃᓂᒃᓴᖓᓄᓪᓗ ᓇᑉᐸᕐᑎᓪᓗᒍ.’ “ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’ 16 “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐊᑖᑕᒥᖕᓂᒃ ᐊᓈᓇᒥᖕᓂᒡᓗ ᐅᐱᓐᓇᕈᓐᓃᕐᑎᑦᓯᔪᖅ.’ “ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’ 17 “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐃᓅᖃᑎᖓᑕ ᓄᓇᖁᑎᖓᑕ ᑭᒡᓕᖓᑕ ᓇᓗᓁᒃᑯᑕᖓᓂᒃ ᐲᕐᓯᔪᖅ.’ “ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’ 18 “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐊᖑᒻᒥᒃ ᑕᐅᑐᖏᑦᑐᒥᒃ ᑕᒻᒪᕐᑎᑦᓯᔪᖅ.’ “ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’ 19 “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐊᑦᔨᒌᒃᑎᑦᓯᓂᕐᒥᒃ ᐊᑐᖏᑦᑐᖅ ᐱᑦᓯᐊᕐᑕᐅᔭᕆᐊᖃᕐᓂᖏᓐᓂᒃ ᓄᓇᓕᑐᖃᐅᖏᑦᑐᑦ, ᐃᓕᐊᕐᔪᐃᑦ, ᐅᐃᒡᒐᕐᓃᓪᓗ.’ “ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’ 20 “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐊᑖᑕᒥᓂᒃ ᑲᓐᖑᓇᕐᑐᒦᑎᑦᓯᔪᖅ ᐃᓐᓇᖓᖃᑎᖃᕐᓂᕐᒥᓄᑦ ᐊᑖᑕᖓᑕ ᓄᓕᐊᖓᑦᑕ ᐃᓚᖓᓐᓂᒃ.’ “ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’ 21 “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᓂᕐᔪᑎᒥᒃ ᓄᓕᐊᕐᑐᖅ.’ “ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’ 22 “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᓇᔭᖕᒥᓂᒃ ᐃᓐᓇᖓᖃᑎᖃᕐᑐᖅ, ᐊᑖᑕᖓᑕ ᐸᓂᖓᓂᒡᓘᓐᓃᑦ ᐊᓈᓇᖓᑕ ᐸᓂᖓᓂᒡᓘᓐᓃᑦ.’ “ᑕᕝᕙ ᐃᓄᐃᑦ ᑕᒪᕐᒥᒃ ᑭᐅᔪᒃᓴᐅᕗᑦ, ‘ᐋᒦᓐ!’ 23 “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐃᓐᓇᖓᖃᑎᖃᕐᑐᖅ ᓴᑭᒥᓂᒃ ᐊᕐᓇᒥᒃ.’ “ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’ 24 “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᐃᔨᕋᕐᑐᕐᓗᓂ ᐃᓄᐊᕐᑐᖅ.’ “ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’ 25 “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᑮᓇᐅᔭᓂᒃ ᐊᑭᓕᕐᑕᐅᔪᒪᓂᕐᒧᑦ ᐸᓯᔭᒃᓴᐅᖏᑦᑐᒥᒃ ᐃᓄᐊᕐᑎᑕᐅᔪᖅ.’ “ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’ 26 “‘ᒎᑎᐅᑉ ᓱᒋᐊᕐᑕᒃᓴᕆᕚ ᓇᓪᓕᐊᑦ ᒎᑎᐅᑉ ᐱᖁᔭᖏᓐᓂᒃ ᓈᓚᖏᑦᑐᖅ ᐊᔪᕆᕐᑐᐃᑦᔪᑎᖏᓐᓂᒡᓗ.’ “ᑕᕝᕙ ᐃᓄᓕᒫᑦ ᑭᐅᔪᒃᓴᐅᕗᑦ, ‘ᐋᒦᓐ!’” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society