ᒨᓯᓯ ᑕᓪᓕᒪᖏᑦ 26 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᕈᕐᑐᕕᓂᕐᓂᒃ ᑲᑎᑕᕕᓂᕐᓂᒃ ᑐᓂᕐᕈᑎᖃᕐᓂᖅ

¹ “ᓄᓇᑖᕐᓯᒪᓕᕈᑦᓯᓕ ᐊᑕᓂᐅᑉ ᒎᑎᑦᓯ ᐃᓕᑦᓯᓐᓄᑦ ᑐᓂᔭᖓᓂᒃ ᑕᕝᕙᓂᓗ ᐃᓂᓪᓚᑦᓯᐊᕐᓯᒪᓕᕈᑦᓯ,

² ᑕᕝᕙᓂ ᓯᕗᓪᓕᕐᐹᒥᒃ ᐱᕈᕐᑎᑕᑦᓯᓐᓂ ᐊᑕᓂᐅᑉ ᒎᑎᑦᓯ ᑐᓂᔭᖓᓂᒃ ᐃᓕᑦᓯᓐᓄᑦ, ᑲᑎᑦᓯᓯᒋᐊᕈᑦᓯ ᐊᑐᓂᑦ ᐃᕕᐅᔭᕐᓂᒃ ᐴᒃᓴᑦᓯᓐᓂᒃ ᓇᒃᓴᕐᑐᒃᓴᐅᕗᓯ ᑖᒃᑯᐊᓗ ᓯᕗᓪᓖᕐᐹᒥᒃ ᐲᔭᕐᑕᑎᑦ ᑐᓂᕐᕈᑎᒋᔭᒃᓴᕆᕙᑎᑦ ᑐᒃᓯᐊᕐᕕᖕᒧᑦ.

³ ᑕᒪᓐᓇ ᓇᓪᓕᐅᑎᓯᒪᓕᕐᑎᓪᓗᒍ ᑐᓂᕐᕈᓯᕐᑎᑦᓯᔨᒧᑦ ᐂᔪᒃᓴᐅᕗᓯ ᐅᖃᐅᑎᓗᒍᓗ, ‘ᒫᓐᓇ ᓇᓗᓁᕐᓯᓕᕐᐳᖓ ᐊᑕᓂᕐᒧᑦ ᒎᑎᑦᑎᓐᓄᑦ ᓄᓇᑖᕐᓯᒪᓕᕋᒪ ᓯᕗᓕᕕᓂᑦᑎᓐᓄᑦ ᐅᖃᕕᒃᓱᓂ ᐅᕙᑦᑎᓐᓄᑦ ᑐᓂᔪᒪᓚᐅᕐᑕᖓᓄᑦ.’

⁴ “ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᐃᕕᐅᔭᖅ ᐃᓕᖕᓂᑦ ᑎᒍᓗᓂᐅᒃ ᑐᓂᕐᕈᓯᕐᕕᖕᒧᑦ ᐃᓕᔭᒃᓴᕆᕚ ᑐᓂᕐᕈᑕᐅᖁᓪᓗᒍ ᐊᑕᓂᕐᒧᑦ ᒎᑎᑦᓯᓐᓄᑦ.

⁵ ᑕᕝᕙ ᐊᑕᓂᐅᑉ ᓵᖓᓂ ᐅᖃᐅᓯᖃᕐᑐᒃᓴᐅᕗᑎᑦ ᐃᒤᑦᑐᓂᒃ; ‘ᐊᕋᒥᐊᒥᐅᑕᕐᒥᒃ ᓯᕗᓕᖃᓚᐅᕐᐳᖓ ᑍᒪᓐᖓᑦ ᐃᖏᕐᕋᖃᑦᑕᓚᐅᕐᑐᒥᒃ, ᑖᑦᓱᒪ ᐃᓚᓂ ᐄᑦᔨᑉᑎᒧᐊᕈᑎᓚᐅᕐᐰᑦ ᑕᕝᕙᓂ ᓄᓇᖃᖁᓪᓗᒋᑦ; ᖃᑦᓰᓐᓇᐅᓪᓗᑎᒃ ᑕᕝᕗᓐᖓᓚᐅᕐᐳᑦ; ᑕᕝᕙᓂᓕ ᐅᓄᕐᓯᓚᐅᕐᐳᑦ ᐊᔪᖏᑦᑐᕐᔪᐊᖑᓕᕐᓗᑎᒃ, ᐃᓅᖃᑎᒌᒡᔪᐊᖑᓕᕐᓗᑎᒡᓗ.

⁶ ᑕᕝᕙᓂ ᐄᑦᔨᑉᑎᒥᐅᓂᑦ ᐱᑦᓯᐊᕐᑕᐅᓚᐅᓐᖏᓚᒍᑦ, ᓱᒃᑯᔨᐊᕆᔭᐅᓪᓗᑕ ᓴᓇᑎᑕᐅᓚᐅᕐᐳᒍᑦ ᐅᖁᒤᑦᑐᓂᒃ ᐱᓇᓱᐊᕐᑎᑕᐅᓪᓗᑕ.

⁷ ᐊᑕᓂᕐᒧᓪᓕ ᐊᒃᓱᕈᕐᓗᑕ ᐃᑲᔪᕐᑕᐅᔪᒪᓪᓗᑕ ᑐᒃᓯᐊᓚᐅᕐᐳᒍᑦ, ᓯᕗᓕᕕᓂᑦᑕ ᒎᑎᖓᓄᑦ, ᑖᑦᓱᒪᓗ ᑐᓴᓚᐅᕐᐹᑎᒍᑦ, ᐊᒃᓱᕈᕐᑎᑕᐅᓂᕗᓪᓗ ᑕᑯᓚᐅᕐᐹ, ᐅᑯᒤᒃᓴᕐᑎᑕᐅᓂᕗᑦ, ᐱᑦᓯᐊᕐᑕᐅᖏᓐᓂᕗᓪᓗ,

⁸ ᑖᑦᓱᒪᓕ ᐱᔪᓐᓇᕐᓂᕐᔪᐊᒥᓄᑦ ᓲᖑᓂᕐᒥᓄᓪᓗ ᐊᐅᓪᓚᕐᑎᓚᐅᕐᐹᑎᒍᑦ ᐄᑦᔨᑉᑎᒥᑦ, ᑲᒪᓇᕐᑐᑎᒍᑦ ᓇᓗᓁᒃᑯᑕᕐᑎᒍᓪᓗ ᐱᓇᓱᐊᕐᓗᓂ, ᑕᐰᕐᓇᕐᑐᓂᒡᓗ ᐊᑐᕐᓗᓂ.

⁹ ᑖᑦᓱᒪ ᑕᒪᐅᖓ ᑎᑭᑎᓚᐅᕐᐹᑎᒍᑦ ᑐᓂᓯᕕᒋᓪᓗᑕᓗ ᓄᓇᒥᒃ ᐊᔪᕐᓴᕐᓇᖏᑦᑐᒥᒃ ᓂᕿᒃᓴᖃᑦᓯᐊᕐᑐᒥᒡᓗ.

¹⁰ ᑕᑯᒋᓪᓗ, ᒫᓐᓇ ᐊᑕᓂᕐᒧᑦ ᕾᑦᓯᕗᖓ ᐅᕙᓐᓄᑦ ᑐᓂᓯᒪᔭᖓᑕ ᓄᓇᐅᑉ ᓯᕗᓪᓕᕐᐹᒥᒃ ᐱᕈᕐᑐᕕᓂᖏᓐᓂᒃ.’ “ᑕᕝᕙ ᐃᕕᐅᔭᖅ ᐴᕆᔧᑦ ᐃᓕᓗᒍ ᐊᑕᓂᐅᑉ ᒎᑎᕕᑦ ᓵᖓᓄᑦ, ᑕᕝᕙᓂ ᐅᐱᒋᓗᒍ ᑐᒃᓯᐊᕐᕕᒋᔭᒃᓴᕆᕙᑦ ᐊᑕᓂᖅ ᒎᑏᑦ.

¹¹ ᐊᑕᓂᕐᒧᑦ ᒎᑎᖕᓄᑦ ᖁᔭᓕᔪᒃᓴᐅᕗᓯ ᐱᐅᔪᓂᒃ ᐊᑕᓂᐅᑉ ᒎᑎᑦᓯ ᑐᓂᓯᕕᒋᖕᒪᓯ ᐃᓚᑎᓪᓗ, ᑕᕝᕙ ᖁᕕᐊᓱᖃᑎᒌᒃᑐᒃᓴᐅᕗᓯ ᓕᕔᑎᓪᓗ ᓄᓇᖃᕐᑐᑐᖃᐅᖏᑦᑐᓪᓗ ᑕᕝᕙᓂ ᓄᓇᖅᑲᑎᒋᔭᓯ ᐃᓚᒋᓗᒋᑦ.

¹² “ᐊᕐᕌᒍᑦ ᐱᖓᓱᑦ ᓈᔭᕌᖓᑕ ᑕᒫᑦ ᓂᐊᖂᔭᒃᓴᓂᒃ ᐱᕈᕐᑎᑕᕕᓂᕐᓯ ᑕᓪᓕᒪᐅᔪᖏᓐᓂᒃ ᑐᓂᓯᖃᑦᑕᕐᑐᒃᓴᐅᕗᓯ, ᓕᕔᑎᒃᑯᓐᓄᑦ, ᓄᓇᖃᕐᑐᑐᖃᐅᖏᑦᑐᓄᓪᓗ, ᐃᓕᐊᕐᔪᖕᓄᓪᓗ, ᐅᐃᒡᒐᕐᓂᕐᓄᓪᓗ, ᓄᓇᓕᓕᒫᓂ ᓂᕆᔪᒪᔭᓕᒫᒥᖕᓂᒃ ᓂᕿᒃᓴᕐᑕᖃᑦᓯᐊᖁᓪᓗᒍ. ᑍᒤᓕᐅᕇᕈᑦᓯᓕ,

¹³ ᐊᑕᓂᕐᒧᑦ ᒎᑎᑦᓯᓐᓄᑦ ᐅᖃᕐᑐᒃᓴᐅᕗᓯ, ‘ᑕᓪᓕᒪᐅᔪᐃᕈᑎᒃᓴᓐᓂᒃ ᐃᑦᔪᕐᓁᑦᑐᓂᒃ ᐃᒡᓗᓐᓂ ᐊᒥᐊᒃᑯᓯᒪᔪᓐᓁᕐᐳᖓ; ᑕᒪᕐᒥᒃ ᑐᓂᓯᒪᕙᒃᑲ ᓕᕔᑎᓄᑦ, ᓄᓇᖃᕐᑐᑐᖃᐅᖏᑦᑐᓄᑦ, ᐃᓕᐊᕐᔪᖕᓄᑦ, ᐅᐃᒡᒐᕐᓂᕐᓄᓪᓗ, ᑕᒪᑐᒥᖓ ᐅᕙᑦᑎᓐᓄᑦ ᐱᖁᔭᓕᐊᕆᓯᒪᔭᓕᒫᕐᓂᒃ. ᓈᓚᖏᑦᑑᓯᒪᓐᖏᓚᖓ ᐳᐃᒍᕐᓯᒪᓇᖓᓗ ᐱᖁᔨᑦᔪᑎᒋᓯᒪᔭᕐᓂᒃ ᑕᓪᓕᒪᐅᔪᐃᕐᓂᖅ ᐱᑦᔪᑎᒋᓪᓗᒍ.

¹⁴ ᓂᕆᓚᐅᓐᖏᓚᖓ ᑕᓪᓕᒪᐅᔪᐃᕈᑎᒃᓴᓐᓂᒃ ᐃᓚᓐᖓᕋᑖᕐᓯᒪᓂᕐᒧᑦ ᕿᒃᓵᒃᑎᓪᓗᖓ; ᐃᒡᓗᓐᓂᓪᓗ ᐊᓐᓂᑦᔨᓚᐅᓐᖏᓚᖓ ᐅᒃᐱᕐᓂᒃᑯᑦ ᓴᓗᒤᓕᓯᒪᓂᕋᕐᑕᐅᑎᓪᓗᖓ; ᑐᓂᕐᕈᑎᖃᓚᐅᕐᓇᖓᓗ ᑖᒃᑯᐊ ᐃᓚᖏᓐᓂᒃ ᑐᖁᖓᔪᓄᑦ, ᐊᑕᓃᖅ, ᓈᓚᑦᓯᐊᓚᐅᕐᐸᒋᑦ ᐱᖁᔨᑦᔪᑎᒋᓯᒪᔭᓕᒫᑎᑦ ᐅᕙᓐᓄᑦ ᐊᑐᕐᓯᒪᕙᒃᑲ ᑕᓪᓕᒪᐅᔪᐃᕐᓂᕐᒧᑦ.

¹⁵ ᕿᓚᖕᒥᑦ ᐃᓂᒋᔭᕐᓂᑦ ᐃᑦᔪᕐᓁᑦᑐᒥᑦ ᑕᑯᓴᓚᐅᕆᑦ, ᐃᓄᖁᑎᑎᓪᓗ ᐃᓴᕆᐊᓕᒥᐅᑦ ᓮᒻᒪᕐᑎᓪᓗᒋᑦ ᓄᓇᓗ ᓯᕗᓕᕕᓂᑦᑎᓐᓄᑦ ᐊᖏᕈᑎᒋᓯᒪᔧᑦ, ᐊᔪᕐᓴᕐᓇᖏᑦᑐᖅ ᓂᕿᒃᓴᖃᑦᓯᐊᕐᑐᕐᓗ ᓮᒻᒪᕐᑎᓚᐅᕈᒃ ᐅᕙᑦᑎᓐᓄᑦ ᑐᓂᓚᐅᕐᑍᑦ.’”

ᐊᑕᓂᐅᑉ ᓇᖕᒥᓂᖅ ᐃᓄᖁᑎᖏᑦ

¹⁶ “ᐅᓪᓗᒥ ᐊᑕᓂᐅᑉ ᒎᑎᑦᓯ ᐱᖁᕚᓯ ᓈᓚᖁᓪᓗᓯ ᐱᖁᔨᑦᔪᑎᓕᒫᖏᓐᓂᒃ; ᑍᒤᒻᒪᑦ ᓈᓚᒃᑕᒃᓴᕆᕙᓯ ᓱᖁᓯᔪᐃᑦᑑᓗᓯ ᐆᒻᒪᒻᒧᑦ ᐃᓗᐃᑦᑐᒧᑦ ᑕᕐᓂᕐᓄᓪᓗ ᐃᓗᐃᑦᑐᒧᑦ.

¹⁷ ᐅᓪᓗᒥ ᓇᓗᓁᕐᓯᓯᒪᖓᑦᓯ ᐊᑕᓂᕐᒥᒃ ᒎᑎᖃᕐᓂᑦᓯᓐᓂᒃ; ᐊᖏᕐᕕᒋᓯᒪᓪᓗᒍᓗ ᓈᓚᖕᓂᐊᕐᓂᕋᕐᓗᒍ, ᐱᖁᔭᓕᒫᖏᓪᓗ ᒪᓕᖕᓂᐊᕐᓂᕋᕐᓗᒋᑦ, ᐱᖁᔨᑦᔪᑎᒋᓯᒪᔭᓕᒫᖏᓪᓗ ᐊᑐᕐᓂᐊᕐᓂᕋᕐᓗᒋᑦ.

¹⁸ ᐅᓪᓗᒥ ᐊᑕᓂᐅᑉ ᐃᓚᓕᐅᓕᕐᐹᓯ ᓇᖕᒥᓂᖅ ᐃᓄᖁᑎᒋᔪᒪᓪᓗᓯ, ᑕᒪᑐᒥᖓ ᐊᖏᕐᕕᒋᓯᒪᖕᒪᓯ, ᑖᑦᓱᒪᓗ ᐱᖁᕚᓯ ᐱᖁᔭᖏᓐᓂᒃ ᑕᒤᓐᓂᒃ ᒪᓕᖁᓪᓗᓯ.

¹⁹ ᐱᓐᖑᕐᑎᓯᒪᔭᓕᒫᒥᓂᓪᓗ ᐃᓅᖃᑎᒌᒡᔪᐊᓕᒫᓂᑦ ᐊᔪᖏᓐᓂᕐᓴᐅᑎᓐᓂᐊᕐᐹᓯ, ᑖᓐᓇᓗ ᓂᕐᑐᕐᓇᕐᓯᑎᓐᓂᐊᕐᐸᓯ ᐊᑎᖓᓗ ᐅᐱᓐᓇᕐᓯᑎᓪᓗᒍ. ᑖᑦᓱᒪᓗ ᓇᖕᒥᓂᕆᓗᓂᓯ ᐃᓄᖁᑎᒋᓂᐊᕐᐹᓯ, ᑕᒪᓐᓇ ᐊᖏᕈᑎᒋᓯᒪᖕᒪᒍ.”