ᒨᓯᓯ ᑕᓪᓕᒪᖏᑦ 25 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᐃᓅᒃ ᒪᕐᕉᒃ ᐃᖅᑲᕐᑐᐃᕕᖕᒧᐊᕋᔭᕐᐸᑎᒃ ᐊᑲᐅᖏᑦᔪᑎᒋᔭᒥᖕᓂᒃ ᐋᖅᑭᒃᑕᐅᖁᔨᓗᑎᒃ, ᐃᖅᑲᕐᑐᐃᔨᐅᑉ ᐃᓱᒪᓕᐅᕈᑎᒃᐸᒋᒃ, ᐂᑉᐸᖓ ᐸᓯᔭᒃᓴᐅᖏᓐᓂᕋᕐᓗᒍ ᐂᑉᐸᖓᓗ ᐸᓯᔭᒃᓴᐅᓂᕋᕐᓗᒍ.

² ᐸᓯᔭᒃᓴᐅᔪᕐᓕ ᓇᓗᓁᕐᑕᐅᒃᐸᑦ ᑏᒐᕐᑐᕐᑕᐅᑦᔪᑎᒃᓴᖃᕐᐸᑦ, ᑕᕝᕙ ᐃᖅᑲᕐᑐᐃᔨᐅᑉ ᐹᒻᒪᒃᑎᑕᐅᖁᔭᒃᓴᕆᕚ ᑏᒐᕐᑐᕐᑕᐅᖁᓗᒍ, ᑏᒐᕐᑐᕐᑕᐅᓂᖓᑕᓕ ᐅᓄᕐᑐᐃᕐᓱᑕᐅᔭᕆᐊᖃᕐᓂᖓ ᓇᓗᓁᕐᑕᐅᒐᔭᕐᐳᖅ ᐱᑦᓯᐊᓐᖏᓯᒪᓂᖓ ᒪᓕᒡᓗᒍ.

³ ᑏᒐᕐᑐᕐᑕᐅᔪᒃᓴᐅᕗᖅ 40ᕕᒡᓗᓂ, ᐅᖓᑖᓅᖏᑦᑐᖅ; ᐃᓚᖓᑦᑕᓕ ᐅᓄᕐᓂᕐᓴᓂᒃ ᑏᒐᕐᑐᕐᐸᒍ ᐱᖁᔭᐅᔫᑉ ᐅᖓᑖᓄᑦ, ᑕᕝᕙ ᐃᓅᖃᑎᓯ ᒥᑭᒡᓕᑎᕐᑕᐅᒐᔭᕐᐳᖅ ᑕᑯᓐᓇᕐᑎᓪᓗᓯ.

⁴ “ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᐃᑦᔭᕈᓰᔪᒃᓴᐅᓐᖏᓚᑎᑦ ᓂᐊᖂᔭᒃᓴᓂᒃ ᐱᕈᕐᓰᕕᖁᑎᕕᑦ ᓄᓇᖓᓂᒃ ᐱᓇᓱᐊᕈᑎᒋᔭᕐᓂᒃ.”

ᖃᑕᓐᖑᑏᑦ ᑐᖁᒃᐸᑦ ᖃᓄᐃᓕᐅᕆᐊᖃᕐᒪᖔᕐᐱᑦ

⁵ “ᖃᑕᓐᖑᑎᒌᖕᓂᒃ ᑲᑎᒪᓗᑎᒃ ᓄᓇᖅᑲᕐᑐᖃᕐᐸᑦ ᖃᑕᓐᖑᑎᖓᓗ ᑐᖁᒃᐸᑦ, ᐃᕐᓂᖃᕋᓂ, ᑕᕝᕙ ᑖᑦᓱᒪ ᑐᖁᔫᑉ ᓄᓕᐊᕕᓂᖓ ᒫᓐᖓᑐᐃᓐᓇᖅ ᐅᐃᓂᒃᑐᒃᓴᐅᓐᖏᓚᖅ; ᑐᖁᔫᓪᓕ ᖃᑕᓐᖑᑎᖓ ᑖᑦᓱᒥᖓ ᓄᓕᐊᓂᒋᐊᖃᕐᐳᖅ ᖃᑕᓐᖑᑎᓂ ᐱᔭᒃᓴᖓᓂᒃ ᐃᓇᖏᕐᓗᒍ.

⁶ ᐃᕐᓂᕐᑖᕈᑎᒡᓗ ᓯᕗᓪᓕᕐᐹᒥᒃ ᑐᖁᓯᒪᔫᑉ ᐃᕐᓂᖓᓂᒃ ᑍᔭᐅᔪᒃᓴᐅᕗᖅ ᐊᑎᖃᐅᑎᒋᓕᕐᓗᓂᐅᒡᓗ, ᑖᒃᑯᐊ ᑭᖑᕚᕆᖕᓂᖏᑕ ᐊᑎᖏᑦ ᓄᖑᑐᐃᓐᓇᖁᓇᒋᑦ ᐃᓴᕆᐊᓕᒥᐅᓂ.

⁷ ᑐᖁᓚᐅᕐᑑᓪᓕ ᓄᑲᖓ ᐂᒥᓂᒃ ᓄᓕᐊᓂᒍᒪᖏᑉᐸᑦ, ᑕᕝᕙ ᐊᕐᓇᖅ ᓄᓇᓕᖕᓂ ᐊᖓᔪᖅᑳᓄᑦ ᐅᐸᒍᑎᔪᒃᓴᐅᕗᖅ ᐅᖃᐅᑎᓗᒋᓪᓗ, ‘ᐅᐃᒋᓚᐅᕐᑕᒪ ᓄᑲᖓ ᐱᔭᒃᓴᕆᔭᒥᓂᒃ ᑲᔪᓯᑎᑦᓯᔪᒪᖏᒻᒪᑦ; ᐊᖓᔪᒋᓚᐅᕐᑕᓂᓗ ᑭᖑᕚᒃᓴᓕᐅᕈᒪᓇᓂᐅᒃ ᐃᓴᕆᐊᓕᒥᐅᑦ ᑭᖑᕚᕇᖕᓂᖏᑎᒍᑦ.’

⁸ ᑕᕝᕙ ᓄᓇᓕᖕᓂ ᐊᖓᔪᖅᑳᑦ ᐊᖑᑦ ᕾᖁᓗᒍ ᐅᖃᐅᑎᔭᒃᓴᕆᕚᑦ. ᓱᓕᓕ ᐂᒥᓂᒃ ᓄᓕᐊᓂᒍᒪᖏᑉᐸᑦ,

⁹ ᑕᕝᕙ ᐊᕐᓇᐅᑉ ᐂᓂ ᐅᐸᒃᑕᒃᓴᕆᕚ ᓄᓇᓕᖕᓂ ᐊᖓᔪᖅᑳᑦ ᑕᑯᓐᓇᕐᑎᓪᓗᒋᑦ, ᐊᖑᑎᐅᓪᓗ ᐃᑎᒐᒍᑎᖓᑕ ᐃᒡᓗᐊ ᐲᕐᓗᓂᐅᒃ, ᑮᓇᖓᑦ ᑎᕝᕗᐊᕐᕕᒋᔭᒃᓴᕆᕚ, ᐅᖃᕐᓗᓂᓗ, ‘ᐊᖑᑦ ᑍᒤᓕᐅᕐᑕᐅᔪᒃᓴᐅᕗᖅ ᐊᖓᔪᒥᓂᒃ ᑭᖑᕚᒃᓴᓕᐅᕈᒪᖏᑦᑐᖅ.’

¹⁰ ᑭᖑᕚᖏᓪᓗ ᐃᓴᕆᐊᓕᒥᐅᓂᑦ ᖃᐅᔨᒪᔭᐅᔪᒃᓴᐅᓕᕐᓗᑎᒃ ᑍᒎᓯᕐᑕᖃᓕᕐᓗᑎᒡᓗ ‘ᐊᖑᑎᐅᑉ ᑭᖑᕚᖏᑦ ᐃᑎᒐᒍᑎᖏᓐᓂᒃ ᐲᕐᓯᕕᐅᓯᒪᔪᑦ.’”

ᐱᖁᔧᑦᑕᐅᖅ ᐊᓯᖏᑦ

¹¹ “ᐊᖑᑏᖕᓂᒃ ᒪᕐᕉᖕᓂᒃ ᐃᒻᒥᖕᓄᑦ ᐹᔪᖃᕐᐸᑦ ᐊᖑᑎᐅᓪᓗ ᐂᑉᐸᖓᑕ ᓄᓕᐊᖓ ᐅᐃᒥᓂᒃ ᓴᐳᑦᔨᓇᓱᒡᓗᓂ ᐊᖑᑎᐅᑉ ᐋᓐᓂᕐᓯᕆᔫᑉ ᐅᓱᖓᓂᒃ ᑎᒍᓯᒃᐸᑦ,

¹² ᐊᖑᑎᐅᑉ ᓂᑲᒋᑐᐃᓐᓇᖏᓪᓗᓂᐅᒃ; ᐊᕐᓇᐅᑉ ᐊᒡᒐᖏᑦ ᓇᑲᑕᒃᓴᕆᕔᑦ.

¹³ “ᐃᒃᐱᐊᕐᔫᑉ ᐅᖁᒤᓐᓂᕐᓯᐅᑎᖓᓂᒃ ᓱᓕᖏᑦᑐᒧᑦ ᐅᖁᒤᓐᓂᕐᓯᐅᕆᔪᒃᓴᐅᓐᖏᓚᑎᑦ.

¹⁴ ᐆᒃᑑᑎᐅᓪᓗ ᐆᒃᑐᕋᐅᑎᐅᓂᖓᓂᒃ ᓱᓕᖏᑦᑐᒥᒃ ᐆᒃᑑᕋᐅᑎᖃᕐᑐᒃᓴᐅᓐᖏᓚᑎᑦ.

¹⁵ ᓱᓕᔪᓂᒃ ᐅᖁᒤᓐᓂᕐᓯᐅᑎᓂᒃ ᐆᒃᑐᕋᐅᑎᓂᒡᓗ ᐊᑐᖃᑦᑕᕐᑐᒃᓴᐅᕗᑎᑦ, ᓄᓇᒥ ᐊᑕᓂᐅᑉ ᒎᑎᕕ ᑐᓂᓯᒪᔭᖓᓂ ᐃᓕᖕᓄᑦ ᐊᑯᓂ ᐃᓅᔪᓐᓇᖁᓪᓗᑎᑦ.

¹⁶ ᑕᒪᕐᒥᑦᓯᐊᖅ ᓱᓕᖏᑦᑐᒥᒃ ᐱᓕᕆᔪᑦ ᐊᑕᓂᐅᑉ ᒎᑎᑦᓯ ᖁᕕᐊᒋᖏᒻᒪᒋᑦ.”

ᐊᒫᓕᑬᑎᑦ ᑐᖁᑕᐅᖁᔭᐅᓂᖏᓐᓄᑦ ᐱᖁᔨᑦᔪᑏᑦ

¹⁷ “ᐃᖅᑲᐅᒪᔪᒃᓴᐅᕗᓯ ᐊᒪᓕᖕᒥᐅᑦ ᖃᓄᐃᓕᐅᓚᐅᕐᓂᖏᓐᓂᒃ ᐄᑦᔨᑉᑎᒥᑦ ᐊᐅᓪᓚᓕᕐᑎᓪᓗᓯ.

¹⁸ ᒎᑎᒥᒃ ᓯᕘᕋᖏᑦᓯᐊᕐᒪᑕ, ᑍᒤᒻᒪᑦ ᐅᓇᑕᕆᐊᕐᑐᓚᐅᕐᐹᓯ ᑭᖑᓂᖔᑦᓯᓐᓂᑦ ᑕᖃᓯᒪᑎᓪᓗᓯ ᓄᑮᕈᑎᓯᒪᑎᓪᓗᓯᓗ, ᐃᓚᒋᔭᓯᓗ ᑭᖑᓪᓕᐅᔪᑦ ᐊᒃᓱᕈᕋᓱᒃᑲᓗᐊᕐᑎᓪᓗᒋᑦ ᑐᖁᓚᐅᕐᐰᑦ; ᒎᑎᒥᒃ ᓯᕘᕋᖏᓐᓇᒥᒃ,

¹⁹ ᑍᒤᒻᒪᑦ, ᐊᑕᓂᐅᑉ ᒎᑎᑦᓯ ᓄᓇᑖᕐᑎᓯᒪᓕᕐᐸᓯ ᑕᕝᕙᓂᓗ ᐃᓂᓪᓚᑦᓯᐊᕐᓯᒪᓕᕈᑦᓯ ᐊᑭᕋᓕᒫᑦᓯᓐᓂᓪᓗ ᖃᓂᒋᔭᑦᓯᓐᓃᑦᑐᓂᑦ ᐅᐸᒃᑕᐅᓂᐅᓴᔪᓐᓁᕈᑦᓯ, ᐊᒪᓕᖕᒥᐅᑦ ᐊᑕᖏᑦᓯᐊᕐᓗᒋᑦ ᑐᑯᕋᕐᑕᒃᓴᕆᕙᓯ, ᓇᓪᓕᐊᓐᓄᓪᓘᓐᓃᑦ ᐃᖅᑲᐅᒪᔭᐅᔪᓐᓁᖁᓪᓗᒋᑦ, ᑕᒪᑐᒥᖓ ᐳᐃᒍᕐᑍᓕᒋᑦᓯ!”