ᒨᓯᓯ ᑕᓪᓕᒪᖏᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᐃᓄᖁᑎᖏᓐᓄᑦ ᐃᓚᒋᔭᐅᔭᕆᐊᖃᖏᑦᑐᑦ

¹ “ᐊᖑᑦ ᓇᓪᓕᐊᓪᓘᓐᓃᑦ ᓄᓕᐊᕈᓐᓁᓕᑎᑕᐅᓯᒪᔪᖅ ᐅᕝᕙᓗ ᐅᓱᖓ ᓇᑲᑕᐅᓯᒪᒃᐸᑦ ᐊᑕᓂᐅᑉ ᐃᓄᖁᑎᖏᓐᓄᑦ ᐃᓚᒋᔭᐅᑎᑕᐅᔪᒃᓴᐅᓐᖏᓚᖅ.

² “ᑲᑎᑎᑕᐅᓯᒪᖏᑦᑐᒧᑦ ᐃᕐᓂᐊᖑᔪᕕᓂᕐᒥᒃ ᐊᑕᓂᐅᑉ ᐃᓄᖁᑎᖏᓐᓄᑦ ᐃᓚᒋᔭᐅᔪᖃᕐᑐᒃᓴᐅᓐᖏᓚᖅ; ᐊᒡᓛᑦ ᑖᑦᓱᒪ ᑭᖑᕚᖏᑕ ᖁᓕᖏᓐᓄᑦ ᑎᑭᓪᓗᒋᑦ ᐊᑕᓂᐅᑉ ᐃᓄᖁᑎᖏᓐᓄᑦ ᐃᓚᒋᔭᐅᔪᒃᓴᐅᓐᖏᓚᑦ.

³ “ᐊᒧᓁᑎᓂᒃ ᐅᕝᕙᓗ ᒧᐊᐱᒥᐅᓂᒡᓘᓐᓃᑦ, ᐊᒡᓛᑦ ᑭᖑᕚᖏᑕ ᖁᓕᖏᓐᓄᑦ ᑎᑭᓯᒪᒐᓗᐊᕐᑎᓪᓗᒋᑦ ᐊᑕᓂᐅᑉ ᐃᓄᖁᑎᖏᓐᓄᑦ ᐃᓚᒋᔭᐅᔪᖃᕐᑐᒃᓴᐅᓐᖏᓚᖅ.

⁴ ᑖᒃᑯᐊ ᓂᕿᒃᓴᓂᒃ ᐃᒥᒃᓴᒥᒡᓗ ᐃᑲᔪᕈᒪᓚᐅᕐᓯᒪᖏᒻᒪᑕ, ᐄᑦᔨᑉᑎᒥᑦ ᐊᐅᓪᓚᓕᕐᑎᓪᓗᓯ ᐊᒡᓛᑦ ᑎᓕᓯᓚᐅᕐᓯᒪᕗᑦ ᐸᓛᒻᒥᒃ ᐱᐅᕆᐅᑉ ᐃᕐᓂᖓᓂᒃ, ᐃᒡᓗᒐᓴᖕᓂᑦ ᐱᑑᕆᒦᑦᑐᒥᑦ ᒥᓱᐳᑍᒥᐊᒦᑦᑐᒥᑦ, ᐃᓕᑦᓯᓐᓂᒃ ᓯᕗᓂᕐᓗᒃᑎᑦᓯᖁᓪᓗᒍ.

⁵ ᐊᑕᓂᐅᓪᓕ ᒎᑎᑦᓯ ᐸᓛᒻ ᓈᓚᓚᐅᓐᖏᓛ; ᓯᕗᓂᕐᓗᖁᔭᐅᓂᕆᔭᓯᓕ ᒧᒥᒃᑎᖔᓚᐅᕐᐹ ᐃᓕᑦᓯᓐᓂᒃ ᓮᒻᒪᕐᑎᑦᓯᓂᕐᒧᑦ, ᐊᑕᓂᐅᑉ ᒎᑎᑦᓯ ᓇᒡᓕᒋᒐᒥᓯ.

⁶ ᑖᒃᑯᐊ ᐃᓅᖃᑎᒌᒡᔪᐊᑦ ᖃᓄᑐᐃᓐᓇᑦᓯᐊᖅ ᐃᑲᔪᓚᐅᕐᓯᒪᓂᐊᓐᖏᓚᓯ ᐅᕝᕙᓗ ᐊᔪᕐᓴᕈᓐᓁᕈᑎᒃᓴᖏᓐᓂᒃ ᐃᑲᔪᓚᐅᕐᓯᒪᓂᐊᓐᖏᓚᓯ ᐃᓅᓂᓕᒫᑦᓯᓐᓂ.

⁷ “ᐄᑐᒥᒥᐅᓪᓕ ᓇᕐᕈᒋᔭᒃᓴᕆᓐᖏᓚᓯ ᑖᒃᑯᐊ ᐃᓚᑦᓯᓐᓂᑦ ᐱᓯᒪᖕᒪᑕ; ᐄᑦᔨᑉᑎᒥᐅᓪᓗᑦᑕᐅᖅ ᓇᕐᕈᒋᔭᒃᓴᕆᖏᓐᓂᕙᓯ, ᑖᒃᑯᐊ ᓄᓇᖏᓐᓂ ᓄᓇᖃᓚᐅᕐᓯᒪᒐᑦᓯ.

⁸ ᑖᒃᑯᐊ ᑭᖑᕚᖏᑕ ᐱᖓᔪᖏᓐᓂᑦ ᐃᕐᓂᐊᖑᓯᒪᔪᑦ ᐱᒋᐊᕐᓗᑎᒃ ᐊᑕᓂᐅᑉ ᐃᓄᖁᑎᖏᓐᓄᑦ ᐃᓚᐅᓕᕈᓐᓇᕐᐳᑦ.”

ᐅᓇᑕᕐᑐᒃᓮᑦ ᓄᓇᖓᑕ ᓴᓗᒪᑎᑕᐅᔭᕆᐊᖃᕐᓂᖓ

⁹ “ᐅᓇᑕᕆᐊᕐᓯᒪᑎᓪᓗᓯᓕ ᐊᑭᕋᑦᓯᓐᓂᒃ ᑕᖕᒫᕐᓯᒪᕕᖕᒦᓪᓗᓯ, ᐅᒃᐱᕐᓂᒃᑯᑦ ᓴᓗᒪᔪᓐᓃᕈᑕᐅᒐᔭᕐᑐᒥᒃ ᐱᓇᓱᐊᕐᑐᒃᓴᐅᓐᖏᓚᓯ.

¹⁰ ᐊᖑᓪᓕ ᐅᒃᐱᕐᓂᒃᑯᑦ ᓴᓗᒪᔪᓐᓃᕐᓂᕋᕐᑕᐅᒃᐸᑦ ᓯᓐᓇᒃᑐᕐᓗᓂ ᐅᓐᓄᐊᒃᑯᑦ ᒪᕿᓯᒪᓂᕐᒥᓄᑦ, ᑖᓐᓇ ᑕᖕᒫᕐᓯᒪᕕᐅᑉ ᓯᓚᑖᓄᐊᕐᑐᒃᓴᐅᕗᖅ ᐅᑎᕆᐊᖃᕈᓐᓃᕐᓗᓂ.

¹¹ ᐅᓐᓄᓕᕐᑎᓪᓗᒍ ᑕᕝᕙ ᐃᒻᒥᓂᒃ ᐅᐊᓴᕐᑐᒃᓴᐅᕗᖅ, ᓯᕿᓂᕐᓗ ᓂᐱᒃᐸᑦ ᑕᕝᕙ ᐅᓇᑕᕐᑐᒃᓴᐅᖃᑎᖏᑕ ᑕᖕᒫᕐᓯᒪᕕᖓᓄᑦ ᐅᑎᕈᓐᓇᕐᓯᒐᔭᕐᐳᖅ.

¹² “ᑕᖕᒫᕐᓯᒪᕕᑦᓯ ᓯᓚᑖᓂ ᐊᓇᕆᐊᕐᑐᕐᕕᖃᕐᑐᒃᓴᐅᕗᓯ ᑕᕝᕗᖓ ᐊᓇᕆᐊᕐᑐᖃᑦᑕᖁᓪᓗᓯ ᐊᓇᕈᓱᓕᕌᖓᑦᓯ.

¹³ ᕿᔪᖕᒥᒃ ᓇᒃᓴᕐᑐᒃᓴᕗᓯ ᐃᑎᕐᓴᓕᐅᕆᑦᔪᑎᒃᓴᑦᓯᓐᓂᒃ ᐊᓇᕆᐊᕐᑐᓕᕈᑦᓯ, ᐊᓇᕇᕈᑦᓯᓗ ᑕᒪᑐᒧᖓ ᓴᐅᕙᒡᓗᒍ.

¹⁴ ᐊᑕᓂᖅ ᒎᑎᓯ ᑕᖕᒫᕐᓯᒪᕕᑦᓯᓐᓂ ᐃᖏᕐᕋᖃᑦᑕᕐᒪᑦ, ᓄᓇᒋᔭᑦᓯᓐᓂ ᓴᐳᑦᔨᓪᓗᓂ ᐊᑭᕋᑦᓯᓐᓂᒡᓗ ᑐᓂᓯᓪᓗᓂ ᐃᓕᑦᓯᓐᓄᑦ, ᑍᒤᒻᒪᑦ ᑕᖕᒫᕐᓯᒪᕕᓯ ᐃᑦᔪᕐᓁᑦᑐᒃᓴᐅᕗᖅ, ᐊᑐᖁᔭᐅᖏᑦᑐᒥᒃ ᐃᓅᓯᖃᕐᑍᓕᓗᓯ ᐊᑕᓂᕐᒧᑦ ᐊᓚᕐᑕᐅᖁᓇᓯ.”

ᐱᖁᔧᑦ ᐊᑦᔨᒌᖏᑦᑐᑦ

¹⁵ “ᓯᐊᓛᕆᔭᐅᔪᒥᒃ ᐊᖓᔪᖅᑳᒥᓂᑦ ᕿᒫᔪᒧᑦ ᐅᐸᒃᑕᐅᒍᕕᑦ ᐃᓕᖕᓄᑦ ᓴᐳᑎᔭᐅᔪᒪᓗᓂ, ᐊᖓᔪᖅᑳᖓᓄᑦ ᐅᑎᕐᑎᑕᒃᓴᕆᓐᖏᓚᑦ;

¹⁶ ᓄᓇᒋᔭᑦᓯᓐᓂ ᓇᓂᑐᐃᓐᓇᖅ ᓄᓇᖃᕈᓐᓇᕐᐳᖅ ᐃᓂᒋᔪᒪᔭᒥᓂ; ᐃᕝᕕᓪᓕ ᐅᖁᒤᒃᓴᕐᑎᑕᒃᓴᕆᓐᖏᓚᑦ.

¹⁷ “ᐃᓴᕆᐊᓕᒥᐅᑕᕐᒥᒃ ᐊᕐᓇᒥᒃ ᐊᖑᑎᒥᒡᓘᓐᓃᑦ ᒎᑎᐅᖏᑦᑐᓄᑦ ᑐᒃᓯᐊᕐᕕᐅᕙᒃᑐᓂ ᓄᓕᐊᒐᐅᔪᖃᕐᑐᒃᓴᐅᓐᖏᓚᖅ ᓄᓕᐊᕐᑐᖃᖃᑦᑕᕐᑐᒃᓴᐅᓇᓂᓗ ᐃᓴᕆᐊᓕᐅᑉ ᑭᖑᕚᖏᓐᓂ.

¹⁸ ᑍᒤᑦᑐᒧᓪᓗ ᑮᓇᐅᔧᕈᑕᐅᔪᕕᓃᑦ ᐊᑕᓂᐅᑉ ᒎᑎᑦᓯ ᐃᒡᓗᖓᓄᑦ ᑐᓂᕐᕈᑕᐅᔪᒃᓴᐅᓐᖏᓚᑦ ᐊᖏᒻᒪᕆᒍᑎᐅᓯᒪᔪᒧᑦ ᐊᑭᓕᐅᑎᒋᔭᐅᓇᓱᒡᓗᑎᒃ. ᐊᑕᓂᐅᑉ ᒎᑎᑦᓯ ᑍᒤᑦᑐᑦ ᓇᕐᕈᓇᕐᑐᐊᓘᓂᕋᕐᒪᒋᑦ.

¹⁹ ᑮᓇᐅᔭᒥᒃ ᐊᑐᕐᑎᑦᓯᒍᕕᑦ ᓂᕿᒥᒡᓘᓐᓃᑦ ᓱᓇᑐᐃᓐᓇᕐᒥᒡᓘᓐᓃᑦ ᐃᓴᕆᐊᓕᒥᐅᖑᖃᑎᖕᓄᑦ, ᐊᑐᕐᑐᐊᕐᓯᒪᔭᖏᓐᓂᒃ ᐃᓚᒃᑲᓐᓂᕐᑎᑦᓯᔪᒃᓴᐅᓐᖏᓚᑎᑦ.

²⁰ ᐃᓚᓯᔪᓐᓇᕐᐳᑎᓪᓕ ᓄᓇᖃᑎᑐᖃᕆᓐᖏᑕᕐᓄᑦ ᐊᑐᕐᑕᐅᑎᑦᓯᒍᕕᑦ, ᐃᓴᕆᐊᓕᒥᐅᖑᖃᑎᕕᓪᓕ ᐊᑐᕐᓯᒪᓂᖓᓄᑦ ᐃᓚᓯᔪᒃᓴᐅᓐᖏᓚᑎᑦ; ᑕᒪᓐᓇ ᐱᖁᔭᖅ ᓈᓚᒃᑕᒃᓴᑕᕆᕚᓯ, ᑕᕝᕙ ᐊᑕᓂᐅᑉ ᒎᑎᑦᓯ ᓮᒻᒪᕐᑎᓐᓂᐊᕐᐹᓯ ᑕᒤᑎᒍᑦ ᐱᓂᐊᕐᓂᕆᔭᑦᓯᒍᑦ ᑕᒫᓂ ᓄᓇᒋᓂᐊᓕᕐᑕᑦᓯᓐᓂ ᓄᓇᖃᓕᕐᑎᓪᓗᓯ.

²¹ “ᐊᑕᓂᕐᒧᑦ ᒎᑎᑦᓯᓐᓄᑦ ᐅᖃᕕᒍᑎᓕᐅᕈᑦᓯ, ᐊᑐᕐᓂᐊᕐᓂᕋᕐᓯᒪᔭᑦᓯᓐᓂᒃ, ᐱᓐᖏᓮᓐᓇᕐᑎᑦᓯᔪᒃᓴᐅᓐᖏᓚᓯ; ᐊᑕᓂᐅᑉ ᒎᑎᑦᓯ ᐅᖃᕕᒍᑎᒋᓯᒪᔧᑦ ᑲᔪᓯᑏᓐᓇᕐᓂᐊᕐᒪᒍ, ᐊᔪᕐᓂᐅᓕᕋᔭᕐᐳᖅ ᐅᖃᕕᒍᑎᒋᓯᒪᔭᕐᓂᒃ ᑲᔪᓯᑎᑦᓯᓐᖏᑐᐊᕈᕕᑦ.

²² ᐅᖃᕕᒍᑎᓕᐅᖏᒃᑯᕕᓪᓕ ᐊᔪᕐᑐᓕᓂᐅᓐᖏᓚᖅ ᐃᓕᖕᓄᑦ,

²³ ᐃᒃᐱᒍᓱᑦᓯᐊᕐᑐᒃᓴᐅᕗᓯᓕ ᖃᓂᒃᑯᑦ ᐊᓂᔪᒥᒃ ᑲᔪᓯᑎᑦᓯᒋᐊᖃᕋᑦᓯ, ᐃᓱᒪᕐᓱᑦᓯᐊᕐᓗᓯ ᐅᖃᕕᒍᑎᓕᐅᕐᐸᒃᑲᑦᓯ ᐊᑕᓂᕐᒧᑦ ᒎᑎᑦᓯᓐᓄᑦ ᐊᖏᕈᑎᒋᓯᒪᔭᕐᓂᒃ ᑲᔪᓯᑎᑦᓯᔪᒃᓴᐅᕗᓯ.

²⁴ “ᐊᓯᕕᑦ ᕔᓂᒃᓴᓂᒃ ᐱᕈᕐᓰᕕᖁᑎᖓᓄᐊᕈᕕᑦ, ᕔᓂᒃᓮᑦ ᐸᐅᕐᖓᖏᓐᓂᒃ ᓂᕆᔪᒪᔭᓕᒫᕐᓂᒃ ᓂᕆᔪᓐᓇᕐᐳᑎᑦ, ᑭᓯᐊᓂᓕ ᐴᖃᕐᓗᑎᑦ ᓄᐊᑦᓯᔪᒃᓴᐅᓐᖏᓚᑎᑦ.

²⁵ ᐊᓯᕕᓪᓕ ᓂᐊᖂᔭᒃᓴᓂᒃ ᐱᕈᕐᓰᕕᖁᑎᖓᒍᑦ ᐱᓱᒃᑯᕕᑦ, ᐱᓱᒡᕕᒋᔭᕐᓂ ᐱᕈᕐᑐᐃᑦ ᓄᕗᖏᓐᓂᒃ ᐊᒡᒐᖕᓄᑦ ᐲᔧᓗᑎᑦ ᓂᕆᔪᓐᓇᕐᐳᑎᑦ, ᑭᓯᐊᓂᓕ ᐃᓅᖃᑎᕕᑦ ᓂᐊᖂᔭᒃᓴᓂᒃ ᐱᕈᕐᓰᕕᖁᑎᖓᓂᑦ ᓂᐊᖂᔭᒃᓴᖃᐅᑎᓄᑦ ᐴᖅᑬᔪᒃᓴᐅᓐᖏᓚᑎᑦ.”