ᒨᓯᓯ ᑕᓪᓕᒪᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᐃᓅᖃᑎᕕᑦ ᐃᒻᒧᒃᓯᐅᒐᖁᑎᖓᓂᒃ ᓰᐱᖁᑎᖓᓂᒡᓘᓐᓃᑦ ᑕᒻᒪᕐᑐᒥᒃ ᑕᑯᒍᕕᑦ, ᑕᑯᓐᓇᑐᐃᓐᓇᕐᑍᓕᒍᒃ; ᐃᓄᖓᓄᓪᓕ ᐅᑎᕐᑎᑕᒃᓴᕆᕙᑦ.

² ᐱᖁᑎᖃᕐᑐᕐᓕ ᐅᖓᓯᒃᑐᒦᑉᐸᑦ ᐅᕝᕙᓗ ᑭᓇᒧᑦ ᐱᒋᔭᐅᖕᒪᖔᑦ ᓇᓗᒍᕕᐅᒃ, ᑕᕝᕙ ᐊᖏᕐᕋᐅᑎᔭᒃᓴᕆᕙᑦ, ᐱᖁᑎᖃᕐᑐᕐᓕ ᕿᓂᕆᐊᕐᐸᑦ, ᑕᕝᕙ ᑐᓂᔭᒃᓴᕆᕙᑦ ᑖᑦᓱᒧᖓ.

³ ᑍᒫᑦᓮᓐᓇᕐᑕᐅᖅ ᐱᔪᒃᓴᐅᕗᑎᑦ ᐃᓅᖃᑎᕕᑦ ᓯᐅᑎᖅᑯᕐᑐᔪᖁᑎᖓᓂᒃ; ᐊᓐᓄᕌᖓᓂᒡᓘᓐᓃᑦ, ᓱᓇᑐᐃᓐᓇᕐᒥᒡᓘᓐᓃᑦ ᐊᓯᐅᔨᔭᐅᓯᒪᔪᒥᒃ ᓇᓂᓯᒍᕕᑦ; ᐃᔨᕐᓯᓯᒪᓇᓱᐊᕐᑐᒃᓴᐅᓐᖏᓚᑎᑦ.

⁴ “ᐃᓅᖃᑎᕕᑦ ᓯᐅᑎᖅᑯᕐᑐᔪᖁᑎᖓ ᐃᒻᒧᒃᓯᐅᒐᖁᑎᖓᓘᓐᓃᑦ ᐅᕐᕈᓯᒪᔪᖅ ᐊᖅᑯᑎᒥ ᑕᑯᑐᐃᓐᓇᕐᑕᒃᓴᕆᓐᖏᓚᑦ, ᐃᑲᔪᕐᑕᒃᓴᕆᕙᓪᓕ ᓂᑯᕕᑎᓐᓇᓱᐊᕐᓗᒍ.

⁵ “ᐊᕐᓇᖅ ᐊᖑᑎᓯᐅᑎᓂᒃ ᐊᓐᓄᕌᓂᒃ ᐊᑐᕐᑐᒃᓴᐅᓐᖏᓚᖅ, ᐊᖑᓪᓗ ᐊᕐᓇᕐᓯᐅᑎᓂᒃ ᐊᓐᓄᕌᕐᓯᒪᔪᒃᓴᐅᓐᖏᓚᖅ; ᐊᑕᓂᐅᑉ ᒎᑎᑦᓯ ᑍᒤᓕᐅᕐᑐᑦ ᖁᕕᐊᒋᖏᒻᒪᒋᑦ.

⁶ “ᑎᖕᒥᐊᒧᑦ ᐃᕙᕕᖕᒥᒃ ᑕᑯᒍᕕᑦ, ᓇᐹᕐᑐᒥ ᐅᕝᕙᓗ ᓇᑎᕐᓇᒥ ᐊᕐᓇᕕᐊᒥᒃ ᐃᕙᔪᒥᒃ ᐅᕝᕙᓗ ᐱᐊᕋᖃᕐᑐᒥᒃ, ᑕᕝᕙ ᐊᓈᓇᖓ ᐱᐊᕋᖏᓪᓗ ᐱᓇᓱᐊᕐᑕᒃᓴᕆᓐᖏᓚᑎᑦ.

⁷ ᐱᐊᕋᖏᓐᓂᒡᓕ ᐱᔪᓐᓇᕋᓗᐊᕐᐳᑎᑦ ᐊᓈᓇᖓ ᐱᔭᒃᓴᕆᓐᖏᓚᑦ, ᖃᓄᐃᖏᑦᓯᐊᖁᓪᓗᑎ, ᐊᑯᓂᓗ ᓄᓇᒥ ᐃᓅᔪᓐᓇᖁᓪᓗᑎᑦ.

⁸ “ᓄᑖᒥᒃ ᐃᒡᓗᓕᐅᕈᕕᑦ, ᖁᓛᖓᑕ ᓯᓈᒍᑦ ᐃᔪᒃᑲᕇᒃᑯᓯᕐᑕᒃᓴᕆᕙᑦ, ᐃᓄᖕᒥᒃ ᐃᒡᓘᑉ ᖁᓛᓂᑦ ᐃᔪᒃᑲᕐᑐᖃᕐᓗᓂ ᑐᖁᔪᖃᕐᐸᑦ ᐸᓯᔭᒃᓴᐅᒐᔭᓐᖏᓚᑎᑦ.

⁹ “ᕔᓂᒃᓴᓄᑦ ᐱᕈᕐᓰᕕᖁᑎᖕᓂ ᑕᕝᕗᖓᑦᓮᓐᓇᖅ ᐊᑦᔨᒋᓐᖏᑕᖏᓐᓂᒃ ᐱᕈᕐᓯᐊᒃᓴᓂᒃ ᑲᓐᖓᕐᓱᐃᔪᒃᓴᐅᓐᖏᓚᑎᑦ; ᑍᒤᓕᐅᕈᕕᑦ, ᑕᕝᕙᓂ ᐱᕈᕐᑎᑕᑎᑦ ᐊᑐᕐᑐᒃᓴᐅᔪᓐᓃᖁᓇᒋᑦ ᕔᓂᒃᓴᓕᐅᕐᕖᓪᓗ ᓇᕐᕈᓇᕐᑎᑕᐅᖁᓇᒍ.

¹⁰ “ᐱᕈᕐᓰᕕᖁᑎᖕᓂ ᓄᓇᒥᒃ ᒪᒃᐱᕐᑎᕆᔪᒃᓴᐅᓐᖏᓚᑎᑦ ᐅᓂᐊᕐᑕᐅᑎᓪᓗᒍ ᐊᑕᐅᑦᓯᒃᑯᑦ ᐃᒻᒧᒃᓯᐅᒐᕐᒧᑦ ᓯᐅᑎᖅᑯᕐᑐᔪᒧᓪᓗ.

¹¹ “ᐊᓐᓄᕌᕐᓯᒪᔪᒃᓴᐅᓐᖏᓚᑎᑦ ᐃᓛᕐᑐᕐᓯᒪᔪᒥᒃ ᓄᕕᕐᓵᒃᓴᓂᒃ ᖃᓪᓗᓈᕐᑕᑦᓯᐊᕙᖕᓂᒡᓗ.

¹² “ᐅᓕᒡᔪᐊᑦ ᓯᑕᒪᓂᒃ ᑎᕆᖅᑯᖏᑎᒍᑦ ᓂᕕᓐᖓᑖᓕᐅᕐᑕᒃᓴᕆᕙᑦ ᐊᑐᖃᑦᑕᕐᑍᑦ.”

ᐱᖁᔭᖅ ᐃᓐᓇᖓᖃᑎᖃᕐᓂᐅᑉ ᐊᑐᕐᑕᐅᑦᓯᐊᕆᐊᖃᕐᓂᖓᓄᑦ

¹³ “ᐊᖑᑦ ᓄᓕᐊᓂᒃᐸᑦ, ᐃᓐᓇᖓᖃᑎᒋᓯᒪᓕᕐᓗᒍ, ᑭᖑᓂᖓᒍᑦ ᓄᓕᐊᕆᔪᒪᔪᓐᓃᕐᐸᒍ,

¹⁴ ᓱᓕᖏᑦᑐᒥᒡᓗ ᑲᓐᖑᓇᕐᑐᒥᒃ ᐸᓯᔭᒃᓴᐅᓂᕋᕐᐸᒍ, ᐱᐅᓐᖏᑎᓐᓇᓱᒡᓗᓂᐅᒡᓗ ᐅᖃᐅᓯᕆᓕᕐᐸᒍ, ᓄᓕᐊᕐᑖᕆᓕᕐᑎᓪᓗᓂᐅᒃ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᔪᕕᓂᐅᓂᕋᕐᓗᒍ.

¹⁵ “ᑍᒤᑦᑐᖃᕐᐸᑦ, ᑕᕝᕙ ᐊᕐᓇᐅᑉ ᐊᑖᑕᖓᑕ ᐊᓈᓇᖓᑕᓗ ᐸᓂᖓᑕ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᓐᓂᖓᑕ ᓱᓕᓂᖓᓂᒃ ᓇᓗᓁᕐᓯᑦᔪᑎᒋᓗᒍ ᑲᑎᑎᑕᐅᕋᑖᕐᑎᓪᓗᒋᒃ ᐊᓪᓕᓂᕕᓂᖓ ᐊᐅᒥᑎᕐᓯᒪᔪᖅ ᓇᒃᓴᕐᑕᒃᓴᕆᕚᒃ ᐃᒡᓗᒐᓴᖕᓂ ᐊᖓᔪᖅᑳᓄᑦ ᖃᐅᔨᓇᓱᐊᕐᕕᖕᒧᑦ.

¹⁶ ᑕᕝᕙ ᐊᕐᓇᐅᑉ ᐊᑖᑕᖓ ᐅᖃᕐᑐᒃᓴᐅᕗᖅ ᐊᖓᔪᖅᑳᓄᑦ, ‘ᐸᓂᒐ ᐊᖑᒻᒧᑦ ᐆᒧᖓ ᑐᓂᓚᐅᕐᐸᕋ ᑲᑎᑎᑕᐅᖁᓪᓗᒍ, ᒫᓐᓇᓕ ᑖᑦᓱᒪ ᓄᓕᐊᕆᔪᒪᔪᓐᓃᕐᐹ;

¹⁷ ᑕᑯᒋᓪᓗ, ᓱᓕᖏᑦᑐᒥᒃ ᐸᓯᔭᒃᓴᐅᓂᕋᕋᓱᒃᐹ ᐱᐅᓐᖏᑎᓐᓇᓱᒃᓗᓂᐅᒃ ᐅᖃᐅᓯᕆᓯᒪᕚ ᐊᖑᒻᒧᑦ ᐊᒃᑐᕐᑕᐅᓯᒪᑎᓪᓗᒍ ᓄᓕᐊᕐᑖᕆᓚᐅᕐᓂᕋᕐᓗᓂᐅᒃ. ᐅᓇ ᑕᕝᕙ ᐸᓂᖕᒪ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᓐᓂᖓᑕ ᓱᓕᓂᖓᓂᒃ ᓇᓗᓁᕐᓯᑦᔪᑎᒃᓴᐅᕗᖅ.’ ᑕᕝᕙ ᑲᑎᑎᑕᐅᕋᑖᕐᑎᓪᓗᒋᒃ ᐊᓪᓕᓂᕕᓂᖓ ᐃᓯᕕᑕᒃᓴᕆᕚ ᐃᒡᓗᒐᓴᖕᓂ ᐊᖓᔪᖅᑳᑦ ᓵᖓᓄᑦ.

¹⁸ ᑕᕝᕙ ᐃᒡᓗᒐᓴᖕᓂ ᐊᖓᔪᖅᑳᓄᑦ ᐊᖑᑦ ᑍᒤᓕᐅᓚᐅᕐᑐᖅ ᑏᒐᕐᑐᕐᑕᐅᔪᒃᓴᐅᕗᖅ.

¹⁹ ᐊᑭᓖᑎᑕᐅᔪᒃᓴᐅᕗᕐᑕᐅᖅ ᓯᐅᓪᕕᕆᓂᒃ 100ᓂᒃ, ᑖᒃᑯᐊᓗ ᑐᓂᔭᐅᓗᑎᒃ ᐊᕐᓇᐅᑉ ᐊᑖᑕᖓᓄᑦ, ᐊᖑᑦ ᐃᓴᕆᐊᓕᒥᐅᑕᕐᒥᒃ ᐊᕐᓇᒥᒃ ᑲᓐᖑᓇᕐᑐᒦᑎᑦᓯᓂᖓᓄᑦ; ᐊᕐᓇᕐᓗ ᓱᓕ ᑖᑦᓱᒧᖓ ᐊᖑᒻᒧᑦ ᓄᓕᐊᕆᔭᐅᔭᕆᐊᖃᕐᐳᖅ; ᐊᖑᑎᐅᓪᓗ ᐊᕕᑦᓴᕆᐊᖃᓐᖏᓛ ᐃᓅᓯᓕᒫᒥᓂ.

²⁰ “ᑭᓯᐊᓂᓕ ᐸᓯᔭᒃᓴᐅᑎᑕᐅᔪᖅ ᓱᓕᒃᐸᑦ, ᓇᓗᓁᕐᓯᔪᓐᓇᕐᑐᖃᖏᑉᐸᓪᓗ ᐊᕐᓇᐅᑉ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᓇᓂ ᐂᑉᐸᕐᑖᕐᑐᕕᓂᐅᓂᖓᓂᒃ.

²¹ ᑕᕝᕙ ᑖᒃᑯᓇᓐᖓᑦ ᑕᕝᕙᓐᖓᑦ ᐊᓐᓂᓯᔭᐅᓗᓂ ᐊᑖᑕᖓᑕ ᐃᒡᓗᖓᑕ ᐃᑎᕐᑕᕐᕕᖓᓄᐊᕈᑦᔭᐅᔪᒃᓴᐅᕗᖅ, ᑖᑦᓱᒪᓗ ᐊᕐᓇᐅᑉ ᓄᓇᖓᑕ ᐃᒡᓗᒐᓴᒡᔪᐊᕐᒥᐅᑦ ᐊᖑᑎᖏᑕ ᒥᓪᓗᕐᓗᒍ ᑐᖁᑕᒃᓴᕆᕚᑦ, ᑖᓐᓇ ᐊᕐᓇᖅ ᑲᓐᖑᓇᕐᑐᒥᒃ ᐃᓴᕆᐊᓕᒥᐅᓄᑦ ᑎᑭᑎᑦᓯᖕᒪᑦ ᐃᓐᓇᖓᖃᑎᖃᕐᓯᒪᓂᕐᒥᓄᑦ ᐅᐃᓂᓚᐅᖅᑳᕋᓂ, ᓱᓕ ᐊᑖᑕᖓᑕ ᐃᒡᓗᖓᓂ ᐊᖏᕐᕋᖃᕐᑎᓪᓗᒍ. ᑕᕝᕙ ᑍᒤᓕᐅᕐᓗᓯ ᑕᒪᓐᓇ ᐱᐅᖏᑦᑐᓕᓂᖅ ᓄᖅᑲᕐᑎᒃᑲᔭᕐᐸᓯ.

²² “ᐊᖑᓪᓕ ᐊᖑᔭᐅᒃᐸᑦ ᓄᓕᐊᕆᔭᐅᔪᒥᒃ ᐃᓐᓇᖓᖃᑎᖃᕐᑎᓪᓗᒍ, ᑖᒃᑯᐊᒃ ᑕᕝᕙ ᑕᒪᕐᒥᒃ ᑐᖁᑕᐅᔪᒃᓴᐅᕘᒃ, ᑕᕝᕙ ᑍᒤᓕᐅᕐᓗᓯ ᑕᒪᓐᓇ ᐱᐅᖏᑦᑐᓕᓂᖅ ᐃᓴᕆᐊᓕᒥᐅᓂ ᓄᖅᑲᕐᑎᒃᑲᔭᕐᐸᓯ.

²³ “ᐊᖑᓪᓕ ᐊᖑᔭᐅᒃᐸᑦ ᓄᓇᓕᖕᓂ ᐃᓐᓇᖓᖃᑎᖃᕐᑎᓪᓗᒍ ᐊᕐᓇᒥᒃ ᐊᓯᐊᓂᒃ ᐅᐃᒃᓴᓕᖕᒥᒃ.

²⁴ ᑕᕝᕙ ᑖᒃᑯᐊᒃ ᓄᓇᓖᑦ ᓯᓚᑖᓄᐊᕈᑎᓗᒋᒃ ᒥᓪᓗᕐᑕᐅᓗᑎᒃ ᑐᖁᑕᐅᔪᒃᓴᐅᕘᒃ. ᐊᕐᓇᖅ ᑐᖁᑕᐅᔭᕆᐊᖃᕐᐳᖅ ᐃᑲᔪᕐᑕᐅᔪᒪᓗᓂ ᓂᓪᓕᐊᓚᐅᖏᓐᓂᖓ ᐱᓪᓗᒍ, ᑕᕝᕙᓂ ᓄᓇᓕᖕᓃᒃᑲᓗᐊᕐᓗᓂ, ᓂᓪᓕᑐᐊᕐᐸᑦ ᑐᓴᕐᑕᐅᔪᓐᓇᕋᔭᓚᐅᕋᓗᐊᕐᒪᑦ. ᐊᖑᑦᑕᐅᖅ ᑐᖁᑕᐅᔭᕆᐊᖃᕆᕗᖅ ᐊᕐᓇᒥᒃ ᐃᓐᓇᖓᖃᑎᖃᕐᒪᑦ ᐊᓯᐊᓄᑦ ᓄᓕᐊᒃᓴᕆᔭᐅᔪᒥᒃ. ᑕᕝᕙ ᑍᒤᓕᐅᕐᓗᓯ ᑕᒪᓐᓇ ᐱᐅᖏᑦᑐᓕᓂᖅ ᓄᖅᑲᕐᑎᒃᑲᔭᕐᐸᓯ.

²⁵ “ᐊᖑᓪᓕ ᐃᒡᓗᒐᓮᑦ ᓯᓚᑖᓂ ᐊᕐᓇᒥᒃ ᖁᓄᔪᕐᓂᐊᕐᐸᑦ ᐊᓯᐊᓄᑦ ᓄᓕᐊᒃᓴᕆᔭᐅᔪᒥᒃ. ᑕᕝᕙ ᐊᖑᑦ ᑖᓐᓇᑐᐊᖅ ᑐᖁᑕᐅᔭᕆᐊᖃᕐᐳᖅ;

²⁶ ᐊᕐᓇᕐᓕ ᖃᓄᐃᓕᔭᐅᔭᕆᐊᖃᓐᖏᓚᖅ, ᑐᖁᑕᐅᑦᔪᑎᒃᓴᐅᔪᒥᒃ ᐊᔪᕐᑐᓕᖏᒻᒪᑦ. ᑕᒪᓐᓇ ᐊᑦᔨᖃᕆᕗᖅ ᐊᖑᑦ ᐊᖑᑕᐅᖃᑎᒥᓂᒃ ᐅᐸᒍᑎᓗᓂ ᑐᖁᑦᓯᔪᒥᒃ.

²⁷ ᐊᖑᑦ ᐃᒡᓗᒐᓮᑦ ᓯᓚᑖᓂ ᐊᕐᓇᒥᒃ ᖁᓄᔪᕐᓂᐊᕐᐸᑦ, ᐊᕐᓇᖅ ᐃᑲᔪᕐᑕᐅᔪᒪᓗᓂ ᓂᓪᓕᐊᒐᓗᐊᕐᓗᓂ, ᓇᓪᓕᐊᓐᓂᒡᓘᓐᓃᑦ ᐃᑲᔪᕐᑎᒃᓴᖃᖏᒻᒪᑦ.

²⁸ “ᐊᖑᓪᓕ ᐊᕐᓇᒥᒃ ᐅᐃᒃᓴᖃᖏᑦᑐᒥᒃ ᖁᓄᔪᕐᓂᐊᕐᑎᓪᓗᒍ ᐊᖑᔭᐅᒃᐸᑦ.

²⁹ ᑕᕝᕙ ᐊᖑᑦ ᐊᕐᓇᐅᑉ ᐊᑖᑕᖓᓄᑦ ᐊᑭᓖᔪᒃᓴᐅᕗᖅ ᓄᓕᐊᒃᓴᒥᓂᒃ ᐊᑭᓖᐅᑎᒋᔭᐅᓲᑎᑐᑦ 50ᓂᒃ ᓯᐅᓪᕕᕆᓂᒃ, ᐊᕐᓇᕐᓗ ᑖᓐᓇ ᓄᓕᐊᕐᑖᕆᓗᓂᐅᒃ, ᐱᔪᒪᑎᓐᓇᒍ ᐃᓐᓇᖓᖃᑎᒋᓯᒪᖕᒪᒍ. ᐊᖑᑎᐅᓪᓗ ᐊᕕᑕᒃᓴᕆᓐᖏᓛ ᐃᓅᓂᓕᒫᒥᓂ ᐱᔪᒪᑎᓐᓇᒍ ᐱᓕᕆᐊᕆᖕᒪᒍ; ᐊᕕᑕᒃᓴᕆᓐᖏᓛᓗ ᐃᓅᓯᓕᒫᒥᓂ.

³⁰ “ᐊᖑᑦᑕᐅᖅ ᐊᑖᑕᒥᓂᒃ ᑲᓐᖑᓇᕐᓯᑎᑦᓯᔪᒃᓴᐅᓐᖏᓚᖅ ᓄᓕᐊᖏᑕ ᐃᓚᖓᓐᓂᒃ ᐃᓐᓇᖓᖃᑎᖃᕐᓂᕐᒥᖑᑦ.”