ᒨᓯᓯ ᑕᓪᓕᒪᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᔮᕆᓗᓂ ᐃᓄᐊᕐᓯᒪᔪᖃᕐᐸᑦ ᓇᓗᓇᕐᐸᓪᓗ ᓇᓪᓕᐊᓐᓄᑦ ᑐᖁᑕᐅᖕᒪᖔᑦ

¹ “ᐊᖑᒻᒥᒃ ᐱᔮᕆᔭᐅᓗᓂ ᑐᖁᑕᐅᓯᒪᔪᖃᕐᐸᑦ ᐱᕈᕐᓰᕕᖕᒥ ᑕᒫᓂ ᐊᑕᓂᐅᑉ ᒎᑎᑦᓯ ᑐᓂᓯᒪᔭᖓᓂ ᓄᓇᖃᓕᕐᑎᓪᓗᓯ, ᖃᐅᔨᒪᖏᒃᑯᑦᓯᓗ ᓇᓪᓕᐊᓐᓄᑦ ᑐᖁᑕᐅᓯᒪᖕᒪᖔᑦ.

² ᑕᕝᕙ ᐊᖓᔪᖅᑳᓯ ᐋᖅᑭᒃᓱᐃᔨᓯᓗ ᑕᑯᔭᕐᑐᕐᑐᒃᓴᐅᕗᑦ, ᖃᓄᖅ ᐅᖓᓯᖕᓂᖃᕐᒪᖔᑦ ᑐᖁᑕᐅᓯᒪᔫᑉ ᑎᒥᖓᓂᑦ ᐃᒡᓗᒐᓴᖕᓄᑦ ᖃᓂᓛᓄᑦ ᖃᐅᔨᓴᕐᑐᒃᓴᐅᕗᑦ ᐆᒃᑐᕋᕐᓗᒍ.

³ ᑕᕝᕙ ᐃᒡᓗᒐᓮᑦ ᑐᖁᑕᐅᓯᒪᔪᒥᒃ ᖃᓂᒃᓴᕐᓂᕐᐹᑉ ᐊᖓᔪᖅᑳᖏᑦ ᐃᒻᒧᒃᓯᐅᒐᕐᒥᒃ ᐱᕈᕋᑖᕕᓂᕐᒥᒃ ᐊᑐᐃᓐᓇᕈᐃᔪᒃᓴᐅᕗᑦ ᓱᓕ ᐊᑐᕐᑕᐅᓚᐅᕐᓯᒪᖏᑦᑐᒥᒃ ᐱᓇᓱᐊᕐᓂᕐᒧᑦ.

⁴ ᑕᕝᕙ ᐃᒡᓗᒐᓮᑦ ᐊᖓᔪᖅᑳᖏᑕ ᐃᒻᒧᒃᓯᐅᒐᖅ ᓄᕐᕋᖅ ᓇᕐᓴᒧᐊᕈᑎᔭᒃᓴᕆᕚᑦ ᑰᖏᓐᓇᕐᑐᒥᒃ ᑰᓕᖕᒧᑦ, ᓄᓇᖓᓗ ᐊᐅᓚᑕᐅᓯᒪᖏᑦᑐᒧᑦ ᐱᕈᕐᓰᕕᐅᓚᐅᕐᓯᒪᖏᑦᑐᒧᓪᓗ, ᑕᕝᕙᓂ ᖁᖓᓯᖓᒍᑦ ᐊᓇᐅᓗᒍ ᑐᖁᑕᒃᓴᕆᕚᑦ.

⁵ ᑕᕝᕙ ᓕᕔᑉ ᑭᖑᕚᖏᑦ ᑐᓂᕐᕈᓯᕐᑎᑦᓯᔩᑦ ᓯᕗᒧᐊᒃᑐᒃᓴᐅᕗᑦ, ᑖᒃᑯᐊ ᐊᑕᓂᐅᑉ ᒎᑎᑦᓯ ᓂᕈᐊᕐᓯᒪᖕᒪᒋᑦ ᐱᔨᑦᓯᖁᓪᓗᒋᑦ ᐃᒻᒥᓄᑦ ᓮᒻᒪᕐᑎᑦᓯᔨᐅᖁᓪᓗᒋᓪᓗ ᐊᑕᓂᐅᑉ ᐊᑎᖓᓂ, ᑖᒃᑯᐊ ᐅᖃᐅᓯᖏᑎᒍᑦ ᐊᑭᕋᕐᑑᑎᑦᔪᑎᓕᒫᑦ ᐋᓐᓂᕐᓯᓇᓱᐊᕐᓂᓕᒫᓪᓗ ᑖᒃᑯᓇᓐᖓᑦ ᐃᓱᐊᕐᓯᑎᑕᐅᔪᓐᓇᕐᒪᑕ.

⁶ ᑕᕝᕙ ᐊᖓᔪᖅᑳᓕᒫᑦ ᐃᒡᓗᒐᓴᖕᓄᑦ ᑖᑦᓱᒪ ᑐᖁᑕᐅᓯᒪᔫᑉ ᑎᒥᖓᓄᑦ ᖃᓂᓐᓂᕐᐹᒥᑦ ᐱᓯᒪᔪᑦ ᐊᒡᒐᖕᒥᖕᓂᒃ ᐅᐊᓴᕐᑐᒃᓴᐅᕗᑦ ᐃᒻᒧᒃᓯᐅᒐᐅᑉ ᓄᕐᕋᖓᑕ ᖁᓛᓂ ᓇᕐᓴᒥ;

⁷ ᓇᓗᓁᕐᓯᓗᑎᒃ, ‘ᐊᖑᒻᒥᒃ ᑖᑦᓱᒥᖓ ᑐᖁᑦᓯᓯᒪᓐᖏᓚᒍᑦ, ᑕᑯᓐᓈᓚᐅᕋᑕᓗ ᑐᖁᑕᐅᑎᓪᓗᒍ.

⁸ ᐊᑕᓃᖅ, ᐃᓴᕆᐊᓕᒥᐅᑦ ᐃᓄᖁᑎᑎᑦ ᐃᓱᒪᒋᔪᓐᓁᕐᕕᒋᓚᐅᒃᑭᑦ, ᑖᒃᑯᐊ ᐱᐅᓕᓚᐅᕐᑕᑎᑦ. ᐸᓯᔭᒃᓴᐅᓂᖅ ᐊᐅᑉ ᐸᓯᔭᒃᓴᐅᖏᑦᑑᑉ ᑯᕕᔭᐅᓂᖓᓄᑦ ᐃᓄᖁᑎᑎᑦ ᐃᓴᕆᐊᓖᑦ ᐱᓯᒪᔭᐅᖁᓇᒋᑦ; ᐸᓯᔭᒃᓴᐅᓂᕐᒥᑦ ᐃᓱᒪᒋᔪᓐᓁᕐᕕᒋᓚᐅᒃᑭᑦ.’

⁹ ᑕᕝᕙ ᑍᒤᓕᐅᕐᓗᓯ ᐸᓯᔭᒃᓴᐅᓂᖅ ᐲᕋᔭᕐᐸᓯ ᐃᓕᑦᓯᓐᓂᑦ, ᓈᒻᒪᒃᑐᒥᒃ ᐱᓇᓱᐊᕈᑦᓯ ᐊᑕᓂᐅᑉ ᓵᖓᓂ.”

ᐊᕐᓁᑦ ᐅᓇᑕᕐᓂᒃᑯᑦ ᑎᒍᔭᐅᓯᒪᔪᑦ ᐱᓪᓗᒋᑦ

¹⁰ “ᐅᓇᑕᕆᐊᕈᑦᓯ ᐊᑭᕋᑦᓯᓐᓂᒃ ᐊᑕᓂᐅᑉ ᒎᑎᑦᓯ ᓵᓚᖃᕐᑎᑉᐸᓯ ᐅᓇᑕᕐᓂᒃᑯᑦ, ᐊᖏᕐᕋᐅᑦᔨᒍᑦᓯᓗ ᐃᓄᖕᓂᒃ ᑎᒍᔭᑦᓯᓐᓂᒃ,

¹¹ ᑖᒃᑯᐊ ᐃᓚᖏᓐᓂᒃ ᑕᑯᒍᕕᑦ ᐊᕐᓇᒥᒃ ᐃᓂᖁᓇᕐᑐᒥᒃ, ᐃᒃᓯᒋᓗᒍᓗ ᓄᓕᐊᕐᑖᕆᔪᒪᓕᕈᕕᐅᒃ.

¹² ᑕᕝᕙ ᐃᒡᓗᖕᓄᑦ ᐊᖏᕐᕋᐅᑎᔭᒃᓴᕆᕙᑦ, ᑕᕝᕙᓂᓗ ᓄᔭᖏᑦ ᓴᓕᓗᒋᑦ ᑯᑮᔭᕐᓗᒍᓗ,

¹³ ᑎᒍᔭᐅᓯᒪᔪᖅ ᐊᓐᓄᕌᖏᑕ ᐊᓯᖏᓐᓂᒃ ᐊᓐᓄᕌᕐᑎᓪᓗᒍ, ᐃᒡᓗᖕᓂᓗ ᐊᖏᕐᕋᖃᕐᑐᒃᓴᐅᕗᖅ ᐊᖓᔪᖅᑳᒥᓂᒡᓗ ᕿᒃᓵᒍᑎᖃᕐᑐᒃᓴᐅᕗᖅ ᑕᖅᑭᓕᒫᒥᒃ; ᑭᖑᓂᖓᒍᑦ ᑕᕝᕙ ᐃᓐᓇᖓᖃᑎᒋᔪᓐᓇᕐᓯᖓᔭᕐᐸᑦ, ᐅᐃᑖᕆᓗᓂᑎᑦ ᐃᕝᕕᓪᓗ ᓄᓕᐊᕐᑖᕆᓗᒍ.

¹⁴ ᑭᖑᓂᖓᒍᓪᓕ ᖁᕕᐊᒋᖏᒃᑯᕕᐅᒃ, ᑕᕝᕙ ᐊᓂᑎᑕᒃᓴᕆᕙᑦ ᐃᓱᒪᕐᓱᓕᕐᓗᓂ ᐂᕕᒋᔪᒪᔭᒥᓄᑦ; ᓂᐅᕐᕈᑎᒋᔭᒃᓴᕆᓐᖏᓚᑦ ᑮᓇᐅᔭᒧᑦ, ᓂᐅᕕᐊᖑᓯᒪᔪᑎᑐᑦ ᐱᔨᑐᑦ ᑍᒤᑦᓴᕆᐊᖃᓐᖏᓚᖅ, ᐃᓐᓇᖓᖃᑎᒋᓯᒪᒐᕕᐅᒃ.”

ᐊᖓᔪᒃᓯᕐᐹᖑᔫᑉ ᐃᕐᓂᐅᑉ ᑭᖑᕐᖑᑎᔭᒃᓴᖓ ᐱᓪᓗᒍ

¹⁵ “ᐊᖑᓪᓕ ᓄᓕᐊᖃᕐᐸᑦ ᒪᕐᕉᖕᓂᒃ, ᐂᑉᐸᖓ ᐅᖓᒋᓂᕐᓴᕆᓗᒍ ᐂᑉᐸᖓᓗ ᐅᖓᒋᖏᓐᓂᕐᓴᕆᓗᒍ, ᑖᒃᑯᖕᓇᓐᖓᓪᓗ ᐃᕐᓂᕐᑖᕐᓯᒪᒍᓂ ᑕᒪᖏᖕᓂᑦ, ᐅᖓᒋᓂᕐᓴᒥᓂᓪᓗ ᐅᖓᒋᖏᓐᓂᕐᓴᒥᓂᓪᓗ, ᐊᖓᔪᒃᓯᐅᔪᖅ ᐃᕐᓂᕐᑖᖓ ᓇᒡᓕᒋᖏᓐᓂᕐᓴᒥᓂᑦ ᐃᕐᓂᕐᑖᕆᓯᒪᒃᐸᒍ,

¹⁶ ᑕᕝᕙ ᐱᖁᑎᒥᓂᒃ ᐃᕐᓂᕐᒥᓄᑦ ᑭᖑᕐᖑᑎᔭᒃᓴᖏᓐᓂᒃ ᑐᓂᓯᕝᕕᒃᓴᖓ ᐅᓪᓗᖅ ᓇᓪᓕᐅᑎᒃᐸᑦ, ᑕᕝᕙ ᐅᖓᒋᓂᕐᓴᖓᑕ ᐃᕐᓂᖓ ᐱᑎᖔᕐᑕᒃᓴᕆᓐᖏᓛ ᐅᖓᒋᖏᓐᓂᕐᓴᒥ ᐃᕐᓂᖓᑕ ᐱᔭᒃᓴᖏᓐᓂᒃ, ᐃᕐᓂᐊᖑᖄᕐᓯᒪᓂᖓᓄᑦ.

¹⁷ ᐊᖓᔪᒃᓯᕐᐹᖁᑎᓂ ᐅᐱᒋᔭᒃᓴᕆᕚ, ᓄᓕᐊᖓᑕ ᐅᖓᒋᓂᕐᓴᖓᑕ ᐃᕐᓂᕆᖏᒃᑲᓗᐊᕐᑎᓪᓗᓂᐅᒃ, ᐱᖁᑎᒥᓕ ᐊᕕᒋᐊᖃᕐᑕᖏᓐᓂᑦ ᒪᕐᕈᐃᕐᓱᓪᓗᐊᕐᑐᓂᒃ ᐃᕐᓂᓂ ᐊᖓᔪᒃᓯᖅ ᑐᓂᓯᕕᒋᔭᒃᓴᕆᕚ, ᑖᓐᓇ ᐱᔪᓐᓇᕐᓂᖓᓂᒃ ᓯᕗᓪᓕᕐᒥᑦ ᐱᓯᒪᖕᒪᑦ; ᐊᖓᔪᒃᓯᐅᓂᖅ ᑖᑦᓱᒪ ᐱᒋᖕᒪᒍ.”

ᐃᕐᓂᖅ ᓈᓚᖏᑦᑐᖅ ᐱᓪᓗᒍ

¹⁸ “ᐊᖑᓪᓕ ᐃᕐᓂᖃᕐᐸᑦ ᐊᖏᕈᓐᓇᖏᑦᑐᒥᒃ ᓈᓚᒍᓐᓇᖏᑦᑐᒥᒡᓗ, ᐃᕐᓂᖅ ᐊᑖᑕᒥᓂᒃ ᐊᓈᓇᒥᓂᒡᓘᓐᓃᑦ ᓈᓚᒍᒪᖃᑦᑕᖏᑉᐸᑦ, ᐋᖅᑭᒋᐊᕐᑕᐅᕙᒃᑲᓗᐊᕐᓗᓂ ᑖᒃᑯᓂᖓ ᓈᓚᒍᒪᖏᑦᐸᑦ,

¹⁹ ᑕᕝᕙ ᐊᑖᑕᖓᑕ ᐊᓈᓇᖓᑕᓗ ᐃᒡᓗᒐᓴᖕᒥᖕᓂ ᐊᖓᔪᖅᑳᕆᔭᐅᔪᓄᑦ ᐋᑕᒃᓴᕆᕚ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖓᓄᑦ ᓇᔪᒐᕐᒥᖕᓂ,

²⁰ ᐅᖃᕐᓗᑎᒡᓗ ᐃᒡᓗᒐᓴᖕᓂ ᐊᖓᔪᖅᑳᓄᑦ, ‘ᐃᕐᓂᕗᑦ ᑐᓴᕈᓐᓇᖏᒻᒪᑦ ᐊᑭᕋᕐᑐᖃᑦᑕᕐᓗᓂᓗ, ᐅᕙᑦᑎᓐᓂᒡᓗ ᓈᓚᒍᒪᓇᓂ; ᓂᕆᑐᔫᓪᓗᓂᓗ ᐋᖓᔮᕐᑎᐅᓪᓗᓂᓗ.’

²¹ ᑕᕝᕙ ᐊᖑᑎᓕᒫᑦ ᐃᒡᓗᒐᓴᒡᔪᐊᓃᑦᑐᑦ ᒥᓪᓗᕐᓗᒍ ᑐᖁᑕᒃᓴᕆᕚᑦ; ᑍᒫᒃ ᑕᕝᕙ ᐱᐅᖏᑦᑐᓕᓂᖅ ᐲᕋᔭᕐᐸᓯ ᐊᑯᓐᓇᑦᓯᓐᓂᑦ. ᐃᓴᕆᐊᓕᒥᐅᓕᒫᑦ ᖃᓄᐃᑦᑐᖃᕐᓂᕕᓂᖓᓂᒃ ᑐᓴᕋᔭᕐᐳᑦ, ᓯᕘᕋᓕᕐᓗᑎᒡᓗ.”

ᖃᓄᐃᑦᑐᑐᐃᓐᓁᑦ ᐊᑦᔨᒌᖏᑦᑐᑦ ᐱᖁᔧᑦ

²² “ᐊᖑᓪᓕ ᑐᖁᑕᐅᓯᒪᒃᐸᑦ ᐱᖁᔭᓂᒃ ᒪᓕᖏᓐᓂᖓᓄᑦ ᑐᖁᑕᐅᑦᔪᑎᒃᓴᐅᔪᒧᑦ ᑐᖁᑕᐅᒃᐸᓪᓗ, ᑎᒥᖓᓗ ᓂᕕᖓᑎᒃᑯᑦᓯᐅᒃ ᓇᐹᕐᑐᒥ,

²³ ᐅᓐᓄᐊᓕᒫᖅ ᓈᓗᒍ ᑎᒥᖓ ᓂᕕᖓᑎᑕᐅᔪᒃᓴᐅᓐᖏᓚᖅ, ᐅᓪᓗᒥ ᑕᕝᕙᓂᑦᓮᓐᓇᖅ ᐃᓗᕕᕐᑕᐅᔪᒃᓴᐅᕗᖅ, ᓂᕕᖓᔪᖅ ᓇᐹᕐᑐᒥ ᒎᑎᐅᑉ ᓇᕐᕈᓇᕐᓯᓂᕋᕐᒪᒍ; ᓄᓇ ᓇᕐᕈᓇᕐᓯᑎᑕᒃᓴᕆᓐᖏᓚᓯ ᐊᑕᓂᐅᑉ ᒎᑎᑦᓯ ᑐᓂᓯᒪᔭᖓ ᓄᓇᑖᖑᖁᓪᓗᒍ ᐃᓕᑦᓯᓐᓄᑦ.”