ᒨᓯᓯ ᑕᓪᓕᒪᖏᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᓇᑕᕐᓂᐅᑉ ᐱᐅᓯᖏᑦ

¹ “ᐅᓇᑕᕆᐊᕐᓂᐊᓕᕈᑦᓯ ᐊᑭᕋᑦᓯᓐᓄᑦ, ᑕᑯᓕᕈᑦᓯᐅᒡᓗ ᕿᒧᒃᓯᐅᑎᖃᕐᑐᑦ ᐊᒃᓴᓗᐊᓕᖕᓂᒃ ᕿᒻᒥᕐᔪᐊᖃᕐᓗᑎᒡᓗ ᐅᓇᑕᕐᑐᒃᓴᖃᕐᓗᑎᒡᓗ ᐃᓕᑦᓯᓐᓂᑦ ᐅᓄᕐᓂᕐᓴᓂᒃ, ᓯᕘᕋᒋᔭᒃᓴᕆᓐᖏᓚᓯ; ᐊᑕᓂᐅᑉ ᒎᑎᑦᓯ, ᐃᓕᑦᓯᓐᓂᒃ ᐱᐅᓕᒃᓯᓚᐅᕐᑑᑉ ᐄᑦᔨᑉᑎᒥᑦ, ᑖᑦᓱᒪ ᐃᓚᒋᓂᐊᕐᒪᓯ.

² ᐅᓇᑕᕆᐊᕐᕕᖕᒧᓪᓕ ᑎᑭᓕᕈᑦᓯ, ᑐᓂᕐᕈᓯᕐᑎᑦᓯᔨ ᐅᓇᑕᕐᑐᒃᓮᑦ ᓯᕗᕌᓄᐊᕐᓗᓂ ᐅᓇᑕᕐᑐᒃᓴᓄᑦ ᐅᖃᕐᑐᒃᓴᐅᕗᖅ,

³ ‘ᐃᓴᕆᐊᓕᒥᐅᖑᔪᓯ, ᓈᓚᒋᑦᓯ! ᐅᓪᓗᒥ ᐅᓇᑕᕆᐊᕐᓂᐊᕋᑦᓯ ᐊᑭᕋᑦᓯᓐᓂᒃ, ᓯᕘᕋᒋᔭᒃᓴᕆᓐᖏᓚᓯ, ᓴᐱᕐᑐᒃᓴᐅᓇᓯᓗ, ᐅᕝᕙᓗ ᐅᐃᒻᒪᒃᑐᒃᓴᐅᓐᖏᓚᓯ.

⁴ ᐊᑕᓂᐅᑉ ᒎᑎᑦᓯ ᐃᓚᒋᓂᐊᕐᒪᓯ, ᑖᑦᓱᒪᓗ ᓵᓚᒃᓴᕐᑎᓐᓂᐊᕐᐹᓯ.’

⁵ “ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖏᑦ ᐅᓇᑕᕐᑐᒃᓴᓄᑦ ᐅᖃᕐᑐᒃᓴᐅᕗᑦ, ‘ᐅᕙᓃᑦᑐᖃᕐᐹ ᐃᒡᓗᓕᐅᕋᑖᕐᓯᒪᔪᒥᒃ, ᓱᓕᓕ ᑐᒃᓯᐊᕐᓂᒃᑯᑦ ᑐᓂᔭᐅᓯᒪᖏᑦᑐᒥᒃ? ᑍᒤᓯᒪᔪᖃᕐᐸᑦ ᑖᓐᓇ ᐊᖏᕐᕋᕐᑐᒃᓴᐅᕗᖅ, ᐊᖏᕐᕋᖏᒃᑯᓂ, ᐅᓇᑕᕐᑐᓂᓗ ᑐᖁᑕᐅᒃᐸᑦ, ᑕᕝᕙ ᐊᓯᐊᓄᑦ ᐃᒡᓗᒃᓴᖓ ᑐᒃᓯᐊᕐᓂᒃᑯᑦ ᑐᓂᔭᐅᓕᕋᔭᕐᐳᖅ.

⁶ ᐅᕙᓃᑦᑐᖃᕆᕚ ᐱᕈᕐᓰᕕᖁᑎᒥᓂ ᕔᓂᒃᓴᓂᒃ ᑲᓐᖓᕐᓱᐃᕋᑖᕐᓯᒪᔪᒥᒃ, ᓱᓕ ᕔᓂᒃᓴᓂᒃ ᑲᑎᕐᓱᐃᔪᓐᓇᕐᓯᓚᐅᖏᑦᑐᒥᒃ? ᑍᒤᓯᒪᔪᖃᕐᐸᑦ ᑖᓐᓇ ᐊᖏᕐᕋᕐᑐᒃᓴᐅᕗᖅ, ᐊᖏᕐᕋᖏᒃᑯᓂ, ᐅᓇᑕᕐᑐᓂᓗ ᑐᖁᑕᐅᒃᐸᑦ, ᑕᕝᕙ ᐊᓯᖓᓄᑦ ᕔᓃᑦ ᖁᕕᐊᓲᑎᒋᔭᐅᓗᑎᒃ ᐱᔭᐅᓕᕋᔭᕐᐳᑦ.

⁷ ᐅᕙᓃᑦᑐᖃᕆᕚ ᓄᓕᐊᒃᓴᖃᕐᑐᒥᒃ ᑲᑎᑎᑕᒃᓴᐅᓂᕐᒧᑦ ᐊᑐᐃᓐᓇᐅᓕᕐᓯᒪᔪᒥᒃ? ᑍᒤᑦᑐᖃᕐᐸᑦ ᑖᓐᓇ ᐊᖏᕐᕋᕐᑐᒃᓴᐅᕗᖅ, ᐊᖏᕐᕋᖏᒃᑯᓂ, ᐅᓇᑕᕐᑐᓂᓗ ᑐᖁᑕᐅᒃᐸᑦ, ᑕᕝᕙ ᐊᓯᐊᑕ ᐊᕐᓇᖅ ᑖᓐᓇ ᓄᓕᐊᕐᑖᕆᓕᕋᔭᕐᒪᒍ.’

⁸ “ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖏᑦ ᐅᖃᒃᑲᓐᓂᕋᔭᕆᕗᑦ ᐅᓇᑕᕐᑐᒃᓴᓄᑦ, ‘ᐅᕙᓃᑦᑐᖃᕐᐹ ᓯᕘᕋᓂᕐᒧᑦ ᓄᑭᖃᑦᓯᐊᕈᓐᓃᕐᑐᒥᒃ? ᑍᒤᑦᑐᖃᕐᐸᑦ ᑖᓐᓇ ᐊᖏᕐᕋᕐᑐᒃᓴᐅᕗᖅ, ᐊᖏᕐᕋᖏᒃᑯᓂ, ᐃᓚᒥᓂᒃ ᓯᕘᕋᓕᕐᑎᑦᓯᒐᔭᕐᒪᑦ.’

⁹ ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖏᑦ ᐅᖃᓪᓚᒌᕐᐸᑕ ᐅᓇᑕᕐᑐᒃᓴᓄᑦ, ᐊᖓᔪᖅᑳᖏᑦ ᐊᑐᓂᑦ ᐃᓚᒌᖕᓂᐊᕐᑐᓂᒃ ᓂᕈᐊᓕᕋᔭᕐᐳᑦ.

¹⁰ “ᐃᒡᓗᒐᓴᖕᓄᑦ ᖃᒡᓕᓕᕈᑦᓯ ᐅᓇᑕᕆᐊᕐᓗᓯ, ᐅᓇᑕᖏᑦᔪᑎᒃᓴᒥᒃ ᐅᖃᕐᕕᐅᑎᑦᓴᕆᐊᖃᕐᐸᓯ.

¹¹ ᐅᓇᑕᕈᒪᖏᓪᓗᑎᒃ ᑭᐅᒃᐸᑕ ᐊᕙᓗᕐᔪᐊᖓᑕᓗ ᐅᒃᑯᐊᖓᓂᒃ ᒪᑐᐃᕐᓯᓗᑎᒃ ᓴᐱᓕᕐᐸᑕ, ᑕᕝᕙ ᐃᓄᓕᒫᖏᑦ ᓯᐊᓛᕐᑖᕆᔭᒃᓴᕆᕙᓯ ᐊᒃᓱᕈᕐᓇᕐᑐᓂᒡᓗ ᓴᓇᑎᑕᒃᓴᕆᕙᓯ.

¹² ᐃᒡᓗᒐᓴᒡᔪᐊᕐᒥᐅᓪᓕ ᐃᓕᑦᓯᓐᓄᑦ ᐃᒻᒥᖕᓂᒃ ᑐᓂᔪᒪᖏᑉᐸᑕ, ᐅᓇᑕᖔᕈᒫᒃᐸᑕᓗ, ᑕᕝᕙ ᐊᕙᓗᔭᒃᓴᕆᕙᓯ ᐅᓇᑕᕐᑐᒃᓴᖁᑎᑦᓯᓐᓄᑦ.

¹³ ᐊᑕᓂᐅᓪᓗ ᒎᑎᑦᓯ ᐃᒡᓗᒐᓮᑦ ᑖᒃᑯᐊ ᐃᓕᑦᓯᓐᓄᑦ ᑐᓂᒃᐸᒋᑦ ᓵᓚᒋᒍᑦᓯᐅᒡᓗ, ᑕᕝᕙ ᑕᕝᕙᓃᑦᑐᑦ ᐊᖑᑎᓕᒫᑦ ᑐᖁᑕᒃᓴᕆᕙᓯ.

¹⁴ ᐊᕐᓁᓪᓕ ᕿᑐᕐᖓᖏᓪᓗ, ᐆᒪᔪᖁᑎᖏᓪᓗ ᓱᓇᑐᐃᓐᓇᓕᒫᖏᓪᓗ ᑕᕝᕙᓂ ᐃᒡᓗᒐᓴᒡᔪᐊᓃᑦᑐᑦ ᐱᑖᕆᔭᒃᓴᕆᕙᓯ. ᐊᑭᕋᑦᓯ ᐱᖁᑎᓕᒫᑦᓯᐊᖏᑦ ᐊᑕᖏᕐᓗᒋᑦ ᐱᑖᕆᔪᓐᓇᕐᐸᓯ. ᐊᑕᓂᐅᑉ ᒎᑎᑦᓯ ᑐᓂᓯᒪᖕᒪᒋᑦ ᐃᓕᑦᓯᓐᓄᑦ.

¹⁵ ᑍᒫᒃ ᑕᕝᕙ ᐃᒡᓗᒐᓮᑦ ᐅᖓᓯᒋᔭᑦᓯᓐᓃᑦᑐᑦ ᐱᓇᓱᐊᕐᕕᒋᔭᒃᓴᕆᕙᓯ, ᑕᒫᓐᖓᑦ ᐃᓅᖃᑎᒌᒡᔪᐊᓂᑦ ᓄᓇᑖᕆᓛᕐᑕᑦᓯᓐᓂᑦ ᐅᖓᓯᒃᐸᑕ.

¹⁶ “ᓄᓇᒋᓕᕐᑕᑦᓯᓐᓂᓕ ᐃᒡᓗᒐᓮᑦ ᓵᓚᒋᒍᑦᓯᐅᒃ ᐊᑕᓂᐅᑉ ᒎᑎᑦᓯ ᐃᓕᑦᓯᓐᓄᑦ ᑐᓂᒃᐸᒋᑦ, ᐃᓄᓕᒫᖏᑦ ᐊᓂᕐᓂᖃᕐᑐᓕᒫᑦ ᑐᖁᑕᒃᓴᕆᕙᓯ.

¹⁷ ᐊᑕᖏᑦᓯᐊᕐᓗᒋᑦ ᐃᓄᖏᑦ ᓄᒍᑦᓯᐊᕆᐊᖃᕐᐸᓯ, ᕼᐃᑍᑎᑦ, ᐊᒧᕅᑎᓪᓗ, ᑬᓇᓂᒥᐅᑦ, ᐱᕆᔧᑎᓪᓗ, ᕼᐃᕔᑎᑦ, ᔨᐳᓮᑎᓪᓗ, ᑍᒤᓕᐅᖁᓪᓗᓯ ᐊᑕᓂᐅᑉ ᒎᑎᑦᓯ ᐱᖁᓯᒪᖕᒪᓯ.

¹⁸ ᑐᖁᑕᒃᓴᕆᕙᓯ, ᐊᔪᕆᕐᓱᕐᑕᐅᖁᓇᓯ ᒎᑎᓐᖑᐊᕆᔭᒥᖕᓄᑦ ᑐᒃᓯᐊᕐᓗᑎᒃ ᐱᐅᖏᑦᑐᐊᓗᖕᓂᒃ ᐃᓕᖅᑯᓯᕆᖃᑦᑕᕐᑕᖏᓐᓂᒃ, ᐊᔪᕐᑐᓕᑎᑕᐅᖁᓇᓯᓗ ᐊᑕᓂᕐᒧᑦ ᒎᑎᑦᓯᓐᓄᑦ.

¹⁹ “ᐃᒡᓗᒐᓴᖕᓂᒃ ᐊᑯᓂ ᐊᕙᓗᓯᓯᒪᓕᕈᑦᓯ, ᐅᓇᑕᕐᓂᒃᑯᑦ ᓵᓚᒋᓇᓱᐊᕐᓗᒋᑦ, ᓇᐹᕐᑐᐃᑦ ᐱᕈᕐᑐᓖᑦ ᓇᑲᑎᕐᑕᒃᓴᕆᓐᖏᓚᓯ, ᐅᓕᒪᐅᑎᓄᑦ. ᐱᕈᕐᑐᖏᑦ ᓂᕿᒋᔭᕆᐊᖃᕋᑦᓯᐅᒃ, ᓇᐹᕐᑐᐃᓪᓕ ᓇᑲᑎᕐᑕᒃᓴᕆᓐᖏᓚᓯ. ᓇᐹᕐᑐᑦ ᓇᑎᕐᓇᒦᑦᑐᑦ ᐊᑭᕋᕆᖏᓐᓇᑦᓯᐅᒃ.

²⁰ ᓇᐹᕐᑐᐃᓪᓕ ᐊᓯᖏᑦ ᓇᑲᑎᕈᓐᓇᕐᐸᓯ ᖃᐅᔨᒪᔭᓯ ᓂᕿᒃᓴᓕᐅᕈᓐᓇᖏᑦᑐᑦ ᑕᒪᒃᑯᐊ ᓇᑲᑎᕐᓗᒋᑦ ᓴᐴᓗᑕᓕᐊᕆᓗᒋᓪᓗ ᐃᒡᓗᒐᓴᒡᔪᐊᓄᑦ ᐃᓕᑦᓯᓐᓂᒃ ᐅᓇᑕᕋᓱᐊᕐᑐᓄᑦ, ᓵᓚᖃᓚᐅᖏᓐᓂᑦᓯᓐᓂ ᑖᒃᑯᓂᖓ.”