ᒨᓯᓯ ᑕᓪᓕᒪᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᑕᕝᕙ ᐅᑎᒧᑦ ᐊᐅᓪᓚᓕᓚᐅᕐᐳᒍᑦ, ᐃᖏᕐᕋᓕᕐᓗᑕᓗ ᐃᓄᖃᖏᑦᑐᒧᑦ ᐃᒪᐅᑉ ᐊᐅᐸᓗᒃᑕᐅᑉ ᓇᓛᓄᑦ, ᑍᒫᒃ ᐊᑕᓂᐅᑉ ᐱᖁᓚᐅᕐᒪᑎᒍᑦ, ᑕᕝᕙᓂᓗ ᓄᓇᖃᓕᓚᐅᕐᐳᒍᑦ ᐊᑯᓂᒐᓚᒃ ᓰᐊᕆᐅᑉ ᖃᖅᑲᖏᓐᓂ.

² “ᑕᕝᕙ ᐊᑕᓂᐅᑉ ᐅᖃᐅᑎᓚᐅᕐᐹᖓ

³ ᑕᒫᓂ ᖃᖅᑲᓂ ᓇᔪᕐᑕᑦᑎᓐᓂ ᐊᑯᓂᐅᓂᕗᑦ ᓈᒻᒪᒃᓯᓂᕋᕐᓗᒍ ᓅᒋᐊᖃᓕᕐᓂᑦᑎᓐᓂᒡᓗ ᐅᓐᓄᐊᓪᓗᐊᑉ ᓇᓛᓄᑦ.

⁴ ᐃᓕᑦᓯᓐᓂᒃ ᐅᖃᐅᑦᔨᖁᓪᓗᖓ ᖃᐅᔨᒪᑦᔪᑎᒃᓴᑦᓯᓐᓂᒃ ᐃᒫᒃ ᐅᖃᐅᑎᓚᐅᕐᐹᖓ: ‘ᓰᐊᕆᐅᑉ ᖃᖅᑲᖏᑎᒍᑦ ᐃᖏᕐᕋᓂᐊᓕᕋᑦᓯ, ᑖᒃᑯᐊ ᑕᒫᓂ ᓄᓇᓖᑦ ᐅᖓᓯᒋᔭᑦᓯᒍᑦ ᐃᓚᒋᒐᓗᐊᕐᐸᓯ, ᐄᓴᐅᑉ ᑭᖑᕚᕆᖕᒪᒋᑦ. ᐃᓕᑦᓯᓐᓂᒡᓕ ᓯᕘᕋᓂᐊᕐᐳᑦ,

⁵ ᑖᒃᑯᐊ ᐅᓇᑕᕋᓱᐊᕐᑕᒃᓴᕆᓐᖏᓚᓯ, ᑖᒃᑯᐊ ᓄᓇᖓᓐᓂᒃ ᒥᑭᔪᒥᒡᓘᓐᓃᑦ ᐃᑎᒐᒃᑎᑐᑦ ᐊᖏᑎᒋᔪᒥᒡᓘᓐᓃᑦ ᑐᓂᓯᕕᒋᓂᐊᖏᓐᓇᑦᓯ. ᑕᒪᓐᓇ ᓄᓇᒋᔭᖓᑦ ᓰᐊᕆ; ᐄᓴᐅᑉ ᑭᖑᕚᖏᓐᓄᑦ ᓄᓇᒋᔭᐅᖁᓪᓗᒍ ᑐᓂᓯᒪᒐᒃᑯ.

⁶ ᓂᕿᒃᓴᓂᒡᓕ ᑖᒃᑯᓇᓐᖓᑦ ᓂᐅᕕᕈᓐᓇᕋᓗᐊᕐᐳᓯ ᑮᓇᐅᔭᓄᑦ, ᓂᕿᒃᓴᖃᖁᓪᓗᓯ; ᐃᒥᕐᒥᒃᑕᐅᖅ ᓂᐅᕕᕈᓐᓇᕆᕗᓯ ᐃᒥᕈᓐᓇᖁᓪᓗᓯ.’

⁷ ᐊᑕᓂᐅᑉ ᒎᑎᑦᓯ ᓮᒻᒪᕐᑎᓯᒪᖕᒪᓯ ᐱᓇᓱᐊᕐᓯᒪᔭᑦᓯᒍᑦ ᑕᒤᑎᒍᑦ. ᑖᑦᓱᒪᓗ ᑲᒪᒋᑦᓯᐊᕐᓯᒪᕚᓯ ᑕᒪᐅᓇ ᓄᓇᒃᑯᑦ ᐃᓄᖃᖏᑦᑐᒃᑯᑦ ᐃᖏᕐᕋᑎᓪᓗᓯ, ᑖᑦᓱᒪᓗ ᐃᓚᒋᓚᐅᕐᐹᓯ ᑖᒃᑯᓇᓂ ᐊᕐᕌᒍᓂ 40ᓂ, ᓱᓇᓕᒫᑦᓯᐊᓂᒡᓗ ᑭᓐᖒᒪᒋᔭᑦᓯᓐᓂᒃ ᑐᓂᓯᕕᒋᓯᒪᓪᓗᓯ.

⁸ “ᑍᒤᒻᒪᑦ ᑕᕝᕙ ᑲᔪᓯᓕᓚᐅᕐᐳᒍᑦ, ᐃᓚᒋᔭᕗᑦ ᕿᒪᒃᓗᒋᑦ ᐄᓴᐅᑉ ᑭᖑᕚᖏᑦ ᓰᐊᕆᒦᑦᑐᑦ, ᐃᖏᕐᕋᓪᓗᑕ ᐊᕋᐸᐅᑉ ᐊᖅᑯᑎᖏᑦ ᕿᒪᒡᓗᒋᑦ ᐃᓚᑎᒥᑦ ᐃᔨᐅᓂ-ᒋᐱᕆᒥᓪᓗ. ᓴᖑᓚᐅᕐᐳᒍᑦ ᑐᕌᓕᕐᓗᑕ ᓄᓇᒧᑦ ᒧᐊᐱᐅᑉ ᐱᕈᕐᑐᖃᖏᑦᑐᖓᓄᑦ.

⁹ ᐊᑕᓂᐅᑉ ᐅᖃᐅᑎᓚᐅᕐᐹᖓ, ‘ᐃᓄᐃᑦ ᒧᐊᐱᒥᐅᑦ ᐸᒡᕕᓴᕐᓂᐊᕐᓇᒋᑦ, ᓘᑎᐅᑉ ᑭᖑᕚᕆᖕᒪᒋᑦ, ᐅᓇᑕᕋᓱᐊᕐᓂᐊᕐᓇᒋᓪᓗ. ᓄᓇᒥᒃ ᐋᕆᒥᒃ ᐃᒡᓗᒐᓴᒡᑖᕐᑎᓯᒪᒐᒃᑭᑦ, ᑖᒃᑯᐊᓕ ᓄᓇᖓᓐᓂᒃ ᒥᑭᔪᒥᒡᓘᓐᓃᑦ ᑐᓂᓯᕕᒋᓂᐊᓐᖏᓚᑦᓯ.’”

¹⁰ (ᓴᓐᖏᔪᕐᔪᐊᕌᓗᐃᑦ ᐃᒥᒻᒥᒃ ᑍᔭᐅᔪᑦ ᐃᓄᒃᐹᓘᓪᓗᑎᒡᓗ ᐅᓄᕐᑐᐊᓘᑦᓱᑎᒃ ᑕᕝᕙᓂ ᓄᓇᒥ ᐊᕐᒥ ᓄᓇᖃᕐᐸᓚᐅᕐᐳᑦ. ᐊᓇᑭᒥᓂᒃ ᐃᓅᖃᑎᒌᓂᒃ ᑍᔭᐅᔪᑎᑐᑦ ᐊᖏᔫᑕᐅᑎᒋᓚᐅᕐᐳᑦ, ᑖᒃᑯᑎᑐᓇᖅ ᐊᓇᑭᒥᐅᑎᑐᑦ ᐊᖏᔫᑎᐊᓗᒃᑎᑐᑦ.

¹¹ ᐊᓇᑭᒥᐅᑎᑐᑦ ᐊᑎᖃᕐᑎᑕᐅᕙᓚᐅᕆᕗᑦ ᕆᐰᒻᓂᒃ; ᒧᐊᐱᒥᐅᓂᓪᓕ ᐊᑎᖃᕐᑎᑕᐅᓚᐅᕐᐳᑦ ᐃᒥᒻᒥᓂᒃ.

¹² ᐃᓄᐃᑦᑕᐅᖅ ᕼᐅᕅᑎᒥᐅᑦ ᓄᓇᖃᕐᐸᓚᐅᕆᕗᑦ ᓰᐊᕆᒥ, ᐄᓴᐅᓪᓕ ᑭᖑᕚᖏᑕ ᑖᒃᑯᐊ ᓄᓇᒥᑦ ᑕᕝᕙᓐᖓᑦ ᐊᓂᑎᓚᐅᕐᐰᑦ, ᐃᓅᖃᑎᒌᖕᓂᖏᓪᓗ ᓄᖑᑎᓪᓗᒋᑦ, ᐃᒻᒥᖕᓂᒃ ᑕᕝᕙᓂ ᓄᓇᑖᖔᕐᓗᑎᒃ, ᓲᕐᓗᑦᑕᐅᖅ ᐃᓴᕆᐊᓕᒥᐅᑦ ᒪᑐᒪ ᑭᖑᕐᖓᒍᑦ ᐊᑭᕋᕐᑐᕐᑎᒥᖕᓂᒃ ᐊᐅᓪᓚᕐᑎᑦᓯᔪᒫᕐᒪᑕ ᑕᒫᓐᖓᑦ ᓄᓇᒥᑦ ᐊᑕᓂᐅᑉ ᑐᓂᓯᒪᔭᖓᓂᑦ ᑖᒃᑯᓄᖓ.)

¹³ “ᑭᖑᓂᖓᒍᑦ ᐃᑳᕐᓯᓕᓚᐅᕆᕗᒍᑦ ᑰᖕᒥᒃ ᔨᕆᑦᒥᒃ ᐊᑎᓕᖕᒥᒃ ᐊᑕᓂᐅᑉ ᑍᒫᒃ ᐱᖁᔨᓂᖓ ᒪᓕᒡᓗᒍ.

¹⁴ ᑕᒪᐅᓇ ᑰᒃᑯᑦ ᔨᕆᑦᑯᑦ ᐃᑳᓚᐅᕐᐳᒍᑦ ᓄᓇᒥᑦ ᑲᑎᓯ-ᐸᕐᓂᐊᒥᑦ ᐊᐅᓪᓚᕐᓯᒪᓂᑦᑕ ᐊᕐᕌᒍᖏᑕ 38ᒋᓕᕐᑕᖓᓂ. ᐊᖑᑎᓕᒫᑦ ᐅᓇᑕᕐᑐᒃᓴᐅᔪᑦ ᑍᑦᓱᒪᓂᐅᑎᓪᓗᒍ ᑐᖁᖓᔪᐃᓐᓇᐅᓕᕐᑎᓪᓗᒋᑦ, ᐊᑕᓂᖅ ᑍᒤᓐᓂᐊᕐᓂᕅᓪᓗᓂ ᐅᖃᓚᐅᕐᒪᑦ.

¹⁵ ᐊᑕᓂᐅᑉ ᓵᓐᖎᓐᓇᓚᐅᕐᐰᑦ ᓄᖑᓚᐅᖅᑳᕋᓂᒋᑦ.

¹⁶ “ᑐᖁᔪᐃᓐᓇᐅᓯᒪᓕᕐᒪᑕᓕ,

¹⁷ ᐊᑕᓂᐅᑉ ᐅᖃᐅᑎᕚᑎᒍᑦ,

¹⁸ ‘ᐅᓪᓗᒥᓕ ᒧᐊᐱᒥᐅᑦ ᓄᓇᖓᒍᑦ ᐃᖏᕐᕋᓂᐊᕐᐳᓯ ᓄᓇ ᐋᕆ ᐊᖅᑯᑎᒋᓗᒍ.

¹⁹ ᑕᕝᕙ ᐊᒧᓁᑎᒃᑯᑦ ᓄᓇᖓᓐᓄᑦ ᖃᓂᑦᑑᓕᕐᓂᐊᕐᐳᓯ, ᓘᑎᐅᑉ ᑭᖑᕚᖏᓐᓄᑦ. ᑖᒃᑯᐊ ᐸᒡᕕᓴᕐᓂᐊᕐᓇᓯᒋᒃ ᐅᓇᑕᕋᓱᐊᕐᓂᐊᕐᓇᒋᓪᓗ, ᑖᒃᑯᐊ ᓄᓇᖓᑕ ᐃᓚᖓᓐᓂᒃ ᒥᑭᔪᒥᒡᓘᓐᓃᑦ ᑐᓂᓯᓂᐊᖏᓐᓇᒪ ᐃᓕᑦᓯᓐᓄᑦ; ᓄᓇ ᑖᒃᑯᓄᖓ ᑐᓂᔭᕇᕐᓯᒪᒐᒃᑯ.’”

²⁰ (ᑕᒪᓐᓇ ᓄᓇᒋᔭᐅᔪᖅ ᐊᑎᖃᕐᑎᑕᐅᓲᖑᒋᕗᖅ ᕆᐰᒥᐅᑦ ᓄᓇᖓᓐᓂᒃ, ᐃᓄᐃᑦ ᑕᒫᓂ ᓄᓇᖃᓚᐅᕐᓯᒪᔪᑦ ᐊᑎᖃᐅᑎᒋᔭᐅᓪᓗᑎᒃ; ᐊᒧᓁᑎᒥᐅᓂᓪᓕ ᐊᑎᖃᕐᑎᑕᐅᓚᐅᕐᐳᑦ ᔨᒻᔪᒥᒻᓂᒃ.

²¹ ᑖᒃᑯᐊᓗ ᐊᔪᖏᑦᑐᐊᓘᓚᐅᕐᐳᑦ ᐅᓄᕐᓗᑎᒡᓗ ᐊᖏᔫᑎᐊᓘᓚᐅᕐᐳᑦ ᐊᓇᑭᒥᐅᑎᑐᑦ. ᐊᑕᓂᐅᓪᓕ ᓄᖑᑕᐅᑎᓚᐅᕐᐰᑦ, ᑍᒤᒻᒪᑦ ᐊᒧᓁᑎᒥᐅᓂᑦ ᓄᓇᑖᕆᔭᐅᓚᐅᕐᐳᖅ ᓄᓇᖓᑦ ᑕᕝᕙᓂᓗ ᓄᓇᖃᓕᕐᓗᑎᒃ.

²² ᐊᒻᒪ ᐊᑕᓂᖅ ᑍᒫᑦᓮᓐᓇᖅ ᐱᓇᓱᐊᓚᐅᕆᕗᖅ ᓰᐊᕆᒥᐅᓄ, ᐄᓴᐅᑉ ᑭᖑᕚᖏᓐᓄᑦ, ᕼᐅᕅᑎᒥᐅᑦ ᓄᖑᑕᐅᑎᓚᐅᕐᐰᑦ, ᐃᑐᒤᑎᒥᐅᑦ ᑕᕝᕙᓂ ᓄᓇᑖᖔᕈᓐᓇᖁᓪᓗᒋᑦ, ᒫᓐᓇ ᓱᓕ ᑕᕝᕙᓂ ᓄᓇᖃᕐᐳᑦ.

²³ ᐃᒪᕐᔪᐊᓪᓕ ᒥᑎᑎᕆᓂᐊᑉ ᐋᐅᐃᒥᐅᑦ ᓯᓈᓃᑦᑐᑦ ᓄᓇᓖᑦ ᓄᓇᑖᕆᔭᐅᓯᒪᕗᑦ ᕿᑭᕐᑕᒥᐅᑕᕐᓂᑦ ᑲᑉᕼᐊᑐᐊᕆᒥᐅᓂᑦ, ᑕᒫᓂ ᓄᓇᓕᑐᖃᐅᓚᐅᕐᑐᑦ ᓄᖑᑕᐅᓚᐅᕐᐳᑦ, ᓄᓇᓕᒫᖓᓗ ᓄᓇᑖᕆᔭᐅᓪᓗᓂ ᑕᒪᑐᒪ ᓄᓇᐅᑉ ᓯᕿᓂᖓᓃᑦᑐᑦ ᒑᓴᒥᐅᑦ ᐊᒡᓛᑦ ᑎᑭᓪᓗᒋᑦ.)

²⁴ “ᓄᓇᓖᓪᓕ ᒧᐊᐱᒥᐅᑦ ᖄᖏᕋᑦᑎᒋᒃ, ᐊᑕᓂᐅᑉ ᐅᖃᐅᑎᕚᑎᒍᑦ, ‘ᒫᓐᓇ ᐋᕐᓄᓂᐅᑉ ᑰᖓ ᐃᑳᓕᕐᓯᐅᒃ. ᐊᒧᕅᑎᒃᑯᑦ ᐊᖓᔪᖅᑳᕐᔪᐊᖓᑦ ᓮᕼᐆᓂ ᕼᐃᓴᐸᓂᒥ ᓄᓇᓕᒃ ᐃᓕᑦᓯᓐᓄᑦ ᑐᓂᕙᕋ, ᓄᓇᖓᓗ ᐱᖃᓯᐅᑎᓪᓗᒍ. ᐅᓇᑕᕆᐊᓕᕐᓯᐅᒃ, ᓄᓇᖓᓗ ᓄᓇᑖᕆᓗᒍ.

²⁵ ᐅᓪᓗᒥᒥᑦ ᐱᒋᐊᕐᓗᒍ ᓇᓂᑐᐃᓐᓇᒥᐅᓄᑦ ᐃᓄᖕᓄᑦ ᓯᕘᕋᒋᔭᐅᓕᕐᑎᓐᓂᐊᕐᐸᑦᓯ. ᐃᓕᑦᓯᓐᓂᒃ ᑍᓯᔪᖃᑐᐊᕐᐸᑦ ᑍᒃᑯᐊᓕᒫᖅ ᓴᔪᓕᖃᑦᑕᕐᓂᐊᕐᐳᑦ ᑲᑉᐱᐊᓱᒧᑦ.’”

ᐃᓴᕆᐊᓕᒥᐅᑦ ᓵᓚᖃᕐᓂᖓᑦ ᐊᖓᔪᖅᑳᕐᔪᐊᕐᒥᒃ ᓯᕼᐅᓐᒥᒃ

²⁶ “ᑕᕝᕙ ᑎᓕᓯᓕᕐᐳᖓ ᓄᓇᒥᑦ ᐃᓄᖃᖏᑦᑐᒥᑦ ᑭᑎᒫᑎᒥᑦ ᐱᔪᓂᒃ ᐊᖓᔪᖅᑳᕐᔪᐊᕐᒧᑦ ᓮᕼᐆᓂᒧᑦ ᕼᐃᓴᐸᓂᒥ ᓄᓇᖃᕐᑐᒧᑦ ᐅᓇᑕᖏᑦᔪᑎᒃᓴᒥᒃ ᐅᖃᐅᓯᖃᕐᑐᓂᒃ ᐃᒤᓕᔪᓂᒃ:

²⁷ ‘ᓄᓇᑦᓯᒍᑦ ᐊᖅᑯᓵᑐᐃᓐᓇᕈᓐᓇᕐᑎᓚᐅᕐᑎᒍᑦ, ᐊᖅᑯᑎᒃᑰᑐᐃᓐᓇᕐᓗᑕ ᐃᖏᕐᕋᓂᐊᕐᐳᒍᑦ, ᐊᖅᑯᑎᐅᑉ ᓯᓚᑖᓄᑦ ᓴᖑᓂᐊᓐᖏᓚᒍᑦ ᓴᐅᒥᒧᑦ ᑕᓕᕐᐱᒧᓪᓘᓐᓃᑦ.

²⁸ ᓂᕿᒃᓴᑦᑎᓐᓂᒃ ᑮᓇᐅᔭᓄᑦ ᓂᐅᕕᕐᓂᐊᕐᐳᒍᑦ ᓂᕆᔪᓐᓇᖁᓪᓗᑕ ᐃᒥᒃᓴᑦᑎᓐᓂᒡᓗ ᐃᒥᕈᓐᓇᖁᓪᓗᑕ, ᓄᓇᑦᓯᒍᑦ ᐊᖅᑯᓵᕈᓐᓇᕐᑎᑕᐅᔪᒪᑐᐃᓐᓇᕐᐳᒍᑦ.

²⁹ ᑰᒃ ᔪᐊᕐᑕᓂᐅᑉ ᑰᖓ ᐃᑳᕐᓗᒍ ᓄᓇᒧᑦ ᐊᑕᓂᐅᑉ ᒎᑎᑦᑕ ᑐᓂᓯᒪᔭᖓᓄᑦ ᑎᑭᓚᐅᖏᓐᓂᑦᑎᓐᓂ. ᐄᓴᐅᑉ ᑭᖑᕚᖏᑦ, ᓰᐊᕆᒥ ᓄᓇᓖᑦ, ᒧᐊᐱᒥᐅᓪᓗ, ᐋᕆᒥ ᓄᓇᓖᑦ, ᐅᕙᑦᑎᓐᓂᒃ ᓄᓇᒥᒃᑎᒍᑦ ᐊᖅᑯᓵᕈᓐᓇᕐᑎᑦᓯᖃᑦᑕᓚᐅᕐᓂᖏᑎᑐᑦ ᐱᔪᓐᓇᕐᑎᑕᐅᔪᒪᕗᒍᑦ.’

³⁰ “ᕼᐃᓴᐸᓂᒥᓕ ᐊᖓᔪᖅᑳᕐᔪᐊᖅ ᓮᕼᐆᓂ ᓄᓇᒥᒍᑦ ᐊᖅᑯᓵᖁᔨᓚᐅᓐᖏᓚᖅ ᐅᕙᑦᑎᓐᓂᒃ. ᐊᑕᓂᐅᑉ ᒎᑎᑦᓯ ᐊᖓᔪᖅᑳᕐᔪᐊᑉ ᐆᒻᒪᑎᖓ ᓯᑎᔫᑎᓚᐅᕐᒪᒍ ᓈᒻᒪᒃᓴᖏᑦᑑᑎᑦᓱᓂᐅᒡᓗ, ᓵᓚᖃᕈᓐᓇᖁᓪᓗᑕ ᓄᓇᖁᑎᖓᓗ ᓄᓇᖁᑎᑖᕆᓗᒍ, ᒫᓐᓇ ᓱᓕ ᑖᓐᓇ ᓇᔪᕐᐸᕗᑦ.

³¹ “ᑕᕝᕙ ᐊᑕᓂᐅᑉ ᐅᖃᐅᑎᕚᖓ, ‘ᑕᑯᒋᑦ, ᐊᖓᔪᖅᑳᕐᔪᐊᖅ ᓮᕼᐆᓂ ᓄᓇᖁᑎᖓᓗ ᐃᓕᖕᓄᑦ ᑐᓂᕙᒃᑲ; ᓄᓇᖁᑎᖓᓂᒃ ᐊᕐᓵᕐᓗᒍ ᓄᓇᖁᑎᖓ ᓄᓇᑖᕆᓕᕐᓯᐅᒃ.’

³² ᓮᕼᐆᓂ ᑕᕝᕙ ᐊᖑᑎᖁᑎᓕᒫᒥᓂᒃ ᐃᓚᖃᕐᓗᓂ ᐅᕙᑦᑎᓐᓂᒃ ᐅᓇᑕᕋᓱᐊᓕᓚᐅᕐᐳᖅ ᓄᓇᐅᑉ ᔧᕼᐋᓯᐅᑉ ᖃᓂᒋᔮᓂ,

³³ ᐊᑕᓂᐅᓪᓕ ᒎᑎᑦᑕ ᐅᕙᑦᑎᓐᓄᑦ ᑐᓂᓚᐅᕐᐹ; ᑕᕝᕙ ᑐᖁᓚᐅᕐᐸᕗᑦ, ᐃᕐᓂᖏᓪᓗ, ᐃᓄᓕᒫᖏᓪᓗ.

³⁴ ᑍᑦᓱᒪᓂᑦᓮᓐᓇᕐᑕᐅᖅ ᓄᓇᓖᑦ ᖃᓂᒋᔮᓃᑦᑐᓕᒫᑦ ᓵᓚᒋᓚᐅᕐᐸᕗᑦ ᓄᖑᑦᓯᐊᕐᓗᒋᓪᓗ, ᐃᓄᓕᒫᖏᓪᓗ ᑐᖁᓪᓗᒋᑦ, ᐊᖑᑎᑦ, ᐊᕐᓁᑦ, ᓄᑕᖅᑲᓪᓗ. ᐊᒥᐊᒃᑯᖃᕐᑎᑦᓯᓚᐅᓐᖏᓚᒍᓪᓘᓐᓃᑦ.

³⁵ ᐃᓅᑦᔪᑎᒃᓴᐅᔪᓐᓇᕐᑐᓪᓕ ᐱᓚᐅᕐᐸᕗᑦ ᓄᓇᓖᓪᓗ ᓱᓇᑐᐃᓐᓇᓕᒫᖏᑦ ᐱᑖᕆᓪᓗᒋᑦ.

³⁶ ᐊᑕᓂᐅᑉ ᒎᑎᑦᑕ ᓵᓚᖃᕐᑎᓚᐅᕐᒪᑎᒍᑦ ᐊᕈᐃᕆᒥᑦ ᐋᕐᓄᓂᐅᑉ ᓇᕐᓴᖓᓂᑦ ᐱᒋᐊᕐᓗᒍ, ᑕᕝᕙᓂᓗ ᓇᕐᓴᒥ ᐃᒡᓗᒐᓮᑦ ᐊᑯᓐᓂᖓᓃᑦᑐᑦ, ᓄᓇᒧᑦ ᒋᓕᐊᑎᒧᑦ ᑎᑭᓪᓗᒋᑦ. ᐃᒡᓗᒐᓮᓪᓕ ᐊᕙᓗᕐᔪᐊᖏᑦ ᐊᔪᕐᓇᓗᐊᕐᑐᖃᓚᐅᓐᖏᓚᑦ ᐅᕙᑦᑎᓐᓄᑦ.

³⁷ ᑭᓯᐊᓂᓕ ᓄᓇᓖᑦ ᐊᒧᓁᑎᒥᐅᑦ ᖃᓂᒋᔮᓄᐊᓚᐅᓐᖏᓚᒍᑦ ᑰᓪᓗ ᐊᑎᓕᐅᑉ ᔭᐴᒃᒥᒃ ᐅᕝᕙᓗ ᖃᖅᑲᓃᑦᑐᓄᑦ ᐃᒡᓗᒐᓴᖕᓄᑦ ᐅᕝᕙᓗ ᐊᓯᖏᓐᓄᓪᓘᓐᓃᑦ ᓄᓇᓕᖕᓄᑦ ᐊᑕᓂᐅᑉ ᒎᑎᑦᑕ ᐅᐸᒃᑕᐅᖁᓚᐅᓐᖏᑕᖏᓐᓄ ᐅᐸᒍᑎᓚᐅᓐᖏᓚᒍᑦ.”