ᒨᓯᓯ ᑕᓪᓕᒪᖏᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᒡᓗᒐᓮᑦ ᕿᒫᕕᒃᓴᐅᔪᑦ

¹ “ᐊᑕᓂᐅᑉ ᒎᑎᑦᓯ ᐃᓅᖃᑎᒌᒡᔪᐊᓂᒃ ᓄᓇᖃᕐᑐᓂᒃ ᓄᖑᑎᑦᓯᓚᐅᕐᓂᖓᑕ ᑭᖑᓂᖓᒍᑦ ᐃᓕᑦᓯᓐᓄᑦ ᓄᓇᑖᕆᔭᐅᑎᓯᒪᓕᕐᐸᒍ ᑖᒃᑯᐊᓗ ᓄᓇᖓᑦ ᓄᓇᑖᕆᒍᑦᓯᐅᒃ ᐃᒡᓗᒐᓴᖏᓪᓗ ᐃᒡᓗᒋᓕᕈᑦᓯᐅᒃ,

² ᐃᒡᓗᒐᓴᖕᓂᒃ ᐱᖓᓱᓂᒃ ᓴᓂᕐᕔᔪᒃᓴᐅᕗᓯ ᓄᓇᒥ ᐊᑕᓂᐅᑉ ᒎᑎᑦᓯ ᑐᓂᔭᖓᓂᒃ ᐃᓕᑦᓯᓐᓄᑦ ᓄᓇᑖᕆᖁᓪᓗᒍ.

³ ᐊᖅᑯᑎᓕᐅᕐᑐᒃᓴᐅᕗᓯ, ᓄᓇᑖᕆᔭᓕᒫᑦᓯᓐᓂ ᐱᖓᓱᐃᓕᖅᑲᖓᓗᒍ ᐅᖓᓯᖕᓂᖏᑦ ᖃᐅᔨᓴᕐᓗᒋᑦ ᐊᑕᓂᐅᑉ ᒎᑎᑦᓯ ᑐᓂᔭᖓᓂᒃ ᓄᓇᑖᕆᖁᓪᓗᒍ, ᐃᓅᖃᑎᒥᓂᒃ ᑐᖁᑦᓯᔪᖃᕐᐸᑦ ᓄᓇᓖᑦ ᑖᒃᑯᐊ ᓇᓪᓕᐊᓐᓄᑦ ᕿᒫᔪᖃᕈᓐᓇᖁᓪᓗᒍ ᓴᐳᑎᔭᐅᑦᔪᑎᒃᓴᖓᓄᑦ.

⁴ ᐃᓄᒡᓕ ᐃᓅᖃᑎᒥᓂᒃ ᐱᔭᕆᐊᖃᕐᐳᖅ, ᑖᒃᑯᓄᖓ ᓇᓪᓕᐊᓐᓄᑦ ᕿᒫᒃᐸᑦ ᐃᒻᒥᓂᒃ ᓴᐳᑎᔪᓐᓇᕐᐳᖅ. ᐃᓅᖃᑎᒥᓂᒃ ᐱᔮᕆᖏᓪᓗᓂ ᑐᖁᑦᓯᒃᐸᑦ ᓯᕗᓂᖓᓂ ᐊᑭᕋᕆᓯᒪᖏᓪᓗᒍ.

⁵ ᐊᖑᑏᒃ ᒪᕐᕉᒃ ᓇᐹᕐᑐᓂᒃ ᓇᑲᑎᕆᔭᕐᑐᕐᐸᑎᒃ, ᐂᑉᐸᖓ ᓇᐹᕐᑐᒥᒃ ᐅᓕᒪᐅᒻᒧᑦ ᓇᑲᑦᓯᒐᓱᒡᓗᓂ, ᐅᓕᒪᐅᑎᖓ ᐃᐳᖓᓂᑦ ᐲᑲᓪᓚᒡᓗᓂ ᐂᑉᐸᓂ ᐅᓕᒪᐅᑎᒧᑦ ᐱᒃᓯᒡᕕᖏᓗᓂᐅᒃ ᑐᖁᑉᐸᒍ, ᑕᕝᕙ ᑐᖁᑦᓯᔪᖅ ᕿᒫᔪᓐᓇᕋᔭᕐᐳᑦ ᑖᒃᑯᓄᖓ ᐃᒡᓗᒐᓴᖕᓄᑦ ᓇᓪᓕᐊᓐᓄᑐᐃᓐᓇᖅ ᐃᒻᒥᓂᒡᓗ ᓴᐳᑎᓗᓂ.

⁶ ᑐᖁᑕᐅᔪᒥᒡᓕ ᐊᑭᔪᒪᔪᖅ ᐊᒃᓱᕈᕐᓗᓂ ᑐᖁᑦᓯᔪᒥᒃ ᒪᓕᒃᐸᑦ ᐊᖑᓗᒍᓗ ᕿᒫᔪᖅ, ᐊᖅᑯᑎᐅᑉ ᓯᕕᑐᓂᖓᓄᑦ, ᐃᑭᓕᕐᓗᒍᓗ ᑐᖁᑉᐸᒍ, ᐊᖑᑦ ᑖᓐᓇ ᑐᖁᑕᒃᓴᐅᖏᒃᑲᓗᐊᕐᑎᓪᓗᒍ, ᑐᖁᑕᓂ ᐊᑭᕋᕆᓚᐅᖏᒻᒪᒍ ᓯᕗᓂᖓᓂ.

⁷ ᑍᒤᒻᒪᑦ ᑕᕝᕙ ᐱᖁᔨᕗᖓ ᐃᓕᑦᓯᓐᓂᒃ, ᐃᒡᓗᒐᓴᖕᓂᒃ ᐱᖓᓱᓂᒃ ᓇᓗᓁᕐᓯᖁᔨᓯᒪᕗᖓ ᕿᒫᕕᒃᓴᐅᓂᐊᕐᑐᓂᒃ.

⁸ “ᐊᑕᓂᐅᓪᓕ ᒎᑎᑦᓯ ᓄᓇᒋᔭᓯ ᑭᒡᓕᖓ ᐊᖏᒡᓕᒋᐊᕐᑎᑉᐸᒍ, ᑕᒪᓐᓇ ᓯᕗᓕᕕᓂᑦᓯᓐᓄᑦ ᐊᖏᕈᑎᒋᓯᒪᒐᒥᐅᒃ ᑍᒤᓐᓂᐊᕐᓂᕋᕐᓗᒍ,

⁹ ᑕᕝᕙ ᑲᒪᑦᓯᐊᕐᓗᓯ ᐱᖁᔨᓂᓕᒫᖏᑦ ᐊᑐᑦᓯᐊᕈᑦᓯᐅᒃ, ᐅᓪᓗᒥ ᐱᖁᔨᑦᔪᑎᒋᔭᒃᑲ, ᐊᑕᓂᖅ ᒎᑎᓯ ᐅᖓᒋᑦᓯᐊᕐᓗᒍ ᐊᑐᕐᑕᐅᖁᔭᖏᓪᓗ ᐊᑐᑦᓯᐊᕐᓗᒋᑦ, ᑕᕝᕙ ᐃᒡᓗᒐᓮᑦ ᕿᒫᕖᑦ ᐱᖓᓱᑦ ᐃᓚᒃᑲᓐᓂᕋᔭᕐᐸᓯ ᐱᖓᓱᒃᑲᓐᓂᕐᓂᒃ.

¹⁰ ᑍᒤᓕᐅᕐᑐᒃᓴᐅᕗᓯ, ᐸᓯᔭᒃᓴᐅᖏᑦᑐᓂᒃ ᐃᓄᖕᓂᒃ ᑐᖁᑕᐅᔪᖃᖃᑦᑕᖁᓇᒍ ᓄᓇᑦᓯᓐᓂ ᐊᑕᓂᐅᑉ ᒎᑎᑦᓯ ᑐᓂᔭᖓᓂ ᐃᓕᑦᓯᓐᓄᑦ ᓄᓇᑖᕆᖁᓪᓗᒍ, ᐃᓕᑦᓯᓗ ᐸᓯᔭᒃᓴᐅᖁᓇᓯ ᑐᖁᑕᐅᔪᑦ ᐱᓪᓗᒋᑦ.

¹¹ “ᐊᖑᓪᓕ ᐃᓅᖃᑎᒥᓂᒃ ᐆᒥᓱᒃᐸᑦ, ᐱᕕᒃᓴᒥᓂᒡᓗ ᓈᒻᒪᓈᕐᓯᓗᓂ, ᐱᔮᕆᓗᓂ ᐱᒋᐊᕐᐸᒍ, ᐃᑭᓕᕐᓗᒍᓗ ᑐᖁᑉᐸᒍ, ᑐᖁᑦᓯᔪᕐᓗ ᕿᒫᒃᐸ ᐃᒡᓗᒐᓴᖕᓄᑦ ᓇᓪᓕᐊᓐᓄᑦ ᓇᓗᓁᕐᓯᒪᔪᓄᑦ.

¹² ᑕᕝᕙ ᓄᓇᒋᔭᖓᓂ ᐊᖓᔪᖅᑳᖑᔪᑦ ᑖᑦᓱᒪ ᑐᖁᑕᐅᔫᑉ ᐃᓚᒋᔭᖏᓐᓂᒃ ᑎᓕᓯᒐᔭᕐᐳᑦ ᑐᖁᑦᓯᓯᒪᔪᖅ ᑎᒍᔭᐅᔭᕐᑐᖁᓪᓗᒍ ᑍᑲᓐᖓᑦ, ᐊᑭᓂᐊᕈᒪᔪᒧᓪᓗ ᑐᓂᔭᐅᓗᓂ, ᑖᓐᓇ ᑐᖁᑦᓯᔪᕕᓂᖅ ᑐᖁᑕᐅᖁᓪᓗᒍ.

¹³ ᓂᑲᒋᔭᐅᔭᕆᐊᖃᓐᖏᓚᖅ, ᐃᓴᕆᐊᓕᒥᐅᑦ ᑕᕝᕙ ᓴᓗᒻᒪᕐᑕᐅᒐᔭᕐᐳᑦ ᑐᖁᑕᐅᔪᒃᓴᐅᖕᒪᑦ ᐸᓯᔭᒃᓴᐅᖏᑦᑑᑉ ᑐᖁᑕᐅᓂᕕᓂᖓᓂᑦ, ᖃᓄᐃᓕᐅᕐᓂᓕᒫᑦᓯᒍᑦ ᖃᓄᐃᖏᑦᓯᐊᖁᓪᓗᓯ.”

ᓄᓇᐅᑉ ᑭᒡᓕᑐᖃᕕᓂᖏᑦ

¹⁴ “ᐃᓅᖃᑎᑦᓯ ᓄᓇᖓᑕ ᑭᒡᓕᖓᑕ ᓇᓗᓁᒃᑯᑕᖓᓂᒃ ᐲᕐᓯᔪᒃᓴᐅᓐᖏᓚᑎᑦ, ᓯᕗᓂᑦᓯᓐᓂ ᐃᓅᓚᐅᕐᑐᑦ ᐃᓕᔭᕕᓂᖏᓐᓂᒃ ᐊᑕᓂᐅᑉ ᒎᑎᑦᓯ ᑐᓂᓯᒪᔭᖓᓂᒃ ᐃᓕᑦᓯᓐᓄᑦ.”

ᖃᐅᔨᓯᒪᔪᑦ ᐱᑦᔪᑎᒋᓪᓗᒋᑦ

¹⁵ “ᐃᓄᖕᒥᒃ ᐊᑕᐅᓯᑐᐃᓐᓇᕐᒥᒃ ᖃᐅᔨᓯᒪᔪᖃᕐᑎᓪᓗᒍ ᓈᒻᒪᓐᖏᓚᖅ ᐊᖑᒻᒥᒃ ᐱᕋᔭᒃᓯᒪᔪᒥᒃ ᐸᓯᔭᒃᓴᐅᑎᑦᓯᓇᓱᒋᐊᒃᓴᖅ; ᒪᕐᕉᒃᐸᑎᒡᓕ ᖃᐅᔨᓯᒪᔫᒃ ᐱᖓᓱᓪᓘᓐᓃᑦ, ᐸᓯᔭᒃᓴᓐᖑᕐᑎᑦᓯᔪᓐᓇᕐᐳᑦ.

¹⁶ ᐊᖑᓪᓕ ᐃᓅᖃᑎᒥᓂᒃ ᐸᓯᔭᒃᓴᓐᖑᕐᑎᑦᓯᓇᓱᐊᕋᔭᕐᐸᑦ ᓱᓕᖏᑦᑐᒧᑦ ᓵᑕᐅᑎᑦᓯᓇᓱᒃᐸᑦ ᐱᕋᔭᒃᓯᒪᓂᕅᓗᓂ,

¹⁷ ᑕᕝᕙ ᑕᒪᕐᒥᒃ ᑖᒃᑯᐊᒃ ᑲᑎᕕᐅᓲᒧᑦ ᑐᒃᓯᐊᕐᕕᖕᒧᐊᕐᑐᒃᓴᐅᕘᒃ ᖃᐅᔨᓇᓱᐊᕐᑕᐅᓗᑎᒡᓗ ᑐᑭᑖᕈᑕᐅᔪᒃᓴᐅᕘᒃ ᑐᓂᕐᕈᓯᕐᑎᑦᓯᔨᓄᑦ ᐋᖅᑭᒃᓱᐃᔨᓄᓪᓗ ᐱᓇᓱᐊᕐᕕᒃᓴᖏᑕ ᓇᓪᓕᐅᑎᓯᒪᓂᖏᑦ ᒪᓕᒡᓗᒋᑦ.

¹⁸ ᐋᖅᑭᒃᓱᐃᔩᑦ ᖃᐅᔨᓇᓱᐊᑦᓯᐊᕐᑐᒃᓴᐅᕗᑦ ᐊᐱᕐᓱᑲᑕᑦᓯᐊᕐᓗᑎᒃ; ᐊᖑᓪᓕ ᓱᓕᖏᑦᑐᒥᒃ ᐱᑦᔪᑎᖃᕐᓗᓂ ᓵᑕᐅᑎᑦᓯᓇᓱᐊᕐᓯᒪᒃᐸᑦ ᐃᓴᕆᐊᓕᒥᐅᑕᐅᖃᑎᒥᓂᒃ,

¹⁹ ᑕᕝᕙ ᓱᒋᐊᕐᑕᐅᔪᒃᓴᐅᕗᖅ ᑖᑦᓱᒪ ᐸᓯᔭᒃᓴᐅᓂᕋᕐᑕᐅᔫᑉ ᓱᒋᐊᕐᑕᐅᑦᔪᑎᒋᒐᔭᓐᖑᐊᓚᐅᕐᑕᖓᓂᒃ. ᑕᕝᕙ ᑍᒤᓕᐅᕐᓗᓯ ᑕᒪᓐᓇ ᐱᐅᖏᑦᑐᓕᓂᖅ ᓄᖅᑲᕐᑎᒃᑲᔭᕐᐸᓯ.

²⁰ ᑕᕝᕙ ᐃᓄᓕᒫᓄᑦ ᑐᓴᕐᑕᐅᒐᔭᕐᐳᖅ ᖃᓄᐃᓕᐅᕐᑐᖃᕐᓯᒪᖕᒪᖔᑦ; ᓯᕘᕋᓕᕐᓗᑎᒡᓗ, ᑕᒪᑐᒥᖓᓗ ᐱᐅᖏᑦᑐᒥᒃ ᐱᓇᓱᐊᕐᑐᖃᕈᒪᔪᓐᓃᕋᔭᕐᐳᖅ.

²¹ ᑍᒤᓕᐅᕐᑐᖃᕋᔭᕐᐸᑦ ᑕᑯᓐᓇᕐᓂᑦᓯᒍᑦ ᓂᑲᒍᓱᓕᕐᑐᒃᓴᐅᓐᖏᓚᓯ; ᑕᒪᓐᓇ ᓱᒋᐊᕐᑕᐅᓂᖅ ᐊᑭᓕᕐᑕᐅᔭᕆᐊᖃᕐᒪᑦ ᐃᓅᓯᖅ ᐃᓅᓯᕐᒧᑦ, ᐃᔨ ᐃᔨᒨᑦ, ᑭᒍᑎ ᑭᒍᑎᒧᑦ, ᐊᒡᒊᓪᓗ ᐊᒡᒐᓄᑦ, ᐃᑎᒊᓪᓗ ᐃᑎᒐᖕᓄᑦ.”