ᒨᓯᓯ ᑕᓪᓕᒪᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᓂᕐᕈᓯᕐᑎᑦᓯᔩᑦ ᐱᖃᑕᐅᖃᑦᑕᕆᐊᖃᕐᓂᖏᑦ

¹ “ᓕᕔᑎᒃᑯᓪᓕ ᑭᖑᕚᖏᑦ ᑐᓂᕐᕈᓯᕐᑎᑦᓯᔩᑦ, ᑖᒃᑯᐊ ᓕᕔᑉ ᑭᖑᕚᓕᒫᖏᑦ, ᐃᓴᕆᐊᓕᒥᐅᓂᑦ ᓄᓇᑖᖃᑕᐅᔪᒃᓴᐅᖏᓚᑦ ᓇᖕᒥᓂᒃᓴᒥᖕᓂᒃ; ᓂᕆᖃᑦᑕᕐᑐᒃᓴᐅᕗᓪᓕ ᐃᑯᐊᓚᑎᑕᐅᓂᒃᑯᑦ ᑐᓂᕐᕈᑎᕕᓂᕐᓂᒃ ᐊᑕᓂᕐᒧᑦ, ᑕᒪᒃᑯᐊ ᑖᒃᑯᓄᖓ ᑐᕌᖓᖕᒪᑕ.

² ᓄᓇᖁᑎᖃᕐᑐᒃᓴᐅᓐᖏᓚᑦ ᓇᖕᒥᓂᒃᓴᒥᖕᓂᒃ, ᑭᖑᕚᕇᑎᑐᑦ ᐊᓯᒥᒃᑎᑐᑦ; ᐱᖃᖃᑕᐅᓯᒪᕗᓪᓕ ᐊᑕᓂᕐᒧᑦ ᑐᓂᕐᕈᓯᕐᑎᑦᓯᔨᐅᓂᕐᒥᒃ ᑐᓂᓯᕕᐅᓯᒪᖓᒥᒃ, ᑕᒪᓐᓇ ᐊᑕᓂᐅᑉ ᐊᖏᕈᑎᒋᓯᒪᖕᒪᒍ.

³ “ᖃᖓᓕᒫᕐᓕ ᐃᒻᒧᒃᓯᐅᒐᕐᒥᒃ ᓰᐱᒥᒡᓘᓐᓃᑦ ᑐᓂᕐᕈᓯᕐᑐᖃᓕᕐᐸᑦ ᑐᖁᑕᒃᓴᒥᒃ, ᑕᕝᕙ ᑐᓂᕐᕈᓯᕐᑎᑦᓯᔩᑦ ᑐᓂᔭᐅᔪᒃᓴᐅᕗᑦ ᑭᐊᓯᖏᖕᓂᒃ, ᐊᒡᓕᕈᖏᖕᓂᒃ, ᕿᓴᕈᐊᖓᓂᒡᓗ.

⁴ ᐊᒻᒪ ᑐᓂᓯᕕᐅᔪᒃᓴᐅᒋᕗᑦ ᐱᕈᕐᑎᑕᓯ ᑲᑎᑕᐅᒋᐊᓕᕐᑎᓪᓗᒋᑦ ᓯᕗᓪᓕᕐᐹᖏᓐᓂᒃ ᓂᐊᖂᔭᓴᓂᒃ, ᕔᓂᒃᓴᓂᒃ, ᓇᐹᕐᑐᐃᓪᓗ ᐸᐅᖓᖏᑕ ᐅᕐᓱᒃᓴᖏᓐᓂᒃ, ᓰᐱᐅᓪᓗ ᒥᖅᑯᖏᓐᓂᒃ ᓴᓕᔭᐅᓂᖏᑕ ᓯᕗᓪᓕᕐᐹᖏᓐᓂᒃ ᑐᓂᓯᕕᒋᔭᕆᐊᖃᕐᐸᓯ.

⁵ ᐊᑕᓂᖅ ᒎᑎᓯ ᑖᒃᑯᓂᖓ ᓂᕈᐊᕐᓯᒪᖕᒪᑦ ᑭᖑᕚᖑᖃᑎᓕᒫᑦᓯᓐᓂᑦ, ᓕᕔᑎᒃᑯᑦ ᑭᖑᕚᖏᓐᓂᒃ ᑐᓂᕐᕈᓯᕐᑎᑦᓯᔨᐅᓂᕐᒧᑦ ᐱᔨᑦᓯᖁᓪᓗᒋᑦ ᐊᑕᓂᐅᑉ ᐊᑎᖓᓂ, ᐃᓱᖃᖏᑦᑐᒧᑦ.

⁶ “ᓇᓪᓕᐊᓪᓕ ᓕᕔᑎᑦ ᐃᓴᕆᐊᓕᒥᐅᑦ ᓄᓇᖏᓐᓂᑦ ᑐᒃᓯᐊᕐᕕᐅᕙᒃᑐᒧᐊᕈᒪᒍᓂ ᖃᖓᑐᐃᓐᓇᖅ ᐂᔪᓐᓇᕐᐳᖅ ᐱᔪᒪᓕᕈᓂ, ᐊᑕᓂᐅᑉ ᑐᒃᓯᐊᕐᕕᐅᖁᓪᓗᒍ ᓂᕈᐊᕐᓯᒪᔭᖓᓄᑦ,

⁷ ᑕᕝᕙᓂᓗ ᐱᔨᑦᓯᕋᔭᕐᐳᖅ ᑐᓂᕐᕈᓯᕐᑎᑦᓯᔨᐅᓂᕐᒥᒃ ᐱᓇᓱᐊᕐᓗᓂ ᐊᑕᓂᕐᒧᑦ ᒎᑎᒥᓄᑦ, ᓕᕔᑎᐅᖃᑎᒥᑐᑦ ᐱᔨᑦᓯᕐᑐᑎᑐᑦ ᐊᑕᓂᐅᑉ ᓵᖓᓂ ᐱᔪᓐᓇᕐᓂᖃᑦᓯᐊᕋᔭᕐᐳᖅ.

⁸ ᑍᒫᓪᓗᐊᕐᑕᐅᖅ ᓂᕿᒃᓴᓂᒃ ᐱᑎᑕᐅᖃᑦᑕᕐᑐᒃᓴᐅᕗᖅ ᐊᓯᖏᑎᑐᑦ ᑐᓂᑦᕈᓯᕐᑎᑦᓯᔨᑎᑐᑦ, ᐱᖁᑎᖏᑕᓗ ᓂᐅᕕᕐᑕᐅᑦᔪᑎᕕᓂᖏᓐᓂᒃ ᐱᖃᑕᐅᔪᒃᓴᐅᓪᓗᓂ.”

ᒎᑎᒧᑦ ᐅᒃᐱᖏᑦᑐᑦ ᐊᑐᕐᐸᒃᑕᖏᑕ ᐅᓗᕆᐊᓇᕐᓂᖏᑦ

⁹ “ᓄᓇᒧᓪᓕ ᑎᑭᒃᑯᑦᓯ ᐊᑕᓂᐅᑉ ᒎᑎᑦᓯ ᑐᓂᔭᖓᓄᑦ, ᑕᒫᓂ ᓄᓇᓖᑦ ᐃᓅᖃᑎᒌᒡᔪᐊᑦ ᐊᑐᕐᐸᒃᑕᖏᓐᓂᒃ ᒎᑎᒧᑦ ᓇᕐᕈᓇᕐᑐᓂᒃ ᒪᓕᒃᓴᕐᑐᒃᓴᐅᓐᖏᓚᓯ.

¹⁰ ᑐᓂᕐᕈᓯᕐᕕᖕᒥ ᐃᑯᐊᓚᑦᓯᓂᒃᑯᑦ ᑐᓂᓯᓕᕐᑎᓪᓗᓯ ᕿᑐᕐᖓᑦᓯᓐᓂᒃ ᑐᓂᕐᕈᓯᕐᑐᒃᓴᐅᓐᖏᓚᓯ; ᐃᓄᖁᑎᓯ ᓇᓚᐅᑦᑍᓇᓱᐊᖃᑦᑕᕐᑐᒃᓴᐅᓐᖏᓚᑦ ᐅᕝᕙᓗ ᓯᕗᓂᕐᒧᑦ ᓇᓚᐅᑦᑍᑦᔪᑎᖃᕋᓱᒃᑐᒃᓴᐅᓐᖏᓚᑦ ᐅᕝᕙᓗ ᐃᓕᓰᕐᓯᓇᓱᒃᑐᒃᓴᐅᓇᑎᒃ ᓱᓇᑐᐃᓐᓇᕐᒥᒃ ᐊᑐᕐᓗᑎᒃ;

¹¹ ᐅᕝᕙᓗ ᓴᐳᑎᔭᐅᑦᔪᑎᖃᕋᓱᒃᑐᒃᓴᐅᓐᖏᓚᓯ ᓂᕕᖓᑎᑕᑦᓯᓐᓂᒃ, ᑐᖁᓯᒪᔪᓂᒡᓗ ᐅᖃᖃᑎᖃᕋᓱᒃᑐᒃᓴᐅᓐᖏᓚᓯ.

¹² ᐊᑕᓂᖅ ᒎᑎᓯ ᐃᓄᖕᓂᒃ ᑍᒤᓕᐅᕐᑐᓂᒃ ᓈᒻᒪᖏᑦᑐᓕᔪᓂᒃ ᐆᒥᒋᔭᖃᕐᒪᑦ, ᑍᒤᒻᒪᑦ ᑕᕝᕙ ᐃᓄᐃᑦ ᑕᒫᓂ ᓄᓇᖃᕐᑐᑦ ᓄᓇᒥᖕᓂᑦ ᐊᐅᓪᓚᕐᑎᓚᐅᕐᐰᑦ ᓯᕗᓂᑦᓯᓐᓂ.

¹³ ᐊᑕᓂᐅᑉ ᒎᑎᑦᓯ ᓵᖓᓂ ᐸᓯᔭᒃᓴᐅᓂᖃᕐᑐᒃᓴᐅᓐᖏᓚᓯ ᑖᑦᓱᒧᖓ.”

ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓂᒃ ᑎᓕᔭᐅᔪᒫᕐᑐᒥᒃ ᐊᖏᕈᑎᖃᕐᓂᖅ

¹⁴ “ᐃᓅᖃᑎᒌᒡᔪᐊᑦ, ᓄᓁᕐᓂᐊᓕᕐᑕᓯ, ᓈᓚᖃᑦᑕᓚᐅᕐᒪᑕ ᓯᕗᓂᒃᓴᒥᒃ ᓇᓚᐅᑦᑍᓇᓱᐊᖃᑦᑕᕐᑐᓂᒃ ᓇᓚᐅᑦᑍᑦᔪᑎᖃᕋᓱᒃᑐᓂᒡᓗ; ᐃᓕᑦᓯᓕ, ᐊᑕᓂᐅᑉ ᒎᑎᑦᓯ ᑕᒪᒃᑯᓂᖓ ᐊᑐᖁᓐᖏᓛᓯ.

¹⁵ ᐊᑕᓂᕐᓕ ᒎᑎᓯ ᒪᑭᑎᑦᓯᔪᒫᕐᐳᖅ ᐱᔪᖃᓛᕐᑐᒥᒃ ᐅᖃᕐᑎᒥᓂᒃ ᐅᕙᑦᑐᑦ ᑍᒤᑦᑐᒥᒃ ᐃᓅᖃᑎᓪᓚᕆᑦᓯᓐᓂᑦ ᐱᓯᒪᔪᒥᒃ, ᑖᓐᓇᓗ ᓈᓚᒋᐊᖃᕈᒫᕐᐸᓯ.

¹⁶ “ᑍᑦᓱᒪᓂ ᐃᒫᒃ ᐱᖁᔨᓚᐅᕐᐳᓯ ᐊᑕᓂᕐᒥᒃ ᒎᑎᑦᓯᓐᓂᒃ ᖃᖅᑲᒥ ᕼᐆᕆᑉᒥ ᑲᑎᒪᑎᓪᓗᓯ, ᐅᖃᓚᐅᕐᓯᒪᒐᑦᓯ, ‘ᐅᖃᓪᓚᒃᑎᓪᓗᒍ ᑐᓵᒃᑲᓐᓂᕈᒪᔪᓐᓃᕐᐳᒍᑦ ᐊᑕᓂᐅᑉ ᒎᑎᑦᑕ ᓂᐱᖓᓂᒃ, ᐃᑯᐊᓚᔪᕐᔪᐊᖁᑎᖓᓂᒡᓘᓐᓃᑦ ᑕᑯᓐᓇᕈᒪᔪᓐᓁᕐᐳᒍᑦ, ᑐᖁᖁᓇᑕ.’

¹⁷ ᐊᑕᓂᐅᓪᓕ ᐅᖃᐅᑎᓚᐅᕐᐹᖓ, ‘ᓱᓕᔪᒥᒃ ᐱᔪᒪᔭᖃᕐᐳᑦ.

¹⁸ ᐱᔪᖃᓛᕐᑐᒥᒡᓕ ᐅᖃᕐᑎᓐᓂᒃ ᑎᓕᓯᕕᒋᔪᒫᕐᐸᒃᑲ ᐃᓕᒃᑐᑦ ᑍᒤᑦᑐᒥᒃ ᐃᓅᖃᑎᓪᓚᕆᖏᓐᓂᑦ ᐱᓯᒪᔪᒥᒃ; ᖃᓂᖓᓄᓪᓗ ᐅᖃᐅᓯᒃᓴᖏᓐᓂᒃ ᐃᓕᓯᔪᒫᕐᐳᖓ, ᐃᓄᖕᓂᒡᓗ ᐅᖃᐅᑦᔨᔪᒫᕐᐳᖅ ᐅᖃᐅᓯᕆᔭᐅᖁᔭᓕᒫᓐᓂᒃ.

¹⁹ ᓇᓪᓕᐊᓪᓗ ᐅᖃᐅᓯᐅᖁᔭᓐᓂᒃ ᓈᓚᒍᒪᖏᑦᑐᖅ ᑖᑦᓱᒪ ᐅᖃᐅᓯᕆᔭᖏᓐᓂᒃ ᐅᕙᖓ ᐊᑎᓐᓂ ᐅᕙᖓ ᓇᖕᒥᓂᖅ ᑖᓐᓇ ᓱᒋᐊᕈᒫᕐᐸᕋ.

²⁰ ᓇᓪᓕᐊᓪᓕ ᐅᖃᓪᓚᒐᓱᐊᕐᐸᑦ ᐅᕙᓐᓄᑦ ᐅᖃᖁᔭᐅᓯᒪᖏᓪᓗᓂ, ᑖᓐᓇ ᑍᒫᑦᓮᓐᓇᕐᑕᐅᖅ ᒎᑎᒋᔭᐅᔪᓂᒃ ᐱᑦᔪᑎᖃᕐᓗᓂ ᐅᖃᓪᓚᒐᓱᐊᕐᑐᖅ ᑍᒫᑦᓮᓐᓇᖅ ᑖᓐᓇ ᑐᖁᔪᒪᕐᐳᖅ.’

²¹ “ᐃᓱᒪᒐᔭᕐᑐᒃᓴᐅᕗᓯ, ‘ᖃᓄᕐᓕ ᖃᐅᔨᒪᔪᓐᓇᕋᑦᑕ ᓇᓪᓕᐊᑦ ᐅᖃᐅᓯᖅ ᐊᑕᓂᕐᒥᑦ ᐅᖃᐅᓯᐅᖁᔭᐅᓯᒪᖏᓐᓂᖓᓂᒃ?’

²² ᐱᔪᖃᓛᕐᑐᒥᒡᓕ ᐅᖃᕐᑎ ᐊᑕᓂᐅᑉ ᐊᑎᖓᓂ ᐅᖃᓪᓚᒃᐸᑦ, ᐅᖃᓪᓚᐅᓯᖏᓪᓗ ᓇᓚᐅᑦᓯᖏᑉᐸᑕ, ᓱᓕᓂᖏᓪᓗ ᓴᖅᑭᖏᑉᐸᑕ, ᑖᓐᓇ ᑕᕝᕙ ᐊᑕᓂᕐᒧᑦ ᑎᓕᔭᐅᓯᒪᓐᖏᓚᖅ. ᐃᒻᒥᓃᓐᓇᕐᓕ ᐅᖃᓪᓚᒃᐳᖅ ᐃᓱᒪᑐᐃᓐᓇᕐᒥᓂᒃ, ᑍᒤᑦᑐᑦ ᓯᕘᕋᒋᔭᒃᓴᕆᓐᖏᓚᓯ.”