ᒨᓯᓯ ᑕᓪᓕᒪᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᐊᑕᓂᕐᒧᑦ ᒎᑎᑦᓯᓐᓄᑦ ᑐᓂᕐᕈᓯᕐᑐᒃᓴᐅᓐᖏᓚᑎᑦ ᐃᒻᒧᒃᓯᐅᒐᕐᒥᒃ ᓰᐱᒥᒡᓘᓐᓃᑦ ᐃᓕᖅᑯᓯᕐᓱᖏᑦᑐᒥᒃ; ᐊᑕᓂᐅᑉ ᒎᑎᑦᓯ ᑍᒤᑦᑐᑦ ᐆᒥᒋᖕᒪᒋᑦ.

² “ᓄᓇᒋᔭᑦᓯ ᐊᓯᐊᓂ ᑐᓴᕋᔭᕈᑦᓯ ᐊᖑᑎᑦ ᐃᓚᖏᑦ ᐊᕐᓁᓪᓘᓐᓃᑦ ᐊᑕᓂᕐᒧᑦ ᐊᔪᕐᑐᓕᓂᕋᕐᑕᐅᔪᓂᒃ ᐊᖏᖃᑎᒌᒍᑎᒋᓯᒪᔭᖓᓂᒡᓗ ᓯᖁᒥᑦᓯᔪᖃᕐᓂᕅᔪᖃᕐᐸᑦ,

³ ᑐᒃᓯᐊᖃᑦᑕᓕᕐᑐᖃᕐᐸᑦ ᐱᔨᑦᓯᓕᕐᑐᖃᕐᐸᓪᓗ ᒎᑎᓐᖑᐊᓄᑦ ᐅᕝᕙᓗ ᓯᕿᓂᕐᒧᑦ ᑕᖅᑭᕐᒧᓪᓘᓐᓃᑦ ᐅᓪᓗᕆᐊᓄᓪᓘᓐᓃᑦ, ᐊᑕᓂᐅᑉ ᐱᖁᔨᑦᔪᑎᒋᓯᒪᔭᖓᓄᑦ ᐊᑭᕋᕐᑐᕐᑐᓂᒃ.

⁴ ᑍᒤᑦᑐᒥᒃ ᐅᖃᐅᓯᐅᔪᒥᒃ ᑐᓴᕈᑦᓯ, ᖃᐅᔨᓇᓱᐊᑦᓯᐊᕐᑐᒃᓴᐅᕗᓯ ᐊᐱᕐᓱᖃᑦᑕᕐᓗᓯ, ᑕᒪᓐᓇᓗ ᓱᓕᒃᐸᑦ ᐱᐅᖏᑦᑐᓕᓂᕐᒥᒡᓗ ᑍᒤᑦᑐᒥᒃ ᐊᑐᕐᑐᖃᓕᕐᐸᑦ ᐃᓴᕆᐊᓕᒥ,

⁵ ᑕᕝᕙ ᐃᓅᒃ ᐊᖑᓪᓘᓐᓃᑦ ᐊᕐᓇᕐᓘᓐᓃᑦ ᓄᓇᓖᑦ ᓯᓚᑖᓄᐊᕈᑎᓗᒍ ᒥᓪᓗᕐᑕᐅᓗᓂ ᑐᖁᑕᐅᔪᒃᓴᐅᕗᖅ.

⁶ ᑐᖁᑕᐅᔪᒃᓴᐅᕗᕐᓕ ᒪᕐᕉᖕᓂᒃ ᐅᖓᑖᓄᓪᓘᓐᓃᑦ ᖃᐅᔨᓯᒪᓪᓚᕆᒃᑐᓂᒃ ᓇᓗᓁᕐᓯᔪᓐᓇᕐᑐᕐᑕᖃᕐᐸᑦ ᓈᒻᒪᖏᑦᑐᓕᓂᕅᔪᓂᒃ ᑖᑦᓱᒥᖓ; ᑐᖁᑕᐅᔪᒃᓴᐅᓐᖏᓚᕐᓕ ᐊᑕᐅᓯᑐᐃᓐᓇᕐᒥᒃ ᖃᐅᔨᓯᒪᔪᖃᕐᑎᓪᓗᒍ.

⁷ ᖃᐅᔨᓯᒪᔪᓪᓕ ᓯᕗᓪᓕᕐᐸᐅᓗᑎᒃ ᒥᓗᕆᐊᖅᑳᕐᑐᒃᓴᐅᕗᑦ ᐅᔭᖅᑲᓄᑦ ᑐᖁᖁᓪᓗᒍ, ᑕᕝᕙ ᑭᖑᓂᖓᒍᑦ ᐃᓄᓕᒫᑦ ᒥᓪᓗᓕᕋᔭᕐᐳᑦ ᑖᑦᓱᒥᖓ; ᑕᕝᕙ ᑍᒤᓕᐅᕐᓗᓯ ᐱᐅᖏᑦᑐᓕᓂᖅ ᑍᒤᑦᑐᖅ ᓄᖅᑲᕐᑎᒃᑲᔭᕐᐸᓯ.

⁸ “ᐃᓚᖏᓪᓕ ᓄᓇᓕᖕᓂᑦ ᐋᖅᑭᒃᓱᐃᔨᐅᔪᓂᑦ ᐃᓄᑑᑦᔭᐅᓗᑎᒃ ᐅᖁᒤᓗᐊᕐᐸᑕ ᐋᖅᑭᒃᑕᐅᔭᕆᐊᒃᓴᖅ, ᓄᓇᖁᑎᖃᕐᓂᖅ ᓇᓪᓕᐊᑦ ᐱᖃᕆᐊᖃᕐᒪᖔᑦ ᐅᕝᕙᓗ ᑎᒥᒃᑯᑦ ᐋᓐᓂᕐᑕᐅᓯᒪᔪᖃᕐᐸᑦ ᐅᕝᕙᓗ ᑲᒪᔪᖃᕆᐊᖃᕐᐸᑦ ᐱᔮᕆᓗᓂ ᐃᓄᐊᕐᓯᒪᔪᒥᒃ ᑐᖁᑦᓯᓯᒪᔪᒥᒡᓘᓐᓃᑦ. ᑕᒪᒃᑯᐊ ᓇᓪᓕᐊᑦ ᐊᑐᕐᑕᐅᓯᒪᒃᐸᑕ, ᑕᕝᕙ ᑐᒃᓯᐊᕐᕕᖕᒧᐊᕐᑐᒃᓴᐅᕗᓯ ᑲᑎᖃᑦᑕᕐᕕᖕᒧᑦ ᐊᑕᓂᐅᑉ ᒎᑎᑦᓯ ᓂᕈᐊᕐᓯᒪᔭᖓᓄᑦ,

⁹ ᑕᒪᓐᓇᓗ ᑐᓂᔭᒃᓴᕆᕙᓯ ᓕᕔᑎᒃᑯᓐᓄᑦ ᑐᓂᕐᕈᓯᕐᑎᑦᓯᔨᓄᑦ, ᑕᒪᑐᒪᓂᐅᑎᓪᓗᒍᓗ ᑕᕝᕙᓂ ᐋᖅᑭᒃᓱᐃᔨᐅᔪᒧᑦ, ᑕᕝᕙ ᑖᒃᑯᐊ ᑐᑭᑖᖃᑎᒌᓕᕋᔭᕐᐳᑦ ᑕᒪᑐᒧᖓ.

¹⁰ ᑖᒃᑯᐊ ᐊᖏᖃᑎᒌᒡᓗᑎᒃ ᑐᑭᑖᖃᑎᒌᒃᑐᒃᓴᐅᕗᑦ, ᐃᓕᑦᓯᓐᓄᑦ ᑖᒃᑯᐊ ᐅᖃᐅᓯᕆᔭᖏᑦ ᖃᓄᐃᓕᐅᖁᔨᑦᔪᑎᒋᔭᖏᓪᓗ ᒪᓕᑦᓯᐊᕐᓗᒋᑦ ᐊᑐᕆᐊᖃᕋᔭᕐᐸᓯ.

¹¹ ᐊᑐᕐᑕᐅᖁᔭᐅᔪᒥᒃ ᖃᓄᐃᓕᐅᖁᔭᐅᑦᔪᑎᓕᒫᓪᓗ ᑍᒪᓐᓇᓪᓗᐊᖅ ᒪᓕᒡᓗᒋᑦ ᐱᓇᓱᐊᕐᑐᒃᓴᐅᕗᓯ; ᓴᖑᑎᖏᑦᓯᐊᕐᓗᒋᑦ ᑕᓕᕐᐱᒧᑦ ᓴᐅᒥᖕᒧᓪᓘᓐᓃᑦ.

¹² ᓇᓪᓕᐊᓪᓕ ᓈᓚᖏᑦᑐᖅ ᒪᓕᖏᓪᓗᓂ ᐋᖅᑭᒃᓱᐃᔨᒥᒃ ᑐᓂᕐᕈᓯᕐᑎᑦᓯᔨᒥᒡᓘᓐᓃᑦ ᐱᓇᓱᐊᕆᐊᖃᕐᑕᒥᓂᒃ ᐱᓇᓱᐊᕐᑐᒥᒃ ᑖᓐᓇ ᑐᖁᑕᐅᔪᒃᓴᐅᕗᖅ; ᑍᒫᒃ ᑕᕝᕙ ᑍᒤᓕᐅᕐᓗᓯ ᐱᐅᖏᑦᑐᓕᓂᖅ ᐲᕐᑎᒐᔭᕐᐸᓯ ᐃᓴᕆᐊᓕᒥᑦ.

¹³ ᑕᒪᓐᓇ ᑕᕝᕙ ᑐᓴᕐᑕᐅᒍᓂ ᐃᓄᓕᒫᓄᑦ ᓯᕘᕋᓕᕈᑕᐅᒐᔭᕐᐳᖅ, ᓇᓪᓕᐊᓐᓄᓪᓘᓐᓃᑦ ᐃᓱᒪᒋᑐᐃᓐᓇᕐᑕᒥᓂᒃ ᐱᓇᓱᐊᕈᒪᔪᓐᓁᕈᑕᐅᖓᔭᕐᐳᖅ ᑭᖑᓂᖓᒍᑦ.”

ᐊᖓᔪᖅᑳᕐᔪᐊᖃᕐᓂᕐᒥᒃ ᖃᐅᔨᒪᑦᔪᑎᒃᓴᑦ

¹⁴ “ᓄᓇᑖᕐᓯᒪᓕᕈᑦᓯᓕ ᐊᑕᓂᐅᑉ ᒎᑎᑦᓯ ᐃᓕᑦᓯᓐᓄᑦ ᑐᓂᓂᐊᕐᑕᖓᓄᑦ, ᑕᕝᕙᓂᓗ ᐃᓂᓪᓚᒃᓯᒪᓕᕈᑦᓯ, ᐅᖃᓕᕈᑦᓯ, ‘ᐊᖓᔪᖅᑳᕐᔪᐊᓕᐅᕈᒪᕗᖓ ᐅᕙᓐᓄᑦ ᐊᖓᔪᖅᑲᐅᓂᐊᕐᑐᒥᒃ, ᐊᓯᑦᑎᑐᑦ ᐃᓅᖃᑎᒌᒡᔪᐊᑎᑐᑦ ᐊᕙᑎᑦᑎᓐᓃᑦᑐᑎᑐᑦ.’

¹⁵ ᑕᕝᕙ ᐊᖓᔪᖅᑳᕐᔪᐊᕐᑖᕈᓐᓇᑦᓯᐊᕐᐳᓯ ᐃᓕᑦᓯᓐᓄᑦ ᐊᖓᔪᖅᑲᐅᔪᒥᒃ ᐊᑕᓂᕐᒧᑦ ᒎᑎᑦᓯᓐᓄᑦ ᓂᕈᐊᕐᑕᐅᔪᒥᒃ. ᐃᓅᖃᑎᓪᓚᕆᑦᓯᓐᓂᑦ ᐱᔪᒥᒃ ᐊᖓᔪᖅᑳᕐᔪᐊᓕᐅᕐᑐᒃᓴᐅᕗᓯ ᐃᓕᑦᓯᓐᓄᑦ; ᐃᓅᖃᑎᒃᓴᔭᕆᓐᖏᑕᑦᓯᓐᓂᒃ ᐊᖓᔪᖅᑳᕐᔪᐊᕐᑖᕐᑐᒃᓴᐅᓐᖏᓚᓯ,

¹⁶ ᑖᓐᓇ ᐅᓄᕐᑐᐊᓗᖕᓂᒃ ᕿᒻᒥᕐᔪᐊᖃᕐᑐᒃᓴᐅᓐᖏᓚᖅ ᓇᖕᒥᓂᒃᓴᒥᓂᒃ, ᐃᓄᖁᑎᒥᓂᒡᓗ ᐄᑦᔨᑉᑎᒧᑦ ᐅᑎᕐᑎᑦᓯᔪᒃᓴᐅᓐᖏᓚᖅ ᕿᒻᒥᕐᔪᐊᓂᒃ ᐅᓄᕐᓯᑎᑦᓯᔪᒪᓗᓂ, ᐊᑕᓂᖅ ᐅᖃᕐᓯᒪᖕᒪᑦ ᐃᓕᑦᓯᓐᓄᑦ, ‘ᑕᐅᕗᖓ ᐅᑎᓚᐅᕐᓯᒪᓂᐊᓐᖏᓚᓯ ᖃᖓᓕᒫᖅ.’

¹⁷ ᑖᓐᓇᓗ ᐅᓄᕐᑐᓂᒃ ᓄᓕᐊᖃᕐᑐᒃᓴᐅᓐᖏᓚᖅ, ᑍᒤᒐᔭᕈᓂ ᑕᒪᓐᓇ ᐊᑕᓂᕐᒥᒃ ᕿᒤᑦᔪᑎᒋᒐᔭᕐᒪᒍ; ᐃᒻᒥᓂᒡᓗ ᐊᔪᕐᓴᖏᑦᑐᐊᓘᑎᑦᑐᒃᓴᐅᓐᖏᓚᖅ ᓯᐅᓪᕕᕆᓂᒃ ᒎᓗᓂᒡᓗ.

¹⁸ ᑖᓐᓇ, ᐊᖓᔪᖅᑳᕐᔪᐊᑉ ᐃᒃᓯᕙᐅᑕᖓᓂ ᐃᒃᓯᕙᓕᕈᓂ ᐊᖓᔪᖅᑲᐅᕕᖕᒥᓂ, ᓇᖕᒥᓂᖅ ᑎᑎᕋᕆᐊᖃᕐᐳᖅ ᐱᖁᔭᓂᒃ ᑖᒃᑯᓂᖓ ᒪᒃᐱᕐᑐᕋᕐᑎᒍᑦ ᐊᑦᔨᓕᐅᕐᓗᒋᑦ ᐱᒋᓂᐊᕐᑕᒥᓂᒃ, ᓕᕔᑎᒃᑯᑦ ᑐᓂᕐᕈᓯᕐᑎᑦᓯᔩᑦ ᐱᓯᒪᔭᖏᑕ ᐊᑦᔨᓪᓚᕆᖏᓐᓂᒃ;

¹⁹ ᑖᒃᑯᐊᓗ ᑍᒪᓐᖓᑦ ᓇᔪᕐᑎᒋᑦᓮᓐᓇᕆᐊᖃᕐᐰᑦ ᐅᖃᓕᒫᖃᑦᑕᕐᓗᓂᒋᓪᓗ ᐃᓅᓯᓕᒫᒥᓂ, ᐊᑕᓂᕐᒥᒃ ᒎᑎᒥᓂᒃ ᓯᕘᕋᒋᔭᖃᓕᖁᓪᓗᒍ, ᐱᖁᔧᑦ ᒪᓕᒐᒃᓮᓪᓗ ᐅᑯᐊ ᐅᖃᐅᓯᖏᓐᓂᒃ ᒪᓕᑦᓯᐊᕐᓂᕐᒥᓄᑦ, ᐊᑐᑦᓯᐊᕐᓗᒋᓪᓗ.

²⁰ ᑕᒪᓐᓇ ᓴᐳᑦᔭᐅᑦᔪᑎᒋᓯᒪᒐᔭᕐᒪᒍ ᐃᓅᖃᑎᒥᓂᑦ ᐱᐅᓂᕐᓴᐅᓇᓱᒋᓕᖁᓇᒍ, ᐊᑕᓂᐅᓪᓗ ᐱᖁᔭᖏᓐᓂᑦ ᓴᖑᖁᓇᒍ, ᑕᓕᕐᐱᖕᒧᓪᓘᓐᓃᑦ ᓴᐅᒥᖕᒧᓪᓘᓐᓃᑦ; ᐊᑯᓂᐅᔪᒥᒃ ᐊᖓᔪᖅᑳᕐᔪᐊᖑᖁᓪᓗᒍ ᐊᖓᔪᖅᑲᐅᕕᖕᒥᓂ, ᑖᓐᓇᓗ ᑭᖑᕚᖏᓪᓗ, ᐃᓴᕆᐊᓕᒥᐅᓂ.”