ᒨᓯᓯ ᑕᓪᓕᒪᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ

ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᓂᖅ

¹ “ᐊᑕᓂᖅ ᒎᑎᒋᔧᑦ ᐅᐱᓐᓇᕐᓯᑎᑕᒃᓴᕆᕙᑦ ᓇᓪᓕᐅᓐᓂᕐᓯᐅᕐᓗᑎᑦ ᖄᖏᕐᑕᐅᕕᖕᒥᒃ ᑕᖅᑭᒥ ᐊᐱᑉᒥᒃ ᑍᔭᐅᔪᒥ; ᑕᕝᕙᓂ ᑕᖅᑭᒥ ᐅᓐᓄᐊᒃᑯᑦ ᓴᐳᑎᔭᐅᓚᐅᕐᓯᒪᒐᑦᓯ ᐊᐅᓪᓚᕐᑎᑕᐅᓪᓗᓯᓗ ᐄᑦᔨᑉᑎᒥᑦ.

² ᑐᒃᓯᐊᕐᕕᖕᒧᐊᕐᑐᒃᓴᐅᕗᓯ ᑐᖁᑦᓯᓗᓯᓗ ᓰᐱᖁᑎᑦᓯ ᐃᓚᖓᓐᓂᒃ ᐅᕝᕙᓗ ᐃᒻᒧᒃᓯᐅᒐᖁᑎᑦᓯᓐᓂᒃ ᖄᖏᕐᑕᐅᕕᒃᓯᐅᑎᒥ ᓂᕆᔭᒃᓴᐅᖁᓪᓗᒍ ᐊᑕᓂᐅᑉ ᒎᑎᓯ ᐅᐱᓐᓇᕐᓯᑎᑕᐅᓂᖓᓄᑦ.

³ ᑍᒤᑦᑐᒥᒃ ᓂᕆᓕᕐᑎᓪᓗᓯ, ᓂᐊᖂᔭᕐᑐᕐᑐᒃᓴᐅᓐᖏᓚᓯ ᐳᕙᓪᓚᕐᓴᐅᑎᖃᕐᑐᒥᒃ. ᐅᓪᓗᓂᒃ 7ᓂᒃ ᓂᐊᖂᔭᓂᒃ ᐳᕙᓪᓚᕐᓴᐅᑎᖃᖏᑦᑐᓂᒃ ᓂᕿᖃᕐᑐᒃᓴᐅᕗᓯ, ᑍᒤᑦᓴᕆᐊᖃᓚᐅᕋᑦᓯ ᐄᑦᔨᑉᑎᒥᑦ ᑐᐊᕕᕐᓗᓯ ᐊᐅᓪᓚᕆᐊᖃᓕᕐᑎᓪᓗᓯ. ᓂᐊᖂᔭᓂᒃ ᑕᒪᒃᑯᓂᖓ ᓂᕆᔪᒃᓴᐅᕗᓯ ᑍᒤᑦᑐᑦ ᑍᔭᐅᕙᖕᓂᐊᕐᒪᑕ ᐅᖁᒤᒃᓴᑎᕐᑕᐅᓂᐅᑉ ᓂᐊᖂᔭᖁᑎᖏᓐᓂᒃ; ᑍᒫᓐᖓᑦ ᐃᓅᓯᓕᒫᑦᓯᓐᓂ ᐃᖅᑲᐅᒪᒃᓯᔪᓐᓇᖁᓪᓗᓯ ᐄᑦᔨᑉᑎᒥᑦ ᐊᐅᓪᓚᕐᑎᑕᐅᓚᐅᕐᓯᒪᓂᑦᓯᓐᓂᒃ, ᓄᓇᒥᑦ ᐅᖁᒤᒃᓴᕐᑎᑕᐅᕕᖕᒥᑦ.

⁴ ᐅᓪᓗᓂᒃ 7ᓂᒃ ᓄᓇᒋᔭᑦᓯᓐᓂ ᐃᓘᓐᓇᑦᓯᐊᖓᓂ ᐳᕙᓪᓚᕐᓴᐅᑎᑕᖃᕐᑐᒃᓴᐅᓐᖏᓚᖅ ᐊᑐᓂᑦ ᐊᖏᕐᕋᕆᔭᖏᓐᓂ; ᐃᑯᐊᓚᑎᑦᓯᓂᒃᑯᑦ ᑐᓂᕐᕈᑎᕕᓂᕐᒥᒃ ᐅᓐᓄᒥᓗ ᑕᕝᕙᓂ ᑐᓂᕐᕈᑕᐅᔪᕕᓂᐅᑉ ᓂᕿᖓ ᐅᓪᓗᒥ ᑕᕝᕙᓂᑦᓮᓐᓇᖅ ᓂᕆᔭᐅᔪᒃᓴᐅᕗᖅ ᓄᖑᑕᐅᓗᓂ.

⁵ “ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕈᑎᒃᓴᒧᑦ ᑐᓂᕐᕈᑎᒃᓴᖅ ᐆᒪᔪᖅ ᑐᖁᑕᒃᓴᕆᕙᓯ ᑐᒃᓯᐊᕐᕕᖕᒥ ᐊᓯᐊᓂᐅᖏᑦᑐᖅ ᐊᑕᓂᐅᑉ ᒎᑎᑦᓯ ᑐᓂᓯᒪᔭᖓᓂ ᓄᓇᒥ;

⁶ ᑕᕝᕙᓂ ᑭᓯᐊᓂ ᐊᑎᖓᑕ ᐃᓂᖓᓂ ᖄᖏᕐᑕᐅᕕᒃᓯᐅᑎᒥᒃ ᑐᓂᕐᕈᓯᕐᑐᒃᓴᐅᕗᓯ ᓯᕿᓂᖅ ᓂᐱᓕᕐᑎᓪᓗᒍ, ᑍᑦᓱᒪᓂ ᐄᑦᔨᑉᑎᒥᑦ ᐊᐅᓪᓚᓕᕐᑎᓪᓗᓯ ᑍᒤᓪᓗᐊᓕᕐᑎᓪᓗᒍ ᐊᐅᓪᓚᓚᐅᕋᑦᓯ.

⁷ ᓂᕿᖓ ᐆᔪᓕᐅᕐᑕᒃᓴᕆᕙᓯ ᓂᕆᓗᒍᓗ ᐃᓂᒥ ᐊᑕᓂᐅᑉ ᒎᑎᑦᓯ ᓂᕈᐊᕐᓯᒪᔭᖓᓂ; ᐅᓪᓛᖑᓕᕐᐸᓪᓕ ᐊᖏᕐᕋᕐᑐᒃᓴᐅᕗᓯ ᑐᐱᑦᓯᓐᓄᑦ.

⁸ ᐅᓪᓗᓂᒡᓕ ᓱᓕ ᐱᖓᓲᔪᕐᑐᓂᒃ ᓂᐊᖂᔭᓂᒃ ᓂᕿᖃᕐᑐᒃᓴᐅᕗᓯ ᐳᕙᓪᓚᕐᓴᐅᑎᖃᖏᑦᑐᓂᒃ; ᐅᓪᓗᓪᓕ 7ᖓᓐᓂ ᑲᑎᔪᒃᓴᐅᕗᓯ ᑐᒃᓯᐊᕆᐊᕐᑐᕐᓗᓯ ᐊᑕᓂᕐᒧᑦ ᒎᑎᑦᓯᓐᓄᑦ, ᑕᕝᕙᓂᓗ ᐅᓪᓗᒥ ᐱᓇᓱᐊᕐᑐᒃᓴᐅᓐᖏᓚᓯ.”

ᐱᕈᕐᑐᓂᒃ ᑲᑎᕐᓱᐃᕕᐅᑉ ᓇᓪᓕᐅᓐᓂᕐᓯᐅᕈᑕᐅᓂᖓ

⁹ “ᓂᐊᖂᔭᒃᓴᓂᒃ ᑲᑎᕐᓱᐃᒋᐊᓕᕐᓂᑦᓯᓐᓂᑦ ᐱᒋᐊᕐᓗᓯ ᐱᓇᓱᐊᕈᓯᕐᓂᒃ ᓈᓮᒋᐊᓯᔪᒃᓴᐅᕗᓯ ᐱᓇᓱᐊᕈᓯᕐᓄᑦ 7ᓄᑦ ᑎᑭᓪᓗᒋᑦ,

¹⁰ ᑕᕝᕙ ᐱᕈᕐᑐᓂᒃ ᑲᑎᕐᓱᐃᕕᖕᒥᒃ ᓇᓪᓕᐅᓐᓂᕐᓯᐅᕐᑐᒃᓴᐅᕗᓯ ᐱᓇᓱᐊᕈᓰᑦ 7ᖓᓐᓂ, ᐊᑕᓂᖅ ᒎᑎᓯ ᐅᐱᓐᓇᕐᓯᑎᑕᐅᖁᓪᓗᒍ, ᑐᓂᕐᕈᓯᕐᕕᐅᓂᖓᒍᑦ ᐃᓱᒪᕐᓱᕐᓗᑎᒃ ᑐᓂᔪᒪᔭᒥᖕᓂᒃ ᑐᓂᓯᓂᒃᑯᑦ ᐱᕈᕐᑎᑕᕕᓂᕐᒥᖕᓂᑦ ᓮᒻᒪᕐᑎᑕᐅᑦᔪᑎᒋᔭᒥᖕᓂᑦ ᑖᑦᓱᒪᓐᖓᑦ.

¹¹ ᖁᕕᐊᓱᒃᑐᒃᓴᐅᕗᓯ ᐊᑕᓂᐅᑉ ᒎᑎᑦᓯ ᓵᖓᓂ, ᕿᑐᕐᖓᓯ ᐃᓚᒋᓗᒋᑦ, ᐱᔨᓯᓗ ᐊᕐᓁᑦ ᐊᖑᑎᓪᓗ, ᓕᕔᑎᒃᑯᓪᓗ, ᓄᓇᖃᕐᑐᑐᖃᐅᖏᑦᑐᓪᓗ, ᐃᓕᐊᕐᔪᐃᓪᓗ, ᐅᐃᒡᒐᕐᓃᓪᓗ ᑕᕝᕙᓂ ᓄᓇᑦᓯᓐᓂ ᓄᓇᖅᑲᑎᒋᔭᓯ. ᑍᒤᓕᐅᕐᑐᒃᓴᐅᕗᓯ ᑲᑎᖃᑦᑕᕐᕕᖕᒥ ᑐᒃᓯᐊᕐᕕᖕᒥ.

¹² ᑕᒪᓐᓇ ᐃᒃᐱᒋᑦᓯᐊᕐᑕᒃᓴᕆᕙᓯ ᐱᖁᔨᑦᔪᑎᐅᔪᖅ ᓈᓚᑦᓯᐊᕐᓗᒍᓗ; ᐳᐃᒍᕐᑐᒃᓴᐅᓐᖏᓚᓯ ᓯᐊᓛᕆᔭᐅᓚᐅᕋᑦᓯ ᐄᑦᔨᑉᑎᒥ.”

ᓇᓪᓕᐅᓐᓂᕐᓯᐅᕐᕕᒃ ᑐᐲᓐᓇᕐᒥ ᐃᓂᖃᕐᓂᕐᒥᒃ

¹³ “ᓂᐊᖂᔭᒃᓴᓕᒫᓂᒃ ᐃᕖᔧᔭᕇᕈᑦᓯ ᕔᓂᒃᓴᓕᒫᓪᓗ ᐃᑏᔭᕐᑕᐅᔭᕇᕐᐸᑕ, ᑕᕝᕙ ᓇᓪᓕᐅᓐᓂᕐᓯᐅᕐᑐᒃᓴᐅᕗᓯ ᐅᓪᓗᓂᒃ 7ᓂᒃ ᑐᐲᓐᓇᕐᒥ ᐃᓂᖃᓚᐅᕐᓂᑦᓯᓐᓂᒃ.

¹⁴ ᖁᕕᐊᓱᒃᑐᒃᓴᐅᕗᓯ ᓇᓪᓕᐅᓐᓂᕐᓯᐅᓕᕐᑎᓪᓗᓯ ᕿᑐᕐᖓᓯ ᐃᓚᒋᓗᒋᑦ, ᐱᔨᓯᓗ ᐊᖑᑎᑦ ᐊᕐᓁᓪᓗ ᐃᓚᒋᓗᒋᑦ, ᓕᕔᑎᒃᑯᓪᓗ, ᓄᓇᖃᕐᑐᑐᖃᐅᖏᑦᑐᓪᓗ, ᐃᓕᐊᕐᔪᐃᓪᓗ, ᐅᐃᒡᒐᕐᓃᓪᓗ ᓄᓇᑦᓯᓐᓂ ᓄᓇᖅᑲᑎᒋᔭᓯ.

¹⁵ ᐊᑕᓂᖅ ᒎᑎᓯ ᐅᐱᓐᓇᕐᓯᑎᑕᒃᓴᕆᕙᓯ ᓇᓪᓕᐅᕐᓂᕐᓯᐅᕐᓗᓯ ᐅᓪᓗᓂᒃ 7ᓂᒃ ᑲᑎᖃᑦᑕᕐᕕᖕᒥ ᑐᒃᓯᐊᕐᕕᖕᒥ. ᖁᕕᐊᓱᒃᑐᒃᓴᐅᕗᓯ, ᐊᑕᓂᐅᑉ ᒎᑎᑦᓯ ᓮᒻᒪᕐᑎᓯᒪᖕᒪᓯ ᐱᕈᕐᑎᑕᑦᓯᒍᑦ ᐃᖅᑲᓁᔭᕐᓂᑦᓯᒍᓪᓗ.

¹⁶ “ᐊᖑᑎᓕᒫᑦ ᐃᓅᖃᑎᒌᒡᔪᐊᓂᑦ ᐱᓯᒪᔪᑦ ᑐᒃᓯᐊᕆᐊᖃᑦᑕᕐᑐᒃᓴᐅᕗᑦ ᐊᑕᓂᕐᒧᑦ ᐱᖓᓱᐃᕐᑐᕐᓗᑎᒃ ᐊᕐᕌᒍᒥ ᐊᑕᐅᓯᕐᒥ ᑕᕝᕙᓂ ᑐᒃᓯᐊᕐᕕᖕᒥ: ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᕕᒥ, ᐱᕈᕐᑐᓂᒃ ᑲᑎᕐᓯᕕᐅᑉ ᓇᓪᓕᐅᓐᓂᕐᓯᐅᕐᑕᐅᓂᖓᓂ, ᑐᐲᓐᓇᕐᒥᓗ ᐃᓂᖃᓚᐅᕐᓂᑦᓯ ᓇᓪᓕᐅᓐᓂᕐᓯᐅᕐᑕᐅᓂᖓᓂ. ᐊᖑᑎᓪᓕ ᐊᑐᓂᑦ ᑐᓂᕐᕈᑎᒃᓴᒥᖕᓂᒃ ᓇᒃᓴᕐᑐᒃᓴᐅᕗᑦ;

¹⁷ ᐊᖑᑎᓕᒪᑦ ᑐᓂᓯᔪᒃᓴᐅᕗᑦ ᐱᔪᓐᓇᕐᑕᒥᖕᓂᒃ, ᓮᒻᒪᕐᑎᑕᐅᓂᒃᑯᑦ ᐊᑕᓂᕐᒧᑦ ᒎᑎᑦᓯᓐᓄᑦ ᑐᓂᓯᕕᐅᓯᒪᓂᑎᒃ ᒪᓕᒡᓗᒋᑦ.”

ᐊᑦᔨᒌᒃᑎᑦᓯᓗᓂ ᐊᐅᓚᑦᓯᔪᒃᓴᐅᓂᖅ

¹⁸ “ᐋᖅᑭᒃᓱᐃᔨᒃᓴᓂᒃ ᑎᓕᓯᔪᒃᓴᐅᕗᓯ ᐊᖓᔪᖅᑳᖑᓂᐊᕐᑐᓂᒡᓗ ᐊᑕᓂᐅᑉ ᑐᓂᓯᒪᔭᖏᓐᓂ ᓄᓇᑦᓯᓐᓂ, ᑭᖑᕚᖑᖃᑎᒌᑦ ᒪᓕᒡᓗᒋᑦ; ᑖᒃᑯᐊᓗ ᐋᖅᑭᒃᓱᐃᔨᐅᔪᒃᓴᐅᕗᑦ ᐃᓄᖕᓂᒃ ᐊᑦᔨᒌᒃᑎᑦᓯᓗᑎᒃ.

¹⁹ ᐃᓄᖕᓂᒃ ᐋᖅᑭᒃᓱᐃᓂᖅ ᐱᑦᓯᐊᕆᐊᖃᕐᐳᖅ; ᐃᓔᓐᓇᕐᓯᐅᕐᓗᑎᒃ ᐋᖅᑭᒃᓱᐃᔪᒃᓴᐅᓐᖏᓚᑦ; ᓯᓔᕐᕆᒃᓯᓇᓱᐊᕐᑐᓂᒡᓗ ᒪᓕᒃᓴᕐᑐᒃᓴᐅᓐᖏᓚᑦ, ᑐᓂᕐᕈᑎᒋᔭᐅᔪᑦ ᓯᓔᕐᕆᒃᓯᕈᑕᐅᓇᓱᐊᕐᓗᑎᒃ ᑕᑯᓐᓇᕈᓐᓃᕐᑎᑦᓯᔪᓐᓇᕐᒪᑕ ᐊᒡᓛᑦ ᓯᓚᑐᔪᓂᒃ ᐱᑦᓯᐊᕋᓱᒃᑐᓂᒡᓗ ᐊᒡᓛᑦ, ᓈᒻᒪᓈᖏᑦᑐᓂᒡᓗ ᐃᓱᒪᑖᕐᑎᑦᓯᓕᕈᓐᓇᕐᓗᑎᒃ.

²⁰ ᓈᒻᒪᓈᕐᓯᒪᔪᒥᒃ ᐊᑦᔨᒌᓐᖏᑎᑦᓯᖏᑦᑐᒥᒡᓗ ᑖᑦᓱᒥᖓᑐᐊᖅ ᒪᓕᒃᑐᒃᓴᐅᕗᓯ, ᐃᓅᖁᓪᓗᓯ ᑭᖑᕐᖑᑦᔨᓗᓯᓗ ᓄᓇᒥᒃ ᐊᑕᓂᐅᑉ ᒎᑎᑦᓯ ᑐᓂᓯᒪᔭᖓᓂ ᐃᓕᑦᓯᓐᓄᑦ.

²¹ “ᑐᓂᕐᕈᓯᕐᕕᖕᒥᒃ ᐊᑕᓂᕐᒧᑦ ᒎᑎᑦᓯᓐᓄᑦ ᓴᓇᓕᕈᕕᑦ, ᓴᓂᐊᓄᑦ ᓇᑉᐸᕐᓯᔪᒃᓴᐅᓐᖏᓚᑎᑦ ᕿᔪᖕᒥᒃ ᐊᕐᓇᓐᖑᐊᒥᒃ ᐊᓯᕋᒥᒃ ᐊᑎᓕᖕᒥᒃ.

²² ᐅᔭᕋᖕᓂᒡᓗ ᓇᐸᔪᓂᒃ ᒎᑎᓐᖑᐊᕆᔭᐅᓲᓂᒃ, ᐋᖅᑭᒃᓯᔪᒃᓴᐅᓐᖏᓚᑎᑦ; ᐊᑕᓂᐅᑉ ᒎᑎᑦᓯ ᑕᒪᒃᑯᐊ ᐆᒥᒋᖕᒪᒋᑦ.”