ᒨᓯᓯ ᑕᓪᓕᒪᖏᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᕐᕌᒍᑦ 7ᖓᓐᓂ

¹ “ᐊᕐᕌᒍᑦ 7 ᐊᓂᒍᕌᖓᑕ ᑍᒪᓐᖓᑦ ᐃᓕᑦᓯᓐᓄᑦ ᐊᑭᓕᒃᓴᖃᕐᑐᓕᒫᑦ ᐊᑭᓕᒃᓴᖏᑦ ᐊᑭᓕᒃᓴᐅᔪᓐᓁᕐᑎᑕᒃᓴᕆᕙᓯ.

² ᐃᒫᒃ ᑕᒪᓐᓇ ᐋᖅᑭᒃᓯᒪᔪᒃᓴᐅᕗᖅ. ᑮᓇᐅᔭᓂᒃ ᐊᑐᕐᑎᑦᓯᓯᒪᔪᓕᒫᑦ ᐃᓴᕆᐊᓕᐅᖃᑎᒥᓄᑦ ᐊᑭᓕᒃᓴᖏᓐᓂᒃ ᐊᑭᓕᒃᓴᐅᔪᓐᓁᕐᑎᑦᓯᔪᒃᓴᐅᕗᖅ; ᑮᓇᐅᔭᓂᒃ ᐊᑭᓕᐅᑎᔪᒃᓴᓂᒃ ᑲᑎᑦᓯᓇᓱᐊᕐᑐᒃᓴᐅᓐᖏᓚᖅ; ᐊᑕᓂᐅᑉ ᓇᖕᒥᓂᖅ ᐊᑭᓕᒃᓴᐅᔪᓐᓁᖁᓯᒪᓕᕐᑕᖓᓂᒃ.

³ ᓄᓇᖃᑎᑐᖃᕆᓐᖏᑕᑦᓯᓕ ᐊᑭᓕᒃᓴᖏᓐᓂᒃ ᑲᑎᑦᓯᔪᓐᓇᕐᐳᓯ ᐊᑭᓕᐅᑎᔪᒃᓴᓂᒃ, ᑭᓯᐊᓂᓕ ᐃᓕᑦᓯ ᓇᖕᒥᓂᖅ ᐃᓅᖃᑎᓪᓚᕆᑦᓯ ᐃᓕᑦᓯᓐᓄᑦ ᐊᑭᓕᒃᓴᖏᓐᓂᒃ ᐊᑭᓕᕐᑕᐅᔪᒪᒧᑦ ᑲᑎᑦᓯᓇᓱᒃᑐᒃᓴᐅᓐᖏᓚᓯ.

⁴ “ᐊᑕᓂᐅᑉ ᒎᑎᑦᓯ ᓮᒻᒪᕐᑎᓐᓂᐊᕐᐹᓯ ᑕᒫᓂ ᓄᓇᒥ ᐃᓕᑦᓯᓐᓄᑦ ᑐᓂᓯᒪᔭᖓᓂ ᓄᓇᖃᕐᑎᓪᓗᓯ. ᓇᖕᒥᓂᕐᓕ ᐃᓅᖃᑎᓯ ᐊᔪᕐᓴᓗᐊᕐᑐᖃᕐᓂᐊᓐᖏᓚᑦ

⁵ ᑖᓐᓇ ᓈᓚᖕᓂᐊᕈᑦᓯᐅᒃ ᐊᑐᕐᑕᐅᖁᔭᓕᒫᖏᓐᓂᒡᓗ ᐊᑐᕋᓱᑦᓯᐊᕈᑦᓯ ᐅᓪᓗᒥ ᐃᓕᑦᓯᓐᓄᑦ ᐱᖁᔨᑦᔪᑎᒋᔭᓐᓂᒃ.

⁶ ᑕᕝᕙ ᐊᑕᓂᐅᑉ ᒎᑎᑦᓯ ᓮᒻᒪᕐᑎᓐᓂᐊᕐᐹᓯ, ᑕᒪᓐᓇ ᐊᖏᕈᑎᒋᓯᒪᖕᒪᒍ. ᐃᓅᖃᑎᒌᒡᔪᐊᓄᑦ ᐅᓄᕐᑐᓄᑦ ᑮᓇᐅᔭᑦᓯᓐᓂᒃ ᐊᑐᕐᑕᐅᑎᑦᓯᔪᒫᕐᐳᓯ, ᑭᓯᐊᓂᓕ ᓇᓪᓕᐊᓐᓂᓪᓘᓐᓃᑦ ᐊᑐᕐᑐᐊᕆᐊᖃᕈᒫᓐᖏᓚᓯ; ᐃᓅᖃᑎᒌᒡᔪᐊᓂᒃ ᐅᓄᕐᑐᓂᒃ ᐊᐅᓚᑦᓯᔪᒫᕐᐳᓯ, ᑭᓯᐊᓂᓕ ᐃᓅᖃᑎᒌᒡᔪᐊᓄᑦ ᓇᓪᓕᐊᓐᓄᓪᓘᓐᓃᑦ ᐊᐅᓚᑕᐅᔪᒫᓐᖏᓚᓯ.

⁷ “ᓄᓇᓖᓪᓕ ᓇᓪᓕᐊᓐᓂᑐᐃᓐᓇᖅ ᓄᓇᒥ ᐊᑕᓂᐅᑉ ᒎᑎᑦᓯ ᑐᓂᓯᒪᔭᖓᓂ ᐃᓕᑦᓯᓐᓄᑦ ᐃᓴᕆᐊᓕᒥᐅᖑᖃᑎᑦᓯᓐᓂᒃ ᐊᔪᕐᓴᕐᑐᖃᕐᐸᑦ, ᐃᒻᒥᓂᒃ ᑭᓯᐊᓂ ᐃᓱᒪᒋᓂᕐᒧᑦ ᐃᑲᔪᕐᑍᓕᒪᔪᒃᓴᐅᓐᖏᓚᑎᑦ.

⁸ ᐃᑲᔪᕐᑍᓕᒪᓂᐊᕐᓇᒍ ᐊᑐᕐᑎᑕᒃᓴᕆᕙᑦ ᓈᒻᒪᒋᔭᖏᓐᓂᒃ, ᓱᓇᑐᐃᓐᓇᐅᒐᓗᐊᕐᐸᑦ.

⁹ ᐅᑦᔨᕐᑐᑦᓯᐊᕆᑦᓯ, ᐱᐅᖏᑦᑐᒥᒃ ᐆᒻᒪᑎᑦᓯᓐᓂ ᐃᓱᒪᖁᓇᓯ, ᐅᖃᕐᓗᓯ, ‘ᐊᕐᕌᒍᑦ 7ᖓ, ᐊᑭᓕᒃᓴᓂᒃ ᓴᒃᑯᐃᕕᒃ ᖃᓂᓗᐊᓕᕐᒪᑦ,’ ᓈᒻᒪᒋᖏᓪᓗᒍᓗ ᖃᑕᓐᖑᑏᑦ ᑕᑯᓐᓇᕐᓗᒍ, ᑐᓂᓯᕕᒋᖏᒃᑯᕕᐅᒃ, ᐊᑕᓂᕐᒧᑦ ᓂᓪᓕᐊᓕᕋᔭᕐᒪᑦ ᐱᑦᔪᑎᒋᓗᑎᑦ, ᑕᕝᕙ ᐊᔪᕐᑐᓕᓯᒪᓕᕋᔭᕐᐳᑎᑦ.

¹⁰ ᑐᓂᓯᕕᒋᔭᒃᓴᕆᕙᑦ ᐊᓐᓂᕈᓱᖏᓪᓗᑎᑦ ᐱᐅᖏᑦᑐᒥᒡᓗ ᐃᓱᒪᖃᖏᓪᓗᑎᑦ ᑐᓂᓯᓕᕈᕕᑦ ᑖᑦᓱᒧᖓ; ᑕᕝᕙ ᐊᑕᓂᐅᑉ ᓮᒻᒪᕐᑎᓐᓂᐊᕐᐹᑎᑦ ᐱᓇᓱᐊᕐᑕᓕᒫᕐᓂ.

¹¹ ᐊᔪᕐᓴᕐᑐᑦ ᓄᖑᓚᐅᕐᓯᒪᓂᐊᖏᒻᒪᑕ ᓄᓇᒥ; ᑍᒤᒻᒪᑦ ᑕᕝᕙ ᐱᖁᓪᓚᕆᒃᐸᑦᓯ, ᐊᓐᓂᕈᓱᖏᓪᓗᓯ ᐃᑲᔪᕆᐊᖃᕐᐳᓯ ᖃᑕᓐᖑᑎᑦᓯᓐᓂᒃ, ᐱᖃᖏᑦᑐᓂᒃ ᐊᔪᕐᓴᕐᑐᓂᒡᓗ ᓄᓇᒥ.”

ᓯᐊᓛᑦ ᖃᓄᐃᓕᐅᕐᑕᐅᔭᕆᐊᖃᕐᓂᖏᑦ

¹² “ᐄᑉᕉᒥᒃ ᖃᑕᓐᖑᑎᖕᓂᒃ ᐊᖑᒻᒥᒃ ᐊᕐᓇᒥᒡᓘᓐᓃᑦ, ᓯᐊᓛᕐᑖᕆᓗᒍ ᓂᐅᕕᕈᕕᑦ, ᑖᑦᓱᒪ ᐱᔨᑦᓯᕐᑕᒃᓴᕆᕚᑎᑦ ᐊᕐᕌᒍᓂᒃ ᐱᖓᓲᔪᕐᑐᓂᒃ, ᐊᕐᕌᒍᓪᓕ 7ᖓᓐᓂ, ᑕᕝᕙ ᕿᓚᕈᑦᔮᕐᑕᒃᓴᕆᕙᑦ ᐃᓕᖕᓂᑦ.

¹³ ᕿᓚᕈᑦᔮᕈᕕᐅᒡᓕ, ᓱᓇᖃᕐᑎᓐᓇᒍ ᐊᐅᓪᓚᕐᑎᑕᒃᓴᕆᓐᖏᓚᑦ.

¹⁴ ᐊᓐᓂᕈᓱᖏᓪᓗᑎᑦ ᑐᓂᓯᕕᒋᔭᒃᓴᕆᕙᑦ ᓰᐱᖁᑎᖕᓂᑦ, ᓂᐊᖂᔭᒃᓴᖁᑎᖕᓂᓪᓗ ᐃᕖᔧᕕᖕᒥᑦ ᐱᔪᓂᒃ, ᐅᐂᓂᒃᓴᖁᑎᖕᓂᓪᓗ; ᐊᑕᓂᐅᑉ ᐃᓕᖕᓄᑦ ᓮᒻᒪᕐᑎᑦᓯᑦᔪᑎᒋᓯᒪᔭᖏᑦ ᒪᓕᒡᓗᒋᑦ, ᑐᓂᓯᕕᒋᔭᒃᓴᕆᕙᑦ.

¹⁵ ᐃᖅᑲᐅᒪᔭᕆᐊᖃᕋᑦᓯ ᐃᓕᑦᓯᑦᑕᐅᖅ ᓯᐊᓛᖑᓚᐅᕐᒥᒐᑦᓯ ᓄᓇᒥ ᐄᑦᔨᑉᑎᒥ, ᐊᑕᓂᐅᓪᓕ ᒎᑎᑦᓯ ᑕᕝᕙᓐᖓᑦ ᐊᓂᑎᓚᐅᕐᒪᓯ; ᑍᒤᒻᒪᑦ ᐱᖁᔭᒥᒃ ᑕᒪᑐᒥᖓ ᒫᓐᓇ ᒪᓕᒐᒃᓴᓕᐅᕐᐸᑦᓯ.

¹⁶ “ᓯᐊᓛᑦᓯᓕ ᐅᖃᐅᑎᒃᐸᓯ, ‘ᐃᓕᑦᓯᓐᓂᑦ ᓅᒍᒪᓐᖏᓚᖓ’; ᐅᖓᓕᕐᓂᕐᒥᓄᑦ ᐃᓕᖕᓂᒃ ᐃᒡᓗᒥᐅᖃᑎᖕᓂᒡᓗ, ᐃᓂᖃᑦᓯᐊᕐᓂᕐᒥᓄᑦ ᐃᓕᑦᓯᓐᓂ.

¹⁷ ᑕᕝᕙ ᐳᑐᓯᑦᔪᑎᒥᒃ ᐱᔪᒃᓴᐅᕗᓯ ᐃᒡᓗᑦᓯ ᐅᒃᑯᐊᖓᓄᐊᕐᑕᒃᓴᕆᕙᑦ ᓯᐅᑎᖓ ᑲᐱᖃᓯᐅᑦᔭᒃᓴᕆᕙᑦ ᐅᒃᑯᐊᒧᑦ, ᑕᕝᕙ ᑍᒪᓐᖓᓕᒫᖅ ᓯᐊᓛᕆᓕᕋᔭᕐᐸᑦ ᐃᓅᓯᖓ ᓈᓗᒍ. ᐊᕐᓇᕐᑕᐅᖅ ᓯᐊᓛᖅ ᑍᒫᑦᓮᓐᓇᖅ ᐱᓂᐊᕐᕕᒋᔭᒃᓴᕆᕙᑦ.

¹⁸ ᐊᒃᓱᕈᕐᓇᓗᐊᕐᑐᒃᓴᐅᓐᖏᓚᖅ ᐃᓕᑦᓯᓐᓄᑦ, ᓯᐊᓛᕆᔭᕐᓂᒃ ᓯᐊᓛᖑᔪᓐᓃᕐᑎᑦᓯᒍᕕᑦ; ᑖᑦᓱᒪ ᐱᔨᑦᓯᕐᕕᒋᓯᒪᖕᒪᑎᑦ ᐊᕐᕌᒍᓂᒃ ᐱᖓᓲᔪᕐᑐᓂᒃ ᐃᖅᑲᓁᔭᕐᑎᑦᓯᒐᔭᕈᕕᑦ ᐊᕝᕙᓪᓗᐊᖓᓂᒃ ᐱᓇᓱᐊᕐᓂᕐᓴᐅᓯᒪᖕᒪᑦ. ᑍᒤᓕᐅᕈᕕᑦ, ᐊᑕᓂᐅᑉ ᒎᑎᕕᑦ ᓮᒻᒪᕐᑎᓐᓂᐊᕐᐹᑎᑦ ᑕᒤᑎᒍᑦ ᐱᓇᓱᐊᕐᓂᕆᔭᒃᑯᑦ.”

ᐃᕐᓂᐊᕆᔭᐅᖅᑳᕐᓯᒪᔪᑦ ᐃᒻᒧᒃᓯᐅᖎᑦ ᓰᐲᓪᓗ

¹⁹ “ᓴᓂᕐᕔᓯᒪᖃᑦᑕᕐᑐᒃᓴᐅᕗᓯ ᐊᑕᓂᕐᒧᑦ ᒎᑎᑦᓯᓄᑦ ᑐᓂᕐᕈᑎᒃᓴᓕᒫᓂᒃ ᐊᖑᑎᓂᒃ ᐃᕐᓂᐊᕆᔭᐅᖄᕐᓯᒪᔪᓂᒃ ᐃᒻᒧᒃᓯᐅᒐᖁᑎᑦᓯᓐᓄᑦ ᓰᐲᖁᑎᑦᓯᓐᓄᓪᓗ; ᑕᒪᒃᑯᐊ ᐃᒻᒧᒃᓯᐅᒊᑦ ᐃᕐᓂᐊᖑᖅᑳᕐᓯᒪᔪᑦ ᐱᓇᓱᐊᕈᑎᒋᔭᒃᓴᕆᓐᖏᓚᓯ, ᓰᐲᓪᓗ ᐃᕐᓂᐊᖑᖅᑲᕐᓯᒪᔪᑦ ᓴᓕᔭᒃᓴᕆᓇᒋᑦ.

²⁰ ᑕᒪᒃᑯᐊᓕ ᐊᕐᕌᒍᑕᒫᑦ ᑍᒤᑦᑐᑦ ᓂᕆᔭᒃᓴᕆᕙᓯ, ᐃᓚᓯ ᐃᓚᒋᓗᒋᑦ ᐊᑕᓂᐅᑉ ᒎᑎᑦᓯ ᓵᖓᓂ ᑐᒃᓯᐊᕐᕕᖕᒥ.

²¹ ᐃᕐᓂᐊᕆᔭᐅᖄᕐᓯᒪᔪᕐᓕ ᑕᕐᓴᖃᕐᐸᑦ, ᐱᓱᒍᓐᓇᑦᓯᐊᖏᑉᐸᓪᓘᓐᓃᑦ ᐅᕝᕙᓗ ᑕᐅᑐᖏᑉᐸᑦ, ᐅᕝᕙᓗ ᐊᓯᐊᒍᑦ ᐃᓕᖅᑯᓯᕐᓱᖏᑉᐸᑦ, ᑕᒪᒃᑯᐊ ᑍᒤᑦᑐᑦ ᑐᓂᕐᕈᑎᒋᔭᒃᓴᕆᓐᖏᓚᓯ ᐊᑕᓂᕐᒧᑦ ᒎᑎᑦᓯᓐᓄᑦ.

²² ᑍᒤᑦᑐᓪᓕ ᓂᕐᔪᑏᑦ ᐊᖏᕐᕋᑦᓯᓐᓂ ᓂᕆᔪᓐᓇᕐᐸᓯ; ᐅᒃᐱᕐᓂᒃᑯᑦ ᓴᓗᒪᓂᕋᕐᑕᐅᒐᓗᐊᕐᐸᑦ ᓴᓗᒪᓂᕋᕐᑕᐅᖏᑉᐸᓪᓘᓐᓃᑦ, ᓂᕆᔭᒃᓴᕆᕙᓯ, ᑐᑐᖓᔪᒥᒃ ᑐᒃᑑᔮᕐᑐᒥᒡᓘᓐᓃᑦ ᓂᕆᒐᔭᕐᓂᑦᓯᑐᑦ.

²³ ᐊᐅᖏᓪᓕ ᓂᕆᔭᐅᔪᒃᓴᐅᓐᖏᓚᑦ; ᒪᓂᖅᑲᒧᓪᓕ ᑯᕕᔭᒃᓴᕆᕙᓯ ᐃᒥᕐᑎᑐᑦ.”