ᒨᓯᓯ ᑕᓪᓕᒪᖏᑦ 14 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓚᓐᖓᕐᓗᓂ ᕿᒃᓵᖕᓂᕐᒧᑦ ᐊᑐᕐᑕᐅᖁᔭᐅᖏᑦᑐᑦ

¹ “ᐊᑕᓂᕐᒧᑦ ᒎᑎᑦᓯᓐᓄᑦ ᕿᑐᕐᖓᐅᒐᑦᓯ; ᐃᓕᑦᓯᓐᓂᒃ ᑭᓪᓕᐊᔪᒃᓴᐅᓐᖏᓚᓯ ᐅᕝᕙᓗ ᓴᓕᔪᒃᓴᐅᓐᖏᓚᓯ ᓄᔧᕈᑎᓗᓯ, ᑐᖁᔪᑦ ᐱᔪᑎᒋᓗᒋᑦ.

² ᐊᑕᓂᕐᒧᑦ ᒎᑎᑦᓯᓐᓄᑦ ᐃᓄᖁᑎᒋᔭᐅᒐᑦᓯ ᐃᑦᔪᕐᓁᑦᑐᖁᑎᒋᔭᐅᓪᓗᓯ, ᐊᑕᓂᐅᑉ ᓂᕈᐊᕐᓯᒪᖕᒪᓯ ᓇᖕᒥᓂᕆᔪᒪᓪᓗᓯ, ᓄᓇᕐᔪᐊᕐᒦᑦᑐᓕᒫᑦ ᐊᑯᕐᖓᓐᓂᑦ.”

ᐆᒪᔪᐃᑦ ᓴᓗᒪᓂᕋᕐᑕᐅᔪᑦ ᓴᓗᒪᖏᓐᓂᕋᕐᑕᐅᔪᓪᓗ

³ “ᓱᓇᒥᒡᓘᓐᓃᑦ ᓂᕆᔪᒃᓴᐅᓐᖏᓚᓯ ᐊᑕᓂᐅᑉ ᓴᓗᒪᖏᑦᑑᓂᕋᕐᑕᖏᓐᓂᒃ.

⁴ ᒪᑯᐊ ᑕᕝᕙ ᐆᒪᔪᐃᑦ ᓂᕆᔪᓐᓇᕐᑕᓯ; ᐃᒻᒧᒃᓯᐅᒊᑦ, ᓰᐲᑦ, ᒎᑦᓰᓪᓗ,

⁵ ᑐᒃᑐᖓᔪᐃᑦ, ᓰᐲᓪᓗ ᓄᔪᐊᕐᑐᑦ, ᒎᑦᓰᓪᓗ ᓄᔪᐊᕐᑐᑦ, ᑐᒃᑑᔮᕐᑐᓪᓗ ᐃᐱᒃᓯᒥᒡᓗ ᑍᔭᐅᔪᑦ, ᐋᓐᑎᓘᑉᒥᒡᓗ ᑍᔭᐅᔪᑦ, ᓰᐱᐅᔮᕐᑐᓪᓗ ᖃᖅᑲᒥᐅᑍᑦ.

⁶ ᖃᓄᐃᑦᑐᑐᐃᓐᓁᑦ ᐆᒪᔪᑦ ᐃᑎᒐᖏᑦ ᑯᑭᖃᕐᑐᑦ ᒪᕐᕉᓕᖅᑲᖓᔪᓂᒃ ᑕᒧᓗᕋᐅᔭᕐᐸᒃᑐᓪᓗ ᐆᒪᔪᓕᒫᓂᑦ ᑕᒪᒃᑯᐊ ᓂᕆᔪᓐᓇᕐᐸᓯ.

⁷ ᐆᒪᔪᐃᓪᓕ ᓂᕆᔭᐅᔭᕆᖃᓐᖏᓚᑦ ᑭᓯᐊᓂ ᐃᑎᒐᖏᑦ ᑯᑭᖃᕐᐸᑕ ᒪᕐᕉᓕᖅᑲᖓᔪᓂᒃ ᑕᒧᓗᕋᐅᔭᕐᐸᒡᓗᑎᒡᓗ. ᒪᑯᐊ ᓂᕆᔭᒃᓴᕆᓐᖏᓚᓯ ᑳᒥᓖᑦ, ᐅᑲᓖᑦ, ᓂᕐᔪᑏᓪᓗ ᐹᑦᔪᕐᒥᒃ ᐊᑎᓖᑦ. ᑕᒪᒃᑯᐊ ᑕᒪᑦᔭ ᓴᓗᒪᖏᓐᓂᕋᕐᑕᐅᔭᕆᐊᓖᑦ; ᑕᒧᓗᕋᐅᔭᕐᐸᒃᑑᒐᓗᐊᑦ ᑯᑭᖏᑦ ᒪᕐᕉᓕᖅᑳᖓᖏᒻᒪᑕ.

⁸ ᑰᒃᑰᓯᓂᒃ ᓂᕆᔪᒃᓴᐅᓐᖏᓚᓯ, ᑕᒪᒃᑯᐊ ᓴᓗᒪᖏᑦᑑᓂᕋᕐᑕᐅᔪᒃᓴᐅᖕᒪᑕ; ᐃᑎᒐᖏᑦ ᑯᑭᖃᕐᑑᒐᓗᐊᑦ ᒪᕐᕉᓕᖅᑲᖓᔪᓂᒃ ᑭᓯᐊᓂᓕ ᑕᒧᓗᕋᐅᔭᕐᐸᖏᒻᒪᑕ; ᑕᒪᒃᑯᐊ ᑕᒪᑦᔭ ᓂᕐᔪᑏᑦ ᓂᕆᔭᕆᐊᖃᓐᖏᑕᓯ ᑐᖁᖓᑎᓪᓗᒋᓪᓘᓐᓃᑦ ᐊᒃᑐᕆᐊᖃᓐᖏᓚᓯ.

⁹ “ᖃᓄᐃᑦᑐᑐᐃᓐᓇᕐᓂᒡᓕ ᓂᕆᔪᓐᓇᕐᐳᓯ ᐃᒪᕐᒥᐅᑕᓂᒃ ᐃᖃᓗᖕᓂᒃ ᐸᐱᕈᖃᕐᐸᑕ ᑲᕕᓯᖃᕐᐸᑕᓗ ᓂᕆᔪᓐᓇᕐᐸᓯ,

¹⁰ ᐸᐱᕈᖃᖏᑦᑐᓪᓕ ᑲᕕᓯᖃᖏᑦᑐᓪᓗ ᓂᕆᔭᒃᓴᕆᓐᖏᓇᓯ; ᑕᒪᒃᑯᐊ ᓴᓗᒤᑦᑑᖕᒪᑕ ᐃᓕᑦᓯᓐᓄᑦ.

¹¹ “ᑎᖕᒥᐊᓂᒃ ᖃᓄᐃᑦᑐᑐᐃᓐᓇᕐᓂᒃ ᓴᓗᒪᓂᕋᕐᑕᐅᔪᓂᒃ ᓂᕆᔪᓐᓇᕐᐳᓯ.

¹² ᒪᑯᐊᓕ ᑕᕝᕙ ᑎᖕᒥᐊᑦ ᓂᕆᔭᕆᐊᖃᓐᖏᑕᓯ; ᓇᒃᑐᕋᓖᑦ, ᐅᒃᐱᒡᔪᐊᑦ, ᓇᒃᑐᕋᓕᐅᔮᕐᑐᑦ, ᑭᒡᒐᕖᑦ,

¹³ ᓂᕿᑐᕐᑏᑦ ᐸᓴᕐᑦᒥᒃ ᐊᑎᓖᑦ, ᑭᒡᒐᕕᐊᕐᔪᐃᓪᓗ, ᑬᑦᓗ ᐊᑦᔨᒐᓚᓕᒫᖏᓪᓗ;

¹⁴ ᑐᓗᒐᓕᒫᓪᓗ ᐊᑦᔨᒐᓚᓕᒫᖏᓪᓗ;

¹⁵ ᑎᖕᒥᐊᕐᔪᐊᓪᓗ ᑎᖏᔪᓐᓇᖏᑦᑐᑦ, ᑭᒡᒐᕕᐊᕐᔫᔮᕐᑐᓪᓗ ᐅᓐᓄᐊᒃᑯ ᖃᖓᑕᕙᒃᑐᑦ, ᓇᐅᔧᓪᓗ, ᕿᓐᓄᐊᔪᐊᓪᓗ, ᐊᑦᔨᒐᓚᓕᒫᖏᓪᓗ;

¹⁶ ᐅᒃᐱᒡᔪᐊᓪᓗ ᒥᑭᔪᑦ ᐊᖏᓂᕐᓮᓪᓗ, ᕼᐃᓐᓯᓂᒡᓗ ᑍᔭᐅᔪᑦ ᐃᒪᕐᒥᐅᑍᑦ

¹⁷ ᐱᓕᑲᓃᓪᓗ, ᑲᕆᐊᓃᓪᓗ ᕙᐅᓪᓮᑦ ᑐᖁᖓᔪᕐᓯᐅᕐᑏᓪᓗ ᑯᕐᒧᕌᓐᑎᓪᓗ,

¹⁸ ᓂᐅᑯᑖᓖᓪᓗ ᓯᑐᐊᕆᒃᒥᒃ ᑍᔭᐅᔪᑦ, ᓂᐅᑯᑖᓖᓪᓗ ᕼᐃᕌᓂᒥᒃ ᐊᑎᓖᑦ, ᐊᑦᔨᒐᓚᓕᒫᖏᓪᓗ; ᕼᐅᐳᐃᓪᓗ ᐅᓐᓄᐊᕐᓯᐅᑏᓪᓗ ᐃᓴᕈᓖᑦ.

¹⁹ “ᖁᐱᕐᕈᓕᒫᓪᓗ ᐃᓴᕈᓖᑦ ᑕᒪᒃᑯᐊ ᐃᓕᑦᓯᓐᓄᑦ ᓴᓗᒤᑉᐳᑦ; ᓂᕆᔭᐅᔭᕆᐊᖃᕋᑎᒡᓗ.

²⁰ ᐃᓴᕈᓕᓕᒪᓪᓕ ᖁᐱᕐᕈᐃᑦ ᓴᓗᒪᔪᑦ ᓂᕆᔪᓐᓇᕐᐸᓯ.

²¹ “ᓂᕐᔪᑎᓂᒃ ᐃᒻᒥᖕᓂᒃ ᑐᖁᔪᕕᓂᕐᓂᒃ ᓂᕆᔪᒃᓴᐅᓐᖏᓚᓯ; ᓄᓇᖃᑎᑐᖃᕆᓐᖏᑕᑦᓯᓐᓄᑦ ᓄᓇᑦᓯᓐᓃᑦᑐᒧᑦ ᑐᓂᔪᓐᓇᕐᐸᓯ ᓂᕆᔭᐅᖁᓪᓗᒋᑦ ᑖᒃᑯᓄᖓ, ᐅᕝᕙᓗ ᓄᓇᖃᑎᒋᓐᖏᑕᑦᓯᓐᓄᑦ ᐊᓯᑦᓯᓐᓃᑦᑐᓄᑦ ᓂᐅᕐᕈᑎᒋᔪᓐᓇᕐᐸᓯ; ᐃᓕᑦᓯᓕ ᐊᑕᓂᕐᒧᑦ ᒎᑎᑦᓯᓐᓄᑦ ᐃᓄᖁᑕᐅᕗᓯ ᐃᑦᔪᕐᓁᑦᑑᓪᓗᓯ. “ᒎᑦᓰᑦ ᓄᕐᕋᖓᓂᒃ ᐆᔪᓕᐅᕐᑐᒃᓴᐅᓐᖏᓚᓯ ᐊᓈᓇᖓᑕ ᐃᒻᒧᖓᓄᑦ.”

ᑕᓪᓕᒪᐅᔪᐃᕐᓂᕐᒧᑦ ᐱᖁᔧᑦ

²² “ᑕᓪᓕᒪᐅᔪᐃᕐᑐᒃᓴᐅᕗᓯ ᐱᕈᕐᓯᐊᒃᓴᑦᓯ ᐃᓕᐅᕋᓚᐅᕐᑕᓯ ᐱᕈᕐᑎᑕᓕᒫᖏᓐᓂᒃ, ᐱᕈᕐᓰᕕᖕᓂᑦ ᐊᕐᕌᒍᑕᒫᑦ ᐱᕈᕐᑎᑉᐸᒃᑕᑦᓯᓐᓂᑦ.

²³ ᑕᕝᕙ ᐊᑕᓂᐅᑉ ᒎᑎᑦᓯ ᓵᖓᓂ, ᑐᒃᓯᐊᕐᕕᒃᓴᐅᖁᓪᓗᒍ ᓂᕈᐊᕐᓯᒪᔭᖓᓄᐊᕐᑐᒃᓴᐅᕗᓯ; ᑕᓪᓕᒪᐅᔪᐃᕈᑎᓯ ᓂᕆᔭᒃᓴᕆᕙᓯ ᓂᐊᖂᔭᒃᓮᑦ, ᐅᐂᓃᓪᓗ, ᓇᐹᕐᑐᐃᓪᓗ ᐸᐅᕐᖓᖏᑕ ᐅᕐᓱᖏᑦ, ᐃᒻᒧᒃᓯᐅᒐᖁᑎᑦᓯᓪᓗ ᓰᐱᖁᑎᑦᓯᓗ ᓯᕗᓪᓕᕐᐹᒥᒃ ᐃᕐᓂᐊᕆᓯᒪᔭᖏᑦ. ᑐᑭᓯᕙᓪᓕᐊᖁᓪᓗᓯ ᐊᑕᓂᕐᒥᒃ ᒎᑎᑦᓯᓐᓂᒃ ᑍᒪᓐᖓᓕᒫᖅ ᐃᓕᕋᓱᒋᐊᖃᕐᓂᕐᒥᒃ.

²⁴ ᑐᒃᓯᐊᕐᕕᒃᓴᐅᖁᔭᐅᓯᒪᔪᕐᓕ ᓇᔪᕐᑕᑦᓯᓐᓂᑦ ᐅᖓᓯᓗᐊᕐᐸᑦ, ᐊᔪᕐᓇᕐᐸᓪᓗ ᑕᓪᓕᒪᐅᔪᐃᕆᐊᕐᑐᕆᐊᒥᒃ, ᑕᕝᕙ ᐊᑕᓂᐅᑉ ᒎᑎᑦᓯ ᓮᒻᒪᕐᑎᓯᒪᒃᐸᓯ, ᑕᓪᓕᒪᐅᔪᖏᓐᓂᒃ ᐋᑦᓯᕕᒋᔭᕆᐊᓕᐅᑉ ᐅᖓᓯᓗᐊᕐᓂᖓᓄᑦ ᐊᑕᓂᐅᑉ ᒎᑎᑦᓯ ᓂᕈᐊᕐᓯᒪᔭᖓ, ᐊᑎᖓᓂ ᑐᒃᓯᐊᕐᕕᒃᓴᐅᖁᓯᒪᔭᖓ ᑕᕝᕙ ᐃᒫᒃ ᐱᔪᒃᓴᐅᕗᓯ:

²⁵ ᑖᒃᑯᐊ ᓂᐅᕐᕈᑎᒋᔭᒃᓴᕆᕙᓯ ᑮᓇᐅᔭᓐᖑᕐᑎᖔᕐᓗᒋᑦ ᑖᒃᑯᐊᓗ ᓇᒃᓴᕐᓗᒋᑦ ᐂᔪᒃᓴᐅᕗᓯ ᐊᑕᓂᐅᑉ ᒎᑎᕕᑦ ᓂᕈᐊᕐᓯᒪᔭᖓᓄᑦ.

²⁶ ᑮᓇᐅᔧᓪᓗ ᓂᐅᕕᐅᑎᒋᔪᓐᓇᕐᐸᑎᑦ ᐱᔪᒪᔭᑐᐃᓐᓇᕐᓂᒃ ᐃᒻᒧᒃᓯᐅᒐᕐᒥᒡᓘᓐᓃᑦ, ᓰᐱᒥᒡᓘᓐᓃᑦ, ᐅᐂᓂᒥᒡᓘᓐᓃᑦ, ᓴᓐᖏᔪᒥᒡᓘᓐᓃᑦ ᐃᒥᐊᓗᖕᒥᒃ, ᓂᕆᔪᒪᔭᑐᐃᓐᓇᕐᓂᒃ ᐃᒥᕈᒪᔭᕐᓂᒡᓘᓐᓃᑦ ᐊᑕᓂᐅᑉ ᒎᑎᑦᓯ ᓵᖓᓂ, ᐃᓚᑎᑦ ᐃᒡᓗᒥᐅᖃᑎᑎᑦ ᐃᓚᒋᓗᒋᑦ ᓂᕆᔪᒃᓴᐅᕗᓯ ᖁᕕᐊᓱᖃᑎᒌᒡᓗᓯ.

²⁷ “ᓕᕔᑉ ᑭᖑᕚᖏᑦ ᒥᓂᑕᒃᓴᕆᓐᖏᓚᓯ ᓄᓇᖅᑲᑎᒋᔭᓯ, ᑖᒃᑯᐊ ᓇᖕᒥᓂᖅ ᓄᓇᖁᑎᖃᖏᒻᒪᑕ ᑭᖑᕐᖑᑎᔭᒃᓴᖃᕋᑎᒡᓗ.

²⁸ ᐊᕐᕌᒍᑦ ᐱᖓᓱᑦ ᐊᓂᒍᕌᖓᑕ ᑕᒫᑦ ᐱᕈᕐᑎᑕᕕᓂᑦᓯ ᓂᐊᖂᔭᒃᓮᑦ ᑕᓪᓕᒪᐅᔪᖏᓐᓂᒃ ᑲᑎᑦᓯᔪᒃᓴᐅᕗᓯ ᑕᒪᒃᑯᐊᓗ ᓄᓇᒋᔭᑦᓯᓐᓂ ᑲᑎᑕᒃᓴᕆᕙᓯ.

²⁹ ᓕᕔᑉ ᑭᖑᕚᖓ, ᑖᓐᓇ ᓇᖕᒥᓂᕐᑕᕐᓯᒪᖏᒻᒪᑦ ᓄᓇᖁᑎᒃᓴᒥᓂᒃ, ᓄᓇᖃᑎᑐᖃᕆᓐᖏᑕᓯ ᐱᖃᑕᐅᔭᕆᐊᖃᕆᕗᑦ, ᐃᓕᐊᕐᔪᐃᓪᓗ, ᐅᐃᒡᒐᕐᓃᓪᓗ ᑕᕝᕙᓂ ᓄᓇᖃᑎᒋᔭᓯ. ᑖᒃᑯᐊᓗ ᕾᔪᒃᓴᐅᕗᑦ ᓂᕆᓗᑎᒃ ᐊᕿᐊᑦᑐᕐᓗᑎᒡᓗ; ᑕᕝᕙ ᐊᑕᓂᐅᑉ ᒎᑎᑦᓯ ᓮᒻᒪᕐᑎᓐᓂᐊᕐᐹᓯ ᖃᓄᓕᒫᖅ ᐱᓇᓱᐊᕐᓂᕆᔭᑦᓯᓐᓂ.”