ᒨᓯᓯ ᑕᓪᓕᒪᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᐱᔪᖃᓚᕐᑐᒥᒃ ᐅᖃᕐᑎᐅᓂᕋᕐᑐᒥᒃ ᓯᓐᓇᒃᑐᕐᓂᒡᓗ ᑐᑭᓯᓇᕐᓯᑎᑦᓯᔪᓐᓇᕐᓂᕋᕐᑐᒥᒃ ᐱᑕᖃᓕᕐᐸᑦ ᐊᑯᓐᓇᑦᓯᓐᓂ, ᑲᒪᓇᕐᑐᓕᓂᕐᓂᒃ ᓇᓗᓁᒃᑯᑕᕐᓂᒡᓘᓐᓃᑦ ᐱᑎᑕᐅᓂᐊᕐᓂᕋᕐᑕᐅᒍᑦᓯ,

² ᒎᑎᓐᖑᐊᓄᑦ ᑐᒃᓯᐊᖃᑦᑕᓕᖁᓪᓗᓯ ᑕᓯᐅᕐᓯᓇᓱᐊᕐᐸᑕ ᓯᕗᓂᖓᒍᑦ ᑐᒃᓯᐊᕐᕕᒋᓚᐅᕐᓯᒪᓐᖏᑕᑦᓯᓐᓄᑦ ᓇᓗᓁᒃᑯᑍᑦ ᑲᒪᓇᕐᑐᓪᓗ ᐅᖃᐅᓯᕆᓚᐅᕐᑕᖏᑦ ᓇᓚᐅᑦᓯᒐᓗᐊᕐᐸᑕ,

³ ᑍᒤᑦᑐᑦ ᑕᒪᒃᑯᐊ ᓈᓚᒐᒃᓴᕆᓐᖏᓚᓯ ᐅᖃᐅᓯᕆᔭᖏᑦ. ᐊᑕᓂᐅᑉ ᒎᑎᑦᓯ ᐊᑐᑐᐃᓐᓇᕐᒪᒋᑦ ᐆᒃᑐᕐᑕᐅᖁᓪᓗᓯ, ᐊᑕᓂᕐᒥᒃ ᒎᑎᑦᓯᓐᓂᒃ ᐱᓐᓈᕆᔭᖃᓪᓚᕆᖕᒪᖔᑦᓯ ᐆᒻᒪᑎᑦᓯᓐᓄᑦ ᐊᑕᖏᕐᑐᒧᑦ ᑕᕐᓂᑦᓯᓐᓄᓪᓗ ᐊᑕᖏᕐᑐᒧᑦ.

⁴ ᐊᑕᓂᖅ ᒎᑎᓯ ᒪᓕᒃᑕᒃᓴᕆᕙᓯ ᐃᓕᕋᒋᓗᒍᓗ ᐱᖁᔭᖏᓪᓗ ᒪᓕᒡᓗᒋᑦ ᓂᐱᖓᓗ ᓈᓚᒡᓗᒍ, ᑐᒃᓯᐊᕐᕕᒋᔭᒃᓴᕆᕙᓯ ᓴᒃᑯᑦᑍᓕᓗᒍᓗ.

⁵ ᓇᓪᓕᐊᓪᓕ ᓯᓐᓇᒃᑑᒪᓂᒃ ᑐᑭᓯᓇᕐᓯᑎᑦᓯᔪᓐᓇᕐᓂᕋᕐᑐᖅ ᐱᔪᖃᓛᕐᑐᒥᒡᓗ ᐅᖃᕐᑎᐅᓂᕋᕐᑐᖅ ᑐᑯᑕᐅᔪᒃᓴᐅᕗᖅ, ᐃᓕᑦᓯᓐᓂᒃ ᐊᔪᕆᕐᑐᐃᖕᒪᑦ ᐊᑭᕋᕐᑐᕐᓂᕐᒥᒃ ᐊᑕᓂᕐᒧᑦ ᒎᑎᑦᓯᓐᓂᒃ, ᑖᑦᓱᒥᖓ ᓴᐳᑦᔨᔨᒋᓚᐅᕐᑕᑦᓯᓐᓂᒃ ᓄᓇᒥᑦ ᐄᑦᔨᑉᑎᒥᑦ ᐱᐅᓕᓪᓗᓯᓗ ᕿᓚᒃᓱᕐᑕᐅᓯᒪᕕᖕᒥᑦ, ᑍᒤᑦᑐᖅ ᐃᓄᒃ ᑕᓯᐅᕐᓯᓇᓱᐊᕐᒪᑦ ᐊᖅᑯᑎᒥᒃ ᕿᒤᖁᓪᓗᓯ ᐊᑕᓂᐅᑉ ᒎᑎᑦᓯ ᐃᓕᑦᓯᓐᓄᑦ ᐊᑐᕐᑕᐅᖁᓚᐅᕐᑕᖓᓂᑦ. ᑍᒤᑦᑐᖅ ᐃᓄᒃ ᑐᖁᑕᐅᔪᒃᓴᐅᕗᖅ, ᐊᑯᓐᓇᑦᓯᓐᓂ.

⁶ “ᖃᑕᓐᖑᑎᕕᑦ, ᐊᓈᓇᕕᑦ ᐃᕐᓂᕕᓪᓘᓐᓃᑦ, ᐸᓂᕕᓪᓘᓐᓃᑦ, ᓄᓕᐊᕕᓪᓘᓐᓃᑦ ᓇᒡᓕᒋᒻᒪᕆᒃᑕᕕᑦ ᐱᖃᓐᓇᕆᔭᕕᓪᓘᓐᓃᑦ ᖃᓂᒋᒻᒪᕆᒃᑕᕕᑦ ᐃᔨᕋᕐᑐᕐᓗᓂ ᒎᑎᓐᖑᐊᓄᑦ ᑐᒃᓯᐊᖃᑦᑕᖁᓗᓂᑎᑦ ᐃᓇᓐᓇᓱᐊᕐᐸᑎᑦ, ᒎᑎᒋᔭᐅᔪᓄᑦ ᐃᕝᕕᓪᓗ ᓯᕗᓕᕕᓂᕐᐱᓪᓗ ᖃᐅᔨᓚᐅᕐᓯᒪᓐᖏᑕᖏᓐᓄᑦ.

⁷ ᖃᓂᒋᔭᑦᓯᓐᓂ ᐊᕙᑎᑦᓯᓐᓃᑦᑐᑦ ᒎᑎᒋᔭᖏᓐᓄᑦ, ᐅᕝᕙᓘᓐᓃᑦ ᐅᖓᓯᒋᔭᑦᓯᓐᓂᑦ ᒎᑎᒋᔭᐅᔪᓄᑦ ᓄᓇᕐᔪᐊᓪᓗ ᐃᓱᐊᓂᑦ ᐃᓱᐊᓄᑦ ᑎᑭᓪᓗᒍ,

⁸ ᑍᒤᓕᐅᕐᑐᒧᑦ ᓴᖑᑎᑕᐅᑦᑍᓕᒋᑦ, ᓈᓚᖕᓂᐊᕐᓇᒍᓘᓐᓃᑦ, ᓇᒡᓕᒋᓕᕐᓂᐊᕐᓇᒍᓘᓐᓃᑦ, ᓈᒃᑭᒋᓕᕐᓂᐊᕐᓇᒍᓘᓐᓃᑦ.

⁹ ᑐᖁᑕᒃᓴᕆᕙᓯᓕ! ᓯᕗᓪᓕᕐᐸᐅᓗᑎᑦ ᐊᒡᒐᖕᓄᑦ ᐱᒋᐊᕐᑕᒃᓴᕆᕙᑦ, ᑕᒪᑐᒪ ᑭᖑᓂᖓᒍᑦ ᑕᕝᕙ ᐃᓄᓕᒫᓄᑦ ᐱᒋᐊᕐᑕᐅᔪᒃᓴᐅᕗᖅ ᑐᖁᑕᐅᖁᓪᓗᒍ.

¹⁰ ᐅᔭᖅᑲᓄᑦ ᒥᓪᓗᕐᑕᒃᓴᕆᕙᓯ ᑐᖁᓪᓗᒍ, ᑖᑦᓱᒪ ᓴᖑᑎᓐᓇᓱᐊᓚᐅᕐᒪᓯ ᐊᑕᓂᕐᒥᑦ ᒎᑎᑦᓯᓐᓂᑦ, ᐃᓕᑦᓯᓐᓂᒃ ᐊᐅᓪᓚᕐᑎᑦᓯᓚᐅᕐᑐᒥᒃ ᐄᑦᔨᑉᑎᒥᑦ, ᑕᕝᕙᓐᖓᑦ ᕿᓚᒃᓱᕐᑕᐅᓯᒪᕕᒋᓚᐅᕐᑕᑦᓯᓐᓂᑦ.

¹¹ ᑕᕝᕙ ᐃᓴᕆᐊᓕᒥᐅᓕᒫᑦ ᑐᓴᓕᕋᔭᕐᐳᑦ, ᓯᕘᕋᓕᕐᓗᑎᒡᓗ, ᑭᖑᓂᖓᒍᓪᓗ ᑍᒫᒃ ᐱᐅᖏᑦᑐᐊᓗᖕᒥᒃ ᐱᓕᕆᔪᖃᕈᓐᓃᕋᔭᕐᐳᖅ ᐊᑯᓐᓇᑦᓯᓐᓂ.

¹² “ᑐᓴᕈᑦᓯ ᐃᒡᓗᒐᓴᒡᔪᐊᑦ ᐃᓚᖓᓐᓂ, ᐊᑕᓂᐅᑉ ᒎᑎᑦᓯ ᐃᓕᑦᓯᓐᓄᑦ ᑐᓂᓯᒪᔭᖓᓂᒃ ᓄᓇᒋᖁᓪᓗᒍ,

¹³ ᐃᓄᐃᑦ ᐃᓚᖏᓐᓂᒃ ᓲᖑᓵᕐᑎᓂᒃ ᐃᓕᑦᓯᓐᓄᐊᕐᓯᒪᔪᓂᒃ ᐃᒡᓗᒐᓴᒡᔪᐊᕐᒥᐅᓂᒡᓗ ᓴᖑᑎᑦᓯᓯᒪᒃᐸᑕ, ᐅᖃᕐᓗᑎᒃ, ‘ᐂᓚᐅᕐᑕ ᒎᑎᓂᒃ ᐊᓯᖏᓐᓂᒃ ᐱᔨᑦᓯᕆᐊᕐᑐᕐᓗᑕ,’ ᖃᐅᔨᒪᓚᐅᓐᖏᑕᑦᓯᓐᓂᒃ.

¹⁴ ᑕᕝᕙ ᐊᐱᕐᓱᕐᑐᒃᓴᐅᕗᓯ ᕿᓂᕐᓗᓯᓗ ᑐᑭᓯᓇᓱᐊᑦᓯᐊᕐᓗᓯ; ᑕᒪᓐᓇ ᓱᓕᒃᐸᑦ ᓇᓗᓁᕐᓗᓂᓗ ᑍᒫᒃ ᒎᑎᐅᑉ ᓇᕐᕈᒋᔭᖓᓂᒃ ᐱᓇᓱᐊᕐᑐᖃᕐᓯᒪᓂᖓᓂᒃ ᐊᑯᓐᓇᑦᓯᓐᓂ,

¹⁵ ᑕᕝᕙ ᑕᕝᕙᓂ ᓄᓇᓕᓕᒫᑦ ᑐᑯᕋᕐᑕᐅᔪᒃᓴᐅᕗᑦ, ᐊᑕᖏᕐᓗᑎᒃ ᓄᖑᑕᐅᑦᓯᐊᕐᑐᒃᓴᐅᕗᑦ, ᑕᕝᕙᓂ ᓄᓇᓖᑦ ᐆᒪᔪᖁᑎᖏᓪᓗ ᑐᖁᕋᕐᑕᐅᓗᑎᒃ ᓴᕕᒡᔪᐊᒧᑦ.

¹⁶ ᐱᖁᑎᓕᒫᖏᑦ ᐊᑕᐅᓯᕐᒧᑦ ᑲᑎᓪᓗᒋᑦ ᐃᒡᓗᒐᓴᖏᑕ ᕿᑎᖓᓂ, ᐱᕕᑐᓂᖓᓄᑦ, ᓄᓇᓕᓕᒫᖅ ᐃᑯᐊᓪᓚᒃᑕᐅᔪᒃᓴᐅᕗᖅ ᐱᖁᑎᓕᒫᖏᓪᓗ ᐱᖃᓯᐅᑎᓗᒋᑦ, ᐃᑯᐊᓚᓂᒃᑯᑦ ᑐᓂᕐᕈᑎᒋᓗᒋᑦ ᐊᑕᓂᕐᒧᑦ ᒎᑎᑦᓯᓐᓄᑦ. ᕿᒪᒃᑕᐅᔪᒃᓴᐅᕗᑦ ᓱᕋᑦᓯᐊᕐᑎᓪᓗᒋᑦ ᐃᓱᖃᖏᑦᑐᒧᑦ, ᓴᓇᔭᐅᒃᑲᓐᓂᕐᑐᒃᓴᐅᓇᑎᒡᓗ.

¹⁷ ᓇᓪᓕᐊᓐᓂᒡᓘᓐᓃᑦ ᓄᖑᑕᐅᔪᒃᓴᐅᑎᓪᓗᒍ ᓱᒋᐊᕐᑕᐅᖁᔭᐅᔪᒥᒃ ᓇᖕᒥᓂᒃᓴᕆᔪᒪᓗᒍ ᑎᒍᓯᔪᒃᓴᐅᓐᖏᓚᑎᑦ ᐊᑕᓂᖅ ᓂᓐᖓᖕᓂᕐᔪᐊᒥᓂᑦ ᓴᖑᖁᓪᓗᒍ, ᓂᑲᒋᓗᓯᓗ. ᐃᓚᑦᓱᒋᓕᕐᓂᐊᕐᒪᓯ, ᐃᓄᒐᓴᒡᔪᐊᓐᖑᕐᑎᓪᓗᓯᓗ, ᑍᒫᒃ ᐊᖏᕈᑎᖃᕐᓯᒪᖕᒪᑦ ᓯᕗᓕᕕᓂᑦᓯᓐᓄᑦ,

¹⁸ ᐊᑕᓂᐅᑉ ᒎᑎᑦᓯ ᓂᐱᖓ ᓈᓚᖕᓂᐊᕈᑦᓯᐅᒃ, ᐱᖁᔨᑦᔪᑎᖏᓪᓗ ᒪᓕᑦᓯᐊᕐᓂᐊᕈᑦᓯᒋᒃ ᐅᓪᓗᒥ, ᒪᓕᒃᑕᐅᖁᓪᓗᒋᑦ ᐅᖃᐅᓯᕆᔭᒃᑲ, ᐱᓂᐊᕐᓂᖃᖁᓪᓗᓯ ᓈᒻᒪᒋᔭᐅᔪᒥᒃ ᐊᑕᓂᐅᑉ ᒎᑎᑦᓯ ᓵᖓᓂ.”