ᒨᓯᓯ ᑕᓪᓕᒪᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᖅ ᐊᔪᖏᑦᑐᕐᔪᐊᖑᓂᖓ

¹ “ᐊᑕᓂᖅ ᒎᑎᒋᔧᑦ ᐱᓐᓈᕆᔭᒃᓴᕆᕙᑦ ᑍᒪᓐᖓᓪᓗ ᐱᖁᔭᓕᒫᖏᑦ ᓈᓚᒡᓗᖏᑦ.

² ᐅᓪᓗᒥ ᐃᖅᑲᐅᒪᓚᐅᕐᓯᐅᒃ ᑐᑭᓯᓚᐅᕐᑕᓯ ᐊᑕᓂᐅᑉ ᐊᑐᕐᑕᑦᓯᒍᑦ ᐋᖅᑭᒃᓱᐃᓯᒪᓂᖏᑦ. ᕿᑐᕐᖓᓯᐅᖏᑦᑐᖅ, ᑕᒪᒃᑯᓂᖓ ᐊᑐᓚᐅᕋᑦᓯ. ᑕᑯᓚᐅᕋᑦᓯ ᐊᑕᓂᐅᑉ ᒎᑎᑦᓯ ᐊᔪᖏᑦᑐᕐᔪᐊᖑᓂᖓᓂᒃ, ᐱᔪᓐᓇᕐᓂᕐᔪᐊᖓᓂᒡᓗ, ᐊᔪᒐᖃᖏᑦᑐᕐᔪᐊᖑᓂᖓᓂᒡᓗ,

³ ᓇᓗᓁᒃᑯᑕᖏᓐᓂᒡᓗ ᑕᑯᓚᐅᕆᕗᓯ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐱᓇᓱᐊᓚᐅᕐᓂᖓᓂᒃ ᓄᓇᖁᑎᓕᒫᖓᓄᓪᓗ.

⁴ ᑕᑯᓚᐅᕆᕗᓯ ᐊᑕᓂᐅᑉ ᓵᓚᖃᓪᓚᕆᖕᓂᖓᓂᒃ ᐄᑦᔨᑉᑎᒥᐅᑦ ᐅᓇᑕᕐᑐᒃᓴᖁᑎᖏᓐᓂᒃ, ᕿᒻᒥᕐᔪᐊᑯᑎᖏᓪᓗ ᕿᒧᒃᓯᐅᑎᓄᓪᓗ ᐊᒃᓴᓗᐊᓕᑦ ᐱᖃᓯᐅᑎᓪᓗᒋᑦ, ᐃᒪᕐᒥ ᐊᐅᐸᓗᒃᑕᒥ ᑭᕕᑎᑦᓯᓚᐅᕐᒪᑦ ᐃᓕᑦᓯᓐᓂᒃ ᒪᓕᒐᓱᒃᑐᓂᒃ.

⁵ ᖃᐅᔨᒪᒋᕗᓯ ᐊᑕᓂᐅᑉ ᖃᓄᖅ ᐱᓇᓱᐊᕐᕕᒋᓚᐅᕐᒪᖔᓯ ᐃᓄᖃᖏᑦᑐᒥ ᑕᒪᐅᖓ ᓄᓇᒧᑦ ᑎᑭᓚᐅᖅᑳᕐᑎᓐᓇᓯ.

⁶ ᐃᖅᑲᐅᒪᒋᕗᓯ ᖃᓄᐃᓕᐅᓚᐅᕐᓂᖓᓂᒃ ᑖᑕᓂᒧᑦ ᐊᐱᕋᒧᓪᓗ, ᐃᓔᐊᐱᐅᑉ ᐃᕐᓂᖏᖕᓄᑦ ᕉᐱᓂᐅᑉ ᑭᖑᕚᖏᖕᓄᑦ. ᐃᓄᓕᒫᑦ ᑕᑯᓐᓇᕐᑎᓪᓗᒋᑦ ᓄᓇᕐᔪᐊᖅ ᐃᕐᐸᓚᐅᕐᒪᑦ ᑖᒃᑯᐊᓗ ᓄᓇᒧᑦ ᐄᔭᐅᓚᐅᕐᐳᑦ, ᐃᓚᓕᒫᖏᓪᓗ ᐃᓚᒋᓪᓗᒋᑦ, ᑐᐱᖏᓪᓗ, ᐱᔨᒋᔭᖏᓪᓗ ᐆᒪᔪᖁᑎᓕᒫᖏᓪᓗ, ᐃᓴᕆᐊᓕᒥᐅᑦ ᐊᑯᕐᖓᓐᓂᑦ.

⁷ ᐃᓕᑦᓯ ᑕᕝᕙ ᑕᒪᒃᑯᓂᖓ ᑕᑯᓯᒪᔪᓯ ᐊᑕᓂᐅᑉ ᐱᓇᓱᐊᕐᓯᒪᔭᖏᓐᓂᒃ.”

ᓄᓇᐅᑉ ᐊᖏᕈᑕᐅᓯᒪᔫᑉ ᓮᒻᒪᕐᑕᐅᓇᕐᓂᖓ

⁸ “ᐱᖁᔭᓕᒫᑦ ᒪᓕᒃᑕᒃᓴᕆᕙᓯ ᐃᓕᑦᓯᓐᓄᑦ ᐅᓪᓗᒥ ᑐᓂᓯᒪᔭᒃᑲ. ᓴᓐᖏᔫᖁᓪᓗᓯ, ᓄᓇᒧᓪᓗ ᐃᑳᕈᓐᓇᖁᓪᓗᓯ ᓄᓇᑖᕆᐊᕐᑐᕐᓗᓯ ᑕᒪᑐᒥᖓ ᐃᑎᑐᐃᓐᓇᕆᐊᖃᓕᕐᑕᑦᓯᓐᓂᒃ.

⁹ ᑕᕝᕙ ᑕᒫᓂ ᐊᑯᓂ ᐃᓅᔪᓐᓇᕐᓂᐊᕐᐳᓯ ᓄᓇᒥ ᓂᕿᒃᓴᖃᑦᓯᐊᕐᑐᒥ ᐊᔪᕐᓴᕐᓇᖏᑦᑐᒥᓗ ᐊᑕᓂᐅᑉ ᑐᓂᓂᐊᕐᓂᕋᕐᓗᒍ ᐊᖏᕈᑎᒋᓯᒪᔭᖓᓂᒃ ᓯᕗᓕᕕᓂᑦᓯᓐᓄᑦ ᑭᖑᕚᖏᓐᓄᓪᓗ.

¹⁰ ᑕᒪᓐᓇ ᓄᓇ ᓄᓇᑖᕆᓂᐊᓕᕐᑕᓯ ᐄᑦᔨᑉᑎᐅᑉ ᓄᓇᖓᑎᑐᑦ ᑍᒤᑦᑑᓐᖏᓚᖅ, ᓄᓇᒋᓚᐅᕐᑕᑦᓯᑐᑦ. ᑍᑲᓂ ᐱᕈᕐᓯᐊᒃᓴᓂᒃ ᑲᓐᖓᕐᓱᐃᔭᕌᖓᑦᓯ, ᐱᔭᕐᓂᖏᑦᑐᒃᑯᑦ ᐱᕈᕐᑎᑦᓯᓇᓱᖃᑦᑕᓚᐅᕋᑦᓯ, ᐱᕈᕐᓰᕕᖕᒥ ᐱᕈᕐᑐᕕᓂᕐᑎᑐᑦ ᑍᒤᑎᓐᓇᓱᐊᕐᓗᒋᑦ.

¹¹ ᓄᓇᓕ ᑕᒪᓐᓇ ᓄᓇᑖᕆᓂᐊᕐᑕᓯ ᖃᖅᑲᖃᐅᕐᓗᓂᓗ ᓇᕐᓴᖃᐅᕐᐳᖅ, ᓯᓚᓗᖕᒧᓪᓗ ᐃᒻᒥᓂᒃ ᐃᒻᒥᕐᓱᕐᑕᐅᖃᑦᑕᕐᐳᖅ.

¹² ᐊᑕᓂᐅᓪᓕ ᒎᑎᑦᓯ ᑕᒪᓐᓇ ᓄᓇ ᓇᖕᒥᓂᖅ ᑲᒪᒋᖃᑦᑕᕐᐹ ᐊᕐᕌᒍᓕᒫᖅ ᓈᓪᓗᒍ.

¹³ “ᑍᒤᒻᒪᑦ, ᐱᖁᔧᑦ ᐃᓕᑦᓯᓐᓄᑦ ᐅᓪᓗᒥ ᑐᓂᔭᒃᑲ ᓈᓚᒃᑕᒃᓴᕆᕙᓯ; ᐊᑕᓂᖅ ᒎᑎᒋᔧᑦ ᐱᓐᓈᕆᔭᒃᓴᕆᕙᑦ ᐱᔨᑦᓯᕐᕕᒋᓗᒍᓗ ᐆᒻᒪᑎᖕᓄᑦ ᐊᑕᖏᕐᑐᒧᑦ ᑕᕐᓂᕐᓄᓪᓗ ᐊᑕᖏᕐᑐᒧᑦ.

¹⁴ ᑍᒤᑐᐊᕈᕕᑦ ᑕᕝᕙ, ᓄᓇᒋᔭᕐᓄᑦ ᓯᓚᓗᒃᑕᐅᑎᑦᓯᖃᑦᑕᕐᓂᐊᕐᐳᖅ ᐱᔭᕆᐊᖃᓕᕌᖓᑦ, ᐅᑭᐊᒃᓵᒃᑯᑦ ᐅᐱᕐᖔᒃᑯᓪᓗ, ᓂᕿᒃᓴᖃᑦᓯᐊᖁᓪᓗᑎᑦ ᓂᐊᖂᔭᒃᓴᓂᒃ, ᕔᓂᒃᓴᓂᒃ, ᓇᐹᕐᑐᐃᓪᓗ ᐱᕈᕐᑐᖏᓐᓂᒃ ᐅᕐᓱᒃᓴᓂᒃ.

¹⁵ ᐱᕈᕐᓰᕕᖁᑎᑦᓯᓐᓂᓗ ᐃᕕᒐᕐᓂᒃ ᐱᕈᕐᑐᖃᑦᓯᐊᕐᓂᐊᕐᐳᖅ ᐃᒻᒧᒃᓯᐅᒐᖁᑎᓯ ᓂᕿᒃᓴᖃᑦᓯᐊᖁᓪᓗᒋᑦ, ᓂᕿᒃᓴᖃᑦᓯᐊᕐᓂᐊᕐᐳᓯᓗ ᓂᕆᔪᓐᓇᕐᑕᓕᒫᑦᓯᓐᓂᒃ.

¹⁶ ᐃᒃᐱᒍᓱᑦᓯᐊᕐᑐᒃᓴᐅᕗᓯᓕ ᓯᓔᕐᕆᔭᐅᖁᓇᓯ ᐊᑕᓂᐅᑉ ᐊᓯᐊᓂᒃ ᒎᑎᓐᖑᐊᓂᒃ ᑐᒃᓯᐊᕐᕕᖃᖃᑦᑕᓕᖁᓇᓯ.

¹⁷ ᑐᒃᓯᐊᕐᕕᖃᖃᑦᑕᓕᑐᐊᕈᑦᓯ, ᐊᑕᓂᐅᑉ ᓂᓐᖓᒃᕕᒋᒐᔭᕐᒪᓯ, ᓄᓇᒧᓪᓗ ᓯᓚᓗᖃᑦᑕᕐᓂᖅ ᓄᖅᑲᕐᑎᒃᑲᔭᕐᐹ, ᓄᓇᖁᑎᓯᓗ ᐸᓂᓗᐊᓕᕋᔭᕐᐳᖅ ᓂᐊᖂᔭᒃᓴᓂᒃ ᐱᕈᕐᕕᐅᔭᕆᐊᒃᓴᖅ. ᑕᕝᕙᓂᓗ ᓄᓇᒥ ᑐᖁᑲᐅᕐᑐᕋᔭᕐᐳᓯ, ᑕᒪᓐᓇ ᓄᓇᑦᓯᐊᕚᓘᒐᓗᐊᕐᑎᓪᓗᒍ ᐊᑕᓂᐅᑉ ᑐᓂᓯᒪᔭᖓ ᐃᓕᑦᓯᓐᓄᑦ.

¹⁸ “ᑕᒪᒃᑯᐊ ᐃᖅᑲᐅᒪᔭᒃᓴᕆᕙᓯ ᐃᓕᑦᓯᓐᓄᑦ ᐱᖁᔨᑦᔪᑎᒋᔭᒃᑲ ᑍᒧᖎᓐᓇᕆᐅᕐᓴᕐᓗᒋᓪᓗ ᐆᒻᒪᑎᑦᓯᒍᑦ. ᐊᒡᒐᐅᑎᑦᓯᓐᓄᑦ ᓂᒻᒪᐅᑎᓗᒋᑦ ᕿᓚᒃᑕᒃᓴᕆᕙᓯ ᖃᐅᕐᒥᐅᑕᕆᓗᒋᓪᓗ ᐊᑯᓕᐊᑦᓯᓐᓂ ᐃᓕᑦᓯᓐᓄᑦ ᓇᓗᓁᒃᑯᑕᐅᖁᓪᓗᒋᑦ.

¹⁹ ᕿᑐᕐᖓᑦᓯᓐᓄᓪᓗ ᑕᒪᒃᑯᐊ ᐃᓕᓐᓂᐊᕐᑎᑦᓯᑦᔪᑎᒋᔭᒃᓴᕆᕙᓯ, ᐊᖏᕐᕋᕐᓯᒪᓕᕌᖓᑦᓯᓗ ᐅᖃᖃᑎᒌᒍᑎᒋᖃᑦᑕᕐᓗᒋᑦ, ᐊᖏᕐᕋᕐᓯᒪᖏᒃᑲᓗᐊᕈᑦᓯᓗ, ᑕᖅᑬᕐᓯᕐᑎᓪᓗᓯᓗ ᐃᖅᑲᓁᔭᕐᑎᓪᓗᓯᓗ.

²⁰ ᑎᑎᕋᕐᑕᒃᓴᕆᕙᓯ ᐃᒡᓗᑦᓯ ᐃᑎᕐᑕᕐᕕᖏᑕ ᐊᕙᓗᖏᑎᒍᑦ ᐃᒡᓗᒐᓮᓪᓗ ᐊᕙᓗᕐᔪᐊᖏᑕ ᐃᑎᕐᑕᕐᕕᖏᑎᒍᑦ.

²¹ ᑕᕝᕙ ᕿᑐᕐᖓᓯᓗ ᐊᑯᓂ ᐃᓅᓂᐊᕐᐳᓯ ᑕᒫᓂ ᓄᓇᒥ ᐊᑕᓂᐅᑉ ᒎᑎᑦᓯ ᐊᖏᕈᑎᒋᓯᒪᔭᖓᓂ ᑐᓂᔪᒪᓪᓗᓂᐅᒃ ᓯᕗᓕᕕᓂᑦᓯᓐᓄᑦ. ᑕᕝᕙᓂᓗ ᐃᓅᓂᐊᕐᐳᓯ ᓄᓇᐅᑉ ᖁᓛᒍᑦ ᕿᓚᖃᕐᓂᓕᒫᖓᓂ.

²² “ᐱᖁᔭᓕᒫᑦ ᓱᖁᓯᔪᐃᑦᑑᓗᑎᑦ ᓈᓚᒃᑕᒃᓴᕆᕙᑎᑦ, ᐊᑕᓂᖅ ᒎᑎᒋᔧᑦ ᐱᓐᓈᕆᓗᒍ, ᐱᖁᔨᓂᓕᒫᖏᓪᓗ ᒪᓕᒡᓗᒋᑦ, ᑖᑦᓱᒧᖓᓗ ᓱᖁᓯᔪᐃᑦᑑᓗᑎᑦ.

²³ ᑕᕝᕙ ᐃᓅᖃᑎᒌᒡᔪᐊᑦ ᕿᒪᒃᓯᑎᓐᓂᐊᕐᐰᑦ ᐱᕕᒃᓴᖃᖔᖁᓪᓗᓯ, ᓄᓇᖏᓐᓂᒡᓗ ᓄᓇᑖᕐᓂᐊᕐᐳᓯ ᐃᓅᖃᑎᒌᒡᔪᐊᓄᑦ ᐃᓕᑦᓯᓐᓂᑦ ᐊᔪᖏᓐᓂᕐᓴᐅᔪᓄᑦ ᐱᔪᓐᓇᕐᓂᖃᕐᓂᕐᓴᐅᔪᓄᓪᓗ ᓄᓇᒋᔭᐅᓚᐅᕐᑐᒥᒃ.

²⁴ ᓄᓇᓕᒫᕐᓗ ᐱᓱᒡᕕᒋᔭᓯ ᑕᒪᕐᒥᒃ ᓄᓇᑖᕆᓂᐊᕐᐸᓯ; ᓄᓇᒋᔭᓯᓗ ᑭᒡᓕᖃᕐᓂᐊᕐᐳᖅ ᓯᕿᓂᐅᑉ ᓇᓛᓂᑦ ᐃᓄᖃᖏᑦᑐᒥᑦ ᐱᒋᐊᕐᓗᒍ ᓕᐸᓇᓂᐅᑉ ᖃᖅᑲᖏᓐᓄᑦ ᐅᓐᓄᐊᓪᓗᐊᑉ ᓇᓛᓃᑦᑐᒧᑦ ᑎᑭᓪᓗᒍ, ᑰᒑᓗᖕᒥᓪᓗ ᐃᕗᕅᑎᒥᑦ ᐱᒋᐊᕐᓗᒍ ᓯᕿᓂᐅᑉ ᓄᐃᕕᐊᓂᑦ ᒥᑎᑎᕆᓂᐊᒧᑦ ᐃᒪᕐᔪᐊᕐᒧᑦ ᓯᕿᓂᐅᑉ ᓂᐱᕕᐊᓃᑦᑐᒧᑦ ᑎᑭᓪᓗᒍ.

²⁵ ᐃᓄᖕᓄᑦ ᓇᓪᓕᐊᓐᓄᑐᐃᓐᓇᖅ ᐊᑭᕋᕐᑐᕐᑕᐅᔪᓐᓇᕐᓂᐊᓐᖏᓚᓯ; ᐊᑕᓂᐅᑉ ᒎᑎᑦᓯ ᐃᓄᖕᓄᑦ ᓯᕘᕋᒋᔭᐅᑎᓐᓂᐊᕐᒪᓯ, ᑲᑉᐱᐊᒋᔭᐅᑎᓐᓂᐊᕐᐹᓯᓗ ᓇᓂᓕᒫᖅ ᓄᓇᒥ ᐱᓱᒡᕕᒋᔪᒫᕐᑕᑦᓯᓐᓂ, ᑍᒫᒃ ᐅᖃᕐᓯᒪᒐᒥ.

²⁶ “ᑕᑯᒋᑦ, ᐅᓪᓗᒥ ᐊᑐᐃᓐᓇᕈᐃᕕᒋᕙᑦᓯ ᓮᒻᒪᕐᑎᑕᐅᓂᕐᒥᒃ ᓱᒋᐊᕐᑕᐅᓂᕐᒥᒡᓗ;

²⁷ ᓮᒻᒪᕐᑎᑕᐅᓂᖅ, ᐊᑕᓂᐅᑉ ᒎᑎᑦᓯ ᐱᖁᔨᑦᔪᑎᖏᑦ ᓈᓚᒃᑯᑦᓯᒋᒃ, ᐅᓪᓗᒥ ᐃᓕᑦᓯᓐᓄᑦ ᐅᖃᐅᓯᕆᔭᒃᑲ;

²⁸ ᓱᒋᐊᕐᑕᐅᓂᕐᓕ, ᐊᑕᓂᐅᑉ ᒎᑎᑦᓯ ᐱᖁᔨᑦᔪᑎᖏᑦ ᓈᓚᖏᒃᑯᑦᓯᒋᒃ, ᓴᖑᒍᑦᓯᓗ ᐊᖅᑯᒻᒥᑦ ᐅᓪᓗᒥ ᐊᑐᕐᑕᐅᖁᓪᓗᒍ ᐅᖃᐅᓯᕆᔭᓐᓂᑦ, ᒎᑎᓐᖑᐊᓄᓪᓗ ᑐᒃᓯᐊᖃᑦᑕᖔᓕᕈᑦᓯ ᑕᒪᑐᒪ ᓯᕗᕐᖓᒍᑦ ᖃᐅᔨᒪᓚᐅᓐᖏᑕᑦᓯᓐᓄᑦ.

²⁹ ᐊᑕᓂᐅᑉ ᒎᑎᑦᓯ ᓄᓇᒧᑦ ᑎᑭᑎᑉᐸᓯ ᓄᓇᑖᕆᓂᐊᓕᕐᑕᑦᓯᓐᓄᑦ, ᖃᖅᑲᖅ ᒋᕆᔨᒥᒃ ᐊᑎᓕᒃ ᓮᒻᒪᕐᑎᑕᐅᖁᔭᒃᓴᕆᕙᓯ ᖃᖅᑲᕐᓗ ᐄᐸᐅᓪᒥᒃ ᐊᑎᓕᒃ ᓱᒋᐊᕐᑕᐅᔪᒃᓴᐅᖁᓗᒍ.

³⁰ ᑖᒃᑯᐊᒃ ᖃᖅᑳᒃ ᑰᑉ ᔪᐊᕐᑕᓂᐅᑉ ᐊᑭᐊᓃᓐᖏᓚᒃ, ᓯᕿᓂᐅᑉ ᓂᐱᕕᐊᑕ ᓇᓛᓃᑉᐴᒃ, ᑬᓇᓂᒥᐅᑦ ᓄᓇᖓᓂ ᐊᕋᐸᒥ ᓄᓇᖃᕐᑐᓂ, ᒋᐅᓪᒐᐅᑉ ᐊᑭᐊᓂ, ᓇᐹᕐᑑᑉ ᐆᒃᒥᒃ ᒨᕆᒥᒃ ᐊᑎᓕᐅᑉ ᖃᓂᒋᔭᖓᓂ.

³¹ ᑰᖕᒥᒃ ᔪᐊᕐᑕᓂᒥᒃ ᐃᑳᕈᑦᓯ ᓄᓇᑖᕆᐊᕐᑐᕐᓗᓯ ᐊᑕᓂᐅᑉ ᒎᑎᑦᓯ ᑐᓂᔭᖓᓂᒃ ᐃᓕᑦᓯᓐᓄᑦ; ᓄᓇᑖᕆᒍᑦᓯᐅᒃ ᑍᑲᓂᓗ ᓄᓇᖃᓕᕈᑦᓯ,

³² ᑲᒪᑦᓯᐊᕆᑦᓯ ᐱᖁᔭᓕᒫᓐᓂᒃ ᒪᓕᒐᒃᓴᓂᒡᓗ ᒪᓕᑦᓯᐊᖁᓪᓗᓯ ᐅᓪᓗᒥ ᐃᓕᑦᓯᓐᓄᑦ ᐅᖃᐅᓯᕆᓯᒪᔭᓐᓂᒃ.”