ᒨᓯᓯ ᑕᓪᓕᒪᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᒨᓯᓯᐅᑉ ᐱᖁᔭᓂᒃ ᑐᓂᓯᕕᐅᒃᑲᓐᓂᕐᓂᖓ

¹ “ᑕᕝᕙ ᐊᑕᓂᐅᑉ ᐅᖃᐅᑎᕚᖓ, ‘ᐅᔭᕌᖕᓂᒃ ᒪᕐᕉᖕᓂᒃ ᐲᕐᓯᓚᐅᕆᑦ ᐅᓕᒻᒫᓗᒋᒃ ᓯᕗᓪᓕᕐᑎᑐᑦ ᓴᓇᓯᒪᓗᖏᒃ ᕿᔪᖕᒥᒡᓗ ᐴᓕᐅᕐᓗᒋᒃ ᐃᓂᒃᓴᖏᖕᓂᒃ. ᐅᕙᓐᓄᓪᓗ ᕾᓂᐊᕐᐳᑎᑦ ᒪᔪᕋᕐᓗᑎᑦ ᖃᖅᑲᒧᑦ.

² ᑖᒃᑯᐊᒃ ᑎᑎᕋᕐᕕᒋᓂᐊᕋᒃᑭᒃ ᐅᖃᐅᓯᕐᓂᒃ ᓯᕗᓪᓕᕐᒥᒃ ᑎᑎᕋᕐᓯᒪᓚᐅᕐᑐᑎᑐᑦ ᑍᒃᑯᑎᑐᓇᖅ ᓱᕋᓚᐅᕐᑕᕐᑎᑐᑦ, ᑕᕝᕙ ᐱᒍᕕᒋᒃ ᐃᒃᓯᕐᕕᖕᒧᑦ ᐴᕐᑕᒃᓴᕆᕚᒃᑭᒃ.’

³ “ᑕᕝᕙ ᐃᒃᓯᕐᕕᓕᐅᓕᓚᐅᕐᐳᖓ ᕿᔪᖕᒥᒃ ᐊᑬᑦᓯᐊᒥᒃ ᐊᑎᓕᖕᒥᑦ ᐱᓯᒪᔪᒥᒃ ᐅᔭᕌᖕᓂᒡᓗ ᒪᕐᕉᖕᓂᒃ ᐅᓕᒻᒫᓪᓗᒋᒃ ᐲᕐᓯᓚᐅᕆᕗᖓ ᓯᕗᓪᓕᐅᓚᕐᑐᑎᑐᑦ ᓴᓇᓯᒪᓪᓗᒋᒃ ᑖᒃᑯᐊᓗ ᓇᒃᓴᕐᓗᒋᑦ ᖃᖅᑲᒧᑦ ᒪᔪᕋᓕᓚᐅᕐᐳᖓ.

⁴ ᑕᕝᕙ ᐊᑕᓂᐅᑉ ᑖᒃᑯᐊᒃ ᐅᔭᕌᒃ ᑎᑎᕋᕐᕕᒋᓚᐅᕐᐰᑦ ᐅᖃᐅᓯᕐᓂᒃ ᑖᒃᑯᓂᖓᑦᓮᓐᓇᖅ ᑎᑎᕋᓚᐅᕐᑕᒥᑐᑦ ᑎᑎᕋᕐᓗᒋᑦ, ᐱᖁᔭᓂᒃ ᖁᓕᓂᒃ ᑍᑦᓱᒪᓂ ᐃᑯᒪᒦᓪᓗᓂ ᐃᓕᑦᓯᓐᓄᑦ ᑐᓂᓚᐅᕐᑕᒥᓂᒃ ᖃᖅᑲᐅᑉ ᑭᒡᓕᖓᓂ ᑲᑎᒪᑎᓪᓗᓯ. ᑖᒃᑯᐊᒡᓗ ᐊᑕᓂᐅᑉ ᐅᕙᓐᓄᑦ ᑐᓂᓚᐅᕐᐰᑦ.

⁵ ᖃᖅᑲᒦᒌᕋᒪᓕ ᐊᖅᑲᓕᓚᐅᕆᕗᖓ, ᑕᕝᕙ ᐊᑕᓂᐅᑉ ᑍᒫᒃ ᐱᖁᔨᓯᒪᓂᖓ ᒪᓕᒡᓗᒍ, ᐃᒃᓯᕐᕕᖕᒧᑦ ᓴᓇᓚᐅᕐᑕᓐᓄᑦ ᐴᓚᐅᕐᐸᒃᑲ ᑍᒫᓐᖓᓪᓗ ᑕᕝᕙᓃᖏᓐᓇᓕᕐᐳᑦ.”

⁶ (ᑕᕝᕙ ᐃᓴᕆᐊᓕᒥᐅᑦ ᐃᒥᕐᑕᕐᕕᖕᒥᑦ ᐱᐊᕌᔅ-ᐱᓂ-ᔮᑲᓐᒥᐅᑦ ᐃᒥᕐᑕᕐᕕᖁᑎᖓᓂᑦ ᓅᓕᕐᐳᑦ, ᓄᓇᒧᑦ ᒧᓯᕋᑎᒧᑦ ᐂᓪᓗᑎᒃ. ᑕᕝᕙᓂᓗ ᐂᕉᓂ ᑐᖁᕗᖅ ᐃᓗᕕᕐᑕᐅᓪᓗᓂᓗ, ᐃᕐᓂᖓᑕᓕ ᐃᓕᓯᕆᐅᑉ ᐃᓇᖏᕐᐹ ᑐᓂᕐᕈᓯᕐᑎᑦᓯᔨᐅᓂᕐᒧᑦ.

⁷ ᑕᕝᕙᓐᖓᓪᓗ ᓄᓇᒥᑦ ᓅᓕᕐᒥᖓᒥᒃ ᒐᑦᒍᑕᒧᐊᕐᐳᑦ ᑕᕝᕙᓐᖓᓪᓗ ᔮᑦᐹᑕᒧᐊᕆᕗᑦ, ᐃᒥᕐᑕᕐᕕᖃᑦᓯᐊᕐᑐᒧᑦ.

⁸ ᑍᑦᓱᒪᓂᐅᑎᓪᓗᒍ ᖃᖅᑲᒦᑎᓪᓗᒋᑦ ᓱᓕ ᐊᑕᓂᖅ ᑎᓕᓯᓚᐅᕐᐳᖅ ᐃᓄᖕᓂᒃ ᓕᕔᑎᒃᑯᑦ ᑭᖑᕚᖏᓐᓂᒃ ᐊᖏᖃᑎᒌᒍᑎᐅᑉ ᐃᒃᓯᕐᕕᖁᑎᖓᓂᒃ ᐊᐅᓚᑦᓯᔨᐅᖁᓪᓗᒋᑦ ᐊᒡᔭᕐᑕᐅᔭᕆᐊᖃᓕᕐᐸᑦ, ᐊᑕᓂᕐᒧᓪᓗ ᑐᓂᕐᕈᓯᕐᑎᑦᓯᔨᐅᖁᓪᓗᒋᑦ, ᐊᑕᓂᐅᓪᓗ ᐊᑎᖓᓂ ᓮᒻᒪᕐᑎᑦᓯᔨᐅᖁᓪᓗᒋᑦ. ᐅᓪᓗᒥᒧᓪᓗ ᑎᑭᓪᓗᒍ ᓱᓕ ᑖᒃᑯᐊ ᑕᒪᒃᑯᓂᖓ ᐱᓇᓱᐊᕐᑎᐅᕗᑦ.

⁹ ᑍᒤᒻᒪᑦ ᑕᕝᕙ ᑖᒃᑯᐊ ᓕᕔᒃᑯᑦ ᑭᖑᕚᖏᑦ ᓄᓇᖁᑎᑖᕐᓯᒪᖏᑦᑐᑑᕗᑦ ᐊᓯᖏᑎᑐᑦ ᑭᖑᕚᕇᑎᑐᑦ; ᑭᓯᐊᓂᓕ ᐱᑎᑕᐅᖔᓚᐅᕐᐳᑦ ᐊᑕᓂᕐᒧᑦ ᑐᓂᕐᕈᓯᕐᑎᑦᓯᔨᐅᓂᕐᒥᒃ, ᑍᒫᒃ ᐊᑕᓂᖅ ᒎᑎᓯ ᑕᒪᑐᒥᖓ ᐊᖏᕈᑎᖃᕐᓯᒪᖕᒪᑦ.)

¹⁰ “ᖃᖅᑲᒦᓚᐅᕐᐳᖓᓕ ᐅᓪᓗᓂᒃ ᐅᓐᓄᐊᓂᒡᓗ 40ᓂᒃ, ᓯᕗᓪᓕᕐᒥᒃ ᑍᒫᑦᓮᓐᓇᖅ ᐊᑯᓂᐅᑎᒋᔪᖅ ᒪᔪᐊᕐᓯᒪᓚᐅᕐᓂᑦᑐᑦ. ᑕᕝᕙᓂᓗ ᐊᑕᓂᐅᑉ ᓈᓚᓕᓚᐅᕆᕚᖓ ᐊᖏᕐᕕᒋᓪᓗᓂᖓᓗ ᐃᓕᑦᓯᓐᓂᒃ ᓄᖒᑦᓯᔪᒪᔪᓐᓁᕐᓗᓂ.

¹¹ ᐊᑕᓂᐅᓪᓗ ᐅᖃᐅᑎᓚᐅᕐᐹᖓ ᐃᓕᑦᓯᓐᓂᒃ ᑕᓯᐅᕐᓯᖁᓪᓗᖓ, ᓄᓇᑖᕈᓐᓇᖁᓪᓗᓯ ᓯᕗᓕᕕᓂᑦᓯᓐᓄᑦ ᐊᖏᕈᑎᒋᓯᒪᓚᐅᕐᑕᖓᓂᒃ.”

ᒎᑎᐅᑉ ᐊᑐᕐᑕᐅᖁᔭᖏᑦ

¹² “ᒫᓐᓇᓕ ᐃᓴᕆᐊᓕᒥᐅᖑᔪᓯ, ᓈᓚᓚᐅᕆᑦᓯ ᐊᑕᓂᐅᑉ ᒎᑎᑦᓯ ᐊᑐᕐᑕᐅᖁᔭᖏᓐᓂᒃ ᐃᓕᑦᓯᓐᓄᑦ: ᑖᓐᓇ ᐊᑕᓂᖅ ᑐᒃᓯᐊᕐᕕᒋᔭᒃᓴᕆᕙᓯ ᐱᖁᔭᓕᒫᖏᓪᓗ ᒪᓕᒡᓗᒋᑦ, ᐅᖓᒋᔭᒃᓴᕆᕙᓯ, ᐱᔨᑦᓯᕐᓗᒍᓗ ᐆᒻᒪᒻᒧᑦ ᐃᓗᐃᑦᑐᒧᑦ ᑕᕐᓂᕐᓄᓪᓗ ᐃᓗᐃᑦᑐᒧᑦ,

¹³ ᐱᖁᔭᓕᒫᖏᓪᓗ ᓈᓚᒃᑕᒃᓴᕆᕙᓯ. ᐅᓪᓗᒥ ᑖᒃᑯᐊ ᑐᓂᕙᒃᑲ ᐱᕙᓪᓕᐅᑎᒃᓴᐅᖁᓪᓗᒋᑦ ᐃᓕᑦᓯᓐᓄᑦ.

¹⁴ ᑕᑯᒋᑦ, ᐊᑕᓂᐅᑉ ᒎᑎᑦᓯ ᕿᓔᑦ ᖁᕝᕙᓯᖕᓂᕐᐹᕆᔭᖏᑦ ᐱᖁᑎᒋᕔᑦ; ᓄᓇᕐᔪᐊᕐᑕᐅᖅ ᐱᖁᑎᒋᕚ, ᑖᑦᓱᒪᓃᑦᑐᓕᒫᓪᓗ ᐱᖁᑎᒋᒋᕔᑦ.

¹⁵ ᐊᑕᓂᐅᓪᓕ ᓯᕗᓕᕕᓂᑦᓯᓐᓄᑦ ᓇᒡᓕᒍᓱᖕᓂᖓᑕ ᓴᓐᖏᔫᓗᐊᕐᓂᖓᓄᑦ ᐃᓅᖃᑎᒌᖑᔪᓯ ᓂᕈᐊᓚᐅᕐᐹᓯ ᐊᓯᑦᓯᓐᓂᒃ ᐃᓅᖃᑎᒌᖑᔪᓂᒃ ᐱᓇᓂ, ᓱᓕ ᓂᕈᐊᕐᓯᒪᓪᓗᓂᓯ ᐃᓄᖁᑎᒋᖕᒪᓯ.

¹⁶ ᑍᒤᒻᒪᑦ, ᒫᓐᓇᒥᑦ ᐱᒋᐊᕐᓗᓯ ᐊᑕᓂᕐᒥᒃ ᓈᓚᑦᓯᐊᕐᑐᒃᓴᐅᕗᓯ ᑐᓵᓐᖏᓴᕐᑐᒃᓴᐅᓇᓯᓗ.

¹⁷ ᐊᑕᓂᖅ ᒎᑎᒋᔭᓯ ᒎᑎᒋᔭᐅᔪᓕᒫᓂᑦ ᐊᖏᓂᕐᓴᐅᖕᒪᑦ ᐱᔪᓐᓇᕐᓂᕐᐹᖑᓪᓗᓂᓗ. ᐱᔪᓐᓇᕐᑐᕐᔪᐊᖑᕗᖅ ᐊᔪᒐᖃᖏᑦᑐᕐᔪᐊᖑᓪᓗᓂᓗ, ᓯᕘᕋᒋᔭᐅᔪᒃᓴᐅᕗᕐᓗ. ᐃᓄᖕᓂᒡᓗ ᐃᓔᓐᓇᕐᓯᐅᓐᖏᓚᖅ, ᓯᓔᕐᕆᔭᐅᔪᓐᓇᕋᓂᓗ.

¹⁸ ᑲᒪᒋᔭᐅᑦᓯᐊᖁᔨᓪᓗᓂᓗ ᐋᖅᑭᒃᓯᓲᖑᕗᖅ ᐃᓕᐊᕐᔪᖕᓂᒃ ᐅᐃᒡᒐᕐᓂᕐᓂᒡᓗ; ᓄᓇᖃᕐᑐᑐᖃᐅᖏᑦᑐᓪᓗ ᓇᒡᓕᒋᕔᑦ ᐃᓅᖃᑎᑦᑎᓐᓄᑦ ᓄᓇᖅᑲᑎᒋᔭᐅᔪᑦ, ᓂᕿᒃᓴᖃᕐᑎᓪᓗᒋᑦ ᐊᓐᓄᕌᒃᓴᖃᕐᑎᑉᐰᑦ.

¹⁹ ᑍᒤᒻᒪᑦ, ᓄᓇᖃᕐᑐᑐᖃᐅᖏᑦᑐᓂᒃ ᓄᓇᑦᓯᓐᓃᑦᑐᓂᒃ ᓇᒡᓕᒍᓱᒃᑐᒃᓴᐅᕗᓯ, ᐃᓕᑦᓯᑦᑕᐅᖅ ᓄᓇᑐᖃᕆᓐᖏᑕᑦᓯᓐᓃᓚᐅᕋᑦᓯ ᐄᑦᔨᑉᑎᒥ.

²⁰ ᐊᑕᓂᖅ ᒎᑎᒋᔭᓯ ᓈᓚᒐᒃᓴᕆᕙᓯ ᑖᓐᓇᓗ ᑭᓯᒥ ᑐᒃᓯᐊᕐᕕᒋᓗᒍ. ᑖᑦᓱᒧᖓᓗ ᓱᖁᓯᔪᐃᑦᑑᔪᒃᓴᐅᕗᓯ ᑖᑦᓱᒪᓗ ᐊᑎᖓᒍᑦ ᑭᓯᐊᓂ ᐊᖏᒻᒪᕆᒃᑐᒃᓴᐅᕗᓯ.

²¹ ᓂᕐᑐᒐᒃᓴᕆᕙᓯ ᒎᑎᒋᒐᑦᓯᐅᒃ, ᓇᖕᒥᓂᖅ ᑕᑯᓯᒪᒐᑦᓯ ᑖᑦᓱᒪ ᐊᔪᖏᑦᑐᐊᓘᓂᖓᓂᒃ ᑲᒪᓇᕐᑐᕐᔪᐊᖑᓂᖓᓂᒡᓗ ᐃᓕᑦᓯ ᐱᑦᔪᑎᒋᓪᓗᓯ.

²² ᓯᕗᓕᕕᓂᓯᓕ ᐄᑦᔨᑉᑎᒧᐊᓕᕐᑎᓪᓗᒋᑦ ᑍᑯᓐᖓᕐᑐᑦ 70ᑐᐃᓐᓇᐅᓚᐅᕐᐳᑦ; ᒫᓐᓇᓕ ᐊᑕᓂᐅᑉ ᒎᑎᑦᓯ ᐅᓪᓗᕆᐊᑎᑐᑦ ᕿᓚᖕᒦᑦᑐᑎᑐᑦ ᐅᓄᕐᓯᑎᓯᒪᓕᕐᐹᓯ.”