ᑖᓂᐊᓕᐅᑉ ᐊᒡᓚᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᑖᓂᐊᓕᐅᑉ ᐃᓅᖃᑎᒥᓂᒃ ᑐᒃᓯᐅᑦᔨᓂᖓ

¹ ᑍᕉᓯᐅᑉ ᐊᕼᐊᓱᐃᕋᓯᐅᑉ ᐃᕐᓂᖓᑕ, ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᖏᑕ ᓯᕗᓪᓕᕐᐹᖓᓂ, ᒥᑏᒥᐅᑉ ᑭᖑᕚᖓᑦ, ᐊᖓᔪᖅᑳᕐᔪᐊᓐᖑᓚᐅᕐᐳᖅ ᑲᐅᓪᑎᐊᒥ.

² ᐊᕐᕌᒍᑦ ᓯᕗᓪᓕᕐᐹᖓᓂ ᐊᖓᔪᖅᑳᕐᔪᐊᖑᑎᓪᓗᒍ, ᐅᕙᖓ, ᑖᓂᐊᓕ, ᑐᑭᓯᓚᐅᕐᐳᖓ ᒎᑎᐅᑉ ᐅᖃᐅᓯᖏᑦ ᒪᓕᒡᓗᒋᑦ, ᐊᑕᓂᖅ ᐅᖃᕐᓯᒪᖕᒪᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᒍᑦ ᔨᕆᒤᐊᒃᑯᑦ, ᔨᕉᓴᓕᐅᑉ ᓯᖁᒥᑕᐅᓯᒪᓂᖓ ᓯᕕᑐᑎᒋᔪᒫᕐᒪᑦ ᐊᕐᕌᒍᓂᒃ 70ᓂᒃ.

³ ᑍᒤᒻᒪᑦ ᐊᑕᓂᕐᒧᑦ ᒎᑎᒧᑦ ᓵᓚᐅᕐᐳᖓ ᕿᓄᕕᒋᓪᓗᒍᓗ ᑐᒃᓯᐊᕐᕕᒋᕙᕋ, ᓂᕆᑦᑍᓕᓪᓗᖓᓗ, ᐊᓐᓄᕌᕐᓯᒪᓪᓗᖓᓗ ᐃᒃᐱᐊᕐᔪᒐᔭᐅᔮᕐᑐᓂᒃ, ᐊᕐᔭᓕᓂᕐᓃᓪᓗᖓᓗ.

⁴ ᑐᒃᓯᐊᓚᐅᕐᐳᖓ ᐊᑕᓂᕐᒧᑦ ᒎᑎᓐᓄᑦ ᖁᔭᓕᓂᕐᒥᒡᓗ ᓴᖅᑭᑎᑦᓯᕕᒋᓪᓗᒍ ᐃᒫᒃ. “ᐊᑕᓃᖅ, ᐊᖏᔪᐊᓘᕗᑎᑦ ᑕᑕᓐᓇᕐᑑᓪᓗᑎᓪᓗ ᒎᑏᒃ, ᐊᖏᖃᑎᒌᒍᑎᑎᑦ ᓇᒡᓕᖕᓂᕐᒥᒃ ᑲᔪᓯᑎᑉᐸᑎᑦ ᐃᓕᖕᓂᒃ ᓇᒡᓕᒍᓱᒃᑐᓕᒫᓄᑦ, ᐱᖁᔭᕐᓂᒡᓗ ᓈᓚᒃᑐᓄᑦ.

⁵ “ᐱᐅᖏᑦᑐᓕᓯᒪᒐᑦᑕ ᓈᒻᒪᖏᑦᑐᓂᒡᓗ ᐱᓂᐊᕐᓂᖃᕐᓯᒪᓪᓗᑕ, ᐱᐅᖏᑦᑐᐊᓘᓯᒪᒐᑦᑕ ᐃᓕᖕᓂᒡᓗ ᐊᑭᕋᕐᑐᕐᓯᒪᓪᓗᑕ; ᒪᓕᒐᒃᓴᐅᖁᔭᕐᓂᒃ ᐱᖁᔭᕐᓂᒡᓗ ᕿᒤᓯᒪᒐᑦᑕ.

⁶ ᐱᔨᑎᑦ ᐅᖃᕐᑎᑎᑦ ᓈᓚᖃᑦᑕᕐᓯᒪᖏᓐᓇᑦᑎᒍ, ᐃᕝᕕᑦ ᐊᑎᖓᓂ ᐅᖃᓪᓚᖃᑕᕐᓯᒪᔪᑦ ᐊᖓᔪᖅᑳᕐᔪᐊᓄᑦ, ᐊᖓᔪᖅᑳᓄᓪᓗ ᓯᕗᓕᕕᓂᑦᑎᓐᓄᓪᓗ, ᐃᓄᖕᓄᓪᓗ ᓄᓇᑎᓐᓂ ᓄᓇᖃᕐᑐᓕᒫᓄᑦ.

⁷ ᐊᑕᓃᖅ, ᐃᓱᐊᕐᑑᒐᕕᑦ, ᐅᓪᓗᒥᓕ ᐃᓕᖕᓄᑦ ᑲᓐᖑᓱᖕᓂᕐᒥᒃ ᐅᓕᒃᓯᒪᕗᒍᑦ, ᐃᓄᐃᑦ ᔫᑕᒥ ᓄᓇᖃᕐᑐᑦ, ᔨᕉᓴᓕᒥᓗ ᓄᓇᖃᕐᑐᓕᒫᑦ, ᖃᓂᑦᑐᒧᑦ ᐅᖓᓯᒃᑐᒧᓪᓗ ᓄᓇᖃᑎᒌᒃᔪᐃᓪᓗ ᐊᓯᖏᓐᓄᑦ ᓯᐊᒻᒪᕐᑎᓯᒪᒐᑦᑎᒍᑦ, ᐃᓕᖕᓄᑦ ᑲᔪᓯᖃᑦᑕᕐᓯᒪᖏᓐᓂᑦᑎᓐᓄᑦ.

⁸ ᐊᑕᓃᖅ, ᐅᕙᒍᑦ ᐊᖓᔪᖅᑳᕐᔪᐊᕗᑦ, ᐊᖓᔪᖅᑳᕗᓪᓗ, ᓯᕗᓕᕕᓂᕗᓪᓗ ᐅᓕᒃᓯᒪᕗᒍᑦ ᑲᓐᖑᓱᖕᓂᕐᒥᒃ, ᐊᔪᕐᑐᓕᓯᒪᒐᑦᑕ ᐃᓕᖕᓄᑦ.

⁹ ᐊᑕᓂᖅ ᒎᑎᕗᑦ ᓈᒃᑭᒍᓱᖕᒪᑦ ᐃᓱᒪᒋᔪᓐᓁᕐᕕᖃᕈᓐᓇᕐᓗᓂᓗ, ᐅᕙᒍᑦ ᑖᑦᓱᒥᖓ ᐊᑭᕋᕐᑐᕐᓯᒪᒐᓗᐊᕐᑎᓪᓗᑕ;

¹⁰ ᐊᑕᓂᖅ ᒎᑎᕗᑦ ᓈᓚᓚᐅᖏᓐᓇᑦᑎᒍ ᐱᖁᔭᖏᓪᓘᓐᓃᑦ ᐅᕙᑦᑎᓐᓄᑦ ᑐᓂᓯᒪᔭᖏᑦ ᒪᓕᓚᐅᕐᓇᒋᑦ ᐱᔨᒥᒍᑦ ᐅᖃᕐᑎᒥᒍᑦ ᑐᓂᓯᒪᔭᖏᑦ ᐅᕙᑦᑎᓐᓄᑦ.

¹¹ ᐃᓴᕆᐊᓕᑎᓕᒫᑦ ᓯᖁᒥᑦᓯᖃᑦᑕᕐᓯᒪᖕᒪᑕ ᐱᖁᔭᕐᓂᒃ ᒪᓕᖕᓇᒋᓪᓗ, ᐃᓕᖕᓂᒡᓗ ᓈᓚᒍᒪᓇᑎᒃ. ᑍᒤᒻᒪᑦ ᓇᕐᕈᓇᕐᓯᑎᑕᐅᓃᑦ ᐃᖅᑲᕐᑐᐃᓂᒃᑯᓪᓗ ᓱᒋᐊᕐᓯᓃᑦ ᒨᓯᓯᐅᑉ ᐱᔨᒋᔭᕕᑦ ᐱᖁᔭᖏᑎᒍᑦ ᑎᑎᕋᕐᓯᒪᔪᑦ, ᐅᕙᑦᑎᓐᓄᑦ ᑯᕕᓯᒪᕗᑦ, ᐃᓕᖕᓄᑦ ᐱᐅᖏᑦᑐᓕᓯᒪᒐᑦᑕ.

¹² ᐅᖃᐅᓯᕐᑎᑦ ᓈᒻᒪᒃᓴᖏᓐᓂᑎᓪᓗ ᐅᕙᑦᑎᓐᓂᒃ ᐊᐅᓚᑦᓯᔨᑦᑎᓐᓂᒡᓗ ᑲᔪᓯᓯᒪᖕᒪᑕ ᖁᕕᐊᓇᖏᑦᑐᓄᑦ ᐅᒡᒍᐊᕐᓇᕐᑐᓄᑦ ᑎᑭᓯᒪᕗᒍᑦ. ᕿᓚᐅᑉ ᐊᑖᓂ ᔨᕉᓴᓕᐅᑉ ᐱᓂᐊᕐᕕᐅᓯᒪᓂᖓᑐᑦ ᐱᔭᐅᔪᖃᓚᐅᕐᓯᒪᓐᖏᓚᖅ.

¹³ ᑎᑎᕋᕐᓯᒪᔪᑦ ᒨᓯᓯᐅᑉ ᐱᖁᔭᖏᓐᓂ ᒪᓕᒡᓗᒋᑦ, ᐱᓂᐊᕐᕕᐅᓯᒪᒐᑦᑕ ᖁᕕᐊᓇᖏᑦᑐᓂᒃ, ᑍᒤᒃᑲᓗᐊᕐᑎᓪᓗᒍ ᐊᑕᓂᖅ ᒎᑎᕗᑦ ᕿᓂᓚᐅᓐᖏᓚᕗᑦ ᐊᔪᕐᓂᑦᑎᓐᓂᒡᓗ ᕿᒤᓇᑕ ᓱᓕᑦᓯᐊᕐᓃᑦ ᑲᒪᒋᓚᐅᖏᓐᓇᑦᑎᒍ.

¹⁴ ᐊᑕᓂᐅᑉ ᐱᐅᖏᑦᑐᒧᑦ ᑲᑉᐱᐊᓇᕐᑐᒧᑦ ᐅᑕᕿᓇᓂ ᑎᑭᑎᓚᐅᕐᐹᑎᒍᑦ, ᐊᑕᓂᖅ ᒎᑎ ᐃᓱᐊᕐᑑᖕᒪᑦ ᖃᓄᐃᓕᐅᕐᑕᓕᒫᒥᓂ; ᐅᕙᒍᓪᓕ ᓈᓚᓚᐅᖏᓚᕗᑦ.

¹⁵ “ᒫᓐᓇᓕ ᐊᑕᓃᖅ, ᐃᓄᖁᑎᖕᓂᒃ ᐊᐅᓪᓚᕐᑎᑦᓯᓚᐅᕐᑐᑎᑦ ᐄᑦᔨᑉᑎᒥᑦ ᐊᒡᒐᕕᑦ ᐱᔪᓐᓇᕐᓂᖓᓄᑦ ᐊᑏᓪᓗ ᓱᖁᓯᕐᓂᐊᖏᒻᒪᑦ ᐅᓪᓗᒥᒧᑦ ᑎᑭᓪᓗᒍ, ᐱᐅᖏᑦᑐᓕᓯᒪᒐᑦᑕ, ᑕᒻᒪᕐᓯᒪᔪᐊᓘᒐᑦᑕ.

¹⁶ ᐊᑕᓃᖅ ᐱᓂᐊᕐᓂᑎᑦ ᐃᓱᐊᕐᑐᑦ ᑲᔪᓯᑎᓪᓗᒋᑦ, ᓂᓐᖓᐅᒪᓃᑦ ᔨᕉᓴᓕᒥᑦ ᓴᖑᑎᓚᐅᕈᒃ ᓂᓐᖓᐅᒪᕕᒃᔪᐊᕐᓃᑦ ᐃᒡᓗᒐᓴᒡᔪᐊᖁᑎᖕᓂᑦ, ᖃᖅᑲᒥᑦ ᐃᑦᔪᕐᓁᑦᑐᒥᑦ ᐊᔪᕐᑐᓕᓂᑦᑕ ᓯᕗᓕᑦᑕᓗ ᐱᐅᖏᑦᑐᓕᓂᖏᑕ, ᔨᕉᓴᓕᒻ ᐃᓄᖁᑎᑎᓪᓗ ᒥᑕᐅᑎᒋᔭᒃᓴᓐᖑᕐᑎᓯᒪᖕᒪᒋᑦ ᐃᓄᖕᓄᑦ ᐊᕙᑎᑦᑎᓐᓂ ᓄᓇᖃᕐᑐᓄᑦ.

¹⁷ ᒫᓐᓇᓕ ᒎᑏ, ᐱᔨᕕᑦ ᑐᒃᓯᐊᕐᓂᖏᑦ ᑐᒃᓯᐅᑦᔨᓂᖏᓪᓗ ᑐᓴᓚᐅᒃᑭᑦ, ᐃᑦᔪᕐᓁᑦᑐᕕᖁᑏᑦ ᓱᕋᒃᓯᒪᔪᖅ ᑮᓇᕐᐱᑦ ᖃᐅᒪᓂᖓᓄᑦ ᑕᑯᓚᐅᕈᒃ, ᐊᑕᓂᖅ ᐱᑦᔪᑎᒋᓗᒍ.

¹⁸ ᓈᓚᓚᐅᕆᑦ ᒎᑏᒃ, ᑐᓵᓗᑎᓪᓗ; ᐃᔩᒃᑭᒃ ᐅᐃᑎᓚᐅᒃᑭᒃ ᑕᑯᓗᑎᓪᓗ ᐃᒡᓗᒐᓴᒡᔪᐊᓂᒃ ᓱᕋᒃᓯᒪᔪᓂᒃ ᐃᕝᕕᑦ ᐊᑎᕐᓂᒃ ᑍᒎᓯᖃᕐᑐᓂᒃ, ᐃᓱᐊᕐᑑᓂᑦᑎᓐᓄᑦ ᑐᒃᓯᐊᓐᖏᓚᒍᑦ, ᐊᖏᔪᐊᓗᖕᒥᒡᓕ ᓂᑲᒍᓱᖕᓃᑦ ᐱᑦᔪᑎᒋᓪᓗᒍ.

¹⁹ ᐊᑕᓃᖅ ᑐᓵᓚᐅᕆᑦ! ᐊᑕᓃᖅ ᐃᓱᒪᒋᔪᓐᓁᕐᕕᒋᓚᐅᒃᑭᑦ! ᐊᑕᓃᖅ, ᑐᓵᔭᑎᑦ ᒪᓕᒡᓗᒋᑦ ᐱᓇᓱᐊᓕᕆᑦ ᐅᑕᕿᖏᓪᓗᑎᑦ! ᐃᓕᖕᓂᒃ ᐱᑦᔪᑎᒋᓪᓗᑎᑦ, ᒎᑎᒐ ᐅᑕᕿᓐᖏᓚᐅᕆᑦ, ᐃᒡᓗᒐᓴᖁᑎᑎᑦ ᐃᓄᖁᑎᑎᓪᓗ ᐃᕝᕕᑦ ᐊᑎᕐᓂᒃ ᑍᒍᓯᖃᕐᒪᑕ.”

ᒊᐳᕆᐅᓕᐅᑉ ᓇᓗᓁᕐᓯᓂᖓ ᒎᑎᐅᑉ ᐅᖃᕐᑕᐅᖁᔭᖓᓂᒃ

²⁰ ᐅᖃᓪᓚᒃᑎᓪᓗᖓ ᑐᒃᓯᐊᕐᑎᓪᓗᖓᓗ, ᖃᕿᐊᓕᕐᑎᓪᓗᖓᓗ ᐊᔪᕐᓂᓐᓂᒃ, ᐃᓅᖃᑎᒪᓗ ᐃᓴᕆᐊᐊᓕᑎᑦ ᐊᔪᕐᓂᖏᓐᓂᒃ, ᕿᓄᑎᓪᓗᖓᓗ ᐊᑕᓂᕐᒧᑦ ᒎᑎᓐᓄᑦ ᖃᖅᑲᖅ ᐃᑦᔪᕐᓁᑦᑐᖅ ᐱᒋᔭᖓ ᐱᓪᓗᒍ.

²¹ ᑐᒃᓯᐊᕐᑎᓪᓗᖓ ᓱᓕ, ᒊᐳᕆᐅᓕ, ᐊᖑᑦ ᑕᑯᓚᐅᕐᑕᕋ ᑕᑯᑎᑕᐅᓂᕐᒥ ᓯᕗᓪᓕᕐᒥᒃ, ᕾᕗᖅ ᓱᒃᑲᓕᔪᒥᒃ ᖃᖓᑕᓪᓗᓂ, ᐅᓐᓄᒃᓯᐅᑎᒥᒃ ᑐᓂᕐᕈᓯᕐᓂᖅ ᓇᓪᓕᐅᑎᓪᓗᐊᕐᑎᓪᓗᒍ.

²² ᒪᓕᖕᓂᐊᕐᑕᓐᓂᒃ ᐅᖃᐅᑎᕚᖓ, “ᑖᓂᐊᓖ, ᕾᕗᖓ ᑕᑯᑎᑦᓱᒪᓪᓗᑎᑦ ᓯᕗᓂᕐᒥᒃ ᑐᑭᓯᑎᑦᓱᒪᓪᓗᑎᓪᓗ.

²³ ᑐᒃᓯᐊᓕᑐᐊᕋᕕᑦ ᑭᐅᔭᐅᑦᔪᑏᑦ ᑐᓂᔭᐅᔭᕇᖅᑲᐅᕗᖅ, ᕾᕗᖓ ᐅᖃᐅᑎᔭᕐᑐᕐᓗᑎᑦ, ᐊᖏᔪᒥᒃ ᖁᕕᐊᒋᔭᐅᕗᑎᑦ. ᑍᒤᒻᒪᑦ ᐅᖃᐅᓯᒃᓴᖅ ᐃᓕᖕᓄᑦ ᐃᓱᒪᒋᑦᓯᐊᕈᒃ ᑕᑯᑎᑕᐅᓂᕐᓗ ᑐᑭᓯᓗᒍ.

²⁴ “ᓇᓪᓕᐅᓐᓃᑦ 70 7ᐃᕐᑐᕐᓗᒋᑦ ᐅᖃᐅᓯᐅᕗᑦ ᐃᓄᖁᑎᖕᓄᑦ ᐃᒡᓗᒐᓴᖁᑎᖕᓄᓪᓗ ᐃᑦᔪᕐᓁᑦᑐᓄᑦ ᐱᐅᖏᑦᑐᓕᓂᖏᑕ ᓱᒋᐊᕐᑕᐅᓂᖏᑕ ᐃᓱᓕᕝᕕᒃᓴᖏᑦ, ᐊᔪᕐᑐᓕᓂᖅ ᐃᓱᓕᖁᓪᓗᒍ, ᐱᐅᖏᑦᑐᓕᓂᐅᑉ ᓴᓗᒻᒪᕐᑎᑕᐅᕕᒃᓴᖓᓄᑦ, ᐃᓱᐊᕐᑐᓕᓂᖅ ᐃᓱᖃᖏᑦᑐᒧᑦ ᐃᖏᕐᕋᓕᖁᓪᓗᒍ, ᑕᑯᑎᑕᐅᓂᖅ ᓇᓚᐅᑦᑍᓂᕐᓗ ᓇᕿᑦᔪᓯᕐᓗᒍ ᐃᑦᔪᕐᓁᓐᓂᕐᐹᕐᓗ ᐅᕐᓱᒧᑦ ᒥᖑᐊᕐᓗᒍ.

²⁵ ᐅᓇ ᖃᐅᔨᒍᒃ ᑐᑭᓯᑦᓯᐊᕐᓗᒍᓗ; ᐱᖁᔨᓂᖅ ᔨᕉᓴᓕᐅᑉ ᓴᓇᔭᐅᒃᑲᓐᓂᕐᓂᒃᓴᖓᓂᒃ ᐅᑎᕐᑎᑕᐅᑦᓯᐊᕐᓂᖓᓂᒡᓗ, ᐱᔪᒫᕐᐳᖅ ᐅᕐᓱᒧᑦ ᒥᖑᐊᕐᑕᐅᓯᒪᔪᖅ ᐊᐅᓚᑦᓯᔨ ᑎᑭᑉᐸᑦ, ᑭᖑᓂᖓᓂ ᓇᓪᓕᐅᓐᓃᑦ 7ᐃᑦ 7ᐃᕐᑐᕐᓗᒋᑦ. ᐊᒻᒪᓗ ᓇᓪᓕᐅᓐᓃᑦ 62 7ᐃᕐᑐᕐᓗᒋᑦ, ᐃᒡᓗᒐᓮᑦ ᓴᓇᔭᐅᒃᑲᓐᓂᕈᒫᕐᐳᑦ, ᐊᑐᕆᐊᖏᓪᓗ, ᑰᒃᕖᓪᓗ, ᑲᑉᐱᐊᓇᕐᑐᑦ ᓇᓪᓕᐅᑎᓯᒪᑎᓪᓗᒋᑦ.

²⁶ ᓇᓪᓕᐅᓐᓃᑦ 62 7ᐃᕐᑐᕐᓯᒪᔪᑦ ᐊᓂᒍᕐᐸᑕ ᐅᕐᓱᒧᑦ ᒥᖑᐊᕐᑕᐅᓯᒪᔪᖅ ᑐᖁᑕᐅᔪᒫᕐᐳᖅ ᐃᒻᒥᓂᒃ ᐱᑦᔪᑎᒋᓇᓂ: ᐊᖓᔪᖅᑳᕐᓗ ᑎᑭᑦᓱᒫᕐᐳᖅ ᐃᒡᓗᒐᓮᑦ ᓱᕋᒃᑎᕐᓗᒋᑦ ᐃᑦᔪᕐᓁᑦᑐᕕᒡᓗ. ᐃᓱᐊ ᑕᕝᕙ ᓇᓪᓕᐅᑎᔪᒫᕐᐳᖅ ᓄᓇᑐᑦ ᖄᒥᑦᑐᒥᑦ ᑎᑭᑕᐅᔪᑐᑦ; ᐅᓇᑕᕐᓂᕐᓗ ᑲᔪᓰᓐᓇᕈᒫᕐᐳᖅ ᐃᓱᐊᓄᑦ, ᑲᑉᐱᐊᓇᕐᑐᑦ ᐊᑐᕈᒫᕐᓂᖏᑦ ᐋᖅᑭᒃᑕᐅᔭᕇᕐᒪᑕ.

²⁷ ᑖᓐᓇ ᐊᖏᖃᑎᒌᒍᑎᒥᒃ ᐋᖅᑭᒃᓯᔪᒫᕐᐳᖅ ᓇᓪᓕᐅᓐᓃᑦ 7ᐃᑦ ᐃᓚᖓᓐᓂ, ᓇᓪᓕᐅᓐᓃᑦ 7ᐃᑦ ᐃᓚᖓᓐᓂ ᑐᖁᑕᐅᔪᒫᕐᐳᖅ ᐆᒪᔪᑎᑐᑦ ᑐᓂᕐᕈᑎᒋᔭᐅᓗᓂ. ᑐᒃᓯᐊᕐᕕᒡᔪᐊᑉ ᐳᕐᑐᓂᕐᐹᖓᓂ ᐃᓕᓯᔪᒫᕐᐳᖅ ᓇᕐᕈᓇᕐᑐᕐᔪᐊᒥᒃ ᓱᕋᒃᑕᐅᑎᑦᓯᔪᒥᒃ ᐃᒡᓗᒐᓴᒡᔪᐊᓂᒃ ᑖᓐᓇ ᑍᒤᓕᖓᓂᐊᕐᐳᖅ, ᐅᖃᐅᑕᐅᓯᒪᔫᑉ ᓇᓪᓕᐅᑎᓂᖓᑕ ᐃᓱᓕᑦᓯᐊᕐᓂᖓᓄᑦ ᑎᑭᓪᓗᒍ.”