ᑖᓂᐊᓕᐅᑉ ᐊᒡᓚᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᑖᓂᐊᓕᐅᑉ ᑕᑯᑎᑕᐅᓂᖓ ᓰᐲᑦ ᐊᖑᓴᓪᓗᖓᓂ ᒎᑦᓯᒥᒡᓗ

¹ ᐊᖓᔪᖅᑳᕐᔪᐊᑉ ᐱᐅᓪᓴᔮᐅᑉ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᑦ ᐱᖓᔪᖓᓐᓂ, ᐅᕙᖓ ᑖᓂᐊᓕ, ᑕᑯᑎᑕᐅᓚᐅᕐᐳᖓ, ᑍᑦᓱᒪ ᑕᑯᑎᑕᐅᓂᕐᒪ ᓯᕗᓪᓕᐅᑉ ᑭᖑᓂᖓᒍᑦ.

² ᑕᑯᑎᑕᐅᓪᓗᖓ, ᐅᕙᓐᓂᒃ ᑕᑯᓚᐅᕐᐳᖓ ᐊᖓᔪᖅᑳᕐᔪᐊᑉ ᐃᒡᓗᖓᓃᓪᓗᖓ ᓄᓇᒥ ᓲᓴᒥ ᓄᓇᐅᑉ ᐊᕕᒃᑐᕐᓯᒪᓂᖓᑕ ᐃᓚᖓᓂ ᐊᑎᖃᕐᑐᒥ ᐃᓛᒥᒥᒃ, ᑕᑯᑎᑕᐅᓪᓗᖓ ᑰᑉ ᐊᑎᖃᕐᑑᑉ ᐅᓔᒥᒃ ᓯᓈᓂᓚᐅᕐᐳᖓ.

³ ᖁᒻᒧᑦ ᕿᕕᐊᕋᒪ, ᑕᑯᕗᖓ ᓰᐱᒥᒃ ᐊᖑᓴᓪᓗᕐᒥᒃ ᒪᕐᕉᖕᓂᒃ ᓇᒡᔪᖃᕐᑐᒥᒃ, ᑰᑉ ᓴᓂᐊᓂ ᓇᖏᕐᑐᒥᒃ, ᓇᒡᔪᖏᒡᓗ ᑕᑭᔪᐊᓘᕗᒃ: ᓇᒡᔪᖓᑕ ᐂᑉᐸᖓ ᐃᒡᓗᐊᓂᑦ ᑕᑭᓂᕐᓴᐅᕗᖅ ᑭᖑᓪᓕᐅᓪᓗᓂᓗ ᑎᑭᐅᑎᕗᖅ.

⁴ ᑕᐅᑐᒃᑎᓪᓗᖓ ᓰᐱᐅᑉ ᐊᖑᓴᓪᓗᖓ ᐅᐸᒃᑐᖃᑦᑕᕐᐳᖅ, ᓯᕿᓂᐅᑉ ᓂᐱᕕᐊᑕ ᓇᓛᓄᑦ, ᐅᓐᓄᐊᓪᓗ ᓇᓛᓄᑦ, ᓯᕿᓂᐅᓪᓗ ᓇᓛᓄᑦ. ᐆᒪᔪᓂᑦ ᓱᓇᑐᐃᓐᓇᕐᓂᑦ ᐊᑭᕋᕐᑐᕐᑕᐅᔪᓐᓇᓐᖏᓚᖅ, ᑭᓇᒥᒡᓘᓐᓃᑦ ᑖᑦᓱᒪᖓᑦ ᓴᐳᑎᔭᐅᔪᖃᕈᓐᓇᕋᓂ, ᐃᓱᒪᒥᓂᒃ ᖁᕕᐊᒋᔭᒥᓂᒡᓗ ᐱᓇᓱᐊᑐᐃᓐᓇᕐᐳᖅ, ᐊᔪᖏᑦᑐᒪᕆᐅᓕᕐᓗᓂᓗ.

⁵ ᑕᒪᑐᒥᖓ ᐃᓱᒪᒃᓴᕐᓯᐅᕐᑎᓪᓗᖓ, ᑕᕝᕔᓐᓇᖅ ᐊᖑᓴᓪᓗᖅ ᒎᑦᓯ ᓴᖅᑭᑉᐳᖅ ᓯᕿᓂᐅᑉ ᓂᐱᕕᐊᑕ ᓇᓛᓂᑦ, ᓇᒡᔪᖃᕐᑐᖅ ᐅᑦᔨᕐᓇᕐᑐᒥᒃ ᐃᔨᖏᒃᑕ ᐊᑯᓂᖓᓂ, ᓄᓇᕐᔪᐊᓕᒫᖅ ᐸᖓᓕᒃᕕᒋᕚ ᓄᓇᒧᑦ ᑐᓐᖓᓇᓂ.

⁶ ᑖᓐᓇ ᓂᓐᖓᐅᒪᓂᕐᒧᑦ ᐊᒃᓱᕈᕐᓗᓂ ᐅᐸᒃᑐᕐᐳᖅ ᓰᐱᐅᑉ ᐊᖑᓴᓪᓗᖓᓄᑦ ᒪᕐᕉᖕᓂᒃ ᓇᒡᔪᓕᖕᒧᑦ ᑰᑉ ᓯᓈᓂ ᓇᖏᕐᑐᒧᑦ.

⁷ ᑕᑯᕙᕋᓗ ᓰᐱ ᐊᖑᓴᓪᓗᖅ ᐊᐳᕐᒪᒍ, ᓇᒡᔪᖏᒃ ᒪᕐᕉᒃ ᓯᖁᒥᑉᐴᒃ, ᓰᐱ ᐊᖑᓴᓪᓗᖅ ᑖᑦᓱᒥᖓ ᐊᑭᒪᔪᓐᓇᓐᖏᓚᖅ; ᒎᑦᓯᐅᑉ ᐅᕐᕈᑎᑉᐹ ᓄᓇᒧᑦ ᑐᓪᓕᕋᕐᓗᒍᓗ, ᑭᐊᓘᓐᓃᑦ ᓰᐱ ᐊᖑᓴᓪᓗᖅ ᓴᐳᑎᔪᓐᓇᓐᖏᓛ ᒎᑦᓯᐅᑉ ᐱᔪᓐᓇᕐᓂᖓᓂᑦ.

⁸ ᒎᑦᓯ ᑖᓐᓇ ᐊᔪᕈᓐᓃᕐᐸᓪᓕᐊᑐᐃᓐᓇᕐᐳᖅ, ᐱᔪᓐᓇᕐᓂᖓᑕ ᐊᔪᖏᓐᓂᕐᐹᖓᓂ, ᓇᒡᔪᖓ ᓇᑲᓪᓗᓂ ᐲᕐᐳᖅ, ᐃᓂᖓᓂᓕ ᐱᕈᕐᑐᖃᕐᐳᖅ ᓇᒡᔪᖕᓂᒃ ᓯᑕᒪᓂᒃ ᖁᒻᒧᑦ ᓴᖕᒥᔪᓂᒃ ᑐᕌᕐᓗᑎᒡᓗ ᕿᓚᐅᑉ ᐊᓄᕆᖏᓐᓄᑦ ᓯᑕᒪᓄᑦ.

⁹ ᓇᒡᔪᖕᓂᑦ ᑖᒃᑯᓇᖓᑦ ᐱᕈᕐᑐᖃᕆᕗᖅ, ᒥᑭᔫᓪᓗᓂ ᓄᐃᔪᖅ, ᐱᔪᓐᓇᕐᓂᕐᔪᐊᕐᑖᕐᐳᕐᓕ ᓯᕿᓂᐅᑉ ᓇᓛᓄᑦ ᓯᕿᓂᐅᑉ ᓂᐱᕝᕕᐊᑕ ᓇᓛᓄᑦ ᓄᓇᒧᓪᓗ ᑕᑯᒥᓇᕐᑐᒧᑦ.

¹⁰ ᑖᓐᓇ ᐊᖏᔪᕐᔪᐊᖑᓕᕐᐳᖅ ᕿᓚᖕᒥᐅᒐᓴᒃᔪᐃᑦ ᑎᑭᓪᓗᒋᑦ, ᐅᓪᓗᕆᐊᑦ ᐃᓚᖏᑦ ᐃᒋᑉᐰᑦ ᓄᓇᒧᑦ ᑐᓪᓕᕋᕐᓗᒋᓪᓗ.

¹¹ ᐃᒻᒥᓂᒡᓗ ᐊᖏᔪᕈᕐᑎᑉᐳᖅ ᕿᓚᖕᒥᐅᒐᓴᒃᔪᐊᓄᓪᓗ ᐊᖓᔪᖅᑳᕐᔪᐊᒧᑦ ᑐᖏᓕᕆᔭᐅᓕᕐᓗᓂ, ᑐᓂᕐᕈᓯᕐᓃᓪᓗ ᖃᐅᑕᒫᕐᓯᐅᑎᑦ ᓄᖅᑲᕐᑎᑉᐰᑦ ᑖᑦᓱᒧᖓ ᑐᓂᕐᕈᑕᐅᕙᒃᑐᑦ, ᑐᓂᕐᕈᓯᕐᕕᐅᓪᓗ ᐃᓂᖓ ᐊᒃᐸᓯᒃᑐᓐᖑᕐᑎᑉᐹ.

¹² ᐅᓇᑕᕐᓂᖏᓐᓄᑦ, ᕿᓚᖕᒥᐅᒐᓴᒡᔪᐃᑦ ᐃᑦᔪᕐᓁᑦᑐᑦ, ᖃᐅᑕᒫᓪᓗ ᐆᒪᔪᓂᒃ ᑐᓂᕐᕈᓯᕐᓂᖅ ᑐᓂᔭᐅᕗᑦ ᑖᑦᓱᒧᖓ. ᑖᓐᓇᓗ ᖃᓄᐃᓕᐅᕐᑕᓕᒫᒥᓂᒃ ᐊᔪᕈᓐᓃᕐᐳᖅ, ᓱᓕᑦᓯᐊᕐᓂᕐᓗ ᓄᓇᒧᑦ ᐃᒋᑕᐅᕗᖅ.

¹³ ᑐᓴᕐᐳᖓᓗ ᐃᑦᔪᕐᓁᑦᑐᒥᒃ ᐃᑦᔪᕐᓁᑦᑑᖃᑎᒥᓄᑦ ᐅᖃᕐᑐᒥᒃ, “ᖃᓄᖅ ᐊᑯᓂᐅᑎᒋᔪᖅ ᑕᑯᑎᑕᐅᑦᔪᑎ ᓇᓪᓕᐅᑎᓇᓱᐊᕐᓂᐊᕐᐹ? ᖃᐅᑕᒫᑦ ᐆᒪᔪᓂᒃ ᑐᓂᕐᕈᓯᖃᑦᑕᕐᓂᖅ, ᐅᓇᑕᕐᓂᕐᓗ ᓱᓇᖃᕈᓐᓁᕐᑎᑦᓯᔪᖅ, ᐃᑦᔪᕐᓁᑦᑐᕕᐅᓪᓗ ᑐᓂᔭᐅᓯᒪᓂᖓ, ᐃᑦᔪᕐᓁᑦᑐᓪᓗ ᑐᓪᓕᕋᕐᑕᐅᓂᖏᑦ?”

¹⁴ ᐅᖃᐅᑎᕚᖓᓗ, “ᐅᓪᓗᐃᑦ ᐅᓐᓄᐊᓪᓗ 2,300ᐃᑦ ᐊᓂᒍᕐᐸᑕ; ᑕᕝᕙ ᐃᑦᔪᕐᓁᑦᑐᕕᒃ ᐃᑦᔪᕐᓁᓕᑎᒃᑲᓐᓂᕈᒪᕙᕋ.”

ᐂᖏᓕᐅᑉ ᒊᐳᕆᐅᓕᐅᑉ ᓇᓗᓁᕐᓯᓂᖓ ᑕᑯᑎᑕᐅᓂᕐᒥᒃ

¹⁵ ᐅᕙᖓ ᑖᓂᐊᓕ ᑕᑯᓐᓇᕐᑎᓪᓗᖓ ᑕᒪᑐᒥᖓ ᑕᑯᑎᑕᐅᓂᕐᒥᒃ, ᑐᑭᓯᓇᓱᐊᕐᑎᓪᓗᖓᓗ, ᓵᓐᓂ ᓇᖏᕐᑐᖃᓕᕐᐳᖅ ᐃᓄᒃᑎᑐᑦ ᑕᐅᑦᑐᖃᕐᑐᒥᒃ.

¹⁶ ᑐᓵᓕᕐᐳᖓᓗ ᐊᖑᑎᐅᑉ ᓂᐱᖓᓂᒃ ᑰᑉ ᐅᓔᑉ ᓇᓛᓂᑦ ᐅᖃᕐᑐᒥᒃ, “ᒊᐳᕆᐅᓖ, ᐊᖑᑦ ᐅᓇ ᐅᖃᐅᑎᓚᐅᕈᒃ ᑕᑯᑎᑕᐅᓂᐅᑉ ᑐᑭᖓᓂᒃ.”

¹⁷ ᖃᓂᒋᔭᓐᓄᓪᓗ ᕾᕗᖅ, ᓯᕘᕋᓂᕐᒥᒡᓗ ᑕᑕᑉᐳᖓ ᓵᖓᓂᓗ ᐅᕐᕈᓪᓗᖓ ᐹᒻᒪᒃᐳᖓ, ᐅᖃᐅᑎᕚᖓᓗ, “ᐃᓅᑉ ᐃᕐᓂᖓ, ᑐᑭᓯᓕᕆᑦ ᑕᑯᑎᑕᐅᓂᖅ ᑕᒪᓐᓇ ᐱᑦᔪᑎᖃᕐᒪᑦ ᓱᓇᓕᒫᑦ ᐃᓱᒃᓴᖓᓂᒃ.

¹⁸ ᐅᖃᓪᓚᒃᑎᓪᓗᒍ, ᐃᑎᔪᒥᒃ ᓯᓂᓕᓚᐅᕐᐳᖓ, ᑮᓇᕋ ᒪᓂᖅᑲᒧᑦ ᑐᓐᖓᓪᓗᓂ: ᑖᑦᓱᒪ ᐊᒃᑐᕐᐹᖓ ᓂᑯᕕᑎᓪᓗᖓᓗ.”

¹⁹ ᐅᖃᐅᑎᕚᖓ, “ᐅᖃᐅᑎᓂᐊᕋᒃᑭᑦ ᓱᓇᒥᒃ ᐱᔪᖃᕈᒫᕐᒪᖔᑦ ᐅᓪᓗᐃᑦ ᑭᖑᓪᓕᖏᓐᓂ ᓂᓐᖓᐅᒪᓂᕐᔪᐊᖅ ᓇᓪᓕᐅᑎᒃᐸᑦ, ᑕᑯᑎᑕᐅᓂᖅ ᑕᒪᓐᓇ ᐱᑦᔪᑎᖃᕐᒪᑦ ᐃᓱᐊᓂ ᐱᔪᒫᕐᑐᓂᒃ.

²⁰ “ᓰᐱ ᐊᖑᓴᓪᓗᖅ ᒪᕐᕉᖕᓂᒃ ᓇᒡᔪᓕᒃ ᑐᑭᖃᕐᐳᖅ ᒥᑎᐊᑉ ᐴᕐᓯᐊᓪᓗ ᐊᖓᔪᖅᑳᕐᔪᐊᖃᕐᕕᐊᓂᒃ.

²¹ ᑕᑯᔧᑦ ᒎᑦᓯ, ᑐᑭᖃᕐᐳᖅ ᒍᕇᓯᒥᐅᑦ ᐊᖓᔪᖅᑳᕐᔪᐊᖃᕐᕕᖓᓂᒃ, ᓇᒡᔪᒃ ᐊᖏᔪᖅ ᐃᔨᖏᒃᑕ ᐊᑯᓐᓂᖓᓃᑦᑐᖅ ᑐᑭᖃᕐᐳᖅ ᐊᖓᔪᖅᑳᕐᔪᐊᖓᓐᓂᒃ ᓯᕗᓪᓕᕐᐹᒥᒃ.

²² ᓇᒡᔪᐃᑦ ᓯᑕᒪᑦ ᓇᒡᔪᖕᒥᒃ ᐲᕐᑐᒥᒃ ᑭᖑᕝᕕᐅᑎᔪᑦ, ᑐᑭᖃᕐᐳᑦ ᐊᖓᔪᖅᑲᐅᕕᖕᒥᑦ ᑕᕝᕙᓐᖓᑦ ᐃᓅᖃᑎᒌᒡᔪᐊᓂᑦ ᓯᑕᒪᑦ ᐊᖓᔪᖅᑳᕐᔪᐊᖃᕐᕖᑦ ᓴᖅᑭᑦᓱᒫᕐᒪᑕ, ᐊᑐᓂᓪᓕ ᐱᔪᓐᓇᕐᓂᖏᑦ ᐊᑦᔨᒌᒍᒫᓐᖏᓚᑦ.

²³ “ᑖᒃᑯᐊ ᐊᖓᔪᖅᑳᕐᔪᐊᖑᑎᓪᓗᒋᑦ, ᐊᑭᕋᕐᑐᕐᑎᖏᑦ ᐱᐅᖏᑐᒻᒪᕆᐅᓕᕈᒫᕐᒪᑕ, ᐊᖓᔪᖅᑳᕐᔪᐊᑉ ᑮᓇᖓ ᐃᓕᕋᓇᕐᑐᖅ ᓯᓔᕐᕆᒃᓯᔪᓐᓇᕐᑐᖅ, ᒪᑭᑦᓱᒫᕐᐳᖅ.

²⁴ ᑖᑦᓱᒪ ᐱᔪᓐᓇᕐᓂᖓ ᓴᓐᖏᔪᕐᔪᐊᖑᓕᕈᒫᕐᐳᖅ, ᓇᖕᒥᓂᖅ ᐱᔪᓐᓇᕐᓂᕐᒥᓅᖏᑦᑐᖅ: ᑖᓐᓇ ᐊᖏᔪᐊᓗᖕᒥᒃ ᓵᓚᖃᕈᒫᕐᐳᖅ, ᖃᓄᐃᓕᐅᕋᓱᐊᕐᑕᒥᓂᒃ ᑕᒤᓐᓂᒃ ᑲᔪᓯᓗᓂ, ᓱᓇᐅᔪᓐᓁᕐᑎᑦᓯᔪᒫᕐᐳᖅ ᐊᔪᖏᑦᑐᕐᔪᐊᖁᑕᐅᔪᓂᒃ ᐃᓄᖕᓂᒡᓗ ᐃᑦᔪᕐᓁᑦᑐᓂᒃ.

²⁵ ᑖᓐᓇ ᐅᐃᕕᕐᕆᒃᓯᓂᕐᒥᒍᑦ ᐊᔪᕈᓐᓁᕈᒫᕐᐳᖅ, ᐃᒻᒥᓂᒡᓗ ᐊᔪᖏᑦᑐᕐᔪᐊᖑᓂᕋᓕᕐᓗᓂ. ᓵᓚᐅᓂᐊᕋᓱᒋᖏᑦᑐᑦ, ᐅᓄᕐᑐᑦ ᓯᖁᒥᑦᓱᒫᕐᐰᑦ, ᐊᑭᕋᕐᑐᕐᓗᓂᓗ ᐊᖓᔪᖅᑲᐅᔪᓄᑦ ᐊᖓᔪᖅᑳᕐᔪᐊᓄᓪᓗ. ᑭᓯᐊᓂᓕ ᓵᓚᐅᔪᒫᕆᕗᖅ, ᐃᓅᑉ ᐱᔪᓐᓇᕐᓂᖓᓅᖏᑦᑐᖅ.

²⁶ ᑕᑯᑎᑕᐅᓃᑦ ᐅᓪᓗᓂᒃ ᐅᓐᓄᐊᓂᒡᓗ ᐅᖃᐅᓯᐅᔪᑦ ᐃᓕᖕᓄᑦ ᓱᓕᑦᓯᐊᕐᐳᑦ, ᑕᑯᑎᑕᐅᓂᕐᓕ ᒪᑐᒍᒃ, ᐅᖃᐅᓯᖃᕐᒪᑦ ᓯᕗᓂᕐᔪᐊᒥ ᐱᔪᒫᕐᑐᓂᒃ.”

²⁷ ᐅᕙᖓ, ᑖᓂᐊᓕ, ᑕᖃᓚᐅᕐᐳᖓ ᐅᓪᓗᓂᒡᓗ ᐅᓄᕐᑐᓂᒃ ᖃᓂᒪᓪᓗᖓ, ᑭᖑᓂᖓᒍᑦ ᒪᑭᓐᓇᒪ ᐊᖓᔪᖅᑳᕐᔪᐊᑉ ᐱᔭᒃᓴᐅᑎᑕᖏᓐᓂᒃ ᐱᓇᓱᐊᓕᓚᐅᕆᕗᖓ. ᑕᑕᒥᓐᓂᐊᓚᐅᕐᐳᖓᓕ ᑕᑯᑎᑦᔪᑎᓂᒃ ᑐᑭᓯᔭᐅᔪᓐᓇᕐᑑᑉ ᐅᖓᑖᓃᓚᐅᕐᒪᑕ.