ᑖᓂᐊᓕᐅᑉ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᑖᓂᐊᓕᐅᑉ ᐅᓂᒃᑳᕐᓂᖏᑦ ᑕᑯᑎᑕᐅᓂᕐᒥᓂᒃ ( 7:1—12:13 ) ᑖᓂᐊᓕᐅᑉ ᑕᑯᑎᑕᐅᓂᖓ ᐆᒪᔪᓂᒃ ᓯᑕᒪᓂᒃ

¹ ᐊᕐᕌᒍᑦ ᓯᕗᓪᓕᕐᐹᖓᓐᓂᒃ ᐱᐅᓪᓴᔭᐅᑉ ᐹᐱᓘᓂᒥ ᐊᖓᔪᖅᑳᕐᔪᐊᖑᓂᖓᓂ, ᑖᓂᐊᓕ ᓯᓐᓇᒃᑐᓚᐅᕐᐳᖅ ᑕᑯᑎᑕᐅᓪᓗᓂᓗ ᐃᒡᓕᕐᒥᓂ ᓇᓚᑎᓪᓗᒍ. ᐃᒫᒃ ᓯᓐᓇᒃᑐᕐᒥᓂᒃ ᑎᑎᕋᓚᐅᕐᐳᖅ.

² ᑖᓂᐊᓕ ᐅᖃᕐᐳᖅ, “ᐅᓐᓄᐊᒃᑯᑦ ᑕᑯᑎᑕᐅᓪᓗᖓ ᑕᑯᓚᐅᕐᐳᖓ, ᐊᓄᕆᓂᒃ ᓯᑕᒪᓂᒃ ᕿᓚᖕᒥᑦ ᐱᔪᓂᒃ ᐃᒪᕐᔪᐊᒥᒃ ᐊᐅᓚᑎᑦᓯᔪᓂᒃ.

³ ᐆᒪᔪᐃᓪᓗ ᐊᖏᔪᑦ ᓯᑕᒪᑦ, ᐊᑐᓂᑦ ᐊᑦᔨᒌᖏᑦᑐᑦ, ᖃᑭᕗᑦ ᐃᒫᓂᑦ.

⁴ ᓯᕗᓪᓕᕐᐹᖅ ᑕᐅᑦᑐᖃᕐᐳᖅ ᓛᔭᑎᑐᑦ, ᐃᓴᕈᖃᕐᓗᓂᓗ ᓇᒃᑐᕋᓕᒃᑎᑐᑦ. ᑕᑯᓐᓇᕐᑎᓪᓗᖓ ᐃᓴᕈᖏᒃ ᐲᕐᑕᐅᕗᒃ ᓄᓇᒥᓪᓗ ᖃᖓᑦᑕᕐᑎᑕᐅᓪᓗᓂ ᓂᐅᖏᖕᓄᓪᓗ ᒪᕐᕉᖕᓄᑦ ᓂᑯᕕᑎᑕᐅᕗᖅ ᐃᓄᒃᑎᑐᑦ, ᐃᓅᓪᓗ ᐆᒻᒪᑎᖓᓂᒃ ᐆᒻᒪᑎᓕᕐᑕᐅᕗᖅ.

⁵ “ᐆᒪᔫᓪᓗ ᐂᑉᐸᖓ ᓵᓐᓃᓕᕆᕗᖅ, ᓇᓄᕐᑎᑐᑦ ᑕᐅᑦᑐᓕᒃ, ᑖᓐᓇᓗ ᒪᑭᑎᑕᐅᕗᖅ, ᐱᖓᓱᓂᒡᓗ ᑐᓕᒫᓂᒃ ᑭᖕᒥᐊᕐᐳᖅ; ᐅᖃᐅᑎᔭᐅᓪᓗᓂᓗ, ‘ᒪᑭᓪᓗᑎᑦ ᓂᕆᔪᓐᓇᕐᑕᓕᒫᕐᓂᒃ ᓂᕿᒥᒃ ᓂᕆᒋᑦ!’

⁶ “ᑭᖑᓂᖓᓂ, ᑕᑯᓕᕆᕗᖓ ᐆᒪᔪᐊᓗᐃᑦ ᐃᓚᖓᓐᓂᒃ ᓕᐸᕐᑎᑐᑦ ᑕᐅᑦᑐᖃᕐᑐᒥᒃ, ᕿᒥᕐᓗᖕᒥᒍᑦ ᓯᑕᒪᓂᒃ ᐃᓴᕈᖃᕐᐳᖅ ᑎᖕᒥᐊᑉ ᐃᓴᕈᖏᑎᑐᑦ; ᓯᑕᒪᓂᒡᓗ ᓂᐊᖁᖃᕐᓗᓂ, ᐊᖓᔪᖅᑳᕐᔪᐊᖑᓂᕐᒥᒡᓗ ᑐᓂᓯᕕᒋᔭᐅᕗᖅ ᐊᐅᓚᑦᓯᖁᓪᓗᒍ.

⁷ “ᓱᓕ, ᐅᓐᓄᐊᒥ ᑕᑯᑎᑕᐅᓪᓗᖓ ᑕᑯᒋᕗᖓ ᐆᒪᔪᐊᓗᐃᑦ ᓯᑕᒪᖓᓐᓂᒃ, ᑲᑉᐱᐊᓇᕐᑑᓪᓗᓂ ᓯᕘᕋᓇᕐᑐᖅ ᓴᓐᖏᔪᕐᔪᐊᖑᓪᓗᓂᓗ, ᑭᒍᑎᖃᕐᐳᖅ ᓴᕕᕋᔭᖕᓂᒃ ᐊᖏᔪᐊᓗᖕᓂᒃ; ᖃᖅᑯᐊᕐᐳᖅ ᓂᕆᓪᓗᓂᓗ ᓵᓚᒋᔭᒥᓂᒃ, ᑐᓪᓕᕋᕐᐰᓪᓗ ᐊᒥᐊᒃᑯᓂ. ᐆᒪᔪᕐᔪᐊᖑᖃᑎᒥᓂᑦ ᓯᕗᓪᓕᕐᓂᑦ ᐊᑦᔨᒋᔭᐅᓐᖏᓚᖅ, ᖁᓕᓂᑦ ᓇᒡᔪᖃᕐᑐᖅ.

⁸ ᓇᒡᔪᖏᓐᓂᒃ ᐃᓱᒪᒃᓴᕐᓯᐅᕈᑎᖃᕐᑎᓪᓗᖓ, ᓇᒡᔪᒃ ᒥᑭᔪᖅ ᓄᐃᕗᖅ ᓇᒡᔪᐃᑦ ᐊᑯᓐᓂᖓᑦᑎᒍᑦ, ᓇᒡᔪᐃᑦ ᓯᕗᓪᓖᑦ ᐱᖓᓱᑦ ᒪᓐᖑᖏᑎᒍᑦ ᑖᑦᓱᒪ ᐲᕐᑎᑉᐰᑦ, ᓇᒡᔪᒃ ᑖᓐᓇ ᐃᔨᖃᕐᐳᖅ ᐃᓅᑉ ᐃᔨᖏᒃᑎᑐᑦ ᖃᓂᖃᕐᓗᓂᓗ ᓂᓪᓕᐊᔪᒥᒃ ᐱᐅᔪᕆᓂᕐᒥᓂᒃ.”

ᑕᑯᑎᑕᐅᓂᖅ ᐃᓅᑦᓮᓐᓇᕐᑐᒥᒃ ᐃᓱᖃᖏᑦᑐᒧᑦ

⁹ “ᑕᑯᓐᓈᕐᑎᓪᓗᖓ, ᐃᒃᓯᕙᐅᑕᕐᔪᐃᑦ ᐃᓂᖏᓐᓄᑦ ᐃᓕᔭᐅᕗᑦ, ᑍᒪᖓᑐᖃᕐᓗ ᐃᓅᖏᓐᓇᕐᑐᖅ ᐃᒃᓯᕙᐅᑕᕐᔪᐊᒥᓄᑦ ᐃᖏᑉᐳᖅ, ᐊᓐᓄᕌᖏᑦ ᐊᐳᑎᑐᑦ ᖃᑯᕐᑎᒋᕗᑦ; ᓄᔭᖏᓪᓗ ᓰᐱᐅᑉ ᒥᖅᑯᖏᑎᑐᑦ ᖃᑯᕐᑎᒋᕗᑦ, ᐃᒃᓯᕙᐅᑕᕐᔪᐊᖓ ᐃᑯᐊᓚᕗᖅ, ᐊᒃᓴᓗᐊᖏᑦ ᐃᑯᒪᐅᓪᓗᑎᒃ.

¹⁰ ᐃᑯᒪᔪᖅ ᑰᒃᐳᖅ ᑖᑦᓱᒪ ᓵᖓᓂᑦ: ᑕᐅᓴᑎᑦ ᑕᐅᓴᑎᓪᓗ ᐅᖓᑖᓃᑦᑐᑦ ᐱᔨᑦᓯᕐᐳᑦ ᑖᑦᓱᒥᖓ; 10,000 10,000ᐃᕐᑐᕐᓗᒍ ᐅᓄᕐᑎᒋᔪᑦ ᓵᖓᓂ ᓇᖏᕐᐳᑦ, ᐃᖅᑲᕐᑐᐃᓂᖅ ᐱᒋᐊᕐᒪᑦ, ᒪᒃᐱᕐᑐᖅᑲᓪᓗ ᒪᒃᐱᕐᑕᐅᕗᑦ.

¹¹ “ᑕᑯᓐᓇᕐᑎᓪᓗᖓ, ᑐᓵᓚᐅᕐᐳᖓ ᓇᒡᔫᑉ ᒥᑭᔫᑉ ᓂᓪᓕᐊᓪᓗᓂ ᐱᐅᔪᕆᓂᖓᓂᒃ: ᑕᑯᓐᓇᕐᑎᓪᓗᖓᓗ ᐆᒪᔪᐊᓗᒃ ᑐᖁᑕᐅᕗᖅ ᑎᒥᖓᓗ ᑐᖁᖓᓕᕐᒪᑦ ᐃᒋᑕᐅᕗᖅ ᐃᑯᒪᒧᑦ ᐃᑯᐊᓚᔪᒧᑦ.

¹² ᐆᒪᔪᐊᓗᐃᓪᓕ ᐊᓯᖏᑦ ᐊᖓᔪᖅᑲᐅᓂᖏᑦ ᐲᕐᑕᐅᕗᑦ, ᐃᓅᑎᑕᐅᒃᑲᓐᓂᓚᐅᕐᐳᓪᓕ ᓇᓪᓕᐅᓐᓂᕐᓂᒃ.

¹³ “ᑕᑯᑎᑕᐅᑎᓪᓗᖓ ᐅᓐᓄᐊᒥ ᑕᑯᕗᖓ ᐃᓅᑉ ᐃᕐᓂᖓᑕ ᐊᑦᔨᖓᓂᒃ ᓄᕗᔭᓃᑦᑐᒥᒃ, ᑍᒪᖓᑐᖃᕐᓗ ᐃᓅᔪᖅ ᐅᐸᒃᐹ, ᓇᔪᒐᖓᓄᐊᕐᑎᑕᐅᓪᓗᓂᓗ.

¹⁴ ᑖᓐᓇ ᐊᖓᔪᖅᑲᐅᓂᕐᒥᒃ ᑐᓂᓯᕝᕕᐅᕗᖅ, ᐃᓅᖃᓐᓂᕐᓂᕐᒥᒡᓗ ᐊᖓᔪᖅᑲᐅᓂᕐᒥᒡᓗ; ᐃᓄᓕᒫᓪᓗ, ᐃᓅᖃᑎᒌᒡᔪᐃᓪᓗ ᓇᑭᑐᐃᓐᓇᖅ ᐱᓯᒪᔪᑦ ᖃᓄᑐᐃᓐᓇᕐᓗ ᐅᖃᐅᓯᓖᑦ ᑐᒃᓯᐊᕐᕕᒋᕚᑦ: ᐊᖓᔪᖅᑲᐅᕕᖓ ᐃᓱᖃᖏᑦᑐᒧᑦ ᐊᖓᔪᖅᑲᐅᓂᐅᕗᖅ ᐃᓱᓕᓐᓂᐊᕋᓂᓗ, ᐊᖓᔪᖅᑳᔪᐊᖑᕕᖓ ᑍᒪᓐᖓᑦ ᓵᓚᐅᓂᐊᓐᖏᓚᖅ.”

ᑕᑯᑎᑕᐅᓃᑦ ᓇᓗᓁᕐᑕᐅᓂᖏᑦ

¹⁵ “ᐅᕙᖓ ᑖᓂᐊᓕ, ᐊᓂᕐᓂᑯᑦ ᐃᓱᒪᔮᓚᐅᕐᐳᖓ, ᑕᑯᑎᑕᐅᓂᖅ ᐃᓱᒪᓐᓄᑦ ᑎᑭᓯᒪᔪᖅ ᐱᑦᔪᑎᒋᓪᓗᒍ.

¹⁶ ᑕᕝᕙᓂ ᓇᖏᕐᑐᑦ ᐃᓚᖓᑦ ᐅᐸᒃᓗᒍ, ᑕᒪᑐᒪ ᑕᑯᔭᒪ ᑐᑭᖓᓂᒃ ᐊᐱᕆᕙᕋ, ᐅᖃᐅᑎᕚᖓᓗ ᖃᐅᔨᑎᓪᓗᓂᖓ ᑕᒪᒃᑯᐊ ᑐᑭᖏᓐᓂᒃ.

¹⁷ ‘ᐆᒪᔪᐊᓗᐃᑦ ᓯᑕᒪᑦ ᑕᑯᔭᑎᑦ ᓯᑕᒪᐅᕗᑦ ᐊᖓᔪᖅᑲᐅᕖᑦ, ᓄᓇᒥ ᐊᖓᔪᖅᑲᐅᓂᐅᔪᒫᕐᑐᑦ.

¹⁸ ᖁᑦᓯᖕᓂᕐᐹᖑᔫᓪᓕ ᐃᑦᔪᕐᓁᑦᑐᖁᑎᖏᑦ ᐊᖓᔪᖅᑲᐅᕕᖕᒥᒃ ᑐᓂᓯᔭᐅᔪᒫᕐᐳᑦ, ᐱᓯᒤᓐᓇᓕᕐᓗᒍᓗ, ᐃᓱᖃᖏᑦᑐᒧᑦ, ᐃᓛᒃ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ.’

¹⁹ “ᑐᑭᓯᔪᒪᓚᐅᕆᕙᕋ ᐆᒪᔪᐊᓗᐃᑦ ᑕᑯᔭᒪ ᓯᑕᒪᖓᑕ ᑐᑭᖓ, ᑖᓐᓇ ᐊᑦᔨᒋᔭᐅᖏᑦᑐᖅ ᐆᒪᔪᐊᓗᖕᓂᑦ ᐊᓯᖏᓐᓂᑦ, ᑲᑉᐱᐊᓇᕐᓂᕐᐹᖑᓪᓗᓂᓗ, ᑭᒍᑎᖃᕐᑐᖅ ᓴᕕᕋᔭᖕᓂᒃ ᑯᑭᖃᕐᓗᓂᓗ ᖃᑯᕐᓕᕐᓂᒃ, ᑖᓐᓇ ᖃᖅᑯᐊᕐᐳᖅ ᓂᕆᓪᓗᓂᓗ ᓵᓚᒋᔭᒥᓂᒃ, ᑐᓪᓕᕋᕐᓗᓂᓗ ᐊᒥᐊᒃᑯᒥᓂᒃ.

²⁰ ᑐᑭᓯᔪᒪᓚᐅᕆᕙᒃᑲᓗ ᓂᐊᖁᖓᓂ ᓇᒡᔪᖏᑦ ᖁᓕᑦ, ᐃᓚᖓᓪᓗ ᐊᑯᓐᓂᖏᑎᒍᑦ ᐱᕈᕐᑐᖅ, ᑖᑦᓱᒪᓗ ᓯᕗᓂᐊᒍᑦ ᓇᒡᔪᐃᑦ ᐱᖓᓱᑦ ᐲᕐᑐᑦ, ᑖᓐᓇ ᑕᑯᓴᐅᓂᕐᓴᐅᔮᕐᑐᖅ ᐊᓯᒥᓂᑦ, ᐃᔨᖃᕐᓗᓂᓗ ᖃᓂᕐᒥᓄᓪᓗ ᓂᓪᓕᐊᔪᖅ ᐱᐅᔪᕆᓂᕐᒥᓂᒃ.

²¹ “ᑕᑯᓐᓈᕐᑎᓪᓗᖓ, ᓇᒡᔪᒃ ᑖᓐᓇ ᐅᓇᑕᖃᑎᖃᕐᐳᖅ ᐃᑦᔪᕐᓁᑦᑐᓂᒃ, ᓵᓚᒋᓕᕐᓗᒋᓪᓗ.

²² ᑍᒪᓐᖓᑐᖃᕐᓂᑦ ᐃᓅᔪᖅ ᕾᓚᐅᖏᓐᓂᖓᓂ, ᐃᖅᑲᕐᑐᐃᓂᕐᒥᒡᓗ ᓴᖅᑭᑎᑦᓯᓪᓗᓂ ᖁᑦᓯᖕᓂᕐᐹᑉ ᐃᑦᔪᕐᓁᑦᑐᖁᑎᖏᑦ ᓴᐳᑎᕔᑦ, ᓇᓪᓕᐅᑎᓪᓗᓂᓗ ᐊᖓᔪᖅᑲᐅᓂᖅ ᑖᒃᑯᓇᖓᑦ ᐱᓯᒪᔭᐅᓕᕐᕕᒃᓴᖓᑦ.

²³ “ᐃᓛᒃ ᑐᑭᖓᓂᒃ ᐅᖃᐅᑎᕚᖓ: ‘ᐆᒪᔪᐊᓗᐃᑦ ᓯᑕᒪᖓᑦ ᑖᓐᓇᐅᕗᖅ ᓄᓇᒥ ᐊᖓᔪᖅᑲᐅᕖᑦ ᓯᑕᒪᖓᑦ ᓄᓇᒥ ᓴᖅᑭᑦᓱᒫᕐᑐᖅ. ᑖᓐᓇ ᐊᖓᔪᖅᑲᐅᓂᕐᓂᑦ ᐊᑦᔨᒋᔭᐅᔪᒫᓐᖏᓚᖅ ᓄᓇᕐᔪᐊᒥᒡᓗ ᓄᖒᑦᓯᔪᒫᕐᐳᖅ, ᑐᓪᓕᕋᕐᓗᒍ ᓯᖁᑦᑎᕐᓗᒍᓗ.

²⁴ ᓇᒡᔪᐃᑦ ᖁᓕᑦ ᑖᒃᑯᐊᖑᕗᑦ ᐊᖓᔪᖅᑳᕐᔪᐊᑦ ᖁᓕᑦ ᑕᕝᕙᓐᖓᑦ ᐊᖓᔪᖅᑲᐅᕕᖕᒥᑦ ᐱᓯᒪᔪᑦ: ᑖᒃᑯᐊ ᑭᖑᓂᖓᑦᑎᒍᑦ ᐊᖓᔪᖅᑳᕐᔪᐊᖅ ᐊᓯᖓᑦ ᓴᖅᑭᑦᓱᒫᕐᐳᖅ, ᑖᒃᑯᓇᖓᑦ ᓯᕗᓪᓕᕐᓂᑦ ᐊᑦᔨᒋᔭᐅᖏᑦᑐᖅ; ᑖᓐᓇ ᓵᓚᖃᕈᒫᕐᐳᖅ ᐊᖓᔪᖅᑳᕐᔪᐊᓂᒃ ᐱᖓᓱᓂᒃ.

²⁵ ᑖᓐᓇ ᓂᓪᓕᐊᔪᒫᕐᐳᖅ ᖁᑦᓯᖕᓂᕐᐹᖑᔪᖅ ᐊᑭᕋᕐᑐᕐᓗᒍ ᐅᖁᒤᒃᓴᕐᑎᓪᓗᒋᓪᓗ ᖁᑦᓯᖕᓂᕐᐹᖑᔪᑉ ᐃᑦᔪᕐᓁᑦᑐᖁᑎᖏᑦ, ᐋᖅᑭᒃᓱᐃᓇᓱᐊᕈᒫᕐᓗᓂᓗ ᐱᖁᔭᓂᒃ ᓇᓪᓕᐅᓂᕐᓯᐅᕕᖕᓂᒡᓗ ᐊᓯᑦᔩᓇᓱᐊᕈᒫᕐᓗᓂ. ᖁᑦᓯᖕᓂᕐᐹᓪᓗ ᐃᑦᔪᕐᓁᑦᑐᖁᑎᖏᑦ ᓯᐊᓛᕆᑬᓐᓇᕈᒫᕐᐰᑦ, ᓇᓪᓕᐅᓐᓂᕐᓂᒃ ᐱᖓᓱᓂᒃ ᐊᕝᕙᕐᒥᒡᓗ.

²⁶ ᐃᖅᑲᕐᑐᐃᓂᕐᓕ ᓇᓪᓕᐅᑎᔪᒫᕐᐳᖅ, ᐊᖓᔪᖅᑲᐅᓂᖓᑕᓗ ᐱᔪᓐᓇᕐᓂᖓᓂᒃ ᐊᕐᓵᕐᑕᐅᔪᒫᕐᐳᖅ ᓱᓇᐅᔪᓐᓃᕐᑎᑕᐅᓗᓂᓗ ᐃᓱᖃᖏᑦᑐᒧᑦ.

²⁷ ᐊᖓᔪᖅᑲᐅᓂᖅ, ᐱᔪᓐᓇᕐᓂᕐᓗ, ᐊᖏᔫᓂᕐᓗ ᐊᑕᓂᐅᕕᖕᒥᑦ ᐱᔪᑦ ᕿᓚᐅᑉ ᐊᑖᓃᑦᑐᓕᒫᑦ ᑐᓂᔭᐅᔪᒫᕐᐳᑦ ᖁᑦᓯᖕᓂᕐᐹᑉ ᐃᑦᔪᕐᓁᑦᑐᖁᑎᖏᓐᓄᑦ, ᑖᑦᓱᒪ ᐊᑕᓂᐅᕕᖓ, ᐃᓱᖃᖏᑦᑐᒧᑦ ᐊᖓᔪᖅᑲᐅᓂᐅᔪᒫᕐᐳᖅ, ᐊᖓᔪᖅᑳᕐᔪᐊᓕᒫᓪᓗ ᐱᔨᑦᓯᕈᒫᕐᐹᑦ ᓈᓚᒡᓗᒍᓗ.’

²⁸ “ᑖᒃᑯᐊ ᑕᕝᕙ ᑕᑯᑎᑕᐅᓃᑦ ᐃᓱᐊᑦ, ᐅᕙᖓ ᑖᓂᐊᓕ ᐃᓱᒪᔮᕈᑎᒋᓚᐅᕐᐸᒃᑲ, ᑮᓇᕋᓗ ᐊᐅᖃᕈᓐᓃᓚᐅᕐᐳᖅ, ᑭᓇᒧᓪᓘᓐᓃᑦ ᐅᖃᓚᐅᓐᖏᓚᖓ ᐆᒻᒪᒻᒥᐅᑕᕆᑐᐃᓐᓇᓚᐅᕐᐸᒃᑲᓕ.”