ᑖᓂᐊᓕᐅᑉ ᐊᒡᓚᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦᓂᐱᑯᓁᓴᐅᑉ ᓯᓐᓇᒃᑐᖓᑕ ᐂᑉᐸᖓ 1 “ᐊᖓᔪᖅᑳᕐᔪᐊᒥᑦ ᓂᐱᑯᓁᓴᒥᑦ, ᐃᓄᓕᒫᓄᑦ, ᐃᓅᖃᑎᒌᓄᓪᓗ ᓇᑭᑐᐃᓐᓇᖅ ᐱᓯᒪᔪᓄᑦ, ᐅᖃᐅᓯᖃᑎᒌᖏᑦᑐᓄᓪᓗ, ᓄᓇᕐᔪᐊᒥ ᐃᓅᔪᓕᒫᓄᑦ; ᓮᒪᓂᖃᕆᑦᓯ ᐊᖏᔪᒥᒃ! 2 ᖁᕕᐊᓱᒃᐳᖓ ᑐᓴᕐᑕᐅᔭᕆᐊᖃᕋᓱᒋᒐᒃᑯ ᐃᓕᑦᓯᓐᓄᑦ ᑲᒪᓇᕐᑐᓂᒃ ᓇᓗᓁᒃᑯᑕᓂᒡᓗ ᒎᑎᐅᑉ ᖁᑦᓯᖕᓂᕐᐹᑉ ᐱᓂᐊᕐᓂᕆᓯᒪᔭᖏᓐᓂᒃ ᖃᐅᔨᑎᓪᓗᖓ. 3 ᓇᓗᓁᒃᑯᑍᑦ ᐱᓂᐊᕐᓂᖏᑦ ᐊᖏᔫᕗᑦ, ᓴᓐᖏᔫᓪᓗᑎᒡᓗ ᑲᒪᓇᕐᑐᓕᓂᖏᑦ! ᐊᖓᔪᖅᑲᐅᕕᖓ ᐃᓱᖃᖏᑦᑐᒧᑦ ᐊᑕᓂᐅᕕᐅᕗᖅ; ᐊᑕᓂᐅᕕᖓ ᓱᖁᓯᕐᓂᐊᓐᖏᓚᖅ ᑭᖑᕚᖑᖃᑎᒌᓂᑦ ᑭᖑᕚᖑᖃᑎᒌᓄᑦ. 4 “ᐅᕙᖓ, ᓂᐱᑯᓁᓴ, ᐊᖏᕐᕋᕐᓯᒪᓚᐅᕐᐳᖓ ᐃᒡᓗᒥ ᐊᖓᔪᖅᑳᕐᔪᐊᒃᑯᕕᓐᓂ, ᖁᕕᐊᓱᑦᓯᐊᕐᓗᖓ ᓈᒻᒪᒃᓯᓯᒪᑦᓯᐊᕐᓗᖓᓗ. 5 ᓯᓐᓇᒃᑐᓚᐅᕐᐳᖓ ᑲᑉᐱᐊᓱᓕᕈᑎᒋᓪᓗᒍᓗ, ᓯᓂᒃᑎᓪᓗᖓ ᓯᓂᒡᕕᓐᓂ, ᑕᑯᓚᐅᕐᐳᖓᓗ ᑕᑯᑎᑕᐅᓂᕐᓂᒃ ᑲᑉᐱᐊᓱᓕᓚᐅᕐᐳᖓᓗ. 6 ᐱᖁᔨᓚᐅᕐᐳᖓᓗ ᓯᓚᑐᔪᓕᒫᑦ ᐹᐱᓘᓂᒦᑦᑐᑦ ᓵᓐᓄᑦ ᕾᑎᑕᐅᖁᓪᓗᒋᑦ ᓯᓐᓇᒃᑐᒪ ᑐᑭᖓᓂᒃ ᐅᖃᐅᑎᔭᐅᔪᒪᓪᓗᖓ. 7 ᐊᖓᒃᑯᐃᓪᓕ, ᓇᓚᐅᑦᑍᔩᓪᓗ, ᑲᓪᑎᐊᒥᐅᓪᓗ ᓯᓚᑐᔪᖁᑎᖏᑦ, ᓯᕗᓂᒃᓴᒥᒡᓗ ᖃᐅᔨᒪᓇᓱᐊᕐᑏᑦ, ᕾᖕᒪᑕ ᓯᓐᓇᒃᑐᓐᓂᒃ ᐅᓂᒃᑳᕐᕕᒋᓚᐅᕐᐸᒃᑲ, ᑍᒃᑯᓇᖓᓪᓕ ᑐᑭᖓᓂᒃ ᐅᖃᐅᑎᔭᐅᔪᓐᓇᓚᐅᓐᖏᓚᖓ. 8 ᑭᖑᓪᓕᕐᐹᒥᒡᓕ ᑖᓂᐊᓕ ᕾᓚᐅᕆᕗᖅ ᓇᔪᒐᓐᓄᑦ, ᓯᓐᓇᒃᑐᓐᓂᒡᓗ ᐅᓂᒃᑳᕐᕕᒋᓚᐅᕐᐸᕋ. ᑖᓐᓇ ᐊᑎᖃᕐᑐᖅ ᐱᐊᓪᓴᔮᕆᒥᒃ, ᒎᑎᒪ ᐊᑎᖓᓂᒃ, ᑖᓐᓇ ᒎᑎᑦ ᐃᑦᔪᕐᓁᑦᑐᑦ ᐊᓂᕐᓂᖏᑕ ᐃᓂᒋᕚᑦ. 9 ᐅᖃᐅᑎᓚᐅᕐᐸᕋᓗ, ᐱᐊᓪᓴᔮᕆ, ᐊᖓᒃᑯᐃᑦ ᐊᖓᔪᖅᑳᖓᑦ, ᖃᐅᔨᒪᕗᖓ ᒎᑎᑦ ᐊᓂᕐᓂᖏᑕ ᐃᓂᒋᖕᒪᑎᑦ, ᓇᓗᓇᕐᑐᓂᒡᓗ ᓴᐱᕈᑎᖃᖏᓐᓇᕕᑦ, ᐃᒫᒃ ᓯᓐᓇᒃᑐᓚᐅᕐᐳᖓ; ᑐᑭᖓᓂᒃ ᐅᖃᐅᑎᓚᐅᓐᖓ. 10 “ᐃᒫᒃ ᑕᑯᑎᑕᐅᓚᐅᕐᐳᖓ ᐃᓱᒪᒃᑯᑦ ᓯᓂᒡᕕᓐᓂ ᓯᓂᒃᑎᓪᓗᖓ: ᑕᐅᑐᒃᑎᓪᓗᖓ, ᓇᐹᕐᑐᒥᒃ ᓵᓐᓂ ᑕᑯᓚᐅᕐᐳᖓ ᓄᓇᐅᑉ ᕿᑎᖓᓃᑦᑐᒥᒃ, ᑕᑭᓂᖓ ᑕᑭᔪᒻᒪᕆᐊᓘᓪᓗᓂ. 11 ᓇᐹᕐᑐᖅ ᑖᓐᓇ ᐱᕈᓚᐅᕐᐳᖅ ᐊᖏᔪᐊᓘᓕᕐᓗᓂ ᓴᓐᖏᔫᓪᓗᓂᓗ, ᓄᕗᐊᓗ ᕿᓚᖕᒧ ᑎᑭᑉᐳᖅ, ᓄᓇᒥᓪᓗ ᓇᑭᑐᐃᓐᓇᖅ ᑕᑯᓴᐅᓕᕐᓗᓂ. 12 ᐅᖃᐅᔭᖏᑦ ᑕᑯᒥᓇᕐᑑᓚᐅᕐᐳᑦ, ᐸᐅᕐᖓᖃᕐᓗᓂᓗ ᐊᒥᒐᖏᑦᑐᓂᒃ, ᑕᒤᓐᓄᓪᓗ ᓂᕿᒃᓴᐅᓪᓗᑎᒃ: ᐆᒪᔪᐃᓪᓗ ᓄᓇᒥᐅᑍᑦ ᐊᑖᓂ ᑕᕐᕋᓕᓂᖃᕐᐳᑦ, ᑎᖕᒥᐊᓪᓗ ᑎᖏᕙᒃᑐᑦ ᐊᕙᓚᖓᔪᖏᓐᓂ ᐃᓂᖃᕐᓗᑎᒃ; ᑕᕝᕙᓐᖓᓪᓗ ᐆᒪᔪᐃᑦ ᓱᓇᑐᐃᓐᓁᑦ ᐅᕕᓂᓕᓕᒫᓪᓗ ᓂᕿᖃᕐᐳᑦ. 13 “ᑕᑯᑎᑦᔪᑎᒥᒃ ᑕᐅᑐᒃᑎᓪᓗᖓ ᓯᓂᒃᕕᓐᓂ ᓯᓂᒃᓗᖓ, ᑕᑯᓕᕆᕗᖓ ᐂᖏᓕᒥᒃ ᐃᑦᔪᕐᓁᑦᑐᒥᒃ ᖃᐅᔨᓴᕐᑎᒥᒃ ᕿᓚᖕᒥᑦ ᑎᓕᔭᐅᔪᒥᒃ. 14 ᑖᓐᓇ ᓂᓪᓕᐊᕗᖅ ᓂᐱᖅᑯᕐᑐᓪᓗᓂ: ‘ᑭᐱᓕᕐᓯᐅᒃ ᓇᐹᕐᑐᖅ, ᐊᕙᓚᖓᔪᖏᑦ ᓇᑲᑎᕐᓗᒋᑦ, ᐅᖃᐅᔭᖏᓪᓗ ᐲᔭᕐᓗᒋᑦ, ᐸᐅᕐᖓᖏᓪᓗ ᓇᒧᑐᐃᓐᓇᖅ ᓯᐊᒻᒪᒃᑎᓪᓗᒋᑦ, ᐆᒪᔪᑦ ᐊᑖᓂᑦ ᕿᒫᓕᕐᓕᑦ, ᑎᖕᒥᐊᓪᓗ ᐊᕙᓚᖓᔪᖏᓐᓂᑦ ᑎᖏᓕᑦ. 15 ᓇᐹᕐᑑᓪᓕ ᑭᐱᔭᐅᓂᖓᑕ ᐊᒥᐊᒃᑯᐊ, ᐊᒫᖏᓪᓗ, ᐊᑦᑐᖏᕐᑕᐅᓕᕐᓕᑦ ᓄᓇᒧᑦ ᓴᕕᕋᔭᖕᒧᑦ ᖃᖁᕐᓕᖕᒧᓪᓗ, ᓄᓇᒦᖏᓐᓇᓕᕐᓕ ᐃᕕᒃᓱᒃᑲᓂ ᑐᖑᔪᕐᑐᓂ, ᖃᐅᓯᕐᑎᑕᐅᓕᕐᓕ ᐂᔪᖓᓂᕐᒧᑦ ᕿᓚᖕᒥᑦ ᐱᔪᒧᑦ, ᐃᓅᖃᑎᖃᓕᕐᓕ ᐆᒪᔪᓂᒃ ᓇᑎᕐᓇᒥᐅᑕᕐᓂᒃ. 16 ᐃᓱᒪᖓ ᐊᓯᑦᔨᓕᕐᓕ ᐃᓅᑉ ᐃᓱᒪᑦᔪᓯᖓᓂᑦ, ᐆᒪᔪᐃᑦ ᐃᓱᒪᑦᔪᓯᖓᓂᒃ ᐃᓱᒪᖃᓕᕐᓕ, ᓇᓪᓕᐅᓐᓃᑦ 7 ᐊᓂᒍᕐᓗᒋᑦ. 17 ᐃᓱᒪᒃᓴᕐᓯᐅᕐᓂᖅ ᑕᒪᓐᓇ ᐅᖃᐅᓯᐅᕗᖅ ᐂᖏᓕᓄᑦ ᖃᐅᔨᓴᕐᑎᓄᑦ, ᐃᑦᔪᕐᓁᑦᑐᓪᓗ ᑖᒃᑯᐊ ᑕᒪᑐᒥᖓ ᓇᓗᓁᕐᓯᕗᑦ, ᐃᓅᔪᑦ ᑐᑭᓯᓕᖁᓪᓗᒋᑦ ᖁᑦᓯᖕᓂᕐᐹᖅ ᐊᐅᓚᑦᓯᖕᒪᑦ ᐃᓄᐃᑦ ᐊᖓᔪᖅᑲᐅᕕᖏᓐᓂᒃ, ᐊᖓᔪᖅᑳᕐᔪᐊᖑᖁᔭᖏᓪᓗ ᐃᓱᒪᒥᓂᒃ ᐊᖓᔪᖅᑳᕐᔪᐊᖑᑎᑉᐸᒃᐰᑦ, ᐊᖓᔪᖅᑳᕐᔪᐊᖑᑎᓪᓗᒋᓗ ᒥᑭᓐᓂᕐᐹᓄᑦ ᓄᓇᒦᑦᑐᓄᑦ.’ 18 “ᑍᒫᒃ ᑕᕝᕙ ᐅᕙᖓ, ᐊᖓᔪᖅᑳᕐᔪᐊᖅ ᓂᐱᑯᓁᓴ, ᓯᓐᓇᑑᒪᓚᐅᕐᐳᖓ, ᑍᒪᓕ ᐃᕝᕕᑦ ᐱᐊᓪᓴᔮᕆ, ᐅᖃᐅᑎᓚᐅᓐᖓ ᑕᒪᓐᓇ ᖃᓄᖅ ᑐᑭᖃᕐᒪᖔᑦ, ᓯᓚᑐᔪᑦ ᐊᖓᔪᖅᑲᐅᕕᓐᓃᑦᑐᑦ ᓇᓪᓕᐊᑦᑕᓘᓐᓃᑦ ᑐᑭᖓᓂᒃ ᐅᖃᐅᑎᔪᓐᓇᖏᒻᒪᖓ, ᐃᕝᕕᓪᓕ ᐊᔪᖏᓐᓇᕕᑦ, ᒎᑏᑦ ᐃᑦᔪᕐᓁᑦᑐᑦ ᐊᓂᕐᓂᖏᑕ ᓇᔪᕐᒪᑎᑦ.” ᑖᓂᐊᓕᐅᑉ ᓇᓗᓁᕐᓯᓂᖓ ᓯᓐᓇᒃᑐᒥᒃ 19 ᑕᕝᕙ ᑖᓂᐊᓕ ᐱᐊᓪᓴᔮᕆᒥᒃ ᑍᔭᐅᔪᖅ, ᐊᑯᓂ ᑕᑕᒥᓐᓂᐊᓚᐅᕐᐳᖅ ᐃᓱᒪᖓᑕᓗ ᑲᑉᐱᐊᓱᒃᑎᓚᐅᕐᐹ, ᑍᒤᒻᒪᑦ ᐊᖓᔪᖅᑳᕐᔪᐊᑉ ᐅᖃᐅᑎᕚ, “ᐱᐊᓪᓴᓵᕆ, ᓯᓐᓇᒃᑑᑉ ᑕᒪᑐᒪ ᑐᑭᖓᑕᓘᓐᓃᑦ ᐃᓱᒪᔮᕐᑎᑦᑍᓕᓕᑎᑦ.” ᐱᐊᓪᓴᓵᕆᐅᑉ ᑭᐅᕚ, “ᐊᖓᔪᖅᑳᒃ, ᑕᒪᓐᓇ ᓯᓐᓇᒃᑐᖅ ᐃᕝᕕᑦ ᐊᑭᕋᖏᓐᓄᑦ ᑐᕌᖓᔪᓐᓇᖁᔪᒥᓇᖅ, ᑐᑭᖓᓗ ᐊᑭᕋᕐᑐᕐᑎᖕᓄᑦ ᑐᕌᖓᖁᔪᒥᓇᖅ! 20 ᓇᐹᕐᑐᖅ ᑍᓐᓇ ᑕᑯᓚᐅᕐᑍᑦ, ᐱᕈᓚᐅᕐᑐᖅ ᐊᖏᔪᐊᓘᓕᕐᓗᓂ, ᓴᓐᖏᔪᒻᒪᕆᐅᓕᕐᓗᓂᓗ, ᓄᕗᐊ ᕿᓚᖕᒧ ᑎᑭᓚᐅᕐᑐᖅ, ᓄᓇᕐᔪᐊᕐᒥᓪᓗ ᓇᑭᑐᐃᓐᓇᖅ ᑕᑯᒃᓴᐅᓕᕐᓗᓂ. 21 ᐅᖃᐅᔭᖏᑦ ᑕᑯᒥᓇᑑᓚᐅᕐᑐᑦ, ᐸᐅᕐᖓᖃᕐᓗᓂᓗ ᐊᒥᒐᖏᑦᑐᓂᒃ, ᖃᓄᐃᑦᑐᑐᐃᓐᓇᓄᑦ ᓂᕿᒃᓴᓂᒃ, ᐃᓂᒃᓴᖃᕐᑎᑦᓯᓪᓗᓂᓗ ᑕᕐᕋᓕᓂᕐᒥᓂ ᐆᒪᔪᓂᒃ ᓄᓇᒦᑦᑐᓂᒃ, ᐃᓂᒋᔭᐅᓪᓗᓂᓗ ᑎᖕᒥᐊᓄᑦ ᓱᓇᑐᐃᓐᓇᕐᓄᑦ ᑎᖏᕙᒃᑐᓄᑦ. 22 “ᐃᕝᕕ ᐊᖓᔪᖅᑳᕐᔪᐊᖅ, ᑖᓐᓇᐅᕗᑎ ᓇᐹᕐᑐᖅ! ᐊᖏᔪᕈᕐᓯᒪᕗᑎᑦ ᓴᓐᖏᔫᓪᓗᑎᓪᓗ: ᐱᔪᓐᓇᕐᓃᑦ ᑎᑭᓯᒪᕗᖅ ᕿᓚᖕᒧᑦ, ᐊᖓᔪᖅᑲᐅᕖᓪᓗ ᑎᑭᓯᒪᕗᖅ ᓄᓇᕐᔪᐊᑉ ᐅᖓᓯᖕᓂᕐᐹᖏᓐᓄᑦ. 23 ᐊᖓᔪᖅᑳᕐᔪᐊᖅ, ᑕᑯᓚᐅᕐᐳᑎᓪᓗ, ᑎᓕᔭᐅᓯᒪᔪᒥᒃ, ᐃᑦᔪᕐᓁᑦᑐᒥᒃ, ᕿᓚᖕᒥᑦ ᐱᔪᒥᒃ ᐅᖃᕐᑐᒥᒡᓗ, ‘ᓇᐹᕐᑐᖅ ᑭᐱᔭᐅᓕ ᐊᓯᕈᑕᐅᓗᓂᓗ, ᑭᐱᓂᑯᐊ ᓄᓇᒦᑐᐃᓐᓇᕐᓕ, ᐊᑦᑐᖏᕐᓗᒍᓗ ᓄᓇᒧᑦ ᓴᕕᕋᔭᖕᒧᑦ ᖃᑯᕐᓕᕐᒧᑦ, ᓄᓇᒥ ᐃᕕᒃᓱᒃᑲᓂ ᑐᖑᔪᕐᑐᓂ, ᐊᒫᖏᑦ ᓄᓇᒧᑦ ᑲᐳᑎᓯᒪᑐᐃᓐᓇᕐᓕᑦ, ᖃᐅᓯᕐᑎᑕᐅᓕᕐᓕ ᓯᓚᐅᑉ ᐂᔪᖕᓂᖓᓄᑦ; ᐃᓅᓯᖃᓕᕐᓕ ᐆᒪᔪᑎᑐᑦ, ᓇᓪᓕᐅᓃᑦ 7 ᐊᓂᒍᓚᐅᕐᑎᓐᓇᒋᑦ.’ 24 “ᐊᖓᔪᖅᑳᕐᔪᐊᖅ, ᐃᒫᒃ ᑕᕝᕙ ᑐᑭᖓ, ᖁᑦᓯᖕᓂᕐᐹᖑᔪᖅ ᐱᖁᔨᖕᒪᑦ ᐃᒫᒃ ᐱᓂᐊᕐᓂᕅᓪᓗᓂ, ᓈᓚᒐᓐᓂᒃ ᐊᖓᔪᖅᑳᕐᔪᐊᕐᒥᒃ. 25 ᐃᓄᐃᑦ ᐃᓂᖏᓐᓂᑦ ᐊᐅᓪᓚᕐᑎᑕᐅᔪᒫᕋᕕᑦ ᐃᓅᖃᑎᖃᓕᕐᓗᑎᓪᓗ ᐆᒪᔪᓂᒃ ᓄᔪᐊᕐᑐᓂᒃ, ᓂᕿᖃᕈᒫᕐᐳᑎᓪᓗ ᐃᕕᒃᓱᒐᕐᓂᒃ ᐆᒪᔪᖁᑎᒋᔭᐅᔪᑎᑐᑦ ᖃᐅᓯᕐᑎᑕᐅᕙᒡᓗᑎᓪᓗ ᓯᓚᐅᑉ ᐂᔪᖓᓂᖓᓄᑦ, ᓇᓪᓕᐅᓐᓃᓪᓗ 7 ᐊᓂᒍᕐᐸᑕ, ᖁᑦᓯᖕᓂᐹᖅ ᖃᐅᔨᒍᕕᐅᒃ ᐊᑕᓂᐅᓂᖓᓂᒃ ᐃᓄᓕᒫᑦ ᐊᖓᔪᖅᑲᐅᕕᖏᓐᓄᑦ, ᐊᖓᔪᖅᑲᐅᓂᕐᓗ ᑐᓂᕙᖕᒪᒍ ᓇᓪᓕᐊᓐᓄᑦ ᑐᓂᔪᒪᔭᒥᓄᑦ. 26 ᓇᐹᕐᑑᑉ ᑭᐱᔭᐅᓂᖓᑕ ᐊᒥᐊᒃᑯᐊᑕ ᐊᒫᖏᑕᓗ ᓱᖁᓯᖁᔭᐅᖏᓐᓂᖓ, ᑐᑭᑲᕐᐳᖅ ᐊᖓᔪᖅᑲᐅᕖᑦ ᐃᓕᖕᓄᑦ ᐅᑎᕐᑎᑕᐅᔪᒫᕐᒪᑦ ᖃᐅᔨᒍᕕᑦ ᕿᓚᐅᑉ ᐊᐅᓚᑦᓯᓂᖓᓂᒃ. 27 ᑍᒤᒻᒪᑦ ᐊᖓᔪᖅᑳᕐᔪᐊᖅ, ᐅᖃᐅᓯᕋ ᐃᓚᓕᐅᕈᒃ: ᐊᔪᕐᓂᑎᑦ ᑐᓄᓕᒃᑭᑦ, ᐊᑲᐅᔪᒥᒃ ᐱᓇᓱᐊᕐᓗᑎᑦ, ᐱᐅᖏᑦᑐᓕᓂᑎᓪᓗ ᕿᒪᓕᒃᑭᑦ ᐊᔪᕐᓴᕐᑐᑦ ᓂᑲᒋᓗᒋᑦ; ᐊᔪᕐᓴᖏᓐᓃᑦ ᑲᔪᓰᓐᓇᖁᓪᓗᒍ.” 28 ᑕᒪᒃᑯᐊᓕᒫᑦ ᐊᑐᓚᐅᕐᐳᑦ ᐊᖓᔪᖅᑳᕐᔪᐊᕐᒧᑦ ᓂᐱᑯᓁᓴᒧᑦ. 29 ᑕᖅᑮᑦ 12ᐃᑦ ᑭᖑᓂᖓᒍᑦ, ᐊᖓᔪᖅᑳᕐᔪᐊᖅ ᐱᓱᒃᓗᓂ ᐹᐱᓘᓂᐅᑉ ᐊᖓᔪᖅᑳᕐᔪᐊᒃᑯᕕᖓᓂᒃ ᕿᒥᕐᕈᓚᐅᕐᐳᖅ. 30 ᑕᕝᕙ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᐹᐱᓘᓂ ᐊᖏᔪᐊᓘᓐᖏᓛᖅ? ᐊᖓᔪᖅᑳᕐᔪᐊᒧᑦ ᐃᓂᓕᐊᕆᓚᐅᓐᖏᓚᕌ? ᐱᔪᓐᓇᕐᓂᓐᓄᑦ ᐊᖓᔪᖅᑳᕐᔪᐊᖑᓂᕐᒪᓗ ᐅᐱᒋᔭᐅᑦᔪᑎᒃᓴᖓᓄᑦ?” 31 ᓱᓕ ᑍᒫᒃ ᐅᖃᓪᓚᒃᑎᓪᓗᒍ, ᓂᐱ ᕿᓚᖕᒥᑦ ᐅᖃᕐᐳᖅ, “ᐊᖓᔪᖅᑳᕐᔪᐊᖅ ᓂᐱᑯᓁᓴ, ᐃᓕᖕᓄᑦ ᐃᒫᒃ ᐅᖃᕐᐳᖓ, ᐊᖓᔪᖅᑳᕐᔪᐊᖑᓂᕕᑦ ᐱᔪᓐᓇᕐᓂᖓ ᐃᓕᖕᓂᑦ ᐲᕐᐸᕋ! 32 ᐃᓄᐃᑦ ᐃᓂᖏᓐᓂᑦ ᐊᐅᓪᓚᕐᑎᑕᐅᓂᐊᕐᐳᑎᑦ, ᐆᒪᔪᓪᓗ ᓄᔪᐊᕐᑐᑦ ᐃᓅᖃᑎᒋᔪᒫᕐᐸᑎᑦ: ᐆᒪᔪᖁᑎᒋᔭᐅᔪᑐᓪᓗ ᐃᕕᒃᓱᒐᕐᓂᒃ ᓂᕿᖃᕐᓂᐊᓕᕐᐳᑎᑦ, ᓇᓪᓕᐅᓐᓃᑦ 7 ᐊᓂᒍᕐᐸᑕ, ᖃᐅᔨᓕᕈᕕᑦ ᑭᓯᐊᓂ ᖁᑦᓯᖕᓂᕐᐹᖅ ᐊᐅᓚᑦᓯᖕᒪᑦ ᐃᓄᐃᑦ ᐊᖓᔪᖅᑲᐅᕕᖏᓐᓂᒃ, ᐊᖓᔪᖅᑲᐅᓃᓪᓗ ᑐᓂᕙᒃᐰᑦ ᑐᓂᔪᒪᔭᒥᓄᑦ.” 33 ᑕᕝᕔᓐᓇᕐᓗ ᓂᐱᑯᓁᓴᒧᑦ ᐅᖃᐅᓯᐅᔪᑦ ᑕᕝᕙᓂ ᓇᓪᓕᐅᑎᕗᑦ. ᐃᓄᐃᑦ ᐃᓂᖏᓐᓂᑦ ᐊᐅᓪᓚᕐᐳᖅ ᐃᕕᒃᓱᒐᓂᒡᓗ ᓂᕿᖃᓕᕐᓗᓂ, ᑎᒥᖓᓗ ᖃᐅᓯᕐᑎᑕᐅᕙᓕᕐᓗᓂ ᓯᓚᐅᑉ ᐂᔪᖓᓂᖓᓄᑦ, ᓄᔭᖏᓪᓗ ᓇᒃᑐᕋᓕᐅᑉ ᒥᖅᑯᖏᑎᑐᑦ ᑍᒤᓕᕐᓗᑎᒃ, ᑯᑭᖏᓪᓗ ᑎᖕᒥᐊᑉ ᑯᑭᖏᑎᑐᑦ ᑍᒤᓕᕐᓗᑎᒃ. ᓂᐱᑯᓁᓴᐅᑉ ᒎᑎᒥᒃ ᓂᕐᑐᐃᓂᖓ 34 “ᐅᓪᓗᐃᑦ ᑍᒃᑯᐊ ᐃᓱᓕᒻᒪᑕ, ᐅᕙᖓ ᓂᐱᑯᓁᓴ, ᕿᓚᖕᒧᑦ ᐋᕐᓗᕐᓗᖓ, ᖃᐅᔨᒪᓂᕋᓗ ᐅᑎᑦᓯᐊᓚᐅᕐᐳᖅ; ᖁᑦᓯᖕᓂᕐᐹᕐᓗ ᓂᕐᑐᕐᓇᕐᓯᑎᓚᐅᕐᐸᕋ, ᓂᕐᑐᓚᐅᕐᐸᕋᓗ ᐅᐱᒋᓚᐅᕐᐸᕋᓗ ᐃᓅᔪᖅ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. “ᑖᑦᓱᒪ ᐊᑕᓂᐅᕕᖓ ᐃᓱᖃᖏᑦᑐᒧᑦ ᐊᑕᓂᐅᕕᐅᖕᒪᑦ, ᐊᖓᔪᖅᑲᐅᓂᖓᓗ ᓱᖁᓯᕐᓂᐊᓐᖏᓚᖅ ᑭᖑᕚᖑᖃᑎᒌᓂᑦ ᑭᖑᕚᖑᖃᑎᒌᓄᑦ. 35 “ᐃᓄᐃᑦ ᓄᓇᕐᔪᐊᒥ ᐃᓂᖃᕐᑐᑦ ᓱᓇᐅᖏᑦᑐᑎᑐᑦ ᑍᒤᒻᒪᑕ, ᐃᓱᒪᒥᓂᒃ ᕿᓚᖕᒥᐅᒐᓴᒃᔪᐃᑦ ᐊᐅᓚᑎᑉᐰᑦ, ᓄᓇᒦᑦᑐᓪᓗ ᐃᓄᐃ ᐃᓱᒪᒥᓂᒃ ᐊᐅᓚᑎᑉᐰᑦ: ᐱᔪᓐᓇᕐᓂᖓ ᓄᖅᑲᕐᑎᑕᐅᔪᓐᓇᓐᖏᓚᖅ, ᐅᖃᐅᑎᔭᐅᔪᓐᓇᕋᓂᓗ, ‘ᓱᖕᒪᑦ ᑍᒤᓕᐅᕐᐲᑦ?’ 36 “ᑍᑦᓱᒪᓂᑦᓮᓐᓇᖅ ᐃᓱᒪᖃᑦᓯᐊᓕᓚᐅᕐᐳᖓ, ᐅᐱᒋᔭᐅᓂᕋᓗ ᐱᐅᒋᔭᐅᓂᕋᓗ ᐅᑎᓚᐅᕆᕗᑦ ᐊᑕᓂᐅᕕᒐ ᖁᕕᐊᒋᔭᐅᒃᑲᓐᓂᓕᕐᓗᓂ; ᐃᓱᒪᓕᐅᕐᑎᒃᑲ ᐊᖓᔪᖅᑳᖁᑎᒃᑲᓗ ᐅᑎᖁᔨᓕᓚᐅᕐᐳᑦ ᐅᕙᓐᓂᒃ, ᐃᒃᓯᕙᐅᑕᕐᔪᐊᓐᓄᓪᓗ ᐅᑎᕐᑎᑕᐅᓪᓗᖓ ᐊᔪᖏᓐᓂᕐᓴᒃᑲᓐᓂᐅᓕᓚᐅᕐᐳᖓ ᓯᕗᓪᓕᕐᒥᑦ. 37 “ᒫᓐᓇᓕ ᐅᕙᖓ, ᓂᐱᑯᓁᓴ, ᕿᓚᖕᒥᐅᑦ ᐊᖓᔪᖅᑳᕐᔪᐊᖓᑦ ᓂᕐᑐᕐᐸᕋ ᐊᖏᔪᕈᕐᑎᓪᓗᒍᓗ, ᖃᓄᐃᓕᐅᕐᓂᖏᑦ ᐊᑲᐅᔪᐃᓐᓇᐅᖕᒪᑕ, ᐱᓂᐊᕐᓂᓕᒫᖏᓪᓗ ᐊᑦᔨᒌᒃᑎᑦᓯᓪᓗᑎᒃ, ᐱᔪᓐᓇᕋᓱᒋᓂᕐᒥᓗ ᐃᓅᔪᑦ ᒥᑭᒃᓕᑎᕈᓐᓇᕐᐰᑦ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society