ᑖᓂᐊᓕᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᓂᐱᑯᓁᓴᐅᑉ ᑐᒃᓯᐊᖁᔨᓂᖓ ᐃᓄᓕᒫᓂᒃ ᐃᓄᖑᐊᒧᑦ ᒎᓗᒧᑦ

¹ ᐊᖓᔪᖅᑳᕐᔪᐊᖅ ᓂᐱᑯᓁᓴ ᓴᓇᑎᑦᓯᕗᖅ ᐃᓄᓐᖑᐊᒥᒃ ᒎᓗᒥᒃ, 90ᓂᒃ ᐃᑎᒐᖕᓂᒃ ᐳᕐᑐᑎᒋᔪᒥᒃ ᐃᑎᒐᖕᓂᒡᓗ 9ᓂᒃ ᓴᓂᒧᑐᑎᒋᔪᒥᒃ, ᐃᓕᓪᓗᒍᓗ ᓇᑎᕐᓇᒧᑦ ᑑᕋᒥᒃ ᐊᑎᓕᖕᒧᑦ, ᐹᐱᓘᓂᐅᑉ ᐃᓚᖓᓄᑦ.

² ᐊᖓᔪᖅᑳᕐᔪᐊᕐᓗ ᓂᐱᑯᓁᓴ ᕾᖁᔨᕗᖅ ᕿᑐᕐᖓᒥᓂᒃ ᑐᖓᓕᓕᒫᒥᓂᒃ, ᓄᓇᒥ ᐊᐅᓚᑦᓯᔨᓂᒃ, ᐅᓇᑕᕐᑐᒃᓮᑦ ᐊᖓᔪᖅᑳᖏᓐᓂᒃ, ᐃᖅᑲᕐᑐᐃᔨᓂᒃ, ᑮᓇᐅᔭᓕᕆᔨᓂᒃ, ᐃᓄᓕᕆᔨᓂᒃ, ᐳᓖᓯᓂᒃ, ᐹᐱᓘᓂᐅᓪᓗ ᐊᕕᒃᑐᕐᓯᒪᓂᖏᓐᓄᑦ ᐊᖓᔪᖅᑳᓂᒃ, ᑖᒃᑯᐊ ᐃᓚᐅᖁᓪᓗᒋᑦ ᐃᓄᓐᖑᐊᑉ ᓴᓇᔭᐅᑎᓯᒪᔭᒥ ᓴᖅᑭᑕᐅᓂᖓᓂ.

³ ᑕᕝᕙ ᐊᖓᔪᖅᑳᕐᔪᐊᑉ ᑐᖓᓕᖏᑦ, ᓄᓇᒥᓗ ᐊᐅᓚᑦᓯᔩᑦ, ᐅᓇᑕᕐᑐᒃᓮᓪᓗ ᐊᖓᔪᖅᑳᖏᑦ, ᐃᖅᑲᕐᑐᐃᔩᓪᓗ, ᑮᓇᐅᔭᓕᕆᔩᓪᓗ, ᐃᓄᓕᕆᔩᓪᓗ, ᐳᓖᓰᓪᓗ, ᐹᐱᓘᓂᐅᓪᓗ ᐊᕕᒃᑐᕐᓯᒪᓂᖏᑕ ᐊᐅᓚᑦᓯᔨᖏᑦ, ᑲᑎᕗᑦ ᐊᖓᔪᖅᑳᕐᔪᐊᑉ ᓂᐱᑯᓁᓴᐅᑉ ᐃᓄᓐᖑᐊᓕᐊᖓᑕ, ᓵᖓᓂ ᓇᖏᕐᓗᑎᒃ.

⁴ ᑐᓴᕐᑎᑦᓯᔨᓗ ᓂᐱᖅᑯᕐᑐᓪᓗᓂ ᓂᓪᓕᐊᕗᖅ, “ᐃᒫᒃ ᐱᖁᔭᐅᕗᓯ, ᐃᓕᑦᓯ ᐃᓅᔪᓯ, ᓇᑭᑐᐃᓐᓇᕐᓗ ᐱᓯᒪᔪᓯ, ᐅᖃᐅᓯᖃᑎᒌᖏᑦᑐᓯᓗ:

⁵ ᑐᓴᑐᐊᕈᑦᓯ ᑎᑦᑐᓚᐅᑏᑦ ᐊᑦᔨᒌᖏᑦᑐᑦ, ᓱᐴᒊᓪᓗ ᐊᑦᔨᒌᖏᑦᑐᑦ ᓄᖃᕐᓯᕋᓖᓪᓗ, ᑐᓴᕐᓂᕋᐅᑏᓪᓗ ᓱᓇᑐᐃᓐᓁᑦ ᓂᓪᓕᕐᐸᑕ, ᐹᒻᒪᒃᑎᕐᑐᒃᓴᐅᕗᓯ ᑐᒃᓯᐊᕐᓗᓯᓗ ᐊᖓᔪᖅᑳᕐᔪᐊᑉ ᓂᐱᑯᓁᓴᐅᑉ ᓴᓇᔭᐅᑎᓯᒪᔭᖓᑕ ᐃᓄᓐᖑᐊᑉ ᒎᓘᑉ ᓵᖓᓂ.

⁶ ᓇᓪᓕᐊᑦ ᐹᒻᒪᒃᑎᖏᑦᑐᖅ ᑐᒃᓯᐊᕐᓇᓂᓗ, ᑕᕝᕔᓐᓇᖅ ᐃᒋᑕᐅᓂᐊᕐᐳᖅ ᐃᑯᒪᒧᑦ ᐃᑯᐊᓚᔪᒧᑦ.”

⁷ ᑍᒤᒻᒪᑦ ᑖᒃᑯᐊ ᑐᓴᑐᐊᕋᒥᒃ ᑎᑦᑐᓚᐅᑏᑦ ᐊᑦᔨᒌᖏᑦᑐᑦ, ᓱᐴᒊᓪᓗ ᐊᑦᔨᒌᖏᑦᑐᑦ, ᓄᖃᕐᓯᕋᓖᓪᓗ, ᑐᓴᕐᓂᕋᐅᑏᓪᓗ ᓱᓇᑐᐃᓐᓁᑦ, ᓂᓪᓕᕐᑎᑕᐅᖕᒪᑕ, ᐃᓄᐃᑦ ᓇᑭᑐᐃᓐᓇᖅ ᐱᓯᒪᔪᑦ, ᐅᖃᐅᓯᖃᑎᒌᖏᑦᑐᑦ, ᐹᒻᒪᒃᑎᕐᐳᑦ ᑐᒃᓯᐊᕐᓗᑎᒡᓗ ᐃᓄᓐᖑᐊᒧᑦ ᒎᓗᒧᑦ ᐊᖓᔪᖅᑳᕐᔪᐊᑉ ᓂᐱᑯᓁᓴᐅᑉ ᓴᓇᔭᐅᑎᓯᒪᔭᖓᓄᑦ.

ᑖᓂᐊᓕᐅᑉ ᐱᖃᓐᓇᕆᔭᖏᑕ ᐱᖓᓱᑦ ᓈᓚᖏᓐᓂᕋᕐᑕᐅᓂᖓᑦ

⁸ ᑍᑦᓱᒪᓂ ᑲᐅᓪᑎᐊᒥᐅᑦ ᓯᓚᑐᔪᖁᑎᖏᑕ ᐃᓚᖏᑦ ᕾᕗᑦ, ᔫᑎᓂᒡᓗ ᐊᑭᕋᕐᑐᕐᓗᑎᒃ.

⁹ ᐊᖓᔪᖅᑳᕐᔪᐊᒧᓪᓗ ᓂᐱᑯᓁᓴᒧᑦ ᐅᖃᕐᐳᑦ, “ᐊᖓᔪᖅᑳᕐᔪᐊᖅ, ᐃᓅᒋᑦ ᐃᓱᖃᖏᑦᑐᒧᑦ!

¹⁰ ᐃᕝᕕᑦ ᐊᖓᔪᖅᑳᕐᔪᐊᖅ ᒪᓕᒋᐊᓕᖕᒥᒃ ᓴᖅᑭᑎᑦᓯᓯᒪᒐᕕᑦ, ᓂᓪᓕᕐᐸᑕ ᑎᑦᑐᓚᐅᑏᑦ ᐊᑦᔨᒌᖏᑦᑐᑦ, ᓱᐴᒊᓪᓗ ᐊᑦᔨᒌᖏᑦᑐᑦ, ᓄᖃᕐᓯᕋᓖᓪᓗ ᐊᑦᔨᒌᖏᑦᑐᑦ ᑐᓴᕐᓂᕋᐅᑏᓪᓗ ᓱᓇᑐᐃᓐᓁᑦ, ᑐᓴᕐᑐᓕᒫᑦ ᐹᒻᒪᒃᑎᖁᓪᓗᒋᑦ ᑐᒃᓯᐊᕐᓗᑎᒡᓗ ᐃᓄᓐᖑᐊᑉ ᒎᓘᑉ ᓵᖓᓂ.

¹¹ ᓇᓪᓕᐊᓪᓗ ᐹᒻᒪᒃᑎᖏᑦᑐᖅ ᑐᒃᓯᐊᖏᓪᓗᓂᓗ, ᐃᒋᑕᐅᖁᓪᓗᒍ ᐃᒐᐅᑉ ᐃᓗᐊᓄᑦ ᐃᑯᐊᓚᔪᒧᑦ.

¹² ᑕᕝᕙᓃᑦᑐᖃᕐᒪᑦ ᔫᑎᓂᒃ, ᐹᐱᓘᓂᐅᑉ ᐊᕕᒃᑐᕐᓯᒪᓂᖏᓐᓄᑦ ᐊᖓᔪᖅᑲᐅᑎᑕᕐᓂᒃ; ᓵᑐᕌᑭ, ᒥᓵᑭ, ᐊᐱᓐᑎᒎᓗ; ᐊᖓᔪᖅᑳᕐᔪᐊᖅ ᐃᓕᖕᓂᒃ ᑖᒃᑯᐊ ᓈᓚᓐᖏᓚᑦ, ᐃᕝᕕᓪᓗ ᒎᑎᖏᓐᓂᒃ ᐱᔨᑦᓯᕈᒪᓇᑎᒃ, ᑐᒃᓯᐊᕐᕕᖃᕈᒪᖏᒻᒪᑕ ᐃᓄᓐᖑᐊᒥᒃ ᓴᓇᔭᐅᑎᓚᐅᕐᑕᕐᓂᒃ.”

¹³ ᓂᐱᑯᓁᓴ ᓂᓐᖓᒃᑐᐊᓘᒐᒥ, ᓵᑐᕌᑭ, ᒥᓵᑭᓗ, ᐊᐱᓐᑎᒎᓗ, ᕾᑕᐅᖁᕔᑦ. ᑖᒃᑯᐊᓗ ᐊᖓᔪᖅᑳᕐᔪᐊᑉ ᓵᖓᓄᑦ ᐱᑎᑕᐅᕗᑦ.

¹⁴ ᓂᐱᑯᓁᓴᐅᓪᓗ ᐅᖃᐅᑎᕔᑦ, “ᓵᑐᕌᑭ, ᒥᓵᑭ, ᐊᐱᓐᑎᒎ, ᓱᓕᕚ? ᒎᑎᒃᑲᒎᖅ ᐱᔨᑦᓯᕈᒪᖏᓐᓇᑦᓯᐅᒃ, ᐃᓄᓐᖑᐊᕐᓗ ᒎᓗ ᓴᓇᔭᐅᑎᓚᐅᕐᑕᕋ ᑐᒃᓯᐊᕐᕕᒋᔪᒪᖏᓐᓇᑦᓯᐅᒃ?

¹⁵ ᑎᑦᑐᓚᐅᑏᑦ ᐊᑦᔨᒌᖏᑦᑐᑦ, ᓱᐴᒊᓪᓗ ᐊᑦᔨᒌᖏᑦᑐᑦ, ᓄᖃᕐᑎᓖᓪᓗ ᐊᑦᔨᒌᖏᑦᑐᑦ, ᑐᓴᕐᓂᕋᐅᑏᓪᓗ ᓱᓇᑐᐃᓐᓁᑦ, ᓂᓪᓕᕐᑎᑕᐅᔪᑦ ᑐᓴᕈᑦᓯᐅᒃ, ᐹᒻᒪᒃᑎᕐᓂᐊᕈᑦᓯ ᑐᒃᓯᐊᕐᓗᓯᓗ ᐃᓄᓐᖑᐊᒧᑦ ᓴᓇᔭᐅᑎᓚᐅᕐᑕᓐᓄᑦ ᑍᒫᒃ ᓈᒻᒪᒃᐳᖅ: ᑖᑦᓱᒧᖓᓕ ᑐᒃᓯᐊᕐᓂᐊᖏᒍᑦᓯ, ᐃᒋᑕᐅᓂᐊᕐᐳᓯ ᐃᒐᐅᑉ ᐃᑯᐊᓚᔫᑉ ᐃᓗᐊᓄᑦ. ᑭᓇᐅᓪᓗ ᒎᑎᐅᑉ ᓴᐳᑎᔪᓐᓇᕐᐹᓯ ᐊᒡᒐᓐᓂᑦ?”

¹⁶ ᑕᕝᕙ ᓵᑐᕌᑭ, ᒥᓵᑭᓗ, ᐊᐱᓐᑎᒎᓗ ᐊᖓᔪᖅᑳᕐᔪᐊᕐᒧᑦ ᑭᐅᕗᑦ, “ᓂᐱᑯᓁᓵ, ᐅᕙᑦᑎᓐᓂᒃ ᓵᖕᓂ ᓇᖕᒥᓂᑦᑎᓐᓂᒃ ᓴᐳᑎᓇᓱᐊᕆᐊᖃᓐᖏᓚᒍᑦ.

¹⁷ ᐃᒐᐅᑉ ᐃᑯᒪᔫᑉ ᐃᓗᐊᓄᑦ ᐃᒋᑕᐅᒍᑦᑕ, ᒎᑎᐅᑉ ᐱᔨᑦᓯᕐᑕᑦᑕ, ᓴᐳᑎᓂᐊᕐᐹᑎᒍᑦ ᑕᕝᕙᓐᖓᑦ, ᐃᕝᕕᓪᓗ ᐊᖓᔪᖅᑳᕐᔪᐊᖅ ᐱᔪᓐᓇᕐᓂᕐᓂᑦ ᓴᐳᑎᓂᐊᕆᕚᑎᒍᑦ.

¹⁸ ᓴᐳᑎᖏᒃᑲᓗᐊᕐᐸᑎᒍᑦ, ᐊᖓᔪᖅᑳᕐᔪᐊᖅ, ᖃᐅᔨᒪᖁᕙᑦᑎᒋᑦ, ᒎᑎᑎᑦ ᐱᔨᑦᓯᕈᒪᖏᓐᓇᑦᑎᒍ, ᐃᓄᓐᖑᐊᕐᓗ ᒎᓗ ᓴᓇᔭᐅᑎᓚᐅᕐᑍᑦ ᑐᒃᓯᐊᕐᕕᒋᔪᒪᓐᖏᓚᕗᑦ.”

ᑖᓂᐊᓕᐅᑉ ᐱᖃᓐᓇᕆᔭᖏᑕ ᐱᖓᓱᑦ ᑐᖁᑕᒃᓴᓐᖑᕐᑎᑕᐅᓂᖏᑦ

¹⁹ ᓂᐱᑯᓁᓴᓕ ᓂᓐᖓᒃᑐᒻᒪᕆᐊᓘᒐᒥ, ᓵᑐᕌᑭᒧᑦ, ᒥᓵᑭᒧᓪᓗ, ᐊᐱᓐᑎᒎᒧᓪᓗ, ᑮᓇᖓ ᐊᓯᑦᔨᕐᐳᖅ ᑖᒃᑯᓄᖓ: ᐱᖁᔨᕗᖅ ᐃᒐᐅᑉ ᐃᑯᒪᖓ ᐃᑯᐊᓪᓚᒃᑎᑕᐅᖁᓪᓗᒍ ᐆᓇᕐᓂᕆᕙᒃᑕᖓᓂᑦ 7ᐃᕐᑑᑎᓪᓗᐊᖓᓂᒃ ᐆᓇᕐᓂᕐᓴᐅᓕᖁᓪᓗᒍ.

²⁰ ᐱᖁᔨᓪᓗᓂᓗ ᐅᓇᑕᕐᑐᒃᓴᖁᑎᒥ ᓴᓐᖏᓂᕐᐹᖏᓐᓂᒃ ᐊᑦᑐᖏᕐᓱᐃᖁᓪᓗᒋ ᓵᑐᕌᑭᒥᒃ ᒥᓵᑭᒥᒃ, ᐊᐱᓐᑎᒎᒥᒡᓗ, ᐃᒋᓪᓗᒋᓗ ᐃᒐᒧᑦ ᐃᑯᐊᓚᔪᐊᓗᖕᒧᑦ.

²¹ ᑖᒃᑯᐊ ᐊᖑᑎᑦ ᐊᓐᓄᕌᕐᓯᒪᓪᓗᑎᒃ, ᖃᕐᓕᒃᓯᒪᓪᓗᑎᒡᓗ, ᓇᓴᕐᓯᒪᓪᓗᑎᒡᓗ, ᐊᓯᖏᓐᓂᒡᓗ ᐊᑐᕐᓗᑎᒃ ᕿᓚᒃᓱᕐᑕᐅᕗᑦ, ᐃᒋᑕᐅᓪᓗᑎᒡᓗ ᐃᒐᒧᑦ ᐃᑯᐊᓚᔪᕐᔪᐊᒧᑦ.

²² ᐊᖓᔪᖅᑳᕐᔪᐊᑉ ᑕᕝᕙᑲᐅᑎᒋ ᐱᖁᔨᓪᓚᕆᖕᓂᖓᓄᑦ ᐃᒐᐅᓪᓗ ᐆᓇᓗᐊᓕᕐᓂᖓᓄᑦ, ᐅᓇᑕᕐᑐᒃᓮᑦ ᑕᕝᕗᖓᐅᑦᔨᔪᑦ ᓵᑐᕌᑭᒥᒃ ᒥᓵᑭᒥᒡᓗ ᐊᐱᓐᑎᒎᒥᒡᓗ, ᐃᑯᒪᐅᑉ ᐊᓂᓪᓚᖃᑦᑕᕐᓂᖓᓄᑦ ᐆᓪᓗᑎᒃ ᑐᖁᕗᑦ.

²³ ᐊᖑᑎᓪᓕ ᑖᒃᑯᐊ ᐱᖓᓱᑦ ᓵᑐᕌᑭ, ᒥᓵᑭᓗ, ᐊᐱᓐᑎᒎᓗ ᐊᑦᑐᖏᕐᓱᕐᓯᒪᓪᓗᑎᒃ ᑲᑕᒃᐳᑦ ᐃᑯᒪᔪᕐᔪᐊᑉ ᕿᑎᖓᓄᑦ.

²⁴ ᑕᕝᕙ ᐊᖓᔪᖅᑳᕐᔪᐊᖅ ᓂᐱᑯᓁᓴ ᑐᐊᕕᕐᓗᓂ ᓂᑯᕕᑉᐳᖅ, ᑕᑕᒥᓯᒪᓪᓗᓂᓗ ᐃᑲᔪᕐᑎᒥᓄᑦ ᐅᖃᕐᐳᖅ, “ᐃᑯᒪᒧᑦ ᐃᒋᑦᓯᖅᑲᐅᓐᖏᓚᒎᑦ? ᐊᑦᑐᖏᕐᓱᕐᓯᒪᔪᓂᒃ ᐊᖑᑎᓂᒃ ᐱᖓᓱᓂᒃ?” ᑖᒃᑯᐊ ᑭᐅᕗᑦ, “ᐊᖓᔪᖅᑳᕐᔪᐊᖅ, ᑍᒫᒃ ᐱᖅᑲᐅᕗᒍᑦ.”

²⁵ ᐊᖓᔪᖅᑳᕐᔪᐊᖅ ᐅᖃᕐᐳᖅ, “ᑕᑯᒋᑦ! ᑕᑯᕗᖓ ᐊᖑᑎᓂᒃ ᓯᑕᒪᓂᒃ, ᐃᑯᒪᐅᑉ ᐃᓗᐊᓂ ᐱᓱᑲᑕᒃᑐᓂᒃ ᖃᓄᐃᖏᑦᑐᓂᒃ; ᓯᑕᒪᖓᓪᓗ ᒎᑎᑦ ᐃᕐᓂᖓᑐᑦ ᑕᐅᑦᑐᖃᕐᐳᖅ.”

ᐊᖑᑎᑦ ᐱᖓᓱᑦ ᐃᑯᒪᒥᑦ ᐊᓂᑎᑕᐅᓂᖏᑦ ᐊᖓᔪᖅᑳᓐᖑᕐᑎᑕᐅᓂᖏᓪᓗ

²⁶ ᓂᐱᑯᓁᓴᓕ ᐃᒐᐅᑉ ᐃᑯᐊᓚᔫᑉ ᐹᖓ ᖃᒡᓕᓪᓗᓂᐅᒃ ᕾᒐᓛᕐᐳᖅ ᐅᖃᕐᓗᓂ, “ᓵᑐᕌᑭ, ᒥᓵᑭ, ᐊᐱᓐᑎᒎ, ᒎᑎᐅᑉ ᖁᑦᓯᖕᓂᕐᐹᑉ ᐱᔨᖏᑦ, ᐊᓂᓕᕆᑦᓯ! ᕾᓗᓯᓗ!” ᑕᕝᕙ ᓵᑐᕌᑭ ᒥᓵᑭ ᐊᐱᓐᑎᒎᓗ ᐃᑯᒪᒥᑦ ᐊᓂᕗᑦ.

²⁷ ᐊᖓᔪᖅᑳᕐᔪᐊᑉ ᑐᖓᓕᖏᑦ, ᓄᓇᒥᓗ ᐊᐅᓚᑦᓯᔩᑦ, ᐊᖓᔪᖅᑳᕐᔪᐊᓪᓗ ᐃᑲᔪᕐᑎᖏᑦ ᑲᑎᒪᔪᑦ ᑕᕝᕗᖓ ᑲᑎᕗᑦ ᑖᒃᑯᓄᖓ. ᑕᑯᓪᓗᑎᒃᓗ ᑎᒥᖏᑦ ᐃᑭᓯᒪᖏᒻᒪᑕ, ᓄᔭᖏᓪᓘᓐᓃᑦ ᐃᑭᓯᒪᔪᖃᓐᖏᓚᑦ, ᐊᓐᓄᕌᖏᓪᓗ ᐃᑭᓯᒪᓇᑎᒃ, ᐳᔪᕐᓱᓐᓂᓐᓇᑎᒡᓘᓐᓃᑦ.

²⁸ ᑕᕝᕙ ᓂᐱᑯᓁᓴ ᐅᖃᕐᐳᖅ, “ᓵᑐᕌᑭᐅᑉ ᒥᓵᑭᐅᓪᓗ ᐊᐱᓐᑎᒎᓪᓗ, ᒎᑎᖓᑦ ᓂᕐᑐᕐᑕᐅᓕ, ᐂᖏᓕᖁᑎᓂ ᑎᓕᖕᒪᒍ ᐱᔨᓂᓗ ᓴᐳᑎᓪᓗᒋᑦ, ᑖᑦᓱᒥᖓ ᑕᑎᖃᕐᒪᑕ, ᐊᖓᔪᖅᑳᕐᔪᐊᑉ ᐱᖁᔨᓂᖓ ᐊᑐᕐᓇᒍ ᑎᒥᑎᒃ ᐊᓐᓂᕆᓇᒋᑦ, ᓇᖕᒥᓂᖅ ᒎᑎᑎᒃ ᐱᔨᑦᓯᕈᒪᓪᓗᒍ, ᐊᓯᖏᓐᓂᒃ ᐱᔨᑦᓯᕈᒪᓇᑎᒃ ᑐᒃᓯᐊᕐᕕᖃᕈᒪᓇᑎᒡᓗ.

²⁹ “ᑍᒤᒻᒪᑦ ᐱᖁᔭᓕᐅᓕᕐᐳᖓ ᐃᓄᐃᑦ ᓇᑭᑐᐃᓐᓇᖅ ᐱᓯᒪᔪᑦ ᐅᖃᐅᓯᖃᑎᒌᖏᑦᑐᓪᓗ, ᓇᓪᓕᐊᓐᓂᒃ ᐊᑭᕋᕐᑐᕐᓂᕐᒥᒃ ᐅᖃᕐᑐᖃᕐᐸᑦ, ᓵᑐᕌᑭᐅᑉ ᒥᓵᑭᐅᓪᓗ ᐊᐱᓐᑎᒎᓪᓗ ᒎᑎᖓᓐᓄᑦ, ᑍᒤᓕᐅᕐᑑᑉ ᑎᒥᖓ ᐊᕕᒃᑐᕐᑕᐅᔪᒃᓴᐅᕗᖅ ᐃᒡᓗᖓᓗ ᓯᖁᒥᑕᐅᓗᓂ ᓴᓂᑐᐃᓐᓇᐅᓕᕐᓗᓂ: ᒎᑎᑕᖃᖏᒻᒪᑦ ᐊᓯᐊᓂᒃ ᑍᒫᒃ ᓴᐳᑦᔨᔪᓐᓇᕐᑎᒋᔪᒥᒃ.”

³⁰ ᐊᖓᔪᖅᑳᕐᔪᐊᑉ ᓵᑐᕌᑭ ᒥᓵᑭᓗ, ᐊᐱᓐᑎᒎᓗ ᐊᖓᔪᖅᑳᓐᖑᕐᑎᒃᑲᓐᓂᕐᐰᑦ ᐹᐱᓘᓂᒥ ᓄᓇᒥ.