ᑖᓂᐊᓕᐅᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦᓂᐱᑯᓁᓴᐅᑉ ᓯᓐᓇᒃᑑᒪᖓ 1 ᓂᐱᑯᓁᓴ ᐊᖓᔪᖅᑳᕐᔪᐊᖑᓂᕐᒥ ᐊᕐᕌᒍᖓᑕ ᐂᑉᐸᖓᓂ, ᓯᓐᓇᒃᑑᒪᓚᐅᕐᐳᖅ; ᐃᓱᒪᔮᓕᕐᓗᓂ ᓯᓂᔪᐃᑦᑑᓕᕐᓗᓂᓗ. 2 ᐊᖓᔪᖅᑳᕐᔪᐊᕐᓗ ᕾᖁᔨᕗᖅ ᐊᖓᒃᑯᓂᒃ, ᓇᓚᐅᑦᑍᔨᓂᒡᓗ, ᐱᔪᓐᓇᐅᑎᓕᖕᓂᒡᓗ, ᑳᓪᑎᐊᒥᐅᓪᓗ ᓯᓚᑐᔪᖁᑎᖏᓐᓂᒃ, ᑖᒃᑯᓄᖓ ᐅᖃᐅᑎᔭᐅᔪᒪᓪᓗᓂ ᓱᓇᒥᒃ ᓯᓐᓇᒃᑐᓚᐅᕐᒪᖔᕐᒥ. ᑖᒃᑯᐊᓗ ᕾᒐᒥᒃ ᐊᖓᔪᖅᑳᕐᔪᐊᑉ ᓵᖓᓂ ᓇᖏᕐᐳᑦ. 3 ᐅᖃᐅᑎᕔᓪᓗ, “ᓯᓐᓇᒃᑐᓚᐅᕋᒪ ᐃᓱᒪᔮᕈᑎᒋᔭᓐᓂᒃ, ᑐᑭᓯᔪᒪᕗᖓᓗ ᖃᓄᖅ ᑐᑭᖃᕐᒪᖔᑦ.” 4 ᑳᓪᑎᐊᒥᐅᓪᓗ ᓯᓚᑐᔪᖁᑎᖏᑦ ᐊᖓᔪᖅᑳᕐᔪᐊᒧᑦ ᐊᕋᒥᐊᒃᑎᑐᑦ ᑭᐅᕗᑦ, “ᐊᖓᔪᖅᑳᕐᔪᐊᖅ ᐃᓅᒋᑦ ᐃᓱᖃᖏᑦᑐᒧᑦ! ᐅᖃᐅᑎᓚᐅᕐᑎᒍ ᓯᓐᓇᒃᑐᕐᓂᒃ, ᑕᕝᕙ ᑐᑭᖓᓂᒃ ᐅᖃᐅᑎᓂᐊᕐᐸᑦᑎᒋᑦ.” 5 ᐊᖓᔪᖅᑳᕐᔪᐊᕐᓗ ᓯᓚᑐᔪᓄᑦ ᑭᐅᕗᖅ, “ᐃᒫᒃ ᑕᕝᕙ ᐃᓱᒪᑖᕐᓯᒪᕗᖓ: ᓱᓇᒥᒃ ᓯᓐᓇᑑᒪᓚᐅᕐᒪᖔᕐᒪ ᑐᑭᖓᓂᒡᓗ ᐅᖃᐅᑎᖏᒃᑯᑦᓯᖓ, ᐊᕕᒃᑐᕐᑕᐅᑎᓐᓂᐊᕐᐸᑦᓯ ᒥᑭᔫᑕᐅᓕᕐᓗᓯ, ᐃᒡᓗᓯᓗ ᓯᖁᒥᑕᐅᓗᑎᒃ ᓴᓂᑐᐃᓐᓇᐅᓕᕐᑎᓐᓂᐊᕐᐸᒃᑲ. 6 ᓯᓐᓇᒃᑐᓐᓂᒡᓕ ᐅᖃᐅᑎᒍᑦᓯᓐᖓ ᑐᑭᖓᓂᒡᓗ, ᑕᕝᕙ ᑐᓂᓯᕕᒋᓂᐊᕐᐸᑦᓯ ᑐᓂᕐᕈᑎᓂᒃ ᐊᑭᓕᐅᑎᓂᒡᓗ, ᐅᐱᒋᔭᐅᑎᑦᓱᒪᕙᑦᓯᓗ. ᑍᒤᒻᒪᑦ ᐅᖃᐅᑎᓚᐅᕐᓯᓐᖓ ᓱᓇᒥᒃ ᓯᓐᓇᑑᒪᓚᐅᕐᒪᖔᕐᒪ ᑐᑭᖓᓂᒡᓗ ᐅᖃᐅᑎᓗᖓ.” 7 ᓱᓕ ᑭᐅᒃᑲᓐᓂᕆᕗᑦ, “ᐊᖓᔪᖅᑳᕐᔪᐊᖅ ᐱᔨᑎᑦ ᐅᓂᒃᑲᐅᑎᓚᐅᒃᑭᑦ ᓯᓐᓇᑑᒪᒋᓚᐅᕐᑕᕐᓂᒃ, ᑕᕝᕙ ᐅᖃᐅᑎᓂᐊᕐᐸᑦᑎᒋᑦ ᑐᑭᖓᓂᒃ.” 8 ᐊᖓᔪᖅᑳᕐᔪᐊᑉ ᐅᖃᐅᑎᒃᑲᓐᓂᕐᐰᑦ, “ᖃᐅᔨᕗᖓ ᐱᕕᖃᒃᑲᓐᓂᕋᓱᑐᐃᓐᓇᕋᑦᓯ, ᖃᐅᔨᒪᕗᓯ ᐃᓱᒪᒐ ᐋᖅᑭᒌᕐᓯᒪᖕᒪᑦ ᑍᒫᒃ ᐱᔪᒪᓪᓗᖓ. 9 ᐅᖃᐅᑎᖏᒃᑯᑦᓯᓐᖓ ᓯᓐᓇᒃᑐᓐᓂᒃ, ᓱᒋᐊᕐᑕᐅᑦᔪᑎᒃᓴᓯ ᐃᓕᑦᓯᓐᓄᑦ ᓈᒻᒪᒃᑐᖅ ᐋᖅᑭᒌᕐᓯᒪᕗᖅ. ᐊᖏᖃᑎᒌᒃᓯᒪᒐᑦᓯ ᐅᐃᕕᕆᔪᒪᓪᓗᖓ ᐱᐅᖏᑦᑐᓂᒡᓗ ᓱᓕᖏᑦᑐᓂᒃ ᐅᖃᐅᑎᔪᒪᓪᓗᖓ, ᑲᑉᐱᐊᓇᕐᑐᒦᓐᓂᑦᓯᓐᓂᑦ ᐃᓕᑦᓯᓐᓂᒃ ᓴᐳᑎᔪᒪᓪᓗᓯ. ᒫᓐᓇ ᐅᖃᐅᑎᓚᐅᕐᓯᓐᖓ ᓯᓐᓇᒃᑐᕆᓚᐅᕐᑕᓐᓂᒃ, ᖃᐅᔨᓂᐊᕋᒪ ᑐᑭᖓᓂᒃ ᐅᖃᕈᓐᓇᕐᒪᖔᑦᓯ.” 10 ᓯᓚᑐᔪᓪᓕ ᐊᖓᔪᖅᑳᕐᔪᐊᒥᒃ ᑭᐅᕗᑦ, “ᓄᓇᒥ ᐃᓄᒃᑕᖃᓐᖏᓚᖅ ᐊᖓᔪᖅᑳᕐᔪᐊᑉ ᐱᔪᒪᔭᖓᓂᒃ ᐅᖃᕈᓐᓇᕐᑐᒥᒃ! ᐊᖓᔪᖅᑳᕐᔪᐊᒥᒃ ᐳᕐᑐᓛᖑᓗᓂ ᐊᔪᖏᓐᓂᕐᐹᖑᓗᓂᓗ, ᑍᒫᒃ ᐱᖁᔨᔪᖃᓚᐅᕐᓯᒪᖏᒻᒪᑦ ᐊᖓᒃᑯᓂᒃ ᓇᓚᐅᑦᑍᔨᓂᒡᓗ ᑳᓪᑎᐊᒥᐅᓪᓗ ᓯᓚᑐᔪᖁᑎᖏᓐᓂᒃ. 11 ᐊᖓᔪᖅᑳᕐᔪᐊᑉ ᐱᔪᒪᔭᖓ ᐊᔪᕐᓇᓗᐊᕐᒪᑦ. ᐊᖓᔪᖅᑳᕐᔪᐊᖅ ᑕᒪᑐᒥᖓ ᐅᖃᐅᑎᔭᐅᔪᓐᓇᓐᖏᓚᖅ ᒎᑎᑦ ᑭᓯᒥ ᑍᒤᓕᐅᕈᓐᓇᕐᐳᑦ, ᑍᒃᑯᐊᓗ ᐃᓄᖕᓂ ᐃᓂᖃᕋᑎᒃ.” 12 ᑕᒪᓐᓇ ᐱᑦᔪᑎᒋᓪᓗᒍ, ᐊᖓᔪᖅᑳᕐᔪᐊᖅ ᓂᓐᖓᒃᐳᖅ ᓂᓐᖓᐅᒪᕕᒡᔪᐊᓕᕐᓗᓂ, ᐹᐱᓘᓂᒥᐅᓪᓗ ᓯᓚᑐᔪᖁᑎᓕᒫᖏᑦ ᑐᖁᕋᕐᑕᐅᖁᕔᑦ. 13 ᐊᖓᔪᖅᑳᕐᔪᐊᑉ ᐱᖁᔭᖓ ᑐᓴᐅᒪᔭᐅᓕᕐᐳᖅ ᐊᖓᔪᖅᑲᐅᕕᖓᓂ, ᓯᓚᑐᔪᖁᑎᓕᒫᖏᑦ ᑐᖁᑕᐅᖁᓪᓗᒋᑦ, ᐊᖑᑏᓪᓗ ᑎᓕᔭᐅᕗᑦ ᑖᓂᐊᓕᒥᒃ ᐱᖃᓐᓇᕆᔭᖏᓐᓂᒡᓗ ᕿᓂᖁᓪᓗᒋᑦ ᑐᖁᑦᓯᖁᓪᓗᒋᓪᓗ. ᒎᑎᐅᑉ ᖃᐅᔨᑎᑦᓯᓂᖓ ᑖᓂᐊᓕᒥᒃ ᓯᓐᓇᒃᑑᒪᐅᑉ ᑐᑭᖓᓂᒃ 14 ᐊᕆᐅᑭᓕ ᐊᖓᔪᖅᑳᕐᔪᐊᑉ ᐅᓇᑕᕐᑐᓴᖁᑎᖏᑕ ᐊᖓᔪᖅᑳᖓᑦ, ᑐᖁᕅᔭᕐᑐᕐᑎᓪᓗᒍ ᐹᐱᓘᓂᒥᐅᑦ ᓯᓚᑐᔪᖁᑎᖏᓐᓂᒃ, ᑖᓂᐊᓕᐅᑉ ᐅᖃᖃᑎᒋᕚ, ᓯᓚᑐᓂᕐᒥᓄᑦ ᐅᖃᐅᓯᕐᓄᓪᓗ ᐋᖅᑭᒃᓱᑦᓯᐊᕐᓯᒪᔪᓄᑦ. 15 ᐊᖓᔪᖅᑳᕐᔪᐊᑉ ᐅᓇᑕᕐᑐᓴᖁᑎᖏᑕ ᐊᖓᔪᖅᑳᖓᑦ ᐊᕆᐅᑭ ᐊᐱᕆᕚ, “ᓱᖕᒪᑦ ᑍᒫᕌᓗᒃ ᐱᖁᔨᕚ?” ᐊᕆᐅᑭᓗ ᑖᓂᐊᓕᒧᑦ ᐅᓂᒃᑳᑦᓯᐊᕐᐳᖅ ᑕᒪᑐᒥᖓ. 16 ᑕᕝᕔᓐᓇᖅ ᑖᓂᐊᓕ ᐊᖓᔪᖅᑳᕐᔪᐊᒧᑦ ᐂᕗᖅ ᐱᕕᖃᕐᑎᑕᐅᒃᑲᓐᓂᕈᒪᓪᓗᓂ, ᓯᓐᓇᒃᑑᑉ ᑐᑭᖓᓂᒃ ᓇᓗᓁᕐᓯᔪᓐᓇᕈᒪᓪᓗᓂ ᐊᖓᔪᖅᑳᕐᔪᐊᒧᑦ. 17 ᑖᓂᐊᓕᓗ ᐅᑎᕐᐳᖅ ᐊᖏᕐᕋᒥᓄᑦ, ᐅᓂᒃᑲᐅᓯᕆᓪᓗᒍᓗ ᑕᒪᓐᓇ ᐃᓚᒥᓄᑦ, ᕼᐊᓇᓁᐊᒧᑦ, ᒥᓮᐅᓪᒧᓪᓗ, ᐊᔭᕅᐊᒧᓪᓗ. 18 ᑖᒃᑯᐊ ᒎᑎᒧᑦ ᕿᓚᖕᒦᑦᑐᒧᑦ ᓂᑲᒋᔭᐅᔪᒪᓪᓗᑎᒃ ᑐᒃᓯᐊᖁᕔᑦ ᑕᒪᓐᓇ ᓇᓗᓇᕐᑐᖅ ᐱᑦᔪᑎᒋᓪᓗᒍ; ᑖᓂᐊᓕ ᐃᓚᓐᓇᕆᔭᓂᓗ ᑐᖁᑕᐅᖃᑕᐅᔪᒪᓇᑎᒃ ᐹᐱᓘᓂᒥᐅᑦ ᓯᓚᑐᔪᖁᑎᓕᒫᖏᑦ ᐃᓚᒋᓗᒋᑦ. 19 ᐅᓐᓄᐊᖑᑎᓪᓗᒍ ᓇᓗᓇᕐᑐᖅ ᑕᒪᓐᓇ ᓇᓗᓇᕈᓐᓃᕐᑎᑕᐅᕗᖅ ᑖᓂᐊᓕᒧᑦ ᑕᑯᑎᑕᐅᓂᒃᑯᑦ. ᑖᓂᐊᓕᐅᓪᓗ ᒎᑎ ᕿᓚᖕᒦᑦᑐᖅ ᓂᕐᑐᕐᐹ: 20 ᐅᖃᕐᓗᓂ, “ᒎᑎᐅᑉ ᐊᑎᖓ ᓂᕐᑐᕐᑕᐅᓕ; ᓯᓚᑐᓂᖅ ᐱᔪᓐᓇᕐᓂᕐᓗ ᐱᒋᖕᒪᒋᒃ. 21 ᐊᕐᕌᒍ ᐊᓂᒍᕐᐸᓪᓕᐊᑎᑉᐹ ᓇᓪᓕᐅᓐᓂᖃᕐᑎᓪᓗᒍ; ᐊᖓᔪᖅᑳᕐᔪᐊᑦ ᒪᑭᑎᑉᐰᑦ, ᐊᖓᔪᖅᑳᕐᔪᐊᓪᓗ ᐊᓯᖏᑦ ᐅᕐᕈᑎᓪᓗᒋᑦ. ᓯᓚᑐᓂᕐᒥᒃ ᑐᓂᓯᕗᖅ ᓯᓚᑐᔪᓄᑦ ᖃᐅᔨᒪᓂᕐᒥᒡᓗ ᑐᓂᓯᕗᖅ ᑐᑭᓯᐊᔪᓄᑦ. 22 ᓇᓗᓁᕐᓯᕙᒃᐳᖅ ᐃᑎᔪᓂᒃ ᐃᔨᕐᓯᒪᔪᓂᒡᓗ; ᑖᕐᑐᒦᑦᑐᑦ ᖃᐅᔨᒪᕔᑦ, ᖃᐅᒪᔫᓪᓗ ᐃᓂᒋᕚ. 23 ᖁᔭᒋᕙᒋᑦ ᓂᕐᑐᕐᐸᒋᓪᓗ, ᓯᕗᓕᕕᓂᕐᒪ ᒎᑎᖓ, ᓯᓚᑐᓂᕐᒥᒃ ᐱᔪᓐᓇᕐᓂᕐᒥᒡᓗ ᑐᓂᓯᕕᒋᒐᕕᖓ; ᖃᐅᔨᑎᒃᑲᕕᖓᓗ ᐊᐱᖅᑯᑎᒋᔭᑦᑎᓐᓂᒃ ᐃᓕᖕᓄᑦ, ᐊᖓᔪᖅᑳᕐᔪᐊᑉ ᓯᓐᓇᒃᑐᕕᓂᖓᓂᒃ ᑐᑭᓯᑎᒃᑲᑦᑎᒍᑦ.” ᑖᓂᐊᓕᐅᑉ ᐊᖓᔪᖅᑳᕐᔪᐊᒥᒃ ᓯᓐᓇᒃᑐᖓᓂ ᐅᓂᒃᑲᐅᑦᔨᓂᖓ ᑐᑭᖓᓂᒡᓗ ᓇᓗᓁᕐᓯᓪᓗᓂ 24 ᑖᓂᐊᓕᐅᑉ ᐊᕆᐅᑭ ᐅᐸᒃᐹ, ᐊᖓᔪᖅᑳᕐᔪᐊᑉ ᑎᓕᓚᐅᕐᑕᖓ ᑐᖁᕅᖁᓪᓗᒍ ᐹᐱᓘᓂᒥᐅᑦ ᓯᓚᑐᔪᖁᑎᖏᓐᓂᒃ, ᐅᖃᐅᑎᓪᓗᒍᓗ, “ᐹᐱᓘᓂᒥᐅᑦ ᓯᓚᑐᔪᖁᑎᖏᑦ ᑐᖁᕋᕐᓂᐊᕐᓇᒋᑦ: ᐊᖓᔪᖅᑳᕐᔪᐊᖕᒧᓪᓕ ᐂᑎᓕᓐᖓ, ᐅᖃᐅᑎᓂᐊᕐᐸᕋ ᓯᓐᓇᒃᑐᖓᑕ ᑐᑭᖓᓂᒃ.” 25 ᐊᕆᐅᑭᐅᓪᓗ ᑖᓂᐊᓕ ᑐᐊᕕᕐᓗᓂ ᐊᖓᔪᖅᑳᕐᔪᐊᒧᐊᕈᑎᕚ ᐅᖃᕐᓗᓂᓗ, “ᔫᑕᒥᑦ ᑎᒍᔭᐅᓯᒪᔪᑦ ᐃᓚᖓᓐᓂᒃ ᓇᓂᓯᒐᒪ ᓇᓗᓁᕐᓯᔪᓐᓇᕐᑐᒥᒃ ᐊᖓᔪᖅᑳᕐᔪᐊᑉ ᓯᓐᓇᒃᑐᖓᓂᒃ ᑐᑭᖓᓂᒡᓗ.” 26 ᐊᖓᔪᖅᑳᕐᔪᐊᓪᓗ ᑖᓂᐊᓕ, ᑍᔭᐅᕙᒃᑐᖅ ᐱᐊᓪᓴᔮᕆᒥᒃ ᐊᐱᕆᕚ, “ᖃᐅᔨᑎᑦᓱᓐᓇᕐᐱᖔ ᖃᓄᖅ ᓯᓐᓇᒃᑑᒪᓚᐅᕐᒪᖔᕐᒪ? ᑐᑭᖓᓂᒡᓗ ᐅᖃᐅᑎᓗᖔ?” 27 ᑖᓂᐊᓕᐅᑉ ᐊᖓᔪᖅᑳᕐᔪᐊᖅ ᑭᐅᕚ, “ᐃᔨᕐᓯᒪᔪᖅ ᐊᖓᔪᖅᑳᕐᔪᐊᑉ ᑐᓴᕈᒪᔭᖓ, ᓯᓚᑐᔪᓄᑦ, ᑳᓪᑎᐊᒥᐅᑦ ᓯᓚᑐᔪᖁᑎᖏᓐᓄᓪᓘᓐᓃᑦ, ᐊᖓᒃᑯᓄᓪᓘᓐᓃᑦ, ᓇᓚᐅᑦᑍᔨᓄᓪᓘᓐᓃᑦ ᐅᖃᐅᓯᐅᔪᓐᓇᓐᖏᓚᖅ. 28 ᒎᑎᑕᖃᕐᐳᕐᓕ ᕿᓚᖕᒥ ᓇᓗᓇᕐᑐᓂᒃ ᓴᖅᑭᑎᑦᓯᔪᓐᓇᕐᑐᒥᒃ, ᑖᑦᓱᒪ ᐊᖓᔪᖅᑳᕐᔪᐊᖅ ᓂᐱᑯᓁᓴ ᖃᐅᔨᑎᑉᐹ ᐅᓪᓗᓂ ᐱᔪᒫᕐᑐᓂᒃ ᓱᔪᖃᕈᒫᕐᒪᖔᑦ. ᓯᓐᓇᒃᑐᐃᑦ ᑕᑯᑎᑕᐅᓃᓪᓗ ᐃᓱᒪᒃᑯᑦ ᐃᓕᖕᓅᓚᐅᕐᑐᑦ ᓯᓂᒃᑎᓪᓗᑎᑦ ᐃᒫᒃ ᑐᑭᖃᕐᐳᑦ. 29 “ᐊᖓᔪᖅᑳᕐᔪᐊᖅ ᓯᓂᒃᑎᓪᓗᑎᑦ, ᐃᓱᒤᑦ ᓴᖅᑭᕝᕕᐅᓚᐅᕐᐳᖅ ᓯᕗᓂᕐᒥ ᐱᔪᒫᕐᑐᓂᒃ, ᓇᓗᓇᕐᑐᓂᒃ ᓇᓗᓁᕐᓯᔪᓐᓇᕐᑑᑉ ᑕᑯᑎᓚᐅᕐᐹᑎᑦ ᓱᔪᖃᕈᒫᕐᒪᖔᑦ. 30 ᐅᕙᓐᓄᓪᓕ, ᓇᓗᓇᕐᑐᖅ ᓇᓗᓁᕐᑕᐅᓚᐅᕐᐳᖅ, ᐃᓄᖕᓂᑦ ᐃᓅᔪᓂᑦ ᓯᓚᑐᓂᕐᓴᐅᓂᓐᓅᖏᑦᑐᖅ, ᐃᕝᕕᓪᓕ ᐊᖓᔪᖅᑳᕐᔪᐊᖅ ᑐᑭᖓᓂᒃ ᖃᐅᔨᖁᓪᓗᑎᑦ ᑐᑭᓯᖁᓪᓗᑎᓪᓗ ᐃᓱᒪᒃᑯᑦ ᑕᑯᓚᐅᕐᑕᑎᑦ ᓱᓇᐅᖕᒪᖔᑕ. 31 “ᐊᖓᔪᖅᑳᕐᔪᐊᖅ, ᑕᑯᓚᐅᕐᐳᑎᑦ, ᓵᖕᓂ ᓇᖏᕐᑐᒥᒃ ᐃᓄᓐᖑᐊᒥᒃ ᐊᖏᔪᕐᔪᐊᒥᒃ. ᐱᐅᔪᐊᓗᖕᒥᒃ ᕿᓪᓚᕆᒃᑐᒥᒃ, ᑕᐅᑦᑐᐊᓗ ᑲᑉᐱᐊᓇᕐᑑᓪᓗᓂ. 32 ᓂᐊᖁᐊ ᓴᓇᓯᒪᓚᐅᕐᐳᖅ ᒎᓗᒥᒃ ᐃᓚᖃᖏᑦᑐᒥᒃ, ᓴᒡᕕᖓ ᑕᓕᖏᒡᓗ ᓯᐅᓪᕕᕆᒥᑦ ᓴᓇᓯᒪᕗᑦ, ᓈᖓ ᖁᒃᑐᕋᖏᒡᓗ ᖃᑯᕐᓕᖕᒥᒃ ᓴᓇᓯᒪᕗᒃ, 33 ᓂᐅᖏᒃ ᓴᕕᕋᔭᖕᒥᒃ ᓴᓇᓯᒪᓪᓗᑎᒃ, ᐃᑎᒐᖏᓪᓗ ᓴᕕᕋᔭᐅᓪᓗᑎ ᐃᓚᖓᓗ ᔭᕐᕋᐅᓪᓗᓂ. 34 ᑕᑯᓐᓇᕐᑎᓪᓗᑎᑦ, ᐅᔭᕋᒃᔪᐊᖅ ᐲᕐᑕᐅᕗᖅ ᐃᓅᑉ ᐊᒡᒐᖏᓐᓅᖏᑦᑐᖅ, ᐃᑎᒐᖏᑦ ᓴᕕᕋᔧᑦ ᔭᕐᕋᐅᓪᓗᑎᒡᓗ, ᒥᓗᕐᑕᐅᕗᑦ ᓯᖁᒥᓪᓗᑎᒃ. 35 ᑕᕝᕔᓐᓇᖅ ᓴᕕᕋᔭᒡᓗ, ᔭᕐᕋᕐᓗ, ᖃᑯᕐᓕᓗ, ᓯᐅᓪᕕᕆᓗ, ᒎᓗᐃᓪᓗ, ᐊᑕᐅᑦᓯᒃᑯᑦ ᓯᖁᒥᑉᐳᑦ, ᓂᐊᖂᔭᒃᓴᓕᐅᕐᕕᖕᒥ ᐊᐅᔭᒃᑯᑦ ᓂᐊᖂᔭᒃᓴᓕᐅᕐᓂᑯᑐᑦ ᓴᓂᐅᓕᕐᓗᑎᒃ, ᐊᓄᕆᒧᑦ ᑎᒃᑕᐅᕗᑦ ᐊᒥᐊᒃᑯᓇᑎᒃ. ᐅᔭᕋᒃᔪᐊᕐᓕ ᐃᓄᓐᖑᐊᒥᒃ ᒥᓗᕐᓯᔪᖅ ᖃᖅᑲᕐᔪᐊᖑᓕᕐᐳᖅ ᓄᓇᕐᔪᐊᒥᒃ ᓈᓯᓪᓗᓂ. 36 “ᑍᒫᒃ ᑕᕝᕙ ᓯᓐᓇᒃᑑᒪᓚᐅᕐᐳᑎᑦ, ᒫᓐᓇᓕ ᐊᖓᔪᖅᑳᕐᔪᐊᖅ ᑐᑭᖓᓂᒃ ᐅᖃᐅᑎᔪᒪᓕᕆᕙᑦᑎᒋᑦ. 37 ᐃᕝᕕᑦ ᐊᖓᔪᖅᑳᕐᔪᐊᖅ, ᐊᖓᔪᖅᑳᕐᔪᐊᖑᕗᑎᑦ ᐊᖓᔪᖅᑳᕐᔪᐊᓕᒫᓄᑦ, ᒎᑎᐅᑉ ᕿᓚᖕᒦᑦᑑᑉ ᑐᓂᓯᕕᒋᖕᒪᑎᑦ ᐊᖓᔪᖅᑲᐅᕕᖕᒥᒃ, ᐱᔪᓐᓇᕐᓂᕐᒥᒡᓗ ᐊᔪᖏᓐᓂᕐᒥᒡᓗ ᐅᐱᒋᔭᐅᓂᕐᒥᒡᓗ. 38 ᐃᓕᖕᓄᑦ ᑐᓂᓯᓯᒪᖕᒪᑦ ᐃᓄᖕᓂᒃ ᐃᓅᔪᓂᒃ, ᐆᒪᔪᓂᒡᓗ ᓄᓇᒦᑦᑐᓂᒃ, ᑎᖕᒥᐊᓂᒡᓗ ᑎᖏᕙᒃᑐᓂᒃ, ᓇᓃᒃᑲᓗᐊᕐᐸᑕ ᐊᖓᔪᖅᑲᐅᕕᒋᕙᑎᑦ ᑕᒪᒃᑯᐊᓕᒫᑦ. ᐃᕝᕕᑦ ᑕᕝᕙ ᐃᓄᖑᐊᑉ ᓂᐊᖁᐊ ᒎᓗ. 39 ᑭᖑᓂᕐᓂ ᐊᖓᔪᖅᑲᐅᕕᒃ ᒪᑭᑦᓱᒫᕐᒪᑦ ᐃᕝᕕᑦ ᐊᖓᔪᖅᑲᐅᕕᖕᒐᓂᑦ ᓴᓐᖐᑦᑑᓂᕐᓴᖅ, ᓱᓕ ᐱᖓᔪᖓᑦ ᑭᖑᓂᒃᑲᓐᓂᕐᓂ, ᖃᑯᕐᓕᒃ, ᐊᖓᔪᖅᑳᕐᔪᐊᖑᔪᒫᕐᐳᖅ ᓄᓇᕐᔪᐊᓕᒫᒧᑦ. 40 ᑭᖑᓪᓕᕐᐹᒥᒃ, ᓯᑕᒪᖓᑦ ᐊᖓᔪᖅᑲᐅᕖᑦ ᓴᖅᑭᑦᓱᒫᕐᐳᖅ, ᓴᕕᕋᔭᒃᑎᑐᑦ ᓴᓐᖏᔫᑎᒋᓗᓂ, ᓴᕕᕋᔭᒃ ᓱᓇᑐᐃᓐᓇᕐᓂᒃ ᓱᕋᒃᓯᔪᓐᓇᕐᒪᑦ ᓯᖁᒥᑦᓯᔪᓐᓇᕐᓗᓂᓗ; ᑍᒫᒃ ᓴᕕᕋᔭᒃ ᓯᖁᑦᑎᕆᖕᒪᑦ, ᑍᒫᒃᑕᐅᖅ ᑖᓐᓇ ᐊᓯᒥᓂᒃ ᓯᖁᑦᑎᕆᔪᒫᕆᕗᖅ. 41 ᑕᑯᓚᐅᕋᕕᑦ ᐃᓄᓐᖑᐊᑉ ᐃᑎᒐᖏᑦ ᐃᓄᒐᓐᖑᐊᖏᓪᓗ ᒪᕐᕋᓕᐅᕐᑎᒧᑦ ᔭᕐᕋᓕᐊᕆᔭᐅᓯᒪᖕᒪᑕ ᐃᓚᖏᑦ ᓴᕕᕋᔭᐅᓪᓗᑎᒃ, ᑍᒫᒃᑕᐅᖅ ᑖᓐᓇ ᐊᖓᔪᖅᑲᐅᕕᒃ ᐊᕕᒃᑐᕈᒫᕐᐳᖅ; ᑭᓯᐊᓂᓕ ᐃᓚᖃᕈᒫᕐᐳᖅ ᓴᕕᕋᔭᐅᑉ ᓴᖏᓂᖓᓂᒃ, ᑍᒫᒃ ᑕᑯᓚᐅᕋᕕᐅᒃ ᓴᕕᕋᔭᒃ ᔭᕐᕋᕐᒥᒃ ᐃᓚᓯᒪᔪᖅ. 42 ᐃᓄᒐᓐᖑᐊᖏᑦ ᓴᓇᓯᒪᓚᐅᕐᒪᑕ ᐃᓚᖓ ᓴᕕᕋᔭᐅᓪᓗᓂ ᐃᓚᖓᓗ ᔭᕐᕋᐅᓪᓗᓂ, ᑍᒫᒃᑕᐅᖅ ᐊᖓᔪᖅᑲᐅᕕᒃ ᑖᓐᓇ ᐃᓚᖓ ᓴᓐᖏᔫᔪᒫᕐᐳᖅ ᐃᓚᖓ ᓯᖁᒥᓴᕅᑦᑑᓗᓂ. 43 ᑕᑯᓚᐅᕋᕕᐅᒃ ᓴᕕᕋᔭᒡᓗ ᔭᕐᕋᕐᓗ ᑲᑎᓯᒪᔫᒃ, ᑍᒫᒃᑕᐅᖅ ᐃᓄᐃᑦ ᑲᑎᑕᐹᖑᔪᒫᕐᐳᑦ ᐊᑕᐅᓯᓐᖑᕈᓐᓇᕋᑎᒃ, ᑍᒫᒃᑕᐅᖅ ᓴᕕᕋᔭᒡᓗ ᔭᕐᕋᕐᓗ ᑲᑎᔪᓐᓇᖏᒻᒪᑎᒃ. 44 ᑖᒃᑯᐊ ᐊᖓᔪᖅᑳᕐᔪᐊᑦ ᑭᖑᓕᕇᒃᑕᕐᓗᑎᒃ ᐊᖓᔪᖅᑲᐅᑎᓪᓗᒋᑦ, ᒎᑎ ᕿᓚᖕᒦᑦᑐᖅ ᐊᖓᔪᖅᑲᐅᕕᓕᐅᕈᒫᕆᕗᖅ ᓯᖁᒥᑕᐅᓂᐊᖏᑦᑐᒥᒃ, ᐃᓄᐃᓪᓗ ᐊᓯᖏᓐᓄᑦ ᐱᔭᐅᓂᐊᖏᑦᑐᒥᒃ. ᑖᓐᓇ ᓵᓚᖃᕈᒫᕐᐳᖅ ᐊᖓᔪᖅᑲᐅᕕᖕᓂᒃ ᐊᓯᒥᓂᒃ ᑖᒃᑯᓂᖓ ᐃᓱᓕᑎᓪᓗᒋᓪᓗ, ᐊᖓᔪᖅᑲᐅᕕᒡᓕ ᑖᓐᓇ ᐃᓱᓕᓐᓂᐊᓐᖏᓚᖅ ᐃᓱᖃᖏᑦᑐᒧᑦ. 45 ᑖᓐᓇ ᑕᕝᕙ ᐅᔭᕋᒃᔪᐊᑉ ᑐᑭᖓ, ᑕᑯᓚᐅᕐᑍᑦ ᐲᕐᑕᐅᔪᖅ ᖃᖅᑲᒥ ᐃᓅᑉ ᐊᒡᒐᖏᓐᓅᖏᑦᑐᖅ, ᓯᖁᒥᑦᓯᓚᐅᕐᑐᖅ ᓴᕕᕋᔭᖕᒥᒃ, ᖃᑯᕐᓕᕐᒥᒡᓗ, ᔭᕐᕋᕐᒥᒡᓗ, ᓯᐅᓪᕕᕆᒥᒡᓗ, ᒎᓗᒥᒡᓗ. ᒎᑎᓪᓚᕆᐊᓘᑉ ᐊᖓᔪᖅᑲᕐᔪᐊᖅ ᑕᑯᑎᓚᐅᕐᐹ ᓯᕗᓂᒃᓴᒥ ᐱᔪᒫᕐᑐᓂᒃ: ᓯᓐᓇᒃᑐᕆᔧᑦ ᓱᓕᔪᖅ ᑐᑭᖓᓗ ᐅᒃᐱᕆᔭᒃᓴᐅᓪᓗᓂ.” ᑖᓂᐊᓕᐅᑉ ᐊᑭᓕᕐᑕᐅᓂᖓ ᐊᖓᔪᖅᑳᕐᔪᐊᕐᒥᑦ 46 ᑕᕝᕙ ᐊᖓᔪᖅᑳᕐᔪᐊᖅ ᓂᐱᑯᓁᓴ ᑖᓂᐊᓕᐅᑉ ᓵᖓᓄᑦ ᐹᒻᒪᒃᐳᖅ, ᐅᐱᒋᔭᐅᖁᓪᓗᒍ ᐱᖁᔨᓪᓗᓂᓗ ᑐᓂᕐᕈᓯᕐᕕᐅᖁᓪᓗᒍ ᐃᓯᕐᓗᐊᕐᓂᑎᑦᓯᑦᔪᑎᒥᒃ ᑎᐱᑦᓯᐊᕆᒃᑐᒥᒃ. 47 ᐊᖓᔪᖅᑳᕐᔪᐊᕐᓗ ᐅᖃᕐᐳᖅ ᑖᓂᐊᓕᒧᑦ, “ᓱᓕᔪᒥᒃ ᒎᑏᑦ ᒎᑎᓄᑦ ᒎᑎᒋᔭᐅᕗᖅ, ᐊᑕᓂᐅᓪᓗᓂᓗ ᐊᖓᔪᖅᑳᕐᔪᐊᓄᑦ, ᓇᓗᓇᕐᑐᓂᒃ ᓴᖅᑭᑎᑦᓯᔪᓐᓇᕐᑐᖅ, ᖃᐅᔨᑦᔪᑎᒐ ᑕᕝᕙ ᓇᓗᓇᕐᑐᒥ ᑕᒪᑐᒥᖓ ᖃᐅᔨᑎᑕᐅᒐᕕᑦ.” 48 ᐊᖓᔪᖅᑳᕐᔪᐊᑉ ᑕᕝᕙ ᑖᓂᐊᓕ ᐃᓂᑖᕐᑎᑉᐹ ᐊᖓᔪᖅᑳᖁᑎᒥ ᐳᕐᑐᓂᕐᐹᖓᓐᓄᑦ, ᑐᓂᓯᕕᒋᓪᓗᒍᓗ ᐱᐅᔪᓂᒃ ᐱᖁᑎᓂᒃ ᐅᓄᕐᑐᓂᒃ. ᐊᖓᔪᖅᑳᓐᖑᕐᑎᓪᓗᒍᓗ ᐹᐱᓘᓂᓕᒫᒧᑦ, ᓯᓚᑐᔪᖁᑎᓕᒫᒥᓄᓪᓗ ᐊᖓᔪᖅᑳᓐᖑᕐᑎᑉᐹ. 49 ᑖᓂᐊᓕᐅᓪᓕ ᐱᖁᔨᓂᖓᓄᑦ, ᐊᖓᔪᖅᑳᕐᔪᐊᑉ ᓵᑐᕌᑭ, ᒥᓵᑭᓗ ᐊᐱᓐᑎᒎᓗ, ᑲᒪᔨᓐᖑᕐᑎᐰᑦ ᐹᐱᓘᓂᓕᒫᒧᑦ: ᑖᓂᐊᓕᓕ ᐊᖓᔪᖅᑳᕐᔪᐊᑉ ᐃᒡᓗᖓᓃᖏᓐᓇᓕᕐᐳᖅ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society