ᑖᓂᐊᓕᐅᑉ ᐊᒡᓚᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᑭᓱᑐᐃᓐᓁᑦ ᐃᓱᒃᓴᖓᑦ

¹ “ᑍᑦᓱᒪᓂ ᒤᑯ, ᐊᖓᔪᖅᑳᕐᔪᐊᑉ ᐊᖓᔪᖅᑳᖁᑎᖓ ᐃᓅᖃᑎᒌᓂᒃ ᓴᐳᑦᔨᔨ ᒪᑭᑦᓱᒫᕐᐳᖅ, ᐃᓗᖏᕐᑐᕐᓇᕐᑐᖃᕈᒫᕐᒪᑦ ᑍᒪᓐᖓᑦ ᐃᓴᕆᐊᓕᑎᑦ ᐱᒋᐊᕐᓂᖓᓐᓂᑦ ᐅᓪᓗᒥᒧᑦ ᑎᑭᓪᓗᒍ ᐱᓚᐅᕐᓯᒪᖏᑦᑐᒥᒃ. ᑭᓯᐊᓂᓕ ᐃᓅᖃᑎᒌᑦ ᓇᓪᓕᐊᑦ ᐊᑎᖃᕐᑐᑦ ᒪᒃᐱᕐᑐᕋᕐᓂ ᓴᐳᑎᔭᐅᔪᒫᕐᐳᑦ.

² ᐅᓄᕐᑐᕐᔪᐊᑦ ᓄᓇᐅᑉ ᐃᓗᐊᓂ ᓯᓂᒃᑐᑦ ᒪᑭᑦᓱᒫᕐᐳᑦ: ᐃᓚᖏᑦ ᐃᓅᓯᕐᒧᑦ ᐃᓱᖃᖏᑦᑐᒧᑦ, ᐃᓚᖏᓪᓗ ᑲᓐᖑᓇᕐᑐᒧᑦ ᑲᑉᐱᐊᓇᕐᑐᒧᑦ ᐃᓱᖃᖏᑦᑐᒧᑦ.

³ ᓯᓚᑐᔪᓪᓕ ᖃᐅᒪᔪᒫᕐᐳᑦ ᕿᓚᐅᑉ ᖃᐅᒪᓂᖓᑐᑦ, ᑕᓯᐅᕐᓯᓚᐅᕐᑐᓪᓗ ᐅᓄᕐᑐᓂᒃ ᐃᓗᐊᕐᑐᒧᑦ ᐅᓪᓗᕆᐊᑎᑐᑦ ᖃᐅᒪᔪᒫᕐᐳᑦ ᐃᓱᖃᖏᑦᑐᒧᑦ.

⁴ “ᐃᕝᕕᓪᓕ, ᑖᓂᐊᓖ, ᑎᑎᕋᕐᓯᒪᔪᑦ ᑖᒃᑯᐊ ᒪᑐᓕᒃᑭᑦ ᓇᕿᑦᔪᓯᕐᓗᒋᓪᓗ ᓱᓇᑐᐃᓐᓁᑦ ᐃᓱᓕᖅᑳᕐᑎᓐᓇᒋᑦ, ᐅᓄᕐᑐᑦ ᐊᕗᖓ ᒪᐅᖓᓗ ᐊᐅᓪᓚᕈᒫᕐᒪᑕ, ᐊᖏᓂᕐᓴᒥᒃ ᖃᐅᔨᒃᑲᓐᓂᕈᒪᓗᑎᒃ.”

⁵ ᑕᕝᕙ ᐅᕙᖓ ᑖᓂᐊᓕ, ᑕᑯᓕᕐᐳᖓ ᒪᕐᕉᖕᓂᒃ ᓇᖏᕐᑑᖕᓂᒃ, ᐂᑉᐸᖓ ᓇᖏᕐᑐᖅ ᑰᑉ ᓯᓈᓂ, ᐂᐸᖓᓗ ᑰᑉ ᐊᑭᐊᓂ.

⁶ ᐂᑉᐸᖓ ᐅᖃᕐᐳᖅ ᐊᖑᒻᒧᑦ ᖃᓪᓗᓈᕐᑕᓂᒃ ᐊᓐᓄᕌᓕᖕᒧᑦ, ᑖᓐᓇ ᑰᑉ ᐃᒪᖓᑕ ᖁᓛᓃᑦᑐᖅ, “ᖃᓄᖅ ᐊᑯᓂᐅᑎᒋᓂᐊᕐᐹ ᑕᒪᒃᑯᐊ ᑲᒪᓇᕐᑐᑦ ᓇᓪᓕᐅᑎᖅᑳᕐᑎᓇᒌᑦ?”

⁷ ᐊᖑᑎᐅᑉ ᖃᓪᓗᓈᕐᑕᓂᒃ ᐊᓐᓄᕌᓕᐅᑉ, ᑰᑉ ᖁᓛᓂ ᓇᖏᕐᑑᑉ, ᑕᓕᕐᐱᓂ ᐃᓴᒃᐹ ᓴᐅᒥᓂᓗ ᕿᓚᖕᒧᑦ ᐃᓴᓪᓗᒍ, ᑐᓴᕐᐸᕋᓗ ᐊᖏᕈᑎᒥᒃ ᐅᖃᕐᑐᖅ ᑖᓐᓇ ᐃᓅᑦᓮᓐᓇᕐᑐᖅ ᐃᓱᖃᖏᑦᑐᒧᑦ ᐊᖏᕈᑎᒋᓪᓗᒍ, ᐅᖃᕐᓗᓂ, “ᓇᓪᓕᐅᓐᓂᖅ ᓇᓪᓕᐅᓐᓂᒃᑲᓐᓂᕐᓗ ᓇᑉᐸᕐᓗ ᐊᓂᒍᕐᐸᑕ, ᐃᓄᐃᑦ ᐃᑦᔪᕐᓁᑦᑐᑦ ᐱᔪᓐᓇᕐᓂᖃᕐᕕᐅᓂᖏᑦ ᐃᓱᓕᑉᐸᑕ, ᑕᒪᒃᑯᐊ ᑕᕝᕙ ᓇᓪᓕᐅᑎᔭᕇᕈᒫᕐᐳᑦ.”

⁸ ᑐᓵᓚᐅᕐᐳᖓ ᑐᑭᓯᓇᖓᓗ, ᐊᐱᕆᓚᐅᕐᐳᖓ, “ᐊᑕᓂᕋ, ᑕᒪᒃᑯᐊ ᑭᖑᓂᖓᓂ ᖃᓄᐃᑦᓱᒫᕐᐹᑦ?”

⁹ ᑭᐅᕚᖓᓗ, “ᑖᓂᐊᓖ, ᐊᐅᓪᓚᓕᕆᑦ, ᐅᖃᐅᓰᑦ ᑕᒪᒃᑯᐊ ᒪᑐᓯᒪᖕᒪᑕ ᓇᕿᑦᔪᓯᕐᓯᒪᓪᓗᑎᒡᓗ ᑭᓯᐊᓂ ᐃᓱᐊᑕ ᓇᓪᓕᐅᑎᓂᖓ ᑎᑭᑉᐸᑦ.”

¹⁰ ᐅᓄᕐᑐᑦ ᓴᓗᒻᒪᕐᓴᕐᑕᐅᔪᒫᕐᐳᑦ, ᑕᕐᓴᖃᕈᓐᓁᕐᓗᑎᒡᓗ, ᓱᕉᓂᖏᑦ ᐲᔭᕐᑕᐅᓗᑎᒃ; ᐱᐅᖏᑦᑐᓕᔪᓪᓕ ᑍᒪᓐᖓᑦ ᐱᐅᖏᑦᑐᓖᓐᓇᕐᓂᐊᕐᐳᑦ, ᐱᐅᒋᑦᑐᓕᔪᑦ ᑐᑭᓯᔪᓐᓇᕐᓂᐊᓐᖏᓚᑦ, ᓯᓚᑐᔪᓪᓕ ᑐᑭᓯᓂᐊᕐᐳᑦ.

¹¹ ᑍᑦᓱᒪᓂ ᖃᐅᑕᒫᑦ ᐆᒪᔪᓂᒃ ᑐᓂᕐᕈᓯᖃᑦᑕᕐᓂᐅᑉ ᓄᖅᑲᕐᑎᑕᐅᓂᖓᓂᑦ, ᐃᑦᔪᕐᓇᕐᑐᐊᓘᓪᓗ ᐃᓕᔭᐅᓂᖓ ᓱᕈᕐᑎᑕᐅᓐᓇᕐᑑᑉ ᐊᑯᓐᓂᖓᓂ, ᐅᓪᓗᐃᑦ 1,290ᐅᕗᑦ.

¹² ᖁᕕᐊᓱᑦᓯᐊᕐᐳᑦ, ᐅᑕᖅᑭᔪᑦ ᑎᑭᐅᑎᔪᓪᓗ ᐅᓪᓗᐃᑦ 1,335 ᐃᓱᐊᓄᑦ.

¹³ ᐃᕝᕕᓪᓕ, ᐊᖏᕐᕋᓕᕆᑦ ᐃᓱᐊ ᐅᑕᖅᑭᓗᒍ ᑕᕾᕐᓯᕐᓗᑎᑦ, ᐅᓪᓗᐃᑦ ᐃᓱᓕᑉᐸᑕ ᒪᑭᑦᓱᒫᕋᕕᑦ ᓇᓚᐅᑦᑖᕈᑎᒃᑯᓪᓗ ᐱᑖᕆᔭᒃᓮᑦ ᐃᓕᖕᓄᑦ ᑐᓂᔭᐅᔪᒫᕐᐳᖅ.