ᑖᓂᐊᓕᐅᑉ ᐊᒡᓚᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᐄᑦᔨᑉᑎᒥ ᐊᖓᔪᖅᑲᐅᕕᒃ ᓯᕆᐊᒥᓗ ᐊᖓᔪᖅᑲᐅᕕᒃ

¹ ᐊᖓᔪᖅᑳᕐᔪᐊᑉ ᑍᕉᓯᐅᑉ ᒦᑎᒥᐅᑕᐅᑉ ᐊᖓᔪᖅᑲᐅᓂᖓᑕ ᐊᕐᕌᒍᑦ ᓯᕗᓪᓕᕐᐹᖓᓂ, ᒪᑭᒋᐊᓚᐅᕐᐳᖓ ᐃᑲᔪᕐᓯᕐᓗᒍᓗ ᓴᐳᑎᔪᒪᓪᓗᒍ.

² “ᒫᓐᓇᓕ ᐅᖃᐅᓯᕆᓂᐊᕐᑕᕋ ᐃᓕᖕᓄᑦ ᓱᓕᑦᓯᐊᕐᐳᖅ: ᐊᖓᔪᖅᑳᕐᔪᐊᑦ ᓱᓕ ᐱᖓᓱᑦ ᓴᖅᑭᑦᓱᒫᕐᐳᑦ ᐴᕐᓯᐊᒥ, ᓯᑕᒪᖓᓪᓗ ᓴᖅᑭᑦᓱᒫᕆᕗᖅ, ᑖᓐᓇ ᐊᔪᕐᓴᖏᓐᓂᕐᐹᖑᔪᒫᕐᐳᖅ ᐊᓯᓕᒫᒥᓂᑦ, ᐱᔪᓐᓇᕐᓂᖃᓕᕈᓂ ᐊᔪᕐᓴᖏᓐᓂᕐᒥᓄᑦ, ᑲᑐᑦᔨᓕᕐᑎᑦᓯᔪᒫᕐᐳᖅ, ᐊᑭᕋᕐᑐᓕᕐᓗᑎᒃ ᒍᕇᓯᐅᑉ ᐊᖓᔪᖅᑲᐅᕕᖓᓄᑦ.

³ “ᑕᕝᕙ ᐊᖓᔪᖅᑳᕐᔪᐊᖅ ᐱᔪᓐᓇᕐᓂᓕᒃ ᓴᖅᑭᑦᓱᒫᕆᕗᖅ, ᐊᐅᓚᑦᓯᔪᒫᕐᐳᕐᓗ ᐱᔪᓐᓇᕐᓂᕐᔪᐊᖃᕐᓗᓂ, ᖃᓄᐃᓕᐅᕈᒪᑦᔪᑎᓕᒫᒥᓂᒃ ᐱᓂᐊᕐᓂᖃᕐᓗᓂ.

⁴ ᓴᖅᑭᓯᒪᓕᕐᐸᑦ, ᐊᖓᔪᖅᑲᐅᕕᖓ ᐊᒡᒍᕈᒫᕐᐳᖅ, ᑐᓂᐅᖅᑲᐅᑕᐅᓗᓂᓗ ᕿᓚᐅᑉ ᐊᓄᕆᖏᓐᓄᑦ ᓯᑕᒪᓄᑦ; ᑭᖑᕚᖏᓐᓂᑦ ᑭᖑᕝᕕᕐᑕᐅᔪᒫᓐᖏᓚᖅ, ᐱᔪᓐᓇᕐᓂᕆᓚᐅᕐᑕᒥᑐᓪᓗ ᐱᔪᓐᓇᕐᑎᒋᔪᓐᓃᕐᓗᓂ, ᐊᖓᔪᖅᑲᐅᕕᖓ ᐊᒫᖏᓐᓂᑦ ᓄᓱᒃᑕᐅᔪᒫᕐᒪᑦ, ᑐᓂᔭᐅᓗᓂᓗ ᐊᓯᖏᓐᓄᑦ.

⁵ “ᐊᖓᔪᖅᑳᕐᔪᐊᖅ ᓯᕿᓂᐅᑉ ᓇᓛᓂᑦ ᐱᔪᖅ ᓴᓐᖏᔪᕐᔪᐊᖑᓕᕈᒫᕐᒪᑦ, ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖏᑦ ᑖᑦᓱᒪᓐᖓᑦ ᐊᔪᖏᓐᓂᕐᓴᒻᒪᕆᐅᓕᕈᒫᕐᐳᑦ, ᐊᖓᔪᖅᑲᐅᕕᓂᓗ ᐊᐅᓚᑎᑦᓱᒫᕐᐹ ᐱᔪᓐᓇᕐᓂᕐᔪᐊᖃᕐᓗᓂ.

⁶ ᐊᕐᕌᒍᐃᑦ ᑖᒃᑯᐊ ᐊᓂᒍᕐᐸᑕ, ᑖᒃᑯᐊ ᑲᑎᓗᑎᒃ ᑕᐱᕇᓕᕈᒫᕐᐳᑦ; ᐊᖓᔪᖅᑳᕐᔪᐊᑉ ᓯᕿᓂᐅᑉ ᓇᓛᓂᑦ ᐱᓯᒪᔫᑉ ᐸᓂᐊ ᐂᔪᒫᕐᐳᖅ ᐊᖓᔪᖅᑳᕐᔪᐊᒧᑦ ᐅᓐᓄᐊᑉ ᓇᓛᓂ ᐊᖓᔪᖅᑲᐅᔪᒧᑦ, ᑕᐱᕇᓕᕐᑎᑦᓯᓗᓂᓗ, ᑭᓯᐊᓂᓕ ᐱᔪᓐᓇᕐᓂᓂ ᐱᓯᒤᓐᓇᕈᒫᓐᖏᓛ, ᐊᖓᔪᖅᑳᕐᔪᐊᓪᓗ ᑖᑦᓱᒪ ᐱᔪᓐᓇᕐᓂᓂ ᐱᓯᒤᓐᓇᕈᒫᖏᓐᓂᕚ, ᐅᓪᓗᓂ ᑍᒃᑯᓇᓂ ᐊᖓᔪᖅᑳᔪᐊᑉ ᓯᕿᓂᐅᑉ ᓇᓛᓃᑦᑑᑉ ᐸᓂᐊ ᕿᑐᕐᖓᖓᓗ ᐊᑖᑕᖓᓗ ᐃᑲᔪᕐᑐᕐᑎᖓᓗ ᑖᒃᑯᐊ ᑐᖁᑕᐅᔪᒫᕐᐳᑦ.

⁷ ᐊᕐᓇᐅᑉ ᓇᖕᒥᓂᖅ ᐃᓚᖏᓐᓂᑦ ᒪᑭᑦᑐᖃᕈᒫᕐᐳᖅ ᑭᖑᕝᕕᕐᑕᐅᓗᓂᓗ, ᑖᑦᓱᒪ ᐊᖓᔪᖅᑳᕐᔪᐊᖅ ᐅᓐᓄᐊᑉ ᓇᓛᓂ ᓄᓇᖃᕐᑐᖅ ᐅᓇᑕᕆᐊᕐᑐᕈᒫᕐᐹ, ᐃᒡᓗᒐᓴᒡᔪᐊᖏᑕᓗ ᐊᕙᓗᕐᔪᐊᖓᓄᑦ ᐃᑎᕐᓗᓂ; ᐅᓇᑕᕈᒫᕐᐰᑦ ᓵᓚᒋᓗᒋᓪᓗ.

⁸ ᑖᑦᓱᒪ ᑎᒍᔪᒫᕐᐰᑦ ᒎᑎᓐᖑᐊᖏᑦ, ᐃᓄᓐᖑᐊᑦ ᓴᕕᕋᔧᑦ ᐱᖁᑎᖏᓪᓗ ᐊᑭᑐᔪᑦ ᓯᐅᓪᕕᕇᑦ, ᒎᓗᐃᓪᓗ ᐊᐅᓪᓚᕈᑎᓗᒋᑦ ᐄᑦᔨᑉᑎᒧᑦ, ᐊᕐᕌᒍᓂᒡᓗ ᐅᓄᕐᑐᓂᒃ ᐊᖓᔪᖅᑳᕐᔪᐊᖅ ᐅᓐᓄᐊᑉ ᓇᓛᓃᑦᑐᖅ ᑲᒪᒋᓐᖏᑬᓐᓇᕈᒫᕐᐹ.

⁹ ᐊᖓᔪᖅᑳᕐᔪᐊᖅ ᐅᓐᓄᐊᑉ ᓇᓛᓂᑦ ᐱᔪᖅ, ᐅᓇᑕᕆᐊᕈᒫᕐᐳᖅ ᐊᖓᔪᖅᑳᕐᔪᐊᒧᑦ ᓯᕿᓂᐅᑉ ᓇᓛᓂᑦᑐᒧᑦ, ᐅᑎᕈᒫᕆᕗᕐᓕ ᓄᓇᒥᓄᑦ.

¹⁰ “ᑖᑦᓱᒪᓕ ᐃᕐᓂᖏᑦ ᐸᕐᓇᓕᕈᒫᕆᕗᑦ ᐅᓇᑕᕐᑐᒃᓴᓂᒡᓗ ᐅᓄᕐᑐᕐᔪᐊᓂᒃ ᑲᑎᑦᓯᓗᑎᒃ, ᐃᖏᕐᕋᔪᒫᕐᐳᑦ ᐃᒪᕐᑐᑦ ᐊᑭᕋᕐᑐᕐᑕᐅᔪᓐᓇᖏᓪᓗᓂ ᐅᓕᒃᓯᕙᓪᓕᐊᔪᑎᑐᑦ, ᐅᓇᑕᕈᒫᕐᐳᓪᓗ ᓄᓇᓕᒃᔪᐊᖏᑦ ᑎᑭᐅᒪᓗᒋᑦ.

¹¹ ᑕᕝᕙ ᐊᖓᔪᖅᑳᕐᔪᐊᖅ ᓯᕿᓂᐅᑉ ᓇᓛᓃᑦᑐᖅ ᓄᓇᒥᓂᑦ ᐊᓂᔪᒫᕐᐳᖅ ᓂᓐᖓᐅᒪᓗᓂ, ᐅᓇᑕᓕᕐᓗᓂᓗ ᐊᖓᔪᖅᑳᕐᔪᐊᒧᑦ ᐅᓐᓄᐊᑉ ᓇᓛᓂᑦ ᐱᓯᒪᔪᒧᑦ, ᐅᓇᑕᕐᑐᒃᓴᕐᔪᐊᖁᑎᖃᕐᑐᒧᑦ, ᑭᓯᐊᓂᓕ ᓵᓚᒋᔪᒫᕐᐹ.

¹² ᐅᓇᑕᕐᑐᒃᓴᕐᔪᐊᓪᓕ ᐊᐅᓪᓚᕐᑎᑕᐅᒃᐸᑕ, ᐊᖓᔪᖅᑳᕐᔪᐊᖅ ᓯᕿᓂᐅᑉ ᓇᓛᓃᑦᑐᖅ ᐱᐅᔪᕆᓕᕈᒫᕐᐳᖅ ᑐᖁᕅᓗᓂᓗ ᑕᐅᓴᓐᑎᓂᒃ ᐅᓄᕐᑐᓂᒃ, ᓵᓚᖃᕐᓂᖓᓕ ᑲᔪᓯᔪᒫᓐᖏᓚᖅ.

¹³ “ᐊᖓᔪᖅᑳᕐᔪᐊᖅ ᐅᓐᓄᐊᑉ ᓇᓛᓂᑦ ᐱᓯᒪᔪᖅ, ᐅᓇᑕᕐᑐᒃᓴᓂᒃ ᐅᓄᕐᑐᕐᔪᐊᓂᒃ ᑲᑎᑎᑦᓯᒃᑲᓐᓂᕈᒫᕐᒪᑦ, ᓯᕗᓪᓕᕐᒥᑦ ᐅᓄᕐᓂᕐᓴᓂᒃ; ᐊᕐᕌᒍᑦ ᖃᑦᓯᑲᓪᓔᑦ ᐊᓂᒍᕐᐸᑕ, ᓱᕐᔪᓕᕈᒫᕆᕗᖅ ᐅᓇᑕᕐᑐᒃᓴᕐᔪᐊᖁᑎᖃᕐᓗᓂ ᐅᓇᑕᐅᑎᑦᓯᐊᕆᒃᑐᓂᒃ.

¹⁴ ᑍᑦᓱᒪᓂ ᐅᓄᕐᑐᑦ ᐊᑭᕋᕐᑐᕋᓱᐊᖃᑦᑕᕈᒫᕐᒪᑕ ᐊᖓᔪᖅᑳᕐᔪᐊᒥᒃ ᓯᕿᓂᐅᑉ ᓇᓛᓃᑦᑐᒥᒃ, ᐱᕋᔧᓪᓗ ᐃᕝᕕᑦ ᐃᓅᖃᑎᖕᓂᑦ ᐱᓯᒪᔪᑦ ᑕᑯᑎᑕᐅᓂᕐᒥᒃ ᓇᓪᓕᐅᑎᑎᑦᓯᓇᓱᐊᕈᒫᕆᕗᑦ, ᓵᓚᖃᕐᓂᐊᓐᖏᓚᓪᓕ.

¹⁵ ᐊᖓᔪᖅᑳᕐᔪᐊᖅ ᑕᕝᕙ ᐅᓐᓄᐊᑉ ᓇᓛᓂᑦ ᐱᔪᖅ ᑎᑭᑦᓱᒫᕆᕗᖅ, ᓯᕿᓂᐅᑉ ᓇᓛᓃᑦᑐᒧᑦ, ᐃᒡᓗᒐᓴᒡᔪᐊᑦ ᐊᕙᓗᓗᒋᑦ ᐅᓇᑕᕐᑐᒃᓴᖁᑎᒥᓂᒃ, ᐃᑎᕈᑎᒃᓴᒥᖕᓂᒡᓗ ᐊᕙᓗᕐᔪᐊᓄᑦ ᐋᖅᑭᒃᓱᐃᓗᑎᒃ, ᐃᒡᓗᒐᓴᒡᔪᐊᑦ ᓵᓚᐅᔪᒫᕐᐳᑦ, ᓯᕿᓂᐅᑉ ᓇᓛᓃᑦᑐᑦ ᐊᑭᒪᔪᓐᓁᓪᓕᔪᒫᕐᐳᑦ ᐱᔪᓐᓇᕐᓂᖃᕈᓐᓁᕐᓗᑎᒃ; ᐅᓇᑕᕐᑐᒃᓴᖁᑎᖏᑦ ᐊᔪᖏᓐᓂᕐᐹᑦ ᓄᑭᖃᕈᓐᓁᕈᒫᕐᐳᑦ ᐊᒡᓛᑦ.

¹⁶ ᓵᓚᖃᕐᑐᖅ ᖃᓄᐃᓕᐅᕈᒪᔭᒥᓂᒃ ᐃᓱᒪᕐᓱᑦᓯᐊᕈᒫᕐᐳᖅ; ᑭᐊᓘᓐᓃᑦ ᐊᑭᒪᔪᓐᓇᕈᒫᓐᖏᓛ, ᐃᓂᑖᕈᒫᕐᓗᓂᓗ ᓄᓇᒥ ᑕᑯᒥᓇᕐᑐᒥᒃ ᐊᑎᖃᕐᑐᒥ, ᐱᔪᓐᓇᕐᓂᖃᕐᓗᓂᓗ ᑖᒃᑯᐊ ᐃᒡᓗᒐᓮᑦ ᓯᖁᒥᑦᓱᓐᓇᕐᓗᒋᑦ ᐱᔪᒪᒍᓂ.

¹⁷ “ᐊᖓᔪᖅᑲᐅᕕᓕᒫᓂ ᐱᔪᓐᓇᕐᓂᕐᔪᐊᕐᑖᖁᒧᑦ, ᐊᖓᔪᖅᑳᕐᔪᐊᖅ ᓯᕿᓂᐅᑉ ᓇᓛᓂᒥᐅᑕᖅ ᑕᐱᕆᓕᕈᒫᕐᐹ; ᑐᓂᓯᕕᒋᓗᒍᓗ ᐸᓂᖕᒥᓂᒃ, ᐊᖓᔪᖅᑲᐅᕕᖓ ᓄᑭᖃᕈᓐᓁᖅᑯᓪᓗᒍ, ᐃᓱᒪᒋᔭᖓ ᑲᔪᓯᔪᒫᓐᖏᓚᖅ, ᐱᕙᓪᓕᕈᑎᒋᓇᒍᓘᓐᓃᑦ.

¹⁸ ᐃᒫᐅᑉ ᓯᓈᓃᑦᑐᓄᑦ ᓄᓇᓕᖕᓄᑦ ᓵᓐᖓᓕᕈᒫᕆᕗᖅ, ᐅᓄᕐᑐᓪᓗ ᐃᒪᐅᑉ ᓯᓈᓃᑦᑐᑦ ᓄᓇᓖᑦ ᐱᑖᕆᔪᒫᕐᐰᑦ, ᐊᖓᔪᖅᑳᖁᑎᖓᑕ ᕿᓂᕐᓂᖓ ᓄᓇᓖᑦ ᐊᓯᖏᓐᓄᑦ ᓄᖅᑲᕐᑎᑦᓱᒫᕐᐹ, ᐃᒻᒥᓄᓪᓗ ᓵᓐᖓᑎᓕᕐᓗᒍ.

¹⁹ ᑕᒪᑐᒪ ᑭᖑᓂᖓᒍᑦ, ᓄᓇᒥᓄᑦ ᐃᒡᓗᒐᓴᒡᔪᐊᖁᑎᒥᓄᑦ ᐅᑎᓕᕈᒫᕐᐳᖅ, ᐊᖅᑯᑎᒥᓂᓕ ᐅᕐᕈᔪᒫᕐᐳᖅ, ᑕᑯᔭᐅᒃᑲᓐᓂᕈᓐᓁᕐᓗᓂᓗ.

²⁰ “ᑭᖑᕝᕕᕐᑎᖓ ᑎᓕᓯᔪᒫᕐᐳᖅ ᐃᓄᐃᑦ ᑖᒃᓰᔭᕐᑎᓪᓗᒋᑦ, ᐊᖓᔪᖅᑲᐅᕕᖓᑕ ᑕᑯᒥᓇᕐᓂᐊᓗᐊᓄᑦ ᐊᑐᕐᑕᐅᓂᐊᕐᑐᓂᒃ, ᐊᑯᓂᐅᖏᑦᑐᕐᓕ ᑖᓐᓇ ᑐᖁᑕᐅᔪᒫᕐᐳᖅ, ᓂᓐᖓᐅᒪᓂᒃᑰᖏᑦᑐᖅ ᐅᓇᑕᕐᓂᒃᑰᖏᑦᑐᕐᓘᓐᓃᑦ.”

ᐱᐅᖏᑦᑐᐊᓗᒃ ᐊᖓᔪᖅᑳᕐᔪᐊᖅ

²¹ “ᑭᖑᕝᕕᕐᑕᐅᔪᒫᕐᐳᖅ ᐱᐅᖏᑦᑐᐊᓗᖕᒧᑦ, ᐊᖓᔪᖅᑳᕐᔪᐊᑎᑐᑦ ᐅᐱᒋᔭᐅᖏᑦᑐᒧᑦ, ᐊᖓᔪᖅᑲᐅᕕᒃ ᐅᓇᑕᕆᐊᕈᒫᕐᐹ, ᐃᓄᖏᑦ ᓵᓚᐅᓂᐊᕐᓂᕐᒥᒃ ᐃᓱᒪᖏᑦᓯᐊᕐᑎᓪᓗᒋᑦ, ᐅᐃᕕᕐᕆᒃᓯᓂᕐᒥᓄᑦ ᐊᖓᔪᖅᑲᐅᕕᒃ ᑎᒍᔪᒫᕐᐹ.

²² ᐅᓇᑕᕐᑐᒃᓴᒐᓴᒡᔪᐊᑦ ᓴᓂᕐᑕᐅᔪᑎᑐᑦ ᓵᓚᒋᔪᒫᕐᐰᑦ; ᐊᖓᔪᖅᑳᕐᔪᐊᒃᓴᕐᓗ ᐊᖏᖃᑎᒌᒍᑕᐅᓯᒪᔪᖅ ᑐᖁᓪᓗᒍ.

²³ ᐃᓅᖃᑎᒌᒡᔪᐊᓂᒃ ᐊᓯᖏᓐᓂᒃ ᐊᖏᖃᑎᒌᒍᑎᖃᖃᑦᑕᕈᒫᕐᐳᖅ, ᐅᐃᕕᕐᕆᒃᓯᓂᕐᒥᒍᑦ, ᓄᓇᓕᖁᑎᖏᑦ ᐃᓄᑭᑦᑑᒐᓗᐊᕐᓗᑎᒃ ᐱᔪᓐᓇᕐᓂᕐᔪᐊᖃᓕᕈᒫᕐᐳᑦ.

²⁴ ᓄᓇᐅᑉ ᐊᕕᒃᑐᕐᓯᒪᓂᖏᓐᓂ ᓄᓇᖃᕐᑐᑦ ᐊᔪᕐᓴᖏᓐᓂᕐᐹᑦ ᓵᓚᐅᓂᐊᕋᓱᒋᓐᖏᑎᓪᓗᒋᑦ, ᐅᓇᑕᕆᐊᖃᑦᑕᕈᒫᕐᐰᑦ, ᓵᓚᖃᕈᒫᕐᓗᓂᓗ, ᓯᕗᓕᖏᑕ ᓯᕗᓕᑐᖃᖏᑕᓘᓐᓃᑦ ᐱᓚᐅᕐᓯᒪᓐᖏᑕᖏᓐᓂᒃ ᓵᓚᖃᕈᒫᕐᐳᖅ, ᓵᓚᒃᓴᕈᑎᓂ ᐱᖁᑏᑦ, ᑮᓇᐅᔧᓪᓗ, ᐊᔪᕐᓴᖏᑦᔪᑎᒃᓮᓪᓗ ᓱᓇᑐᐃᓐᓁᑦ ᑐᓂᐅᖅᑲᕐᓗᒋᑦ ᒪᓕᒃᑎᒥᓄᑦ, ᐃᓱᒪᓕᐅᖃᑦᑕᕈᒫᕐᓗᓂᓗ ᓄᓇᓖᑦ ᐊᕙᓗᕐᔪᐊᖏᓐᓂᒃ ᓵᓚᖃᕈᑎᒃᓴᒥᓂᒃ ᐅᓇᑕᕐᓂᒃᑯᑦ, ᑭᓯᐊᓂ ᐱᕕᒃᓴᑭᑦᑑᔪᒫᕐᐳᖅ.

²⁵ “ᐅᓇᑕᕐᑐᒃᓴᖁᑎᖏᑦ ᐅᓄᕐᑐᐊᓘᓗᑎᒃ ᐱᔪᓐᓇᕐᓂᖃᕐᔪᐊᓕᕈᒫᕐᐳᖅ, ᓯᕘᕋᔪᓐᓃᕐᓗᓂᓗ ᐊᑭᕋᕐᑐᕆᐊᒃᓴᖅ ᓯᕿᓂᐅᑉ ᓇᓛᓂ ᐊᖓᔪᖅᑳᕐᔪᐊᒧᑦ, ᓯᕿᓂᐅᑉ ᓇᓛᓃᑦᑐᖅ ᐊᖓᔪᖅᑳᕐᔪᐊᖅ ᐅᓇᑕᕈᒫᕐᐳᖅ ᐅᓇᑕᕐᑐᒃᓴᒐᓴᖕᓂᒃ ᐱᔪᓐᓇᕐᑐᕐᔪᐊᓂᒃ, ᓇᖏᕈᓐᓇᕈᒫᓐᖏᓚᕐᓕ ᓵᓚᐅᓂᒃᓴᒧᑦ ᐋᖅᑭᒃᓲᑦᔭᐅᓯᒪᔪᒫᕋᒥ.

²⁶ ᐊᖓᔪᖅᑳᕐᔪᐊᑉ ᓂᕿᒃᓴᖏᓐᓂᒃ ᓂᕆᖃᑕᐅᕙᒃᑐᓂᑦ, ᑐᖁᑕᐅᔪᒫᕐᒪᑦ; ᐅᓇᑕᕐᑐᒃᓴᖁᑎᖏᓪᓗ ᐊᖑᐊᕐᑕᐅᔪᑎᑐᑦ ᓵᓚᐅᔪᒫᕐᐳᑦ, ᐅᓄᕐᑐᑦ ᑐᖁᑕᐅᓗᑎᒃ.

²⁷ ᑖᒃᑯᐊᒃ ᐊᖓᔪᖅᑳᕐᔪᐊᒃ ᒪᕐᕉᒃ, ᑕᒪᕐᒥᒃ ᐱᐅᖏᑦᑐᒥᒃ ᐆᒻᒪᑎᖃᕐᓗᑎᒃ, ᓂᕆᕕᖕᒥ ᐃᒃᓯᕙᖃᑎᒌᒍᒫᕐᐴᒃ ᓴᒡᓗᓂᕐᒥᒡᓗ ᐃᒻᒥᖕᓄᑦ ᓂᓪᓕᐊᖃᑎᒌᒡᓗᑎᒃ, ᓵᓚᒌᖃᑦᑕᐅᑎᔪᒫᓐᖏᓚᒃ ᐱᕕᒃᓴᖓᒃ ᓈᒻᒪᒃᓯᖏᒻᒪᑦ ᓱᓕ.

²⁸ ᐅᓐᓄᐊᑉ ᓇᓛᓂ ᐊᖓᔪᖅᑳᕐᔪᐊᖅ ᓄᓇᒥᓄᑦ ᐅᑎᕈᒫᕐᐳᖅ ᐊᔪᕐᓴᖏᑦᑐᕐᔪᐊᖑᓗᓂ, ᒎᑎᐅᓪᓗ ᐊᖏᖃᑎᒌᒍᑎᒋᓯᒪᓪᓗᒋᑦ ᐃᓄᖁᑎᖏᑦ ᐅᓇᖕᒥᔪᒫᕐᐰᑦ ᐆᒻᒪᑎᒥᓂ, ᐃᓱᒪᕐᓱᑦᓯᐊᕐᓗᓂ ᓱᒃᑯᔨᐊᖃᕈᒫᕐᐳᖅ, ᓄᓇᒥᓄᓪᓗ ᐅᑎᕈᒫᕐᐳᖅ.

²⁹ “ᐱᕕᒃᓴᖓ ᓈᒻᒪᒃᓯᒃᐸᑦ, ᓯᕿᓂᐅᑉ ᓇᓛᓃᑦᑐᓄᑦ ᐅᓇᑕᕆᐊᕈᒫᕆᕗᖅ, ᑭᓯᐊᓂᓕ ᓯᕗᓪᓕᕐᑐᑦ ᓵᓚᖃᕈᓯᕆᓚᐅᕐᑕᒥᑐᑦ ᑍᒤᑦᓱᓐᓃᕈᒫᕐᐳᖅ.

³⁰ ᐅᒥᐊᕐᔪᐊᑦ ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐱᔪᑦ ᐃᒪᐅᑉ ᓯᓈᓃᑦᑐᑦ ᑭᑎᒻᒥᑦ ᐊᑭᕋᕐᑐᕈᒫᕐᐳᑦ ᑖᑦᓱᒧᖓ, ᑕᕝᕙ ᑲᑉᐱᐊᓱᒻᒪᕆᓕᕈᒫᕐᐳᖅ, ᐅᑎᓕᕈᒫᕐᐳᕐᓗ, ᓂᓐᖓᐅᒪᓂᓂᓗ ᓵᑎᑦᓱᒫᕐᐹ ᐃᑦᔪᕐᓁᑦᑐᓄᑦ ᐊᖏᖃᑎᒌᒍᑕᐅᓯᒪᔪᓄᑦ. ᑭᖑᓂᖓᒍᑦ ᐅᑎᕈᒫᕐᐳᖅ ᐱᑦᓯᐊᕐᕕᒋᓕᕐᓗᒋᓪᓗ ᐃᑦᔪᕐᓁᑦᑐᒥᒃ ᐊᖏᖃᑎᒌᒍᑕᐅᓯᒪᔪᒥᒃ ᕿᒤᓯᒪᔪᑦ ᓈᓚᖔᓕᕐᓗᒋᑦ.

³¹ ᐅᓇᑕᕐᑐᒃᓴᕐᔪᐊᖁᑎᖏᑦ ᓱᕐᔪᒍᒫᕐᐳᑦ ᑐᒃᓯᐊᕐᕕᒡᔪᐊᑉ ᐊᕙᓗᕐᔪᐊᖓ ᐃᑦᔪᕐᓇᕐᓯᑎᓪᓗᒍ, ᓄᖅᑲᕐᑎᑦᓯᓗᑎᒡᓗ ᐆᒪᔪᓂᒃ ᖃᐅᑕᒫᑦ ᑐᓂᕐᕈᓯᖃᑦᑕᕐᓂᕐᒥᒃ; ᑕᕝᕙ ᐃᓕᓯᔪᒫᕐᐳᑦ ᐃᑦᔪᕐᓇᕐᑐᕐᔪᐊᒥᒃ ᑲᑉᐱᓇᕐᑐᕐᔪᐊᒥᒃ.

³² ᓯᓔᕐᕆᒃᓯᓂᕐᒥᒍᑦ ᓱᕈᕐᑎᑦᓯᔪᒫᕐᐳᖅ ᒎᑎᐅᑉ ᐊᖏᖃᑎᒌᒍᑎᖓᓂᒃ ᓈᓚᖏᑦᑐᓂᒃ, ᒎᑎᒥᒡᓕ ᖃᐅᔨᒪᔪᑦ ᑲᔪᓯᓪᓚᕆᒃᑐᒥᒃ ᐊᑭᕋᕐᑐᕈᒫᕐᐳᑦ ᑖᑦᓱᒥᖓ.

³³ ᑐᑭᓯᒪᑦᓯᐊᕐᑐᑦ ᐃᓕᓐᓂᐊᕐᑎᑦᓯᔪᒫᕐᐳᑦ ᑖᑦᓱᒪ ᐱᐅᓯᖓᓂᒃ, ᐅᓪᓗᓂᒃ ᐅᓄᕐᑐᓂᒃ ᓴᕕᒡᔪᐊᒧᑦ ᐃᓚᖏᑦ ᑐᖁᑕᐅᒐᓗᐊᕐᑎᓪᓗᒋᑦ, ᐃᑭᑕᐅᓗᑎᒡᓘᓐᓃᑦ, ᑎᒍᔭᐅᓗᑎᒡᓘᓐᓃᑦ, ᐱᖁᑍᕈᑦᔭᐅᓗᑎᒡᓘᓐᓃᑦ.

³⁴ ᑐᖁᑕᐅᔭᕌᖓᑕ, ᐃᑲᔪᕐᑎᒃᓴᖃᕈᒫᓐᖏᓚᑦ, ᐅᓄᕐᑐᐊᓗᐃᑦ ᓱᓕᓪᓚᕆᖏᑦᑐᑦ ᐅᐃᕕᕐᕆᔭᐅᓂᕐᒧᑦ ᓵᓚᐅᔪᒫᕐᐳᑦ.

³⁵ ᓯᓚᑐᔪᑦ ᐃᓚᖏᑦ ᑐᖁᑕᐅᔪᒫᕐᐳᑦ, ᑲᔪᓯᔪᑦ ᓴᓗᒻᒪᕐᓴᕐᑕᐅᑦᓯᐊᖁᓪᓗᒋᑦ, ᑕᕐᓴᖃᖏᑦᑐᑐᑦ ᐃᓱᐊᓄᑦ ᑎᑭᑦᓱᓐᓇᖁᓪᓗᒋᑦ, ᓂᕈᐊᕐᑕᐅᓯᒪᔪᖅ ᓇᓪᓕᐅᓐᓂᖅ ᑎᑭᑦᓱᒫᕐᒪᑦ.

³⁶ “ᐊᖓᔪᖅᑳᕐᔪᐊᖅ ᐱᓂᐊᕐᓂᖃᕈᒫᕐᐳᖅ ᖃᓄᑐᐃᓐᓇ ᐱᔪᒪᔭᒥᓂᒃ, ᐃᒻᒥᓂᒃ ᐊᖏᔪᕈᕐᑎᑦᓱᒫᕐᒪᑦ ᓂᕐᑐᕐᑕᐅᔪᒪᓗᓂᓗ ᒎᑎᓐᖑᐊᓕᒫᓂᑦ ᐊᖏᓂᕐᓴᐅᔪᒪᓗᓂ; ᑐᓴᕐᑕᐅᓚᐅᕐᓯᒪᖏᑦᑐᓂᒃ ᓂᓪᓕᐊᔪᒫᕐᐳᖅ ᒎᑎᒋᔭᐅᔪᓕᒫᓂᑦ ᒎᑎᐅᓂᕐᐹᖑᔪᒧᑦ, ᐱᓇᓱᐊᕈᒪᔭᓕᒫᒥᓂᒃ ᐊᒡᕕᐊᕐᑕᐅᖏᓪᓗᓂ ᐃᓱᒪᕐᓱᕈᒫᕐᐳᖅ ᓇᓪᓕᐅᓐᓂᖅ ᒎᑎᐅᑉ ᓂᓐᖓᐅᒪᓂᖓ ᐃᓱᓕᖅᑳᕐᑎᓐᓇᒍ, ᐋᖅᑭᒃᑕᐅᓯᒪᔪᑦ ᑲᔪᓯᔭᕆᐊᖃᕐᒪᑕ.

³⁷ ᓯᕗᓕᕕᓂᕐᒥ ᒎᑎᖏᓐᓂᒃ ᑲᒪᔪᒫᓐᖏᓚᖅ ᐊᕐᓇᓂᒃ ᐃᒃᓕᒍᖕᓂᖃᕈᒫᓐᖏᓚᖅ, ᒎᑎᒥᒡᓘᓐᓂᑦ ᓇᓪᓕᐊᓐᓂᒃ ᒎᑎᖃᕈᒫᓐᖏᓚᖅ, ᐃᒻᒥᓂᒃ ᐊᖏᓂᕐᓴᐅᑎᑦᓱᒫᕐᒪᑦ ᑕᒪᒃᑯᓇᓐᖓᓕᒫᖅ.

³⁸ ᑕᒪᒃᑯᐊ ᐊᓯᖏᑎᒍᑦ ᐅᐱᒍᓱᒍᒫᕐᐳᖅ ᒎᑎᓐᖑᐊᒥᒃ ᐃᒡᓗᒐᓴᒡᔪᐊᑦ ᐊᕙᓗᕐᔪᐊᖏᓐᓂ ᓴᐳᑦᔨᔪᒥᒃ; ᒎᑎ ᓯᕗᓕᕕᓂᖏᑕᓘᓐᓃᑦ ᖃᐅᔨᒪᓐᖏᑕᖓᑦ, ᐅᐱᒋᔪᒫᕐᐹ ᑐᓂᓯᕕᒋᕙᒡᓗᒍ ᒎᓗᒥᒃ, ᓯᐅᓪᕕᕆᒥᒡᓗ, ᐅᔭᕋᖕᓂᒡᓗ ᐱᓐᓇᕐᓇᕐᑐᓂᒃ, ᐱᖁᑎᓂᒡᓗ ᐊᑭᑐᔪᓂᒃ.

³⁹ ᐅᓇᑕᕆᐊᖃᑦᑕᕈᒫᕐᐳᖅ ᐃᒡᓗᒐᓴᒡᔪᐊᓂᒃ ᓴᐳᓐᓂᐊᕈᑎᒥᖕᓂᒃ ᐊᕙᓗᕐᔪᐊᓕᖕᓂᒃ, ᐃᑲᔪᕐᑎᖃᕐᓗᓂ ᒎᑎᓐᖑᐊᒥᓂᒃ ᐱᒋᓚᐅᕐᓯᒪᓐᖏᑕᒥᖕᓂᒃ, ᐊᖏᔪᒥᒃ ᐅᐱᒋᔪᒪᕐᐰᑦ ᑖᑦᓱᒥᖓ ᑲᒪᑦᓯᐊᕐᑐᑦ ᐅᖃᐅᓯᖃᑦᓯᐊᕐᑐᓪᓗ ᑖᑦᓱᒥᖓ, ᑍᒤᑦᑐᑦ ᐊᖓᔪᖅᑳᓐᖑᕐᑎᑦᓱᒫᕐᐰᑦ ᐃᓄᖕᓄᑦ ᐅᓄᕐᑐᓄᑦ ᓄᓇ ᓂᐅᕐᕈᑎᒋᔪᒫᕐᐹ ᐱᕚᓪᓕᕈᑎᒃᓴᒥᓄᑦ.

⁴⁰ “ᑍᑦᓱᒪ ᐃᓱᐊᓂ ᐊᖓᔪᖅᑳᕐᔪᐊᖅ ᓯᕿᓂᐅᑉ ᓇᓛᓂᑦ ᐱᔪᖅ ᐅᓇᑕᖃᑎᒋᔪᒫᕐᐹ, ᐊᖓᔪᖅᑳᕐᔪᐊᓪᓗ ᐅᓐᓄᐊᑉ ᓇᓛᓂᑦ ᐱᔫᑉ ᓱᕐᔪᒍᒫᕆᕚ ᕿᒧᒃᓯᐅᑎᑦ ᐃᑭᒪᕝᕕᖕᒥᒃ ᐅᓂᐊᕐᑐᑦ ᐊᑐᕐᓗᒋᑦ, ᐅᓇᑕᕐᑐᒃᓴᒐᓴᒃᔪᐊᖃᕐᓗᓂ, ᐅᒥᐊᕐᔪᐊᖁᑎᖏᓪᓗ ᐅᓄᕐᑐᑦ ᐊᑐᕐᓗᒋᑦ, ᓄᓇᓕᒡᔪᐊᑦ ᐅᓄᕐᑐᑦ ᐅᓇᑕᕈᒫᕐᐰᑦ ᐃᒪᕐᑐᑦ ᖄᒥᑦᑐᑐᑦ.

⁴¹ ᓄᓇ ᑕᑯᒥᓇᕐᑐᕐᔪᐊᖅ ᐅᓇᑕᕆᐊᕈᒫᕆᕚ ᐊᖏᔫᑎᕐᔪᐊᓂᒃ ᓄᓇᖃᕐᑐᑦ ᐅᓄᕐᑐᑦ ᓵᓚᒋᔪᒫᕐᐰᑦ, ᑭᓯᐊᓂ ᓄᓇᒥ ᐄᑐᒥ, ᒧᐊᐱᒥᓗ, ᐊᒧᓁᑎᒥᓗ ᐊᐅᓚᑦᓯᔩᑦ ᐊᓐᓇᒍᒫᕐᐳᑦ.

⁴² ᐊᖓᔪᖅᑲᐅᓂᖓ ᑎᑭᑦᓱᒫᕐᐳᖅ ᓄᓇᖃᑎᒌᒃᔪᐊᓄᑦ ᐅᓄᕐᑐᓄᑦ; ᐄᑦᔨᑉᑎ ᐊᓐᓇᒍᒫᖏᓐᓂᕗᖅ.

⁴³ ᐊᖓᔪᖅᑳᕐᔪᐊᖅ ᑖᓐᓇ ᐊᐅᓚᑦᓯᓕᕈᒫᕐᐳᖅ ᒎᓗᓂᒃ ᓯᐅᓪᕕᕆᓂᒡᓗ ᐄᑦᔨᑉᑎᒥᐅᓪᓗ ᐊᔪᕐᓴᖏᑦᔪᑎᓕᒫᖏᓐᓂᒃ; ᓕᐱᐊᓐᒥᐅᓪᓗ ᐃᑎᐅᐱᐊᒥᐅᓪᓗ ᓵᓚᐅᔪᒫᕆᕗᑦ.

⁴⁴ ᑐᓴᕐᑕᒥᓂᒃ ᐅᖃᐅᓯᕐᓂᒃ ᓯᕿᓂᐅᑉ ᓂᐱᕕᐊᑕ ᓇᓛᓂᑦ ᐱᔪᓂᒃ, ᐅᓐᓄᐊᓪᓗ ᓇᓛᓂᑦ ᐱᔪᓂᒃ ᐃᓱᒪᔮᕈᑎᖃᕈᒫᕐᐳᖅ, ᓱᕐᔪᒍᒫᕐᓗᓂᓗ ᓂᓐᖓᐅᒪᓗᓂ ᓯᖁᒥᑦᓯᔪᒪᓗᓂ ᓱᓇᐅᔪᓐᓃᕐᑎᑦᓯᔪᒪᓪᓗᓂᓗ ᐅᓄᕐᑐᓂᒃ.

⁴⁵ ᐊᖓᔪᖅᑳᕐᔪᐊᕐᓯᐅᑎᓂᒃ ᑐᐱᕐᓯᒪᔪᒫᕐᐳᖅ ᐃᒪᐅᓪᓗ ᖃᖅᑲᐅᓪᓗ ᐃᑦᔪᕐᓁᑦᑑᑉ ᐊᑯᓐᓂᖓᓂ. ᑕᕝᕙᓂᓕ ᑐᖁᔪᒫᕐᐳᖅ ᑭᓇᒧᓪᓘᓐᓃᑦ ᐃᑲᔪᕐᑕᐅᔪᓐᓇᖏᓪᓗᓂ.”