ᑯᓘᓯᐊᒥᐅᓄᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐊᖓᔪᖅᑳᖑᔪᓯ ᓂᐅᕕᐊᕆᓯᒪᓪᓗᒋᑦ ᐱᔨᒋᔭᓯ ᓈᒻᒪᒃᑐᒥᒃ ᐱᐅᔪᒥᒡᓗ ᐱᓂᐊᕐᕕᒋᓯᒋᒃ, ᖃᐅᔨᒪᓗᓯ ᐊᖓᔪᖅᑳᖃᕋᑦᓯᑦᑕᐅᖅ ᕿᓚᖕᒥ.

ᓱᓕ ᐊᑐᕐᑕᐅᔭᕆᐊᓖᑦ

² ᑐᒃᓯᐊᕐᓂᕐᒧᑦ ᑲᔪᓯᑦᓯᐊᕆᑦᓯ, ᖃᐅᔨᓴᑦᓯᐊᖃᑦᑕᕐᓗᓯ ᖁᔭᓕᖃᑦᑕᕐᓗᓯᓗ ᒎᑎᒧᑦ;

³ ᐅᕙᒍᓪᓗ ᑐᒃᓯᐅᔭᐅᖃᑦᑕᕐᑕ, ᒎᑎ ᐱᕕᒃᓴᒥᒃ ᐅᒃᑯᐃᕐᓯᖁᓪᓗᒍ, ᐅᖃᐅᓯᖃᕈᓐᓇᖁᓪᓗᑕ ᙭ᔅᑑᓯᐅᑉ ᓇᓗᓇᕐᓂᖓᓂᒃ, ᑕᒪᓐᓇ ᐱᑦᔪᑎᒋᓪᓗᒍ ᑎᒍᔭᐅᓯᒪᕕᖕᒦᓐᓇᒪ.

⁴ ᓇᓗᓁᕐᓯᑦᓯᐊᕈᓐᓇᖁᓪᓗᖓ, ᑍᒫᒃ ᐱᔪᒃᓴᐅᒐᒪ.

⁵ ᓯᓚᑐᔪᒥᒃ ᐱᓂᐊᕐᓂᖃᕆᑦᓯ ᐅᒃᐱᖏᑦᑐᓄᑦ; ᐱᕕᒃᓴᓯᓗ ᐊᑐᑦᓯᐊᖃᑦᑕᕐᓗᒍ.

⁶ ᐅᖃᐅᓯᕆᔭᓯ ᐱᔪᓐᓇᕐᑎᑦᓯᓂᕐᒥᒃ ᐃᓗᓕᖃᕐᑐᒃᓴᐅᕗᑦ ᑐᓴᕈᒥᓇᕐᓗᑎᒡᓗ ᑕᕆᐅᓕᕐᓯᒪᔪᑎᑐᑦ, ᑕᒤᓐᓄᑦ ᑭᐅᑦᔪᑎᒃᓴᖃᑦᓯᐊᖁᓪᓗᓯ.

ᑕᕝᕙᐅᕗᑏᕐᓃᑦ

⁷ ᑍᑭᑰᓯᐅᑉ ᐅᓂᒃᑲᐅᓯᕆᑦᓯᐊᕐᓂᐊᕐᐹᖓ ᐃᓕᑦᓯᓐᓄᑦ; ᑖᓐᓇ ᐅᒃᐱᕐᑑᖃᑎᒋᒐᑦᑎᒍ ᓇᒡᓕᖕᓇᕐᑐᖅ ᓱᖁᓯᔪᐃᑦᑑᓪᓗᓂᓗ ᐱᔨᑦᓯᕐᑎᐅᔪᖅ ᐱᔨᐅᖃᑎᒋᓪᓗᒍᓗ ᐊᑕᓂᕐᒥ.

⁸ ᑍᒤᒻᒪᑦ ᑖᓐᓇ ᑕᒪᑐᒥᖓ ᐱᑦᔪᑎᖃᕐᓗᖓ ᑎᓕᕙᕋ ᐃᓕᑦᓯᓐᓄᑦ, ᖃᓄᐃᓐᓂᑦᑎᓐᓂᒃ ᖃᐅᔨᑦᓯᐊᖁᓪᓗᓯ ᑖᑦᓱᒧᖓᓗ ᐱᕙᓪᓕᕐᑎᑕᐅᖁᓪᓗᓯ.

⁹ ᑖᓐᓇᓗ ᐃᓚᖃᕐᓂᐊᕐᐳᖅ ᐅᓂᓯᒪᓯᒥᒃ, ᓱᖁᓯᔪᐃᑦᑑᓪᓗᓂ ᐅᒃᐱᕐᑑᖃᑎᑦᑎᓐᓂᒃ ᓇᒡᓕᖕᓇᕐᑐᒥᒃ, ᐃᓕᑦᓯᓗ ᐃᓚᒋᒐᑦᓯᐅᒃ. ᑖᒃᑯᖕᓇᓐᖓᑦ ᐅᖃᐅᑦᔭᐅᑦᓯᐊᕈᒫᕐᐳᓯ ᒫᓂ ᖃᓄᐃᒻᒪᖔᑦᑕ.

¹⁰ ᑎᒍᔭᐅᓯᒪᖃᑎᒪ ᐊᕆᔅᑕᑰᓯᐅᑉ ᑕᕝᕙᐅᕗᑏᕐᐹᓯ, ᒫᑯᓯᐅᓪᓗ ᐸᕐᓇᐹᓯᐅᑉ ᑎᒥᒥᒍᑦ ᖃᑕᓐᖑᑎᖓᑕ. (ᑐᓴᕐᑎᑕᐅᔭᕇᕐᓯᒪᕗᓯ ᖃᓄᖅ ᐱᔭᕆᐊᖃᕐᒪᖔᑦᓯ ᑖᑦᓱᒧᖓ, ᑐᓐᖓᓱᒃᑎᑦᓱᒫᕐᐸᓯ ᐃᓕᑦᓯᓐᓄᑦ ᑎᑭᑉᐸᑦ.)

¹¹ ᔩᓱᓯᐅᓪᓗ ᔭᔅᑕᓯᒥᒃ ᑍᔭᐅᔫᑉ, ᑕᕝᕙᐅᕗᑏᕐᐹᓯ ᑖᒃᑯᐊᑐᐊᑦ ᔫᑎᐅᕗᑦ ᐱᓇᓱᐊᖃᑎᓐᓂ ᒎᑎᐅᑉ ᐊᑕᓂᐅᕕᖓᓄᑦ, ᐅᕙᓐᓂᒡᓗ ᐃᑲᔪᒻᒪᕆᒃᓯᒪᕗᑦ.

¹² ᐃᐸᐳᕌᓯᐅᑉ ᑕᕝᕙᐅᕗᑏᕆᕚᓯ, ᐃᓕᑦᓯᓐᓂᑦᑕᐅᖅ ᐱᓯᒪᔫᑉ, ᙭ᔅᑑᓯᐅᑉ ᔩᓱᓯᐅᑉ ᐱᔨᖓᑕ, ᑖᓐᓇ ᑍᒪᓐᖓᑦ ᐊᒃᓱᕈᕐᓗᓂ ᐃᓕᑦᓯᓐᓂᒃ ᑐᒃᓯᐅᑦᔨᖃᑦᑕᕐᐳᖅ, ᓇᖏᕈᓐᓇᕐᑎᑕᐅᖁᓪᓗᓯ ᐊᐅᓚᖏᓪᓗᓯ ᐱᕈᕇᑦᓯᐊᖁᓪᓗᓯᓗ ᖁᓚᕐᓂᖃᖏᑦᓯᐊᕐᓗᓯ ᒎᑎᐅᑉ ᐱᔪᒪᔭᖓᓂᒃ ᓈᓚᑦᓯᐊᕐᓗᓯ.

¹³ ᑖᓐᓇ ᓇᓗᓁᔭᕈᑎᒋᕙᕋ ᐃᓕᑦᓯᓐᓄᑦ ᐱᓇᓱᐊᕐᒪᑦ ᐊᒃᓱᕈᕐᓗᓂ ᓚᐅᑏᓯᐊᒦᑦᑐᓄᓪᓗ ᕼᐂᕋᐴᓕᓯᒦᑦᑐᓄᓪᓗ.

¹⁴ ᐃᓚᓐᓇᕆᔭᑦᑕ ᓘᑲᓯᐅᑉ ᐋᓐᓂᐊᓯᐅᕐᑎᒻᒪᕆᐅᔫᑉ ᑏᒪᓯᐅᓪᓗ ᑕᕝᕙᐅᕗᑏᕐᐹᓯ.

¹⁵ ᐅᒃᐱᕐᑑᖃᑎᒌᑦ ᓚᐅᑏᓯᐊᒥᐅᑦ ᑕᕝᕙᐅᕗᑏᕐᐸᕗᑦ, ᓂᒻᐸᓗ ᐅᒃᐱᕐᑑᖃᑎᒌᓪᓗ ᑖᑦᓱᒪ ᐊᕐᓇᐅᑉ ᓂᒻᐸᐅᑉ ᐃᒡᓗᖓᓂ ᑲᑎᒪᕙᒃᑐᑦ ᑕᕝᕙᐅᕗᑏᕐᐸᕗᑦ.

¹⁶ ᑖᒃᑯᐊ ᑎᑎᕋᕐᑕᕗᑦ ᐅᖃᓕᒫᕇᕈᑦᓯᐅᒃ, ᐅᖃᓕᒫᕐᑕᐅᑎᑦᓱᒫᕆᕙᓯ ᐅᒃᐱᕐᑑᖃᑎᒌᓄᑦ ᓚᐅᑏᓯᐊᒥᐅᓄᑦ. ᐃᓕᑦᓯᓗᑦᑕᐅᖅ ᑎᑎᖅᑲᑦ ᓚᐅᑏᓯᐊᒧᐊᕐᑐᑦ ᐅᖃᓕᒫᕈᒫᕆᕙᓯ.

¹⁷ ᐋᑭᐸᓯ ᐅᖃᐅᑎᓯᐅᒃ, “ᐱᔭᕇᑦᓯᐊᕋᓱᖕᓂᐊᕐᐸᑦ ᐱᓇᓱᐊᒐᒃᓴᖅ ᐱᔭᒃᓴᕐᑖᕆᓚᐅᕐᑍᑦ ᐊᑕᓂᕐᒥᑦ.”

¹⁸ ᐅᕙᖓ, ᐸᐅᓗᓯ ᓇᖕᒥᓂᖅ ᐅᓇ ᐊᒡᒐᓐᓄᑦ ᑎᑎᕋᕐᑕᕋ. ᑕᕝᕙᐅᕗᓯ ᐸᐅᓗᓯᒥᑦ. ᐊᑦᓱᖏᕐᑕᐅᓯᒪᓂᕋ ᐳᐃᒍᕐᑍᓕᓯᐅᒃ. ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᐃᓚᒋᓕᓯ.