ᐂᒨᓯᐅᑉ ᐊᒡᓚᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᑕᑯᑎᑕᐅᓂᖅ ᐃᕕᐅᔭᒥᒃ ᐸᐅᕐᖓᓂᒃ ᐃᓗᓕᓕᖕᒥᒃ

¹ ᐊᑕᓂᐅᑉ ᒎᑎᐅᑉ ᑕᑯᑎᓚᐅᕐᐹᖓ: ᑕᑯᒋᑦ, ᐃᕕᐅᔭᖅ ᐸᐅᕐᖓᓂᒃ ᐱᕈᕇᕐᓯᒪᔪᓂᒃ ᐃᓗᓕᓕᒃ.

² ᐅᖃᐅᑎᕚᖓᓗ, “ᐂᒨᓰ ᓱᓇᒥᒃ ᑕᑯᕖᑦ?” ᑭᐅᕙᕋᓗ, “ᐃᕕᐅᔭᕐᒥᒃ ᐸᐅᕐᖓᓂᒃ ᐱᕈᕇᕐᓯᒪᔪᓂᒃ ᐃᓗᓕᓕᖕᒥᒃ.” ᑕᕝᕙ ᐊᑕᓂᐅᑉ ᐅᖃᐅᑎᕚᖓ, “ᐃᓄᖁᑎᒪ ᐃᓴᕆᐊᓕᒥᐅᑦ ᐃᓱᓕᕝᕕᐊ ᓇᓪᓕᐅᑎᕗᖅ, ᖄᖏᑐᐃᓐᓇᕐᓂᐊᕈᓐᓃᕐᐸᒃᑲ.

³ ᑐᒃᓯᐊᕐᕕᒡᔪᐊᒥ ᐃᓐᖏᕐᓃᑦ, ᐅᓪᓗᒥ ᑍᑲᓂ ᕿᐊᓂᕐᔪᐊᓐᖑᕐᑎᑦᓱᒫᕐᐸᒃᑲ,” ᐊᑕᓂᖅ ᒎᑎ ᐅᖃᕐᐳᖅ, “ᑐᖁᖓᔪᑦ ᑎᒥᖏᑦ ᐅᓄᕐᑐᕐᔪᐊᖑᔪᒫᕐᐳᑦ. ᓇᓂᑐᐃᓐᓇᖅ ᐊᓂᐅᖃᕐᑕᐅᔪᒫᕐᐳᑦ ᓂᐰᑦᑑᓗᑎᒃ.”

ᐃᓴᕆᐊᓕᐅᑉ ᐊᓯᕈᕐᑕᐅᓂᖓ

⁴ ᑐᓴᕐᓯᐅᒃ ᐃᓕᑦᓯ ᓱᒃᑯᔨᐊᖃᕐᑐᓯ ᐊᔪᕐᓴᕐᑐᓂᒃ, ᓄᓇᖁᑎᑦᓯᓐᓂᓗ ᐊᒃᓗᔪᓂᒃ ᐊᔪᓕᕐᑎᑦᓯᔪᓯ.

⁵ ᐅᖃᕐᑐᓯᓗ, “ᖃᖓᓕ ᑕᖅᑭᓂᕋᑖᑉ ᓇᓪᓕᐅᓐᓂᕐᓯᐅᕐᑕᐅᓂᖓ ᐃᓱᓕᓐᓂᐊᕐᐹ? ᓂᐅᕐᕈᑎᖃᕈᒪᒐᑦᑕ ᓂᐊᖂᔭᒃᓴᓂᒃ, ᓴᐸᑎᓗ ᖃᖓ ᐃᓱᓕᓐᓂᐊᕐᐹ? ᓂᐅᕐᕈᑎᖃᕐᓂᐊᕋᑦᑕ ᐃᕕᖕᓂᒃ, ᐆᒃᑑᑏᑦ ᐅᕿᑦᑐᕐᓯᐅᑎᓕᐊᕆᓗᒋᑦ ᑮᓇᐅᔭᕐᑖᕐᓂᕐᓴᐅᖁᓪᓗᑕ, ᐅᖁᒤᓐᓂᕐᓯᐅᑏᓪᓗ ᐱᕋᔭᖕᓂᒃᑯᑦ ᐋᖅᑭᒃᓱᕐᓗᒋᑦ ᓴᒡᓗᕿᑦᓯᓂᐊᕋᑦᑕ ᓂᐅᕕᕐᐸᒃᑐᓂᒃ.

⁶ ᐊᒃᓗᔪᑦ ᓂᐅᕕᕐᓂᐊᕋᑦᑎᒍᑦ ᓯᐅᓪᕕᕆᒧᑦ, ᐊᔪᕐᓴᕐᑐᓪᓗ ᐃᓯᒐᒍᑏᖕᓄᑦ ᓂᐅᕕᐊᕆᓗᒋᑦ, ᓂᐊᖂᔭᒃᓴᓂᒡᓗ ᐱᐅᖏᑦᑐᓂᒃ ᓂᐅᕐᕈᑎᖃᕐᓂᐊᕋᑦᑕ.”

⁷ ᐊᑕᓂᖅ ᐊᖏᕈᑎᖃᒻᒪᕆᒃᐳᖅ ᔧᑰᑉ ᑭᖑᕚᖏᑕ ᐱᐅᔪᕆᓂᖓᓂᒃ, “ᓱᓕᓪᓚᕆᒃᓗᖓ ᐱᓂᐊᕐᓂᕆᓯᒪᔭᖏᑦ ᐳᐃᒍᕐᓂᐊᓐᖏᓚᒃᑲ.

⁸ ᓄᓇ ᑕᒪᑐᒧᖓ ᓴᔪᒃᐱᓪᓚᖕᓂᐊᓐᖏᓛᖅ? ᓄᓇᖃᕐᑐᓪᓗ ᑕᒫᓂ ᐅᒡᒍᐊᕐᓂᐊᓐᖏᓛᑦ? ᑰᒃᑎᑐᑦ ᓁᓕᑐᑦ ᖄᒥᑦᓱᒫᕐᐳᖅ, ᖃᑉᐳᑑᕐᓂᖓᓄᓪᓗ ᐃᖅᑲᑦᑕᕐᑕᐅᓚᐅᕐᓗᑎᒃ, ᑰᑭᒡᓕᖕᒥᓗᓂᓗ ᓁᓕᑐᑦ ᐄᑦᔨᑉᑎᐅᑉ ᑰᖓᑐᑦ.”

⁹ ᐊᑕᓂᖅ ᒎᑎ ᐅᖃᕐᐳᖅ, “ᐃᒤᑦᓱᒫᕐᐳᖅ ᐅᓪᓗᒥ ᑍᑲᓂ, ᓯᕿᓂᖅ ᓂᐱᑎᑦᓱᒫᕐᐸᕋ ᐅᓪᓘᑉ ᕿᑎᖓᓂ, ᓄᓇᕐᔪᐊᕐᓗ ᑖᕐᓯᑎᑦᓱᒫᕐᐸᕋ ᐅᓪᓘᑎᓪᓗᒍ.

¹⁰ ᓇᓪᓕᐅᓐᓂᕐᓯᐅᕐᕕᓯᓗ ᐅᒡᒍᐊᕐᓂᖑᕐᑎᑦᓱᒫᕐᐸᒃᑲ, ᐃᓐᖏᕐᓂᓯᓗ ᕿᐊᓂᓐᖑᕐᑎᑦᓱᒫᕐᐸᖅᑲ; ᓂᕈᒥᖏᑦᑐᓂᒃ ᐃᒃᐱᐊᕐᔪᒃᓴᔭᓂᒃ ᑕᒪᑦᓯ ᐊᓐᓄᕌᖃᕐᑎᑦᓱᒫᕐᐸᑦᓯ, ᓂᐊᖁᓯᓗ ᓄᔧᔭᕐᓯᒪᓕᕐᓗᑎᒃ; ᕿᒃᓵᒃᑎᑦᓱᒫᕐᐸᑦᓯᓗ ᐃᕐᓂᑐᐊᑦᓯᓐᓂᒃ ᑐᖁᔨᐊᖃᕐᑐᑎᑐᑦ, ᐅᓪᓗᖅ ᑍᓐᓇ ᖃᓯᓕᓇᕐᑐᑎᑐᑦ ᑍᒤᑦᓱᒫᕐᐳᖅ.”

¹¹ ᐊᑕᓂᖅ ᒎᑎ ᐅᖃᕐᐳᖅ, “ᑕᑯᒋᑦ ᐅᓪᓗᐃᑦ ᕾᕗᑦ, ᓄᓇᒥ ᑳᖕᓂᕐᔪᐊᖃᕐᑎᑦᓯᔪᒫᕐᐳᖓ, ᓂᕿᒥᒃ ᑳᖕᓂᕐᒨᖏᑦᑐᖅ, ᐃᒥᕐᒥᒃ ᐃᒥᕈᖕᓂᕐᒨᖏᑦᑐᕐᓘᓐᓃᑦ, ᐊᑕᓂᐅᓪᓕ ᐅᖃᐅᓯᖏᓐᓂᒃ ᑐᓴᕈᒪᓂᕐᒧᑦ.

¹² ᐃᖏᕐᕋᔪᒫᕐᐳᑦ ᐃᒪᕐᔪᐊᑉ ᑭᒡᓕᖓᓂᑦ ᐃᒪᕐᔪᐊᑉ ᑭᒡᓕᖓᓄᑦ, ᓯᕿᓂᐅᑉ ᑕᕐᕌᓂᑦ ᓯᕿᓂᐅᑉ ᓄᐃᓕᕐᕕᐊᓄᑦ, ᒫᓂ ᐊᕙᓂᓗ ᕿᓂᕈᒫᕐᐳᑦ ᐊᑕᓂᐅᑉ ᐅᖃᐅᓯᖓᓂᒃ, ᑭᓯᐊᓂᓕ ᓇᓂᓯᔪᒫᓐᖏᓚᑦ.

¹³ ᐅᓪᓗᒥ ᑍᑲᓂ ᐊᕐᓁᑦ ᐃᓂᖁᓇᕐᑐᑦ ᐅᐃᒡᒐᓱᐃᑦ ᐃᓅᓱᒃᑐᓪᓗ ᐊᖑᑏᑦ ᓄᑮᕈᑎᔪᒫᕐᐳᑦ ᐃᒥᕈᖕᓂᕐᒧᑦ.

¹⁴ ᐊᖏᕈᑎᓕᐅᕐᑐᓪᓗ ᓴᒥᐊᕆᐊᑉ ᒎᑎᓐᖑᐊᖓᒍᑦ ᐊᓯᒪᒃᑯᑦ, ᐃᒫᒃ ᐅᖃᕐᓗᑎᒃ, ‘ᑖᓐ ᑭᖑᕚᖏᑦ ᒎᑎᓯ ᐃᓅᖕᒪᑦ! ᐱᐊᕐᓯᐸᐅᓪᓗ ᒎᑎᖓ ᐃᓅᖕᒪᑦ!’ ᑖᒃᑯᐊ ᐅᕐᕈᔪᒫᕐᐳᑦ ᒪᑭᓐᓂᐊᕈᓐᓁᕐᓗᑎᒡᓗ.”