ᐂᒨᓯᐅᑉ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᒃᓕᕐᑕᐅᔮᕐᑐᓂᒃ ᑕᑯᑎᑕᐅᓂᖅ

¹ ᐊᑕᓂᐅᑉ ᒎᑎᐅᑉ ᑕᑯᑎᓚᐅᕐᐹᖓ; ᑕᑯᒋᑦ, ᐱᒡᓕᕐᑕᐅᔮᕐᑐᓂᒃ ᓴᖅᑭᑎᑦᓯᓚᐅᕐᐳᖅ ᐅᓄᕐᑐᕐᔪᐊᓂᒃ ᑲᑎᕐᓱᐃᕕᒃ ᓇᓪᓕᐅᑎᕋᑖᕐᑎᓪᓗᒍ ᐱᕈᕐᑐᑦ ᑭᖑᓪᓕᕐᐹᑦ ᐱᕈᕐᐸᓪᓕᐊᓕᕐᑎᓪᓗᒋᑦ, ᐊᖓᔪᖅᑳᕐᔪᐊᖅ ᑲᑎᕐᓱᐃᕋᑖᕐᑎᓪᓗᒍ ᐃᕕᖕᓂᒃ ᐆᒪᔪᐃᑦ ᓂᕿᒃᓴᖏᓐᓂᒃ.

² ᐱᒡᓕᕐᑕᐅᔮᕐᑐᑦ ᓄᖒᑦᓯᖕᒪᑕ ᐃᕕᖕᓂᒃ ᓄᓇᒦᑦᑐᓂᒃ, ᐅᖃᓚᐅᕐᐳᖓ; ᐊᑕᓃᖅ ᒎᑏᒃ ᕿᓄᕗᖓ ᐃᓱᒪᒋᔪᓐᓁᕐᕕᒋᒃᑭᑦ! ᔧᑰᑉ ᑭᖑᕚᖏᑦ ᐊᓐᓇᒍᓐᓇᖁᓪᓗᒋᑦ, ᒥᑭᔫᓗᐊᕐᒪᑕ.

³ ᑕᕝᕙ ᐊᑕᓂᐅᑉ ᐃᓱᒪᓂ ᑕᒪᑐᒧᖓ ᐊᓯᑦᔨᓚᐅᕐᐹ, ᐅᖃᕐᓗᓂ, “ᑍᒤᑦᑐᖃᕐᓂᐊᕈᓃᕐᐳᖅ,” ᐊᑕᓂᖅ ᐅᖃᕐᐳᖅ.

ᐃᑯᐊᓚᔪᒥᒃ ᑕᑯᑎᑕᐅᓂᖅ

⁴ ᐃᒫᒃ ᐊᑕᓂᐅᑉ ᒎᑎᐅᑉ ᑕᑯᑎᓚᐅᕐᐹᖓ: ᑕᑯᒋᑦ, ᐊᑕᓂᖅ ᒎᑎ ᐱᖁᔨᓚᐅᕐᐳᖅ ᐃᖅᑲᕐᑐᐃᓂᕐᒥᒃ ᐃᑯᒪᒧᑦ, ᑕᕆᐅᖅ ᐃᑎᔪᕐᔪᐊᖅ ᐃᑯᐊᓪᓚᓚᐅᕐᐹ ᓄᓇᓗ ᐃᑯᐊᓪᓚᖃᓯᐅᑎᓕᕐᓗᓂ.

⁵ ᐅᖃᓚᐅᕐᐳᖓᓗ, “ᐊᑕᓃᖅ ᒎᑏᒃ, ᕿᓄᕕᒋᕙᒋᑦ, ᓄᖅᑲᕆᑦ! ᔧᑰᑉ ᑭᖑᕚᖏᑦ ᐊᓐᓇᒍᓐᓇᖁᓪᓗᒋᑦ ᒥᑭᓗᐊᕐᒪᑕ!”

⁶ ᑕᕝᕙ ᐊᑕᓂᐅᑉ ᐃᓱᒪᓂ ᑕᒪᑐᒧᖓ ᐊᓯᑦᔨᓚᐅᕐᐹ, ᐅᖃᕐᓗᓂ, “ᑍᒤᑦᑐᖃᕐᓂᐊᕈᓃᕐᐳᖅ,” ᐊᑕᓂᖅ ᒎᑎ ᐅᖃᕐᐳᖅ.

ᑕᑯᑎᑕᐅᓂᖅ ᒪᑭᑎᑦᓯᑦᓯᐊᕈᑎᒥᒃ

⁷ ᐃᒫᒃ ᑕᑯᑎᓚᐅᕐᐹᖓ: ᑕᑯᒋᑦ, ᐊᑕᓂᖅ ᓇᖏᓚᐅᕐᐳᖅ ᐊᕙᓗᕐᔪᐊᑉ ᓴᓂᐊᓂ ᓇᐸᑦᓯᐊᕐᒪᖔᑦ ᖃᐅᔨᓴᐅᑎᒧᑦ ᓴᓇᔭᐅᓯᒪᔪᒥ, ᑎᒍᒥᐊᕐᓗᓂᓗ ᓇᐸᑦᓯᐊᕐᒪᖔᑦ ᖃᐅᔨᓴᐅᑎᒥᒃ.

⁸ ᐊᑕᓂᐅᓪᓗ ᐅᖃᐅᑎᓚᐅᕐᐹᖓ, “ᐂᒨᓰ, ᓱᓇᒥᒃ ᑕᑯᕖᑦ?” ᑭᐅᓚᐅᕐᐸᕋᓗ, “ᓇᐸᑦᓯᐊᕐᒪᖔᑦ ᖃᐅᔨᓴᐅᑎᒥᒃ.” ᑕᕝᕙ ᐊᑕᓂᐅᑉ ᐅᖃᐅᑎᕚᖓ: “ᑕᑯᒋᑦ, ᓇᐸᑦᓯᐊᕐᒪᖔᑦ ᖃᐅᔨᓴᐅᑎᒥᒃ ᐋᖅᑭᒃᓯᓂᐊᕐᐳᖓ ᐃᓄᖁᑎᒪ ᐃᓴᕆᐊᓕᒥᐅᑦ ᐊᑯᕐᖓᓐᓂ, ᖄᖏᑐᐃᓐᓇᕐᓂᐊᕈᓐᓃᕐᐸᒃᑲ.

⁹ ᐂᓴᑭᐅᑉ ᐳᕐᑐᔪᒦᑦᑐᑦ ᑐᒃᓯᐊᕐᕕᒋᕙᒃᑕᕕᓂᖏᑦ ᐃᓄᖃᕈᓐᓃᕈᒫᕐᐳᑦ, ᐃᓴᕆᐊᓕᐅᓪᓗ ᐃᑦᔪᕐᓁᑦᑐᕕᖁᑎᖏᑦ ᑕᒫᓃᕐᕆᓕᕈᒫᕐᐳᑦ, ᒪᑭᓐᓂᐊᕐᐳᖓᓗ ᓴᕕᒡᔪᐊᓕᔭᕐᓗᖓ ᔨᕈᐳᐊᒻ ᐊᖓᔪᖅᑲᐅᕕᖓ ᐅᓇᑕᕆᐊᕐᓗᒍ.”

ᐂᒨᓯᓗ ᐊᒪᓮᐊᓗ

¹⁰ ᐊᒪᔧᐊ ᐱᑎᓕᒥ ᑐᓂᕐᕈᓯᕐᑎᑦᓯᔨ ᑎᓕᓯᓚᐅᕐᐳᖅ ᐅᖃᕆᐊᕐᑐᕐᑎᑦᓯᓪᓗᓂ ᔨᕈᐳᐊᒻᒧᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐃᒫᒃ, “ᐂᒨᓯ ᐃᓱᒪᓕᐅᓕᕐᒪᑦ ᐊᑭᕋᕐᑐᕈᒪᓪᓗᓂ ᐃᓕᖕᓄᑦ ᐃᓴᕆᐊᓕᒥᐅᑎᒍᑦ, ᐅᖃᐅᓯᖏᓪᓗ ᐊᓯᕈᐃᓂᐊᕐᐳᑦ ᓄᓇᖁᑎᑦᑎᓐᓂᒃ.

¹¹ ᐂᒨᓯ ᐃᒫᒃ ᐅᖃᓚᐅᕐᒪᑦ, ‘ᔨᕈᐳᐊᒻ ᑐᖁᑕᐅᔪᒫᕐᐳᖅ ᓴᕕᒡᔪᐊᒧᑦ, ᐃᓴᕆᐊᓕᒥᐅᓪᓗ ᐊᐅᓪᓚᕈᑦᔭᐅᔪᒫᕐᐳᑦ ᑎᒍᔭᐅᓗᑎᒃ ᓄᓇᒥᖕᓂᑦ.’”

¹² ᐊᒪᔧᐊᓗ ᐅᖃᕐᐳᖅ ᐂᒨᓯᒧᑦ, “ᐊᐅᓪᓚᓕᕆᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ! ᕿᒫᓕᕆᑦ ᔫᑕᐅᑉ ᓄᓇᖓᓄᑦ, ᑍᑲᓂᓗ ᓂᕆᖃᑦᑕᕐᓗᑎᑦ ᓂᐊᖂᔭᒥᒃ, ᐅᖃᓪᓚᖃᑦᑕᕆᐊᕐᑐᓕᕆᑦ.

¹³ ᐅᖃᓪᓚᓚᐅᕐᓯᒪᓂᐊᕈᓐᓃᕐᐳᑎᑦ ᐱᑎᓕᒥ, ᐊᖓᔪᖅᑳᕐᔪᐊᑉ ᐃᑦᔪᕐᓁᑦᑐᕕᖁᑎᒋᖕᒪᒍ, ᑐᒃᓯᐊᕐᕕᒃᔪᐊᖃᕐᕕᐅᓪᓗᓂᓗ ᐊᖓᔪᖅᑳᕐᔪᐊᖃᕐᕕᖕᒥ.”

¹⁴ ᑕᕝᕙ ᐂᒨᓯᐅᑉ ᐊᒪᔧᐊ ᑭᐅᕚ ᐅᖃᐅᑎᓪᓗᒍ: “ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᒋᓐᖏᓛᖓ, ᐃᕐᓂᕆᔭᐅᓇᖓᓘᓐᓃᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ, ᓰᐱᓕᕆᔨᑐᐃᓐᓇᐅᕗᖓᓕ, ᓇᐹᕐᑐᒥᒃ ᓯᑲᒧᐊᕆᒥᒃ ᐸᐅᕐᖓᖏᓐᓂᒡᓗ ᑲᒪᔨᑐᐃᓐᓇᐅᕗᖓ.

¹⁵ ᐊᑕᓂᐅᑉ ᕾᖁᓚᐅᕐᐹᖓ ᓰᐱᓕᕆᔨᐅᑎᓪᓗᖓ, ᐊᑕᓂᐅᓪᓗ ᐅᖃᐅᑎᕚᖓ, ‘ᐅᖃᓪᓚᒋᐊᕐᑐᕆᑦ ᐃᓄᖁᑎᓐᓄᑦ ᐃᓴᕆᐊᓕᐅᒥᐅᓄᑦ.’

¹⁶ ᑍᒤᒻᒪᑦ ᒫᓐᓇ ᐊᑕᓂᐅᑉ ᐅᖃᐅᓯᖏᓐᓂᒃ ᑐᓴᓕᕆᑦ; ᐃᕝᕕᓪᓕ ᐅᖃᕐᐳᑎᑦ, ‘ᐅᖃᓪᓚᖕᓂᐊᕐᓇᒃ ᐊᑭᕋᕐᑐᕐᓗᑎᑦ ᐃᓴᕆᐊᓕᒥᐅᓂᒃ, ᐊᔪᕆᕐᑐᐃᑦᑍᓕᓗᑎᓪᓗ ᐂᓴᑭᐅᑉ ᑭᖑᕚᖏᓐᓄᑦ.’

¹⁷ ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ: ‘ᓄᓕᐊᑦ ᐊᖑᑎᓄᑦ ᐊᑐᒐᐅᓂᐊᓕᕐᐳᖅ ᐃᒡᓗᒐᓴᖕᓂ, ᐃᕐᓂᑎᓪᓗ ᐸᓂᑎᓪᓗ ᑐᖁᑕᐅᔪᒫᕐᐳᑦ ᓴᕕᒡᔪᐊᒧᑦ, ᓄᓇᖁᑏᑦ ᐊᕕᒃᑐᕐᑕᐅᔪᒫᕐᐳᖅ ᐆᒃᑐᕋᐅᑏᑦ ᐊᑐᕐᓗᒋᑦ; ᑐᖁᑕᐅᔪᒫᕐᐳᑎᓪᓗ ᓄᓇᒥ ᐃᑦᔪᕐᓇᕐᓂᕋᕐᑕᐅᔪᒥ, ᐃᓴᕆᐊᓕᒥᐅᓪᓗ ᐊᐅᓪᓚᕈᑦᔭᐅᓪᓚᕆᒍᒫᕐᐳᑦ ᑎᒍᔭᐅᓗᑎᒃ ᓄᓇᒥᖕᓂᑦ.’”